Ne Ba Ezize Tato ya Jehova

Ku Mamela Manzwi a Jesu a ku Laeza

FA MANZIBUANA a Nisani 14, 33 C.E., Jesu Kreste ni baapositola ba hae ba ba sepahala ba 11 ne ba inzi fa tafule mwa muzuzu wa fahalimu mwa Jerusalema. Ka ku ziba kuli lifu la hae ne li li bukaufi, n’a ba bulelezi kuli: “Ni sa inzi ni mina nakonyana fela.” (Joani 13:33) Ka mo ku inezi fela, Judasi Isikariota n’a li mwa nzila ya hae ku yo lelisana ni banna ba ba maswe ba ne ba bata kuli Jesu a bulaiwe.

Ku ba ne ba inzi mwa muzuzu wa fahalimu wani ne ku si na ni yo mukana ya n’a lemuhile putako ya muinelo ku fita mwa n’a lemuhezi Jesu. N’a ziba hande kuli n’a s’a li bukaufi ni ku nyanda. Jesu hape n’a ziba kuli baapositola ba hae ne ba ka mu yubeka ona mwa busihu b’o. (Mateu 26:31; Zakaria 13:7) Bakeñisa kuli yeo ne li yona nako ya mafelelezo ya Jesu ya ku bulela kwa baapositola ba hae pili a si ka shwa kale, lu kona ku ba ni buniti bwa kuli manzwi a hae a ku laeza n’a tomile fa litaba za butokwa hahulu ka ku fitisisa.

“Mu Eze Cwalo Kuli Mu Ni Hupule”

Ha n’a li ni baapositola ba hae ba ba sepahala, Jesu n’a tomile mukiti o munca o ne u ka yola Paseka ya Sijuda. Muapositola Paulusi n’a u bizize “mulalelo wa Mulena.” (1 Makorinte 11:20, NW) Ka k’u nga sinkwa se si si ka ya mumela, Jesu a lapela. Cwale a komauna sinkwa mi a si fa kwa baapositola ba hae. “M’u nge, mu ce; se, ki mubili wa ka,” ki mwa n’a bulelezi. Cwale a’ nga komoki ya veine, a’ fa tapelo ya buitumelo ni ku i fa kwa baapositola ba hae, ka ku bulela kuli: “Mu nwele mwateñi kaufela. Kakuli se ki mali a ka, a’ sululelwa ba bañata, bakeñisa swalelo ya libi.”—Mateu 26:26-28.

Ki bufi bo ne bu li butokwa bwa kezahalo ye? Sina Jesu ha n’a bonisize, sinkwa ne si yemela mubili wa hae o si na sibi. (Maheberu 7:26; 1 Pitrosi 2:22, 24) Veine ne i yemela mali a Jesu a suluzwi, ili a konahalisa ku swalelwa kwa libi. Mali a hae a sitabelo n’a ka konahalisa hape bulikani bo bunca bo bu mwahal’a Jehova Mulimu ni batu ba 144,000, ili bao kwa nalulelule ne ba ka busa ni Jesu kwa lihalimu. (Maheberu 9:14; 12:22-24; Sinulo 14:1) Ka ku mema baapositola ba hae ku t’o ca kwa mulalelo wo, Jesu n’a bonisize kuli ne ba ka abana ni yena mwa Mubuso wa kwa lihalimu.

Ka ku ama ka za mulalelo wa kupuzo wo, Jesu n’a laezi kuli: “Mu eze cwalo kuli mu ni hupule.” (Luka 22:19) Ee, Mulalelo wa Mulena ne u ka ba kezahalo ya ka silimo ni silimo, sina mo ne i ezezwa Paseka. Hailif’o Paseka ne i li kupuzo ya ku lukululwa kwa Maisilalele ku zwa mwa butanga mwa Egepita, mulalelo wa Mulena ne u ka toma fa ku lukululwa ko kutuna ni ku fita—kwa mufuta wa mutu o konwa ku liululwa kwa butanga bwa sibi ni lifu. (1 Makorinte 5:7; Maefese 1:7) Fahalimu a seo, bao ba ba ca kwa sinkwa ni veine ya swanisezo ne ba ka hupuzwa ka za matohonolo a bona a mwa nako ya kwapili a ku ba malena ni baprisita mwa Mubuso wa Mulimu wa kwa lihalimu.—Sinulo 20:6.

