Mateu

20 “Kakuli Mubuso wa kwa lihalimu u swana sina mutu, ya li muñaa ndu, ya naa zwile masa ha patalala ku yo bata batu ba ku beleka mwa simu ya hae ya likota za veine. 2 Ha saa lumelelani ni babeleki kuli u ka ba lifa dinari* i liñwi ka lizazi, a ba luma mwa simu ya hae ya likota za veine. 3 Ha zwa hape, ibata iba ka hora ya bulaalu,* a bona ba bañwi ba ba yemi feela fa musika ba si na musebezi, 4 mi a li ku bona, ‘Ni mina, ha mu ye mwa simu ya likota za veine, mi ni ka mi fa tuwelo ye mi lukela.’ 5 Kiha ba ya. Hape a zwa ibata iba ka hora ya bu 6* ni ya bu 9* mi a eza nto ye swana. 6 Kwa mafelelezo, ibata iba ka hora ya bu 11,* a zwa mi a fumana ba bañwi ba ba yemi, mi a li ku bona, ‘Kiñi se mu yemezi fa, lizazi kaufela mu si na musebezi?’ 7 Ba li ku yena, ‘Kakuli ha ku na ya lu kenyize musebezi.’ Kihaa li ku bona, ‘Ni mina ha mu ye mwa simu ya likota za veine.’

8 “Ha se li manzibwana, muñaa simu ya likota za veine a li ku mubabaleli wa simu ya hae, ‘Biza babeleki mi u ba fe lituwelo za bona, ku kala ka ba ba keni mwamulaho ku tisa ku ba ba keni pili.’ 9 Ba ne ba keni ka hora ya bu 11 ha ba fita, ba amuhela dinari i liñwi mutu ni mutu. 10 Cwale ba ne ba keni pili ha ba tile, ba nga kuli ne ba ka lifiwa hahulu ku fita, kono ni bona ba amuhela tuwelo ya dinari i liñwi. 11 Ha se ba filwe tuwelo ya bona, ba kala ku halala ku muñaa ndu, 12 mi ba li, ‘Ba ba tile mwamulaho ba, ba belekile feela hora i liñwi; kono ni bona u ba file se si likana ni se u file luna ba ba mbindanile lizazi kaufela ku nze ku cisa!’ 13 Kono a alaba yo muñwi wa bona, a li, ‘Mulikani, ha ni ku fosezi se siñwi. Kana ne lu si ka lumelelana dinari i liñwi? 14 Ha ku nge se si li sa hao mi u ikele. Ni bata ku fa wa mafelelezo se si likana ni se ni ku file. 15 Kana ha ni na swanelo ya ku itusisa za ka mo ni latela? Kamba u shwa muna* kabakala bunde bwa ka?’ 16 Kamukwaocwalo, ba mafelelezo ba ka ba ba pili mi ba pili ba ka ba ba mafelelezo.”

17 Nako ya ku kambamela kwa Jerusalema ha i fitile, Jesu a ngela balutiwa ba ba lishumi ka ba babeli kwatuko mi a li ku bona mwa nzila: 18 “Ha mu bone! Lu kambamela kwa Jerusalema, mi Mwanaa mutu u ka fiwa mwa mazoho a baprisita ba bahulu ni bañoli ba Mulao, mi ba ka mu atulela lifu 19 mi ba ka mu fa mwa mazoho a bamacaba kuli ba mu shubule ni ku mu shapa ni ku mu kokotela, mi fa lizazi la bulaalu, u ka zusiwa kwa bafu.”

20 Cwale mahe bana ba Zebedea a mu atumela ni bana ba hae, a mu kubamela, ku kupa nto ye ñwi. 21 Jesu a li ku yena: “U batañi?” Yena a mu alaba, a li: “U bulele kuli bana ba ka ba babeli ba, ba ku ine yo muñwi ku la bulyo ni yo muñwi ku la nzohoto, mwa Mubuso wa hao.” 22 Jesu a alaba kuli: “Ha mu zibi seo mu si kupa. Kana mwa kona ku nwa mwa komoki ye ni tuha ni nwa ku yona?” Ba li ku yena: “Lwa kona.” 23 Kihaa li ku bona: “Luli mu ka nwa mwa komoki ya ka, kono taba ye ya ku ni ina ku la bulyo ni la nzohoto hasi ya ka kuli ni i fe, kakuli libaka zeo ki za ba ba lukiselizwe cwalo ki Ndate.”

24 Balutiwa ba bañwi ba ba lishumi ha ba utwa cwalo, ba nyemela bana ba Zebedea. 25 Kono Jesu a ba bizeza ku yena, a li: “Mwa ziba kuli babusi ba macaba ba a hatelela mi ba batuna ba a busa ka taata. 26 Ha ku yo cwalo mwahalaa mina, kono mutu kaufela ya bata ku ba yo mutuna mwahalaa mina u lukela ku ba sikombwa sa mina, 27 mi mutu kaufela ya bata ku ba wa pili mwahalaa mina u lukela ku ba mutangaa mina. 28 Sina feela Mwanaa mutu ha si ka tela ku to sebelezwa, kono kuli a sebeleze ni ku fa moyo* wa hae kuli a liulule ba bañata.”

29 Cwale ha ne ba zwa mwa Jeriko, buñata bo butuna bwa mu latelela. 30 Mi ha mu bone! baana ba babeli ba libofu ba ne ba inzi kwatuko a nzila ba utwa kuli Jesu na fita mi ba huwa, ba li: “Mulena, ha ku lu utwele butuku, Mwanaa Davida!” 31 Kono buñata bwa ba kalimela kuli ba kuze; kono cwale bona kihona ba huwa ka taata, ba li: “Mulena, ha ku lu utwele butuku, Mwanaa Davida!” 32 Jesu kihaa yema, a ba biza, mi a li: “Kiñi se mu bata kuli ni mi ezeze?” 33 Ba li ku yena: “Mulena, ha ku tutubuluhise meeto a luna.” 34 Jesu a ba shwela makeke, a ba swala fa meeto, mi honafo ba kala ku bona, mi ba mu latelela.