29 ELIYA
“Nzambi wanyi n’Yehowa”
BIBLE udi utuadija kuakula bua Eliya kayi utumanyisha tshidiye to. Musangu wa kumpala udiye umutela, mpadiye uya kumanyisha mukalenge Ahaba mukenji wa dilumbuluisha wa kudi Yehowa. Bakalenge ba kumpala 6 bavua bakokeshe mu bukalenge bua bisa 10 bia Isalele bavua babi menemene. Ahaba uvua wa 7. Uvua bayende wa Yezabele mukalenge mukaji mubi wa mu buloba bua Sidona. Yehowa uvua umumona mubi mupite 6 bavua kumpala kuende abu. Ahaba uvua mutendeledi wa mpingu, kadi mukajende uvua mubi kumupita, uvua mutendeledi wa Bâla. Batendeledi ba Bâla bavua balambula nzambi au bana. Yezabele wakafikisha bayende ne bena Isalele bakuabu ku ditendelela Bâla. Kadi dimue dituku, Eliya wakaya kudi Ahaba. Yehowa uvua mumutume bua amuambile dinyoka divuaye ne bua kupeta.
Bua Eliya kufika kuvua Ahaba uvua ne bua kuenza luendu lule, umbuka ku Gilada too ne ku Samalea. Kaluvua luendu lupepele to, bualu uvua uluenzela mu njila ya mabue. Pakafikaye mu Samalea, wakaya ku dibalasa ditambe buimpe dia Ahaba. Bible udi mene udibikila ne: “Nzubu wa mibanga,” pamuapa bua muvuadi dimueneka. (1 Bak. 22:39) Difuanyikijilabi Eliya muvuale bilamba bia biseba ne mukaba mule wa tshiseba muimane kumpala kua mukalenge, umuleja ne: kutuadijila ku dituku adi, mvula kavua ne bua kuloka kabidi to. Yehowa uvua ne bua kutuma munanga uvua ne bua kunenga bidimu bia bungi too ne pavua Eliya ne bua kumanyisha diloka diende kabidi. Biakamulomba dikima bua kumanyisha Ahaba mukenji eu wa ne: Bâla uvuabu bamona bu nzambi wa mvula kavua ne bukole to, uvua ne bua kupanga kulokesha mvula. Bikalabi ne: Yezabele uvua muteleje mukenji wa Eliya au, uvua bushuwa mufiike tshiji.
Nkuepi kuvua Eliya mupetele dikima dia kubamanyisha dilumbuluisha dia kudi Yehowa adi? Mushindu uvuaye muakule bua Yehowa udi uleja kuvuaye mupetele dikima. Wakatuadija ne mêyi a ne: “Bushuwa, anu bu mudi Yehowa Nzambi wa Isalele undi ngenzela mudimu muikale ne muoyo.” Miaku ya mu tshiena Ebelu idibu bakudimune ne: “Undi ngenzela mudimu,” idi yumvuija ku muaku ku muaku ne: “Muena kumpala kundi ngimana.” Pavua Eliya umanyisha Ahaba mukenji au uvua muimane kumpala kuende yeye mukalenge wa bukole. Kadi uvua muvuluke bualu bua mushinga mukole bua ne: bu muvuaye muprofete wa Yehowa, uvua muimane bushuwa kumpala kua Nzambi. Ahaba ne Yezabele bavua bakokeshi ba kutshina bavua ne bukole, kadi kabavua ne bua nsongo kumpala kua Yehowa to. Bualu abu ke buvua mua kuikala bupeteshe Eliya dikima.
Eliya wakamanyisha mukalenge mubi ne mukajende mêyi a buprofete ne dikima, kuamanyishaye tshisamba tshia bantu bavua batombokele Nzambi, ne kushalaye mueyemene Yehowa pavuaye ne buôwa
Eliya wakatungunuka ne kuenzela Yehowa mudimu ne dikima. Uvua ne dikima pakatumikilaye Yehowa, kuyaye mu tshibandabanda nkayende bua kudikuba pavuaku munanga ne tshiyole tshia nzala, mushale anu unua mâyi a kasulu kavua kapitshilamu ne udia biakudia bivua bikololo bimutuadila. Wakenza malu ne dikima pavua Yehowa mumutume mu Sidona muvua tatuende wa Yezabele ukokesha bua kuambuluisha mukaji mukamba mupele uvua ne ditabuja dikole kudi Nzambi. Wakenza kabidi malu ne dikima pavuaye ne baprofete ba Bâla 450 pa mukuna wa Kâmele; tshikondo tshiakabatuishaye ne: Yehowa nkayende ke Nzambi mulelela. Dîna dia Eliya didi diumvuija ne: “Nzambi wanyi n’Yehowa.” Eliya wakeyemena Yehowa Nzambi wende mu nsombelu wende mujima.
