Ngondo 2

Bana betu ba balume badi ne ngikadilu mimpe ya buena Kristo badi ne mushinga wa bungi mu tshisumbu. Muanetu udi kayi muena malu makole, utu wenza bua ditalala dikale anu mu tshisumbu. Wewe musue kumanyika bu muntu udi kayi ne malu makole, ikala uteleja bakuabu, udienzeja bua kumvua mudibu bela meji. Tuteke ne: ukadi mulue mukulu, mpindieu nudi mu tshisangilu ne bakulu bakuabu; ba bungi ba kudibu badi bangata dipangadika bilondeshile mêyi manene a mu Bible, neuditabe nansha diodi kadiyi dikusankishe anyi? Kena ne bua kusumisha bua malu enzeke anu mudiye yeye musue to. Udi witaba ngenyi ya bakuabu. (Gen. 13:8, 9; Nsu. 15:22) Kena ne bua kunyanga tshiakuidi anyi kukokangana ne bakuabu to. Kadi mbimpe ikale ne mêyi mimpe. Muntu wa ditalala utu udienzeja bua kuikala mu ditalala ne bakuabu nansha mu nsombelu mikole. (Yak. 3:17, 18) Mêyi ende mimpe adi mua kutuyisha tshilunji tshia bakuabu, too ne tshia batu kabayi bitaba malongesha etu.​—Bal. 8:1-3; Nsu. 25:15; Mat. 5:23, 24. w24.11 23 §13

Nansha muvua Kristo mufue “musangu umue bua kashidi,” utshidi anu utuenzela malu mimpe a bungi. (Lomo 6:10) Mmalu kayi au? Udi utungunuka ne kutupesha bintu bimpe bia bungi ku diambuluisha dia tshia kupikulangana natshi. Mona midimu idiye nayi: mMukalenge wetu, Muakuidi munene, ne udi ku mutu kua tshisumbu. (1 Kol. 15:25; Ef. 5:23; Eb. 2:17) Yeye ke udi wenza mudimu wa kusangisha bela manyi ne bantu ba mu musumba munene. Neawujikije kumpala kua dikenga dinene kujika. (Mat. 25:32) Udi kabidi upesha batendeledi ba Yehowa ba lulamatu biakudia bia mu nyuma mu matuku a ku nshikidilu aa ku diambuluisha dia mupika wa lulamatu. (Mat. 24:45) Neatungunuke ne kutuenzela malu mimpe mu bukokeshi buende bua bidimu tshinunu. Bulelela, Yehowa wakafila Muanende bua bualu buetu! w25.01 24 §12

Padi Yehowa utufuila luse, udi utufuilalu ne muoyo mujima. Dîba adi bidi bituambuluisha bua kudia bulunda buimpe ne Tatu wetu wa diulu. Tudi kabidi tuvuluka ne: ditufuila luse dilelela dia Yehowa ndipa didiye utupesha bualu mmupeshanganyi wa bintu ne mmutunange. Katu utupeshadi bualu tudi badikumbanyine to. Tuetu bonso tudi ne dianyisha dia bungi bua mudi Yehowa muikale Nzambi wa “difuilangana dia luse dilelela”! (Mis. 130:4; Lomo 4:8) Kadi bua yeye kutufuila luse, tudi ne bua kuenza bualu bua mushinga. Yezu wakamba ne: “Nuenu kanuyi babuikidile bantu bilema biabu, tatu wenu kakunubuikidila penu bienu bilema to.” (Mat. 6:14, 15) Mbimpe tufuilangane luse bua kuidikija Yehowa. w25.02 13 §18-19

Tuakule bua bena mu Sodoma ne mu Amola. Muntu muakane Lota uvua musombele mu Sodoma amu. Kadi tudiku bamanye ni uvua muyishe bantu bonso bavuamu anyi? Tòo. Bavua bushuwa bantu babi, kadi bavuaku bamanye mua kutapulula tshidi tshimpe ne tshidi tshibi anyi? Tuvulukayi ne: musumba munene wa bantu balume ba mu tshimenga atshi bakaya kua Lota bua kulala ne benyi bavua batudilaku ku bukole. Bible udi uleja ne: mu musumba au muvua bantu ‘kubangila anu ku bansongalume too ne ku bakulakaje.’ (Gen. 19:4; 2 Pet. 2:7) Kudiku tshidi tshituleja ne: Yehowa Nzambi wa luse mmupangadije bua kubenga kubabisha bonso ku lufu anyi? Tòo. Bua tshinyi tudi tuamba nanku? Bualu Yehowa uvua muambile Abalahama ne: mu tshimenga atshi kamuvua nansha bantu bakane dikumi betu aba to. (Gen. 18:32) Bantu abu kabavua bakane to. Yehowa uvua ne kabingila ka kubashipa bua bienzedi biabu bibi. Kadi tudiku mua kuamba tushindika ne: muntu nansha umue wa kudibu kakubishibua mu “dibishibua dia bantu ku lufu, dia . . . badi kabayi bakane” anyi? Tòo, katuena mua kuamba nanku to! w24.05 2 §3; 3 §8

