Mu Ine mwa ‘Munzi wa Masabelo’ mi Mu Pile!

“N’a swanezi ku siyala mwa munzi wa hae wa masabelo, ku fitela muprisita yo muhulu h’a ka shwa.”—NUMERE 35:28.

 1. Ki mañi ya li Mulifisi wa mali, mi ki kezo mañi yeo a ka eza ona cwale-cwale fa?

MULIFISI wa mali wa Jehova, Jesu Kreste, u fakaufi ni ku tisa pulao. Hamohocwalo ni limpi za hae za mangeloi, Mulifisi y’o ona cwale-cwale fa u k’a nga muhato wa ku lwanisa bao kaufela ba ba na ni mulatu wa mali ka ku sa baka. Ee, Jesu u ka sebeza sina Mutahisi wa katulo ya Mulimu mwahal’a “ñalelwa ye tuna” ye nze i atumela ka bubebe. (Mateu 24:21, 22; Isaya 26:21) Mufuta wa mutu cwale u fitiswa fa ku talimana ni ze zwa mwa mulatu wa bona wa mali.

 2. Ki sifi se si li sibaka si nosi sa silelezo, mi ki lipuzo lifi ze tokwa likalabo?

² Nzila ya silelezo ki ku kena mwa mukwakwa o liba kwa munzi wa masabelo wa swanisezo ni ku mata kuli mutu a punyuse bupilo bwa hae! Haiba a lumelelwa ku kena mwa munzi wo, mubalehi n’a ka tokwiwa ku zwelapili ku ba m’o, kakuli ki sona fela sibaka sa niti sa silelezo. Kono ne mu kana mwa makala kuli, ‘Bakeñisa kuli buñata bwa luna lwa li ku ba lu sa bulai mutu, kana luli lu na ni mulatu wa mali? Ki kabakalañi Jesu ha li Mulifisi wa mali? Ki ufi o li munzi wa masabelo wa mwa lizazi la kacenu? Kana ku na ni ya kona ku zwa ku ona a sa ikenyi mwa lubeta?’

Kana Luli Lu Na Ni Mulatu wa Mali?

 3. Ki muinelo ufi wa Mulao wa Mushe o ka lu tusa ku bona kuli likiti ze eza bolule-lule za ba ba fa lifasi-mubu ba abana mulatu wa mali?

³ Muinelo o muñwi mwa Mulao wa Mushe u ka lu tusa ku bona kuli likiti za bolule-lule za bayahi ba lifasi-mubu ba abana mwa mulatu wa mali. Mulimu n’a beile kwa Maisilaele mulatu o kopanezwi kwa neku la ku sulula mali. Mutu ha ne a ka fumanwa a shwile mi mubulai wa hae a sa zibwi, baatuli ne ba na ni ku likanya misipili ya ku ya kwa minzi ye potolohile sibaka seo ili ku bonisisa kuli ki ufi o li bukaufi ka ku fitisisa. Kuli ba zwise teñi mulatu, ba bahulu ba munzi o bonahala ku ba ni mulatu wa mali ne ba na ni ku loba mulala wa nkomwana ya sitole, ye si ka sebeliswa kale ili ku u lobela mwa musindi o si ka limwa. Seo ne si ezezwa fapil’a baprisita ba Malivi ‘kakuli Jehova n’a ba ketile kuli litaba kaufela ni likozi li atulwe ka milomo ya bona.’ Ba bahulu ba munzi w’o ne ba tapa kwa mazoho fahalimu a sitole seo ni ku bulela kuli: “Mazoho a luna h’a si ka sulula mali a, ni meto a luna h’a si ka bona se siñwi; Wena Muñ’a Bupilo, u swalele sicaba sa hao sa Isilaele s’o liuluzi, mi u si ke wa balela sicaba sa hao sa Isilaele mali a’ suluzwi fela.” (Deuteronoma 21:1-9) Jehova Mulimu n’a sa bati kuli naha ya Isilaele i silafazwe ka mali kamba kuli batu ba yona ba be ni mulatu wa mali o kopanezwi.

