Enza malu adi akengedibua bua kubatijibua

1. a) Mmalu kayi mimpe adi muntu upeta padiye ubatijibua? b) Mu tshiena-bualu etshi netuakule bua malu kayi?

BIWIKALA ukadi mudilambule kudi Yehowa ne mubatijibue, bidi bileja ne: udi mulombe Yehowa bua akubuikidile mibi yebe bua wikale ne kondo ka muoyo kimpe. (1 Pet. 3:21) Bua bualu abu, udi tshilejilu tshimpe mu tshisumbu tshienu kudi bantu bakuabu badi kabayi banji kubatijibua. Nunku uvua muangate dipangadika dimpe be! Kadi bua nuenu badi kabayi banji kubatijibua, tudi bamanye ne: nudi penu banange Yehowa ne basue kumuenzela mudimu. Nudi penu bamanye ne: bua Yehowa kunubuikidila mpekatu yenu ne nuenu kulua balunda bende, nudi ne bua kubatijibua. (Bien. 2:38-40) Kadi kuoku kuikala malu adi akupangisha bua kubatijibua, ntshinyi tshiudi mua kuenza? Mu tshiena-bualu etshi, netuandamune nkonko eyi: 1) Mmalu kayi adi apangisha bamue bantu bua kubatijibua? 2) Bua tshinyi mbimpe kumanya ne: nshikidilu ukadi pabuipi? 3) Mmalu kayi mimpe adi muntu upeta padiye kayi uladikija malu bua kubatijibua?

MMALU KAYI ADI APANGISHA BAMUE BANTU BUA KUBATIJIBUA?

2. Mmalu kayi adi apangisha bamue bantu bua kubatijibua?

² Buôwa butu bupangisha bamue bua kubatijibua. Tshilejilu, nansha mudibu basue kuenzela Yehowa mudimu, badi mua kuikala ne buôwa bua ne: kabakukumbana bua kumusankisha to. Wewe ne buôwa bua mushindu eu, nkonkonona mvese idi mua kukushindikila ne: Yehowa kena ukeba bua wikale mupuangane to, kadi udi ne disanka bua muudi udifila ne muebe muonso. (Mis. 103:13, 14; Kolos. 3:23) Biwikala utshina buluishi, lomba Yehowa bua akuambuluishe bua umvue anu bu muimbi wa misambu wakafunda ne: “Yehowa udi ku luseke luanyi; tshiakutshina to. Ntshinyi tshidi muntu mua kungenzela?”​—Mis. 118:6.

3. Ngelelu kayi wa meji udi mua kupangisha bamue bua kubatijibua? (Tangila kabidi tshimfuanyi.)

³ Bamue batu belakana bua kubatijibua anu bualu batu bela meji ne: kabena ne dimanya dikumbane to. Kadi bidi bikengela kumanya malu onso a mu Bible bua kushisha kubatijibua anyi? Tòo. Tuangatabi tshilejilu tshia mu Bible etshi. Dituku kampanda butuku, Yehowa wakenzeja dikanka dia buloba bua kupatuisha Paulo ne Sila mu buloko. Paulo ne Sila bakabuelela pa tshivua tshienzeke atshi bua kuyisha mulami wa buloko ne bena mu dîku diende bualu bua Yezu. Mulami wa buloko au ne bena mu dîku diende abu bakajingulula ne: Nzambi ke uvua muenze tshishima atshi. Bakalonga kabidi amue malu a mushinga avua atangila Yehowa ne Yezu butuku abu. Anu malu avuabu balonge butuku bumuepele abu avua makumbane bua bobu ‘kubatijibua kakuyi dijingakana.’ (Bien. 16:25-33) Biwikala ukadi mumanye Yehowa, mumunange ne muoyo mujima, mumanye malongesha a nshindamenu a mu Bible, munyingalale bua mpekatu yebe, ne mudisuike bua kumutumikila, ukadi mukumbane bua kubatijibua.​—Mâko 12:30.

