Младите прашуваат...

Како можам да ја направам вистината моја своина?

„Израснав како Јеховин сведок и секогаш мислев дека ако си воспитан како таков, тогаш го познаваш Јехова. Колку само грешев!“ (Антоанета).

„ШТО е тоа вистина?“ Понтиј Пилат, човекот кој го предал Исус да се погуби, го поставил ова прочуено прашање (Јован 18:38). Меѓутоа, Пилат очигледно имал намера неговото цинично прашање да заврши — а не да започне — еден отворен дијалог. Тој не бил вистински заинтересиран за ‚вистината‘. Но, како е со тебе? Дали ти си заинтересиран за вистината?

Со векови филозофите длабоко размислувале за тоа што е вистината, но срамота е колку малку можат да покажат како резултат на нивните напори. Сепак, ти можеш да го најдеш одговорот на Пилатовото прашање. Исус Христос поучувал дека Божјата Реч е вистина. Исто така, тој зборувал за себе како за „вистината“. А апостол Јован напишал: ‚Вистината произлезе од Исуса‘ (Јован 1:17; 14:6; 17:17). Затоа, целиот збир од христијански учења, кои подоцна станале дел од Библијата, се наречени и „вистината“ или „евангелската вистина“ (Тит 1:14; Галатјаните 2:14; 2. Јованово 1, 2). Овие христијански науки вклучуваат такви работи како што се Божјето лично име, воспоставувањето на Божјето Царство, воскресението и Исусовата откупнина (Осија 12:5; Матеј 6:9, 10; 20:28; Јован 5:28, 29).

Илјадници млади биле поучувани за библиската вистина од своите христијански родители. Но, дали тоа значи дека тие ‚живеат во вистината‘? (3. Јованово 3, 4). Не. На пример, 20-годишната Џенифер била воспитана како Јеховин сведок. Таа се присетува: „Мајка ми ме носеше на конгресите на Сведоците и алудираше на тоа дека треба да размислувам за крштавање. Но, во себе јас си велев: ‚Воопшто не сакам да бидам Сведок. Сакам само да се забавувам!‘“

Некои млади веруваат во она што биле поучени, но пропуштиле да стекнат длабоко разбирање за она што навистина го поучува Библијата. Каква е опасноста? Исус предупредил дека некои поединци „немаат во себе корен“. Таквите „се непостојани; па, кога настане жалост или гонење заради словото, веднаш се соблазнуваат“ (Марко 4:17). Други, пак, донекаде можат да ги објаснат своите верувања темелени на Библијата, но не го запознале Бог на лична основа. Една млада жена по име Анеса вели: „Мислам дека кога бев помлада немав некој вистински однос со Јехова . . . Мислам дека тоа главно зависеше од односот што го имаа со него моите родители“.

Како стојат работите со тебе во овој поглед? Дали Јехова е само Богот на твоите родители? Или, пак, како и библискиот псалмист, можеш да речеш: „Јас, пак, се надевам на Тебе, Господи, и си реков: Ти си мој Бог“? (Псалм 30:14). Можеби ќе ти треба храброст за да се соочиш со фактите. Младиот Александар вели: „За мене првиот чекор беше искреното самоиспитување“. Откако ќе се преиспиташ длабоко во себе, можеби ќе сфатиш дека никогаш си ја немал докажано вистината (вкупниот збир од христијански науки) на себе. Можеби ти недостига цврста увереност и затоа животот ти изгледа бесмислен, без вистинска насока.

На своите христијански состаноци, Јеховините сведоци честопати пеат една песна со наслов „Направи ја вистината твоја“.a Можеби тој совет е соодветен за тебе. Но, како можеш да го постигнеш тоа? Од каде да започнеш?

Докажи си ја себеси

Во Римјаните 12:2 го наоѓаме следниов совет на апостол Павле: „Да можете да познавате, која е добрата, угодна и совршена волја Божја“. А како можете да го направите тоа? Стекнувајќи „познавање на вистината“ (Тит 1:1). Древните жители на градот Берија не ги прифатиле работите што ги чуле без да ги испитаат. Напротив, тие ‚со голема усрдност секој ден го испитувале Писмото, дали е тоа така‘ (Дела 17:11).

Една млада христијанка по име Ерин увидела потреба да го направи истото. Таа се присетува: „Истражував. Се прашував: ‚Од каде да знам дека ова е вистинската религија? Од каде да знам дека постои Бог кој се вика Јехова?‘“ Зошто не започнеш со своја програма на лична студија? Би можел да почнеш со Спознание кое води до вечен живот, книга што се темели на Библијата.b Внимателно прочитај ја. Побарај ги сите наведени библиски стихови и забележи во каква поврзаност се со она што е изнесено. Можеби ќе бидеш изненаден кога ќе откриеш колку поинакво мислење за вистината ќе имаш кога ќе станеш „работник кој нема од што да се срами и кој исправно управува со речта на вистината“ (2. Тимотеј 2:15, NW).