 4. Babilona yo Mutuna s’a bile ni litaba lifi ze tisa mulatu wa mali?

⁴ Ee, ku ba ni mulatu wa mali o kopanezwi, kamba wa nyangela, ku teñi. Mu nyakisise mulatu o mutuna wa mali o fahalimu a Babilona yo Mutuna, kopano ya mwa lifasi kamukana ya bulapeli bwa buhata. Ee, u kozwi mali a batanga ba Jehova! (Sinulo 17:5, 6; 18:24) Bulapeli bwa Krestendomu bu ipapata ku latelela Nabi wa Kozo, kono lindwa, mihato ya koto ya bulapeli, ni lindwa za bulapeli ze tisa pulao li mu bisize ya na ni mulatu wa mali fapil’a Mulimu. (Isaya 9:6; Jeremia 2:34) Ka buniti fela, u lukela ku lwala mulatu o mutuna wa mafu a ba ba eza bolule-lule mwa lindwa za lifasi ze peli za mwa lilimo za mwanda wo. Kacwalo, ba ba kumalezi kwa bulapeli bwa buhata hamohocwalo ni bayemeli ni baabani ba mwa lindwa za batu ba na ni mulatu wa mali fapil’a Mulimu.

 5. Batu ba bañwi se ba bile cwañi sina mubulai ya si wa ka bomu mwa Isilaele?

⁵ Batu ba bañwi se ba tisize lifu la mutu ka ku lata kamba ka ku tokwa tokomelo. Ba bañwi se ba abani mwa bubulai bwa ka sikwata, mwendi ka ku susumezwa ki baeteleli ba bulapeli kuli yeo ne li tato ya Mulimu. Ba bañwi hape se ba nyandisize ni ku bulaya batanga ba Mulimu. Nihakulicwalo, nihaiba lu si ka eza lika ze cwalo, lu na ni mulatu wa ka nyangela kwa neku la bupilo bwa batu kakuli ne lu sa zibi mulao ni tato ya Mulimu. Lu swana sina mubulai ya si wa ka bomu ‘ya bulaile wahabo a sa lemuhi, ya n’a si ka mu toya, ni kale.’ (Deuteronoma 19:4) Batu ka buñwi ba ba cwalo ba swanela ku kupa mufelañeke wa Mulimu mi ba swanela ku matela mwa munzi wa masabelo o ne u swaniselizwe. Hakusicwalo ba ka katana ni Mulifisi wa mali ili nto ye ka tisa lifu.

Likalulo ze Butokwa Hahulu za Jesu

 6. Ki kabakalañi ha ku konwa ku bulelwa kuli Jesu ki yena wahabo mufuta wa mutu ka ku fitisisa?

⁶ Mwa Isilaele mulifisi wa mali ne li wahabo mufu ka ku fitisisa. Kuli a lombote bao kaufela ba ba bulailwe fa lifasi-mubu mi sihulu batanga ba Jehova ba ba bulailwe, Mulifisi wa mali wa mwa lizazi la cwale u ka tokwa ku ba wahabo mufuta wa mutu kamukana. Yona kalulo yeo se i talelelizwe ki Jesu Kreste. N’a pepilwe a li mutu ya petehile. Jesu ka lifu n’a fanile bupilo bwa hae bo bu si na sibi sina sitabelo sa tiululo, mi hamulaho wa zuho ya hae kwa lihalimu, n’a fitisize teko ya sona ku Mulimu ka ku tusa ba ba shwa ba ba simuluha ku Adama wa muezalibi. Kacwalo Kreste n’a fitile fa ku ba Muliululi wa mufuta wa mutu, ili wahabo luna ka ku fitisisa—Mulifisi wa mali ya na ni tukelo. (Maroma 5:12; 6:23; Maheberu 10:12) Jesu u bulelwa ku ba muhulwan’a balateleli ba mwa mihato ya hae ba ba tozizwe. (Mateu 25:40, 45; Maheberu 2:11-17) Ka ku ba Mulena wa mwa lihalimu u fita fa ku ba “Ndate wa kamita” wa bao ba ba ka fumana tuso kwa sitabelo sa hae sina babusiwa ba hae ba fa lifasi-mubu. Bona bao ba ka pila ku ya ku ile. (Isaya 9:6, 7) Kacwalo Jehova ka swanelo u ketile yena Wahabo mufuta wa mutu y’o sina yena Mulifisi wa mali.

