ബൈബി​ളി​ന്റെ വീക്ഷണം

“പുതി​യ​നി​യമം” ശേമ്യ​വി​രോ​ധ​മു​ള്ള​തോ?

ഒരു അമേരി​ക്കൻ സുവി​ശേ​ഷ​പ്ര​സം​ഗകൻ ഒരിക്കൽ ഇങ്ങനെ പ്രസ്‌താ​വി​ച്ചു: “വ്യവസ്ഥാ​പിത സഭ അതിന്റെ ചരി​ത്ര​ത്തി​ന്റെ അധിക​ഭാ​ഗ​ത്തും പാപം ചെയ്‌തി​രി​ക്കു​ന്നു, വിശേ​ഷിച്ച്‌ യഹൂദ​രായ ആളുകൾക്കെ​തി​രെ കാണിച്ച ശേമ്യ​വി​രോ​ധം നിമിത്തം ന്യായ​വി​ധി​യിൽ അത്‌ ഉത്തരം പറയേ​ണ്ട​താ​യും വരും.”

ഇരുപ​താം നൂററാ​ണ്ടു​വരെ തുടർന്നു​വ​ന്നി​ട്ടുള്ള ശേമ്യ​വി​രോ​ധ​ത്തിന്‌ ഇത്ര ദീർഘ​വും ഹീനവും ആയ ഒരു ചരിത്രം ഉണ്ടായി​രു​ന്നത്‌ എന്തു​കൊണ്ട്‌? പുതി​യ​നി​യമം എന്നു വിളി​ക്ക​പ്പെ​ടുന്ന ക്രിസ്‌തീയ ഗ്രീക്ക്‌ തിരു​വെ​ഴു​ത്തു​കളെ ചിലർ കുററ​പ്പെ​ടു​ത്തു​ന്നു. ദൃഷ്ടാ​ന്ത​ത്തിന്‌, ഹാർവാർഡ്‌ ദൈവ​ശാ​സ്‌ത്ര സ്‌കൂ​ളി​ലെ ഡീനായ ക്രിസ്‌ററർ സ്‌റെ​റൻഡാൽ ഇങ്ങനെ അവകാ​ശ​പ്പെട്ടു: “യഹൂദർക്കെ​തി​രെ വിദ്വേ​ഷ​ത്തി​നുള്ള ‘ദിവ്യ’ അനുമ​തി​യാ​യി പുതി​യ​നി​യമ വാക്യങ്ങൾ ഉതകി​യി​രി​ക്കു​ന്നു . . . എന്നതു സുപ്ര​സി​ദ്ധ​വും പൊതു​വേ അംഗീ​ക​രി​ക്ക​പ്പെ​ടു​ന്ന​തു​മായ ഒരു വസ്‌തു​ത​യാണ്‌.” ഇതു പൊതു​വേ അംഗീ​ക​രി​ക്ക​പ്പെ​ടു​ന്ന​താ​യി​രി​ക്കാ​മെ​ങ്കി​ലും വാസ്‌ത​വ​ത്തിൽ അതു സത്യമാ​ണോ?

യേശു​വി​ന്റെ മരണത്തിന്‌ ആർ കുററം ചുമത്ത​പ്പെട്ടു?

“പുതി​യ​നി​യമ”ത്തിലെ ശേമ്യ​വി​രോ​ധ​ത്തി​ന്റെ തെളി​വാ​യി ഉദ്ധരി​ക്ക​പ്പെ​ടുന്ന ഒരു ഭാഗം മത്തായി 27:15-25 ആണ്‌. റോമൻ ഗവർണ​റായ പൊന്തി​യോസ്‌ പീലാ​ത്തോസ്‌ യേശു​വി​നെ വധിക്കണം എന്ന്‌ ഒരു യഹൂദ ജനക്കൂട്ടം ആവശ്യ​പ്പെ​ട്ട​താ​യി അവിടെ നമ്മോടു പറയ​പ്പെ​ട്ടി​രി​ക്കു​ന്നു, അവർ ഇങ്ങനെ പറയു​ക​പോ​ലും ചെയ്‌തു: “അവന്റെ രക്തം ഞങ്ങളു​ടെ​മേ​ലും ഞങ്ങളുടെ മക്കളു​ടെ​മേ​ലും വരട്ടെ.” ഒന്നാം നൂററാ​ണ്ടി​ലെ യഹൂദൻമാ​രെ​ല്ലാ​വ​രും യേശു​വി​ന്റെ മരണത്തിന്‌ ഉത്തരവാ​ദി​ക​ളാ​യി​രു​ന്നെ​ന്നും അവർ എന്നേക്കും ക്രിസ്‌തു​വി​ന്റെ ഘാതകർ എന്ന്‌ അറിയ​പ്പെ​ട​ണ​മെ​ന്നും “പുതി​യ​നി​യമം” അവിടെ പഠിപ്പി​ക്കു​ക​യാ​യി​രു​ന്നോ?