Апостол Петар рекол дека некои работи во Библијата се „тешки за разбирање“ и ти ќе увидиш дека тоа е точно (2. Петрово 3:16). Но, Божјиот дух може да ти помогне да ги сфатиш дури и тешките теми (1. Коринтјаните 2:11, 12). Моли се за Божјата помош кога имаш проблеми да разбереш нешто (Псалм 118:10, 11, 27). Обиди се да истражуваш дополнително во публикациите на Watch Tower Society. Ако не си сигурен како да го направиш тоа, побарај помош. Твоите родители или можеби некои други зрели членови на христијанското собрание можат да ти помогнат.

Запомни, ти не проучуваш за да ги импресионираш другите со своето знаење. Младиот Колин објаснува: „Ги запознаваш Јеховините особини“. Одвој си време за да медитираш за она што го читаш за да ти се всади длабоко во срцето (Псалм 1:2, 3).

И дружењето со собранието на христијанските состаноци може да ти помогне. На крајот на краиштата, како што напишал апостол Павле, собранието е „столб и тврдина на вистината“ (1. Тимотеј 3:15). Некои млади се жалат дека христијанските состаноци им се здодевни. „Но ако не се подготвуваш за состаноците“, потсетува младиот Колин, „тогаш нема да извлечеш многу од нив.“ Затоа, однапред подготвувај се. Состаноците се многу поинтересни кога си учесник — а не само набљудувач.

Дали си презафатен за да проучуваш?

Точно е дека со сите твои обврски на училиште и во домаќинството може да ти биде предизвик да пронајдеш време за проучување. Младата Сузан пишува: „Со години се борев со сознанието дека треба да се подготвувам за состаноците и да имам лична студија, но сепак никогаш не можев да го направам тоа“.

Сузан научила ‚да си откупува време‘ од поневажните активности (Ефесјаните 5:15, 16, NW). Како прво, таа направила список на сето она што требало да го проучи. Потоа испланирала време за да проучува. Но, во својот распоред вклучила и време за рекреација. Таа советува: „Не го планирај секој слободен момент. На сите ни треба време за одмор“. Веројатно и за тебе ќе биде практично да имаш распоред.

Споделувај го она што го учиш

Од особена помош за да ја направиш вистината твоја своина е да го користиш она што го учиш. Обиди се да поучиш некој друг. Псалмистот рекол: „Устата моја ќе кажува мудрост, а мислата на срцето мое — поука“ (Псалм 48:3).

Ако не се срамиш од добрата вест, нема да се колебаш да ја споделуваш со соучениците и со другите кои ќе ги сретнеш (Римјаните 1:16). Користејќи ги таквите прилики да им ја кажуваш вистината на другите, ти ќе го користиш она што го учиш и на тој начин ќе ја всадиш вистината во својот ум и срце.

Внимавај на твоето друштво

Некои христијани во првиот век добро напредувале духовно. Но, наскоро апостол Павле морал да им напише, прашувајќи: „Кој ви попречи, та да не се покорувате на вистината?“ (Галатјаните 5:7). Нешто слично се случило и со младиот Алекс. Тој признава дека неговите напори да ја проучува Божјата Реч биле поткопани со тоа што „бил во лошо друштво“. Заради твојот духовен напредок, можеби ќе треба и ти да направиш некои промени во овој поглед.

Спротивно на тоа, доброто друштво може навистина да ти помогне да напредуваш. Во Изреки 27:17 се вели: „Железо железо остри, и човек го изострува погледот на пријателот свој“. Најди добри примери за имитирање — луѓе кои ја применуваат вистината во својот живот. Можеби не треба да бараш подалеку од својот дом. Младата Џенифер се присетува: „Дедо ми ми беше најдобар пример. Тој секогаш минуваше по три часа во подготовка за нашата собраниска библиска студија во недела. Секој библиски стих од лекцијата го бараше во различни библиски преводи и ги проверуваше зборовите во својот речник. Тој беше експерт за помалку познатите факти од Библијата. Би можеле да го прашате за сѐ, и тој ќе го најдеше одговорот“.

Кога ќе ја направиш вистината твоја лична своина, ти ќе стекнеш еден скапоцен посед — нешто од што не би се откажал за никаква награда. Затоа, никогаш не гледај на вистината само како на „религијата на моите родители“. Твојата увереност треба да биде како увереноста на псалмистот кој рекол: „Зашто татко ми и мајка ми ме оставија, но Господ ме прими“ (Псалм 26:10). Ако навистина знаеш што поучува Библијата, ако веруваш во тоа, ако ги споделуваш своите верувања со другите и, над сѐ, ако живееш во склад со тие верувања, ти ќе покажеш дека си ја направил вистината твоја своина.

[Фусноти]

[Слика на страница 29]

Докажи си ја вистината себеси со тоа што самиот ќе истражуваш и ќе имаш лична студија