 7. Ka ku ba Muprisita yo Muhulu yo mutuna, ki sifi seo Jesu a ezeza batu?

⁷ Jesu hape ki Muprisita yo Muhulu ya si na sibi, ya likilwe, ya utwela ba bañwi butuku. (Maheberu 4:15) Mwa mayemo ao u sebelisa butokwa bwa sitabelo sa hae se si lifa libi kwa mufuta wa mutu. Minzi ya masabelo ne i tomezwi ‘bana ba Isilaele, ni muzwahule, ni mukozi ya pila ku bona.’ (Numere 35:15) Kacwalo Muprisita yo Muhulu yo mutuna y’o n’a sebelisize pili butokwa bwa sitabelo sa hae kwa balateleli ba hae ba ba tozizwe, “bana ba Isilaele.” Cwale bu swelwi ku sebeliswa kwa ‘mazwahule’ ni ‘bakozi’ mwa munzi wa masabelo o ne u swaniselizwe. Zona “lingu ze ñwi” zeo za Mulena Jesu Kreste li sepa ku pila ku ya ku ile fa lifasi-mubu.—Joani 10:16; Samu 37:29, 34.

Munzi wa Masabelo wa Kacenu

 8. Munzi wa masabelo o ne u swaniselizwe ki ufi?

⁸ Ki ufi ona munzi wa masabelo w’o o ne u swaniselizwe? Haki sibaka se siñwi sa fa lundandala lwa lifasi se si cwale ka Hebroni, o muñwi wa minzi ya masabelo ya Malivi ye 6 ni lihae la muprisita yo muhulu wa Isilaele. Munzi wa masabelo wa kacenu ki tukiso ya Mulimu kwa neku la ku lu sileleza kwa lifu le li tiswa ki ku loba mulao wa hae ka za bukeni bwa mali. (Genese 9:6) A be wa ka ku itatela kamba ya si wa ka bomu, mulobi yo muñwi ni yo muñwi wa taelo yeo u lukela ku bata swalelo ya Mulimu ni ku takulwa kwa sibi sa hae ka tumelo mwa mali a Muprisita yo Muhulu, Jesu Kreste. Bakreste ba ba tozizwe ba ba na ni lisepo za kwa lihalimu ni “buñata bo butuna” ba ba na ni litibelelo za fa lifasi-mubu se ba ikungezi lituso za sitabelo sa Jesu se si lifa libi mi ba mwa munzi wa masabelo o ne u swaniselizwe.—Sinulo 7:9, 14; 1 Joani 1:7; 2:1, 2.

 9. Saule wa kwa Tarese n’a lobile cwañi taelo ya Mulimu ya za mali, kono n’a bonisize cwañi cinceho ya mubonelo?

⁹ Pili a si ka ba kale Mukreste, muapositola Paulusi n’a lobile mulao wa ka za mali. Ha n’a li Saule wa kwa Tarese, n’a nyandisize balateleli ba Jesu mi mane n’a lumelelize ku bulaiwa kwa bona. “Nihakubacwalo,” ki mwa n’a bulelezi Paulusi, “ni shemubilwe, kakuli ne ni eza zeo ka ku sa ziba, ni si ka lumela.” (1 Timotea 1:13; Likezo 9:1-19) Saule n’a na ni mubonelo wa ku baka, ili w’o hamulaho ne u pakilwe ka misebezi ye miñata ya tumelo. Kono nto ye fita tumelo mwa tiululo ya tokwahala kuli mutu a kone ku kena mwa munzi wa masabelo o ne u swaniselizwe.

