Yehowa udi mua kukuambuluisha paudi mutekeshibue mu mikolo

1-2. Mmunyi muvua Paulo umvua imue misangu? Tudi bafuanangane ne Paulo ku tshinyi? (Lomo 7:21-24)

PADIBU bakula bua mupostolo Paulo, pamuapa udi umumona bu misionere uvua ne dikima dia bungi, bu mulongeshi mupiluke, anyi bu muntu uvua mufunde mikanda ya bungi ya mu Bible. Muudi umumona amu mmuomu. Kadi kuvua misangu ivua Paulo udiumvua mutekeshibue mu mikolo ne umvua malu amutonda. Uvua pende anu bu tuetu menemene.

² Bala Lomo 7:21-24. Paulo wakafundila bena Lomo mukanda, kubalejaye lutatu luvuaye nalu lutudi petu mua kuikala nalu. Nansha muvuaye muena Kristo wa lulamatu, bua dipanga bupuangane, bivua bitamba kumukolela bua kukumbaja dijinga dikole divuaye nadi dia kuenza disua dia Nzambi. Bivua kabidi bimutonda pavuaye wela meji bua malu mabi avuaye muenze kale ne bua lutatu kampanda luvuaye nalu luvua kaluyi lujika.

3. Ntshinyi tshituamona mu tshiena-bualu etshi? (Tangila kabidi “Diumvuija.”)

³ Nansha muvua Paulo udiumvua mutekeshibue mu mikolo,a uvua udienzeja bikole bua kumbusha meji ende ku malu avua amutekesha. Mu tshiena-bualu etshi, netuandamune nkonko eyi: Ntshinyi tshivua tshifikishe Paulo ku diamba imue misangu ne: uvua “muena dikenga”? Ntshinyi tshiakamuambuluisha bua kubenga kutuma meji bikole ku malu avua mua kumubungamija? Ntshinyi tshitudi mua kuenza patudi babungame?

MALU AVUA ABUNGAMIJA PAULO

4. Mmalu kayi avua abungamija Paulo?

⁴ Malu mabi avuaye muenze kale. Kumpala kua Paulo kulua muena Kristo, uvua muenze malu mabi a bungi avua malue kumubungamija. Tshilejilu, wakanyisha bua bashipe Stefano ne mabue. (Bien. 7:58; 8:1) Uvua kabidi ukengesha bena Kristo bibi menemene.​—Bien. 8:3; 26:9-11.

5. Mmunyi muvua Paulo umvua bua malu avuaye muenze kale?

⁵ Pakalua Paulo muena Kristo, uvua imue misangu umvua bibi bua muvuaye mukengeshe bena Kristo kale. Tshilejilu, pavuaye mufundile bena Kolinto mukanda wa kumpala bu mu 55 B.B., wakamba ne: “Tshiena mukumbane bua kubikidibua mupostolo, bualu mvua mukengeshe tshisumbu tshia Nzambi.” (1 Kol. 15:9) Bidimu bitanu pashishe, wakafundila kabidi bena Efeso, wamba muvuaye ‘muntu uvua mushadile too ne kudi mutambe bukese wa ku bansantu bonso.’ (Ef. 3:8) Pavuaye mufundile Timote mukanda, uvua mumuambile muvuaye kumpala “mupendi wa Nzambi, mukengeshanganyi ne mupange bukalanga.” (1 Tim. 1:13) Anji tetabi kudifuanyikijila muvuaye umvua pavuaye uya kukumbula tshisumbu kampanda tshivua ne bena Kristo bavuaye mukengeshe anyi bena mu mêku a bena Kristo bavuaye mukengeshe!

6. Mbualu kayi bukuabu buvua bubungamija Paulo? (Tangila kabidi dimanyisha dia kuinshi kua dibeji.)

⁶ Uvua ne dieba mu mubidi. Paulo wakafuanyikija tshintu kampanda tshivua tshimutatshisha ne ‘dieba divuaye nadi mu mubidi.’ (2 Kol. 12:7) Kavua mutshitele to. Kadi tudi mua kuamba ne: uvua mua kuikala ne disama kampanda anyi bualu kansanga buvua bumutatshisha.b

7. Mmunyi muvua Paulo umvua bua bilema bivuaye wenza? (Lomo 7:18, 19)

⁷ Bilema bivuaye wenza. Bilema bivua Paulo wenza bivua bimubungamija. Uvua udienzeja bua kulua muntu muimpe. (Bala Lomo 7:18, 19.) Wakamba ne: kuvua misangu ivuaye wenza malu avuaye kayi musue to. Nansha nanku, uvua anu udienzeja bua kuenza malu mimpe pamutu pa kulonda majinga ende mabi. (1 Kol. 9:27) Kadi uvua anu wenza bilema. Anji elabi meji muvuabi mua kuikala bimutonda pavuaye wamba anyi wenza bualu buvuaye mudienzeje bikole bua kulekela!