Bu mudi malu a mpetu ashintulukangana, bamue mbitabe midimu ivua ibalomba bua kuya kule ne bena mu dîku diabu, kadi kuluabu kudiela meji. Kumpala kua kuitaba mudimu, ela meji a difutu diwapeta, kadi keba bua kumanya ni wakuambuluisha wewe ne bena mu diku diebe bua kushala mu malanda makole ne Yehowa. (Luka 14:28) Diebeja ne: ‘Ntshinyi tshidi mua kufikila dibaka dianyi meme kule ne muena dibaka nanyi? Nengikale mbuela mu bisangilu, nyisha, ne mpeta dîba dia kusomba ne bena Kristo nanyi anyi?’ Biwikala muledi, diela lukonko lua mushinga elu: ‘Meme kule ne bana banyi, mmunyi mungabakolesha ne “mibelu ne didimuija bia Yehowa”?’ (Ef. 6:4) Paudi ne bua kuangata dipangadika, londa mibelu ya Yehowa; kulondi mibelu ya balela bebe anyi balunda badi kabayi batumikila Yehowa to. w25.03 29 §12

Muntu udi kayi mukole mu nyuma, badi mua ‘kumushima’ bipepele ne “mayele adi ashimangana.” Udi mua kuitaba ngumu ya dishima idi bantu bamuangalaja peshi kuitaba malu a dishima a batontolodi. Udi mua kulua muena mukawu, kantu wa bilumbu, ne muntu wa biji bia lukasa. (1 Kol. 3:3) Bible udi ufuanyikija dikola mu nyuma ne tshitu tshienzeka patu muana wenda ukola. (Ef. 4:15) Muana katu mumanye malu onso to, bitu bikengela bikale bamuleja tshia kuenza. Bua kumvua bualu ebu bimpe, tuangatayi tshilejilu etshi: Patu mamu usambuka njila ne kana kende ka bakaji, utu ukambila bua kamukuate ku tshianza. Padi muanende au wenda ukola, udi umulekela udisambulukila njila; kadi umuvuluija bua kutangila ku dia balume ne ku dia bakaji kumpala kua kusambuka. Pakadiye mukole, udi umanya mua kuepuka njiwu ya mashinyi. Bia muomumue, padi bena Kristo bakole mu nyuma bakeba kuangata mapangadika, batu bela meji a tshidi Bible wamba bua kumanya tshidi Yehowa musue ne pashishe batshitumikila. w24.04 3 §5-6

Munkatshi mua bidimu bia bungi, Yehowa uvua mudie bulunda anu ne bifukibua bivuaye nabi mu diulu. Pashishe wakalua kufuka bantu, kubuelabu pabu mu ntenta wende. Mu bantu amu muvua Henoka, Noa, Abalahama, ne Yobo. Bible udi ubikila batendeledi balelela aba ne: mbalunda ba Nzambi, anyi bantu ‘bakenda ne Nzambi mulelela.’ (Gen. 5:24; 6:9; Yobo 29:4; Yesh. 41:8) Munkatshi mua bidimu nkama ne nkama, Yehowa wakatungunuka ne kubikila balunda bende mu ntenta wende. (Yeh. 37:26, 27) Tshilejilu, mêyi a buprofete a Yehezekele adi aleja ne: Yehowa mmusue bua batendeledi bende ba lulamatu badie nende bulunda bukole. Mmulaye bua kudia “nabu tshipungidi tshia ditalala.” Mêyi a buprofete au avua akula bua tshikondo tshidi Yehowa usangisha bantu badi ne ditekemena dia kuya mu diulu ne bantu badi ne ditekemena dia kupeta muoyo pa buloba mu ntenta wende bua benze “tshisumbu tshimue.” (Yone 10:16) Tukadi mu tshikondo atshi mpindieu! w24.06 2 §2, 4; 3 §5

