21 SAMUELE
Muana wa balume wakamanyisha mukenji wa Yehowa ne dikima
NSOMBELU wa Samuele uvua mufuanangane ne wa muana wa bakaji wa Yefeta ne wa Shimishona mu bualu ebu: baledi babu bavua batumikila Yehowa, ne bualu abu buvua bubambuluishe bikole. Bavua balambule Samuele kudi Yehowa bua amuenzele mudimu wa tshijila matuku ende onso a muoyo anu bu muvuabi bua muana wa bakaji wa Yefeta. (1 Sam. 2:11) Samuele uvua munazi matuku ende onso a muoyo anu bu Shimishona. (Bal. 13:7) Bonso basatu bavua dijinga ne dikima.
Pakalekeshabu Samuele dibele, patshivuaye pamuapa ne bidimu bisatu anyi kupita apu kakese, mamuende Hana wakaya nende ku ntenta wa tshitendelelu wa Yehowa uvua mu tshimenga tshia Shilo bua enzele Yehowa mudimu anu bu mukavuaye mumulaye. Kadi uvua uya kumutangilaku tshidimu tshionso, umutuadila tshilamba tshipiatshipia tshia kuluata. Samuele uvua mukolele kudi muakuidi munene Eli ukavua mukulakaje. Pamuapa bamue bakaji bavua bambuluisha ku ntenta wa tshitendelelu aku bavua pabu bamutabalela.
Kadi bantu bavua benza malu mabi ku ntenta wa tshitendelelu wa Yehowa. Eli uvua mubatangile kayi ubakandika to. Bana bende ba balume babidi, Hofeni ne Pinehasa, bavua benza malu mabi. Bavua benda masandi ne bamue bantu bakaji bavua benzaku midimu. Kabavua banemeka milambu ivua bantu balua nayi bua kulambula Yehowa to. Bidi bimueneka ne: pavua bantu balua ne milambu, Hofeni ne Pinehasa bavua batumina benji ba mudimu dîyi bua babanyenge bitupa bitambe buimpe bia milambu yabu kumpala kua kuyilambulabu Yehowa. Eli uvua mumanye tshivua bana bende benza atshi. Kadi kavua ubakanyina ne dîsu dikole to, ke bualu kayi bavua balengulula mibelu yende. Nansha muvua Samuele musombe ne bantu bavua benza malu mabi, wakasemena pabuipi ne Yehowa pavuaye wenda ukola; bantu kumunangabu kabidi bikole. Pakakumbana tshikondo tshia Yehowa kulongolola malu mu tshimenga tshia Shilo, wakasungula Samuele utshivua muana bua ashale mufidi wende wa mukenji.
Dituku dikuabu butuku, Samuele wakatabuluka ku tulu pakumvuaye dîyi dimubikila. Yehowa ke uvua umubikila! Kadi yeye kuela meji ne: Eli ukavua mukulakaje ne katshiyi umona ke uvua umubikila, ke kuyaye lubilu kudiye bua kumuebeja tshivuaye umubikidila. Eli wakamuambila bua apingane pa bulalu bualu kavua mumubikile to. Bualu bumue abu kuenzekabu misangu mikuabu ibidi. Ndekelu wa bionso, Eli wakamona ne: Yehowa ke uvua umubikila, kumuambilaye ne: “Ndaku ulale, yeye mukubikile, wambe ne: ‘Akula, Yehowa, bualu muena mudimu webe udi uteleja.’” Ke tshiakenza Samuele.
Yehowa wakamubikila musangu muinayi ne: “Samuele, Samuele!” Yeye kumuandamuna ne: “Akula, bualu muena mudimu webe udi uteleja.” Yehowa wakamuambila ne: uvua ne bua kulongolola malu ku Shilo ne kunyoka Eli bua muvuaye kayi ukandika bana bende bua kuenza malu mabi to. Uvua ne bua kunyoka Eli ne dîku diende dijima pamue ne bana bende ba balume abu. Samuele uvua ne bua kuambila Eli malu onso aa!
