Jéhovah delivré bann dimoune ki deprimé

“Enn dimoune droite gagne beaucoup malheur, mais Jéhovah delivré li ar tousala.”​​—⁠PSAUME 34:⁠19.

1, 2. Ki problem enn chrétienne ti gagné, ek kifer li kapav arrivé ki nou aussi nou ena mem sentiment?

ENN jeune madame ki appel Keikoa pé servi Jéhovah depuis plus ki 20 an. Pendant enn temps, li ti pionnier permanent (enn kikenn ki preche a plein temps). Li ti bien content so service. Pourtant, pa trop longtemps, Keiko inn commence senti-li desesperé ek tousel. Guetté ki li dire: “Mo pa ti arrete ploré.” Pou li combatte so bann pensée negatif, Keiko ti passe plus lé-temps pou etudié lor plan personnel. Mais li dire: “Mem sa, mo pa ti reussi change nanyin. Mo ti tellement accablé, ki ti arrive enn point kot mo ti envie mort.”

² Eski ou finn deja ena mem sentiment ki Keiko? En tant ki Témoin de Jéhovah, ou ena beaucoup raison pou ou heureux, parski grace a l’attachement pou Bondié ou “ena promesse pou la vie asterla ek la vie ki pou vini.” (1 Timothée 4:⁠8) Depuis asterla-mem, ou pé vive dan enn paradi spirituel! Mais eski sa vedir ki ou pa pou gagne okenn problem? Non! Au contraire, la Bible dire: “Enn dimoune droite gagne beaucoup malheur.” (Psaume 34:19) Sa pa etonne nou, parski ‘le monde entier li dan pouvoir Satan le Diable.’ (1 Jean 5:​19) Dan enn fason ou enn lot, nou tou nou faire face ar bann consequence domination Satan lor le monde.​​—⁠Éphésiens 6:​12.

Ki arrivé kan nou senti-nou accablé?

 3. Donne l’exemple bann serviteur Bondié ki ti bien deprimé.

³ Si nou senti-nou deprimé pendant enn longue period, sa kapav faire nou trouve tou kitsoz pa bon. (Proverbes 15:​15) Nou prend l’exemple Job ki ti enn dimoune droite. Kan li ti pé passe par enn l’epreuve terrible, li ti dire: “Enn dimoune ki enn femme inn donne naissance, vive pou enn tigit lé-temps, ek so la-vie rempli ar difficulté.” (Job 14:⁠1) Job ti perdi tou so la-joie. Pendant enn temps, li ti mem pensé ki Jéhovah ti’nn abandonne li. (Job 29:​1-5) Job pa ti sel serviteur Bondié ki ti decouragé. La Bible dire nou ki ‘nâme Hannah, ti vinn amer’ parski li pa ti kapav gagne zenfant. (1 Samuel 1:​9-​11) Kan Rébecca ti bouleversé a cause enn situation difficile dan so famille, li ti dire: “Mo finn degoute mo la-vie.” (Genèse 27:​46) Kan David ti reflechi lor so bann erreur, li ti dire: “Toute longue la journée, mo finn marché, bien triste.” (Psaume 38:​6) Sa dé-trois l’exemple-la montré bien ki avant lepok Jésus Christ, ti ena bann zom ek bann femme ki, mem si zot ti ena la crainte pou Bondié, zot ti passe par bann moment kot zot ti bien deprimé.

 4. Kifer sa pa etonne nou ki ena “bann ki deprimé” parmi bann chrétien zordi?

⁴ Ki nou kapav dire lor bann chrétien? L’apotre Paul ti trouvé ki li ti important pou li dire bann Thessalonicien “console bann ki deprimé.” (1 Thessaloniciens 5:​14) Enn livre reference dire ki mot grec ki finn traduire par “bann ki deprimé” kapav concerne bann “ki abatte pendant enn temps a cause stress ki ena dan la vie.” Nou comprend par bann parole Paul ki certain chrétien oint dan congregation Thessalonique ti senti-zot abatte. Zordi aussi ena certain chrétien ki deprimé. Pou ki raison? Anou examine trois raison principal.