Tudi tutua Bukalenge bua Nzambi mpanda ne muoyo mujima bualu tudi bantu ba Yehowa. Kadi bidi bitulomba dikima. (Mat. 6:33) Tshilejilu, bu mutudi munkatshi mua bantu babi, bitu bitulomba dikima bua kutumikila mikenji ya Yehowa ne kuamba lumu luimpe lua Bukalenge buende. Bu mudi malu a tshididi enda atapulula bena panu, tudi ne bua kuikala ne dikima bua kubenga kubuelakanamu anyi kuepuka biyukiyuki bia malu a tshididi. (Yone 18:36) Midimu ya Bantemu ba Yehowa ba bungi mmifue, mbatute ba bungi ba kudibu, anyi babele mu maloko bualu mbabenge kubuela mu malu a tshididi anyi kuya ku busalayi. Kuvuluka bantu bavua ne dikima, bashale balamate Yehowa ne Bukalenge buende kudi kutupetesha petu dikima. Tshilejilu, pavua Mukalenge wetu Yezu Kristo pa buloba, kakabuelakana mu malu a tshididi a mu bulongolodi bua Diabolo ebu to. (Mat. 4:8-11; Yone 6:14, 15) Uvua anu ulomba Yehowa dikima bua kuenza malu mimpe. w24.07 3 §4; 4 §7

Yehowa wakafundisha malu au mu Bible bua tumanye bualu kampanda bua mushinga. Adi atuambuluisha bua kumanya tshidiye mukinyine mpekatu bikole menemene. Mpekatu udi ututapulula ne Tatu wetu, utulelela ne lufu. (Yesh. 59:2) Ke bualu kayi Satana, muanjelu mubi, udi mukebeshe bionso ebi mmunange mpekatu ne udi usaka bantu bua kuyenza. Nunku pavua Adama ne Eva benze mpekatu, pamuapa uvua muele meji ne: mmutshimune. Kadi kavua mumanye ne: Yehowa mmutunange to. Nzambi kakashintulula tshivuaye mulongoluele ndelanganayi ya Adama ne Eva to. Uvua munange bantu, ke bualu kayi kakajanguluka bua kubapesha ditekemena to. (Lomo 8:20, 21) Yehowa uvua mumanye ne: imue ya ku ndelanganyi yabu ivua ne bua kumunanga ne kumulomba diambuluisha bua kutshimuna mpekatu. Bu mudiye Tatu wabu ne Mufuki wabu, uvua ne bua kubapetesha mushindu wa kupikudibua ku mpekatu ne kusemena pabuipi nende. w24.08 3 §3-4

Batendeledi ba Yehowa ba bungi batu ne bia bungi bia kuenza. Tutu tuenza mudimu bua kudiambuluisha ne kuambuluisha bena mu mêku etu. (1 Tim. 5:8) Bena Kristo ba bungi batu batabalela balela babu badi basama anyi bakadi bakulakaje. Tuetu bonso tudi ne bua kutabalela makanda etu a mubidi; mbualu butu butulomba dîba. Pa kumbusha malu atudi batele aa, tudi kabidi ne malu a kuenza mu tshisumbu. Mudimu munene utudi nawu ngua kuyisha ne tshisumi. Dibala dia Bible mbumue bua ku malu adi ne mushinga buetu tuetu bena Kristo; nunku tudi ne bua kuenza muetu muonso bua kumubala. Mukanda wa misambu udi utuadija ne mêyi adi aleja tshidi muntu mua kuenza bua kupeta diakalenga a ne: “Udi ubala mikenji Yende ne dîyi dia panshi panshi munya ne butuku.” (Mis. 1:1, 2) Mbiumvuike bimpe ne: mêyi aa adi atulomba bua kuditekela dîba dia kubala Bible. Ndîba kayi ditambe buimpe ditudi mua kubala Bible? Mandamuna neikale mashilangane bilondeshile muntu ne muntu. Kadi tudi mua kuandamuna mu tshikoso ne: ndîba diudi ne mushindu wa kumubala dituku dionso. w24.09 3 §5-6

