Ngondo wa 7

Bukulakaja, masama, anyi diteketa dia mubidi bidi mua kutatshisha bamue batendeledi ba Yehowa. Badi mua kufika ku diela meji ne: kabena ne mushinga kudiye to. Badi pamuapa mua kudiebeja ne: ‘Yehowa utshitu anu ungangata ne mushinga anyi?’ Mufundi wa Musambu wa 71 wakaleja muvuaye mupangile pende bukole. Wakasambila, wamba ne: “Kundekedi padi bukole buanyi bushikila.” (Mis. 71:9, 18) Nansha nanku, uvua ne dishindika dia ne: yeye muenzele Yehowa mudimu ne lulamatu, neamulombole ne neamukuatshishe. Wakalonga ne: Yehowa udi usanka padi bantu benza muabu muonso bua kumuenzela mudimu nansha kabatshiyi bakumbana bua kumuenzelawu bu konso eku. (Mis. 37:23-25) Nuenu bana betu bakulakaje, dimonayi mudi Yehowa unumona. Nansha munukadi batshioke bua bukulakaje, Yehowa udi mua kunuambuluisha bua kumuenzela mudimu ne lulamatu. (Mis. 92:12-15) Enzayi malu anudi nukokesha bua kuenza pamutu pa kusamisha meji bua anudi kanuyi mua kuenza. w24.10 28 §14-16

Bitu bikolela muntu utu kayi mukole mu nyuma bua kuangata dipangadika dimpe dia bualu budi kabuyi ne mukenji mu Bible to. Padiku kakuyi mukenji au, bamue batu bela meji ne: badi mua kuenza tshidibu basue. Bakuabu badi mua kukeba mukenji muaba udiwu kawuyi ne mushinga to. Tshilejilu, bidi bimueneka ne: bena Kristo ba mu Kolinto bakalomba mupostolo Paulo bua abambile ni bavua mua kudia biakudia bilambula mpingu. Paulo kakabambila tshia kuenza to. Wakabaleja ne: yonso wa kudibu uvua ne ‘bukenji bua kudisunguila’ tshia kuenza bilondeshile kondo kende ka muoyo. Wakabaleja anu mêyi manene a mu Bible avua mua kubambuluisha bua kuangata dipangadika divua kondo kabu ka muoyo kakayi mua kushala kabalumbuluisha ne divua kadiyi mua kulenduisha bakuabu to. (1 Kol. 8:7-9) Nunku Paulo uvua ubambuluisha bua bakole mu nyuma ne bikale benza mudimu ne bieledi biabu bia meji bia kujingulula nabi malu pamutu pa kuebeja bantu tshia kuenza anyi kukeba mukenji. w24.04 5 §14

Mu matuku a Yona, bena Niniwe bavua ne mpunga wa kunyingalala bua mpekatu yabu. Vuluka ne: Yezu uvua muambe ne: bantu “bavua benze malu mabi” nebabishibue ku lufu bua dilumbuluisha. (Yone 5:29) Nanku, bidi bimueneka ne: kudi ditekemena bua bena mu Sodoma ne mu Amola pabu. Bidi mua kuenzeka ne: nansha bakese ba kudibu babishibue ku lufu. Pamuapa netubalongeshe malu a Yehowa ne a Yezu Kristo. Yehowa ke utu ‘ukonkonona muoyo, ne ukonkonona meji a munda menemene.’ Bua bidi bitangila dibishibua ku lufu, neenze anu bu pa tshibidilu, tuambe ne: ufuta “muntu ne muntu bilondeshile njila yende.” Yehowa neikale ne dîsu dikole padibi bikengela, ne nealejangane luse koku bualu bua kululejangana. Nanku, katuena ne bua kuamba ne: muntu kampanda kakubishibua ku lufu padi Bible kayi muambe nanku to! w24.05 5-6 §15-16

Katshia ku kale, mukenji wa Nzambi mmukoleshe batendeledi bende pavuabu ne mudimu mukole wa kuenza. Tuakulayibi bua muprofete Yelemiya. Pavua Yehowa mumupeshe mudimu wa kuyisha, wakumvua buôwa, kuambaye ne: “Tshiena mumanye mua kuakula, bualu ntshidi anu muana.” (Yel. 1:6) Kadi Dîyi dia Nzambi diakamuambuluisha bua kubenga kumvua buôwa. Wakamba ne: “Diakalua munda muanyi bu kapia kadi kosha kabuta mu mifuba yanyi, ne ngakatshioka ne kudilama munda muanyi.” (Yel. 20:8, 9) Nansha muvua Yelemiya ne bua kuyisha bantu bavua kabayi mua kumuteleja, mukenji uvua Yehowa mumuambile bua kumanyisha wakamupetesha bukole bua kukumbaja mudimu uvuaye mumupeshe. Mukenji wa Nzambi udi mu Bible ke udi upetesha bena Kristo bukole. Mupostolo Paulo wakamba ne: kupeta dimanya dijalame kuvua ne bua kubambuluisha bua “kuenda mu mushindu udi muakanangane ne Yehowa” ‘pavuabu benda bakuama mamuma mu mudimu wonso muimpe.’​—Kolos. 1:9, 10. w24.04 14-15 §2-4

