Ansien—Vinn Bann Bon Berze

1-2. (a) Kouma bann ansien ed nou? (b) Ki dispozision Zeova inn pran pou ki nou gagn led lor plan spiritiel? (Get osi lankadre “Bann Berze dan Lepok Biblik.”)

ESKI to rapel kan dernie fwa enn ansien ki ena boukou lamour inn ed twa? Kitfwa li ti servi Labib pou ed twa pran enn bon desizion. Kitfwa li ti rekonfort twa kan to ti perdi enn kikenn ki to kontan dan lamor. Ouswa kitfwa li ti rapel twa ki kantite Zeova kontan twa kan to ti panse ki to pena valer pou Li. Maríaa enn ser ki res Lespagn, dir: “Kan bann ansien ed mwa ek protez mwa parey kouma enn berze ki vey lor so bann mouton, mo santi ki zot vremem gagn mo traka. Kan zot vizit mwa, sa montre ki zot vremem anvi konn mwa ek ki zot anvi kone dan ki fason zot kapav ed mwa.”

² Zeova kone ki nou bizin led bann ansien. Akoz sa, Li ti promet ki Li ti pou donn so bann serviter ‘bann berze ki pou vremem pran zot swin.’ Li ti anvi servi bann zom ki ti pou ‘azir dapre so leker,’ setadir bann zom ki ti pou servi konesans ek sazes ki ena dan Labib pou pran swin so pep. (Zer. 3:15, not; 23:4) Pli bon fason ki Zeova ti realiz sa promes-la se kan Li ti avoy Zezi lor later. Plitar, Zezi ti pran dispozision pou etabli bann ansien pou pran swin bann frer ek ser dan lasanble. (Efe. 4:7, 8, 11) Dan sa lartik-la, nou pou aprann kifer Zezi li enn bon berze, ek kouma bann ansien kapav swiv so lexanp. Apre sa, nou pou examinn bann kapasite ek bann kalite ki bann ansien bizin ena pou zot vinn bann bon berze. Ek an dernie, nou pou koz lor kifer bann ansien gagn boukou lazwa kan zot pran swin bann ti mouton Zeova.

APRANN AR LEXANP ZEZI, KI ENN “BON BERZE”

3. Kifer Zezi li enn “bon berze”? (Zan 10:11, 14)

³ Zezi ti dir ki li enn “bon berze.” (Lir Zan 10:11, 14.) Kifer li ti dir sa? Parski li ti konsider so bann disip kouma so bann mouton, ek li ti telman kontan zot ki li ti “donn so lavi” pou zot. Zezi ti dir: “Mo konn mo bann mouton ek mo bann mouton konn mwa.” Zezi ti kone ki bann difikilte sakenn parmi so bann disip ti pe gagne, ek li ti dir ki li ti pou donn zot lafors ki zot bizin. (Mat. 11:28, 29) Gras-a sa, so bann disip ti aprann konn li, zot ti vinn pros ar li, ek zot ti fer li konfians.

4-5. (a) Kifer Mart ek Mari ti demann Zezi pou ed zot? (b) Ki Zezi ti dispoze pou fer pou ed zot?

⁴ Dan Zan sapit 11, kan Zezi ti al get Mart ek so ser, Mari, dan Betani, nou trouv bann kalite ki montre ki Zezi enn bon berze. Sa de madam-la ti bizin led Zezi parski de-trwa zour avan, zot frer Lazar ti mor. Zezi ti bien kontan sa fami-la. (Zan 11:5) Souvan Zezi ti res kot zot. Alor li ti konn zot bien ek zot ti so bann bon kamarad. Mem si Mart ek Mari ti sagrin ki Zezi pa’nn geri Lazar ek ki Lazar inn mor, zot pa ti ena okenn dout ki Zezi ti pou konsol zot dan sa moman-la. Azordi, bann ansien swiv lexanp Zezi. Kan zot vinn bann bon kamarad avek zot bann frer ek ser, li pou pli fasil pou zot ed bann-la.

