Изреки

11 Неточната* вага му е одвратна на Јехова,

а точниот тег му е пријатен.

 2 Со вообразеноста доаѓа и срамот,

а мудроста е кај скромните.

 3 Чесните ги води нивната беспрекорност,

а измамниците ќе ги упропасти нивната подмолност.

 4 Богатството нема да помогне во денот на гневот,

а праведноста избавува од смртта.

 5 Праведноста му го израмнува патот на беспрекорниот,

а злобниот ќе падне поради својата злоба.

 6 Чесните ги избавува нивната праведност,

а измамниците ќе паднат во замката на сопствените желби.

 7 Кога ќе умре злобен човек, неговата надеж пропаѓа,

а пропаѓа и довербата во неговата сила.

 8 Праведниот ќе биде спасен од неволјата,

а наместо него злобниот ќе западне во неа.

 9 Отпадникот* со своите зборови го уништува ближниот,

а праведните ги избавува знаењето.

10 Поради добрината на праведните, градот се весели,

и кога ги снемува злобните, се слушаат радосни извици.

11 Кога чесните се благословени,* градот напредува,

а устата на злобните го урива.

12 Оној што е неразумен* го презира својот ближен,

а оној што е вистински прониклив молчи.

13 Клеветникот оди наоколу и открива доверливи работи,

а оној што е достоен за доверба* знае да чува тајна.

14 Кога нема мудро водство, народот страда,

а каде што има многу советници, таму има и успех.*

15 Кој гарантира за туѓ заем, лошо ќе си помине,

а кој не сака* да пружи рака за да гарантира, мирно ќе спие.

16 Жената што има убави особини стекнува почит,*

а безмилосните мажи стекнуваат само богатство.

17 Добриот човек* си прави добро себеси,

а суровиот човек си нанесува штета.*

18 Злобниот добива привидна плата,

а оној што сее праведност добива вистинска награда.

19 Оној што цврсто се држи за праведноста ќе добие живот,

а оној што едвај чека да направи зло оди во смрт.

20 Луѓето со расипано срце му се одвратни на Јехова,

а оние што живеат беспрекорно го радуваат.

21 Биди сигурен дека злобниот нема да си помине без казна,

а децата на праведниот ќе бидат избавени.

22 Златен прстен на рилка на свиња,

тоа е жена убава, но неразумна.

23 Желбата на праведните донесува само добро,

а она на кое се надеваат злобните води до жесток гнев.

24 Некој дава великодушно, и има сѐ повеќе;

друг не го дава она што треба да го даде, и е сѐ посиромашен.

25 Великодушниот човек ќе напредува,

и оној што ги зајакнува* другите и самиот ќе биде зајакнат.

26 Луѓето ќе го проколнуваат оној што го крие житото,

а ќе го благословуваат оној што го продава.

27 Кој се труди да прави добро, се труди да стекне наклоност,

а кој бара зло, тоа и ќе го снајде.

28 Кој се потпира на своето богатство, ќе пропадне,

а праведните ќе бидат бујни како зелени лисја.

29 Кој му навлекува неволја* на својот дом, ќе остане со празни раце,*

и безумниот ќе му биде слуга на мудриот.

30 Постапките на праведниот се како дрво на животот,

и оној што ги поттикнува другите да прават добро* е мудар.

31 Ако праведниот на земјата го добива она што го заслужува,

како ли ќе си поминат злобниот и грешникот!