TSHIVUA PAULO WENZA PAVUAYE MUTEKESHIBUE MU MIKOLO

8. Mmalu kayi avua Paulo muenze bua kupeta ngikadilu mimpe?

⁸ Paulo wakela meji a muvua nyuma wa Nzambi mua kumuambuluisha yeye ne bena Kristo nende bua kutantamena majinga a kuenza mpekatu ne kuikala ne ngikadilu mimpe. Bualu ebu budi bumuenekela mu mikanda ivuaye mufunde. (Lomo 8:13; Gal. 5:16, 17) Paulo wakaleja patoke malu avua bena Kristo ne bua kuepuka bua kusankisha Nzambi. (Gal. 5:19-21, 26) Kakuyi mpata, pavuaye muele meji a bilema biende, wakakeba mibelu mu Mifundu minsantu, pashishe kukebaye mushindu wa kuyitumikila bua kubilekela. Tudi batuishibue ne: uvua utumikila mibelu ivuaye upesha bakuabu.

9-10. Ntshinyi tshivua tshiambuluishe Paulo pavuaye mutekeshibue mu mikolo? (Efeso 1:7) (Tangila kabidi tshimfuanyi.)

⁹ Nansha muvuaku misangu ivua Paulo udiumvua mutekeshibue mu mikolo, kuvua malu avua atamba kumupetesha disanka. Tshilejilu, ngumu mimpe ya mu bisumbu bishilashilangane ivuabu bamutuadila kudi benzejanganyi nende ba mudimu ivua imupetesha disanka dia bungi. (2 Kol. 7:6, 7) Uvua kabidi ne disanka pavuaye usomba ne bena Kristo bavuaye mudie nabu bulunda. (2 Tim. 1:4) Uvua mumanye ne: Yehowa udi umuanyisha. Paulo uvua kabidi ne disanka bualu uvua wenzela Yehowa mudimu “muikale ne kondo ka muoyo katoke.” (2 Tim. 1:3) Nansha pavuaye muena buloko mu Lomo, wakalomba bena Kristo nende bua ‘bikale basanka mu Mukalenge.’ (Filip. 4:4) Mêyi a Paulo aa adi aleja ne: kavua utuma meji ende anu ku ntatu ivuaye nayi ne ku bilema biende to. Mbiumvuike bimpe ne: pavuaye udiumvua mutekeshibue mu mikolo, uvua utuma meji ende ku malu avua mua kumupetesha disanka.

¹⁰ Bu muvua Paulo umona ne: bavua bafile tshia kupikulangana natshi buende yeye, bivua bimuambuluisha kabidi bua kubenga kushala mutekete mu mikolo. (Gal. 2:20; bala Efeso 1:7.) Ke bualu kayi, uvua mutuishibue ne: Yehowa neamubuikidile mibi yende ku butuangaji bua Yezu Kristo. (Lomo 7:24, 25) Malu onso au akamuambuluisha bua kutungunuka ne ‘kuenzela Nzambi mudimu wa tshijila’ ne disanka.​—Eb. 9:12-14.

11. Bua tshinyi tshilejilu tshia Paulo tshidi tshitukankamija?

¹¹ Tudi petu mua kumona anu bu Paulo ne: bidi bitulomba misangu yonso bua kudienzeja bua meji atudi tuela, malu atudi tuamba ne tuenza kabinyingalaji Nzambi to. Bidi mua kufikila yonso wa kutudi bua kuamba pende ne: “Meme muena dikenga!” Muanetu mukuabu wa bakaji wa bidimu 20 ne bia mu njila, diende Elizac, udi wamba bua lutatu ludiye nalu ne: “Pantu ngela meji a nsombelu wa Paulo, bitu binkolesha ne bimpetesha disulakana bualu uvua pende utata anu bu meme. Bitu bimvuluija kabidi ne: Yehowa mmumanye ntatu idi batendeledi bende bapeta.” Ntshinyi tshitudi petu mua kuenza anu bu Paulo bua tuikale ne kondo ka muoyo kimpe ne tuikale ne disanka nansha patudi batekeshibue mu mikolo?

