അത്യാ​ഹി​ത​ങ്ങ​ളിൽനിന്ന്‌ നിങ്ങളു​ടെ കുട്ടിയെ സംരക്ഷി​ക്കു​ക

സ്വീഡനിലെ ഉണരുക! ലേഖകൻ

അയൽപ​ക്കത്ത്‌ മരണം നടന്ന ഒരു വീട്ടിൽ സഹായി​ക്കാ​നെ​ത്തി​യ​താ​യി​രു​ന്നു കാൾ ഏറിക്കും ബിർഗി​റ്റാ​യും. അവരുടെ മൂന്നു വയസ്സു​കാ​രി മകൾ ഹാന്നാ​യും ഒപ്പമു​ണ്ടാ​യി​രു​ന്നു. കുറച്ചു കഴിഞ്ഞ​പ്പോൾ ഒരു ഗുളി​ക​ക്കു​പ്പി​യു​മാ​യി ഹാന്നാ ഒരു മുറി​യിൽനിന്ന്‌ ഇറങ്ങി​വ​രു​ന്നതു കണ്ടു. അതിൽനി​ന്നു കുറച്ചു ഗുളി​കകൾ അവൾ അകത്താ​ക്കി​യി​രു​ന്നു. കുപ്പി​യി​ലെ ലേബൽ കണ്ടപ്പോൾ ബിർഗി​റ്റാ​യ്‌ക്കു ശ്വാസം നിലച്ച​തു​പോ​ലെ​യാ​യി. അയൽക്കാ​രൻ ഹൃ​ദ്രോ​ഗ​ത്തി​നു കഴിച്ചി​രുന്ന മരുന്നാ​യി​രു​ന്നു അതിൽ.

ഉടനടി ഹാന്നായെ ആശുപ​ത്രി​യിൽ എത്തിച്ചു. രാത്രി മുഴുവൻ അവൾ തീവ്ര​പ​രി​ചരണ വിഭാ​ഗ​ത്തി​ലാ​യി​രു​ന്നു. സ്ഥായി​യായ ആരോ​ഗ്യ​പ്ര​ശ്‌ന​ങ്ങൾക്കു വഴി​തെ​ളി​ച്ചേ​ക്കു​മാ​യി​രുന്ന ഒരു സംഗതി​യാ​യി​രു​ന്നു ഇതെങ്കി​ലും അവൾക്കു യാതൊ​രു കുഴപ്പ​വും സംഭവി​ച്ചില്ല. കാരണം? ഗുളിക അകത്താ​ക്കു​ന്ന​തി​നു തൊട്ടു​മുമ്പ്‌ അവൾ ഭക്ഷണം കഴിച്ചി​രു​ന്നു. ഉള്ളിലു​ണ്ടാ​യി​രുന്ന ആഹാര​സാ​ധനം വിഷാം​ശ​ത്തിൽ കുറേ വലി​ച്ചെ​ടു​ത്തി​രു​ന്ന​തു​കൊണ്ട്‌ ഛർദി​ച്ച​പ്പോൾ ആഹാര​ത്തോ​ടൊ​പ്പം വിഷവും വെളി​യിൽവന്നു.

ഹാന്നാ​യു​ടേത്‌ ഒരു അസാധാ​രണ സംഭവം അല്ല. ദിവസ​വും ലോക​മെ​മ്പാ​ടു​മുള്ള ആയിര​ക്ക​ണ​ക്കി​നു കുട്ടി​കൾക്ക്‌, ഡോക്‌ട​റു​ടെ പക്കലോ ആശുപ​ത്രി​യി​ലോ കൊണ്ടു​പോ​കേണ്ടി വരുന്ന തരത്തി​ലുള്ള അത്യാ​ഹി​തങ്ങൾ ഉണ്ടാകു​ന്നു. സ്വീഡ​നിൽ ഓരോ വർഷവും 8 കുട്ടി​ക​ളിൽ ഒരാൾക്കു വീതം അത്യാ​ഹി​തത്തെ തുടർന്ന്‌ വൈദ്യ ചികിത്സ ആവശ്യ​മാ​യി വരുന്നു. അതു​കൊണ്ട്‌ നിങ്ങൾ ഒരു മാതാ​വോ പിതാ​വോ ആണെങ്കിൽ ഓർക്കുക, സൂക്ഷി​ച്ചി​ല്ലെ​ങ്കിൽ നിങ്ങളു​ടെ കുട്ടി​യും അത്തരം അപകട​ങ്ങ​ളിൽ ചെന്നു ചാടാ​നുള്ള സാധ്യത ഏറെയാണ്‌.

