LUMINGU LUA DIA 23-29/3/2026
MUSAMBU WA 18 Dianyisha bua tshia kutupikula natshi
Mushindu uudi mua kuleja dianyisha bua tshia kupikulangana natshi
“Dinanga didi nadi Kristo didi dituenzeja.”—2 KOL. 5:14.
LUNGENYI LUNENE
Mutudi tuetu bonso mua kuleja ne: tudi ne dianyisha bua tshia kupikulangana natshi.
1-2. Mulambu wa Yezu wa tshia kupikulangana natshi udi ne bua kutusaka bua kuenza tshinyi? Bua tshinyi? (2 Kolinto 5:14, 15) (Tangila kabidi tshimfuanyi.)
TUTEKABI ne: udi mukalame mu bibuwa bia nzubu udi mukupukile, pashishe muntu kampanda udi ulua kukupatulamu, neumumone mushindu kayi? Kakuyi mpata, wewe nkayebe neumuele tuasakidila; ne kua kupua tshidiye mukuenzele atshi muoyo nansha kakese.
2 Anu mutuvua bamone mu tshiena-bualu tshishale, tuetu nkayetu katuena mua kudipikula ku mpekatu ne ku lufu to, ke bualu kayi Yehowa wakafila mulambu wa Yezu wa tshia kupikulangana natshi bua 1) kutubuikidila mpekatu, 2) tupete ditekemena dia kulua bapuangane kumpala eku, ne bua 3) tudie kabidi nende malanda mimpe. Dîba adi netupete ditekemena dia kusomba ne muoyo kashidi mu bulongolodi bupiabupia. Bushuwa, tshia kupikulangana natshi tshidi tshileja muvua Yezu munange bantu bidimu bia bungi kumpala mene kua kuluaye pa buloba. (Nsu. 8:30, 31) Mupostolo Paulo wakafunda ne: “dinanga didi nadi Kristo didi dituenzeja.” (Bala 2 Kolinto 5:14, 15.) Bidi biumvuija ne: tudi ne bua kuleja dianyisha bua mudi Yezu mutunange, ne tudienzeje bua katupu tshidiye mutuenzele atshi muoyo to.
Muntu yeye mutupandishe mu bibuwa bia nzubu udi mupuke, tutu tumuela tuasakidila wa bungi. Nunku mbimpe tuele Yehowa ne Yezu tuasakidila ne muoyo wetu wonso bua mudibu batupikule ku mpekatu ne ku lufu (Tangila tshikoso 1-2)
3. Bua tshinyi mushindu uudi mua kuleja dianyisha bua tshia kupikulangana natshi udi mua kushilangana ne udi muntu mukuabu mua kudileja?
3 Ntshinyi tshiwenza bua kuleja ne: udi ne dianyisha bua tshia kupikulangana natshi? Diandamuna diebe didi mua kushilangana ne dia mukuabu. Bua kumvua bualu ebu, tuangatabi tshilejilu etshi: Bantu basatu ba mu bimenga bishilangane badi benza luendu, baya batangile muaba umue. Bidi biumvuika bimpe ne: yonso wa kudibu neikale mu wende njila. Bia muomumue, tuetu bonso tudi ne tshipatshila tshia kuleja dianyisha bua tshia kupikulangana natshi, kadi tudi mua kudileja mu mishindu mishilangane. Ke bualu kayi mu tshiena-bualu etshi netuakule bua: 1) Balongi ba Bible, 2) bana betu bakadi babatijibue, ne 3) bana betu badi balekele kuenzela Yehowa mudimu.
BALONGI BA BIBLE
4. Mmunyi mudi Yehowa umona balongi ba Bible?
4 Biwikala ulonga Bible, ela meji a bualu ebu: wewe utumikila malu a Yehowa audi ulonga au, bidi bileja ne: udi munkatshi mua bantu badiye musue kudia nabu bulunda. (Yone 6:44; Bien. 13:48) Yehowa udi umona tshidi mu muoyo webe. Bidi biumvuija ne: udi umona bionso biudi wenza bua kulonga malu ende, ne udi usanka padiye ukumona ushintuluka bua kumusankisha. (Nsu. 17:3; 27:11) Tshia kupikulangana natshi tshidi tshikupetesha mushindu wa kudia bulunda ne Yehowa. (Lomo 5:10, 11) Kulenguludi bualu ebu to.