⁵ Sa ti pran apepre de zour pou ki Zezi ariv Betani. Anplis, sa vwayaz-la ti danzere pou Zezi. Kifer? Parski bann dimounn dan sa landrwa-la ti rod touy li. (Zan 11:8) Selman, Zezi ti dispoze pou fer tou seki li kapav pou ed so bann kamarad. Parey kouma Zezi, enn bon berze li aksepte pou fer bann sakrifis pou ed so bann frer ek ser.

6. Kouma Zezi ti rekonfort Mart?

⁶ Lazar ti fini mor depi kat zour kan Zezi ti ariv pre ar Betani. Kitfwa Mart ti pe demann limem kifer Zezi pa ti vini pou geri so frer. (Zan 11:21) Zezi ti kone ki li ti bien tris ek dekouraze. Alor, avek bonte, li ti ed Mart pou konsantre li lor lavenir olie lepase. Li ti rekonfort li ek ti dir li: “To frer pou resisite.” (Zan 11:23) Lerla, Zezi ti ekout bien seki Mart ti dir, ek li ti rapel Mart ki Zeova inn donn li pouvwar pou resisit bann mor. (Zan 11:24, 25) Parey kouma Zezi, azordi bann ansien ankouraz bann frer ek ser kan zot ekout bann-la bien, ek kan zot ed bann-la pou ogmant zot lafwa dan bann promes Zeova.

7. Ki Zezi ti resanti kan li ti trouv Lazar so bann fami ek so bann kamarad plore? (Get zimaz osi.)

⁷ Avan ki li resisit Lazar, Zezi ti obzerv bien bann dimounn ki ti pre kot so tom. Mari, ser Lazar, ek bann lezot dimounn ti pe plore. Ki Zezi ti resanti kan li ti trouv zot pe plore? Labib dir: “Li ti pous enn soupir telman li ti ranpli ar lemosion ek li ti boulverse.” Apre sa, “so larm ti koule.” (Zan 11:33, 35) Zezi ti vremem konpran seki zot ti resanti ek sa ti tous zot leker. (Zan 11:36) Parey kouma Zezi, enn bon berze li fer zefor pou konpran santiman so bann frer ek ser.—Rom. 12:15.

8. Apre so rezireksion, ki dispozision Zezi ti pran pou kontign pran swin so bann ti mouton?

⁸ Zezi inn les enn zoli lexanp parski li ti enn bon berze. Li ti kontan so bann disip ek li ti ed zot pou res pros ar Zeova. Alor, li ti ankouraz so bann disip pou fer parey. Inpe apre so rezireksion, Zezi ti demann lapot Pier, ek osi so bann lezot zapot pou kontign pran swin so bann mouton. Li ti fer zot konpran ki kantite sa ti inportan ki zot pran swin ‘so bann ti mouton.’b (Zan 21:15-17) Zame Pier ti bliye seki Zezi ti dir li! Plizir lane apre, li ti sipliy bann ansien pou kontign pran swin bann ti mouton ki ena boukou valer pou Zezi.—1 Pier 5:1, 2.

BANN KAPASITE EK BANN KALITE KI ENN BON BERZE BIZIN ENA

9. Kifer nou kapav dir ki bann ansien ena enn responsabilite bien inportan? (Zistwar Bann Zapot 20:28)

⁹ Lapot Pol ti ankouraz bann ansien dan Efez pou asim bien zot responsabilite pou pran swin bann mouton Zeova, ek pou konsider sa travay-la kouma enn kitsoz ki bien inportan. (Lir Zistwar Bann Zapot 20:28.) Azordi, bann ansien inn gagn mem responsabilite. Enn ansien ki apel David dir: “Se koumadir Zezi pe dir mwa: ‘To pe trouv sa bann ti mouton-la? Zot pou mwa, me mo anvi ki to ed mwa pran zot swin.’” Se enn gran responsabilite ki bann ansien ena. Parfwa, enn ansien kapav panse ki li pena ase kapasite pou rekonfort bann ki an-dey, pou ankouraz bann ki feb, ek pou soutenir bann ki dekouraze ouswa deprime. (1 Tes. 5:14) Selman, zot konpran ki se Zeova ki donn zot lafors pou asim sa responsabilite-la. (Fil. 4:13) Me sak ansien bizin fer zefor pou devlop bann kapasite ek bann kalite ki pou ed li vinn enn pli bon berze. Anou get sertin parmi zot.