Lifu la Jesu Kreste ne li luli kezahalo ya butokwa ka ku fitisisa ye ezahezi mwa litaba kaufela za mufuta wa mutu. Bao ba ba itebuha seo Jesu n’a ezize ba utwa taelo ya hae ye ama Mulalelo wa Mulena ye li: “Mu eze cwalo kuli mu ni hupule.” Lipaki za Jehova ba eza kupuzo ya lifu la Jesu ka silimo ni silimo fa lizazi le li zamaelela ni Nisani 14. Mwa 1996 lizazi leo li ka ba la Bubeli, la April 2, hamulaho wa ku likela kwa lizazi. Mwa memiwa ka mufutumala ku t’o fumaneha kwa Ndu ya Mubuso ye mwa kalulo ya mina.

“Ni Mi Fa Mulao o Munca”

Kwand’a ku toma fela Mulalelo wa Mulena, Jesu n’a na ni likelezo ze ñwi za ku laeza kwa baapositola ba hae. Ku si na taba ni ku twaezwa ko kunde, bona banna bao ne ba sa na ni ku ituta ze ñata. Ne ba si ka utwisisa ka ku tala mulelo wa Mulimu kwa neku la Jesu, kwa neku la bona, kamba kwa neku la za kwapili. Kono Jesu n’a si ka lika ku utwahaza zona litaba zeo kaufela ka nako ye. (Joani 14:26; 16:12, 13) Mwa sibaka sa seo, n’a bulezi ka za nto yeo ñwi ya butokwa bo butuna. “Ni mi fa mulao o munca,” ki mwa n’a bulelezi, “kikuli mu latane; sina mo ni mi latezi, ni mina mu latane cwalo.” Cwale Jesu n’a ekelize kuli: “Se ba ka ziba batu kaufela kuli mu balutiwa ba ka ka sona, ki ha mu latana.”—Joani 13:34, 35.

Ona w’o ne u li “Mulao o Munca” ka nzila ifi? Kihona, Mulao wa Mushe ne u laela kuli: “U late wahenu m’o itatela.” (Livitike 19:18) Nihakulicwalo, Jesu n’a taluselize balutiwa ba hae ku bonisa lilato la ku ifana sitabelo ili le ne li ka fita fa sipimo sa ku fa bupilo bwa hae mutu kwa neku la Bakreste ba bañwi. Ka buniti fela, ‘mulao wa lilato’ ne u ka sebeza ni mwa miinelo ye si ye t’ata hahulu. Mwa miinelo kaufela mulateleli wa Jesu Kreste n’a k’a nga muhato mwa ku bonisa lilato mwa ku tusa ba bañwi kwa moya ni mwa likalulo ze ñwi.—Magalata 6:10.

Fa busihu bo bwa mafelelezo mwa bupilo bwa Jesu bwa fa lifasi-mubu, lilato ne li susuelize Jesu ku lapela ku Jehova Mulimu kwa neku la balutiwa ba hae. Mwa kalulo ya tapelo ya hae, n’a kupile kuli: “Ba mwa lifasi; mi na, ni taha ku Wena. Ndate ya Kenile, u buluke ka Libizo la hao b’o ni file, kuli ba be a li muñwi sina luna.” (Joani 17:11) Ki nto ye hoha mamelelo kuli mwa kupo yeo ku Ndat’ahe, Jesu n’a lapelezi swalisano ye lilato ya balutiwa ba hae. (Joani 17:20-23) Ne ba tokwa ku ‘latana sina mwa n’a ba latezi Jesu.—Joani 15:12.

Baapositola ba ba sepahala ne ba mamezi mañwi a Jesu a ku laeza. Ni luna hape lu swanela ku swalisana ni litaelo za hae. Mwa “mazazi a maungulelo” a t’ata a, lilato ni swalisano mwahal’a balapeli ba niti ki za butokwa hahulu ku fita lili kaufela. (1 Timotea 3:1) Ka mo ku inezi fela, Bakreste ba niti ba utwa litaelo za Jesu ni ku bonisa lilato la sizwale. Seo si kopanyeleza ku utwa taelo ya hae ya ku hupula Mulalelo wa Mulena.