48 STEFANO
Muntu wa ditabuja dikole uvua muwule tente ne nyuma muimpe
STEFANO uvua mu njiwu ya lufu! Bavua bamufunde ne: uvua muenze bualu bubi butambe ne uvua ne bua kuya kulumbulula ku kabadi kanene ka bena Yuda. Kukavua ngondo mikese ikavua kabadi kamue kamue aku kakosele Yezu tshibawu tshia lufu. Nansha muvua Stefano mumanye ne: bavua mua kumushipa pende, kakapampakana to. Bible udi wamba ne: “Mpala wende uvua anu bu mpala wa muanjelu.” Mmunyi muvua muntu wetu wa patupu eu mua kushala mutukije kumpala kua lufu mushindu au? Bualu uvua ne dikima.
Bible udi wamba ne: Stefano uvua “muwule tente ne ditabuja ne nyuma muimpe.” Bapostolo ku Yelushalema bavua bamueyemena bikole ne bakamupesha mudimu munene wa kuenza bua muntu yonso mu tshisumbu apete bintu bivuaye nabi dijinga. Dimue dituku, bena Yuda bavua bamumvuile tshiji bakalua bua kukokangana nende. Kadi bu muvuaye muakule ne meji a bungi, bakapanga tshia kuamba. Bakumvua tshiji tshikole, kumukuatabu, kuyabu nende ku Tshilumbuluidi tshinene. Tshilumbuluidi atshi ke tshivua ne bua kuamba ni uvua mua kufua anyi kushala ne muoyo.
Stefano uvua pamuapa mumanye tshivua Yezu mulaye bayidi bende bavua ne bua kupeta lutatu lua buena alu tshia ne: “Padibu baya nenu bua kunufila, kanudianjidi kuditatshisha bua tshia kuamba; kadi tshidibu banupesha pa dîba adi, nutshiambe, bualu ki nnuenu badi bakula, kadi nnyuma muimpe.” (Mâko 13:11) Bualu abu buvua ne bua kuikala bumupeteshe dikima. Kabidi nyuma wa Yehowa wakamuambuluisha bua kushala anu mutukije, kufikishabi too ne bantu ku dimumona bu muanjelu pavuaye ku Tshilumbuluidi atshi.
Tshilumbuluidi atshi tshivua ne balumbuluishi 71. Bonso buabu bavua bantu banene ne balongeshi ba Mikenji ya Mose. Bavua badisangishila mu nzubu munene ne basomba mu milongo isatu mienze katshijengu. Bavua ne bafundi babidi bavua bafunda malu onso avuabu balumbulula. Stefano uvua muimane kumpala kuabu. Bavua bamushiminyine ne: uvua wakula bibi bua Mikenji ya Mose ne bua ntempelo. Abu buvua bualu bubi butambe buvuabu bashipela muntu uvua ubuenza. Muakuidi munene Kayifa wakebeja Stefano bikala malu avuabu bamubanda nawu avua malelela.
Stefano wakangata dîyi, kutuadijaye kuakula bualu bua bena Isalele. Wakabanga ne Abalahama. Pashishe kutelaye Jozefe uvuabu bakengeshe kudi bana babu, bankambua ba Isalele. Wakajikija ne Mose, kuakulaye ne kanemu bua bualu buende ne bua malu mimpe avuaye muenze. Kubambilaye too ne malu a Mose avua kaayi mafunda mu mifundu ya tshiena Ebelu. Kadi wakabavuluija kabidi bua muvua bena Isalele babenge Mose.
Malu onso avua Stefano muambe au akaleja muvuaye unemeka ntenta wa tshitendelelu, ntempelo, ne mikenji ivua Yehowa mupeshe Mose. Nansha nanku, wakabaleja kabidi muvua bantu ba Nzambi babenge kuteleja baprofete bavuaye ubatumina misangu ne misangu.
Stefano uvua ne bua kuakuila ditabuja diende kumpala kua balumbuluishi bavua badisuike bua kumushipa
Stefano uvua pamuapa mumanye ne: balumbuluishi abu kabavua mua kumulumbuluisha ne buakane to. Kadi Yehowa wakamupesha dikima dia kubambila ne: bavua “bena mutu mukole” bavua ‘bakandamena nyuma muimpe’ anu bu bankambua babu. Kupita apu bakashipa too ne muprofete uvua Mose mumanyishe dilua diende, uvua munene kupita Mose. Stefano wakabamba ne: bavua batungile Yezu ne bamushipe. Yezu eu ke uvua Masiya ne “muntu muakane” uvua Mose mutele au.