4. Mbualu kayi bukuabu budi mua kupangisha bamue bua kubatijibua? (Tangila kabidi tshimfuanyi.)

⁴ Bamue mbasue kushintuluka bua kusankisha Nzambi ne kubatijibua, kadi badi bela meji ne: nebitambe kubakolela bua kuenza nanku. Bushuwa, bitu bikengela kuela meji bikole bua tshidi dipangadika dietu mua kutuenzela. (Luka 14:27-30) Kadi bidi mua kusamisha bamue mutu, bela meji ne: nebalekele malu adibu banange anu bualu badi bakeba kuenzela Nzambi mudimu. Ke muvua nsongakaji kampanda muele meji, diende Candace. Pavuaye muana, bakamulongesha malu adi muntu ne bua kuenza bua kusankisha Yehowa, kadi kavua uenza to. Pakaluaye muntu mukole, wakatuadija kabidi kulonga Bible. Udi wamba ne: “Mvua mumanye malu amvua ne bua kuenza bua kusankisha Yehowa, kadi mvua munange tshimvua atshi nansha mumvua mumanye ne: bimvua ngenza kabivua bimusankisha to. Mvua mumanye kabidi ne: bivua bikole bua meme kushintuluka.” Bakuabu bobu batu basamisha mutu, bela meji ne: pabatijibuabu, kabakukokesha bua kuenza malu adi asankisha Yehowa to. Badi ne buôwa bua ne: badi mua kulua kuenza mpekatu munene udibu mua kubumbushila mu tshisumbu. Wewe wela meji mushindu au, ntshinyi tshiudi mua kuenza?

5. Mbualu kayi butudi ne bua kutamba kuelela meji tuetu tuelakana bua kubatijibua? (Matayi 13:44-46)

⁵ Patutu tukeba kusumba tshintu, tutu tututangila bungi bua makuta atudi tutshitudila ne muikalatshi mua kutuambuluisha. Tuetu bamone ne: netshituambuluishe bikole, netutshisumbe nansha tshiotshi mushinga mukole. Bia muomumue, wewe wela meji bua kumona ni udi mua kubatijibua, kuimanyinyi anu pa malu adi mua kumueneka makole bua kushintulula mu nsombelu webe to, tangila mushinga udi nawu malanda ebe ne Yehowa. Yezu wakafila bilejilu bibidi bua kulongesha bualu ebu. (Bala Matayi 13:44-46.) Mu tshilejilu tshionso, muntu au ki mmuelakane bua kupana bivuaye nabi bua kusumba tshintu tshivua ne mushinga mukole kudiye to. Wewe pebe udi mupete tshintu tshia mushinga mukole, ke bulelela bua malu a Bukalenge. Nunku wewe welakana bua kushintulula malu adi akengedibua bua kubatijibua, elangana meji a bilejilu bia Yezu abi. Diebeja ne: ‘Ndi mutuishibue ne: lumu luimpe lua Bukalenge ludi ne mushinga wa bungi anyi? Ndi ngangata bulunda buanyi ne Yehowa, ditekemena dia kupeta muoyo wa tshiendelele didiye mumpeshe, ne dîku dimpe dia bena Kristo didiye kabidi mumpeshe ne mushinga wa bungi anyi?’ Mandamuna ebe adi mua kukuambuluisha bua kumanya malu adi akengela kuenza bua ufike ku diangata dipangadika dia kubatijibua.

6. Ntshinyi tshidi mua kutuambuluisha bua kutumikila malu atudi tulonga?

⁶ Yezu wakumvuija ne: badi mua kuambila bamue bantu lumu luimpe kadi muoyo wabu ubasaka bua kubenga bua kutumikila bidibu balonge. Kadi wakaleja kabidi ne: bakuabu bavua mua kumvua dîyi “ne muoyo muimpe ne mulengele” ne pashishe balua kutumikila bidibu balonge. (Luka 8:5-15) Wewe usamisha mutu, wela meji ne: kuakufika ku ditumikila biudi ulonga, kuteketshi to. Nzambi neakuambuluishe bua ‘upete muoyo mupiamupia’ wa kutumikila biudi ulonga. Lomba Yehowa bua akuambuluishe unange malu audi ulonga ne uatumikila.​—Yeh. 18:31; 36:26.

7-8. Ntshinyi tshidi tshipangisha bamue bansonga bua kubatijibua? (Tangila kabidi tshimfuanyi.)

⁷ Bamue bansonga badi banange Yehowa batu bapangila bua kuya kumpala too ne ku batismo anu bualu badi balonda bidi bakuabu babambila. Tshilejilu, nansha mudi bimue bikadilu kabiyi bisankisha Yehowa, bamue balongeshi ba mu tulasa badi mua kubela balongi, babambila ne: bikadilu abi mbimpe. Kuitaba mubelu au kudi mua kukukebela ntatu mikole. (Mis. 1:1, 2; Nsu. 7:1-5) Udi mua kuepuka ntatu ayi wewe mulonde tshilejilu tshia mufundi wa misambu wakamba bua Yehowa ne: “Ndi ne busunguluji bua bungi kupita balongeshi banyi bonso, bualu ndi ngelangana meji a mavuluija ebe.”​—Mis. 119:99.

⁸ Bidi bimueneka ne: bamue baledi bena Kristo batu bapangisha bana babu bua kubatijibua. Baledi abu batu baditatshisha bikole bua bungi bua tulasa tudi bana babu mua kulonga ne bua mudimu udibu mua kulua kuenza, bapua muoyo bua kubakankamija bua kudifundila bipatshila biabambuluisha bua kusemena pabuipi ne Yehowa. Wewe mumone ne: baledi bebe badi mua kukuambuluisha bua ukumbaje tshipatshila tshiebe tshia kubatijibua, yukila nabu bualu abu. Manya ne: nansha wewe bukole kayi, udi anu mua kudia bulunda ne Yehowa.​—Nsu. 20:11.