Muntu mukole mu nyuma utuku dijinga ne diambuluisha dia muntu mukuabu anyi? Eyowa. Misangu mikuabu udi mua kulomba pende diambuluisha. Bamue bena Kristo badi kabayi bakole mu nyuma batu bobu bindila bua bakuabu babambile tshia kuenza anyi babangatshile mapangadika. Muntu mukole mu nyuma padiye yeye ulomba diambuluisha kudi bantu badi ne meji ne dimonamona dia malu, mmumanye ne: neadiangatshile mapangadika ne “neadiambuile bujitu buende.” Bantu bonso kabatu ne tshimuenekelu tshia muomumue to. Bena Kristo bakole mu nyuma batu bashilangane pabu ku ngikadilu, bu mudi meji, dikima, lungenyi lua kupeshangana bintu, ne diditeka pa muaba wa bakuabu. Ke bualu kayi, bena Kristo bakole mu nyuma babidi bobu batuilangane ne nsombelu wa muomumue, badi mua kuangata mapangadika mashilangane kadi mimanyine anu pa mêyi manene a mu Bible. Bitu bienzeka nanku nangananga padi bena Kristo ne bua kuangata mapangadika balonda kondo kabu ka muoyo. Bu mudibu bamanye bualu ebu, kabatu balumbuluisha bakuabu padibu bangata mapangadika mashilangane ne abu to. Kadi badi badienzeja bua kulama buobumue.​—Lomo 14:10; 1 Kol. 1:10. w24.04 4 §7-8

Muntu yeye udimona kayi ne mushinga, ntshinyi tshidiye mua kuenza? Bala mvese idi ikujadikila ne: udi ne mushinga kudi Yehowa, uyelele meji. Wewe mupangile bua kukumbaja tshipatshila kampanda anyi mutekeshibue mu mikolo bua muudi kuyi ufika ku dienza malu adi bakuabu benza, kudimonyi muntu tshianana to. Yehowa kena ukulomba bua kuenza malu audi kuyi mua kuenza to. (Mis. 103:13, 14) Biobi ne: bavua bakuenzele malu mabi anyi bakunyange ne malu a masandi kale, kudipeshi tshilema to. Tshilumbu tshidi pambidi pa uvua mukuezelawu! Manya ne: Yehowa utu tshilumbu ne bantu batu benzelangana bibi, ki nne badibu benzele bibi to. (1 Pet. 3:12) Ikala mutuishibue ne: Yehowa udi mua kukusaka bua kuambuluisha bakuabu. Mmukupeshe diakalenga dia kuikala muenzejanganyi nende wa mudimu mu mudimu wa diyisha. (1 Kol. 3:9) Pamuapa ntatu ituvua batuilangane nayi mmitupeteshe ngikadilu wa diditeka pa muaba wa bakuabu ne mmituambuluishe bua kumanya mudibu bumvua. Kudi malu a bungi atudi mua kuenza bua kubambuluisha. w24.10 7-8 §6-7

Bitu bitonda Yehowa bikole padibu batuenzela malu mabi. “Yehowa mmunange kulumbuluisha kuakane.” (Mis. 37:28) Yezu udi utujadikila ne: Yehowa “neakose nsambu . . . lukasa amu pa yoyi” mu tshikondo tshiakane. Mu matuku makese emu, neajikije makenga onso ne malu mabi a mishindu yonso. (Mis. 72:1, 2) Tudi bindile tshikondo tshikala malu makane atua apela. Kadi bua mpindieu, Yehowa udi utuambuluisha bua kumanya mua kupita ne malu mabi adibu batuenzela. (2 Pet. 3:13) Udi utulongesha mua kupita ne malu mabi katuyi tunyanga malu. Mmutuleje ku diambuluisha dia Muanende mutudi mua kuenza nanku. Udi utupesha mibelu itudi mua kutumikila padibu batuenzela malu mabi. w24.11 2-3 §3-4

Dilomba dia Yezu dia kudisha musumba wa bantu kadivua mua kukumbana to, bualu kuvua bantu balume batue ku 5 000 ne bantu bakaji ne bana. Pamuapa bantu bonso bavua bakengela kudiisha bavua mua kuikala 15 000. (Mat. 14:21) Muyidi Andele wakamba ne: “Muana wa balume udi muaba eu ne mampa atanu a orje ne mishipa ya mikese ibidi. Kadi bintu ebi bidi mua kuenzela bantu bungi nunku tshinyi?” (Yone 6:9) Bapele ne bantu bakuabu ba tshianana bavua batamba kudia mampa a orje. Pamuapa mishipa ayi ivua mua kuikala mishipa ya mukele miumisha. Kadi mampa ne mishipa bivua nabi muana wa balume au, kabivua mua kukumbana bua kudiisha bantu bungi nanku to. Bu muvua Yezu musue kudiisha musumba wa bantu abu, wakabambila bua basombe mu mashinde mu bisumbu. (Mâko 6:39, 40; Yone 6:11-13) Pashishe wakasakidila Tatuende bua mampa ne mishipa ayi. Bivua bikumbane menemene bua kusakidilaye Nzambi nanku bualu yeye ke mufidi wa biakudia. Mbimpe tulonde tshilejilu tshia Yezu tshia kusambila kumpala kua kudia. Yezu wakambila bayidi bende bua kuabanyina bantu biakudia. Bantu bonso bakadia, bobu kukuta. w24.12 2-3 §3-4

