Wakabenga bua kupingana

SALA uvua mukaji wa Abalahama. Bavua basombele mu Ula mu buloba bua Shinâ, tshimenga tshinene tshivua tshinyunguluka kudi musulu mualabale wa Efelata. Bantu ba mu Ula amu bavua batendelela mpingu. Kadi Abalahama ne Sala kabavua bobu batendelela mpingu to. Bavua batendelela anu Yehowa, Nzambi umuepele mulelela. Kadi dimue edi, biakalomba Sala bua kuikala ne ditabuja dikole ne dikima dia bungi.

Abalahama wakamuambila ne: Yehowa uvua muakule nende! Sala uvua ne bua kuikala mumvue disanka dia bungi menemene. Kadi bualu buvua Yehowa muambile Abalahama bua kuenza kabuvua bupepele to. Uvua mumuambile bua bashiye nzubu wabu ne balela babu mu Ula, baye kusombela kule. Bavua ne bua kuenza luendu lule, benda basombela mu ntenta. Sala kavua kabidi mua kusombela mu tshimenga tshiabu muvua bukubi to. Kavua kabidi mua kusombela mu nzubu munene wa buena uvuaye nende, uvua ne mâyi munda, anyi kuikala ne lupangu peshi nsombelu wa manyi uvuaye nende to. Kuvuaye uya kakuvua tshisalu to. Uvua ne bua kutuilangana ne nsombelu mikole ya bungi. Nansha nanku, wakitaba bua kuyaku. Wakeyemena Yehowa, kusuikaye bintu biende, kulayanganaye ne bena mu dîku diende ne balunda bende, ne kuasabu luendu ne Abalahama batangile muaba uvuabu kabayi bamanye to.

Sala wakenza malu ne dikima mu mushindu mukuabu. Kakajinga bua kupingana kuabu to. Bivua bipepele bua yeye kujinga nzubu wende wa mu Ula ne muvuaye udiumvuamu mu bukubi. Mupostolo Paulo wakalua kufunda bua bualu buende ne bua Abalahama ne: “Bu bobu batungunuka ne kuvuluka muaba uvuabu bafumine, bavua mua kupeta mushindu wa kupinganaku.” (Eb. 11:15) Kadi wakabenga bua kupinganaku. Wakenza malu ne dikima, kubengaye kujinga bivuaye mushiye.

Pakafikabu mu Kanâna, Sala wakamona ne: kamuvua musulu wa mâyi bu wa Efelata uvua bangenda mushinga balua mu mazuwa ne biakudia ne bintu bikuabu bivuabu mua kusumba to. Ke bualu kayi pakabuela tshiyole tshia nzala, bakumbukamu bualu kabavua ne tshikuabu tshia kuenza to. Sala kakela bayende mutoyi bua bapingane muabu mu Ula bua tshiyole tshia nzala atshi to. Kadi bakaya mu Ejipitu.

Bu muvua Sala muimpe kumona, Abalahama uvua ne buôwa bua ne: bavua mua kumushipa bua muntu mukuabu ashale nende. Sala uvua muenzejibue bua kuambila bantu ne: Abalahama uvua muanabu. Kadi kuamba nanku kakuvua ne bua nsongo kudi Palô pakamuambilabu ne: Sala uvua mukaji muimpe kumona to. Wakatuma dîyi bua bamunyenge kudi Abalahama ne baye nende kudiye mu dibalasa dia bukalenge. Nsombelu wa mu dibalasa amu uvua mua kuikala umueneka muimpe kupita dienda disombela mu ntenta. Kadi Sala wakalekela Abalahama kuyaye kusomba ne Palô anyi? Tòo. Wakenza malu ne dikima, kushalaye ne lulamatu kudi bayende. Ke Yehowa kuenza bua kamunyengi kudi Abalahama to; pashishe wakapingana kudi munanga wende Abalahama.a

