Wakenza malu ne dikima pavuaye ne butekete

SHIMISHONA uvua mu nsombelu mukole. Wakenza tshilema tshinene tshia kuambila muntu mukuabu kuvua bukole buende bufumina. Bua bualu abu bena Peleshete bakamukuata kumushipabu mêsu, kumuelabu mu buloko, ne kumuenzejabu mudimu bu mupika. Nansha mutshivuaye kayi umona, uvua umvua muvua bena Peleshete bamuseka, baseka ne Yehowa Nzambi wende. Shimishona uvua mumanye ne: tshilema tshivuaye muenze ke tshivua tshimufikishe mu nsombelu au. Shimishona mmuntu uvua utamba kuenza malu ne dikima mu nsombelu wende. Uvua kabidi mua kukumbana bua kuenza malu ne dikima mu nsombelu uvuaye ne butekete au anyi?

Shimishona uvua mulumbuluishi mu Isalele. Kadi uvua mushilangane ne balumbuluishi bakuabu. Mmushindu kayi uvuaye mushilangane nabu? Balumbuluishi bakuabu bu mudi: Balaka, Gideona, ne Yefeta bavua bobu baya ne biluilu ku mvita bua kuluangana ne baluishi ba Nzambi. Kadi Shimishona yeye uvua uya kuluangana misangu ya bungi anu nkayende. Wakashipa bena Peleshete ba bungi yeye nkayende. Tumonayi muvua malu matuadije.

Muanjelu wa Yehowa wakambila baledi ba Shimishona ne: nebalele muana, ne neenzele Yehowa mudimu bu Munazi matuku ende onso a muoyo. Kapaya kakavua ne bua kupita ku mutu kuende to. Pavuaye utumikila bionso bivuabu balomba banazi, Yehowa uvua umupesha bukole bua dikema. Dimue dituku wakapanda ntambue mu bitupa bibidi anu ne bianza biende. Uvua utshimuna bena Peleshete bavua bakengesha bena Isalele ku bukole buvua Nzambi mumupeshe abu.

Musangu mukuabu pavua Shimishona mushipe bena Peleshete ba bungi, bena Isalele bakumvua buôwa bua ne: bavua mua kulua kudisombuela. Nanku bakamusuika kumufilabu mu bianza bia bena Peleshete. Kadi wakakosolola mionji ivuabu bamusuike ayi bienze anu bu ne: ivua mienza ne manda a line. Pashishe wakashipa bena Peleshete 1 000 ne mufuba wa ku lubanga lua mpunda. Dituku dikuabu pakayaye mu tshimenga tshia Gaza, baluishi bende bakamualamina ku tshibueledi tshia tshimenga butuku bujima bua kumushipa mu dinda. Kadi wakajuka mundankulu, kujomonaye biibi bia tshimenga ne makunji abi abidi a mu nseke ne mulonda watshi wa kutshiamakajaku. Pashishe wakabituntumuna pa makaya ende, kubandaye nabi ku mutu kua mukuna ntanta wa kilometre mitue ku 60 pabuipi ne Hebelone.

Shimishona wakatshimuna bena Peleshete misangu ne misangu. Wakabaleja muvua nzambi yabu bu mudi Dagona kayiyi mua kubambuluisha bua kutshimuna muena mudimu wa lulamatu wa Yehowa. Kadi bena Peleshete bakapeta mushindu muimpe wakumukuata. Bakabambuluisha kudi mukaji mukuabu diende Delila.

Shimishona wakananga Delila, kadi Delila yeye wakamutungila tshitungu. Bena Peleshete bakamukosa mishiku bua abambile kuvua bukole bua Shimishona bufumina. Delila wakela Shimishona mutoyi bua amuambile anu kuvua bukole buende bufumina. Shimishona wakateketa, kumuambilaye kuvua bukole buende bufumina. Wakamuambila ne: bobu bamukungule nsuki, bukole buende nebujike. Delila wakindila too ne pakalalaye, pashishe wakabikila muntu bua amukungule nsuki. Shimishona katshivua kabidi ne bukole buende abu to. Bible udi wamba ne: “Yehowa ukavua mumulekele.” Bena Peleshete bakalua ne lukasa luonso, kumukuatabu ne kumutonkonabu mêsu.