Nansha muvua Muakuidi munene Ebeyatâ mupange mua kushala ne lulamatu kudi Yehowa pavuaye muditua ku tshia Adoniya bua kutungila Davidi, Sadoka wakashala yeye ne lulamatu kudi Yehowa. Davidi wakashala pende mueyemene Sadoka. Pakatandulabu tshivua Adoniya ukeba kuenza, Davidi wakalomba Sadoka, Natana, ne Benaya bua bele Solomo manyi ne bamubanjije mu bukalenge. (1 Bak. 1:32-34) Tshilejilu tshia Natana ne tshia batendeledi bakuabu ba Yehowa bavua bashale ne lulamatu kudiye ne kudi mukalenge Davidi tshivua ne bua kuikala tshikoleshe Sadoka, ne tshimukankamije. Pakalua Solomo mukalenge, “wakateka muakuidi Sadoka pa muaba wa Ebeyatâ.” (1 Bak. 2:35) Mmunyi muudi mua kuidikija Sadoka? Muntu uudi munange yeye mulekele Yehowa, wewe enza malu adi aleja ne: udi musue kushala ne lulamatu. (Yosh. 24:15) Yehowa neakupeshe bukole ne dikima dia kuenza tshidi tshimpe. Ikala usambila ne wikale pabuipi ne bena Kristo nebe ba lulamatu. Yehowa mmukunange bua muudi ne lulamatu ne neakufute.​—2 Sam. 22:26. w24.07 6-7 §16-17

Misambu 15:2 udi wamba bua mulunda wa Nzambi ne: “mmuntu udi wenda kayi kalema, wenza malu adi makane.” Miaku “wenda” ne “wenza” idi yumvuija tshintu tshidi tshitungunuka ne kuenzeka. Kadi tudi mua ‘kuenda katuyi kalema’ anyi? Eyowa. Nansha mutudi katuyi bapuangane, Yehowa yeye neatumone ne: tudi ‘tuenda kakuyi kalema’ bituikala tudienzeja ne muoyo umue bua kumutumikila. Patudi tudilambula ne tubatijibua, tudi tutuadija kuenda ne Nzambi. Ku kale, kuikala patupu muena Isalele kakuvua kuvuija muntu mukumbane bua kutudila mu ntenta wa Yehowa to. Kuvua bena Isalele bavua babila Yehowa kabiyi “mu bulelela ne mu buakane” to. (Yesh. 48:1) Bua bena Isalele kuleja ne: bavua bushuwa basue kutudila mu ntenta wa Yehowa, bavua ne bua kumanya mikenji yende ne kuyitumikila. Bia muomumue, bua Yehowa kutuanyisha lelu, katuena anu ne bua kubatijibua ne kuikala kubuela mu bisangilu patupu to. Tudi ne bua kutungunuka ne ‘kuenza malu adi makane.’ w24.06 9 §4; 10 §6

Mbintu kayi bitu Yehowa utupesha? Tuakule bua bimue bia kudibi. Yehowa utu utupesha bintu bia ku mubidi. Pamuapa katuena mua kuikala ne bintu bia mushinga mukole to, kadi Yehowa utu utupesha bitutu nabi dijinga. Tshilejilu, utu utupesha biakudia, bilamba ne kaba ka kutekela mutu. (Mis. 4:8; Mat. 6:31-33; 1 Tim. 6:6-8) Yehowa mmuenzejibue bua kutupeha bintu ebi anyi? Tòo! Tukonkononayi mêyi a Yezu adi mu Matayi 6:25, 26. Yezu wakatela bifukibua bu mudi nyunyi, wamba ne: “Kayitu ikuna mamiinu anyi inowa peshi ikunguija bintu mu mayeba” to. Kadi teleja tshivuaye mulue kuamba kabidi: “Tatu wenu wa mu diulu udi uyidisha.” Pashishe wakebeja ne: “Nuenu kanuena bayipite ku mushinga anyi?” Bualu ebu budi butulongesha ntshinyi? Bu mudi Yehowa udisha nyama, bidi bitujadikila ne: neatukumbajile majinga etu. Dinanga didi disaka Yehowa bua kututabalela anu mutu tatu utabalela bana bende.​—Mis. 145:16; Mat. 6:32. w24.09 26-27 §4-6