Nou l’imperfection kapav faire nou deprimé

5, 6. Ki reconfort nou gagné kan nou lire Romains 7:​22-​25?

⁵ Bann dimoune malhonnete, zot ‘nepli ena okenn sens moral.’ (Éphésiens 4:​19) Mais bann vrai chrétien, zot pa coumsa. Au contraire, zot tendance pou faire peché, fatigue-zot. Kitfois zot ena mem sentiment ki Paul, kan li ti ecrire: “Dan mo leker, mo vrai-mem content la loi Bondié, mais mo trouve enn lot la-loi dan mo bann membre ki pé faire la-guerre kont la loi mo l’esprit, ek ki pé faire moi vinn esclave la loi peché ki dan mo bann membre.” Apré sa Paul ti dire: “Mo enn dimoune desesperé!”​​—⁠Romains 7:​22-​24.

⁶ Eski ou finn deja ena mem sentiment ki Paul? Li pa mauvais ki ou conscient ou bann faiblesse. Kifer? Parski si ou comprend ki quantité li grave pou faire peché, ou pou pli determiné pou rejette seki mauvais. Mais fodé pa ki touletan ou senti-ou deprimé a cause ou bann faiblesse. Apré ki Paul ti fini dire bann parole ki montré ki li ti decouragé, li ti ajouté: “Merci Bondié par Jésus Christ nou Seigneur!” (Romains 7:​25) Oui, Paul ti sur ki di-sang ki Jésus inn versé, ti pou kapav couvert so peché ki li finn herité.​​—⁠Romains 5:​18.

 7. Ki kapav aide enn dimoune pou li pa deprimé a cause so tendance pou faire peché?

⁷ Si ou senti-ou deprimé a cause ou tendance pou faire peché, ou kapav gagne enn consolation ar seki l’apotre Jean ti ecrire. Li ti dire: “Si arrivé ki enn kikenn faire enn peché, nou ena enn assistant kot nou Papa, Jésus Christ, enn kikenn ki droite. Ek li enn sacrifice ki couvert nou bann peché, pa zis nou peché, mais aussi peché le monde entier.” (1 Jean 2:​1, 2) Si ou senti-ou abatte a cause sa tendance pou faire peché-la, rappel toujours ki Jésus finn mort pou bann dimoune ki faire peché, pa pou bann dimoune parfait. En realité, “tou dimoune faire peché ek zot pa reussi gagne la gloire Bondié.”​​—⁠Romains 3:​23.

8, 9. Kifer nou bizin rejette bann pensée ki faire nou condamne nou-mem?

⁸ Supposé ki ou finn deja faire enn peché grave dan le passé. Surement ou finn prié Jéhovah lor sa sujet-la, kitfois-mem ou’nn faire sa plusieurs fois. Bann ancien inn vinn aide ou lor plan spirituel. (Jacques 5:​14, 15) Parski ou ti repenti sincerement, ou finn kapav reste enn membre dan congregation. Ou-soit kitfois ou’nn quitte l’organisation Jéhovah pendant enn temps, mais plitar ou’nn repenti ek ou finn ré-vinn pur devant Jéhovah. Dan toulé-deux cas, li possible ki sa peché ki ou’nn faire dan le passé la ré-vinn dan ou l’esprit, ek ou senti-ou deprimé. Si sa arrive ou, pa blié ki Jéhovah pardonne bann dimoune ki’nn vrai-mem repenti “enn quantité fois.” (Isaïe 55:​7) En plus, Li pa’lé ki ou pensé ki ou finn condamné pou touletan. C’est Satan ki envie ou pense coumsa. (2 Corinthiens 2:​7, 10, 11) Satan pou detruire, parski li merite sa, mais li ti pou content faire ou croire ki ou aussi ou merite mem jugement. (Révélation 20:​10) Pa laisse Satan reussi servi sa pensée-la pou detruire ou la-foi. (Éphésiens 6:​11) Au contraire, “resisté kont li” dan sa domaine-la, pareil couma ou faire dan bann lezot domaine.​​—⁠1 Pierre 5:​9.

