Luka

23 Cwale buñata bo kaufela bwa yema, mi bwa mu isa ku Pilato. 2 Kiha ba kala ku mu tama litaba, ba li: “Lu fumani mutu yo a nzaa kelusa sicaba sa luna, u hanisa batu ku lifa mitelo ku Sesare, ni ku ipulela kuli ki yena Kreste mulena.” 3 Cwale Pilato a mu buza, a li: “Kana ki wena Mulena wa Majuda?” Jesu a mu alaba, a li: “U bulezi wena muñi.” 4 Pilato kihaa li kwa baprisita ba bahulu ni kwa buñata: “Ha ni fumani mulatu ku mutu yo.” 5 Kono ba pihelela, ba li: “Mutu yo u tisa mifilifili mwa sicaba ka ku luta batu mwa Judea kaufela, ku kalela kwa Galilea mane ku to fita ni kwanu.” 6 Pilato ha utwa cwalo, a buza kuli a zibe haiba Jesu ne li Mugalilea. 7 Cwale Pilato ha saa zibile kuli Jesu naa zwa mwa sibaka se si mwa maata a Heroda, a mu lumela ku Heroda, ili yo ni yena naa li mwa Jerusalema mwa mazazi ao.

8 Heroda ha bona Jesu, a taba hahulu, kakuli naa kalile kale ku bata ku mu bona bakeñisa kuli naa utwile ze ñata ka za hae, mi naa sepile kuli u ka mu bona a eza makazo ye ñwi. 9 Cwale a kala ku mu buzaka lipuzo ka nako ye telele, kono Jesu a tokwa ku mu alaba se siñwi. 10 Kono baprisita ba bahulu ni bañoli ba Mulao ne ba nze ba yema ni ku mu tama litaba ka mabifi. 11 Cwale Heroda, hamoho ni balibeleli ba hae ba masole, a mu shubula, mi a mu sheununa ka ku mu apesa siapalo se si benya ni ku mu kutiseza ku Pilato. 12 Mi Heroda ni Pilato ba fetuha balikani ku zwa ona lizazi leo, kanti pili ne ba toyani.

13 Pilato cwale a kopanya baprisita ba bahulu ni babusi ni sicaba 14 mi a li ku bona: “Mu ni tiselize mutu yo kuli kuti u shamiliketa petuhelo mwa sicaba. Cwale ha mu bone! ni mu buzize fapilaa mina kono ha ni si ka fumana mulatu mwa lika ze mu mu tama ka zona. 15 Mane, ni yena Heroda ha si ka fumana mulatu ku yena, kakuli u mu kutiselize ku luna, mi ha mu bone! ha ku na sa ezize mutu yo sa lukelwa ku bulaelwa. 16 Hakulicwalo ni ka mu ota ni ku mu lukulula.” 17* —— 18 Kono buñata kaufela bwa kalumuka, bwa li: “U bulaye yo, kono u lu lukululele Barabasi!” 19 (Barabasi naa kalamelelizwe mwa tolongo ka mulatu wa petuhelo ye ne ezahezi mwa muleneñi ni ka mulatu wa bubulai.) 20 Pilato hape a bulela ku bona kakuli naa bata ku lukulula Jesu. 21 Kiha ba kala ku huwaela, ba li: “Mu kokotele! U mu kokotele!” 22 A li ku bona lwa bulaalu: “Libaka ki lifi, ki bumaswe mañi bwa ezize mutu yo? Ha ni si ka fumana ku yena mulatu wa lukelwa ku bulaelwa; hakulicwalo ni ka mu ota ni ku mu lukulula.” 23 Kiha ba pihelela, ka manzwi a matuna, ku kupa kuli a kokotelwe, mi manzwi a bona a kala ku koma Pilato. 24 Pilato kihaa atula ku likana ni mo ne ba tokwela: 25 A lukulula mutu yo ya naa kalamelelizwe mwa tolongo ka mulatu wa ku shangumuna petuhelo mwa sicaba ni wa bubulai, yena ye ne ba kupa kuli a lukululwe, mi a ba fa Jesu kuli ba mu eze mo ne ba latela.

26 Cwale ha ne ba mu isa, ba swala Simoni, ya simuluha kwa Sirene, ya naa zwa mwa masimu, mi ba mu lwalisa kota ya linyando mwamulaho wa Jesu. 27 Hape ne ku na ni buñata bo butuna bwa batu ba ne ba mu latelela, hamohocwalo ni basali ba ne ba sweli ku inata fa lifuba kabakala maswabi ni ku mu lila. 28 Jesu a fetuhela kwa basali bao, mi a li: “Basali ba Jerusalema, mu tuhele ku ni lila. Kono mu itile ili mina ni ku lila bana ba mina 29 kakuli ha mu bone! mazazi a taha muta batu ba ka li, ‘Tabo ki ya basali ba baumba, ni limba ze ne si ka pepa, ni mazwele a naa si ka anyisa!’ 30 Cwale ba ka kala ku bulelela malundu, ba li, ‘Ha mu lu wele!’ mi ba ka li kwa mazulu, ‘Mu lu kwahele!’ 31 Haiba ba eza cwalo kota ha i li ye mezi, ku ka ba cwañi ha se i omile?”

