Ikala ne mêyi mimpe paudi ulongesha bulelela

1. Ntshinyi tshitudi ne bua kuenza bua kubuela mu dîku dia Yehowa?

PATUTU tutuilangana ne mutendeledi wa Yehowa, bumue bua ku malu atutu tujinga kumanya mmuvuaye mupete bulelela. Bamue bana betu batu bandamuna ne: “mbakolele mu bulelela.” Bakuabu badi bobu mua kuamba ne: “mbalonge bulelela” matuku mashale aa. Tutu tuandamuna mushindu eu bualu bulelela bua mu Dîyi dia Nzambi butu butulombola. Bua tshinyi? Bualu bua tuetu kuikala ba mu dîku dia Yehowa anu tuetu baleje mutudi banange bulelela abu ne tutumikila bitudi tulonga. Mu malu a kutumikila au mudi dikala bena bululame mu bitudi tuamba ne tuenza.​—Mis. 15:1-3.

2. a) Yezu uvua mumanyike bu muntu wa mushindu kayi? b) Ntshinyi tshivua bantu mua kuikala benze pavuaye mubambile bulelela?

² Yezu uvua wamba anu malu malelela. Bena lukuna bende bavua bamanye bualu abu, nansha muvuabu kabayi banange bivuaye wamba. (Mat. 22:16) Yezu wakambila bayidi bende tshivua bantu ne bua kuenza pavuabu bateleja malongesha ende. Wakamba ne: “Mvua mulue kukebesha ditapuluka: muntu uluisha tatuende, muana wa bakaji uluisha mamuende, mukaji wa muana uluisha mamuende muenu.” (Mat. 10:35) Yezu kavua musue bua bantu babenge mukenji uvuaye yeye ne bayidi bende ne bua kubayisha to, tshibi uvua mumanye ne: bavua anu mua kuwubenga. (Mat. 23:37) Uvua mumanye kabidi ne: mukenji wende uvua mua kutapulula bantu, mmumue ne: bamue bavua mua kuwunanga bakuabu kuwubenga.​—2 Tes. 2:9-11.

3. Ntshinyi tshituakuila mu tshiena-bualu etshi?

³ Tudi tudienzeja bua kuamba bulelela misangu yonso anu bu Yezu, nansha bantu bobu kabayi banange bitudi tuamba. Tudi kabidi tuyisha bantu bulelela bua mu Bible nansha mudi bamue mua kufiika munda bua bitudi tubambila. Abi bidi biumvuija ne: katuena ne bua kutabalela mushindu utudi tubalongesha bulelela abu ne dîba dia kubalongeshabu anyi? Tòo! Mu tshiena-bualu netuanji kuandamuna lukonko lunene elu: Mmuaba kayi utudi mua kupeta bulelela? Pashishe netuakule bua tshidi tshitusaka bua kubayisha bulelela abu ne bua mushindu ne dîba dia kubayishabu. Malu atuakonkonona aa neatuambuluishe bua kuakaja mushindu utudi tuambila bantu bulelela, tubambilabu ne dîyi dimpe mu tshikondo tshiakanyine.

MMUABA KAYI UTUDI MUA KUPETA BULELELA?

4. Bua tshinyi tudi tuamba ne: Yehowa ke Mpokolo wa bulelela?

⁴ Yehowa ke Mpokolo wa bulelela. Utu wamba anu bulelela. Tshilejilu, tshidiye wamba bua tshidi tshimpe ne tshibi ntshilelela. (Mis. 19:9; 119:142, 151) Malu onso atuye ulaya atu akumbana. (Yesh. 55:10, 11) Tshituye ulaya, utu anu utshikumbaja. (Nom. 23:19) Mu bulelela, kena mua kushima nansha kakese. (Eb. 6:18) Ke bualu kayi Bible udi wamba ne: Yehowa ‘nNzambi wa bulelela.’​—Mis. 31:5.