ഒന്നാമ​താ​യി, യേശു​വി​ന്റെ ശുശ്രൂ​ഷ​ക്കാ​ലത്തു യഹൂദൻമാ​രിൽ മിക്കവ​രും അവിടു​ത്തോട്‌ എങ്ങനെ​യാ​ണു പ്രതി​ക​രി​ച്ചത്‌? യഹൂദ ജനക്കൂ​ട്ട​ത്തി​ന്റെ ഇടയിൽ, വിശേ​ഷിച്ച്‌ തന്റെ ശൂശ്രൂ​ഷ​യിൽ അധിക​പ​ങ്കും നിർവ​ഹിച്ച ഗലീല​യിൽ യേശു വളരെ​യ​ധി​കം ജനസമ്മ​ത​നാ​യി​രു​ന്നു​വെന്ന്‌ “പുതി​യ​നി​യമം” വെളി​പ്പെ​ടു​ത്തു​ന്നു. (യോഹ​ന്നാൻ 7:31; 8:30; 10:42; 11:45) യേശു​വി​ന്റെ അറസ്‌റ​റി​നും വധത്തി​നും കേവലം അഞ്ചു ദിവസം മുമ്പ്‌, ഒരു യഹൂദ ജനക്കൂട്ടം യേശു​വി​നെ മിശിഹ എന്നനി​ല​യിൽ യെരൂ​ശ​ലേ​മി​ലേക്കു സ്വാഗതം ചെയ്‌തു.—മത്തായി 21:6-11.

അങ്ങനെ​യെ​ങ്കിൽ യേശു​വി​നെ കൊല്ലാൻ ആരാണ്‌ ആഗ്രഹി​ച്ചത്‌? മുഖ്യ​പു​രോ​ഹി​തൻമാ​രു​ടെ​യും പല പരീശൻമാ​രു​ടെ​യും സദൂക്യ​രു​ടെ​യും ഇടയിൽ യേശു സമ്മതന​ല്ലാ​യി​രു​ന്നു​വെന്ന്‌ “പുതി​യ​നി​യമം” കുറി​ക്കൊ​ള്ളു​ന്നു, കാരണം അവിടുന്ന്‌ അവരുടെ കപടഭ​ക്തി​യെ വെളി​പ്പെ​ടു​ത്തി. (മത്തായി 21:33-46; 23:1-36)a യേശു​വി​ന്റെ മുഖ്യ എതിരാ​ളി​ക​ളിൽ ഒരുവ​നാ​യി​രു​ന്നു മഹാപു​രോ​ഹി​ത​നായ കയ്യഫാസ്‌. ആലയത്തിൽനി​ന്നു പണമി​ട​പാ​ടു​കാ​രെ യേശു പുറത്താ​ക്കി​യ​പ്പോൾ അയാൾക്കു വ്യക്തി​പ​ര​മായ സാമ്പത്തിക നഷ്ടം നേരിട്ടു എന്നതിനു സംശയ​മില്ല. (മർക്കൊസ്‌ 11:15-18) കൂടാതെ, യഹൂദ ജനങ്ങളു​ടെ ഇടയിലെ യേശു​വി​ന്റെ ജനസമ്മതി ഒടുവിൽ റോമാ​ക്കാ​രു​ടെ ഇടപെ​ട​ലി​ലേ​ക്കും തന്റെ വ്യക്തി​പ​ര​മായ അധികാ​ര​ന​ഷ്ട​ത്തി​ലേ​ക്കും നയിക്കു​മെന്നു കയ്യഫാസ്‌ ഭയപ്പെട്ടു. (യോഹ​ന്നാൻ 11:45-53) അതു​കൊ​ണ്ടു മുഖ്യ​പു​രോ​ഹി​തൻമാ​രും മററു മതനേ​താ​ക്കൻമാ​രും യേശു​വി​ന്റെ മരണത്തി​നു പദ്ധതി​യി​ണ​ക്കു​ക​യും വധനിർവ​ഹ​ണ​ത്തി​നാ​യി യേശു​വി​നെ ഒരു റോമൻ കോട​തി​ക്കു കൈമാ​റു​ക​യും ചെയ്‌തു. (മത്തായി 27:1, 2; മർക്കൊസ്‌ 15:1; ലൂക്കൊസ്‌ 22:66–23:1) യഹൂദ ജനതതി​ക്കി​ട​യി​ലെ യേശു​വി​ന്റെ ജനസമ്മതി അവിടു​ത്തെ മരണത്തി​ലേക്കു നയിച്ചു എന്നത്‌ എത്രയോ വിരോ​ധാ​ഭാ​സ​മാണ്‌!