5. Mmunyi mudi balongi ba Bible mua kutumikila mêyi adi mu Filipoyi 3:16?
5 Biwikala mulongi wa Bible, umue mushindu wa kuleja muudi ne dianyisha bua tshia kupikulangana natshi ngua kutumikila tshivua mupostolo Paulo muambile bena mu Filipoyi, tshia ne: “Mu mushindu utudi baye kumpala, tutungunuke ne kuenda mu bulongame mu njila wa muomumue eu.” (Filip. 3:16) Mbakudimune mvese eu mu Bible mukuabu ne: ‘Tutungunukayi ne kuya kumpala mu njila utukadi bamane kulonda too ne mpindiewu.’ Nunku kulekedi tshintu nansha tshimue tshikupangisha bua kutungunuka ne kuendela mu njila udi ufikisha ku muoyo to.—Mat. 7:14; Luka 9:62.
6. Ntshinyi tshidi balongi ba Bible mua kuenza padibi bibakolela bua kuitaba dilongesha kampanda dia mu Bible anyi bua kushintuluka? (Dutelonome 30:11-14) (Tangila kabidi tshimfuanyi.)
6 Biobi bikukolela bua kuitaba dilongesha kampanda dia mu Bible diudi ufuma ku dilonga, enza makebulula ne ulombe Yehowa akuambuluishe bua udiumvue bimpe. (Mis. 86:11) Wewe kuyi anu mufike ku diumvua dilongesha adi, anji diteka ku luseke, utungunuke ne kulonga Bible ne mulongeshi webe. Biobi bikukolela kabidi bua kulekela tshikadilu kampanda tshidi Bible ukandika, vuluka ne: Yehowa katu ulomba bantu bapange bupuangane bidibu kabayi mua kukokesha bua kuenza to. Neukokeshe bua kuenza malu adi amusankisha. (Bala Dutelonome 30:11-14.) Yehowa mene mmulaye bua kukuambuluisha. (Yesh. 41:10, 13; 1 Kol. 10:13) Nanku tungunuka ne kudienzeja bua kumutumikila. Pamutu pa kuimanyina pa ntatu iudi nayi, ela meji bua malu onso adi Yehowa mukuenzele, bu mudi bua tshia kupikulangana natshi. Wewe munange Yehowa bikole, neumone ne: “mikenji yende kayena ne bujitu” to.—1 Yone 5:3.a
Yehowa kena mua kutulomba bua kuenza bualu butudi katuyi mua kukokesha to. Neatuambuluishe bua kutumikila mikenji yende (Tangila tshikoso 6)
7. Mmalu kayi adi bana badi bakolela mu mêku a bena Kristo ne bua kuelela meji?
7 Netuambe tshinyi bua bana badi bakolela mu mêku a bena Kristo? Nuenu penu nudi balongi ba Bible. Mu bulelela, nudi balongi ba Bible ba mushinga mukole ba baledi benu. Bible udi wamba ne: “Semenayi pabuipi ne Nzambi ne yeye neasemene pabuipi nenu.” (Yak. 4:8; 1 Kul. 28:9) Paudi wenza malu kampanda bua kusemena pabuipi ne Yehowa, yeye pende neasemene pabuipi nebe. Yehowa kena ukutabalela bualu udi ukolela mu dîku dia Bantemu to, kadi mbualu mmusue bua ulue mulunda wende wa pa muoyo. Ntshinyi tshivua Yehowa muenze bua upete mushindu wa kulua mulunda wende wa pa muoyo? Wakafila Muanende. Nunku kupu bualu ebu muoyo to. (Lomo 5:1, 2) Ke bualu kayi, kumpala kua kubuela mu Tshivulukilu tshia tshidimu etshi, elangana meji bikole bua tshidi Yehowa ne Yezu bakuenzele. Pashishe welangane kabidi meji bua malu audi mua kuenza mu nsombelu webe ne bipatshila biudi mua kudifundila bua kuleja Yehowa dianyisha bua tshia kupikulangana natshi.b