⁹ Dan Révélation 12:​10, la Bible appel Satan “sa kikenn ki accuse nou bann frere-la” setadir bann chrétien oint. Li “accuse zot la-nuit li-jour” devant Bondié. Si ou reflechi lor sa verset-la, sa kapav aide ou pou comprend ki Satan, sa fausse accusateur-la, pou bien content si ou accuse ou-mem ek ou condamne ou-mem, alors ki Jéhovah Li, Li pa faire sa. (1 Jean 3:​19-​22) Kifer ou contigne fatigue-ou a cause ou bann faiblesse, ziska ki ou envie abandonne tou? Pa laisse Satan detruire ou relation avek Jéhovah. Fodé jamais ou laisse li faire ou blié ki Jéhovah Li enn Bondié ki ena “misericorde ek compassion, ki pa en colere vite ek ki ena enn l’abondance l’amour fidel.”​​—⁠Exode 34:⁠6.

Nou decouragé parski nou limité

10. Si nou limité, couma sa kapav decourage nou?

¹⁰ Certain chrétien decouragé parski zot pa kapav servi Jéhovah couma zot ti pou content. Eski ou dan sa situation-la? Li possible ki enn maladie grave, l’age, ou-soit lezot kitsoz empeche ou pou passe mem quantité lé-temps dan service Bondié couma avant. Li vrai ki bann chrétien bizin ré-acheté le temps pou servi Bondié. (Éphésiens 5:​15, 16) Mais ki ou pou faire si ou vrai-mem limité ek ou pa kapav faire plus dan service Jéhovah ek ki sa pé decourage ou?

11. Couma nou kapav tire profit ar conseil ki Paul inn donné dan Galates 6:​4?

¹¹ La Bible encourage nou pou pa vinn bann dimoune paresse, mais pou “imite bann dimoune ki, grace a la foi ek patience, herite bann promesse.” (Hébreux 6:​12) Nou pou kapav faire sa a condition ki nou etudié zot l’exemple ek nou essaye imite zot la-foi. Seulement, nou pa pou tire okenn profit si nou compare nou avek lezot ek pensé ki nou pa pé faire assez bien. Li preferable ki nou applik conseil Paul ki ti dire: “Laisse sakenn examine seki li pé faire, lerla li pou ena enn raison pou glorifié li-mem kan li guette seki li’nn faire, sans ki li compare-li avek enn lot.” ​​—⁠Galates 6:​4.

12. Kifer nou kapav heureux dan nou service pou Jéhovah?

¹² Bann chrétien ena bann bon raison pou zot heureux, mem si zot limité a cause enn mauvais la-santé. La Bible donne nou sa l’assurance-la: “Bondié pa injuste pou blié seki zot inn faire ek l’amour ki zot finn montré pou so nom.” (Hébreux 6:​10) Kitfois a cause bann situation lor ki ou pena okenn control, li difficile pou ou faire pareil couma ou ti pé faire avant. Mais avek l’aide Jéhovah, ou kapav faire plus pou rann temoignage dan lezot fason, par exemple par telephone ek par lettre. Ou kapav sur ki Jéhovah pou beni ou pou seki ou faire avek tou ou leker ek pou l’amour ki ou montré pou Li ek pou lezot dimoune.​​—⁠Matthieu 22:​36-​40.

Bann “period critik” kapav accablé nou

13, 14. (a) Dan ki fason eski bann “period critik” kapav accablé nou? (b) Ki kitsoz montré nou ki zordi beaucoup dimoune pena l’affection dan zot famille?