10. Ki kitsoz enn ansien bizin fer pou ki li vinn enn bon berze, ek kifer? (Proverb 27:23)

¹⁰ Konn bien to bann mouton. (Lir Proverb 27:23) Enn Labib tradir sa verse-la koumsa: “Aprann konn bien to bann mouton.”c Li vre ki nou pou respekte lavi prive nou bann frer ek ser. (1 Pier 4:15) Selman, David ki nou ti mansione avan, dir: “Pou ki nou kapav servi Labib pou donn nou bann frer ek ser bann konsey ki apropriye pou zot, avan nou bizin konpran ki bann difikilte nou bann frer ek ser ena.”

11. Ki bienfe bann frer ek ser gagne kan enn ansien pran letan pou ekout zot?

¹¹ Ekout bien to bann frer ek ser. Pou ki enn ansien kone seki so bann frer ek ser vremem bizin, li bizin pran letan pou ekout zot. (Zak 1:19) Anou get lexanp enn ser ki apel Catherine. So misie ti abandonn li ek so bann zanfan. Catherine dir: “Bann ansien ti poz mwa bann bon kestion, ek zot ti ekout tou seki mo ti dir. Kan zot ti fer sa, mo ti santi ki zot vremem gagn mo traka ek ki mo ena boukou valer pou zot. Mo ti trouve ki zot vremem anvi konpran bann difikilte ki mo ti ena ek seki mo pe resanti. Sa vizit-la ti rapel mwa ki Zeova pa’nn abandonn mwa ek mo bann zanfan.”

12. Kouma bann ansien kapav servi bann verse ki apropriye kan zot fer bann vizit pastoral?

¹² Servi bann verse ki apropriye pou sak dimounn. (Tit 1:7, 9) Kan enn ansien kone ki bann difikilte so bann frer ek ser ena, li pou plis kapav ed zot.d Enn ansien ki apel Andrew, dir: “Mo fer zefor pou montre mo bann frer ek ser bann prinsip ek bann zistwar ki ena dan Labib ki pou kapav ed zot pou fer fas ar bann difikilte ki zot pe gagne. Souvan mo servi liv Bann Verse pou Nou Lavi Kretien pou mo fer sa.” Enn lot ansien ki apel Elihú servi mem piblikasion. Li dir: “Souvan mo servi bann size kouma ‘Dekourazman,’ ‘Desepsion,’ ek ‘Traka’ pou prepar mo bann vizit pastoral. Sertin nou bann frer ek ser pe lit kont sa bann santiman-la toulezour, ek ladan mo’nn trouv bann verse ki kapav ankouraz zot ek ki montre zot ki Zeova konpran seki zot resanti.” Catherine, ki nou ti mansione dan paragraf avan, dir: “Enn ansien ti lir Izai 26:3 avek mwa. Apre sa, mwa ek mo bann tifi ti relir sa verse-la plizir fwa. Sa verse-la ti vremem rekonfort nou kan nou ti ena bann santiman negatif.”

13. Kouma to kapav vinn enn ansien ki abordab? (Get osi zimaz ek lankadre “Zot Tou Zot Bann Frer.”)

¹³ To bizin abordab. Mem si li ti bien okipe, Zezi ti touletan pran letan pou koz avek bann dimounn, ek osi avek bann zanfan. (Lik 18:15, 16) Ki sa aprann nou? Enn bon berze zame li tro okipe pou koz ar lezot, ki zot zenn ouswa vie. Kan enn ansien pran enn ti letan pou koz ar bann frer ek ser avan ouswa apre renion, sa kree enn bon lamitie ek sa osi ogmant konfians ki zot ena ant zot. Enn ser ki apel Lauren, dir: “Li pli fasil pou mo koz ar enn ansien ki’nn deza ed mwa ek ki souvan pran mo nouvel. Ek si arive mo fer fas ar enn gro problem, mo pa pou ezite pou al get li parski mo kone ki li gagn mo traka ek ki li anvi ed mwa.”