TSHITUDI MUA KUENZA PATUDI BATEKESHIBUE MU MIKOLO

12. Mmunyi mudi kuenza malu a mu nyuma pa tshibidilu kutuambuluisha patudi tudiumvua batekeshibue mu mikolo?

¹² Ikala ne tshibidilu tshia kuenza malu a mu nyuma. Tuetu ne tshibidilu tshia kuenza malu a mu nyuma, netuikale tutuma meji etu anu ku malu adi akolesha. Tudi mua kufuanyikija tshibidilu tshia kuenza malu a mu nyuma ne malu atutu tuenza bua kuikala ne makanda a mubidi mimpe. Tuetu tudia bimpe, tuibidija mubidi pa tshibidilu, ne tulala mudibi bikengela, tudi tumvua bimpe. Bia muomumue, patutu tubala Bible pa tshibidilu, tuyisha, tulongolola bisangilu, tubuelamu, ne tuandamunamu, tutu tumvua disanka. Kuenza malu aa kutu kutuambuluisha bua kumbusha meji ku malu adi mua kututekesha mu mikolo.​—Lomo 12:11, 12.

13-14. Mmunyi muvua kuenza malu a mu nyuma pa tshibidilu kuambuluishe bamue bena Kristo netu?

¹³ Tuangate tshilejilu tshia muanetu John. Pavuaye ne bidimu 39, bakamukuata disama dia kansere katu kakayi katamba kukuata bantu. Ku ntuadijilu, wakumvua buôwa, kubungamaye bikole. Kudiambilaye ne: ‘Edi disama dinkuata bukole buanyi ebu!’ Tshikondo atshi uvua ne muana wa bidimu bisatu patupu. Ntshinyi tshiakambuluisha John? Udi wamba ne: “Nansha mumvua ntshioka, mvua anu ndienzeja bua tuikale ne tshibidilu tshia kuenza malu a mu nyuma mu dîku dietu. Tuvua tubuela mu bisangilu bionso, tuyisha lumingu luonso, ne tuenza ntendelelu wa mu dîku lumingu luonso nansha muvuabi kabiyi bipepele.” John udi wamba kabidi ne: “Padi ntatu ikukuata, bidi mua kuanji kukutekesha mu mikolo, kadi pashishe neumone mudi Yehowa ukupesha bukole ne uleja mudiye mukunange. Yehowa udi mua kukuambuluisha pebe anu mudiye mungambuluishe emu.”

¹⁴ Eliza utukadi batele udi wamba ne: “Malu antu ndonga mu bisangilu ne antu ndilongela atu amvuluija ne: Yehowa utu unteleja ne mmunnange bikole; bitu bimpetesha disanka dia bungi.” Nolan udi mutangidi wa tshijengu mu Afrike udi wamba buende yeye ne bua mukajende Diane ne: “Tutu anu tuenza malu etu a mu nyuma nansha patutu tudiumvua batekeshibue mu mikolo. Yehowa utu anu utuambuluisha bua kuikala ne disanka. Tutu tudienzeja bua kuikala anu bavuluke ne: Yehowa neatuambuluishe ne neatubeneshe. Tudi ne dishindika adi, nansha mutudi katuyi bamanye muenzaye nanku.”

15. Ntshinyi tshikuabu tshitudi mua kuenza bua katushadi batekeshibue mu mikolo? Fila tshilejilu.

¹⁵ Kudi malu makuabu atudi mua kuenza bua katushadi batekeshibue mu mikolo to. Tuangate tshilejilu etshi: fuanyikijabi ne: nyima udi ukusama. Wewe upatuka bua kuendakana dituku dionso, nyima udi mua kutalala ndambu. Kadi bua yeye kubenga kukusama, udi ne bua kumanya tshidi tshikusamisha nyima au. Bua bualu abu, udi mua kuenza makebulula anyi mene kuya kua munganga. Bia muomumue, bidi mua kutulomba bua kuenza makebulula mu Bible ne mu mikanda yetu anyi mene kukuatshila muena Kristo mushindame bualu budi bututekeshe mu mikolo bua tumone mua kubutantamena. Tumonayi mibelu mikuabu idi mua kutuambuluisha.

