Joba

 2 “Mila olona tomady angaha moa Andriamanitra+

Sa izy mila olona lalin-tsaina?

 3 Ho finaritra ve ilay Mahery Indrindra raha marina ianao,+

Sa misy tombony ho azy raha ataonao tsy misy hokianina ny fiainanao?+

 4 Ny fanajanao azy ve no hananarany anao,

Ary noho izany ve no hitondrany anao any amin’ny fitsarana?+

 5 Tsy efa be loatra ve ny faharatsianao?+

Ary hanao fahadisoana foana ve ianao?

 6 Fa maka antoka tsy ahoan-tsy ahoana amin’ny rahalahinao ianao,+

Ary manendaka ny akanjon’ny olona efa zara raha mitafy.

 7 Tsy manome rano hosotroin’ny reraka ianao,

Ary tsy mahafoy hanina ho an’ny noana.+

 8 Ny be sandry no tompon’ny tany,+

Ary izay iangarana no monina ao.

 9 Nataonao nody maina ny vehivavy mpitondratena,

Ary tsy manan-kery intsony ny ankizilahy kamboty ray.+

10 Izany no antony mampisy fandri-borona manodidina anao,+

Sy zava-mampahatahotra tampoka mampihorohoro anao,

11 Sy haizina mahatonga anao tsy hahita,

Ary rano be misamboaravoara mandifotra anao.

12 Tsy avo tahaka ny lanitra ve Andriamanitra?+

Jereo koa fa avo ny fitambaran’ny kintana.+

13 Hoy anefa ianao: ‘Inona moa no fantatr’Andriamanitra?

Angaha izy afaka mitsara avy ao ambadiky ny haizim-pito?

14 Toeram-piafenany ny rahona ka tsy mahita izy,

Ary mandehandeha eny amin’ny andohalambon’ny lanitra izy.’

15 Moa ve ianao mbola hanaraka ihany ny lalana efa nisy hatrizay,

Izay nandehanan’ny olon-dratsy?

16 Nindaosina talohan’ny fotoana ireny olona ireny,+

Ary mirodana hatrany amin’ny fotony+ ny fiainany.

17 Hoy ireny amin’ilay tena Andriamanitra: ‘Mialà aminay!+

Inona moa no azon’ilay Mahery Indrindra atao aminay?’

18 Andriamanitra anefa no nameno zava-tsoa ny tranon’ireny.+

Ho lavitra ahy anie ny fisainan’ny ratsy fanahy!+

19 Hahita ny fahavoazan’ireny ny marina ka hifaly,+

Ary haneso an’ireny ny olona tsy manan-tsiny, ka hanao hoe:

20 ‘Ringana ny fahavalontsika,

Ary ho levon’ny afo izay sisa miangana aminy.’

21 Mba ataovy izay hahafantaranao tsara an’Andriamanitra, ka mihavàna aminy,

Dia hahazo zava-tsoa ianao.

22 Mba raiso ny lalàna avy amin’ny vavany,

Ary alatsaho ao am-ponao ny teniny.+

23 Raha miverina amin’ilay Mahery Indrindra ianao,+ dia hiverina amin’ny laoniny ny fiainanao.

Raha ataonao lavitra ny tranolainao ny tsy fahamarinana,

24 Ka ataonao eny amin’ny vovoka ny volamena sarobidy,

Ary eny amin’ny vaton’ny lohasaha falehan-driaka ny volamena avy any Ofira,+

25 Dia ilay Mahery Indrindra no ho toy ny volamena sarobidy ho anao,

Sy ho toy ny volafotsy tsara indrindra ho anao.+

26 Amin’izay dia ho finaritra tanteraka amin’ilay Mahery Indrindra ianao,+

Ary hanandrandra ny lohanao amin’Andriamanitra.+

27 Hitalaho aminy ianao, dia hihaino anao izy.+

Ary hanefa ny voadinao ianao.+

28 Hanapa-kevitra ianao, dia ho tanteraka aminao izany.

Ary hamirapiratra amin’ny lalanao ny fahazavana.+

29 Haetry ianao raha mizahozaho,+

Fa ny manetry tena kosa no hovonjeny.+

30 Hamonjy ny tsy manan-tsiny izy.+

Ary ho voavonjy ianao noho ny fahadiovan’ny tananao.”+