Mokanda ya Yuda

1 Yuda, moombo ya Yesu Kristo mpe ndeko ya Yakobo,+ epai ya bato oyo babengami,+ oyo Nzambe Tata alingaka, mpe oyo babatelami mpo na Yesu Kristo:+

2 Tiká ete motema mawa, kimya mpe bolingo ebakisama epai na bino.

3 Bandeko ya bolingo, atako nazalaki kosala nyonso nakomela bino mpo na lobiko oyo biso nyonso tozali na yango,+ namoni ete esengeli nakomela bino mpo na kolendisa bino ete bóbunda etumba makasi mpo na kondima+ oyo epesamaki na basantu mbala moko mpo na libela. 4 Nasali bongo mpo bato mosusu, oyo Makomami emonisá banda kalakala ete bakozwa etumbu,* bamikɔtisi na kati na bino; bazali bato oyo batyolaka Nzambe, oyo bakómisi boboto monene ya Nzambe na biso eloko oyo ezali kopesa nzela ya kozala na etamboli ya nsɔni na nko,*+ mpe bawanganaka mokonzi mpe Nkolo na biso kaka moko, Yesu Kristo.+

5 Atako boyebi malamu makambo nyonso wana, nalingi kokundwela bino ete Yehova,* ntango abikisaki bato ya ekólo moko uta na mokili ya Ezipito,+ na nsima abomaki baoyo bamonisaki kondima te.+ 6 Mpe baanzelu oyo babatelaki te bisika na bango ya ebandeli, kasi basundolaki esika na bango moko ya kofanda,+ akangi bango na minyɔlɔlɔ ya seko na kati ya molili makasi mpo na lisambisi ya mokolo yango monene.+ 7 Ndenge moko mpe, Sodoma ná Gomora ná bingumba ya pembenipembeni na yango, oyo bamipesaki na pite* na ndenge ya nsɔmɔ mpe balukaki kokokisa bamposa ya nzoto na ndenge oyo ebongisamá te,+ bazwaki lisambisi ya etumbu ya mɔtɔ ya seko; na bongo batyami liboso na biso lokola ndakisa ya kokebisa.+

8 Atako bongo, bato wana mpe bamipesi na bandɔtɔ, bakómisaka nzoto mbindo, batyolaka bokonzi mpe balobaka mabe mpo na bato ya nkembo.+ 9 Nzokande, ntango Mikaele+ anzelu-mokonzi+ azwanaki matata ná Zabolo mpe azalaki kotya ntembe mpo na nzoto ya Moize,+ amekaki te kokatela ye etumbu mpe koloba na maloba ya kofinga,+ kasi alobaki: “Tiká Yehova* apamela yo.”+ 10 Kasi, bato yango bazali koloba mabe mpo na makambo nyonso, nzokande bazali kokanga ntina na yango te.+ Mpe makambo nyonso oyo bazali kokanga ntina na yango na mayele ya lɔɔmbi lokola banyama ezangá mayele,+ bazali kokoba kosala yango mpe komibebisa.

11 Mawa na bango! Mpo balandi nzela ya Kaina;+ mpo na koluka lifuti, bamikɔtisi mbangu na nzela oyo ememaki Balaama na libunga;+ mpe bakufi mpo na maloba ya botomboki,+ lokola Kora!+ 12 Bango bazali mabanga oyo ebombaná na nse ya mai na bafɛti na bino ya bolingo,+ wana bazali kolya elongo na bino; babateli ya mpate oyo bamileisaka kozanga kobanga;+ mapata ezangá mbula oyo mopɛpɛ ezali komema epai na epai;+ banzete na nsuka ya eleko ya otɔnɛ oyo eboti mbuma te, oyo ekufi mbala mibale* mpe epikolami; 13 bambonge ya mbu oyo etomboki, oyo ezali kobimisa nsɔni na yango lokola fulufulu;+ minzoto oyo ezangá nzela ya sikisiki, oyo babombelá yango molili oyo eleki makasi libela na libela.+

14 Ɛɛ, Enoka,+ moto ya molɔngɔ ya nsambo banda na Adama, ye mpe asakolaki mpo na bango ntango alobaki ete: “Talá! Yehova* ayei ná bamiriade* na ye basantu,+ 15 mpo na kopesa bato nyonso etumbu,+ mpe kokweisa na likambo bato nyonso oyo batyolaka Nzambe mpo na misala na bango ya mabe oyo basalaki na ndenge ya kotyola Nzambe, mpe mpo na makambo nyonso ya kozokisa oyo basumuki oyo batyolaka Nzambe balobaki mpo na ye.”+

16 Bato yango baimaimaka,+ bamilelalelaka mpo na bomoi na bango mpe balandaka bamposa na bango moko,+ mpe balobaka makambo minene mpo na komikumisa, wana bazali kolɛngola basusu* mpo na matomba na bango moko.+

17 Kasi bino, bandeko ya bolingo, bókanisa lisusu makambo oyo bantoma ya Nkolo na biso Yesu Kristo balobaki liboso;* 18 bazalaki koloba na bino boye: “Na ntango ya nsuka ekozala na batyoli, oyo bakoluka kokokisa bamposa na bango moko ya makambo ya mabe.”*+ 19 Bango bakɔtisaka bokabwani,+ basalaka makambo lokola banyama,* bazangá elimo. 20 Kasi bino, bandeko ya bolingo, bómitonga likoló ya moboko ya kondima na bino oyo eleki mosantu, mpe bóbondela na elimo santu,+ 21 mpo bótikala na kati ya bolingo ya Nzambe,+ wana bozali kozela motema mawa ya Nkolo na biso Yesu Kristo oyo ezali komema na bomoi ya seko.+ 22 Lisusu, bókoba komonisa motema mawa+ epai ya baoyo bazali na bantembe;+ 23 bóbimisa bango+ na mɔtɔ mpo na kobikisa bango. Kasi bókoba komonisela basusu motema mawa, bósala yango na ekɛngɛ, wana bozali koyina ata elamba oyo ezwi litɔnɔ na misala ya nzoto.+

24 Nzokande, epai na ye oyo akoki kobatela bino mpo bóbɛta libaku te mpe akoki kosalisa bino bótɛlɛma kozanga litɔnɔ+ liboso ya nkembo na ye* na esengo monene, 25 epai na Nzambe kaka moko Mobikisi na biso na nzela ya Yesu Kristo Nkolo na biso, nkembo, bonene, nguya, mpe bokonzi ezala, uta na bileko nyonso ya seko mpe sikoyo mpe mpo na seko na seko. Amen.