ബൈബി​ളി​ന്റെ വീക്ഷണം

വിവാഹ ഇണയെ തിര​ഞ്ഞെ​ടു​ക്കേണ്ട വിധം

“വിവാ​ഹി​ത​യാ​കു​ന്ന​തി​നെ കുറിച്ചു നിങ്ങൾ ചിന്തി​ക്കാ​റു​ണ്ടോ?” എന്ന്‌ അവിവാ​ഹി​ത​യായ ഒരു സ്‌ത്രീ​യോ​ടു ചോദി​ച്ച​പ്പോൾ അവർ ഉടനെ പറഞ്ഞ മറുപടി ഇതാണ്‌: “ചിന്തി​ക്കാ​റു​ണ്ടോ എന്നോ, എപ്പോ​ഴും എനിക്ക്‌ അതുത​ന്നെ​യാണ്‌ ചിന്ത.”

ഏതാനും വാക്കു​ക​ളി​ലുള്ള ആ ഉത്തരം സ്‌നേ​ഹ​ത്തി​നും സൗഹൃ​ദ​ത്തി​നും വേണ്ടി ചില ആളുകൾ എത്രമാ​ത്രം കൊതി​ക്കു​ന്നു എന്നു വ്യക്തമാ​യി കാട്ടി​ത്ത​രു​ന്നു. ഒരു വിവാഹ പങ്കാളി​യെ കണ്ടെത്തുക എന്നത്‌ ജീവി​ത​ത്തിൽ ഏറ്റവും പ്രാധാ​ന്യം അർഹി​ക്കുന്ന സംഗതി​ക​ളിൽ ഒന്നായാ​ണു പലരും കാണു​ന്നത്‌. അതു​കൊ​ണ്ടു തന്നെ, വിവാഹ ഇണയെ കണ്ടെത്തു​ന്ന​തിന്‌ ആളുകളെ സഹായി​ക്കുക എന്ന ലക്ഷ്യത്തിൽ ലോക​മെ​മ്പാ​ടും കൂണു​പോ​ലെ​യാണ്‌ സ്ഥാപന​ങ്ങ​ളും മറ്റും മുളച്ചു​പൊ​ങ്ങു​ന്നത്‌. എന്നിട്ടും, ലോക​ത്തി​ന്റെ പല ഭാഗങ്ങ​ളി​ലും, വിവാഹ പരാജ​യ​ങ്ങ​ളു​ടെ കൈപ്പു​നീർ രുചി​ക്കേ​ണ്ടി​വ​രു​ന്ന​വ​രു​ടെ എണ്ണവു​മാ​യി തട്ടിച്ചു നോക്കു​മ്പോൾ വിവാ​ഹ​ത്തിൽ വിജയം കാണു​ന്ന​വ​രു​ടെ എണ്ണം വളരെ കുറവാണ്‌.

വിവാഹ ഇണയെ സ്വയം തിര​ഞ്ഞെ​ടു​ക്കുന്ന രീതി​യാണ്‌ പാശ്ചാത്യ നാടു​ക​ളി​ലേത്‌. എന്നാൽ, ഏഷ്യയു​ടെ​യും ആഫ്രി​ക്ക​യു​ടെ​യും ചില ഭാഗങ്ങ​ളിൽ വീട്ടു​കാർ വിവാഹം ആലോ​ചിച്ച്‌ ഉറപ്പി​ക്കു​ന്ന​താണ്‌ ഇപ്പോ​ഴും നാട്ടു​ന​ടപ്പ്‌. അത്‌ ഏതുവി​ധ​ത്തി​ലാ​യാ​ലും, വിവാഹ ഇണയെ തിര​ഞ്ഞെ​ടു​ക്കുക എന്നത്‌ നിസ്സാ​ര​മാ​യി എടുക്കേണ്ട ഒരു കാര്യമല്ല. ജീവി​തത്തെ സന്തുഷ്ട​മോ ദുഃഖ​പൂർണ​മോ ആക്കി​യേ​ക്കാ​വുന്ന ഇതു​പോ​ലുള്ള തീരു​മാ​നങ്ങൾ അധിക​മില്ല. സ്‌നേഹം കളിയാ​ടുന്ന വിവാ​ഹ​ബന്ധം ജീവി​തത്തെ അങ്ങേയറ്റം അർഥ സമ്പുഷ്ട​വും സംതൃ​പ്‌തി​ദാ​യ​ക​വും ആക്കിത്തീർക്കു​ന്നു. നേരേ​മ​റിച്ച്‌, എപ്പോ​ഴും കലഹി​ക്കുന്ന സ്വര​ച്ചേർച്ച​യി​ല്ലാത്ത രണ്ടുപേർ തമ്മിലുള്ള വിവാ​ഹ​ബന്ധം എന്നും ഹൃദയ​വേ​ദ​ന​യും മാനസിക പിരി​മു​റു​ക്ക​വും മാത്രം സമ്മാനി​ക്കു​ന്ന​താ​യി​രി​ക്കും.—സദൃശ​വാ​ക്യ​ങ്ങൾ 21:19; 26:21.