Pavua Yezu pa buloba, wakatumbisha Tatu wende pavuaye wambila bantu ne: yeye ke uvua mumupeshe bukole bua kuenza bishima. (Mâko 5:18-20) Wakaleja kabidi muvuaye utumbisha Yehowa pavuaye ubambila malu a Tatu wende ne ubenzela malu mimpe. Dimue dituku pavuaye ulongesha mu nsunagoga, kuvua mamu mukuabu munkatshi mua bantu bavuaye ulongesha abu uvuabu batatshisha kudi demon kukavua bidimu 18. Demon au uvua mukobamije mamu au nyima, kayi ne mushindu wa kololoka to. Bivua bibi be! Yezu wakamumvuila luse, kuya kudiye, kumuambilaye ne: “Mukaji, udi musuludibue ku butekete buebe.” Pashishe wakamutentekela bianza, yeye kololoka diakamue, “kutuadijaye kutumbisha Nzambi” bua muvuaye muondopibue! (Luka 13:10-13) Mamu au uvua ne tshivua tshimusake bua kutumbisha Nzambi, nansha tuetu petu. w25.01 2-3 §3-4

Kudiku mushindu wa tuetu kupetulula bionso bivua Adama ne Eva bajimije anyi? Eyowa, kadi ki nku bukole buetu to. (Mis. 49:7-9) Bu Yehowa kayi mutuambuluishe, katuvua mua kutekemena muoyo wa tshiendelele anyi dibishibua ku lufu to. Tuvua tufua anu bu nyama, katuyi mua kupetulula kabidi muoyo to.(Muam. 3:19; 2 Pet. 2:12) Bia muomumue, Yehowa Tatu wetu wa dinanga mmutupeshe dipa didi ditufutshila dibanza dia mpekatu utudi bapiane kudi Adama. Yezu wakumvuija bualu abu, wamba ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Dipa adi didi dituambuluisha kabidi bua kudia bulunda bukole ne Yehowa. Dipa dia kudi Nzambi dia dikema edi didi mua kutuambuluisha bua kutubuikidila mpekatu yetu anyi “mabanza” etu. w25.02 3 §3-6

Ntshinyi tshiakambuluisha Shaula bua kubatijibua? Shaula wakalua mpofu pavua Mukalenge Yezu mumuenekele. (Bien. 9:3-9) Wakajila biakudia matuku asatu, pamuapa welangana meji a tshivua tshifuma ku dimuenzekela. Bushuwa, wakatuishibua ne: Yezu uvua Masiya ne bayidi bende bavua mu ntendelelu mulelela. Tshilejilu tshia Shaula tshidi tshitulongesha malu a bungi. Uvua mua kuikala mulekele lutambishi ne ditshina dia bantu bimupangisha bua kubatijibua. Kadi ki ntshiakenzaye to. Wakitaba bua kulua muena Kristo nansha muvuaye mumanye ne: bavua ne bua kumukengesha. (Bien. 9:15, 16; 20:22, 23) Panyima pa batismo wende, wakatungunuka ne kueyemena Yehowa bua amuambuluishe bua kunanukila mu ntatu mishilashilangane. (2 Kol. 4:7-10) Paudi ubatijibua, ulua Ntemu wa Yehowa, udi mua kupeta buluishi anyi ntatu idi mua kuteta ditabuja diebe. Kadi ikala mumanye ne: Yehowa ne Kristo nebakuambuluishe bua kunanukila ne kushala ne lulamatu.​—Filip. 4:13. w25.03 4 §8-9