BANA BETU BAKADI BABATIJIBUE
8. Mmunyi mudi bana betu bakadi babatijibue baleje mudibu ne dianyisha bua tshia kupikulangana natshi?
8 Biwikale ukadi mubatijibue, ukadi muleje mu mishindu ya bungi muudi ne dianyisha bua tshia kupikulangana natshi. Tshilejilu, kudi malu auvua muenze bua kutuadija kutumikila Yehowa ne bua kulua mulunda wa Yehowa. Uvua mutumikile mukenji wa Yezu wa kuyisha bantu bua kubavuija bayidi. Uvua mudilambule kudi Yehowa ne mubatijibue. Bavua pamuapa bakuluishe bua muudi wenzela Yehowa mudimu. (2 Tim. 3:12) Kadi udi mutungunuke anu ne kuenzela Yehowa mudimu ne lulamatu, bileja muudi mumunange ne muudi ne dianyisha bua tshia kupikulangana natshi.—Eb. 12:2, 3.
9. Njiwu kayi idi bana betu bakadi babatijibue ne bua kudimukila?
9 Kudi njiwu itudi tuetu bakadi babatijibue ne bua kudimukila. Njiwu ayi idi ne: mu kupita kua matuku, tudi mua kutuadija kujimija dianyisha ditudi nadi bua tshia kupikulangana natshi. Mushindu kayi? Tuangate tshilejilu tshia bena Kristo ba mu Efeso. Pakavua Yezu mubishibue ku lufu, wakabela kalumbandi bua dinanukila diabu. Kadi wakabambila ne: “Ndi nebe tshilumbu etshi ne: udi mulekele dinanga diuvua nadi ku ntuadijilu.” (Buak. 2:3, 4) Mêyi a Yezu aa adi aleja ne: muena Kristo udi mua kutuadija kuenzela Nzambi mudimu bu muntu muenzeja. Bushuwa, muena Kristo wa mushindu eu udi mua kuikala usambila, ubuela mu bisangilu, ne uyisha; kadi udi wenza bionso abi anu bua kuwuja mukenji. Dinanga ki ndidi dimusaka bua kubienza to. Wewe mumone ne: kutshiena munange Yehowa bu kumpala, ntshinyi tshiudi mua kuenza?
10. Mmunyi mutudi mua kutumikila tshivua Paulo muambile Timote? (1 Timote 4:13, 15)
10 Mupostolo Paulo uvua muambile Timote bua ‘elangane meji’ bua malu avuaye ne bua kuenza mu ntendelelu wa Yehowa ne ‘adifilaku ne muoyo mujima.’ (Bala 1 Timote 4:13, 15.) Mbimpe wewe pebe welangana meji bua malu audi mua kuenza bua wikale ne tshisumi tshia bungi mu ntendelelu wa Yehowa. (Lomo 12:11) Tshilejilu, ikala ulongolola bisangilu, dîba adi newikale ne ntema ya bungi paudi ubuelamu. Paudi udilongela, mbimpe usombe muaba wa pa nkayebe bua umone mua kuelangana meji bua malu audi ulonga; dîba adi malu au neakuambuluishe. Anu bu muudi mua kutungunuka ne kuela nkunyi ku kapia bua kutemaku bikole, mbimpe utungunuke ne kuenza malu au, dîba adi dianyisha diudi nadi bua malu onso adi Yehowa mukuenzele nedivule. Mu malu au mudi tshia kupikulangana natshi. Mu mbingu ya kumpala kua Tshivulukilu, elangana kabidi meji bua malu onso mimpe adi Yehowa utuenzela tuetu Bantemu bende. Kuenza malu au nekuvudije dianyisha diudi nadi bua tshia kupikulangana natshi tshidi tshikuambuluisha bua kudia nende malanda mashême.
11-12. Wewe mumone ne: tshisumi tshiebe ntshikepele, bidi bimvuija ne: kuena kabidi ne nyuma wa Nzambi anyi? Umvuija. (Tangila kabidi tshimfuanyi.)
11 Wewe mumone ne: kutshiena ne tshisumi mu mudimu wa Nzambi, kuteketshi mu mikolo, wela meji ne: kuena kabidi ne nyuma wa Nzambi to. Vuluka tshivua mupostolo Paulo mufundila bena mu Kolinto bua mudimu wende wa diyisha, tshia ne: “Nansha meme ngenza nunku kabiyi ku disua dianyi, ntshidi anu ne bulami budibu bampeshe.” (1 Kol. 9:17) Uvua usua kuamba tshinyi?