യേശു​വി​ന്റെ ജനപ്രീ​തി​യു​ടെ കാഴ്‌ച​പ്പാ​ടിൽ ഒരു യഹൂദ ജനക്കൂ​ട്ട​ത്തിന്‌ അവിടു​ത്തെ മരണത്തി​നാ​യി എങ്ങനെ മുറവി​ളി കൂട്ടാൻ കഴിയു​മാ​യി​രു​ന്നു? യേശു​വി​നെ പിന്തു​ണ​ച്ചി​രു​ന്ന​വ​രിൽ മിക്കവ​രും ഗലീലാ​ക്കാ​രാ​യി​രു​ന്ന​തു​കൊ​ണ്ടു യേശു മരിച്ചു​കാ​ണാൻ ആഗ്രഹി​ച്ചവർ യഹൂദ്യ നിവാ​സി​കൾ ആയിരി​ക്കാൻ സാധ്യ​ത​യുണ്ട്‌. ഗലീലാ​ക്കാർ സ്വഭാ​വ​ത്തിൽ ഊഷ്‌മ​ള​ഹൃ​ദ​യ​രും താഴ്‌മ​യു​ള്ള​വ​രും വളച്ചു​കെ​ട്ടി​ല്ലാ​ത്ത​വ​രും ആയിരി​ക്കാൻ ചായ്‌വു കാണിച്ചു, അതേസ​മയം യഹൂദ്യ നിവാ​സി​കൾ അഹങ്കാ​രി​ക​ളും ധനിക​രും ഉയർന്ന വിദ്യാ​ഭ്യാ​സ​മു​ള്ള​വ​രും ആയിരി​ക്കാൻ പ്രവണത കാട്ടി, പ്രത്യേ​കി​ച്ചു യെരൂ​ശ​ലേ​മിൽ ഉള്ളവർ. “മഹാപു​രോ​ഹി​തൻമാ​രും മൂപ്പൻമാ​രും” ജനക്കൂ​ട്ട​ത്തിന്‌ എരിവു കേററി​യെന്നു മത്തായി വെളി​പ്പെ​ടു​ത്തു​ന്നതു ശ്രദ്ധേ​യ​മാണ്‌. (മത്തായി 27:20) ജനക്കൂ​ട്ടത്തെ ഈ വിധത്തിൽ ഉത്തേജി​പ്പി​ക്കാൻ എന്തു നുണയാണ്‌ അവർ പറഞ്ഞി​രി​ക്കാൻ സാധ്യ​ത​യു​ള്ളത്‌? യേശു​വി​ന്റെ വിചാ​ര​ണ​സ​മ​യത്ത്‌ അവർ നേരത്തെ അവതരി​പ്പി​ച്ച​തും യേശു​വി​ന്റെ വധസമ​യത്തു ആവർത്തി​ക്ക​പ്പെ​ട്ട​തും ആയ നുണയാ​യി​രു​ന്നോ അത്‌, അതായത്‌ താൻ ആലയം നശിപ്പി​ക്കു​മെന്നു യേശു പറഞ്ഞതാ​ണെ​ന്നുള്ള സംഗതി?—മർക്കൊസ്‌ 14:57, 58; 15:29.b