Kubala Bible mbualu budibu mua kutuelela kalumbadi. Kadi tuetu basue ne: kutuambuluishe bikole, tudi ne bua kuenza malu makuabu. Fuanyikijabi bualu ebu mushindu eu: patu mvula uloka, utu wambuluisha bikunyibua bua kumenabi. Kadi yeye muloke wa bungi menemene mu dîba dikese, buloba butu butalala bikole. Dîba adi kabiakukengela ne: mukuabu aloke to, bualu buloba budi dijinga ne dîba dia kumina mâyi a mvula uvua muloke bua kuambuluisha bikunyibua bua kusampila. Bia muomumue, ki mbimpe tubale Bible lubilu lubilu katuyi ne dîba dia kuelangana meji bua kuvuluka malu atudi babale ne kuatumikila to. (Yak. 1:24) Bitu bikufikila bua kubala Bible lubilu lubilu anyi? Biobi nanku, ntshinyi tshiudi ne bua kuenza? Bala bitekete bitekete. Dienzeja bua kuelangana meji a malu audi ubala anyi audi ufuma ku dibala. Udi mua kupangadija bua kupitshisha dîba dia bungi paudi udilongela bua umone mua kuelangana meji. w24.09 4 §7-9

Padi bakulu bapeta mêyi a kulonda, badi baabala bimpe ne badienzeja bua kuatumikila. Batu bapeta amue mêyi a kulonda a mua kulombola bisangilu, kusambila kumpala kua tshisumbu, ne kutabalela mikoko ya Kristo. Padibu baatumikila, bena Kristo netu badi bamona mudi Yehowa mubanange ne ubatabalela. Padi bakulu batuambila tshia kuenza, tudi ne bua kutshilonda ne muoyo mujima. Dîba adi, netubapepejile mudimu. Bible udi utulomba bua kubakokela ne kubatumikila. (Eb. 13:7, 17) Kadi kabitu anu bipepele to, bualu mbapange bupuangane. Kadi tuetu tuimanyina anu pa bilema biabu, netuikale mu bulelela tuambuluisha bena lukuna betu. Tudi tuamba nanku bua tshinyi? Bualu katuakubeyemena nansha kakese to. w24.04 10 §11-12

Bantu bonso bafua mu dikenga dinene kabakubishibua ku lufu anyi? Bible udi uleja patoke ne: bantu badi baluisha Yehowa, babutulaye yeye ne biluilu biende bia mu diulu ku mvita ya Armagedone, kabakubishibua ku lufu to. (2 Tes. 1:6-10) Kadi ntshinyi tshienzekela bantu bakuabu, tshilejilu bafua bua masama anyi bukulakaja, bafuila mu njiwu, anyi bashipabu kudi bantu nabu? (Muam. 9:11; Zek. 14:13) Bamue ba kudibu nebikale munkatshi mua bantu “badi kabayi bakane” babishibua ku lufu mu bulongolodi bupiabupia anyi? (Bien. 24:15) Katuena bamanye to. Kadi kudi malu ndambu atudi bamanye enzeka kumpala eku. Tshilejilu, tudi bamanye ne: mu mvita ya Armagedone, Yezu nealumbuluishe bantu bilondeshile malu avuabu benzele bana babu ne Kristo. (Mat. 25:40) Bantu badi batua bela manyi ne Kristo mpanda, Yezu neabamone bu mikoko.​—Buak. 12:17. w24.05 10-11 §9-11

Bible udi wamba bua matuku atudi aa ne: “mmatuku a bikondo bia malu makole bidi bikole mua kupita nabi.” (2 Tim. 3:1) Pa kumbusha ntatu itudi nayi mu ndongoluelu wa malu eu, badi batukengesha tuetu Bantemu ba Yehowa bualu tudi tuenzela Yehowa mudimu. Bua tshinyi tudi tutendelela Yehowa nansha mutudi ne ntatu eyi? Bualu tudi bafike ku dimanya ne: Yehowa “udi Nzambi wa muoyo.” (Yel. 10:10; 2 Tim. 1:12) Yehowa utu umona lutatu luonso lutudi nalu, mmusue kutuambuluisha. (2 Kul. 16:9; Mis. 23:4) Patudi tuvuluka ne: Nzambi wetu udi ne muoyo, tuambe ne: udi ututabalela ne udi pabuipi bua kutuambuluisha, tudi tupeta bukole bua kunanukila mu lutatu kayi luonso. w24.06 20 §1-2

