Misambu 23:4​—‘Nansha bingenda mupitshile mu lupongo lua mundidimbi wa lufu’

 “Nansha mundi ngendela mu tshibandabanda tshia mîdima mikole, tshiena ntshina bualu bubi, bualu wewe udi nanyi; tshibonge tshiebe ne mulangala webe bidi binkolesha ku muoyo.”​—Misambu 23:4, Nkudimuinu wa bulongolodi bupiabupia.

‘Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi; tshibongo tshiebe ne tshibangu tshiebe bidi binsamba.’​—Misambu 23:4, Mukanda wa Nzambi.

Diumvuija dia Misambu 23:4a

Nzambi udi ukuba badi bamutendelela nansha bobu mu ntatu mikole. Mvese eu udi mua kufuanyikija mushindu utu Nzambi utabalela batendeledi bende ne mushindu utu mulami wa mikoko utabalela mikoko yende.b Mvese eu udi ufuanyikija kabidi ntatu mikole ne muaba wa mîdima mikole utudi tudimona mu njiwu ya lufu. Mu ntatu ya mushindu au, batendeledi ba Nzambi kabatu badimona nkayabu to. Batu badimona mu bukubi, bienze anu bu ne: Nzambi udi anu ku luseke luabu aku.

Mu bikondo bia kale, mulami wa mikoko uvua ne mulangala bua kumona mua kukuba mikoko yende kudi nyama ya luonji. Bua kuludika mikoko ne kuyepula ku miaba ya njiwu, uvua kabidi ne tshibonge, pa tshibidilu mutshi mule mukobame ku lusongo luawu. Bia muomumue, Yehowa Nzambi udi anu bu Mulami muimpe menemene udi ukuba batendeledi bende ne ubalombola. Nansha padibu mu nsombelu mikole menemene, Yehowa udi ubatabalela mu mishindu mishilashilangane eyi:

• Udi ubalongesha ne ubasamba ku diambuluisha dia Bible Dîyi diende.​—Lomo 15:4.

• Udi uteleja masambila abu ne ubapesha ditalala mu muoyo ne mu lungenyi.​—Filipoyi 4:6, 7.

• Udi ubakankamija ku diambuluisha dia bena Kristo nabu.​—Ebelu 10:24, 25.

• Udi ubapesha ditekemena dimpe dia matuku atshilualua mimpe, pikalaye mua kujikija ntatu yonso idi ibakuata lelu.​—Misambu 37:29; Buakabuluibua 21:3-5.

Malu adi Misambu 23:4 wakuila

Davidi uvua mulami wa mikoko ke wakafunda Misambu 23 pavuaye nsonga. Pashishe wakalua mukalenge wa Isalele wa kale. (1 Samuele 17:34, 35; 2 Samuele 7:8) Mbangilu wa musambu eu udi uleja ne: Yehowa udi Mulami utu ulombola batendeledi bende, ubadiisha, ne ubapeshilula bukole, anu mutu mulami wa mikoko wenza ne mikoko yende.​—Misambu 23:1-3.

Mu Misambu 23:4, Davidi wakakula bua Yehowa, umuamba ne: “wewe.” Bualu abu budi buleja bimpe ne: Davidi uvua mu malanda makole ne Yehowa. Davidi uvua mujadike ne: Nzambi uvua umutabalela ne uvua mumanye ntatu yende. Ke bualu kayi, kavua utshina lutatu nansha lumue to.

Mu mvese ibidi idi ilonda ya Misambu 23, mu mvese 5 ne 6 kabena bakula bua mulami wa mikoko ne mikoko yende to, badi bakulamu bua muntu udi wakidila benyi ne benyi bende. Anu bu muakididi muimpe wa benyi, Yehowa wakakidila Davidi bu muenyi wa mushinga mukole. Nansha baluishi ba Davidi kabavua ne tshia kuenza bua kupangisha Nzambi bua kumutabalela to. Ku ndekelu kua musambu au, Davidi udi uleja dituishibua diende dia ne: Yehowa neatungunuke ne kumunanga ne kumuenzela malu mimpe too ne ku lufu luende.

Mifuanu idi mu Misambu 23 idi ileja ne: Yehowa udi utabalela batendeledi bende ne dinanga.​—1 Petelo 2:25.