സാമൂ​ഹിക ഉത്തരവാ​ദി​ത്വം

ഈ യഹൂദ ജനക്കൂട്ടം മുഴു യഹൂദ ജനതയും അല്ലായി​രു​ന്നെ​ങ്കിൽ, അമ്പതു ദിവസം കഴിഞ്ഞു വാരോ​ത്സ​വ​ത്തി​നു യെരൂ​ശ​ലേ​മിൽ കൂടിവന്ന യഹൂദൻമാ​രു​ടെ ഒരു കൂട്ട​ത്തോ​ടു സംസാ​രി​ക്കവേ “നിങ്ങൾ അവനെ അധർമ്മി​ക​ളു​ടെ കയ്യാൽ തറെപ്പി​ച്ചു കൊന്നു” എന്ന്‌ അപ്പോ​സ്‌ത​ല​നായ പത്രോസ്‌ പറഞ്ഞത്‌ എന്തു​കൊ​ണ്ടാ​യി​രു​ന്നു? (പ്രവൃ​ത്തി​കൾ 2:22, 23) യേശു​വി​ന്റെ വധത്തി​ലേക്കു നയിച്ച സംഭവ​ങ്ങ​ളു​മാ​യി അവരിൽ മിക്കവർക്കും ഒരു ബന്ധവും ഉണ്ടായി​രു​ന്നി​ല്ലെന്നു പത്രോ​സി​നു നിശ്ചയ​മാ​യും അറിയാ​മാ​യി​രു​ന്നു. അതു​കൊ​ണ്ടു പത്രോസ്‌ എന്താണ്‌ അർഥമാ​ക്കി​യത്‌?

തിരു​വെ​ഴു​ത്തു​കൾ പറയു​ന്ന​ത​നു​സ​രിച്ച്‌, പ്രായ​ശ്ചി​ത്തം ചെയ്യാത്ത ഒരു കൊല​പാ​തകം കൊല​പാ​ത​കി​യു​ടെ​മേൽ മാത്രമല്ല അയാളെ ന്യായം വിധി​ക്കാൻ പിഴവു കാട്ടിയ സമൂഹ​ത്തി​ന്റെ മേലും കുററം വരുത്തി​വെച്ചു. (ആവർത്ത​ന​പു​സ്‌തകം 21:1-9) ദൃഷ്ടാ​ന്ത​ത്തിന്‌, തങ്ങളുടെ ഇടയി​ലു​ണ്ടാ​യി​രുന്ന ഒരു കൂട്ടം കൊല​പാ​ത​കി​കളെ ശിക്ഷി​ക്കാൻ പരാജ​യ​പ്പെ​ട്ട​തി​നാൽ ഒരിക്കൽ മുഴു ബെന്യാ​മീൻ ഗോ​ത്ര​വും രക്തപാ​ത​ക​മു​ള്ള​താ​യി വിധി​ക്ക​പ്പെട്ടു. ഈ ഗോ​ത്ര​ത്തി​ലെ ബഹുഭൂ​രി​പ​ക്ഷം​പേ​രും കൊല​പാ​ത​ക​ത്തിൽ നേരിട്ട്‌ ഉൾപ്പെ​ട്ടി​രു​ന്നി​ല്ലെ​ങ്കി​ലും ഈ കുററ​കൃ​ത്യ​ത്തെ പൊറു​ത്ത​തി​നാൽ ശിക്ഷ കൊടു​ക്കാ​തെ അവർ അതിനെ വിട്ടു​ക​ള​യു​ക​യാ​യി​രു​ന്നു, അതുവഴി ഒരളവ്‌ ഉത്തരവാ​ദി​ത്വം അവർ പേറു​ക​യും ചെയ്‌തു. (ന്യായാ​ധി​പൻമാർ 20:8-48) തീർച്ച​യാ​യും “മൗനം സമ്മതലക്ഷണ”മാണെന്നു കുറി​ക്കൊ​ണ്ടി​രി​ക്കു​ന്നു.