തങ്ങളുടെ വിവാ​ഹ​ബന്ധം സന്തോ​ഷ​വും സംതൃ​പ്‌തി​യും നിറഞ്ഞ​താ​യി​രി​ക്കാൻ ആണ്‌ സത്യ​ക്രി​സ്‌ത്യാ​നി​ക​ളും ആഗ്രഹി​ക്കു​ന്നത്‌. എന്നാൽ അതോ​ടൊ​പ്പം, ദൈവത്തെ പ്രസാ​ദി​പ്പി​ക്കാ​നും അവനു ബഹുമതി കരേറ്റാ​നും കൂടെ അവർ ആഗ്രഹി​ക്കു​ന്നു. (കൊ​ലൊ​സ്സ്യർ 3:23) സ്രഷ്ടാ​വും വിവാഹ ക്രമീ​ക​ര​ണ​ത്തി​ന്റെ ഉപജ്ഞാ​താ​വും എന്ന നിലയിൽ, നമ്മുടെ യഥാർഥ ആവശ്യങ്ങൾ എന്താ​ണെ​ന്നും നമുക്ക്‌ അത്യു​ത്ത​മ​മാ​യി​രി​ക്കു​ന്നത്‌ എന്താ​ണെ​ന്നും ഏറ്റവും നന്നായി അറിയാ​വു​ന്നത്‌ ദൈവ​ത്തി​നാണ്‌. (ഉല്‌പത്തി 2:22-24; യെശയ്യാ​വു 48:17-19) മാത്രമല്ല, അവൻ ആയിര​ക്ക​ണ​ക്കി​നു വർഷങ്ങ​ളാ​യി കോടാ​നു​കോ​ടി വിവാ​ഹ​ജീ​വി​തങ്ങൾ—വിജയി​ച്ച​തും പരാജ​യ​മ​ട​ഞ്ഞി​ട്ടു​ള്ള​തു​മാ​യവ—കണ്ടിട്ടുണ്ട്‌. ഒരു വിവാ​ഹത്തെ വിജയി​പ്പി​ക്കു​ന്ന​തും പരാജ​യ​പ്പെ​ടു​ത്തു​ന്ന​തും ആയ കാര്യങ്ങൾ എന്തൊ​ക്കെ​യാ​ണെന്ന്‌ അവന്‌ അറിയാം. (സങ്കീർത്തനം 32:8) കാര്യ​ജ്ഞാ​ന​ത്തോ​ടെ​യുള്ള തിര​ഞ്ഞെ​ടു​പ്പു നടത്താൻ ഏതൊരു ക്രിസ്‌ത്യാ​നി​യെ​യും സഹായി​ക്കുന്ന വ്യക്തവും സുനി​ശ്ചി​ത​വു​മായ തത്ത്വങ്ങൾ തന്റെ വചനമായ ബൈബി​ളി​ലൂ​ടെ ദൈവം നൽകി​ത്ത​രു​ന്നുണ്ട്‌. ഈ തത്ത്വങ്ങ​ളിൽ ചിലത്‌ ഏവയാണ്‌?

