Bomoi​—ezali likabo liuti na Nzambe

MOKOLO na mokolo, motema na biso oyo ezali bongo pompi, ezali kotambwisa makila, eloko ya motuya mingi kati na nzoto na biso. Biso tokolalaka, kasi mampúlúlú na biso mazali kolanda kofungwana mpe kozipama. Tokolyaka bilei, mpe bikogúmbwana na mbala moko. Nyonso wana ezali kosalema mokolo na mokolo, bobele na makasi na biso moke to te. Ebongiseli wana ya kokamwa mpe ya kitoko, oyo ekotyamaka likebi te, ezali kati na likabo oyo tobéngi yango bomoi. Na lolenge mosusu, likabo yango likoki kotalelama lokola likamwisi.

Totalela lolenge moto abandaka na libumu mpe kobotama na ye. Na lolenge yango esalemaka, nzoto ekobwakaka biloko nyonso ya bopaya, atako bongo, zemi efandaka kati na libumu ya mwasi. Na esika na kobwakama, eloko na mopaya oyo ete zemi oyo ekokólaka, eleisami mpe ebatelami na libumu ya mwasi kino ekokóma mwana. Soki libumu ya mwasi ezalaki na likoki te ya kokɔtisa ata eloko moko ya mopaya kati na yango, mbɛlɛ moto akokaki kobotama te.

Soki mbongwana esalemi te kati na libumu ya mama, wana zemi ezali bobele na sanza minei, mbɛlɛ bomoi ya mwana oyo auti kobotama ekozala mokuse. Na ntango wana, abandi kofiba mosapi na ye ya monene, likambo oyo likosalisa mosuni na nzoto na ye, oyo na nsima, ekosalisa ye na komela libɛlɛ ya mama na ye. Mpe wana ezali bobele moko na ebele na makambo matali bomoi oyo masila kobongisama uta kala liboso na kobotama na mwana.

Na ntango zemi ezali kati na libumu ya mama, eloko ezingi motema na ye ezali na lilusu. Nzokande, lilusu wana likozipamaka yango moko na ntango na kobotama. Lisusu, mosisa monene mokotambwisaka makila oyo mozingi mampúlúlú na ntango nyonso oyo zemi ezali na libumu ya mwasi, yango moko ekómaka moke na ntango na kobotama; na ntango wana, makila makotambola na mampúlúlú, epai ekozwa mopepe na ntango mwana akopema mpo na mbala ya liboso.

Nyonso wana ezali bobele ebandeli. Na bomoi mobimba ya moto, bibongiseli na kokamwa oyo bisalemaki (lokola kopema, kotambola na makila kati na nzoto, misisa mpe ebongiseli oyo nzoto yango moko ekobimisaka biloko bisengeli mpo na makila) bikokokisa misala na yango na motindo oyo bato bakoki kososola yango te​—nyonso wana ezali bobele mpo ete bomoi eumela. Ezali likambo na kokamwa te wana mokomi moko na kala, alobaki na Nzambe ete: “Nakotɔndo yo mpo ete nasalami na motindo na kokamwa mingi; misala na yo mizali ya kokamwa, mpe molimo na ngai moyebi yango malamu.”​—Nzembo 139:14.

Na ndenge emonani, mokomi na maloba kitoko oyo akanisaki te ete bomoi ezali bobele eloko oyo ebimaki yango moko to na pwasa, lokola liteya ya évolution emonisi yango. Soki ezalaki bongo, mbɛlɛ tozali na masɛngami to mikumba te na motindo oyo tosengeli kosalela bomoi na biso. Nzokande, motindo oyo bomoi ezali, emonisi polele ete ezalisamaki, mpe kozalisama euti na mozalisi. Biblia emonisi yango na motindo oyo: “Ndako nyonso etongami na moto moko, nde ye oyo atongaki biloko nyonso ezali Nzambe.” (Baebele 3:4) Ezali likambo ya ntina mingi na “koyeba ete Jéhovah azali Nzambe. Ye nde asalaki biso, kasi biso moko te.” (Nzembo 100:3, MN) Ee, bomoi eleki eloko ebimi pwasa; ezali likabo liuti na Nzambe ye moko.​—Nzembo 36:9.

Soki ezali bongo, mikumba nini tozali na yango epai na Ye oyo azali kopesa bomoi? Lolenge nini alingi ete tosalela bomoi na biso? Mituna oyo, mpe misusu oyo misangani na yango, mitalelami kati na lisoló lilandi.