Respé ek dignité ki Bondié donne bann femme

KAN Jésus ti lor la terre, li ti imite dan enn fason parfait personnalité so Papa ki dan le ciel ek So fason agir. Li ti dire: “Mo pa faire nanyé par mo-mem, mais mo dire sa bann kitsoz-la pareil couma mo Papa finn enseigne moi . . . Mo faire toujours seki faire Li plaisir.” (Jean 8:28, 29; Colossiens 1:15) Alors, kan nou examine fason ki Jésus ti agir avek bann femme ek so l’attitude envers zot, sa faire nou trouve ek comprend fason ki Bondié considere bann femme ek seki Li attann ki zot faire.

Dapré seki’nn ecrire dan bann l’Evangile, plusieurs bibliste finn reconette ki fason ki Jésus ti considere bann femme ti bien different ar fason ki bann dimoune ti considere bann femme dan so lepok. Couma? Ek pli important encore, eski so bann l’enseignement kapav toujours donne bann femme plus liberté zordi?

Jésus pa ti considere bann femme couma bann simple objet sexuel. Dapré certain chef religieux juif, si bann zom ena contact avek bann femme, sa pou amenn zot zis pou ena bann desir immoral. Parski bann zom ti considere bann femme couma bann tentation, bann femme pa ti gagne droit koz avek bann zom en publik, ni sorti sans enn voile. De lot coté, Jésus ti conseil bann zom pou controle zot prop desir ek pou traite bann femme avek dignité au lieu ki coupe tou contact avek zot.​—Matthieu 5:28.

Jésus ti dire aussi: “N’importe kisannla ki divorce avek so femme ek marié avek enn lot, commette l’adultere kont li.” (Marc 10:11, 12) Sa montré ki Jésus ti rejette l’enseignement bann rabbin ki ti permette bann zom pou divorce avek zot madame “pou n’importe ki raison.” (Matthieu 19:3, 9) La plupart bann Juif jamais pa ti pensé ki enn zom kapav commette l’adultere kont so femme. Zot bann rabbin ti enseigne zot ki enn mari jamais pa ti kapav commette l’adultere kont so femme​—zis enn femme ki ti kapav vinn infidele! Pareil couma enn commentaire lor la Bible dire: “Kan Jésus ti mette bann mari enba mem l’obligation moral ki zot femme, sa ti eleve position ek dignité bann femme.”

L’effet ki so l’enseignement ena zordi: Dan congregation bann Témoins de Jéhovah, bann femme ek bann zom assisté reunion ensam, sans ki ena okenn barriere entre zot. Zot pa peur pangar bann zom guette zot dan enn fason indecent ou-soit ki bann zom montré-zot trop familier ar zot, parski bann zom chretien faire attention pou traite bann “femme agé couma bann mama, bann jeune femme couma bann soeur, avek enn l’esprit pur.”​—1 Timothée 5:2.

Jésus ti prend le temps pou enseigne bann femme. Bann rabbin ti enseigné ki bann femme ti bizin reste dan l’ignorance. Mais Jésus au contraire, ti enseigne bann femme ek ti encourage zot pou exprime-zot. Jésus ti montré ki enn femme, so place c’est pa zis dan la cuisine. Li ti faire sa kan li ti permette Marie profite l’enseignement ki li ti donné. (Luc 10:38-42) Marthe, soeur Marie, li aussi ti profite l’enseignement Jésus. Nou trouve sa par bann reponse bien reflechi ki li ti donne Jésus apré la mort Lazare.​—Jean 11:21-27.

Jésus ti prend en consideration seki bann femme ti pensé. Sa lepok-la, la plupart bann femme juif ti pensé ki pou trouve vrai bonheur dan zot la vie, zot ti bizin gagne enn zenfant, enn bon garson, si possible enn prophete. Kan enn femme ti criyé: “Heureux sa ventre ki finn sarié toi-la!” Jésus ti profite l’occasion pou dire li enn kitsoz pli important. (Luc 11:27, 28) Kan Jésus ti montré ki spiritualité pli important, li ti attire l’attention sa madame-la lor enn lot kitsoz a part role ki bann femme ti ena en general.​—Jean 8:32.

L’effet ki so l’enseignement ena zordi: Bann enseignant dan congregation apprecié commentaire ki bann femme faire pendant reunion. Zot ena respé pou bann femme ki ena maturité, ki “enseigne seki bon” en privé ek par zot l’exemple. (Tite 2:3) Zot compte lor bann femme pou annonce la bonne nouvelle lor Royaume Bondié en publik.​—Psaume 68:11; guette l’encadré “Eski l’apotre Paul ti interdit bann femme kozé?”

Jésus ti prend compte bann femme. Dan lepok biblik, bann tifi pa ti ena autant valeur ki bann garson. Nou trouve sa mem l’idée-la dan Talmud ki dire: “Heureux enn dimoune ki ena bann garson, ek malheur lor enn dimoune ki ena bann tifi.” Certain parent ti considere zot tifi couma enn grand fardeau​—zot ti pou bizin trouve enn mari pou li ek paye enn dot, ek zot pa ti pou kapav compte lor li pou aide zot kan zot vinn vié.