ശാരീ​രിക സൗന്ദര്യം മാത്രം നോക്കി​യാൽ പോരാ

വിവാഹ ഇണയെ സ്വയം തിര​ഞ്ഞെ​ടു​ക്കാൻ സ്വാത​ന്ത്ര്യം ഉള്ളിട​ങ്ങ​ളിൽ രണ്ടുപേർ തമ്മിൽ കണ്ടുമു​ട്ടു​ന്നത്‌ തികച്ചും അവിചാ​രി​ത​മാ​യി​ട്ടാ​യി​രി​ക്കാം. അല്ലെങ്കിൽ സുഹൃ​ത്തു​ക്ക​ളോ കുടും​ബാം​ഗ​ങ്ങ​ളോ വഴി ആയിരി​ക്കാം അവർ പരിച​യ​പ്പെ​ടു​ന്നത്‌. പലപ്പോ​ഴും അനുരാ​ഗം തളിരി​ടു​ന്നത്‌ ശാരീ​രിക സൗന്ദര്യ​ത്തിൽ ആകൃഷ്ട​രാ​കു​മ്പോ​ഴാണ്‌. ശാരീ​രിക ആകർഷണം സ്വാഭാ​വി​ക​വും ശക്തവു​മായ ഒരു പ്രേരക ഘടകം ആണെങ്കി​ലും വിവാഹ ഇണയെ തിര​ഞ്ഞെ​ടു​ക്കു​മ്പോൾ ശാരീ​രിക ആകാര​ത്തിൽ മാത്രം ശ്രദ്ധ പതിപ്പി​ക്കാ​തി​രി​ക്കാൻ ബൈബിൾ ബുദ്ധി​യു​പ​ദേ​ശി​ക്കു​ന്നു.

“ലാവണ്യം വ്യാജ​വും സൌന്ദ​ര്യം വ്യർത്ഥ​വും ആകുന്നു; യഹോ​വാ​ഭ​ക്തി​യുള്ള സ്‌ത്രീ​യോ പ്രശം​സി​ക്ക​പ്പെ​ടും” എന്ന്‌ സദൃശ​വാ​ക്യ​ങ്ങൾ 31:30 പറയുന്നു. ‘ദൈവ​സ​ന്നി​ധി​യിൽ വില​യേ​റി​യ​താ​യി​രി​ക്കുന്ന സൌമ്യ​ത​യും സാവധാ​ന​ത​യു​മുള്ള മനസ്സു എന്ന അക്ഷയഭൂ​ഷ​ണത്തെ’ കുറിച്ച്‌ അപ്പൊ​സ്‌ത​ല​നായ പത്രൊസ്‌ പറയു​ക​യു​ണ്ടാ​യി. (1 പത്രൊസ്‌ 3:4) അതേ, ഭാവി ഇണയുടെ ആത്മീയ ഗുണങ്ങൾ—ദൈവ ഭക്തിയും ദൈവ സ്‌നേ​ഹ​വും ക്രിസ്‌തീയ വ്യക്തി​ത്വ​വും—ശാരീ​രിക സൗന്ദര്യ​ത്തെ​ക്കാൾ വളരെ​യേറെ പ്രാധാ​ന്യം അർഹി​ക്കു​ന്നു. വസ്‌തു​നി​ഷ്‌ഠ​മായ തിര​ഞ്ഞെ​ടു​പ്പു നടത്താൻ—ഒരേ ആത്മീയ ലക്ഷ്യങ്ങൾ ഉള്ള, ദൈവാ​ത്മാ​വി​ന്റെ ഫലങ്ങൾ നട്ടുവ​ളർത്താൻ ശ്രമി​ക്കുന്ന ഒരാളെ കണ്ടുപി​ടി​ക്കാൻ—സമയ​മെ​ടു​ക്കേ​ണ്ടതു മർമ​പ്ര​ധാ​ന​മാണ്‌. ഇത്‌ ഒരു സന്തുഷ്ട വിവാഹ ബന്ധത്തിനു വളരെ​യ​ധി​കം സംഭാവന ചെയ്യും.—സദൃശ​വാ​ക്യ​ങ്ങൾ 19:2; ഗലാത്യർ 5:22, 23.