Yehowa ukavua mulaye ne: tshisamba tshinene tshivua ne bua kupatukila mu ndelanganyi ya Abalahama. Kadi Sala kavua mulele to. Bua bualu abu, wakabungama. Bobu bamane kuenza bidimu bia bungi mu Kanâna amu, Yehowa wakamubenesha. Nansha mukavuaye ne bidimu 90, Yehowa wakamukumbajila tshivuaye ujinga: yeye kulela muana wa balume. Yehowa wakabambila bua binyike muana au ne: Izaka. Dîna didi diumvuija “Tuseku.” Uvua mubambile nanku bualu bavua baseke pavuaye mubamanyishe ne: bavua ne bua kulela muana wa balume. Sala uvua kabidi mutuishibue ne: bantu bavua ne bua kuseka pamue nende pavuabu bumvua bua tshishima tshivua Nzambi mumuenzele atshi.

Sala wakashala ne muoyo matuku a bungi, kukoleshaye muanende Izaka too ne muakaluaye muntu uvua munange Nzambi. Izaka uvua munange Nzambi bualu mamuende uvua muledi muimpe ne uvua muenze malu ne dikima bua kumukuba pavuabu bamuseka ne bamukengesha. Sala wakashala mutuishile mêsu ende ku malu mimpe avua mamuindile too ne muakafuaye, kayi ujinga nsombelu muimpe uvuaye nende kumpala to. Yeye ne bena mu dîku diende kabavua bamone dikumbana dia milayi ya Yehowa to. Kadi tudi batuishibue ne: milayi ayi ikadi pa kukumbana.

Bala bualu ebu mu:

• Genese 12:1-20; 15:18; 16:1, 2; 17:3-8, 15-19; 18:9-15; 20:1-17; 21:1-13

• Bienzedi 7:1-7

Lukonko lua kuelela meji:

Mmushindu kayi uvua Sala muenze malu ne dikima?

Buela mu buondoke

1. 1. Bivuaku bibi bua Sala kusedibua kudi Abalahama nansha muvuaye muanabu anyi? (wp17.3 12 §5, dim.)

   Andamuna

2. 2. Umvuija muvua nsombelu uvua Sala mushiye mu Ula. (wp17.3 13 §3–14 §2) A

   Andamuna

   

   Foto mukuata ne dianyisha dia British Museum

3. 3. Ntshinyi tshidi tshileja ne: Abalahama uvua muenze malu ne meji pavuaye kayi muambile bantu ne: Sala uvua mukajende? (wp17.3 14 §6–15 §2)

   Andamuna

4. 4. Nansha muvua Sala ukokela Abalahama, kavua ne tshivuaye umuambila anyi? Umvuija. (g 1/08 29 §4-5-wcgr) B

   Andamuna

   

Keba malongesha

• Fuanyikija Sala ne mukaji wa Lota.

  • Nku tshinyi kudi nsombelu yabu mifuanangane? (Gen. 12:1; 13:5-7; 19:12, 15)

    Andamuna

  • Nku tshinyi kudi nsombelu yabu mishilangane? (Gen. 19:17, 26; Luka 17:28-32)

    Andamuna

  • Mapangadika avuabu bangate ne bipeta biawu bidi mua kutulongesha tshinyi?

    Andamuna

• Sala uvua mukaji muimpe kumona ne bayende uvua mubanji. Tuetu bikale ne nsombelu wa buena uvuaye nende, tshilejilu tshiende tshidi tshitulongesha tshinyi? (Nsu. 31:30; 1 Tim. 6:17-19)

  Andamuna

• Mmunyi muudi pebe mua kuenza malu ne dikima bu Sala? C

  Andamuna

  

Lepesha meji

• Bualu ebu budi bundongesha tshinyi bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Sala pabishibuaye ku lufu?

  Andamuna

Bia kutangila kabidi

Tshilejilu tshia Sala tshidi tshitangila anu bakaji basela anyi tshidi mua kulongesha kabidi balume?

Bilejilu biabu bikulongeshe​—Sala (6:27)

Mona malu avua Sala ne Abalahama benzabua yonso wa kudibu adimone munemekibue.

“Enza bua ‘ludimi lua kapia ka Yahʼ luikale anu lukole” (w23.05 24-25 15-17)