Jésus ti montré ki la vie enn tifi ti aussi important ki la vie enn garson. Li ti montré sa kan li ti ressuscite tifi Jaïrus, pareil couma li ti ressuscite garson enn veuve dan Naïn. (Marc 5:35, 41, 42; Luc 7:11-15) Apré ki li ti gueri enn femme ki ti “possedé par enn l’esprit ki ti faire li malade depuis dix-huit an,” Jésus ti appel li “tifi Abraham,” enn expression ki pa ti preské servi dan bann livre ki bann Juif ti ecrire. (Luc 13:10-16) Sa l’expression-la montré enn grand bonté ek beaucoup respé. Alors, kan Jésus ti servi sa, li ti reconette ki sa madame-la ti ena mem l’importance ki n’importe ki dimoune ek aussi ki li ti ena enn grand la foi.​—Luc 19:9; Galates 3:7.

L’effet ki so l’enseignement ena zordi: Enn kozé asiatik dire: “Elevé enn tifi, c’est coumadir ou pé arrose jardin ou voisin.” Bann papa chretien pa laisse zot influencé par sa qualité mentalité-la, mais zot prend bien soin tou zot bann zenfant, garson ek tifi. Bann parent chretien faire sur ki tou zot bann zenfant gagne l’education ek bann soin medical ki bizin.

Jésus ti ena confiance dan bann femme. Dan la cour justice bann Juif, ti considere temoignage enn femme pareil couma temoignage enn esclave. Josèphe, enn historien ki ti vive dan premier siecle, ti dire ki pa ti kapav faire confiance bann femme a cause seki zot été.

Jésus ti bien different, li ti choisir bann femme pou annonce so resurrection. (Matthieu 28:1, 8-10) Sa bann femme fidele-la ti trouve Jésus mort lor enn poteau, ek ti temoin kan ti mette zot Seigneur dan tombe. Mais kan-mem sa, kan zot ti annonce bann zapotre ki Jésus ti ressuscité, li ti bien difficile pou zot croire parole sa bann femme-la. (Matthieu 27:55, 56, 61; Luc 24:10, 11) Selman, kan li ti apparette en premier avek bann femme, Christ ti considere zot digne pou temoigné, pareil couma so bann lezot disciple.​—Actes 1:8, 14.

L’effet ki so l’enseignement ena zordi: Dan congregation bann Témoins de Jéhovah, bann zom ki ena bann responsabilité montré consideration pou bann femme kan zot prend compte l’opinion sa bann femme-la. En seki concerne bann mari chretien, zot ‘donne l’honneur’ zot femme kan zot prend le temps pou ecoute zot.​—1 Pierre 3:7; Genèse 21:12.

Kan bann zom imite Christ, bann femme gagne respé ek liberté ki Bondié ti envie pou zot au commencement. (Genèse 1:27, 28) Au lieu ki zot faire croire ki bann zom pli superieur ki bann femme, bann mari chretien laisse-zot guidé par bann principe la Bible, ek sa faire zot femme heureux.​—Éphésiens 5:28, 29.

Kan Yelena ti commence etudié la Bible, li ti gagne bann mauvais traitement avek so mari, mais jamais li pa ti dire nanyé. So mari ti grandi dan enn l’environnement kot ti ena violence, kot bann zom ti kidnap bann femme ar ki zot ti envie marié, kitfois sans zot l’accord, ni l’accord zot parent. Yelena dire: “Seki mo ti aprann dan la Bible ti donne moi courage. Mo ti comprend ki ti ena enn kikenn ki ti bien content moi ek ki ti prend moi compte. Mo ti comprend aussi ki, si mo mari ti etudié la Bible, sa ti pou kapav change so l’attitude envers moi.” So rêve ti’nn realisé kan so mari plitar ti accepté pou etudié la Bible ek apré ti prend bapteme pou vinn enn Témoin de Jéhovah. Yelena dire: “Li ti vinn enn l’exemple dan maitrise de soi. Nou ti aprann pou pardonne nou camarade.” Ki conclusion Yelena tiré? “Bann principe la Bible finn vrai-mem aide moi pou senti-moi utile ek protegé dan mo mariage.”​—Colossiens 3:13, 18, 19.

Pa zis Yelena ki’nn faire enn l’experience coumsa. Ena plusieurs million femme chretien ki heureux parski zot ek zot mari faire beaucoup zeffort pou applik bann principe la Bible dan zot mariage. Zot gagne respé, reconfort, ek liberté kan zot frequente lezot chretien.​—Jean 13:34, 35.

Bann chretien, zom ek femme toulé-deux reconette ki, parski zot imparfait ek zot faire peché, zot forme partie dan creation Bondié ki “finn bizin soumette ar enn la vie ki pena sens.” Selman, kan zot faire zeffort pou ena bann bon relation avek zot Bondié ek zot Papa Jéhovah, ki ena l’amour, zot ena l’esperance ki zot pou “nepli esclave ar seki pé detruire” zot ek pou profite “liberté extraordinaire bann zenfant Bondié.” C’est vrai-mem enn grand privilege pou bann zom ek bann femme toulé-deux ki enba protection Bondié!​—Romains 8:20, 21.