Изреки

13 Мудриот син ги прима поуките* на својот татко,

а оној што се потсмева не прифаќа укор.

 2 Човекот ќе ужива во доброто од плодовите на своите зборови,

а измамникот копнее по насилство.

 3 Кој внимава што зборува, си го чува животот,

а кој уста не затвора, ќе настрада.

 4 Мрзливиот има многу желби, но останува со празни раце,

а желбите на трудољубивиот ќе се исполнат.

 5 Праведниот ја мрази лагата,

а постапките на злобниот носат срам и понижување.

 6 Праведноста ги чува беспрекорните,

а злобата ги упропастува грешниците.

 7 Некој се прави богат, а нема ништо;

некој се прави сиромашен, а има големо богатство.

 8 Богатиот со своето богатство плаќа откупнина за својот живот,

а на сиромашниот никој не му се ни заканува.

 9 Светлината на праведните силно блеска,*

а светилката на злите ќе угасне.

10 Вообразеноста води само до расправии,

а оние што бараат совет* се мудри.

11 Брзо стекнатото богатство* ќе исчезне,

а богатството на оној што малку по малку собира ќе се зголеми.

12 Од предолго исчекување* се разболува срцето,

а исполнетата желба е дрво на животот.

13 Кој ги презира советите,* ќе плати за тоа,

а кој ги почитува заповедите, ќе биде награден.

14 Поуките* на мудриот се извор на живот,

избавуваат од замките на смртта.

15 Оној што добро расудува стекнува наклоност,

а животот на измамниците е тежок.

16 Разумниот човек постапува промислено,

а глупавиот ја разоткрива својата глупавост.

17 Злобниот гласник запаѓа во неволји,

а верниот гласник донесува освежување.

18 Кој ги игнорира поуките,* ќе осиромаши и ќе си навлече срам,

а кој прифаќа укор, ќе му биде укажана чест.

19 Исполнетата желба го радува човекот,

а безумните не сакаат да се одвратат од злото.

20 Кој се дружи* со мудрите, ќе стане мудар,

а кој е пријател со безумници, лошо ќе си помине.

21 Грешниците ги прогонува неволја,

а праведните ќе бидат богато наградени.

22 Добриот човек им остава наследство и на внуците,

а богатството на грешникот се чува за праведниот.

23 Изораната нива на сиромашниот дава богат род,

но може* да пропадне поради неправда.

24 Кој не го укорува* својот син, го мрази,

а кој го сака, грижливо* го опоменува.*

25 Праведниот јаде и се наситува,

а стомакот на злобниот останува празен.