9. Bua tshinyi bamue batu bajingakana bua kubatijibua?

⁹ Bamue bantu bakadi bakumbaje malu malomba bua kubatijibua badi mua kujingakana bua kubatijibua anu bualu mbasue kubatijibua dituku dimue ne bantu kampanda. Pamuapa bantu abu mbalunda babu anyi mbena mu mêku abu. Bushuwa, ki mbibi bua kubatijibua nabu dituku dimue to. Kadi abu ki mbualu budi mua kukusaka bua kuladikija bua kubatijibua to. Manya ne: kudilambula kudi Nzambi mbualu buebe nkayebe. Kuena ne bua kulonda bantu bakuabu bua kushisha kubatijibua to.​—Lomo 14:12.

BUA TSHINYI MBIMPE KUMANYA NE: NSHIKIDILU UKADI PABUIPI?

10. Bua tshinyi bamue batu baladikija bua kuya kumpala mu nyuma?

¹⁰ Pa kumbusha malu atukadi batele, bamue batu baladikija bua kuya kumpala mu nyuma bualu badi bela meji ne: nshikidilu kakulua mpindieu to. Kadi kuela meji nanku ki nkuimpe to, bualu Yezu wakadimuija bayidi bende ne: “Nuikale badilongolole, bualu Muana wa muntu udi ulua pa dîba dinudi kanuyi nuelela meji.”​—Luka 12:40.

11. Patudi tulonga malu a Yehowa, bidi bitusaka bua kuenza tshinyi? Bua tshinyi? (Misambu 119:60)

¹¹ Dinanga ditudi banange Yehowa ke didi ne bua kusaka muntu bua kudilambula kudiye. Tuetu bamanye Yehowa bimpe, netufike ku dimona ne: mmutunange bikole, ne mikenji idiye mutuelele, mmutuelelayi bua diakalenga dietu. (Bala Misambu 119:60.) Muyidi Yakobo wakaleja bualu bukuabu bua mushinga budi ne bua kutusaka bua kutumikila mikenji ya Yehowa katuyi tujingakana. Mbuobu ebu: Kakuena muntu udi mumanye tshiamufikila malaba to. Nunku mbimpe ‘tuenze tshidi tshimpe’ dituku dionso edi, mmumue ne: tuenze malu adi Nzambi musue.​—Yak. 4:13-17.

12. Tshilejilu tshia budimi bua mionji ya tumuma tua mvinyo tshivua Yezu mufile tshidi tshitulongesha tshinyi?

¹² Tuangate tshilejilu tshia budimi bua mionji ya tumuma tua mvinyo tshivua Yezu mufile. Uvua mumvuije ne: bantu bavua benzamu mudimu dîba dimue bavua bapete difutu dia muomumue ne dia bavua benzamu mudimu dituku dijima. Kadi bua tshinyi bavua benze mudimu dîba dimue abu kabavua bawutuadije kumpala kua dîba? Bakamba ne: “Bualu muntu ki mmutuangate ku mudimu to.” Kabavua bena lulengu to. Bavua anu mua kuenza mudimu dituku dijima, kadi kakuvua muntu uvua mubangate ku mudimu au to. Pakababikilabu, bakadituamu diakamue. (Mat. 20:1-16) Lelu eu, Yezu mmutubikile bua tuikale bayidi bende bua tuenze mudimu wa diyisha. Katujingakanyi bua kuwenza to.

13. Bualu bua mukaji wa Lota budi butulongesha tshinyi?

¹³ Bamue badi mua kuladikija bua kuya kumpala mu nyuma, bela meji ne: nansha minite mishale mikese bua nshikidilu kulua, nebashintuluke. Kadi bu mudibu baladikija malu nanku, bidi mua kulua kubakolela bua kuenza malu adi akengedibua bua kuenzela Nzambi mudimu. Ke bualu kayi Yezu wakadimuija bayidi bende ne: “Vulukayi mukaji wa Lota.” (Luka 17:31-35) Mukaji wa Lota uvua mumanye bimpe ne: Nzambi ukavua pa kubutula Sodoma ne Amola. Kadi kavua mudiakaje bua kulekela bintu bivuabu nabi to. (Gen. 19:23-26) Bualu buende ebu budi butulongesha ne: kudi dîba didi Yehowa muteke bua kukanga tshiibi tshia lupandu. Padi dîba dia kutshikanga dikumbana, neatshikange bua kashidi, kakuyi kabidi mushindu wa bantu kushintuluka bua kumuenzela mudimu to.​—Luka 13:24, 25.