സമാന​മാ​യ ഒരു വിധത്തിൽ, ഒന്നാം നൂററാ​ണ്ടി​ലെ യഹൂദ ജനത തങ്ങളുടെ രക്തപാ​ത​കി​ക​ളായ നേതാ​ക്കൻമാ​രു​ടെ കുററ​കൃ​ത്യ​ത്തിൽ സമ്മതം പ്രകട​മാ​ക്കി. മുഖ്യ​പു​രോ​ഹി​തൻമാ​രു​ടെ​യും പരീശൻമാ​രു​ടെ​യും മരണക​ര​മായ പദ്ധതി​കളെ പൊറു​ക്കു​ക​വഴി മുഴു​ജ​ന​ത​യും ഉത്തരവാ​ദി​ത്വ​ത്തിൽ പങ്കുപ​ററി. അതു​കൊ​ണ്ടാ​യി​രു​ന്നു തന്റെ യഹൂദ സദസ്സി​നോട്‌ അനുതാ​പം പ്രകട​മാ​ക്കാൻ പത്രോസ്‌ ആവശ്യ​പ്പെ​ട്ടത്‌ എന്നതിനു സംശയ​മില്ല.c

മിശിഹ എന്നനി​ല​യിൽ യേശു​വി​നെ തള്ളിക്ക​ള​ഞ്ഞ​തി​ന്റെ പരിണ​ത​ഫ​ലങ്ങൾ എന്തൊ​ക്കെ​യാ​യി​രു​ന്നു? യെരൂ​ശ​ലേം നഗര​ത്തോ​ടു യേശു ഇപ്രകാ​രം പറഞ്ഞു: “നിങ്ങളു​ടെ ഭവനം [ആലയം] ശൂന്യ​മാ​യി​ത്തീ​രും.” (മത്തായി 23:37, 38) അതേ, ദൈവം തന്റെ സംരക്ഷണം പിൻവ​ലി​ച്ചു, തുടർന്നു റോമൻ സൈന്യ​ങ്ങൾ യെരൂ​ശ​ലേ​മി​നെ അതിന്റെ ആലയ​ത്തോ​ടൊ​പ്പം നശിപ്പി​ക്കു​ക​യും ചെയ്‌തു. തന്റെ സ്വത്തു​ക്ക​ളെ​ല്ലാം ധൂർത്ത​ടി​ക്കു​ന്ന​പക്ഷം ഒരു മമനു​ഷ്യ​ന്റെ കുടും​ബം അനന്തര​ഫ​ലങ്ങൾ അനുഭ​വി​ക്കു​ന്ന​തു​പോ​ലെ​തന്നെ, ദിവ്യ സംരക്ഷ​ണ​ത്തി​ന്റെ നഷ്ടം യേശു​വി​നെ കൊല്ലാൻ മുറവി​ളി കൂട്ടി​യ​വർക്കു മാത്രമല്ല, പിന്നെ​യോ അവരുടെ കുടും​ബ​ങ്ങൾക്കും അനുഭ​വ​പ്പെട്ടു. ഈ അർഥത്തിൽ യേശു​വി​ന്റെ രക്തം അവരു​ടെ​യും അവരുടെ മക്കളു​ടെ​യും​മേൽ വന്നു.—മത്തായി 27:25.

എന്നിരു​ന്നാ​ലും യേശു​വി​ന്റെ മരണത്തി​നു യഹൂദൻമാ​രു​ടെ ഭാവി തലമു​റകൾ പ്രത്യേക കുററം പേറു​മെന്ന്‌ “പുതി​യ​നി​യമ”ത്തിൽ യാതൊ​ന്നും പറയു​ന്നില്ല. നേരെ മറിച്ച്‌, അവരുടെ പൂർവ​പി​താ​വായ അബ്രാ​ഹാ​മി​നോ​ടുള്ള സ്‌നേഹം നിമിത്തം ക്രിസ്‌ത്യാ​നി​ക​ളാ​യി​ത്തീ​രാ​നുള്ള പ്രഥമാ​വ​സരം അവർക്കു നൽകി​ക്കൊ​ണ്ടു ദൈവം യഹൂദൻമാ​രോ​ടു പ്രത്യേക പരിഗണന കാട്ടി. (പ്രവൃ​ത്തി​കൾ 3:25, 26; 13:46; റോമർ 1:16; 11:28) ഒടുവിൽ ഈ അവസരം യഹൂദ​ര​ല്ലാ​ത്ത​വർക്കു വെച്ചു​നീ​ട്ട​പ്പെ​ട്ട​പ്പോൾ ദേശീ​യോ​ത്ഭ​വ​ത്തി​ന്റെ അടിസ്ഥാ​ന​ത്തിൽ ദൈവം ഏതു വ്യക്തി​യോ​ടും ഇടപെ​ടു​ന്നതു നിറുത്തി. പത്രോസ്‌ ഇങ്ങനെ പറഞ്ഞു: “ദൈവ​ത്തി​ന്നു മുഖപ​ക്ഷ​മില്ല എന്നും ഏതു ജാതി​യി​ലും അവനെ ഭയപ്പെട്ടു നീതി പ്രവർത്തി​ക്കു​ന്ന​വനെ അവൻ അംഗീ​ക​രി​ക്കു​ന്നു എന്നും ഞാൻ ഇപ്പോൾ യഥാർത്ഥ​മാ​യി ഗ്രഹി​ക്കു​ന്നു.” (പ്രവൃ​ത്തി​കൾ 10:34, 35) അപ്പോ​സ്‌ത​ല​നായ പൗലോസ്‌ പിന്നീട്‌ ഇപ്രകാ​രം എഴുതി: “യെഹൂദൻ എന്നും യവനൻ എന്നും വ്യത്യാ​സ​മില്ല.” (റോമർ 10:12) അപ്പോൾ യഹൂദൻമാർക്കു യഹൂദ​ര​ല്ലാ​ത്ത​വ​രെ​പ്പോ​ലെ​തന്നെ ദൈവ​ത്തി​ന്റെ മുമ്പാകെ ഒരേ അന്തസ്സ്‌ ഉണ്ടായി​രു​ന്നു, അത്‌ ഇന്നും സത്യമാണ്‌.—യെഹെ​സ്‌കേൽ 18:20 താരത​മ്യം ചെയ്യുക.