‘കർത്താ​വിൽ മാത്രം വിവാഹം കഴിക്കുക’

ഒരേ വിശ്വാ​സ​ങ്ങ​ളും ലക്ഷ്യങ്ങ​ളും ഉള്ള ആളെ വിവാഹം കഴി​ക്കേ​ണ്ടതു വളരെ പ്രധാ​ന​മാണ്‌. വിവാ​ഹ​ജീ​വി​തം ഒരു യഥാർഥ വെല്ലു​വി​ളി​യാണ്‌. ഇരു കൂട്ടരും പെരു​മാ​റ്റ​ത്തി​ലും മനോ​ഭാ​വ​ത്തി​ലും പല പൊരു​ത്ത​പ്പെ​ടു​ത്ത​ലു​ക​ളും വരു​ത്തേ​ണ്ടത്‌ ആവശ്യ​മാണ്‌. ഇരുവർക്കും ഇപ്പോൾത്തന്നെ പൊതു​വാ​യി എത്രയ​ധി​കം വീക്ഷണ​ങ്ങ​ളും താത്‌പ​ര്യ​ങ്ങ​ളും ഉണ്ടോ, പൊരു​ത്ത​പ്പെട്ടു പോകാൻ അത്രയ​ധി​കം എളുപ്പ​മാ​യി​രി​ക്കും.

“അവിശ്വാ​സി​ക​ളോ​ടു ഇണയല്ലാ​പ്പിണ കൂടരു​തു” എന്ന്‌ അപ്പൊ​സ്‌ത​ല​നായ പൗലൊസ്‌ ക്രിസ്‌ത്യാ​നി​കളെ ഉദ്‌ബോ​ധി​പ്പി​ച്ച​തി​ന്റെ കാരണം മനസ്സി​ലാ​ക്കാൻ ഇതു നമ്മെ സഹായി​ക്കു​ന്നു. (2 കൊരി​ന്ത്യർ 6:14) ഒരേ വിശ്വാ​സ​മി​ല്ലാത്ത, ബൈബിൾ തത്ത്വങ്ങൾ ഒരേ രീതി​യിൽ മനസ്സി​ലാ​ക്കാത്ത രണ്ടുപേർ തമ്മിൽ വിവാഹം കഴിക്കു​ന്നത്‌ കലഹത്തി​നും പൊരു​ത്ത​ക്കേ​ടി​നും ഇടയാ​ക്കും എന്ന്‌ പൗലൊ​സിന്‌ അറിയാ​മാ​യി​രു​ന്നു. “കർത്താ​വിൽ വിശ്വ​സി​ക്കു​ന്ന​വ​നു​മാ​യി മാത്രമേ” വിവാഹം പാടുള്ളൂ എന്ന ഉദ്‌ബോ​ധനം ന്യായ​യു​ക്ത​മായ ഒന്നാണ്‌. (1 കൊരി​ന്ത്യർ 7:39) അത്‌ ദൈവ​ത്തി​ന്റെ ചിന്താ​ഗ​തി​യെ പ്രതി​ഫ​ലി​പ്പി​ക്കു​ന്നു. അത്‌ അനുസ​രി​ക്കു​ന്നത്‌ ജ്ഞാനപൂർവ​ക​മാണ്‌. കാരണം, ഗുരു​ത​ര​മായ പല കുഴപ്പ​ങ്ങ​ളും ഒഴിവാ​ക്കാൻ അതു സഹായി​ക്കും.—സുഭാ​ഷി​തങ്ങൾ [സദൃശ​വാ​ക്യ​ങ്ങൾ] 2:1, 9, പി.ഒ.സി. ബൈബിൾ.

വീട്ടു​കാർ ആലോ​ചിച്ച്‌ ഉറപ്പി​ക്കുന്ന വിവാ​ഹ​ങ്ങൾ

വിവാഹം വീട്ടു​കാർ ആലോ​ചിച്ച്‌ ഉറപ്പി​ക്കുന്ന രീതി​യുള്ള പ്രദേ​ശ​ങ്ങളെ സംബന്ധി​ച്ചെന്ത്‌? ഉദാഹ​ര​ണ​ത്തിന്‌, തെന്നി​ന്ത്യ​യിൽ 80 ശതമാനം വിവാ​ഹ​ങ്ങ​ളും മാതാ​പി​താ​ക്കൾ ആലോ​ചിച്ച്‌ ഉറപ്പി​ക്കു​ന്ന​വ​യാ​ണെന്ന്‌ ചിലർ കണക്കാ​ക്കു​ന്നു. ഈ രീതി പിൻപ​റ്റ​ണ​മോ വേണ്ടയോ എന്ന്‌ ക്രിസ്‌തീയ മാതാ​പി​താ​ക്കൾക്കു വ്യക്തി​പ​ര​മാ​യി തീരു​മാ​നി​ക്കാ​വു​ന്ന​താണ്‌. ആത്മീയ മൂല്യ​ങ്ങൾക്കു മുഖ്യ പ്രാധാ​ന്യം നൽകു​മ്പോൾ തീർച്ച​യാ​യും അത്തരം വിവാ​ഹങ്ങൾ വിജയ​ക​ര​മാ​യി​രി​ക്കും.