Balumbuluishi abu bakafiikila Stefano munda bikole “kutuadijabu kumudiila dînu.” Kadi Yehowa wakamupesha bukole pakamulejaye tshikena kumona. Stefano wakamba ne: “Tangilayi! Ndi mmona diulu dibululuke ne Muana wa muntu muimane ku tshianza tshia balume tshia Nzambi.” Balumbuluishi abu bakamba kutayika ne tshiji pakumvuabu bualu abu. Bidi bimueneka ne: bavua bavuluke tshivua Yezu mubambile ngondo mikese kumpala pavuabu bamulumbuluisha. Uvua mubambile ne: “Nenumone Muana wa muntu musombe ku tshianza tshia balume tshia bukole.” (Mat. 26:64) Mushindu au Stefano uvua ujinga kubambila ne: mêyi a Yezu au avua makumbane. Yezu ukavua mpindieu muimane ku luseke lua Yehowa!
Pakumvuabu nanku, bakadiela kudi Stefano, kumupulumunabu too ne pambelu pa tshimenga, kutuadijabu kumuasa mabue. Pamuapa utshivua anu umona Yezu mu tshikena kumona, kumuelaye lubila ne: “Mukalenge Yezu, angata muoyo wanyi.” Pashishe wakalomba Yehowa bualu bua ndekelu ne: “Yehowa, kubabadidi mpekatu eu to.” Stefano wakafua muikale anu muyidi wa Yezu. Yeye ke uvua muena Kristo wa kumpala udi Bible utela uvuabu bashipe bua ditabuja diende. Mu bantu bavua bamushipe abu muvua nsonga mukuabu. Nsonga au kakapua mêyi a Stefano a ndekelu au muoyo to. Netuakule bikole bua bualu buende mu nshapita wa 50, wa 51 ne wa 53.
Bala bualu ebu mu:
Lukonko lua kuelela meji:
Mmushindu kayi uvua Stefano muenze malu ne dikima?
Buela mu buondoke
1. Bua tshinyi bapostolo bakasungula Stefano ne balume bakuabu bavua “buwule tente ne nyuma ne meji” bua kulombola mudimu wa diabanya biakudia? (Bien. 6:3-5; bt 46-47 §17-18) A
Tshimfuanyi tshia A
2. Mmalu kayi makuabu a Mose avua Stefano mutele adi kaayi muaba mukuabu mu Bible? (bt 54 §13, dim.)
3. Ntshinyi tshivua tshienze bua Stefano ashale anu ne ditalala pavuabu bamukengesha? (w18.10 32)
4. Bienzedi 7:59 udiku uleja ne: Stefano uvua musambile Yezu anyi? (w05 1/1 31)
Keba malongesha
Stefano uvua “muwule tente ne ditabuja ne nyuma muimpe” ne “dianyishibua dia Nzambi ne bukole.” Nansha nanku, wakenza mudimu wa diabanya biakudia ne muoyo mujima. (Bien. 6:2, 5, 8) Mmunyi mudi bana betu ba balume badi ne mamanya anyi midimu mu tshisumbu mua kumuidikija? B
Tshimfuanyi tshia B
Stefano wakasambila bua bavua bamukengesha. Mmunyi mutudi mua kuenzela bantu badi batukengesha malu ne dinanga? (Mat. 5:44-48)
Mmunyi muudi mua kuenza malu ne dikima bu Stefano?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mmunyi muudi umvua bua mudi Yehowa musungule Stefano bua kuya kukokesha ne Kristo mu diulu? Udi umvua nanku bua tshinyi?
Bia kutangila kabidi
Mona mudi tshilejilu tshia Stefano mua kukuambuluisha bua kuambila bakuabu malu audi witabuja ne kanemu ne dikima.
“Stefano uvua ‘muwule tente ne dianyishibua dia Nzambi ne bukole’” (bt 53-56 §9-19)
Mmunyi mudi bantu ba Yehowa mua kuenza malu ne dikima padibu babakengesha anu bu Stefano?