10. Ku fumana lizwalo le linde ku konahala cwañi, mi ki sifi se si lukelwa ku eziwa kuli li bulukiwe?

¹⁰ Mubulai ya si wa ka bomu na kona ku zwelapili ku pila ku o muñwi wa minzi ya masabelo ya mwa Isilaele ha n’a ka kona fela ku fa bupaki bwa kuli n’a na ni lizwalo le linde ku Mulimu ka ku ama ku za ku sulula mali. Kuli lu fumane lizwalo le linde, lu lukela ku bonisa tumelo mwa sitabelo sa Jesu, ku bakela libi za luna, ni ku cinca nzila ya luna. Lu tokwa ku kupa lizwalo le linde ka buineelo bwa ka tapelo ku Mulimu ka Kreste, ni ku bonisa bona b’o ka kolobezo ya mwa mezi. (1 Pitrosi 3:20, 21) Lona lizwalo le linde leo li lu lumeleza ku fumana swalisano ye kenile ni Jehova. Nzila yeo fela lu kona ku buluka ka yona lizwalo le linde ki ya ku latelela z’a tokwa Mulimu ni ku eza musebezi o lu filwe mwa munzi wa masabelo o ne u swaniselizwe, sina ka m’o babalehi ba mwa minzi ya masabelo ya kwaikale ha ne ba na ni ku utwa Mulao ni ku peta misebezi ye ne ba fiwa. Musebezi o mutuna wa batu ba Jehova kacenu ki wa ku shaela lushango lwa Mubuso. (Mateu 24:14; 28:19, 20) Ku eza ona musebezi w’o ku ka lu tusa ku ba bayahi ba ba na ni tuso mwa munzi wa masabelo wa mwa lizazi la cwale.

11. Ki sifi se si lukelwa ku pimiwa kuli lu kone ku siyala lu silelelizwe mwahal’a munzi wa masabelo wa kacenu?

¹¹ Ku zwa mwa munzi wa masabelo wa kacenu ki ku ipeya fa ngandaleza kwa sinyeho, kakuli Mulifisi wa mali ona cwale-cwale fa u k’a nga muhato wa ku lwanisa ba ba na ni mulatu wa mali kaufela. Ye haki nako ya ku fumaneha kwande a munzi wo wa silelezo kamba mwa kalulo ye lubeta ye kwatuko a mululwani wa kwande a mafulisezo a ona. Ne lu ka fita fa ku ba kwande a munzi wa masabelo o ne u swaniselizwe haiba lu latehelwa ki tumelo mwa sitabelo se si lifa libi sa Muprisita yo Muhulu. (Maheberu 2:1; 6:4-6) Hape ne lu si ke lwa ba mwa silelezo ha ne lu ka ikungela linzila za silifasi, ha ne lu ka yema kwa mandamino a kopano ya Jehova, kamba ha ne lu ka biuka ku zwa mwa lipimo ze lukile za Ndat’a luna wa kwa lihalimu.—1 Makorinte 4:4.

Ba Ba Lukuluzwi ku Zwa mwa Munzi wa Masabelo

12. Ki ka butelele bwa nako ye kuma kai yeo ba ne ba na ni mulatu wa mali ba lukela ku pila mwa munzi wa masabelo o ne u swaniselizwe?

¹² Mubulai ya si wa ka bomu mwa Isilaele n’a na ni ku siyala mwa munzi wa masabelo “ku fitela muprisita yo muhulu h’a ka shwa.” (Numere 35:28) Kacwalo ki ka butelele bwa nako ye kuma kai yeo ba ne ba na ni mulatu wa mali ba lukela ku pila mwa munzi wa masabelo o ne u swaniselizwe? Ku fitela ba fita fa ku sa tokwa lisebelezo za Muprisita yo Muhulu, Jesu Kreste. “U kona ku pilisa ku feleleza ba ba taha ku Mulimu ka yena,” ki mwa n’a bulelezi Paulusi. (Maheberu 7:25) Mwahal’a nako kaufela yeo miinelo ya sibi ni mulatu wa mali wa kale u zwelapili ku ba teñi, lisebelezo za Muprisita yo Muhulu za tokwahala ilikuli batu ba ba si ka petahala ba kone ku ba ni mayemo a lukile ku Mulimu.