വീട്ടു​കാർ ആലോ​ചിച്ച്‌ ഉറപ്പി​ക്കുന്ന വിവാ​ഹ​ങ്ങ​ളു​ടെ കാര്യ​ത്തിൽ തീരു​മാ​ന​മെ​ടു​ക്കു​ന്നത്‌ അനുഭ​വ​സ​മ്പ​ത്തും പക്വത​യു​മു​ള്ളവർ ആയതി​നാൽ അവ മെച്ച​പ്പെ​ട്ട​താ​യി​രി​ക്കും എന്നാണ്‌ അത്തരം വിവാ​ഹ​ങ്ങളെ അനുകൂ​ലി​ക്കു​ന്നവർ പറയു​ന്നത്‌. ആഫ്രി​ക്ക​യി​ലെ ഒരു ക്രിസ്‌തീയ മൂപ്പൻ ഇങ്ങനെ പറയുന്നു: “അനുഭവ സമ്പത്തി​ല്ലാ​ത്ത​വ​രും ചെറു​പ്പ​ക്കാ​രു​മായ മക്കൾക്ക്‌ ഭാവി ഇണയുടെ ആത്മീയ പക്വതയെ ശരിയാ​യി വിലയി​രു​ത്താൻ കഴിയില്ല എന്ന്‌ ചില മാതാ​പി​താ​ക്കൾ കരുതു​ന്നു.” ഇന്ത്യയി​ലെ ഒരു സഞ്ചാര ശുശ്രൂ​ഷകൻ കൂടു​ത​ലാ​യി ഇങ്ങനെ പറയുന്നു: “അനുഭ​വ​സ​മ്പ​ത്തി​ല്ലാ​ത്ത​വ​രാണ്‌ യുവാക്കൾ. അവർ തീരു​മാ​നം എടുക്കു​ന്നത്‌ വികാ​ര​ങ്ങ​ളു​ടെ പുറത്താ​യി​രി​ക്കാം.” തങ്ങൾക്കു മറ്റാ​രെ​ക്കാ​ളും നന്നായി മക്കളെ അറിയാ​വു​ന്ന​തു​കൊണ്ട്‌ അവർക്കു വേണ്ടി ജ്ഞാനപൂർവ​ക​മായ തിര​ഞ്ഞെ​ടു​പ്പു നടത്താൻ തങ്ങളാണ്‌ ഏറ്റവും പറ്റിയ സ്ഥാന​ത്തെന്ന്‌ അച്ഛനമ്മ​മാർ കരുതു​ന്നു. എന്നാൽ അങ്ങനെ ചെയ്യു​മ്പോൾ തന്നെ യുവാ​വി​ന്റെ​യും യുവതി​യു​ടെ​യും വീക്ഷണ​ങ്ങ​ളും കൂടെ കണക്കി​ലെ​ടു​ക്കു​ന്നതു ബുദ്ധി​യാ​യി​രി​ക്കും.

എന്നാൽ, മാതാ​പി​താ​ക്കൾ ബൈബിൾ തത്ത്വങ്ങൾ അവഗണി​ച്ചു​കൊണ്ട്‌ പ്രവർത്തി​ക്കു​ന്നെ​ങ്കിൽ പിന്നീട്‌ വിവാ​ഹ​ബ​ന്ധ​ത്തിൽ അപസ്വ​രങ്ങൾ ഉയരുന്ന പക്ഷം അവർക്കു​തന്നെ തിരി​ച്ചടി നേരി​ട്ടേ​ക്കാം. വിവാ​ഹി​ത​രാ​കാൻ പോകു​ന്ന​വർക്ക്‌ പരസ്‌പരം അടുത്ത​റി​യാൻ പലപ്പോ​ഴും അവസരം ലഭിക്കാ​ത്ത​തു​കൊണ്ട്‌ പ്രശ്‌നങ്ങൾ തലപൊ​ക്കി​യേ​ക്കാം. അങ്ങനെ സംഭവി​ക്കുന്ന പക്ഷം, “കുറ്റം മാതാ​പി​താ​ക്ക​ളു​ടെ തലയിൽ കെട്ടി​വെ​ക്കാ​നുള്ള പ്രവണ​ത​യാണ്‌ ഉള്ളത്‌,” ഇന്ത്യയി​ലെ ഒരു ക്രിസ്‌തീയ പിതാവ്‌ വിശദീ​ക​രി​ക്കു​ന്നു.

