Masoló ya Basakoli ya Bokonzi

Yehova azali na makasi koleka banguna na ye

UTA kala, Zábolo mpe bademó na ye bazali komeka kotɛmɛla mosala ya kosakola nsango malamu na nzela ya mangomba ya lokuta mpe na misala ya bilimu mabe. Biblia elobeli makanisi mabe ya Satana na 2 Bakɔlinti 4:4 epai elobami ete “njambe na mokili oyo ajimisi miso na makanisi na bango baboyi kondima ete bamɔna pole na Nsango Malamu na nkɛmbɔ na Klisto tɛ. Ye ajali elilingi na Njambe.”

Kasi Yehova Nzambe azali na makasi koleka Satana. Ezali na eloko moko te oyo banguna na Yehova bakoki kosala mpo na kopekisa kokokisama ya mokano na ye, oyo ezali ete “lolenge nyonso na bato basengeli kobika mpe bakóma na boyebi ya sikisiki ya solo.” (1 Timoté 2:4, NW) Balapólo elandi oyo euti na basakoli ya Bokonzi na Australie emonisi yango polele.

◻ Nsima ya kokabwana na lingomba na boumeli ya mbula 20, mwasi moko abandaki kotánga lisusu Biblia. Bosepeli wana ya sika mpo na Biblia epusaki ye na kozala na mituna mingi; na yango abondelaki Nzambe ete asalisa ye na kozwa biyano. Azalaki na mposa ya koluka solo, kasi ayebaki ete kozonga lisusu na lingomba na ye ya kala, esengelaki te kokokisa mposa na ye. Nzokande, abandaki kolukaluka na kotaláká bisika batɛkisaka mikanda oyo bato mosusu basilá kosalela yango mpe kotunáká soki bazalaki na babúku oyo elobelaka makambo ya mangomba.

Mokóló magazini moko epai batɛkisaka mikanda yango amikundolaki ete azalaki na búku moko oyo elobelaka makambo ya Nzambe, ezalaki kati na magazini te, kasi na ndako na ye. Motó na likambo ya búku yango ezalaki Okoki kozala na bomoi ya seko na mabele oyo ekobongwana paradis, ebimisami na Batatoli ya Yehova. Mwasi yango atángaki búku wana na mposa makasi mpe azwaki biyano na mituna na ye mingi ya Biblia. Nsima na koluka Batatoli ya Yehova na nzela ya búku oyo ezalaka na banimero ya telefone, na nsuka akutanaki na bango mpe babandaki koyekola Biblia pɔ́sɔ na pɔ́sɔ.

◻ Elenge mwasi moko asɛngaki na bapanzi-nsango ya mboka na bango ete básala piblisité ya botɛkisi mpúngu (amulette) moko boye. Piblisité emonisaki yango lokola ‘mpúngu ya ntango na kala oyo ezali na nguya mingi.’ Moko na Batatoli ya Yehova ayokaki piblisité yango. Azwaki ekateli ya kobénga na nimero ya telefone oyo epesamaki mpe asololaki elongo na mwasi wana na ntina na eutelo ya nguya oyo elobelamaki ete ezali kati na mpúngu yango. Lisoló elandaki na kotalela likanisi ya Biblia na ntina na misala ya bademó. Elenge mwasi oyo azalaki na mpúngu amonisaki ete bobele mokolo moko na liboso, abondelaki Nzambe ete asalisa ye na ntina na mikakatano azalaki na yango elongo na bademó. Motatoli akamataki bibongiseli mpo na kosolola na ye lisusu na nzela ya telefone.

Ntango abéngaki na nzela ya telefone, elenge mwasi yango azalaki na ndako te. Mama na ye ayanolaki mpe alobaki ete: “Nayebi te soki makambo nini oyebisaki epai na mwana na ngai, kasi likambo oyo esalemi ezali likamwisi!” Ayebisaki ete nsima na lisoló ya liboso na nzela ya telefone, mwana na ye abwakaki bikeko mpe babúku na ye nyonso oyo ezalaki na boyokani na misala ya Satana mpe abandaki kotánga Biblia.

Mwa moke na nsima, bibongiseli bikamatamaki mpo na koya kotala elenge mwasi yango. Andimaki nokinoki boyekoli ya Biblia pɔ́sɔ na pɔ́sɔ elongo na Batatoli ya Yehova. Abandaki mpe kosangana elongo na Batatoli na koyanganáká na makita na bango ya boklisto. Lisusu, Yehova alóngaki bademó na kosaláká ete boyebi ya sikisiki ya solo ya Biblia engɛnga lisusu koleka.