13. Ki bomañi ba ba li “bana ba Isilaele” ba mwa lizazi la cwale, mi ba lukela ku siyala mwa “munzi wa masabelo” w’o ka nako ye kuma kai?

¹³ Mu hupule kuli minzi ya masabelo ya kwaikale ne i tomezwi “bana ba Isilaele,” mazwahule, ni bakozi. “Bana ba Isilaele” ki Maisilaele ba kwa moya. (Magalata 6:16) Ba lukela ku pila mwa munzi wa masabelo o ne u swaniselizwe mwa nako kaufela ye ba ka pila fa lifasi-mubu. Kabakalañi? Kakuli ba sa li mwa nama ye si ka petahala mi kacwalo ba tokwa muinelo o lifa milatu wa Muprisita yo Muhulu wa kwa lihalimu. Kono muta bona Bakreste ba ba tozizwe bao ba shwa ni ku zusezwa kwa bupilo bwa kwa moya kwa lihalimu, ha ba sa tokwa lisebelezo za Muprisita yo Muhulu ze lifa milatu; ba ka be ba siile nama ni mulatu wa mali o zamaelela ni yona ku li siyelela. Kwa neku la ba ba zusizwe ba ba tozizwe ba ba cwalo, Muprisita yo Muhulu u ka be a shwile mwa mayemo a ku lifa milatu, a ku sileleza.

14. Ki sifi se siñwi se si tokwahala kuli bao ba ba na ni litibelelo za kwa lihalimu ba pile mwa munzi wa masabelo wa kacenu?

¹⁴ Ku ba kwa bona tenyene ni mibili ya nama ku tokwa kuli bao ba ba ka ‘ca sanda ni Kreste’ ba pile mwa munzi wa masabelo o ne u swaniselizwe ku fitela ba feza ka busepahali bupilo bwa bona bwa fa lifasi-mubu ka lifu. Ha ba ka shwa, ba ka itombola muinelo wa butu bwa fa lifasi-mubu ku ya ku ile. (Maroma 8:17; Sinulo 2:10) Sitabelo sa Jesu si sebeza fela ku bao ba ba mwa butu bwa fa lifasi-mubu. Kacwalo, Muprisita yo Muhulu u shwa kwa neku la bao ba Isilaele wa kwa moya ha ba zusiwa ku ba libupiwa za kwa moya ili ba ba ka pila kwa lihalimu kamita-ni-mita sina ‘ba ba fumana kabelo ku s’a li sona Mulimu.’—2 Pitrosi 1:4.

15. Ki bomañi ba ba li ‘mazwahule’ ni ‘bakozi’ ba mwa lizazi la cwale, mi ki sifi s’a ka ba ezeza Muprisita yo Muhulu yo mutuna?

¹⁵ Ki lili fa ka ‘shwela’ Muprisita yo Muhulu ka ku ama kwa ‘mazwahule’ ni ‘bakozi’ ba mwa lizazi la cwale, ili nto ye ka ba lumeleza ku zwa mwa munzi wa masabelo o ne u swaniselizwe? Bona lilama za buñata bo butuna bao ha ba koni ku zwa mwa munzi wa masabelo w’o hasamulaho fela wa ñalelwa ye tuna. Ki kabakalañi ha ba sa koni ku eza cwalo? Kakuli ba ka be ba sa li mwa nama ya bona ye si ka petahala, ye na ni sibi mi ba ka tokwa ku siyala mwatas’a silelezo ya Muprisita yo Muhulu. Ka ku ipumanela tuso kwa lisebelezo za hae ze lifa milatu mwahal’a bulena ni buprisita bwa hae bwa lilimo ze sikiti, ba ka fita fa bupetehi bwa butu. Jesu kihona a ka ba fa ku Mulimu kwa neku la tiko ya busepahali bwa bona ili ya mafelelezo, ya katulo ya ku ya ku ile ka ku lukulula Satani ni badimona ba hae ka nako–nyana. Bakeñisa kuli ba tula tiko yeo ka ku fumana tumelezo ya bumulimu, Jehova u ka ba bulela kuli ba lukile. Kacwalo ba ka fita fa ku tala luli kwa bupetehi bwa butu.—1 Makorinte 15:28; Sinulo 20:7-10.a