16. Ntshinyi tshidi mua kukuambuluisha bua kumanya malu adi akutekesha mu mikolo? (Misambu 139:1-4, 23, 24)

¹⁶ Sambila bua umanye bimpe tshiudi natshi dijinga. Mukalenge Davidi uvua mujadike ne: Yehowa uvua mumumanye bimpe. Ke bualu kayi wakamulomba bua amuambuluishe bua ajingulule ‘meji avua amutatshisha.’ (Bala Misambu 139:1-4, 23, 24.) Nansha wewe pebe udi mua kulomba Yehowa bua akuambuluishe ujingulule malu adi akutekesha mu mikolo ne umanye tshia kuenza bua upete disulakana. Udi mua kudiebeja ne: ‘Mbualu kayi butu butamba kunsamisha mutu ne kuntekesha mu mikolo? Ntu nshala anu mutume meji ku malu adi mantekeshe mu mikolo pamutu pa kuatuma ku malu adi mua kumpetesha disanka anyi?’

17. Mbiena-bualu kayi bitudi mua kudilongela bua tuikale tutuma meji anu ku malu adi akolesha? (Tangila kabidi tshimfuanyi.)

¹⁷ Dilongela malu adi mua kukuambuluisha mu lutatu luudi nalu. Ikala imue misangu ulonga malu adi atangila ngikadilu kampanda wa Yehowa adi mua kukukankamija. Tshilejilu, pavua mupostolo Paulo muelangane meji a tshia kupikulangana natshi ne a mutu Yehowa ufuilangana luse, biakamuambuluisha bikole. Udi pebe mua kuenza nanku. Tangila mu Mukanda wa makebulula wa Bantemu ba Yehowa, mu Index des publications des Témoins de Jéhovah anyi mu mikanda yetu mikuabu bua upete biena-bualu bidi biakula bua ngikadilu ya Nzambi bu mudi: luse ne dinanga dia lulamatu. Wewe mupete biena-bualu bidi mua kukuambuluisha, mbimpe ubifunda pa dibeji ne uditeka muaba uudi mua kudipeta bipepele. Dîba adi, wewe mudiumvue mutekeshibue mu mikolo, udi mua kubala kabidi malu adi mu biena-bualu abi. Ukebe bua kumona mudiwu mua kukuambuluisha mu lutatu luudi nalu.​—Filip. 4:8.

18. Mbiena-bualu kayi bivua biambuluishe bamue bena Kristo?

¹⁸ Eliza utukadi batele udi wamba ne: “Ngakatuilangana ne tatu ya bungi musangu umue. Nunku ngakadilongela bualu bua Yobo. Ntatu ya bungi yakamukuata, kumutekeshayi mu mikolo bikole menemene. Kadi nansha muvuaye kayi mumanye kuvuayi ifumina, wakatungunuka anu ne kueyemena Yehowa bua amuambuluishe.” (Yobo 42:1-6) Diane utukadi batele udi wamba ne: “Meme ne bayanyi tutu tudilongela mukanda wa Semena pabuipi ne Yehowa. Tudi ne disanka bualu tudi tumona ne: Yehowa udi wenda utufumba anu mutu mufumbi ufumba diima. Pamutu pa tuetu kutuma meji etu ku malu atu atutekesha mu mikolo, tutu tudienzeja bua kuatuma ku mushindu udi Yehowa utufumba bua tulue bantu bimpe. Kuenza nanku kudi kukolesha bulunda buetu ne Yehowa.”​—Yesh. 64:8.

YEHOWA NEATUAMBULUISHE NE NEATUFUTE

19. Ndishindika kayi ditudi mua kuikala nadi?

¹⁹ Nansha tuetu batumikile mibelu yonso idi mu tshiena-bualu etshi, nekuikale anu misangu itudi mua kupeta malu adi atubungamija anyi adi mua kututekesha mu mikolo bikole. Kadi Yehowa neatuambuluishe bua katutambi kutuma meji ku malu au to. Dîba adi netupete disulakana. Tudi bashindike ne: netuikale anu ne kondo ka muoyo kimpe bualu tudi mu malanda mimpe ne Yehowa, bamanye ne: udi wanyisha mudimu utudi tumuenzela.

20. Udi mudisuike bua kutungunuka ne kuenza tshinyi?

²⁰ Tuenzayi muetu muonso bua malu atuvua benze kale, ntatu yetu, anyi bilema bitudi tuenza kabitupangishi bua kuikala ne disanka to. Yehowa neatuambuluishe bua kupeta disulakana patudi ne malu atutonda. (Mis. 143:10) Tutumayi meji ku nsombelu utuikala nende mu bulongolodi bupiabupia muikala anu malu adi atusankisha, ne mutuenzela Yehowa Nzambi wetu udi mutunange mudimu ne disanka, kakuyi kabidi malu adi mua kututekesha mu mikolo to!