14. Ki nou aprann ar lexanp Juan?

¹⁴ Montre lamour anver to bann frer ek ser. Zezi ti dir ki bann dimounn ti pou rekonet so bann vre disip si zot ena lamour ant zot. (Zan 13:35) Alor, kan enn ansien kontan bann mouton Zeova, sa montre ki li enn bon berze. Juan, ki aster-la servi kouma ansien, ti gagn led ar enn bon berze. Li dir: “Kan mo ti koumans etidie Labib, parfwa mo ti tris ek mo ti santi ki mo pa ti pros ar Zeova. Selman, enn ansien ti montre lamour anver mwa, ek sa ti ed mwa pou kontign etidie ek pou asiste bann renion. So lamour ti ed mwa pou pa aret servi Zeova. Gras-a lamour ek pasians ki sa ansien-la ti montre anver mwa, mo ti trouve ki Zeova kontan mwa ek konpran mwa, ek sa ti ankouraz mwa pou pa bes lebra.”

BANN ANSIEN GAGN BOUKOU LAZWA KAN ZOT PRAN SWIN BANN MOUTON ZEOVA

15. Kifer bann ansien gagn lazwa kan zot pran swin zot bann frer ek ser? (Zistwar Bann Zapot 20:31, 35)

¹⁵ Travay enn berze pa touletan fasil. Lapot Pol ti dir ki parfwa li ti bien strese ek li pa ti dormi parski li ti trakase pou so bann frer ek ser ek li ti kontan zot. (2 Kor. 11:27, 28) Selman, kan li ti pans tou seki li ti fer pou bann frer ek ser, li ti rapel seki Zezi ti dir: “Ena plis lazwa kan done ki kan resevwar.” (Lir Zistwar Bann Zapot 20:31, 35.) Javier, ki ansien depi plis ki 30 an, explike kifer li gagn boukou lazwa kan li pran swin so bann frer ek ser. Li dir: “Kan mo’nn pran swin mo bann frer ek ser, sa finn ogmant mo lafwa ek mo lamour pou Zeova. Kan mo vizit zot, sa rapel mwa ki Zeova gagn traka tou bann dimounn ki kontan Li ek ki anvi fer Li plezir.”

16. Kifer Pol ti konpar limem ar enn mama?

¹⁶ Enn bon berze kontan so bann frer ek ser parey kouma enn mama kontan so bann zanfan. Pol ti konpar limem ar enn mama kan li ti pans so bann frer ek ser ki ti dan lasanble Tesalonik. (1 Tes. 2:7, 8) Souvan enn mama li sakrifie boukou kitsoz pou so zanfan, selman li gagn boukou lazwa kan li fer sa. Ek parey kouma enn mama bien fier kan li trouv so zanfan fer bann progre, Pol ti bien fier kan li ti trouv progre ki bann frer ek ser dan Tesalonik ti fer. (2 Tes. 1:3, 4) Dan mem fason, bann ansien ki fer bann sakrifis pou ed lezot progrese, gagn boukou lazwa. Miguel, sa ansien ki ti ed Juan la, dir: “Mo extra kontan ki mo’nn kapav ed Juan pou devlop bann zoli kalite ki enn Kretien bizin ena. Ek aster-la, mo bien fier ki li pe servi kouma enn ansien.”

17. Kifer to rekonesan anver Zeova ki Li’nn donn nou bann berze?

¹⁷ Nou tou nou ena boukou difikilte dan nou lavi. Selman, nou bien rekonesan ki Zeova inn donn nou bann bon berze ki kapav ed nou. Nou trouve ki kantite zefor zot fer pou swiv lexanp Zezi, nou “bon berze.” Alor, nou bien rekonesan ki zot fer boukou zefor pou devlop bann kapasite ek bann kalite ki bizin pou ki zot kapav donn nou bann bon konsey, ankouraz nou, ek rekonfort nou. Sa bann berze-la zot ena boukou valer pou nou ek pou Zeova!—1 Tes. 5:12, 13.