Musadidi wa mudimu mmuanetu wa balume ukadi mubatijibue udi mutekibue ku diambuluisha dia nyuma muimpe bua kuambuluisha bakulu mu midimu ya bungi ya mushinga ya mu tshisumbu. Basadidi ba mudimu batu nangananga bantu ba mu nyuma. Mbanange Yehowa ne batu batumikila mikenji yende miakane. Batu kabidi banange bena Kristo nabu bikole. (Mat. 22:37-39) Ntshinyi tshidi muanetu wa balume mua kuenza bua kulua musadidi wa mudimu? Mu Bible mudi ngikadilu milomba idi bana betu ba balume mua kukumbaja bua kulua basadidi ba mudimu. (1 Tim. 3:8-10, 12) Wewe ukonkonona ngikadilu ayi ne udienzeja bua kuikala nayi, udi mua kulua musadidi wa mudimu. Kadi udi ne bua kuanji kuela meji a tshidi tshikusaka bua kulua musadidi wa mudimu. w24.11 15 §4-5

Bamue bantu batu bamba mukadibu babale Bible misangu ya bungi. Kadi batu bitabuja malu adimu menemene anyi? Batu baatumikila anyi baalekela alombola nsombelu wabu anyi? Tòo. Bantu ba Nzambi mbashilangane nabu bikole be! Tutu tudienzeja bua kutumikila mibelu idimu. Kadi kabitu anu bipepele bua kubala Dîyi dia Nzambi ne kuditumikila to. Bidi mua kutukolela bua kupeta dîba dia kubala Bible anyi bidi mua kutufikila bua kumubala lukasa lukasa, katuyi ne dîba dia kuelangana meji a bitudi babale to. Peshi tudi mua kudisangana ne malu a bungi a kuakaja, bitutekesha ne mu mikolo. Nansha nanku Yehowa neatuambuluishe. Netufike anu ku dimubala ne ku ditumikila malu adimu. Tudisuikayiku bua kulua benji ba Dîyi. Kakuyi mpata, tuetu tubala Dîyi dia Nzambi ne tuditumikila, netuikale ne disanka dia bungi.​—Yak. 1:25. w24.09 7 §15-16

Yehowa udi utukolesha ku diambuluisha dia nyuma wende muimpe patudi tufuisha anyi padi bualu bubi menemene butufikila. Wewe ne muoyo musunsuke bua bualu budi bukufikile, ambila Yehowa muudi umvua. Udi mua kuyukila nende misangu bungi buudi musue anyi kuyukila nende mutantshi mule. (Mis. 86:3; 88:1) Tungunuka anu ne kulomba Yehowa nyuma wende muimpe. Kakupanga kukuambuluisha to. Udi ne lutatu lukole ludi lukutekeshe anyi? Nyuma muimpe udi mua kukupesha bukole bua utungunuke ne kutendelela Yehowa ne lulamatu. (Ef. 3:16) Wewe mumane kulomba Yehowa bua akupeshe nyuma wende muimpe, ntshinyi tshiudi ne bua kuenza? Enza malu akuambuluisha bua utambe kupeta nyuma wa Nzambi. Mu malu au mudi dibuela mu bisangilu ne diyisha. Bala Dîyi dia Yehowa dituku dionso, dîba adi meji a Yehowa neuwule munda muebe. (Filip. 4:8, 9) Paudi ubala Bible, keba bilejilu bia bantu bavua batuilangane ne ntatu ne welangane meji a muvua Yehowa mubambuluishe bua kunanukila. w24.10 9 §12-14

Tudi banange bantu anu mudi Yehowa ne Muanende babanange. (Nsu. 8:31) Tudi tumvuila bantu badi “kabayi ne Nzambi” ne badi kabayi ne “ditekemena” luse lua bungi. (Ef. 2:12) Badi ne ntatu ya bungi, kadi tudi ne lumu luimpe lua Bukalenge bua Nzambi ludibu nalu dijinga. Bu mutudi babanange ne tubumvuila luse, tudi tudienzeja bikole bua kubambila lumu luimpe. Lumu luimpe elu ludi lubapetesha ditekemena, disanka, ne mpunga wa kuluabu kupeta “muoyo wa bushuwa,” tuambe ne: muoyo wa tshiendelele, mu bulongolodi bupiabupia bua Nzambi. (1 Tim. 6:19) Tudi kabidi tudimuija bantu bua nshikidilu ukadi musemene bualu tudi babanange. (Yeh. 33:7, 8) Tudi ne bua kubamanyisha tshienzeka mu dikenga dinene tshia ne: nebanji kubutula bitendelelu bionso bia dishima ne nebalue kubutula ndongoluelu mubi wa malu eu ku Armagedone.​—Buak. 16:14, 16; 17:16, 17; 19:11, 19, 20. w24.05 16-17 §8-9