¹³ Mem si nou pé attann le monde nouveau ki Bondié inn promette nou, asterla nou pé vive dan bann “lepok critik ki difficile pou supporté.” (2 Timothée 3:⁠1) Parski nou koné ki bann problem ki nou gagné zordi, zot enn signe ki nou delivrance pé kosté, sa donne nou courage. Pourtant, nou affecté par bann condition ki ena partout. Par exemple, ki ou pou faire si ou pena travail ek li difficile pou ou trouve enn travail? A mesure le temps passé ek ou trouve ou situation encore pareil, kitfois ou demann-ou si Jéhovah pé trouve ou situation ek si Li pé tann ou bann la-priere. Ou-soit kitfois ou victime bann prejugé ou lezot l’injustice. Parfois, li kapav arrivé aussi ki, kan ou lire bann nouvel ki ena dan la-gazette ou ena mem sentiment ki Lot, ki ti “bien bouleversé,” (“accablé,” Bible de Darby) a cause conduite devergondé ki bann dimoune ti ena autour li.​​—⁠2 Pierre 2:​7.

¹⁴ Fodé pa ki nou blié aussi enn kitsoz ki pou ena dan dernier jour. La Bible ti annoncé ki beaucoup dimoune pa pou ena “l’affection.” (2 Timothée 3:⁠3) Dan beaucoup famille pena l’affection. Livre La violence au foyer (en anglais) dire ki “dapré bann fait, bann dimoune ena plus risk assassiné, gagne batté, ou-soit abusé lor plan affectif ou sexuel par enn membre zot famille, ki par enn lot dimoune.” “Place kot enn dimoune bizin ressenti l’amour, ek senti-li en securité c’est sa place la-mem ki pli dangereux pou certain adulte ek certain zenfant.” Bann dimoune ki’nn vive dan enn famille kot ti ena problem, kapav plitar dan zot la-vie, konn bann period kot zot senti-zot accablé ek desesperé. Ki ou pou faire si ou dan sa situation-la?

15. Couma l’amour Jéhovah pli fort ki l’amour n’importe ki dimoune?

¹⁵ David ki ti ecrire plusieurs Psaume, ti chanté: “Mem si mo papa ek mo mama quitte moi, Jéhovah Li-mem pou ramasse moi.” (Psaume 27:10) Sa bien encourage nou kan nou koné ki l’amour Jéhovah pli fort ki l’amour n’importe ki papa ou mama! Li bien dur si ou parent inn rejette ou, inn maltraite ou, ou-soit inn abandonne ou. Mais sa pena okenn l’effet lor l’attachement ki Jéhovah ena pou ou. (Romains 8:​38, 39) Rappel ki Bondié attire bann dimoune ki Li content. (Jean 3:​16; 6:​44) Mem si bann dimoune pa finn traite ou bien, ou Papa ki dan le ciel Li, Li content ou!

Bann kitsoz pratik ki pou aide ou reprend courage

16, 17. Kan enn dimoune decouragé, ki li kapav faire pou garde so la-force spirituel?

¹⁶ Ou kapav faire bann kitsoz pratik pou ou reprend courage. Par exemple, faire enn bon program activité spirituel, ek suive li. Medite lor Parole Bondié, surtout kan ou senti-ou accablé par bann decouragement. Enn ecrivain Psaume ti chanté: “Kan mo ti dire: ‘Surement, mo pré pou tombé,’ to l’amour fidel, ah Jéhovah, ti contigne soutenir moi. Kan ti ena beaucoup pensée ki ti pé tracasse moi, to bann consolation ti’nn commence caresse mo nâme.” (Psaume 94:​18, 19) Si ou lire la Bible toulé-jour, sa pou aide ou rempli ou l’esprit avek bann parole ek bann pensée ki pou encourage ou.