12 Kuvua misangu ivua Paulo kayi ne dijinga dia kuyisha. Nansha nanku, uvua mudisuike bua kutungunuka anu ne kuyisha. Udi mua kumuidikija. Ikala mudisuike bua kuenza anu tshidi tshimpe nansha wewe kuyi umvua mua kutshienza. Nunku sambila, ulombe Yehowa bua akupeshe “dijinga ne bukole bua kuenza malu.” (Filip. 2:13) Tungunuka ne kuenza malu adi mua kukuambuluisha bua kushala pabuipi ne Yehowa. Ikala mutuishibue ne: panyima pa matuku, neunange kabidi Yehowa bikole ne neupetulule tshisumi tshiuvua natshi.
Tungunuka anu ne kuenza malu a mu nyuma nansha tshikondo tshiudi udiumvua mutekete mu mikolo (Tangila tshikoso 11-12)
13. Mmunyi mutudi mua kutungunuka ne kuditeta bua kumanya ni ‘tudi mu ditabuja’?
13 Mbimpe tuikale ne tshibidilu tshia kudikonkonona anu muvua Paulo mutulombe bua kuenza mu 2 Kolinto 13:5, wamba ne: “Tungunukayi ne kuditeta bua kumanya ni nudi mu ditabuja; tungunukayi ne kupima tshinudi nuenu bine.” Tshilejilu, tudi mua kudiebeja ne: ‘Ntu nteka malu a Bukalenge pa muaba wa kumpala anyi?’ (Mat. 6:33) ‘Malu antu njikija nawu lutetuku atu aleja mundi mukine malu mabi anyi?’ (Mis. 97:10) ‘Ntu nkeba ditalala ne buobumue munkatshi mua bena Kristo nanyi anyi?’ (Ef. 4:2, 3) Tshikondo tshia Tshivulukilu ntshikondo tshimpe tshia kuela meji a malu aa. Patudi tuela meji a malu adi Yehowa ne Yezu batuenzele, nebitusake bua kuela Yehowa tuasakidila ne kuleja ne: tudi ne muoyo bua Kristo, kadi ki mbuetu nkayetu to.c
BANA BETU BADI BALEKELE KUENZELA YEHOWA MUDIMU
14. Mmalu kayi adi mua kufikisha bamue bena Kristo ku dilekela kubuela mu bisangilu?
14 Bamue bena Kristo mbalekele kubuela mu bisangilu pabu bamane kuenzela Yehowa mudimu ne lulamatu munkatshi mua bidimu bia bungi. Bua tshinyi? Bualu kudi badi ne “tunyinganyinga tua mu nsombelu.” (Luka 21:34) Bakuabu mbalenduke bua mêyi avuabu babambe anyi bua malu avua bena Kristo nabu babenzele. (Yak. 3:2) Banga bobu mbenze mpekatu minene, kadi bumvua bundu bua kulomba diambuluisha. Nansha kuoku bualu kayi budi buenze bua ulekele kubuela mu bisangilu, ntshinyi tshiudi mua kuenza? Tshia kupikulangana natshi tshidi Yehowa mufile bualu mmutunange tshidi mua kukusaka bua kuenza tshinyi?
15. Ntshinyi tshidi Yehowa muenze bua kuleja ne: udi utabalela badi balekele kubuela mu bisangilu? (Yehezekele 34:11, 12, 16)
15 Elangana meji a mudi Yehowa umona bantu badi balekele kubuela mu bisangilu. Ki mmubabenge to. Kadi utu ukeba mikoko yende idi mijimine, uyidiisha ne uyambuluisha bua yipingane kudiye. (Bala Yehezekele 34:11, 12, 16.) Ke tshidiye ukuenzela pebe. Bu muudi ubala tshiena-bualu etshi, bidi bileja ne: utshidi anu musue kuenza malu adi amusankisha. Yehowa uvua mukukoke kudiye bualu uvua mumone ngikadilu mimpe iuvua nayi. Mpindieu bu muutshidi anu nayi, mmusue bua utuadijilule kubuela mu bisangilu.