Mupostolo Paulo wakalomba bena Kristo bua ‘kushila tshiji tshia Nzambi muaba.’ Tudi tushila tshiji tshia Yehowa muaba patudi tumulekela yeye nkayende ujikija malu mabi dîba didiye musue ne mu mushindu udiye musue. Pavuabu benzele muanetu John malu mabi, wakamba ne: “Ngakakanda tshiji tshianyi bua tshilu kuenza bualu bubi to. Kadi kabivua bipepele to. Lomo 12:19 wakangambuluisha bua kuikala ne lutulu ne kueyemena Yehowa.” Wewe windila bua Yehowa nkayende akaje malu, kuakusamisha mutu anyi kuakuikala ne tunyinganyinga tutu muntu umvua padiye ukeba kudijikijila tshilumbu to. Yehowa mmusue kukuambuluisha. Mbienze anu bu udi ukuambila ne: ‘Ndekeele malu mabi au, nenjikijangane nawu.’ Tuetu tuitaba tshidi Yehowa mutulaye tshia ne: ‘Meme nennufute,’ netulengulule malu mabi adibu batuenzele, batuishibue ne: neaajikije mu mushindu mutambe buimpe. w24.11 6 §14-15

Tudi ne bua kuteka bintu bia ku mubidi pa muaba wabi. Ke bualu buvua mupostolo Paulo mufundile bena Kristo ba ku nshikidilu wa ndongoluelu wa malu wa bena Yuda. Wakabavuluija malu avua menzekele bena Isalele pavuabu mu tshipela ne pavuabu pabuipi ne mukuna wa Sinai. Wakabadimuija bua ‘kabajingi malu mabi bu muvua [bena Isalele] baajinge.’ (1 Kol. 10:6, 7, 11) Yehowa wakabenzela tshishima bua kubapesha biakudia, kadi bu muvuabu ne lukuka, biakudia abi biakalua ‘bibi’ kudibu. (Nom. 11:4-6, 31-34) Pakatendelelabu kana ka ngombe ka or, bakadia, bakanua, bobu kusanka. (Ekes. 32:4-6) Paulo wakavuluija bena Kristo kumpala kua nshikidilu wa ndongoluelu wa malu wa bena Yuda wakalua mu 70 P.Y. bualu bua bena Isalele abu bua kubadimuija. Bu mutukadi petu basemene bikole ne tshikondo tshikala Yehowa ne bua kubutula buloba ebu, katulenguludi didimuija dia Paulo adi to. w24.12 6 §13

Yehowa ‘nNzambi wa disanka.’ Mmusue bua tuikale petu ne disanka. (1 Tim. 1:11) Mmutupeshe bintu bia bungi bua tuikale ne disanka mu nsombelu wetu. (Yak. 1:17) Tshimue tshia ku bintu abi ndibaka. Padi mulume ne mukaji baselangana, batu benza mutshipu wa kunangangana ne kunemekangana. Padibu banangangana bikole, bonso buabu nebikale ne disanka dia bungi. Bia dibungama, bena dibaka ba bungi lelu batu bapua muoyo mitshipu itubu benza dituku dia dibaka. Ke bualu kayi kabatu ne disanka to. Yehowa mmusue bua mulume enzele mukajende malu mushindu kayi? Yehowa mmutumine balume dîyi bua bapeshe bakaji babu bunême. Kupesha muntu bunême kudi kumuenekela ku mushindu utudi tumuenzela malu. Mulume udi upesha mukajende bunême udi umuenzela malu ne bulenga ne dinanga.​—1 Pet. 3:7. w25.01 8 §1-2; 9 §4-5

Kakuyi mpata, mukanda uvua mupostolo Paulo mufundile bena Kristo bena Ebelu wakabambuluisha bua kudilongolola bua dikenga divua ne bua kubakuata. Paulo wakabalomba bua balonge Dîyi dia Nzambi bikole ne badiumvue bimpe bua bafike ku dijingulula malongesha avua mua kunyanga ditabuja diabu ne kuabenga. Wakabakankamija bua kukolesha ditabuja diabu bua kabikadi bajanguluka bua kulonda buludiki budi Yezu ne bakulu badi balombola tshisumbu bafila to. Wakabambuluisha bua bamone dikengeshibua mu mushindu muimpe, tuambe ne: bamone dikengeshibua bu mpunga wa bobu kulongeshibua kudi Tatu wabu udi mubanange; dîba adi bivua bibambuluisha bua kutungunuka ne kunanukila. Tutumikilayi petu mibelu mimpe ya mu Bible eyi bualu neituambuluishe bua kunanukila ne lulamatu too ne ku ndekelu.​—Eb. 3:14. w24.09 13 §17, 19

Bilondeshile Bible, tshia kupikulangana natshi mmushinga udibu bafuta bua kubuikila mpekatu ne bua kulengejangana ne Nzambi. Ku mêsu kua Yehowa, tshia kupikulangana natshi ke tshidi tshiambuluisha bua kupetulula tshintu tshikavua tshijimine. Tshivua tshijimine ntshinyi? Mmuoyo mupuangane uvua Adama ne Eva nawu ne ditekemena divuabu nadi dia kushala ne muoyo kashidi. Ke bualu kayi tshia kupikulangana natshi tshivua ne bua kuikala ne mushinga wa muomumue ne tshivua tshijimine. (1 Tim. 2:6) Bavua ne bua kutshifuta anu kudi muntu mukole. Muntu au uvua ne bua kuikala muntu mulume 1) mupuangane, 2) muikale ne mushindu wa kusomba ne muoyo pa buloba, ne 3) mudiakaje bua kufila muoyo wende bua bualu buetu. Tumonayi malu asatu adi enza bua Yezu ikale mukumbane bua kuikala tshia kupikulangana natshi. 1) Uvua mupuangane, mmumue ne: “kavua muenze mpekatu to.” (1 Pet. 2:22) 2) Bu muvuaye mupuangane, uvua ne mushindu wa kushala ne muoyo kashidi pa buloba. 3) Uvua mudiakaje bua kutufuila.​—Eb. 10:9. w25.02 4-5 §11-12