Samuele wakashala pa bulalu too ne mu dinda. Bible kena uleja ni wakamona kabidi tulu to. Pakatshiabu, wakajuka bua kuya kukangula biibi bia lubanza lua ntenta wa tshitendelelu. Bidi biumvuika mudi Bible wamba ne: “Samuele uvua utshina bua kuambila Eli bua tshikena kumona” atshi. Eli wakamubikila, kumuebejaye bualu buvua Nzambi mumuambile. Pamuapa bu muvuaye mumone ne: uvua utshina, wakamuambila ne: “Kubunsokoki koku to.”
Nansha mutshivua Samuele muana, wakamanyisha Eli Muakuidi munene mukenji wa dinyoka wa kudi Yehowa
Kabivua bipepele bua Samuele to. Pamuapa uvua unemeka Eli anu bu muvuaye mua kunemeka kakuende. Uvua umunemeka bualu uvua muakuidi munene wa tshisamba tshia Isalele. Nansha nanku, wakamumanyisha tshionso tshivua Yehowa mumuambile. Nanku Eli wakamanya ne: diakabi dikavuabu bamanyishe dikavua pa kukuata dîku diende. Kadi biakamufikishaku ndekelu wa bionso ku ditandisha bana bende bua malu abu mabi anyi? Kakuena tshidi tshileja nanku to.
Yehowa wakabenesha Samuele bikole bua muvuaye muenze malu ne dikima. Bible udi wamba ne: “Yehowa nkayende uvua nende.” Kutuadijila apu, Samuele wakalua muprofete wa Yehowa, ne Yehowa ‘kakalekela dîyi nansha dimue dia ku mêyi onso avua [Samuele] wamba dipanga kukumbana’ to. Mêyi onso avua Samuele muambe bua Eli ne bua bana bende akakumbana. Munkatshi mua bidimu bia bungi biakalonda, Yehowa wakateka Samuele bua kulombola Isalele. Uvua muprofete ne mulumbuluishi mu Isalele. Wakalonga mua kuenza malu ne dikima katshia ku buana buende, ne wakatungunuka ne kuenzela Yehowa mudimu ne lulamatu matuku ende onso a muoyo.
Bala bualu ebu mu:
Lukonko lua kuelela meji:
Mmushindu kayi uvua Samuele muenze malu ne dikima?
Buela mu buondoke
1. Ku Shilo kuvua ntenta wa tshitendelelu wa Yehowa kuvua mushindu kayi? (w92 1/11 8-9-wcgr) A
Todd Bolen/BiblePlaces.com
Tshimfuanyi tshia A: Muaba uvua tshimenga tshia Shilo ku kale
2. Nsombelu wa Samuele uvua mushindu kayi ku ntenta wa tshitendelelu? (ia 61-62 §9-13) B
Tshimfuanyi tshia B
3. Mmu ngumvuilu kayi muvua Samuele ‘kayi muanji kufika ku dimanya Yehowa’ patshivuaye muana? (1 Sam. 3:7; w02 15/12 8 §5-6)
4. Mmunyi muvua mêyi a buprofete avua atangila dîku dia Eli makumbane? (it “Eli, I” §5-7-wcgr)
Keba malongesha
Anu bu Samuele, mmunyi mudi bana mua . . .
kutumikila bantu bonso? (1 Sam. 3:5)
kunemeka bantu bonso? (1 Sam. 3:6-10)
kuikala bantu ba kueyemena? (1 Sam. 3:15) C
Tshimfuanyi tshia C
Ndîba kayi didibi ne mushinga bua muana kuakuila tshidi tshimpe? Mmunyi mudi tshilejilu tshia Samuele mua kumuambuluisha?
Mmu mushindu kayi mukuabu muudi pebe mua kuenza malu ne dikima bu Samuele?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Samuele pabishibuaye ku lufu?
Bia kutangila kabidi
Ndîba kayi didibi mua kulomba bansonga ne bakulumpe dikima dia kuenza tshidi tshimpe?
Patshivua Samuele muana, bantu bavuaye usomba nabu kabavua batumikila Yehowa to; kadi yeye uvua umutumikila.
“Samuele wakenzela Yehowa mudimu” (ijwis tshiena-bualu tshia 15-wcgr)