16. Ki lili f’o bapunyuhi ba ñalelwa ye tuna ba si ke ba tokwa hape lisebelezo ze lifa milatu za Muprisita yo Muhulu?

¹⁶ Kacwalo he, bapunyuhi ba ñalelwa ye tuna ba ka ba ni ku buluka lizwalo le linde ka ku pila mwa munzi wa masabelo o ne u swaniselizwe ku isa kwa mafelelezo a Puso ya Kreste ya Lilimo ze Sikiti. Ka ku ba batu ba ba petehile, ha ba sa na ku tokwa hape lisebelezo za ku lifa milatu za Muprisita yo Muhulu mi ba ka zwa mwatas’a silelezo ya hae. Jesu cwale u ka shwa kwa neku la bona sina Muprisita yo Muhulu, kakuli ha sa na ku tokwa ku sebeza ka ku ba yemela ka mali a’ kenisa a sitabelo sa hae. Ka nako yeo ba ka zwa mwa munzi wa masabelo o ne u swaniselizwe.

17. Ki kabakalañi ku kena mwa munzi wa masabelo o swaniselizwe ni ku pila teñi m’o ha ku si ke kwa ba ko ku tokwahala ku bao ba ba zusiwa mwahal’a Puso ya Kreste ya Lilimo ze Sikiti?

¹⁷ Kana bao ba ba zusiwa mwahal’a Puso ya Lilimo ze Sikiti ya Jesu ba lukela ku kena mwa munzi wa masabelo o ne u swaniselizwe ni ku siyala teñi m’o ku fitela muprisita yo muhulu a shwa? Batili, kakuli ka ku shwa ne ba lifile koto ya buezalibi bwa bona. (Maroma 6:7; Maheberu 9:27) Nihakulicwalo, Muprisita yo Muhulu u ka ba tusa ku fita fa bupetehi. Haiba ba fita mwa tiko ya mafelelezo ka ku kondisa lika hamulaho wa Lilimo ze Sikiti, ni bona Mulimu u ka ba bulela kuli ba lukile ka ku ba fa buikolwiso ka za bupilo bwa kamita fa lifasi-mubu. Ka mo ku inezi fela, ku palelwa ku latelela z’a tokwa Mulimu ku ka tisa katulo ye fa mulatu ni sinyeho kwa batu bafi ni bafi ba ba sa tuli sina babuluki ba busepahali mwa tiko ya mafelelezo.

18. Ka ku ama kwa bulena ni buprisita bwa Jesu, ki sifi se si ka siyala kamita kwa mufuta wa mutu?

¹⁸ Baprisita ba bahulu ba Maisilaele kwa nalulelule ne ba fita fa ku shwa. Kono Jesu u “fetuhile Muprisita yo mutuna wa linako ze sa feli, ka mukwa wa Melekisedeke.” (Maheberu 6:19, 20; 7:3) Kacwalo ku fela kwa situlo sa Jesu sina Muprisita yo Muhulu ya yemela mufuta wa mutu ha ku felisi bupilo bwa hae. Ze nde ze zwa mwa sebelezo ya hae sina Mulena ni Muprisita yo Muhulu li ka siyala ni mufuta wa mutu ku ya ku ile, mi batu ba ka itebuha kamita ku yena kabakala ku sebeza kwa hae mwa mayemo ao. Fahalimu a seo, mwahal’a linako za ku ya ku ile kaufela Jesu u ka fa ketelelo mwa bulapeli bo bu kenile bwa Jehova.—Mafilipi 2:5-11.