Yehowa mmukunange ne mmusue bua ubuele mu dîku diende. Nansha wewe muikale ne malu kayi adi akupangisha bua kubatijibua, manya ne: Yehowa yeye mmusue bua ubuele mu dîku diende. Yezu wakambila kasumbu ka bayidi bende ba mu bidimu lukama bia kumpala ne: “Nuenu ne ditabuja bunene bua lutete lua mutâda, nenuambile mukuna eu ne: ‘Umbuka muaba eu, ndaku kuaka,’ wowu newumbuke, ne kakuena bualu buanukolela.” (Mat. 17:20) Bantu bavuaku pavua Yezu muambe mêyi au, bavua ne bidimu bikese tshianana katshia batuadija kumuteleja. Nunku ditabuja diabu divua dienda dikola. Kadi Yezu wakabajadikila ne: bobu bikale ne ditabuja dikole, Yehowa neabambuluishe bua kutshimuna ntatu idi anu bu mikuna. Ke tshiatuenzelaye petu! Paudi umanya malu adi akupangisha bua kubatijibua, kujingakanyi bua kuajikija to. Dilambula kudi Yehowa ne batijibua. Dipangadika dia kudilambula kudi Yehowa ndipite mapangadika onso awangata! w25.03 7 §18-20

Tuetu tuvuluka ne: Nzambi wa muoyo udi pabuipi bua kutuambuluisha, netutantamene ntatu idi itukuata. Tudi mua kudishindikila ne: Yehowa neatuambuluishe tuetu tuelangana meji a malu avuaye muenze ku kale. (Yesh. 37:17, 33-37) Tangila kabidi luapolo idi mu jw.org ya mudi Yehowa mupandishe bena Kristo ba matuku etu aa. Elangana kabidi meji a bungi bua misangu idi Yehowa mukuambuluishe. Pamuapa udi udiambila ne: Yehowa ki mmukuenzele bualu bunene to. Tshia kumanya tshidi ne: Yehowa mmukuenzele malu a bungi. Mmukubikile bua ulue mulunda wende. (Yone 6:44) Mulomba bua akuvuluije misangu ivuaye muandamune masambila ebe, ivuaye mukupeshe tshiuvua ujinga mu tshikondo tshiakanyine, ne ivuaye mukutabalele mu lutatu. Kuelangana meji a malu aa nekuenze bua utuishibue bikole ne: Yehowa neikale anu nebe. w24.06 21 §8

Tudi badisuike bua kubenga kulekela tshintu nansha tshimue tshitusaka bua kuenza bualu budi mua kunyingalaja Yehowa. Kadi tudi bantu bapange bupuangane ne bitu bipepele bua bantu kutufikisha ku dienza malu mabi. (Lomo 7:21-23) Tudi mua kutuilangana ne nsombelu ya tshimpitshimpi idi mua kutusaka bua kuenza malu mabi. Bua kushala ne lulamatu kudi Yehowa ne Muanende, mbimpe tutumikile mubelu wa Yezu wa kutungunuka ne kudimukila malu adi mua kutufikisha ku dienza mpekatu. Yonso wa kutudi utu utuilangana ne malu adi mua kumusaka bua kuenza bilema ne udi ne buende butekete. Nunku kudi amue malu adi mua kutusaka nangananga bua kuenza malu mabi. Tshilejilu, muntu udi mua kuikala udienzeja bua kukandamena diteta dia kuenda masandi, mukuabu pende udi mua kuikala uluangana bua kulekela tshikadilu tshia bukoya bu mudi tshia kudijikijila majinga a disangila ne tshia kumona filme ya bantu butaka. Munga pende udi mua kuikala uluangana bua kulekela ditshina dia bantu, lungenyi lua kuikala mudikadile, tshiji tshia lukasa anyi malu makuabu. w24.07 14 §3; 15 §5