32 Cwale batu ba bañwi ba babeli, ba baezalibi, ni bona ne ba iswa kwa ku yo bulaiwa ni yena. 33 Mi ha ba fitile kwa sibaka se si bizwa Katendele, ba mu kokotela hamoho ni baezalibi bao, yo muñwi ku la hae la bulyo ni yo muñwi ku la hae la nzohoto. 34 [[Kono Jesu naa li: “Ndate, u ba swalele, kakuli ha ba zibi seo ba si eza.”]] Hape ba posa loto,* kuli ba ikabele liapalo za hae. 35 Mi batu ba yema, ba talima. Kono babusi ne ba mu sheununa, ba li: “U pilisize ba bañwi; ha ipilise he, haiba ki Kreste wa Mulimu, Muketiwa wa hae.” 36 Nihaiba masole ba mu sheununa, ba mu sutelela ni ku mu fa waine ye wawata 37 mi ba li: “Haiba u Mulena wa Majuda, ipilise.” 38 Hape ne ku na ni manzwi a naa ñozwi fahalimwaa hae, aa li: “Yo ki Mulena wa Majuda.”

39 Kono yo muñwi wa baezalibi ba ne ba pahekilwe fo a kala ku mu nyefula, a li: “Kana hasi wena Kreste? Ha ku ipilise mi u lu pilise ni luna.” 40 Kono muezalibi yo muñwi a mu kalimela, a li: “Kikuli ha u sabi Mulimu ni hanyinyani, ha se u amuhezi katulo i liñwi ni yo? 41 Mi luna, kwa lu swanela luli, kakuli lu amuhela ka ku tala se si lu lukela ku likana ni ze lu ezize; kono haili yo yena ha ku na bumaswe bwa ezize.” 42 Kihona a li: “Jesu, u ni hupule ha u ka kena mwa Mubuso wa hao.” 43 Mi Jesu a li ku yena: “Kaniti na ku bulelela kacenu, u ka ba ni na mwa Paradaisi.”

44 Cwale, ne se li hora ya bu 6,* mi lififi la apesa lifasi kaufela ku isa ka hora ya bu 9* 45 kakuli lizazi ne li fifalile; mi lisila* la mwa sibaka se si kenile sa tempele la pazuha fahali. 46 Mi Jesu a huwa ka linzwi le lituna, a li: “Ndate, ni beya moya wa ka mwa mazoho a hao.” A mano bulela cwalo, a felelwa ki moya. 47 Muzamaisi wa masole ha boni ze ezahezi, a kala ku kanyisa Mulimu, a li: “Kaniti luli, mutu yo naa li ya lukile.” 48 Mi buñata kaufela bo ne bu tilo kubukana hamoho mwa sibaka seo ku to buha, ha bu boni ze ezahezi, bwa kala ku kuta, bu nze bu inata fa lifuba. 49 Hape ba ne ba mu ziba kaufela ne ba yemezi kwahule. Mi basali ba ne ba mu latelezi ku zwa kwa Galilea ni bona ne ba yemi fo mi ba iponela lika zeo.

50 Mi ha mu bone! ne ku na ni muuna ya bizwa Josefa, yo muñwi wa ba kuta ya Sanhedrini, ya naa li mutu yo munde ni ya lukile. 51 Muuna yo naa si ka yemela mulelo ni muhato wa bona. Naa zwa kwa Arimatea, muleneñi wa ba Judea, mi naa libelela Mubuso wa Mulimu. 52 Muuna yo a ya ku Pilato mi a yo kupa situpu sa Jesu. 53 Mi a si pahulula ni ku si putela mwa lisila la line ye nde, mi a si buluka mwa libita la ku cakula mwa licwe, mo ne ku si ka bulukwa kale mutu. 54 Cwale ne li lizazi la Buitukiso,* mi liseli la manzibwana la ku kala kwa Sabata ne li atumela. 55 Kono basali ba ne ba tile ni yena ku zwa kwa Galilea ni bona ba latelela mi ba yo bona libita ni ku bona mo si bulukelwa situpu sa hae, 56 mi ba kuta ku yo lukisa milyani ye nunka hande ni mafula a sende. Kono ba pumula la Sabata ka ku ya ka mulao.