5. Bua tshinyi ki mbikole bua kumanya “Nzambi wa bulelela”? Umvuija. (Bienzedi 17:27)

⁵ Bamue bantu badi mua kuamba ne: mbikole bua kumanya Yehowa, “Nzambi wa bulelela.” Kadi badi badishima bualu bifukibua bionso bidi bitufikisha ku dimumanya. (Lomo 1:20) Pavua mupostolo Paulo mu Atena, wakakula ne kasumbu kampanda ka bena Greke bavua balonge bikole; kubambilaye ne: Nzambi mmusue bua ‘tumupete’ ne ‘kena kule ne yonso wa kutudi’ to. (Bala Bienzedi 17:27.) Mu bulelela, bantu badi bakeba Yehowa bikale ne didipuekesha, ke badiye ukoka kudiye.​—Yone 6:44.

6. Ngamue malongesha malelela kayi adi mu Bible? Bua tshinyi udi ne disanka bua muudi muamanye?

⁶ Umue mushindu udi bantu mua kufika ku dimanya Yehowa ngua kulonga Bible. Bantu bavua bafunde Bible bavua bamufunde ku bukole bua nyuma muimpe. (2 Pet. 1:20, 21) Nunku malu onso adimu mmalelela ne nga kueyemena, ne tudi tuitaba malu au. Tshilejilu, Bible mmuleje kudi diulu ne buloba ne muoyo utudi nawu bifumine. (Gen. 1:1, 26) Mmuleje kabidi tshidi tshitufikisha tuetu bonso ku dienza mpekatu ne tshidi tshikebesha makenga ne lufu. (Lomo 5:12; 6:23) Udi wamba ne: Yehowa neajikije malu mabi onso makebesha kudi Satana, “tatu wa dishima,” ku diambuluisha dia Muanende. (Yone 8:44; Lomo 16:20) Udi wamba kabidi ne: Yezu neabutule bantu babi, neabishe bantu ku lufu, neavuije buloba mparadizu, ne neatuvuije bapuangane. (Yone 11:25, 26; 1 Yone 3:8) Edi ndiakalenga dinene didi Yehowa mutupeshe bua mutudi bamanye malu aa! Mmutulongeshe bulelela, ne mmutupeshe mpunga wa kubulongesha bantu bakuabu.​—Mat. 28:19, 20.

TSHIDI TSHITUSAKA BUA KUYISHA BANTU BULELELA

7-8. Ntshinyi tshidi tshitusaka bua kuyisha bantu bulelela? Fila tshilejilu. (Mâko 3:11, 12) (Tangila kabidi bimfuanyi.)

⁷ Anu mutukadi mbambe, tuetu basue kuikala mu dîku dia Yehowa tudi ne bua kuamba malu malelela. Kadi tuetu basue kumusankisha, kudi bualu bukuabu bua mushinga bua kutabalela; mbuobu ebu: tshidi tshitusaka bua kuamba bulelela tshidi ne mushinga kudi Yehowa. Tuakulayi bua tshivua tshienzekele Yezu pavuaye uyisha. (Bala Mâko 3:11, 12.) Pavua Yezu uyisha pabuipi ne Mbuu wa Galela, bantu ba bungi bakalua muaba uvuaye. Bamue ba kudibu bavua bakuatshibue kudi bademon bakadiela panshi kumpala kuende bela mbila bamba ne: ‘Wewe udi Muana wa Nzambi.’ Tshivua tshisake bademon bua kuamba bulelela tshinyi? Pamuapa bavua bakeba ne: babeyemene kudi bantu bavua babateleje, ne bua ndekelu wa bionso babapangishe bua kuenzela Yehowa mudimu. Bademon abu bavua bambe bulelela, kadi bavua ne meji a kudisankisha. Bu muvua Yezu mumanye tshivua meji abu, kakasanka ne tshivuabu bambe atshi to. Ke bualu kayi wakabakandika bua kuyisha malu ende.

⁸ Bualu ebu budi butulongesha ne: tshidi tshitusaka bua kuambila bantu bulelela tshidi ne mushinga kudi Yehowa. Nunku bidi ne mushinga bua kulongesha bantu malu malelela a Yehowa bualu tudi bamunange. Padibu bakeba kututumbisha bua mukenji utudi tuyisha, mbimpe tubasake bua batumbishe Yehowa.​—Mat. 5:16; fuanyikija ne Bienzedi 14:12-15.