Tudi ne bua kueyemena bulongolodi bua Yehowa. Padibi bikengela kuakajilula ngumvuilu wetu wa dilongesha kampanda dia mu Bible anyi kuakaja mushindu wetu wa kuenzela Yehowa mudimu, bana betu badi batulombola badi benza nanku ne lukasa kabayi belakana to. Badi benza nanku bualu mbasue kusankisha Yehowa, ki mbasue kusankisha bantu to. Badi badienzeja kabidi bua kuangatshila mapangadika abu mu Dîyi dia Nzambi didi bantu ba Nzambi bonso ne bua kunemeka. Mupostolo Paulo wakafunda ne: “Ulamate tshilejilu tshia mêyi adi akolesha.” (2 Tim. 1:13) “Tshilejilu tshia mêyi adi akolesha” mmalongesha a bena Kristo adi mu Bible. (Yone 17:17) Malongesha au ke adi nshindamenu wa ditabuja dietu. Bulongolodi bua Yehowa mbutulongeshe bua tulamate ku malongesha au, dîba adi Yehowa neatubeneshe. w24.07 11-12 §12-13

Bu muvua mupostolo Petelo mudimuenene muvua Yezu mumubuikidile pavuaye munyingalale bua mpekatu yende, biakamusaka bua kulongesha bakuabu ne: mbimpe kunyingalala bua kufuidibua luse. Matuku makese panyima pa tshibilu tshia Pentekoste, Petelo wakenza muyuki kumpala kua bena Yuda ba bungi bavua kabayi bitabuje Yezu, ubumvuija ne: bavua bashipe Masiya. Kadi wakabasengelela, wamba ne: “Nyingalalayi bua mpekatu, shintulukayi bua mpekatu yenu ijimijibue, bua bikondo bia dikoleshibua bifume kumpala kua Yehowa nkayende.” (Bien. 3:14, 15, 17, 19) Nunku Petelo wakabalongesha ne: muntu udi unyingalala bua mpekatu yende, udi ushintuluka, ushintulula ngelelu wende mubi wa meji, ulekela bienzedi biende bibi, ne utuadija kuenza malu adi asankisha Nzambi. Wakabalongesha kabidi ne: Yehowa uvua mua kubabuikidila mpekatu yabu yonso anyi kuyijimija. Bualu ebu budi butupetesha ditalala dia bungi mu muoyo bua mutudi bamanye ne: tuetu benze mpekatu minene kadi balue kunyingalala, Yehowa udi utubuikidila. w24.08 12 §14

Tuetu ne ditabuja dikole, batuishibue ne: Yehowa ukadi pa kubutula ndongoluelu wa malu eu, nebitusake bua kulekela dinanga dia bintu. Mu dikenga dinene, bantu “nebimanshe arjan yabu mu misesu” bualu nebajingulule ne: “nansha arjan yabu anyi or yabu kabiakukumbana bua kubapandisha mu dituku dia tshiji tshikole tshia Yehowa to.” (Yeh. 7:19) Pamutu pa kudina ne kasuki mu dikeba makuta a bungi, mbimpe tuangate mapangadika atuambuluisha bua kuikala ne bintu bidi bikengela buetu tuetu, bua bena mu mêku etu ne bua tumone mua kuenzela Yehowa mudimu. Nunku katubuedi mabanza a patupu anyi katufidi meji etu onso ku bintu bitudi nabi to. Tudimuke kabidi bua bintu bitukadi nabi kabilu ne mushinga wa bungi menemene mu nsombelu wetu to. (Mat. 6:19, 24) Bu mutudi tuenda tusemena ku nshikidilu wa ndongoluelu wa malu eu, nebitulombe bua kueyemena Yehowa anyi bintu bitudi nabi. w24.09 11 §13-14

Tudi pamuapa mua kutshimuna amue matekete etu bimpe menemene. Kadi matekete etu makuabu wowu adi alomba bua kutungunuka ne kudienzeja munkatshi mua matuku a bungi bua kuatantamena. Tuakulayi bua mupostolo Petelo. Bua ditshina diende dia bantu, wakavila Yezu misangu isatu. (Mat. 26:69-75) Biakamueneka ne: Petelo wakatantamena buôwa buende abu pavuaye muyishe ne dikima kumpala kua Tshilumbuluidi tshinene. (Bien. 5:27-29) Kadi bidimu ndambu pashishe, “wakatshina ba mu kasumbu ka bantu batengula;” kuanjiye kulekela kudia ne bena Kristo ba bisamba bikuabu. (Gal. 2:11, 12) Petelo wakakuluka kabidi mu buteyi bua ditshina dia bantu, pamuapa too ne muakafuaye kavua mutshimune ditshina dia bantu to. Bualu ebu budi mua kutufikila petu lelu. Kadi tudi mua kutshimuna butekete budi bualukila misangu ne misangu patudi tutumikila mubelu wa Yezu eu: “Nushale batabale.” (Mat. 26:41) Nansha wewe umona ne: udi ne bukole bua kutantamena mpekatu, ikala wepuka nsombelu idi mua kukufikisha ku ditetshibua. Tungunuka ne kuenza malu akadi makuambuluishe bua kubenga kukuluka mu butekete.​—2 Pet. 3:14. w24.07 18-19 §17-19