16. Ntshinyi tshidi mua kuambuluisha mikoko idi mijimine bua kupingana kudi Yehowa? (Tangila kabidi tshimfuanyi.)
16 Mu broshire wa Pingana kudi Yehowa mudi mêyi mimpe aa: “Umanye ne: Yehowa neikaleku bua kukuambuluisha paudi wenda upingana kudiye. Neakuambuluishe bua kupita bimpe ne ntatu yebe, kujikija tunyinganyinga tuudi natu ku muoyo, ne bua kupeta ditalala dia mu lungenyi ne dia mu muoyo didi difumina ku dikala ne kondo ka muoyo kimpe. Dîba adi, udi mua kudiumvua kabidi ne muoyo wa kuenzela Yehowa mudimu pamue ne bena Kristo nebe bakuabu.” Vuluka pebe ne: bakulu badi ne dijinga dikole dia kukuambuluisha. Nebikale “bu muaba wa kusokomena tshipepele, muaba wa kupengama mvula wa tshipepele.” (Yesh. 32:2) Tudi bamanye ne: udi ne dianyisha bua tshia kupikulangana natshi ne udi musue kuleja dianyisha adi. Nunku diebeja ne: ‘Mmalu kayi andi mua kuenza mpindieu bua mpingane kudi Yehowa?’ (Yesh. 1:18; 1 Pet. 2:25) Tshilejilu, buela mu bisangilu ku Nzubu wa Bukalenge. Yukila ne umue wa ku bakulu, umuambile ne: udi musue kupingana kudi Yehowa. Nunku mukulu au udi mua kulongolola bua muanetu mukuabu alonge nebe Bible bua tshikondo kampanda. Ikala mutuishibue ne: Yehowa neabeneshe bionso biudi wenza bua kupingana kudiye ne bua muudi uleja dianyisha bua tshia kupikulangana natshi.
Diebeja ne: ‘Mmalu kayi andi mua kuenza mpindieu bua mpingane kudi Yehowa?’ (Tangila tshikoso 16)
NTSHINYI TSHIWENZA?
17-18. Mmunyi mutudi mua kuenza malu bimpe ne dîba dietu mu tshikondo tshia Tshivulukilu?
17 Yezu wakamba ne: Yehowa uvua mumutume bua kufila muoyo wende “bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Yehowa mmufile tshia kupikulangana natshi bua kutupikula ku mpekatu ne ku lufu. Katupangi kumuleja dianyisha bua bualu ebu to. (Lomo 3:23, 24; 2 Kol. 6:1) Matuku a kumpala kua Tshivulukilu, mbimpe welangane meji a mudi Yehowa ne Yezu bakunange. Dîba adi nebikusake bua kuikala ne dianyisha kudibu.
18 Mmushindu kayi uudi mua kuleja ne: udi ne dianyisha bua tshia kupikulangana natshi? Diandamuna diebe didi mua kushilangana dia bakuabu. Kadi ikala mutuishibue ne: Yehowa neabeneshe bionso biudi wenza ne bidi batendeledi bende bakuabu benza pabu. Bobu abu ‘kabena ne muoyo buabu nkayabu to, kadi badi nawu bua yeye uvua mubafuile.’—2 Kol. 5:15.
MUSAMBU WA 14 Tumbisha Mukalenge mupiamupia wa buloba
a Bua wewe kutumikila malu a mu Bible audi ulonga, kuata mudimu ne kazubu ka “Tshipatshila” kadi lua ku ndekelu kua dilongesha dionso mu mukanda wa Shala ne muoyo kashidi!.
b Bua kumanya malu a kuenza bua kushemeja bulunda ne Yehowa, bala tshiena-bualu tshia “Bana wetu, ‘tungunukayi ne kudienzeja bua lupandu luenu’” mu Tshibumba tshia Nsentedi tshia ngondo wa 12/2017.
c Bua kumanya tshia kuenza bua kuikala anu ne dianyisha kudi Yehowa, bala tshiena-bualu tshia “Ntshinyi tshitu tshikusaka bua kusadila Nzambi?” mu Tshibumba tshia Nsentedi tshia dia 15/6/1995.