Bakaya nende, kumuenzejabu mudimu mukole wa kupela ntete. Bena Peleshete bavua mu masanka, bualu muntu uvua muluishi wabu munene ukadi mpindieu mupika wabu. Bakalongolola difesto dinene bua kuela nzambi wabu Dagona tuasakidila. Pakafika dituku dia difesto, bakadisangisha ba bungi mu ntempelo munene. Kuvua bantu batue ku binunu 3 bavua bobu ku mutu kua nzubu. Bakapatula Shimishona mu buloko, kumuimanyikabu pankatshi pa makunji manene abidi bua kumuseka. Dîba adi nsuki yende ikavua mituadije kutoloka kabidi ne uvua unyingalala bikole bua tshilema tshiende.

Wakakuata ku makunji, kulombaye Yehowa bua amupeshilule bukole. Wakalomba Yehowa ne: “Mvuluka koku ne mpesha koku bukole, anu bua musangu eu Nzambi wanyi,” pashishe wakela dîyi ne: “Mfue ne bena Peleshete!” Wakasakila makunji ne bukole buende buonso, owu kutuadija kunyungakana, kukulukawu kumpala kua bena Peleshete kumupangisha bua kuasakila. Ke ntempelo mujima kupuka. Au ke musangu wa ndekelu uvua Shimishona muenze malu ne bukole buende abu. Bungi bua baluishi ba Nzambi bavuaye mushipe pakafuaye buvua bupite bua bavuaye mushipe pavuaye ne muoyo.

Panyima pa bidimu bia bungi mupostolo Paulo wakaleja ne: Yehowa uvua muvuije bamue batendeledi bende bakole pavuabu ne butekete. Kumpala kua kulejaye bualu abu, wakatela Shimishona muntu wa dikima mu batendeledi ba Yehowa bavua ne ditabuja dikole.​—Eb. 11:32-34.

Bala bualu ebu mu:

• Balumbuluishi 13:1–16:31

Lukonko lua kuelela meji:

Mmushindu kayi uvua Shimishona muenze malu ne dikima?

Buela mu buondoke

1. 1. Mmunyi muvuabi mua kuenzeka ne: Shimishona alenge bitalu kadi ashale anu Munazi? (w05 15/1 30 §1–31 §1)

   Andamuna

2. 2. Ntshinyi tshidi tshileja ne: nyuma wa Nzambi uvua muambuluishe Shimishona bua kutuntumuna tshiibi ne milonda yatshi kumbukila ku Gaza too ne ku Hebelone? (w04 15/10 15 §7-8) A

   Andamuna

   

3. 3. Ntshinyi tshidi tshileja ne: Delila uvua mua kuikala muena Isalele? (w05 15/3 28 §2)

   Andamuna

4. 4. Bua tshinyi Shimishona uvua musambile bua kudisombuela bua “dimue dia ku mêsu [ende] abidi”? (Bal. 16:28; it “Shimishona” §10-wcgr)

   Andamuna

Keba malongesha

• Shimishona wakambila Delila bualu buvuaye kayi mua kumuambila pavuaye mumuele mutoyi wa bungi menemene. Bualu ebu budi bulongesha bakulu ne bakaji babu tshinyi? B

  Andamuna

  

• Shimishona uvua muenze tshilema tshinene, kadi Yehowa wakalua kukuata nende mudimu mu mushindu wa dikema. Muena Kristo yeye muenze tshilema, mmunyi mudi tshilejilu tshia Shimishona mua kumuambuluisha bua kutungunuka anu ne kuenzela Yehowa mudimu?

  Andamuna

• Mmunyi muudi pebe mua kuenza malu ne dikima anu bu Shimishona?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Shimishona pabishibuaye ku lufu?

  Andamuna

Bia kutangila kabidi

Longesha bana bebe tshivua tshivuije Shimishona muntu wa bukole bua bungi.

“Nyuma muimpe wakapesha Shimishona bukole” (ijwis tshiena-bualu tshia 14-wcgr)

Bualu bua Shimishona budi mua kutulongesha malu kayi makuabu?

“Eyemena Yehowa anu muakamueyemena Shimishona” (w23.09 2-7)