ക്രൈ​സ്‌ത​വ​ലോ​ക​ത്തിൽ ശേമ്യ​വി​രോ​ധം ഉള്ളതെ​ന്തു​കൊണ്ട്‌?

അതു​കൊണ്ട്‌ “പുതി​യ​നി​യമം” ശേമ്യ​വി​രോ​ധ​മു​ള്ളതല്ല എന്നു കാണാൻ കഴിയും. പകരം, ഒരു യഹൂദ​നാ​യി ജീവിച്ചു മരിച്ച, മോ​ശൈക ന്യായ​പ്ര​മാ​ണ​ത്തി​ലെ തത്ത്വങ്ങ​ളോട്‌ ആദരവു പുലർത്താൻ തന്റെ യഹൂദ അനുഗാ​മി​കളെ പഠിപ്പിച്ച ഒരു മമനു​ഷ്യ​ന്റെ പഠിപ്പി​ക്ക​ലു​കൾ “പുതി​യ​നി​യമം” രേഖ​പ്പെ​ടു​ത്തു​ന്നു. (മത്തായി 5:17-19) “പുതി​യ​നി​യമ”ത്തെ കുററ​പ്പെ​ടു​ത്തേ​ണ്ട​ത​ല്ലെ​ങ്കിൽ, ക്രൈ​സ്‌ത​വ​ലോ​ക​ത്തിൽ ഇത്രയ​ധി​കം സ്ഥായി​യായ ശേമ്യ​വി​രോ​ധം ഉള്ളതെ​ന്തു​കൊണ്ട്‌?

ക്രിസ്‌ത്യാ​നി​ത്വ​ത്തെ​ത്തന്നെ കുററ​പ്പെ​ടു​ത്താ​വു​ന്നതല്ല. യൂദാ​യു​ടെ കാലത്ത്‌, “ദൈവ​ത്തി​ന്റെ കൃപയെ ദുഷ്‌കാ​മ​വൃ​ത്തി​ക്കു ഹേതു​വാ​ക്കിയ” വ്യാജ​ക്രി​സ്‌ത്യാ​നി​ക​ളു​ടേ​തി​നോ​ടു സമാന​മായ ഒരു വിധത്തിൽ ചരി​ത്ര​ത്തി​ലു​ട​നീ​ളം ക്രിസ്‌ത്യാ​നി​കൾ എന്ന്‌ അവകാ​ശ​പ്പെ​ട്ടവർ ക്രിസ്‌തു​വി​ന്റെ നാമത്തെ മതഭ്രാ​ന്തി​ന്റെ​യും മുൻവി​ധി​യു​ടെ​യും ചെളി​ക്കു​ണ്ടി​ലേക്കു വലിച്ചി​ഴ​ച്ചി​രി​ക്കു​ന്നു. (യൂദാ 4) അതു​കൊണ്ട്‌, പേരിൽ മാത്രം ക്രിസ്‌ത്യാ​നി​ക​ളാ​യി​രി​ക്കുന്ന ആളുക​ളു​ടെ സ്വാർഥ മുൻവി​ധി​കൾ നിമി​ത്ത​മാ​ണു ക്രൈ​സ്‌ത​വ​ലോ​ക​ത്തിൽ ശേമ്യ​വി​രോ​ധം ഉണ്ടായി​രി​ക്കു​ന്നത്‌.