14. Bua tshinyi udi ne bua kuteya ntema ku dikumbana dia mêyi a buprofete?

¹⁴ Malu adi enzeka pa buloba lelu adi akumbaja mêyi a buprofete akavuabu bamanyishe bua nshikidilu wa ndongoluelu wa malu eu. Nansha mudi amue a ku malu aa kaayi enzeka muaba uudi musombele, kadi padiwu enzeka miaba mikuabu, bikusake bua kubatijibua ne lukasa. Tshilejilu, mupostolo Petelo wakambila bena Kristo ba tshikondo tshiende bua ‘bikale badimuke,’ anyi “batabale,” bualu ‘nshikidilu wa malu onso ukavua musemene pabuipi.’ (1 Pet. 4:7; dim.) Pavuaye muakule bua “nshikidilu,” uvua wakula bua dîba divuabu ne bua kubutula Yelushalema ne ntempelo uvuamu. Bantu bavua Petelo mufundile mukanda wende bavua kule ne Yelushalema; nunku kabavua mua kumona muvuabu mua kubutula tshimenga atshi to. (1 Pet. 1:1) Kadi pavuabu bamone dîyi dia buprofete adi dikumbane, biakabashindikila ne: milayi mikuabu ya Yehowa neyikumbane. Bia muomumue, paudi umona pebe mudi mêyi a buprofete adi akula bua nshikidilu wa ndongoluelu wa malu eu enda akumbana, bikusake bua kuenza malu adi akengela bua kubatijibua.

15. Ntshinyi tshitudi mua kuenza bua kuikala badilongolole bua dituku dia Yehowa? (2 Petelo 3:10-13)

¹⁵ Mu mukanda muibidi uvua Petelo mufunde, wakaleja tshitudi mua kuenza bua kuikala badiakaje bua “dituku dia Yehowa” anyi nshikidilu wa ndongoluelu wa malu eu. Bua bena Kristo ba tshikondo atshi, dituku adi ditshivua kule. Nansha nanku, Petelo wakabambila bua “badilame mu meji bimpe” anyi bua bikale ‘badijinga ne muoyo mujima.’ (Bala 2 Petelo 3:10-13; dim.) Tudi petu mua kulama dituku adi mu meji patudi badilongolole ne tujinga ne muoyo mujima bua dilue. Netuleje mutudi tujinga dituku adi ne muoyo mujima patudi ne ‘bienzedi bia tshikadilu tshia tshijila ne bienzedi bia dilamata Nzambi.’ Elabi meji bua disanka dikala nadi Yehowa pakumonaye ne “bienzedi bia dilamata Nzambi.” Neasanke bikole wewe mudilambule kudiye ne mubatijibue.

MUDIBI NE MUSHINGA BUA WEWE KUBATIJIBUA MPINDIEU

16. Ntshikondo kayi tshitambe buimpe tshiudi mua kubatijibua? (2 Kolinto 6:1, 2) (Tangila kabidi bimfuanyi.)

¹⁶ Mpindieu ke tshikondo tshitambe buimpe tshia wewe kubatijibua. (Bala 2 Kolinto 6:1, 2.) Muntu mutungu muena Etshiopi uvua Filipo mutuilangane nende uvua mumanye muvuabi ne mushinga bua yeye kubatijibua ne lukasa. Pavuaye mumvue lumu luimpe ne mupete mpunga wa kubatijibua, kavua mudiambile ne: ‘Mbimpe nganji ndonga malu makuabu; netupete dijiba dikuabu dia mâyi kumpala eku dia bobu kumbatiza’ to. Kadi wakebeja Filipo ne: “Ntshinyi tshidi tshimpangisha bua meme kubatijibua?” (Bien. 8:26, 27, 35-39) Mmukushile tshilejilu tshimpe be! Pakabatijibuaye, “wakatungunuka ne njila, wenda usanka.”

17. Yehowa neakuambuluishe mushindu kayi?

¹⁷ Wewe udimona ujingakana bua kubatijibua, ikala mutuishibue ne: Yehowa udi pabuipi bua kukuambuluisha bua udia nende bulunda. (Lomo 2:4) Udi mua kukuambuluisha biobi ne: udi ne buôwa, anyi wela meji ne: kuakukumbana bua kushintuluka; peshi biobi ne: bantu bakuabu kabena bakukankamija bua kubatijibua. Wewe mubatijibue, neupete kondo ka muoyo kimpe ne neumone pamuapa ne: kuakuikala usamisha kabidi mutu bua “malu adi mashale panyima” to. (Filip. 3:8, 13) Dîba adi newindile “malu adi kumpala” ne muoyo kuulu kuulu, mmumue ne: dikumbana dia milayi ya Yehowa yakumbanyina bantu badi badilambula kudiye ne babatijibua.​—Bien. 3:19.