യോഹന്നാനു ലഭിച്ച വെളിപാട്‌
5 പിന്നെ സിംഹാസനത്തിൽ ഇരിക്കുന്നവന്റെ+ വലതുകൈയിൽ, രണ്ടു വശത്തും* എഴുത്തുള്ള ഒരു ചുരുൾ കണ്ടു. അത്‌ ഏഴു മുദ്രകൊണ്ട്‌ മുദ്രയിട്ടുവെച്ചിരുന്നു.* 2 “മുദ്ര പൊട്ടിക്കാനും ചുരുൾ നിവർക്കാനും യോഗ്യൻ ആരാണ്‌” എന്ന്‌ ഉച്ചത്തിൽ വിളിച്ചുചോദിക്കുന്ന ശക്തനായ ഒരു ദൈവദൂതനെയും ഞാൻ കണ്ടു. 3 എന്നാൽ സ്വർഗത്തിലോ ഭൂമിയിലോ ഭൂമിക്കു കീഴെയോ ഉള്ള ആർക്കും ചുരുൾ നിവർക്കാനോ അതു വായിക്കാനോ കഴിഞ്ഞില്ല. 4 ചുരുൾ നിവർക്കാനോ അതു വായിക്കാനോ യോഗ്യതയുള്ള ആരെയും കാണാഞ്ഞതുകൊണ്ട്‌ ഞാൻ കുറെ നേരം കരഞ്ഞു. 5 അപ്പോൾ മൂപ്പന്മാരിൽ ഒരാൾ എന്നോടു പറഞ്ഞു: “കരയേണ്ടാ. ഇതാ, യഹൂദാഗോത്രത്തിലെ സിംഹവും+ ദാവീദിന്റെ വേരും+ ആയവൻ വിജയിച്ചിരിക്കുന്നു.+ അതുകൊണ്ട്‌ ചുരുൾ നിവർക്കാനും അതിന്റെ ഏഴു മുദ്ര പൊട്ടിക്കാനും അദ്ദേഹത്തിനു കഴിയും.”
6 പിന്നെ ഞാൻ സിംഹാസനത്തിനു സമീപം* നാലു ജീവികൾക്കും മൂപ്പന്മാർക്കും+ നടുവിൽ ഒരു കുഞ്ഞാടു+ നിൽക്കുന്നതു കണ്ടു. അതിനെ കണ്ടാൽ അറുക്കപ്പെട്ടതായി തോന്നും.+ അതിന്‌ ഏഴു കൊമ്പും ഏഴു കണ്ണും ഉണ്ടായിരുന്നു. ഈ കണ്ണുകൾ ദൈവം മുഴുഭൂമിയിലേക്കും അയച്ച ദൈവത്തിന്റെ ഏഴ്‌ ആത്മാക്കളെ+ പ്രതീകപ്പെടുത്തുന്നു. 7 ഉടനെ കുഞ്ഞാടു ചെന്ന്‌ സിംഹാസനത്തിൽ ഇരിക്കുന്നവന്റെ+ വലതുകൈയിൽനിന്ന്‌ ചുരുൾ വാങ്ങി. 8 കുഞ്ഞാട്‌ അതു വാങ്ങിയപ്പോൾ നാലു ജീവികളും 24 മൂപ്പന്മാരും+ കുഞ്ഞാടിന്റെ മുമ്പാകെ കുമ്പിട്ടു. മൂപ്പന്മാർ ഓരോരുത്തരും ഓരോ കിന്നരവും സുഗന്ധക്കൂട്ടു നിറച്ച സ്വർണപാത്രങ്ങളും പിടിച്ചിരുന്നു. (വിശുദ്ധരുടെ പ്രാർഥനയെയാണു സുഗന്ധക്കൂട്ടു സൂചിപ്പിക്കുന്നത്‌.)+ 9 ഇങ്ങനെയൊരു പുതിയ പാട്ട്‌+ അവർ പാടുന്നുണ്ടായിരുന്നു: “ചുരുൾ എടുത്ത്‌ അതിന്റെ മുദ്ര പൊട്ടിക്കാൻ അങ്ങ്‌ യോഗ്യൻ. കാരണം അങ്ങ്‌ അറുക്കപ്പെട്ടു; അങ്ങയുടെ രക്തത്താൽ അങ്ങ്‌ എല്ലാ ഗോത്രങ്ങളിലും ഭാഷകളിലും വംശങ്ങളിലും ജനതകളിലും നിന്നുള്ള ആളുകളെ+ ദൈവത്തിനുവേണ്ടി വിലയ്‌ക്കു വാങ്ങി,+ 10 അവരെ നമ്മുടെ ദൈവത്തിനു പുരോഹിതന്മാരും ഒരു രാജ്യവും+ ആക്കിവെച്ചു. അവർ രാജാക്കന്മാരായി ഭൂമിയെ ഭരിക്കും.”+
11 പിന്നെ ഞാൻ സിംഹാസനത്തിന്റെയും ജീവികളുടെയും മൂപ്പന്മാരുടെയും ചുറ്റും അനേകം ദൈവദൂതന്മാരെ കണ്ടു; അവരുടെ ശബ്ദവും കേട്ടു. അവരുടെ എണ്ണം പതിനായിരംപതിനായിരവും ആയിരമായിരവും ആയിരുന്നു.+ 12 അവർ ഉറക്കെ ഇങ്ങനെ പറഞ്ഞുകൊണ്ടിരുന്നു: “അറുക്കപ്പെട്ട കുഞ്ഞാടു+ ശക്തിയും ധനവും ജ്ഞാനവും ബലവും ബഹുമാനവും മഹത്ത്വവും സ്‌തുതിയും ലഭിക്കാൻ യോഗ്യൻ.”+
13 സ്വർഗത്തിലും ഭൂമിയിലും ഭൂമിക്കു കീഴെയും+ സമുദ്രത്തിലും ഉള്ള എല്ലാ ജീവികളും, അവയിലുള്ളതെല്ലാം ഒന്നടങ്കം, ഇങ്ങനെ പറയുന്നതു ഞാൻ കേട്ടു: “സിംഹാസനത്തിൽ ഇരിക്കുന്നവനും+ കുഞ്ഞാടിനും+ എന്നുമെന്നേക്കും+ സ്‌തുതിയും ബഹുമാനവും+ മഹത്ത്വവും ബലവും ലഭിക്കട്ടെ.” 14 നാലു ജീവികളും “ആമേൻ!” എന്നു പറഞ്ഞു. മൂപ്പന്മാർ കുമ്പിട്ട്‌ ദൈവത്തെ ആരാധിച്ചു.