Ntshinyi tshivua mua kuenzeka bu bakulu babenge kupingaja muenji wa mpekatu uvua munyingalale au mu tshisumbu anyi bena mu tshisumbu atshi babenge kumuleja dinanga pavuabu bamupingaje? “Dibungama dipite bukole” divua mua kumuzengeja. Uvua mua kuela meji ne: kuende nkujike. Kavua nansha mua kutungunuka ne kudienzeja bua kuakaja malanda ende ne Nzambi to. Bualu bubi menemene budi ne: pavua bena Kristo babenga kumufuila luse, bavua badinyangila malanda abu ne Yehowa. Bua tshinyi? Bualu dîba adi, kabavua bidikija Yehowa, mubuikididianganyi wa mpekatu to; kadi bavua bidikija Satana, muena malu makole, utu kayi ne luse. Bavua balua tshiamu tshia mudimu tshivua Satana wenza natshi mudimu bua kumupangisha bua kuenzela Yehowa mudimu.​—2 Kol. 2:10, 11; Ef. 4:27. w24.08 17 §7, 10-11

Yezu wakapesha kabidi tshisumbu “mapa mikale bantu” adi enza mudimu mu mushindu mukuabu. Wakasaka bakulu ba mu Yelushalema bua kutuma Paulo, Bânaba, ne bantu bakuabu mu mudimu wa butangidi buena ngendu. (Bien. 11:22) Bua tshinyi? Bua kukumbaja tshipatshila tshia muomumue ne tshia basadidi ne bakulu, tuambe ne: tshia kukolesha bisumbu. (Bien. 15:40, 41) Batangidi ba bijengu batu benza ngendu bikole. Bamue batu benza kilometre ya bungi bua kuya kukumbula bisumbu bikuabu. Mutangidi wa tshijengu utu ne miyuki ya kuela lumingu luonso, utu wenza makumbula a bulami, ulombola tshisangilu tshia bampanda-njila, tshia bakulu, ne bisangilu bia mudimu wa buambi. Utu ulongolola miyuki ya kuela, ulongolola kabidi malu bua mpuilu ne mpungilu. Utu ulongesha mu tulasa tua bampanda-njila, ulongolola malu bua tshisangilu tshia pa buatshi tshia bampanda-njila ba mu tshijengu tshiende, ne wenza midimu mikuabu, pamuapa idi Betele umupesha, umulomba bua kuyenza lukasa lukasa. w24.10 21 §12-13

Yehowa wakasaka muprofete Yelemiya bua kuamba mêyi a mu mvese wetu wa lelu. Mupostolo Paulo wakatela pende mêyi aa pakambaye ne: “Tshiakuvuluka kabidi mpekatu yabu nansha.” (Eb. 8:12) Kadi mêyi aa adi umvuija tshinyi menemene? Mu Bible, muaku “kuvuluka” kawena anu umvuija kupingaja meji ku bualu butukavua bamanye to, kadi udi mua kuikala kabidi ne lungenyi lua ne: muntu enze bualu kampanda. Muenzavi uvuabu bapopele ku mutshi pamue ne Yezu wakamulomba ne: “Yezu, umvuluke pawabuela mu Bukalenge buebe.” (Luka 23:42, 43) Kavua umulomba bua avuluke bualu buende patupu dîba adi to. Diandamuna dia Yezu diakaleja ne: uvua ne bua kuenza bualu kampanda, tuambe ne: kumubisha ku lufu. Nunku padi Yehowa wamba ne: kakuvuluka kabidi mibi yetu, udi usua kuamba ne: kakutunyoka to. Kakutunyoka bua mpekatu ikadiye mutubuikidile to. w25.02 10-11 §14-15

Tuetu bamanye ngikadilu ya Yehowa, bamanye malu adiye mulongolole bua kuenza, bamanye bidiye munange ne bidiye mukine, netupete dijingulula dia malu dilelela. Diebeja ne: ‘Bilondeshile malu a Yehowa andi mumanye, ndipangadika kayi dindi mua kuangata didi mua kumusankisha?’ (Ef. 5:17) Misangu mikuabu bua kusankisha Yehowa bidi mua kutulomba bua kubenga kuenza malu adi bantu badi batunange batusaka bua kuenza. Tshilejilu, bamue baledi badi belela muanabu wa bakaji meji mimpe badi mua kusumisha bua bamusele kudi muntu wa kantu ku bianza anyi udi mua kubapesha biuma bia bungi nansha biobi ne: muntu au ki mmukole mu nyuma to. Bulelela, mbasue bua muanabu ikale ne nsombelu muimpe. Kadi mulume au neamuambuluishe bua kutungunuka ne kukola mu nyuma anyi? Yehowa udi wela meji kayi bua bualu abu? Diandamuna didi mu Matayi 6:33, mudibu balomba bena Kristo bua kutungunuka ne “kukeba tshia kumpala Bukalenge.” Nansha mutudi tunemeka baledi betu ne bantu bakuabu, tshidi ne mushinga wa bungi menemene nkusankisha Yehowa. w25.01 17 §9-10