രസാവ​ഹ​മാ​യി ചിലർ തന്റെ നാമത്തിൽ എല്ലാത്തരം വീര്യ​പ്ര​വൃ​ത്തി​ക​ളും പ്രവർത്തി​ച്ച​താ​യി അവകാ​ശ​പ്പെ​ടു​മെ​ന്നും, എന്നാൽ അവർ യഥാർഥ​ത്തിൽ “അധർമ്മം പ്രവർത്തി​ക്കു​ന്നവർ” ആയിരി​ക്കു​മെ​ന്നും യേശു​തന്നെ മുൻകൂ​ട്ടി​പ്പ​റഞ്ഞു, അവർ അവിടു​ത്തെ സ്‌നേ​ഹി​തരേ അല്ല! (മത്തായി 7:21-23) തങ്ങളുടെ വിദ്വേ​ഷ​ങ്ങൾക്കും മുൻവി​ധി​കൾക്കും ഒരു ന്യായീ​ക​ര​ണ​മാ​യി “പുതി​യ​നി​യമ”ത്തെ ഉപയോ​ഗി​ക്കാൻ ഇവരിൽ പലരും ശ്രമി​ച്ചി​ട്ടുണ്ട്‌. എന്നാൽ ന്യായ​ബോ​ധ​മുള്ള ആളുകൾക്ക്‌ ആ പൊള്ള​യായ നാട്യം മനസ്സി​ലാ​ക്കാൻ കഴിയും.

ശേമ്യ​വി​രോ​ധ​ത്തി​നു വ്യാജ​ക്രി​സ്‌ത്യാ​നി​കൾ ദൈവ​ത്തോട്‌ ഉത്തരം പറയേ​ണ്ടി​വ​രും. കള്ളപ്പണം നിലനിൽക്കു​ന്നതു യഥാർഥ പണത്തിന്റെ അസ്‌തി​ത്വ​ത്തെ ഖണ്ഡിക്കാ​ത്ത​തു​പോ​ലെ​തന്നെ അനുകരണ ക്രിസ്‌ത്യാ​നി​ക​ളു​ടെ അസ്‌തി​ത്വം തങ്ങളുടെ മുൻവി​ധി​കൾ നിമി​ത്തമല്ല, മറിച്ചു തങ്ങളുടെ സ്‌നേഹം നിമിത്തം അറിയ​പ്പെ​ടുന്ന യഥാർഥ ക്രിസ്‌ത്യാ​നി​കൾ ഉണ്ടെന്നുള്ള വസ്‌തു​തയെ തീർച്ച​യാ​യും ഒരു​പ്ര​കാ​ര​ത്തി​ലും ഇല്ലാതാ​ക്കു​ന്നില്ല. നിങ്ങളു​ടെ അടുത്തുള്ള യഹോ​വ​യു​ടെ സാക്ഷി​ക​ളു​ടെ രാജ്യ​ഹാ​ളിൽ അത്തരം ആളുക​ളു​മാ​യി എന്തു​കൊ​ണ്ടു പരിച​യ​പ്പെ​ട്ടു​കൂ​ടാ? (g93 8/8)

[അടിക്കു​റി​പ്പു​കൾ]

[22-ാം പേജിലെ ആകർഷ​ക​വാ​ക്യം]

ക്രൈസ്‌തവലോകത്തിലെ ശേമ്യ​വി​രോ​ധം നാമമാ​ത്ര ക്രിസ്‌ത്യാ​നി​ക​ളായ ആളുകൾ കൊണ്ടു​ന​ട​ക്കു​ന്ന​താണ്‌

[20-ാം പേജിലെ ചിത്രം]

യേശുവോ അവിടു​ത്തെ ശിഷ്യൻമാ​രോ ശേമ്യ​വി​രോ​ധത്തെ പ്രോ​ത്സാ​ഹി​പ്പി​ച്ചില്ല