മക്കൾക്കു വേണ്ടി വിവാഹ ഇണയെ തേടുന്ന ക്രിസ്‌തീയ മാതാ​പി​താ​ക്കൾ തങ്ങളുടെ ആന്തരം എന്താ​ണെന്നു കൂടെ പരിചി​ന്തി​ക്കേ​ണ്ട​തുണ്ട്‌. ഭൗതി​കത്വ ചിന്താ​ഗ​തി​യോ പേരി​നും പെരു​മ​യ്‌ക്കും വേണ്ടി​യുള്ള ആഗ്രഹ​മോ ആണ്‌ അവരെ ഭരിക്കു​ന്ന​തെ​ങ്കിൽ പ്രശ്‌നങ്ങൾ ഉയർന്നു​വ​ന്നേ​ക്കാം. (1 തിമൊ​ഥെ​യൊസ്‌ 6:9) അതു​കൊണ്ട്‌, വിവാഹം ആലോ​ചിച്ച്‌ ഉറപ്പി​ക്കു​ന്നവർ സ്വയം ഇങ്ങനെ ചോദി​ക്കേ​ണ്ട​തുണ്ട്‌: ‘ഇരു കൂട്ടർക്കും സന്തുഷ്ടി​യും ആത്മീയ ആരോ​ഗ്യ​വും ഉറപ്പു​നൽകുന്ന ഒരു തിര​ഞ്ഞെ​ടു​പ്പാ​ണോ ഞാൻ നടത്തു​ന്നത്‌? അതോ കുടുംബ മഹിമ വർധി​പ്പി​ക്കു​ന്ന​തി​ലും പണമു​ണ്ടാ​ക്കു​ന്ന​തി​ലും ആണോ എന്റെ കണ്ണ്‌?’—സദൃശ​വാ​ക്യ​ങ്ങൾ 20:21, NW.

ബൈബി​ളി​ന്റെ ബുദ്ധി​യു​പ​ദേശം സുവ്യ​ക്ത​മാണ്‌. അത്‌ അനുസ​രി​ക്കു​ന്നതു നന്മയിൽ കലാശി​ക്കും. വിവാഹ ഇണയെ ഏതു വിധത്തിൽ തിര​ഞ്ഞെ​ടു​ത്താ​ലും ശരി, വ്യക്തി​യു​ടെ സ്വഭാ​വ​ഗു​ണ​ത്തി​നും ആത്മീയ​ത​യ്‌ക്കും ആയിരി​ക്കണം എല്ലായ്‌പോ​ഴും മുൻതൂ​ക്കം കൊടു​ക്കേ​ണ്ടത്‌. അങ്ങനെ​യാ​കു​മ്പോൾ, വിവാ​ഹ​ക്ര​മീ​ക​ര​ണ​ത്തി​ന്റെ ഉപജ്ഞാ​താ​വായ യഹോ​വ​യാം ദൈവ​ത്തിന്‌ അതു ബഹുമതി കൈവ​രു​ത്തും. മാത്രമല്ല, വിവാഹം കഴിക്കു​ന്ന​വർക്ക്‌ ഒരു ഉറച്ച ആത്മീയ അടിത്ത​റ​യി​ന്മേൽ തങ്ങളുടെ കുടും​ബ​ജീ​വി​തം പടുത്തു​യർത്താ​നും സാധി​ക്കും. (മത്തായി 7:24, 25) ഇത്‌ വിവാ​ഹ​ബ​ന്ധത്തെ സന്തുഷ്ടി​ദാ​യ​ക​വും അർഥസ​മ്പൂർണ​വും ആക്കിത്തീർക്കു​ന്ന​തി​നു വളരെ​യ​ധി​കം സംഭാവന ചെയ്യും.