Tudi basue bua Yehowa atuambuluishe bua tutungunuke ne kuyisha ne tshisumi padibu batuluisha lelu. (Buak. 12:17) Bua tshinyi mbimpe wikale mutuishibue ne: Yehowa neakuambuluishe? Mona tshivua Yezu muambe mu disambila didi mu Yone nshapita wa 17. Wakalomba Yehowa bua alame bapostolo bende. Ke tshiakenza Yehowa. Mukanda wa Bienzedi udi uleja muvua Yehowa muambuluishe bapostolo bua kuyisha ne tshisumi pavuabu babakengesha. Yezu wakalomba kabidi Yehowa mu disambila adi bua kulama bantu bonso bavua ne bua kuitabuja malu avua bapostolo balongesha. Wewe pebe udi mu bantu abu. Yehowa ki mmulekele kuandamuna disambila dia Yezu adi to. Neakuambuluishe anu muvuaye muambuluishe bapostolo. (Yone 17:11, 15, 20) Bu mukadi nshikidilu mulembelele bikole, bidi mua kutukolela bikole bua kuyisha lumu luimpe ne tshisumi. Nansha nanku, netupete diambuluisha ditudi nadi dijinga.​—Luka 21:12-15. w25.03 18 §13-14

Bantu ba Nzambi badi bela mbila ya disanka bualu badi ne dianyisha kudi Yehowa. ‘Muoyo wetu udi bimpe’ bua ditekemena dietu dikole didi dimanyine pa mulambu wa tshia kupikulangana natshi wa Kristo, bua bulelela bua mu Bible budi butukankamija, ne bua milayi ya Nzambi idi itusamba. Kuambilangana malu aa kudi kutuenza disanka dia bungi! (Mis. 34:8; 133:1-3) Bimanyinu bibidi binene bia bantu ba Yehowa badi mu Mparadizu wa mu nyuma bidi ne: mbanangangane ne badi mu buobumue. ‘Tshisuikidi tshia buobumue’ etshi tshidi tshituleja nsombelu wa mu bulongolodi bupiabupia muikala bantu ba Yehowa banangangane bikole ne bikale mu buobumue bukole bupite bua lelu. (Kolos. 3:14) Muntu yonso udi musue kupeta disanka dia bungi udi ne bua kubuela mu Mparadizu wetu wa mu nyuma. Nansha bena panu batumona mushindu kayi, tudi ne dîna dimpe anyi lumu luimpe kudi Yehowa ne kudi bena Kristo netu.​—Yesh. 65:15. w24.04 21 §7-8

Mmunyi mutudi mua kukankamija bena Kristo netu badi basue kubuela mu dibaka ne kubambuluisha? Umue mushindu utudi mua kuenza nanku ngua kutabalela bitudi tubambila. (Ef. 4:29) Tudi mua kudiebeja ne: ‘Ntuku nsaka bana betu bajike bua kubuela mu dibaka nansha mu bilele anyi? Pantu mmona bajike babidi bayukila, ntu ngela meji ne: bakadi banangangane anyi?’ (1 Tim. 5:13) Kupita apu, katufikishi bajike ku didimona bu bashadile bualu ki mbanji kubuela mu dibaka to. Tuetu tukeba mpunga ya kuela bana betu bajike kalumbandi, netshikale bualu buimpe be! Kadi tshia kuenza ntshinyi tuetu bamone ne: muanetu wa balume kampanda ne wa bakaji batshidi bajike badi mua kuenza dibaka dimpe? Bible udi utulomba bua kunemeka mmuenenu wa bakuabu. (Lomo 15:2) Bajike ba bungi kabatu basue bua babakebele wa kubuelabu nende mu dibaka to. Nanku, tudi ne bua kunemeka dipangadika diabu. (2 Tes. 3:11) Bakuabu badi mua kujinga bua tubakebele wa kubuelabu nende mu dibaka, kadi bobu kabayi batuambile, katubakebediye to.​—Nsu. 3:27. w24.05 24-25 §14-15

Kutu misangu itutu tutuilangana ne malu atu atukebela ntatu anyi anyangakaja nsombelu wetu. Kadi tudi ba diakalenga bualu Yehowa udi ku luseke luetu. Padiye utusamba, tudi tutuishibua ne: “Yehowa udi ne muoyo!” (Mis. 18:46) Davidi mumane kuamba mêyi au, wakamubikila ne: “Dibue dianyi.” Bua tshinyi uvua ufuanyikija Yehowa ne tshintu tshidi katshiyi ne muoyo? Bible mmufuanyikije Yehowa ne dibue bua tujingulule tshidi imue ngikadilu yende. Mu Bible, misangu ya bungi pavua batendeledi ba Yehowa bamutumbisha bua ngikadilu yende milenga, bavua bamubikila ne: Dibue. Musangu wa kumpala uvuabu bamubikile nanku udi mu Dutelonome 32:4. Pavua Hana usambila, wakamba ne: “Kakuena dibue didi bu Nzambi wetu” to. (1 Sam. 2:2) Habakuka wakabikila Yehowa ne: “Dibue dianyi.” (Hab. 1:12) Mufundi wa Musambu wa 73 wakabikila Nzambi ne: “dibue dia muoyo wanyi.” (Mis. 73:26) Too ne Yehowa nkayende mmudibikile ne: dibue.​—Yesh. 44:8. w24.06 26 §1, 3