Kakuena muntu utu wambuluishangana bu Yezu to. Pavuaye pa buloba, uvua wenza bishima bua kuambuluisha bantu. (Luka 9:12-17) Wakatufidila dipa ditambe bunene dia muoyo wende. (Yone 15:13) Katshia wabishibua ku lufu, mmutungunuke ne kuambuluisha bantu. Anu muvuaye mulaye, wakalomba Yehowa bua atupeshe nyuma wende muimpe bua nyuma au atulongeshe ne atukoleshe. (Yone 14:16, 17, dim; 16:13) Yezu udi utungunuka ne kutupesha bitudi nabi dijinga ku diambuluisha dia bisangilu bia tshisumbu bua tulongeshe bantu ba pa buloba bujima bua kubavuija bayidi. (Mat. 28:18-20) Mupostolo Paulo wakafunda ne: Yezu mumane kubanda mu diulu, “wakafila mapa mikale bantu.” (Ef. 4:7, 8) Wakumvuija ne: Yezu uvua mufile mapa au bua kuambuluisha tshisumbu tshia bena Kristo mu mishindu ya bungi. (Efeso 1:22, 23; 4:11-13) Bu mudi bantu aba bapange bupuangane, batu benza bilema. (Yak. 3:2) Nansha nanku Mukalenge Yezu Kristo udi wenza nabu mudimu bua kutuambuluisha. Badi mapa adiye mutupeshe. w24.10 18 §1-2

Davidi wakambila muanende Solomo ne: uvua ne bua kututa diakalenga anu pavuaye utumikila Yehowa. Diakabi, Solomo wakalua kutendelela nzambi mikuabu. Nzambi wakamubenga, kujimijaye meji avuaye mumupeshe bua kulombola bantu ne buakane buonso. (1 Bak. 11:9, 10; 12:4) Dilongesha didi ne: ditumikila didi difikisha ku diakalenga. (Mis. 1:1-3) Bushuwa, Yehowa ki mmutulaye bua kutupesha bubanji ne butumbi bivua nabi Solomo to. Kadi tuetu bamutumikile, neatupeshe meji atuambuluisha bua kuangata mapangadika mimpe. (Nsu. 2:6, 7; Yak. 1:5) Mêyi ende manene adi mua kutuambuluisha bua kumanya mudimu wa kuenza, tulasa tua kulonga, malu a kujikija nawu lutetuku, ne adi mua kutuambuluisha kabidi mu malu a makuta. Kutumikila tshidi meji a Nzambi atuambila, nekutukube bua kashidi. (Nsu. 2:10, 11) Nekutuambuluishe bua kuikala mu malanda mimpe ne bakuabu ne kuikala ne disanka mu dîku dietu. w24.11 10-11 §11-12

Baledi badi ne mpunga ya kuyukila ne bana babu malu adi atangila Bible anyi adi atangila ditabuja diabu kudi Nzambi. Badi mua kuyukila nabu nanku padibu baya mu nzubu kampanda wa dilamina bintu bia kale bia kubandila. Udi mua kukoka ntema ya muanebe ku tshintu kampanda tshia kale anyi ku bualu kansanga buvua buenzeke kale bua kumufikisha ku dimona ne: malu adi mu Bible mmajalame. Bana bebe abu mbamanye ne: pa dibue didibu babikila ne: Dibue dia Moaba dikadi ne bidimu 3 000 padi dîna dia Nzambi anyi? Mbatentule Dibue dia Moaba adi, badileje muaba wa ne: “Bible ne Dîna dia Nzambi” (mu Anglais) udi ku nzubu wa dilamina bintu bia kale bia kubandila wa ku biro bietu binene bia buloba bujima bidi ku Warwick, mu New York. Mbaleje pa dibue adi ne: Mesha mukalenge wa Moaba wakatombokela Isalele. Ke tshitu Bible wamba pende. (2 Bak. 3:4, 5) Padi bana bebe badimuenena tshijadiki tshia ne: malu adi mu Bible mmajalame, ditabuja diabu didi dikola. w24.12 14 §4; 15 §6