Masoló ya Basakoli na Bokonzi

“Nkombo ya Yehova ezali ndako makasi”

TOZALI kobika na ntango ya mobulu. Bomoi na biso oyo ezali komonana lokola ete ezali na kimya ekoki kobongwana na mbala moko, mpe kozanga komizela na yango, basusu bamimonaki bango moko kati na likámá monene liboso ete bayeba yango. Makámá makoki kouta na mbongwana na makambo ya politiki, na moto na mobulu, na likámá liuti na biloko bizalisami, to na bokono moko makasi. Mokakatano ezala ya lolenge nini, epai wapi moklisto asengeli komibalola ntango bomoi na ye etyami na likámá?

David, misionere moko oyo afandi na moko ya ba filiales ya la Société Watch Tower, azwaki eyano na motuna wana longwa na likambo moko ya nsomo oyo akutanaki na yango. Lokola azalaki mokumbi motuka, abimaki na ntɔ́ngɔ́ntɔ́ngɔ́ mpo na kokende kokamata basáli mosusu ya Betele (ya bolingo malamu oyo bafandaka kati na filiale te). Molili ezalaki naino. Akamataki Rosalía mpe alekaki biro moko ya bapolisi ntango ayokaki lokito ya liboso ya mindóki.

Na nsima makambo mabimaki nokinoki. Ayokaki lokito lokola ya litumbú na mɔ́tɔ mpe ayaki kokanga ntina ete ezalaki pinɛ́ moko ya zípe nde ezalaki kokita mopepe. Na mbala moko amonaki sodá moko oyo atelemaki katikati na nzela kolakisáká ye mondóki. Makambo misato mabimaki na mbala moko: kobeta masasi na mopanzi ya zípe, kopanza batalatala ya motuka; David mpe Rosalía bangunzamaki; sodá abetaki masasi na talatala oyo ezalaka liboso ya motuka pembeni na miso.

Lokola zípe ezalaki kozwa masasi mbala na mbala, David asalaki nyonso ekokaki mpo ete atelemisa motuka wana azalaki sé ya kongunzama. David mpe Rosalía bakanisaki ete bakokufa. Babondelaki Yehova na mongongo makasi, kosengáká ye ete abatela bango. Na nsima, Rosalía alobaki ete na bantango wana amitunaki soki mayoki ya libota na ye makozala nini na ntango bakoyoka ete akufi!

Bazali naino na bomoi!

Lokito ya masasi mpe kopaswama ya talatala esilaki, mpe David atalaki Rosalía. Ntango amonaki mwa makila zingazinga na mokongo na ye, abangaki mingi. Ezalaki eteni ya talatala oyo epaswanaki nde ekotelaki ye kasi lisasi te. Mabolongo na ye mazokaki na biteni ya talatala oyo ezalaki kokwea, kasi longola yango, amonanaki ete azalaki na ye malamu.

Bato oyo balataki bilamba ya basodá, oyo bakangaki eteni ya elamba ya mpembe na maboko na bango bapusanaki penepene na zípe mpe basengaki na bango ete babima mpe batombola maboko likoló. Moko, oyo amonanaki ete akoki kozala mokonzi, abalukaki epai ya sodá moko mpe alobaki ete: “Bayebisaki bino ete bóbeta basivili masasi te.” Sodá yango amekaki komilóngisa na kondimáká ete ayokaki lokito ya masasi mpe akanisaki ete ezalaki kouta na zípe.

Wana David amonisaki ete Rosalía mpe ye moko bazalaki Batatoli ya Yehova, bayokelaki bango mawa. Alimbolaki mosala nini azalaki kosala, kasi ata bongo basodá balingaki sé kokanga bango. Na ndenge emonanaki, na bangonga ya ntɔ́ngɔ́, ndambo ya basodá balingaki kokweisa bokonzi, mpe basodá bazalaki komibongisa mpo na kokamata biro ya bapolisi na ntango oyo David mpe Rosalía bazalaki koleka na zípe.

Rosalía atungisamaki mingi kasi na mpiko nyonso akitisaki motema wana David azalaki kobondela basodá na etingya nyonso ete batika bango. Na nsuka bapesaki bango nzela ete bakende​—kozanga zípe. Basengelaki kotambola kino balabála oyo ezalaki penepene mpe bamataki na motuka oyo ememaki bango na filiale, epai bamemaki Rosalía na lopitalo mpo na kosalisama.

Nguya ya libondeli

David azwaki liteya na likambo oyo bakutanaki na yango​—tokoki kotala mpamba te nguya ya libondeli oyo liuti na motema, mpe tosengeli te kobosana ete komonisa na mpiko nyonso ete tozali Batatoli ya Yehova mbala mingi ezalaka libateli. Ezali mpenza solo ete: “Nkombo ya Yehova ezali ndako makasi. Kati na yango moyengebene azali kokima mpe azali kozwa libateli.”​—Masese 15:29; 18:10, NW; Bafilipi 4:6.

[Maloba mpo na kolimbola eutelo ya bafɔtɔ na lokasa 19]

Fotografia de Publicaciones Capriles, Caracas, Venezuela