¹⁷ La priere aussi bien important. Mem si li pa possible pou ou dire Jéhovah tou seki ou ressenti au fond ou-mem, Li koné ki ou pé rod dire Li. (Romains 8:​26, 27) Enn ecrivain Psaume ti donne sa l’assurance-la: “Jette to fardeau lor Jéhovah Li-mem, ek Li, Li pou soutenir toi. Jamais Li pa pou laisse enn kikenn droite, tombé.”​​—⁠Psaume 55:​22.

18. Ki kitsoz pratik enn dimoune ki gagne depression kapav faire?

¹⁸ Certain dimoune bien accablé parski zot gagne depression.b Si ou dan sa situation-la, essaye fixé ou l’esprit lor le monde nouveau ki Bondié inn promette ek lor lepok kot “okenn habitant pa pou dire: ‘Mo malade.’ ” (Isaïe 33:24) Si ou ena bann pensée negatif pendant trop longtemps, alors li bon ki ou al guette enn docteur. (Matthieu 9:​12) Li bien important aussi ki ou prend-ou bien soin lor plan physik. Si ou mange enn mangé equilibré ek ou faire l’exercice, sa kapav aide ou. Veillé ki ou gagne assez lé-temps pou reposé. Pa guette television ziska trop tard a-soir, ek evite bann divertissement ki pou fatigue-ou lor plan physik ek affectif. Mais surtout, contigne reste occupé ar bann activité spirituel! Mem si le temps pankor vini pou Jéhovah “souye tou larme,” Li pou aide ou pou supporte sa situation-la.​​—⁠Révélation 21:​4; 1 Corinthiens 10:​13.

Vive “enba la-main puissant Bondié”

19. Ki Jéhovah promette bann dimoune ki pé souffert?

¹⁹ Li vrai ki enn dimoune droite gagne beaucoup malheur, mais la Bible donne nou l’assurance ki “Jéhovah delivré li ar tousala.” (Psaume 34:​19) Couma Bondié faire sa? Kan l’apotre Paul ti prié Jéhovah plusieurs fois pou delivré-li ar enn ‘pikan dan la chair,’ Jéhovah ti dire li: “Mo puissance pé vinn parfait dan la faiblesse.” (2 Corinthiens 12:​7-9) Ki Jéhovah ti promette Paul, ek ki Li promette ou? Bondié pa promette ki Li pou gueri ou dé-suite, mais Li promette pou donne ou la force pou supporte ou situation.

20. Malgré nou bann problem, ki l’assurance nou gagné dan 1 Pierre 5:​6, 7?

²⁰ L’apotre Pierre ti ecrire: “Abaisse-zot enba la-main puissant Bondié pou ki Li eleve zot kan l’heure pou arrivé; pendant ki zot jette tou zot tracas lor Li, parski Li prend zot soin.” (1 Pierre 5:​6, 7) Jéhovah prend ou soin, a cause sa Li pa pou abandonne ou. Li pou soutenir ou dan ou bann l’epreuve. Pa blié ki bann chrétien fidel, zot “enba la-main puissant Bondié.” Tant ki nou servi Jéhovah, Li donne nou la force pou supporte nou situation. Si nou reste fidel, nanyin pa pou kapav faire nou di-tort lor plan spirituel dan enn fason permanent. Alors, anou garde nou l’integrité envers Jéhovah pou ki nou kapav vive pou touletan dan le monde nouveau. Lerla, nou pou là kan Li pou delivré pou touletan, bann dimoune ki senti-zot deprimé!

[Note]

Revision

• Kifer mem bann serviteur Jéhovah gagne problem?

• Pou ki raison certain serviteur Bondié senti-zot decouragé?

• Couma Jéhovah aide nou pou faire face ar bann kitsoz ki kapav faire nou deprimé?

• Couma eski nou “enba la-main puissant Bondié”?

[Bann zimage, page 18]

Malgré zot problem, bann serviteur Jéhovah ena bann bon raison pou zot heureux