Nansha nanku, Eliya uvua “muntu uvua udiumvua anu bu mututu tudiumvua petu.” (Yak. 5:17) Kuvua misangu ivua buôwa buamba kumudia. Bu muvua Ahaba mubenge kushintulula meji ende panyima pa tshishima tshivua tshienzeke ku mukuna wa Kâmele, ne Yezabele muditshipe bua kushipesha Eliya, dikima dionso divua nadi Eliya diakapueka ne mâyi. Wakanyema bua kusungila muoyo wende. Eliya uvua ne kanyinganyinga ka bungi, kufikaye ne kudiambila Yehowa ne: uvua ujinga kufua. Uvua udiumvua kayi ne mushinga, kuambaye mene ne: kavua mupite bankambua bende bakavua bafue to. Kadi Yehowa uvua mumuteleje ne lutulu. Panyima pa matuku, Eliya wakambila Nzambi misangu ibidi ne: uvua ne buôwa ne udiumvua nkaaya. Wakamuambila kabidi ne: mudimu wonso mukole uvuaye mumuenzele uvua mu tshianana. Yehowa wakamujadikila ne: kavua nkayende to, ne utshivua umuangata ne mushinga wa bungi. Yehowa wakamuambila ne: uvua ne bua kumutumina Elisha bua enzejangane nende mudimu, kumuambila kabidi bua amulongeshe mudimu wa buprofete.
Katupa kîpi pashishe, Eliya kuyaye ukeba Elisha. Bubidi buabu bakenza mudimu wa buprofete pamue mu bikondo bikole abi. Elisha wakambuluisha Eliya uvua muntu mukole kudiye au ne kulongelaye malu kudiye. Yehowa wakambuluisha Eliya, kupetululaye dikima ne kushalaye nadi too ne pakafuaye.
Bala bualu ebu mu:
Lukonko lua kuelela meji:
Mmushindu kayi uvua Eliya muenze malu ne dikima?
Buela mu buondoke
1. Bua tshinyi bivua bimpe pavua bikololo bituadila Eliya biakudia? (it “Tshikololo” §5-wcgr) A
Lior Kislev
Tshimfuanyi tshia A
2. Eliya wakenza bishima kayi? (it “Eliya” No. 1 §11-wcgr)
3. Pavua Eliya pa mukuna wa Kâmele, wakatumina bantu dîyi, kuwujabu mulondo ne mâyi. Bu muvuaku munanga mukole, nkuepi kuvuabu mua kuikala bapetele mâyi au? (ba 17 §3-wcgr) B
Todd Bolen/BiblePlaces.com
Tshimfuanyi tshia B: Mukuna wa Kâmele ne Mbuu wa Mediterane
4. Tshilamba tshivua Eliya wenza natshi mudimu wa buprofete tshivua tshileja tshinyi? Bua tshinyi wakatshikupila Elisha pa makaya? (w14 1/2 12 §3)
Keba malongesha
Mmushindu kayi uvua Yehowa muenzele Eliya malu pavua malu mamutonde? Ntshinyi tshitudi petu mua kuenza bua bana betu batuambile ntatu idi mibatonde padibu batekete mu mikolo? (1 Bak. 19:1-18) C
Tshimfuanyi tshia C
Eliya wakalongesha Elisha mudimu wa buprofete uvuaye wenza ku budisuile. Mmunyi mutudi mua kumuidikija patudi tulongesha bakuabu mudimu utudi tuenza bua bobu balue kuwenza?
Mmushindu kayi mukuabu uudi mua kuidikija dikima dia Eliya?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Eliya pabishibuaye ku lufu?
Bia kutangila kabidi
Tangila filme udi uleja muvua Yehowa mupeshe Eliya bukole bua kukumbaja mudimu wende.
Tshilejilu tshia dikala ne lutulu ntshia baprofete—Eliya: Tshitupa tshia 1 (1:19)
Eliya wakenza malu ne dikima pa mukuna wa Kâmele, mmunyi mudi bansonga mua kumuidikija?
“Tuaku ntendelelu mulelela mpanda!” (Biena-bualu bia mu jw.org “Midimu ya mu dilonga dia Bible”-wcgr)