Lituto ze Butokwa Hahulu ku Luna

19. Ki tuto mañi ye ama sitoyo ni lilato ye konwa ku itutiwa kwa tukiso ya minzi ya masabelo?

¹⁹ Lu kona ku ituta lituto ze fitana-fitana ku zwelela kwa tukiso ya minzi ya masabelo. Sina ka mutala, ha ku na mubulai ya na ni sitoyo sa bubulai ku mutu y’a bulaile ya n’a lumelezwa ku pila mwa munzi wa masabelo. (Numere 35:20, 21) Kacwalo mutu ya mwa munzi wa masabelo o swaniselizwe u kona ku lumeleza cwañi sitoyo sa ku toya muzwale ku hula mwa pilu ya hae? “Mutu ni mutu ya toile mwanahabo ki mubulai,” ki mwa n’a ñolezi muapositola Joani, “mi mwa ziba kuli ha ku na mubulai ye bupilo bo bu sa feli bu inzi ku yena.” Kacwalo he “lu latane; kakuli lilato li zwa ku Mulimu.”—1 Joani 3:15; 4:7.

20. Kuli ba silelezwe ku Mulifisi wa mali, ki sifi se ba lukela ku eza bao ba ba mwa munzi wa masabelo o ne u swaniselizwe?

²⁰ Kwa neku la ku silelezwa ku mulifisi wa mali, babulai ba ba si ba ka bomu ne ba na ni ku pila mwa munzi wa masabelo ni ku sa yembana ka ku fitelela mafulisezo a ona. Ku cwañi ku bao ba ba mwa munzi wa masabelo o swaniselizwe? Kuli ba silelezwe ku Mulifisi wa mali yo mutuna, ha ba lukeli ku zwa mwa munzi wo. Ka buniti fela, ba tokwa ku itibelela ku z’e ba hohela ku ya kwa lweo lwa mafulisezo, ka mubulelelo o muñwi. Ba lukela ku tokomela kuli ba si ke ba tuhelela lilato la ku lata lifasi la Satani ku hula mwa lipilu za bona. Seo ne si kana sa tokwa tapelo ni buikatazo, kono bupilo bwa bona bu itingile ku seo.—1 Joani 2:15-17; 5:19.

21. Ki musebezi ufi o tahisa mupuzo o swelwi ku eziwa ki bao ba ba mwa munzi wa masabelo wa kacenu?

²¹ Babulai ba ba si ba ka bomu mwa minzi ya masabelo ya kwaikale ne ba na ni ku ba babeleki ba ba tahisa se siñwi. Ka ku swana, “bana ba Isilaele” ba ba tozizwe ba file mutala o munde sina bakutuli ni bashaeli ba Mubuso. (Mateu 9:37, 38; Mareka 13:10) Ka ku ba ‘mazwahule’ ni ‘bakozi’ mwa munzi wa masabelo wa kacenu, Bakreste ba ba na ni litibelelo za fa lifasi-mubu ba na ni tohonolo ya ku eza musebezi o pilisa bupilo wo hamoho ni batoziwa ba ba sa li fa lifasi-mubu. Mi wo ki musebezi o tahisa mupuzo hakalo! Bao ba ba sebeza ka busepahali mwa munzi wa masabelo o ne u swaniselizwe ba ka banduka lifu la kamita le li tiswa ki Mulifisi wa mali. Mwa sibaka sa lona, ba ka fumana lituso za kamita ku zwelela kwa sebelezo ya hae sina Muprisita yo Muhulu yo mutuna wa Mulimu. Kana mu ka zwelapili ku ba mwa munzi wa masabelo mi ni ku pila ku ya ku ile?

[Litaluso za kwatasi]

Ne Mu ka Alaba Cwañi?

◻ Ki kabakalañi ha ku konwa ku bulelwa kuli ba ba eza likiti ze bolule-lule ba fa lifasi-mubu ba na ni mulatu wa mali?

◻ Ki likalulo lifi zeo Jesu Kreste a taleleza ka ku ama kwa mufuta wa mutu?

◻ Munzi wa masabelo o ne u swaniselizwe ki ufi, mi mutu u kena cwañi ku ona?

◻ Batu ba ka lukululwa lili mwa munzi wa masabelo o ne u swaniselizwe?

◻ Ki lituto lifi za butokwa hahulu ze lu kona ku ituta ku zwelela kwa tukiso ya minzi ya masabelo?

[Siswaniso se si fa likepe 31]

Kana mwa ziba likalulo za butokwa hahulu ze talelezwa ki Jesu Kreste?