2 NOA
Wakapisha ba pa buloba
BIDIMU bia bungi Henoka mumane kufua, banjelu bakatombokela Nzambi. Dijinga diabu dikole dia kusangila ne bakaji diakabasaka bua kulua pa buloba, kuvualabu mibidi ya bantu. Bavua bakuata mukaji yonso uvuabu basue, bamuvuija mukajabu. Bana bavua banjelu abu balele ne bakaji bavua bantu ba mpolondo bavua ne tshikisu tshia bungi. Bavua bababikila ne: Banefilima. Bua tshikisu tshiabu, bantu bonso bakatuadija kuenza malu mabi bikole. Bua bualu abu, bantu bimpe bavua Nzambi mufuke bakanyanguka. Kadi kuvua muntu umue uvua mushilangane nabu bonso: Noa munkana wa Henoka.
Noa wakalua muntu muakane anu bu Henoka. Bible udi wamba ne: “Noa wakenda ne Nzambi mulelela.” Wakasela, kulelabu bana ba balume basatu. Bakabalongesha mua kutumikila Yehowa. Ke bualu kayi, bavua bashilangane ne bantu bakuabu.
Dimue dituku, Yehowa wakambila Noa ne: uvua mupangadije bua kubutula bantu babi bonso bavua pa buloba. Kumuambilaye bua kuenza buatu bunene bua kukuba mioyo ya bantu ne ya nyama. Katshia Noa kavua muanji kumona Mvula wa kabutu wa buena uvua Yehowa mumuambile ne: uvua ne bua kulokesha to. Bualu bukuabu budi ne: kavua muanji kuenza buatu bua bunene buvua Yehowa mumuambile abu to. Bu muvuaye ne ditabuja mu milayi ya Yehowa, wakatuadija kuenza buatu.
Noa ne dîku diende bavua banyunguluka kudi bantu ba tshikisu bavua ne bukole bua bungi bavua bakine mukenji wabu ne mudimu wabu
Bivua bilombe Noa ne bena mu dîku diende dikima dia bungi bua kuenza mudimu au. Bualu, pamuapa, bantu bavua babaseka anyi babaluisha bikole. Banjelu bavua bavuale mibidi ya bantu abu bavua benza buôwa, ne bana bavuabu balele bavua benzela bantu malu a tshikisu. Kadi Noa, mukajende, ne bana bende basatu ne bakaji babu bakatungunuka ne kuenza buatu. Mudimu au wakabangata pamuapa bidimu 50 anyi kupita apu. Bantu 8 abu bavua bawenza dituku dionso.
Noa uvua wenza kabidi mudimu mukuabu. Bible udi umubikila ne: “Muyishi wa buakane.” Bu muvuaye mfumu wa dîku, uvua ntunga mulongo mu didimuija bantu bua Mvula wa kabutu. Kadi muntu nansha umue kakabateleja to. Bidi bimueneka ne: too ne balela bende ba bungi kabakabateleja to. Bantu kabavua basue kulekela kuenza malu mabi to. Noa uvua mushilangane bikole ne bantu bakuabu bua ditabuja diende. Ke bualu kayi Bible udi wamba ne: “Ku diambuluisha dia ditabuja edi wakapisha ba pa buloba.”
Ndekelu wa bionso, Noa ne bena mu dîku diende bakajikija kuenza buatu. Kutuadijabu kubueja biakudia, mâyi, ne bintu bikuabu bivuabu nabi dijinga mu buatu. Pashishe bualu bua dikema buakenzeka: nyama ya mishindu yonso, milume ne mikaji, yakalua miele mulongo mitangile ku buatu. ‘Yakabuela ibidi ibidi, mulume ne mukaji, kudi Noa mu buatu.’
Yehowa ukavua muambile Noa ne bena mu dîku diende bua kubuela mu buatu bualu kukavua kushale matuku muanda mutekete bua mvula kuloka. Difuanyikijilabi muvuabu mua kuikala baditue mu mudimu wa kubueja kantu konso kavuabu mua kuikala naku dijinga mu buatu ne bateka bintu bionso bikavuamu mu bulongame. Pamuapa bantu bavua babaseka bikole bua bualu abu. Bobu bamane kubueja bintu bionso, Yehowa nkayende wakakanga tshiibi tshia buatu. Bualu abu buvua mua kuikala bupuwishe bena tuseku abu. Mvula kutuadija kuloka! Wakaloka matuku 40. Mâyi kubuikilawu too ne nsongo ya mikuna. Ke muakabutula Yehowa bantu babi pa buloba nanku.
Noa ne dîku diende bakashala mu buatu matuku mapite pa tshidimu tshijima, bindile bua mâyi a mvula apueke pa buloba. Ndekelu wa bionso, mâyi akapueka buatu kuimanabu pa mukuna. Ke Yehowa kuambila Noa bua kupatuka mu buatu. Bakamulambula milambu bua kumuleja dianyisha dia muvuaye mubapandule. Yehowa wakabalaya ne: kavua ne bua kulokesha kabidi mvula wa nanku to. Wakateka muanza nkongolo bua wikale tshijadiki tshia mulayi au.
Bantu bonso badiku lelu mbafumine mu dîku dia Noa. Tudi ne dianyisha dia bungi bua muvuabu benze malu ne dikima ne bua muvuabu bashilangane ne bantu babi ba tshikondo atshi!
Bala bualu ebu mu:
Lukonko lua kuelela meji:
Mmushindu kayi uvua Noa muenze malu ne dikima?
Buela mu buondoke
1. Malu avua mushindu kayi kumpala kua Mvula wa kabutu kuloka? (w02 1/3 5 §3–6 §4)
2. Ndîba kayi divua Nzambi muambile Noa bua kuenza buatu? Ndîba kayi divua Nzambi muambile Noa ne: Mvula wa kabutu uvua ne bua kubangisha kuloka? (w12 15/4 23 §5-8)
3. Ntshinyi tshidi tshitujadikila ne: Mvula wa kabutu uvua muloke? (ijwbq tshiena-bualu tshia 156 §2-5-wcgr, kazubu) A
Historic Collection/Alamy Stock Photo
Tshimfuanyi tshia A: Muanu mukuabu wa mu Inde utu wakula bua muntu uvua muenze buatu bua kupanduka ku mvula wa kabutu. Pakakama mvula au, wakafila mulambu, pashishe kuluaye nkambua wa bantu bonso
4. Mbualu kayi buvua buenzeke bidimu bipite pa lukama panyima pa Mvula wa kabutu? Ntshinyi tshivua bualu abu buenzele Noa ukavua mukulakaje? (it “Noa” No. 1 §12-wcgr) B
Tshimfuanyi tshia B
Keba malongesha
Nku tshinyi kudi matuku etu aa mafuanangane ne a Noa? (Mat. 24:36-39)
Ntshinyi tshidi tshilejilu tshia Noa tshikulongeshe bua mudibi ne mushinga bua kuikala . . .
mudilongolole? C
Tshimfuanyi tshia C
muenji wa mudimu? D
Tshimfuanyi tshia D
muena lutulu? E
Tshimfuanyi tshia E
Mmunyi muudi pebe mua kuenza malu ne dikima bu Noa?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Noa pabishibuaye ku lufu?
Bia kutangila kabidi
Mona mudi mfumu wa dîku udienzeja bikole bua kuidikija Noa.
Enza bua muyuki wa Noa eu ulongeshe bana bebe.
“Noa uvua ne ditabuja kudi Nzambi” (ijwis tshiena-bualu tshia 18-wcgr)