2 Pitrosi

Liñolo la Bubeli la Pitrosi

1 Na Simoni Pitrosi, mutanga ni muapositola wa Jesu Kreste, ni ñolela ba ba fumani tumelo ya butokwa sina ya luna, ka ku luka kwa Mulimu wa luna ni Mupilisi yena Jesu Kreste:

2 Haike mu atisezwe sishemo ni kozo ka zibo ye nepahezi ya Mulimu ni ya Jesu Mulenaa luna, 3 kakuli ka maata a hae a bumulimu lu filwe lika kaufela ze tokwahala kuli lu pile ni kuli lu sepahale ku Mulimu ka zibo ye nepahezi ya yena ya naa lu bizize ka kanya ni bunde bwa hae. 4 Ka zona lika zeo u lu file lisepiso za butokwa ni ze tuna hahulu, kuli ka zona mu kone ku fumana kabelo ku seo Mulimu a li sona, ha se mu bandukile kwa ku bola kwa lifasi ko ku tiswa ki litakazo ze tulile tikanyo.

5 Ka lona libaka leo, mu ikataze hahulu kuli kwa tumelo ya mina mu ekeze kwateñi bunde, kwa bunde bwa mina mu ekeze kwateñi zibo, 6 kwa zibo ya mina mu ekeze kwateñi buiswalo, kwa buiswalo bwa mina mu ekeze kwateñi buitiiso, kwa buitiiso bwa mina mu ekeze kwateñi busepahali ku Mulimu, 7 kwa busepahali bwa mina ku Mulimu mu ekeze kwateñi lilato la mizwale, kwa lilato la mina la mizwale mu ekeze kwateñi lilato la batu kaufela. 8 Kakuli haiba lika zeo li ba teñi ku mina mi ili ka buñata, li ka mi tusa ku sa ina feela mu sa beleki kamba ku palelwa ku beya miselo kwa neku la zibo ye nepahezi ya Mulenaa luna Jesu Kreste.

9 Kakuli haiba lika zeo ha li yo ku mutu, mutu yo ki sibofu, ya kwala meeto a hae kuli a si ke a bona liseli, mi u fetuhile ya libala ku keniswa kwa naa kenisizwe kwa libi za hae za kwakale. 10 Kabakaleo mizwale, mu eze ka mo mu konela kaufela kuli mu tiise ku biziwa ni ku ketiwa kwa mina; kakuli haiba mu zwelapili ku eza lika ze, ha mu na ku palelwa ni kamuta. 11 Mane kamukwawo, mu ka fiwa mbuyoti ye tuna ya ku kena mwa mubuso o sa feli wa Mulenaa luna ni Mupilisi Jesu Kreste.

12 Kabakaleo ni ka na ni mi hupulisanga lika zeo kamita, nihaike mwa li ziba mi mu tiile luli mwa niti ye li teñi ku mina. 13 Kono ni bona kuli ha ni sa inzi mwa tabernakele ye, ki swanelo ku mi nyangumuna ka likupuliso, 14 ka ku ziba kuli tabernakele ya ka i tuha i zwisiwa, sina mwa naa ni zibiselize hande ni yena Mulenaa luna Jesu Kreste. 15 Kamukwaocwalo ni ka na ni eza mo ni konela kaufela kuli ha se ni fundukile, mu kone ku hupula lika ze ka ili mina.

16 Batili, ne i si ka ku latelela makande a buhata a ezizwe ka butali bwa bupumi, ha ne lu mi zibisize za maata ni ku ba teñi* kwa Mulenaa luna Jesu Kreste, kono ne li kabakala kuli ne lu li lipaki ze ne iponezi butuna bwa hae. 17 Kakuli naa amuhezi likute ni kanya ku Mulimu yena Ndate, muta manzwi a swana ni a, naa bulezwi ku yena ka kanya ye tuna: “Yo ki mwanaka, ya latwa, ye ni katelwa luli na ka sibili.” 18 Ki cwalo, ne lu utwile manzwi ao ku zwelela kwa lihalimu ha ne lu li ni yena fa lilundu le li kenile.

19 Kabakaleo, lu na ni linzwi la bupolofita le li tiisizwe ni ku fita; mi mu eza hande ku isa pilu ku lona sina kwa lambi ye benya mwa sibaka se si lififi, (ku fitela ku patalala ni naleli ya lilungwe i bonahala,) mwa lipilu za mina. 20 Kakuli pili mwa izibela se, kuli ha ku na bupolofita bwa Liñolo bo bu simuluha fa taluso ifi kamba ifi ya butu. 21 Kakuli bupolofita ni kamuta ha bu si ka taha ka tato ya batu, kono batu ne ba bulezi se si zwa ku Mulimu ba nze ba susumezwa ki moya o kenile.