യശയ്യ
25 യഹോവേ, അങ്ങാണ്‌ എന്റെ ദൈവം.
ഞാൻ അങ്ങയെ പുകഴ്‌ത്തുന്നു, അങ്ങയുടെ പേര്‌ സ്‌തുതിക്കുന്നു.
പണ്ടുപണ്ടേ നിശ്ചയിച്ചുവെച്ച കാര്യങ്ങൾ,+
അത്ഭുതകാര്യങ്ങൾതന്നെ, അങ്ങ്‌ ചെയ്‌തിരിക്കുന്നല്ലോ;+
ആശ്രയയോഗ്യനായ അങ്ങ്‌ അതെല്ലാം വിശ്വസ്‌തതയോടെ+ ചെയ്‌തിരിക്കുന്നു.
2 അങ്ങ്‌ ഒരു നഗരത്തെ വെറും കൽക്കൂമ്പാരമാക്കി,
കോട്ടമതിലുള്ള പട്ടണത്തെ തകർത്തുതരിപ്പണമാക്കി.
അന്യദേശക്കാരന്റെ കോട്ട ഇപ്പോൾ ഒരു നഗരമല്ല;
ഇനി ഒരിക്കലും അതു പുതുക്കിപ്പണിയില്ല.
3 അതുകൊണ്ട്‌, ശക്തരായ ഒരു ജനം അങ്ങയെ മഹത്ത്വപ്പെടുത്തും,
മർദകരായ ജനതകളുടെ നഗരം അങ്ങയെ ഭയപ്പെടും.+
4 അങ്ങ്‌ സാധുക്കൾക്ക്‌ ഒരു കോട്ടയായിത്തീർന്നിരിക്കുന്നു;
പാവപ്പെട്ടവർക്കു കഷ്ടതയിൽ ഒരു അഭയസ്ഥാനവും,+
പേമാരിയിൽ ഒരു സംരക്ഷണവും,
കൊടുംചൂടിൽ ഒരു തണലും തന്നെ.+
മതിലിൽ ആഞ്ഞടിക്കുന്ന കൊടുംമഴപോലെ ക്രൂരരായ അധികാരികൾ കോപം ചൊരിയുമ്പോൾ,
5 വരണ്ടുണങ്ങിയ ദേശത്തെ കൊടുംചൂടുപോലെ,
അപരിചിതരുടെ ആരവം അങ്ങ്‌ അടക്കിക്കളയുന്നു.
മേഘത്തിന്റെ തണൽ കൊടുംചൂടിനെ ശമിപ്പിക്കുന്നതുപോലെ,
അങ്ങ്‌ മർദകരുടെ ഗാനങ്ങൾ നിശ്ശബ്ദമാക്കുന്നു.
6 സൈന്യങ്ങളുടെ അധിപനായ യഹോവ ഈ പർവതത്തിൽ+ എല്ലാ ജനങ്ങൾക്കുംവേണ്ടി ഒരു വിരുന്ന്‌ ഒരുക്കും;+
വിശിഷ്ടമായ വിഭവങ്ങളും
മേത്തരം* വീഞ്ഞും
മജ്ജ നിറഞ്ഞ സമ്പുഷ്ടമായ വിഭവങ്ങളും
അരിച്ചെടുത്ത മേത്തരം വീഞ്ഞും വിളമ്പും.
7 എല്ലാ ജനങ്ങളെയും പൊതിഞ്ഞിരിക്കുന്ന കച്ച ദൈവം ഈ പർവതത്തിൽവെച്ച്‌ നീക്കിക്കളയും,
എല്ലാ ജനതകളുടെയും മേൽ നെയ്‌തിട്ടിരിക്കുന്ന പുതപ്പ്‌* എടുത്തുമാറ്റും.
8 ദൈവം മരണത്തെ എന്നേക്കുമായി ഇല്ലാതാക്കും,*+
പരമാധികാരിയാം കർത്താവായ യഹോവ എല്ലാ മുഖങ്ങളിൽനിന്നും കണ്ണീർ തുടച്ചുമാറ്റും.+
തന്റെ ജനത്തിന്റെ മേലുള്ള നിന്ദ ഭൂമിയിൽനിന്ന്‌ നീക്കിക്കളയും;
യഹോവയാണ്‌ ഇതു പറഞ്ഞിരിക്കുന്നത്‌.
9 അന്ന്‌ അവർ പറയും:
“ഇതാ, നമ്മുടെ ദൈവം!+
ഇതാ, യഹോവ!
നമ്മൾ ദൈവത്തിൽ പ്രത്യാശ വെച്ചിരിക്കുന്നു,
ദൈവം നമ്മളെ രക്ഷിക്കുന്നതിനാൽ നമുക്കു സന്തോഷിക്കാം, നമുക്ക്‌ ആനന്ദിക്കാം.”+
10 യഹോവ തന്റെ കൈ ഈ പർവതത്തിന്മേൽ വെക്കും;+
വയ്‌ക്കോൽ ചാണകത്തിൽ ഇട്ട്‌ ചവിട്ടിയരയ്‌ക്കുന്നതുപോലെ,
മോവാബിനെ സ്വദേശത്തുവെച്ച്‌ ചവിട്ടിയരയ്‌ക്കും.+
11 നീന്തുന്നവൻ തുഴയാൻ കൈ വീശുന്നതുപോലെ,
ദൈവം കൈ വീശി അതിനെ അടിക്കും.
വിദഗ്‌ധമായി കൈകൾ ചലിപ്പിച്ച്‌
ദൈവം അതിന്റെ അഹങ്കാരം ശമിപ്പിക്കും.+
12 ഉയർന്ന കോട്ടനഗരമേ,
സംരക്ഷണമതിലുകളുള്ള നിന്നെ ദൈവം പൊളിച്ചുകളയും;
ദൈവം അത്‌ ഇടിച്ച്‌ നിരപ്പാക്കും; പൊടിയിലേക്കു തള്ളിയിടും.