9. Ntshinyi tshitudi ne bua kuepuka? Bua tshinyi?

⁹ Tuakulayi bua nsombelu mukuabu udi mua kutulomba bua tuepuke didikebela butumbi. Tutekabi ne: muanetu kampanda udi ne midimu mu bulongolodi mmukuambile bualu busokoka, pashishe ubanga kubulondela bakuabu. Mpindieu baudi mubulondele abu bobu balue kumona ne: tshiuvua mubambile atshi ntshiotshi, badi mua kukema bua malu audi mumanye, bamba muutu mumanye malu masokoka. Badi mua kutuadija kukuangata ne mushinga kupite kumpala, kadi kabiakuikala nanku bua Yehowa to. (Nsu. 11:13) Bua tshinyi? Bualu nansha muuvua mubambile bulelela, kuvua ne bukokeshi bua kubambila malu masokoka to, ne kuvua kabidi ne meji mimpe pauvua ubambila apu to.

MUSHINDU WA KUYISHA BANTU BULELELA

10. Buebe wewe kuakula ne mêyi “mashême” kudi kumvuija tshinyi? (Kolosayi 4:6)

¹⁰ Bala Kolosayi 4:6. Mupostolo Paulo wakavuluija bena Kristo ba mu Kolosayi bua ‘mêyi abu ikale mashême misangu yonso.’ Bidi biumvuija tshinyi? Tshiambilu tshia mu tshiena Greke tshidi muaba eu tshidi tshiumvuija ne: malu atudi tuamba adi ne bua kuambuluisha bakuabu ne adi ne bua kuikala mimpe ne adi abasankisha.

11-12. Bua tshinyi tudi ne bua kutabalela mushindu utudi tulongesha bakuabu bulelela? Fila tshilejilu. (Tangila kabidi bimfuanyi.)

¹¹ Mbimpe tutumikile mubelu wa Paulo wa kuikala ne mêyi mashême patudi tulongesha bakuabu bulelela. Bible udi ufuanyikija bulelela ne muele mutue bikole udi mua kupandulula anyima ne nyuma. Mu mêyi makuabu, bulelela ebu budi butuleja tshidi meji etu menemene. (Eb. 4:12) Kadi tuetu katuyi tuenza mudimu bimpe ne Bible, tudi mua kufiikisha bantu munda anyi kutandangana nabu pabi kakuyi bualu. Bidi mua kuenzeka nanku mushindu kayi?

¹² Fuanyikijabi ne: udi utuilangana ne muntu kampanda mu buambi udi musue kulonga bulelela, kadi utu ne tshibidilu tshia kutendelela mpingu ne utu wenza difesto dia Nowele ne dia Pasaka pamue ne bena mu dîku diende. Bidi mua kukusaka bua kumubadila Bible bua kumuleja ne: kutendelela mpingu nkubula lungenyi ne kumuleja kabidi ne: difesto dia Nowele ne dia Pasaka mmafesto a bampangano. (Yesh. 44:14-20; 2 Kol. 6:14-17) Tuetu bamuambile nanku musangu wa kumpala utudi tuyukila nende, tudi bamuambile bulelela; kadi katuena benze mudimu bimpe ne Dîyi dia Nzambi to.

13. Mmunyi mutudi mua kuela mêyi etu mukele?

¹³ Paulo uvua muambe kabidi ne: tudi ne bua kuenza bua mêyi etu ikale asankisha bantu anu bu biakudia biela kamukele. Kavua usua kuamba ne: tudi ne bua kukonyangaja bulelela anyi kubusokoka to. Kadi uvua utulomba bua tuikale ne mêyi mimpe bua tulongeshe bantu bulelela mu mushindu udi ubasankisha. (Yobo 12:11) Kubuyisha nanku ki kupepele to. Bua biakudia bietu biena dîna ebi, tudi mua kudidinga tuamba ne: tshiakudia tshiotshi tshimpe muetu mukana, ntshimpe kabidi mukana mua bakuabu. Bia muomumue, tudi mua kuela meji ne: ngakuilu wetu udi usankisha muntu yonso. Kadi kabiena nanku to. Tshilejilu, bantu ba imue miaba batu bambilangana malu buludiludi nansha padibu bakula ne bantu bakulumpe. Bantu ba miaba mikuabu badi mua kumona ne: kuambilangana malu mushindu au ki nkuimpe to, nkupanga kua malu. Paulo wakamba ne: tudi ne bua kumanya ‘mutudi ne bua kuandamuna muntu yonso.’ Abi bidi biumvuija ne: nansha ngakuilu wetu yeye utusankisha, mbimpe tuenze bua asankishe kabidi bantu bakuabu.