Bakalenge bena Isalele bavua basankisha Yehowa, bavua bamuenzela mudimu ne muoyo mujima. Bible udi wamba bua Yoshiya ne: “Kakuvua mukalenge bu yeye kumpala kuende uvua mupingane kudi Yehowa ne muoyo wende wonso” to. (2 Bak. 23:25) Kadi netuambe tshinyi bua Solomo wakalua kuenza malu mabi ku ndekelu kua bukokeshi buende. “Muoyo wende kawuvua mujima” to. (1 Bak. 11:4) Bible udi wamba bua Abiyama mukalenge uvua kayi ne lulamatu ne: “Muoyo wende kawuvua mujima kudi Yehowa” to. (1 Bak. 15:3) Mu Bible, muaku “muoyo” utu utamba kumvuija muntu musokome wa munda, tuambe ne: meji etu, majinga etu, mututu tumvua, tshitu tshitusaka bua kuenza amue malu, ne malu atudi badifundile bua kukumbaja. Kadi kuikala ne muoyo mujima kudi Yehowa kudi kumvuija tshinyi? Muntu udi ne muoyo mujima kudi Yehowa kena anu umutendelela bua kuwuja mukenji to. Kadi udi umutendelela bualu mmumunange ne umunemeka. w24.07 21 §4-5

Yehowa udi ufila tshilejilu bua kutumvuija mudiye ujimija mibi yetu. Udi wamba ne: “Nembuikile matomboka ebe bu ne ditutu ne mpekatu yebe bu ne ditutu difiike.” (Yesh. 44:22) Patu Yehowa utubuikidila mibi bitu anu bu ne: udi uyibuikila ne ditutu difiike bua kayimueneki kabidi to. Bilejilu bitudi bafume ku dimona ebi bidi bitulongesha tshinyi? Padi Yehowa utubuikidila mibi, katushadi tudiumvua ne bujitu buayi mu nsombelu wetu mujima to. Mibi yetu ayi bakadi bayijimije yonso ku diambuluisha dia mashi a Yezu Kristo, bienze anu bu ne: katuvua bayenze to. Eu ke mushindu udi Yehowa utufuila luse patudi tunyingalala bua mpekatu yetu. Ditufuila luse dilelela dia Yehowa didi dituambuluisha bua kudia kabidi nende bulunda bushême. Didi dituambuluisha bua kubenga kudipisha. w25.02 10 §11-14

Bakulu badi benza komite badi ne dibanza kumpala kua Yehowa dia kulama tshisumbu tshikezuke. (1 Kol. 5:7) Badi benza muabu muonso bua kufikisha muntu ku dinyingalala bua mpekatu wende. Bua bualu abu, badi bamuambuluisha, batekemene ne: neashintuluke. Bua tshinyi? Bualu mbasue kuidikija Yehowa udi ne “dinanga dikole menemene ne luse.” (Yak. 5:11) Mona muvua mupostolo Yone ukavua mukulakaje muleje meji au pakafundaye ne: “Bana banyi bakese, ndi nnufundila malu aa bua kanuenji mpekatu to. Kadi muntu yeye muenze mpekatu, tudi ne muambuluishi kudi Tatu, Yezu Kristo, muntu muakane.” (1 Yone 2:1) Diakabi, bitu bienzeka bua muntu abenge kunyingalala bua mpekatu udiye muenze. Dîba adi, udi ne bua kumbushibua mu tshisumbu. w24.08 25 §19-20

Lungenyi lua kudifuanyikija ne bakuabu luolu lukuluile, ulumbushe. Bualu Yehowa katu ufuanyikijangana nanku to. (Gal. 6:4) Mariya wakapesha Yezu mafuta a mupuya muimpe a mushinga mukole. (Yone 12:3-5) Kadi mukaji mukamba uvua mukengi wakafila tukuta tubidi tua mushinga mukese ku ntempelo. (Luka 21:1-4) Yezu kakafuanyikija Mariya ne mukaji mukamba au to. Buende yeye, bonso babidi bavua baleje muvuabu ne ditabuja. Ikala mutuishibue ne: Yehowa udi umona bionso biudi wenza bua muudi ne ditabuja kudiye ne muudi mumunange. Manya kabidi ne: nansha kakese kaudi ufila aku, Yehowa udi ukangata ne mushinga wa bungi. Kudi misangu itutu tuetu bonso tupeta dielakana. Kadi Bible udi mua kutuambuluisha bua kudilekela. Nebikuambuluishe bua kudimona ne mushinga pamutu pa kutekeshibua mu mikolo. Yehowa mmukumanye bimpe menemene. Udi wanyisha bionso biudi wenza bua muudi uteka malu ende pa muaba wa kumpala mu nsombelu webe, ne neakubeneshe anu mudiye mulaye. Yehowa mmunange batendeledi bende bonso ba lulamatu ne udi ubatabalela. w24.10 25 §3; 29 §17-18