Azali na elikya atako azali ebɔsɔnɔ

Lisolo ya Sara van der Monde

Mbala mingi bato balobaka na ngai ete: “Sara, osɛkaka kitoko. Mpo na nini ozalaka esengoesengo boye?” Nayebisaka bango ete nazali na elikya moko kitoko. Na mokuse ezali boye: “Nazali ebɔsɔnɔ sikoyo, kasi na mikolo ezali koya nakobonga!”

NABOTAMAKI na Paris, na France na 1974. Kobotama na ngai ezalaki mpasi, mpe na nsima minganga bamonaki ete nazali na maladi moko na bɔɔngɔ oyo ekómisaka moto paralize. Mabɔkɔ ná makolo na ngai ezalaki kosala malamu te, mpe ezalaki mpasi moto ayeba makambo oyo nazali koloba. Nakómaki mpe na maladi ya ndɛkɛ mpe nazalaki kobɛla mpambampamba.

Ntango nazalaki na mbula mibale, tokendeki kofanda na engumba Melbourne, na Australie. Mbula mibale na nsima, papa asundolaki ngai ná mama. Na ntango wana nde, mpo na mbala ya liboso, namiyokaki penepene na Nzambe. Mama azali Motatoli ya Yehova mpe azalaki komema ngai na makita, epai nayekolaki ete Nzambe alingaka ngai mpe atyelaka ngai likebi. Koyeba likambo wana mpe ndenge mama azalaki kolinga ngai mpe kokitisa ngai motema esalisaki ngai nabanga te, atako bomoi na biso ebongwanaki.

Mama alakisaki ngai mpe ndenge ya kobondela Yehova. Kutu, mpo na ngai, kobondela ezalaka pɛtɛɛ koleka koloba. Ntango nazali kobondela, nabundanaka te mpo na kobimisa maloba, kasi nayokaka yango polele ndenge ezali kobima na makanisi na ngai. Mpe lokola ezalaka mpasi moto akanga ntina ya maloba na ngai, koyeba ete Yehova akangaka ntina ya likambo nyonso, ezala oyo nalobi na motema to oyo nazali kobundana mpo na kobimisa, ekitisaka ngai motema.​—Nz. 65:2.

Bomoi ya mikakatano

Maladi na ngai ezalaki kaka koya makasi mpe ntango nakómaki na mbula mitano, nakómaki kolata mabende mpo na kotambola. Wana ezalaki kotambola te, ezalaki nde kobenda makolo! Na mbula 11, nakokaki lisusu kotambola te. Na nsima, mpo namata to nalongwa na mbeto, aparɛyi moko ya kura ezalaki kotombola ngai mpo na kotya ngai na kiti na ngai ya bibɔsɔnɔ oyo ezalaki na motɛrɛ, oyo nazalaki kotambwisa na lobɔkɔ moko.

Ya solo, na bantango mosusu maladi na ngai esalaka ngai susi. Na bantango yango, nakanisaka ndenge tolobaka na libota na biso ete: “Komitungisa te mpo na makambo oyo okokoka kosala te. Salá kaka oyo okoki kosala.” Yango esalisá ngai nalonga kosala makambo lokola kotambola likoló ya mpunda, na bwato, kokende kolala mwa mikolo na zamba, ata mpe kokumba motuka na esika oyo babongisá mpo na kobalukabaluka kuna! Lokola nayebi mwa misala ya mabɔkɔ, nalekisaka ntango na kosala mayemi, kotonga bilamba, babolangiti, kosala ba broderie, mpe bambɛki.

Lokola nazali ebɔsɔnɔ mpenza, bato mosusu bazalaki komituna soki nazali na mayele mpo nakoka kozwa ekateli ya kosalela Nzambe. Ntango nakómaki na mbula 18, molakisi moko ayebisaki ngai nalongwa ndako mpo na nakima lingomba ya mama na ngai. Kutu alakaki ete akosalisa ngai nazwa esika ya kofanda. Kasi nayebisaki ye ete nakotika lingomba na ngai te mpe nakolongwa na ndako kaka soki nakoki mpenza mpo na kofanda ngai moko.

Mwa moke na nsima, nabatisaki Motatoli ya Yehova. Mbula mibale na nsima, nakendeki kofanda na apartema moko ya moke. Na esika yango, nazali na esengo mpo nazwaka lisalisi oyo esengeli mpe nazali na bonsomi.

Likambo moko ya kokamwa

Na boumeli ya bambula, nakutanaki na makambo mosusu oyo emekaki kondima na ngai. Mokolo moko, nakamwaki mpenza ntango moninga moko ya kelasi oyo azali mpe ebɔsɔnɔ atunaki ngai libala. Na ebandeli, nasepelaki. Lokola mwana mwasi nyonso, nazalaka na mposa ya kobala. Kasi elimboli te ete soki ebɔsɔnɔ abali ebɔsɔnɔ, bakozala kaka na libala ya esengo. Lisusu, elenge mobali yango azalaki Motatoli ya Yehova te. Bindimeli na ngai ná oyo ya ye, misala na biso, mpe mikano na biso ekesanaki mpenza. Bongo ndenge nini tokokaki kofanda libala? Nakanaki mpe kotosa etinda ya Nzambe oyo ezali polele ya kobala kaka mokristo lokola ngai. (1 Ko. 7:39) Na yango, nayebisaki mwana mobali yango na boboto ete nakoki kondima kobala ye te.

Tii lelo oyo, nayebaka ete nazwaki ekateli ya malamu. Natyaka ntembe ata moke te ete na mokili ya sika oyo Nzambe alaki, nakozala na esengo. (Nz. 145:16; 2 Pe. 3:13) Kasi sikoyo, nazali na ekateli ya kotikala sembo epai ya Yehova mpe kosepela na bomoi oyo nazali na yango.

Nazali kozela na mposa makasi mokolo nakopumbwa na kiti na ngai ya bibɔsɔnɔ mpe nakopota mbangu lokola mboloko. Na ntango yango nakoganga ete: “Nazalaki ebɔsɔnɔ kasi sikoyo nabongi mpo na libela!”