DÎBA DIA KUAMBILA BANTU BULELELA

14. Pavua Yezu pa buloba, uvua muambile bayidi bende malu onso avuaye mumanye anyi? Umvuija.

¹⁴ Yezu uvua anu wakula ne bayidi bende ne dîyi dimpe ne uvua ubalongesha malu a bungi ne bulenga buonso. (Mâko 6:34) Kadi kutshivua malu a bungi avuabu ne bua kulonga. Nansha nanku Yezu kakakeba bua kubalongesha malu onso avuaye mumanye to, bualu uvua mumanye mikalu yabu. Uvua mumanye bimpe ne: katshivua tshikondo tshikumbane tshia bobu kumanya amue malu to. Yeye muine uvua muambe ne: kabavua mua kukumbana bua kuambula tshikondo atshi to. (Yone 16:12) Bidi bitulongesha tshinyi?

15. Tudi ne bua kulongesha balongi betu ba Bible malu onso musangu umue anyi? Umvuija. (Nsumuinu 25:11) (Tangila kabidi tshimfuanyi.)

¹⁵ Tshilejilu tshia Yezu tshidi tshileja ne: nansha mutudi bamanye bulelela bua mu Bible, kabiena bikengela ne: tulongeshe bakuabu malu onso musangu umue to. Mmushindu kayi utudi mua kulonda tshilejilu tshia Yezu? Tudi ne bua kuela meji bua nsombelu udi nende bantu. Vuluka bualu bua muntu uvua wenza difesto dia Nowele ne dia Pasaka pamue ne bena mu dîku diende. Tudi bamanye ne: mafesto aa nga bampangano ne Nzambi katu uanyisha. Kadi fuanyikijabi ne: udi utuadija kulonga Bible ne muntu au lumingu lumue anyi ibidi kumpala kua difesto dia Nowele. Wewe mumuleje tshidi Bible wamba bua mafesto au ne ujinga bua kenji difesto dia Nowele adi, netuambe ne: udi muyukile nende ne dîyi dimpe anyi? Bushuwa, kudi bamue balongi ba Bible badi mua kutumikila ne lukasa malu adibu balonga. Kadi bakuabu bobu batu bangata matuku a bungi bua kushintulula ngelelu wabu wa meji ne bienzedi biabu. Tuetu tuambila balongi betu ba Bible malu adibu ne bua kumanya mu tshikondo tshiakanyine, tuambe ne: dîba didibu mua kuumvua bimpe, tudi mua kubambuluisha bua baye kumpala.​—Bala Nsumuinu 25:11.

16. Mmushindu kayi utudi mua kuambuluisha balongi betu ba Bible bua ‘batungunuke ne kuenda mu bulelela’?

¹⁶ Kakuena malu a bungi adi atupetesha disanka bu patudi tuambuluisha bantu bakuabu bua bamanye malu malelela adi atangila Yehowa to. Tuetu bikale tshilejilu tshimpe kudibu, tudi mua kubambuluisha bua ‘batungunuke ne kuenda mu bulelela.’ (3 Yone 3, 4) Enza bua nsombelu webe aleje ne: udi witaba milayi idi mu Dîyi dia Nzambi. Ikala ne meji mimpe paudi wambila bakuabu bulelela. Ikala ulongesha bulelela mu tshikondo tshiakanyine, wakula ne dîyi dimpe. Enza bua bantu bapeshe Yehowa butumbi budibu mua kukupesha. Dîba adi neuleje ne: udi utendelela Yehowa, Nzambi wa bulelela.