പരിചി​ത​മാ​യ ചുറ്റു​പാ​ടിൽ, അതായത്‌ വീട്ടി​ലോ പരിസ​ര​ത്തോ വെച്ച്‌ കുട്ടി​കൾക്കു പരി​ക്കേൽക്കു​ന്നതു സാധാ​ര​ണ​മാണ്‌. വ്യത്യസ്‌ത പ്രായ​ത്തി​ലുള്ള കുട്ടി​കൾക്കു വ്യത്യസ്‌ത രീതി​യി​ലുള്ള അപകട​ങ്ങ​ളാ​യി​രി​ക്കും ഉണ്ടാകു​ന്നത്‌. ഒരു കൊച്ചു കുഞ്ഞിന്റെ കാര്യ​ത്തിൽ കട്ടിലിൽനി​ന്നു താഴെ വീണു​പോ​കാ​നോ ആഹാര​സാ​ധ​ന​മോ ചെറിയ എന്തെങ്കി​ലും വസ്‌തു​ക്ക​ളോ തൊണ്ട​യിൽ കുടുങ്ങി ശ്വാസ​ത​ട​സ്സ​മു​ണ്ടാ​കാ​നോ എളുപ്പ​മാണ്‌. കുറച്ചു കൂടെ വലിയ കുട്ടി​ക​ളാ​ണെ​ങ്കിൽ അവർ എവി​ടെ​യെ​ങ്കി​ലും പിടി​ച്ചു​ക​യറി മറിഞ്ഞു​വീ​ണേ​ക്കാം, അല്ലെങ്കിൽ ചൂടുള്ള വസ്‌തു​ക്ക​ളിൽ പോയി തൊടു​ക​യോ വിഷവ​സ്‌തു​ക്കൾ എടുത്തു കഴിക്കു​ക​യോ ചെയ്യു​ന്ന​തി​ന്റെ ഫലമായി പൊള്ള​ലേൽക്കു​ക​യോ അപകടം സംഭവി​ക്കു​ക​യോ ചെയ്‌തേ​ക്കാം. സ്‌കൂൾ പ്രായ​മായ കുട്ടി​കൾക്ക്‌ മിക്ക​പ്പോ​ഴും പരി​ക്കേൽക്കു​ന്നതു വെളി​യിൽ കളിക്കു​ന്ന​തി​നി​ട​യി​ലാണ്‌, റോഡിൽ വെച്ചു​ണ്ടാ​കുന്ന അപകട​ങ്ങ​ളും കുറവല്ല.

ഈ അപകട​ങ്ങ​ളിൽ പലതും തടയാ​വു​ന്ന​വ​യാണ്‌. ഒരൽപ്പം ദീർഘ​വീ​ക്ഷണം ഉണ്ടായി​രി​ക്കു​ക​യും കുട്ടി​യു​ടെ ശാരീ​രിക, മാനസിക വളർച്ചയെ കുറിച്ച്‌ നന്നായി മനസ്സി​ലാ​ക്കി​യി​രി​ക്കു​ക​യും ചെയ്യു​ന്നെ​ങ്കിൽ അവനു പരി​ക്കേൽക്കു​ന്ന​തും എന്തിന്‌ ഗുരു​ത​ര​മായ അപകടങ്ങൾ സംഭവി​ക്കു​ന്ന​തു​പോ​ലും തടയാൻ കഴി​ഞ്ഞേ​ക്കും. ഇതു ശരിയാ​ണെന്നു സ്വീഡ​നിൽ തെളി​യി​ക്ക​പ്പെ​ട്ടി​രി​ക്കു​ന്നു. 1954-നു മുമ്പ്‌ ഓരോ വർഷവും അവിടെ 450-ൽ അധികം കുട്ടികൾ അപകട​ങ്ങ​ളിൽ പെട്ട്‌ മരിച്ചി​രു​ന്നു. എന്നാൽ 1954-ൽ ഒരു സംഘടിത ബാല സുരക്ഷാ പദ്ധതി പ്രാബ​ല്യ​ത്തിൽ വന്നതിന്റെ ഫലമായി ഓരോ വർഷവും അപകട​ങ്ങ​ളിൽ പെട്ടു മരിക്കുന്ന കുട്ടി​ക​ളു​ടെ എണ്ണം ഇന്ന്‌ ഏതാണ്ട്‌ 70 ആയി കുറഞ്ഞി​രി​ക്കു​ന്നു.

വീടി​ന​കത്ത്‌

“ഒന്നോ രണ്ടോ മൂന്നോ വയസ്സു പ്രായ​മുള്ള കുട്ടി​കളെ അപകടങ്ങൾ ഒഴിവാ​ക്കാൻ പഠിപ്പി​ക്കാ​നും പിന്നീട്‌ അവർ അത്‌ ഓർത്തി​രു​ന്നു​കൊ​ള്ളു​മെന്നു പ്രതീ​ക്ഷി​ക്കാ​നും കഴിയില്ല,” കുട്ടി​ക​ളു​ടെ മനശ്ശാ​സ്‌ത്ര​ജ്ഞ​നായ ചെഷ്ടിൻ ബാക്ക്‌സ്‌​ട്രോം പറയുന്നു. അതു​കൊണ്ട്‌, അപകടങ്ങൾ ഒഴിവാ​ക്കാൻ കുട്ടി​കളെ സഹായി​ക്കു​ന്ന​തി​നുള്ള ഉത്തരവാ​ദി​ത്വം മാതാ​പി​താ​ക്ക​ളെന്ന നിലയിൽ നിങ്ങൾക്കാണ്‌, അല്ലെങ്കിൽ കുട്ടിയെ നോക്കാൻ ചുമത​ല​പ്പെട്ട മറ്റു മുതിർന്ന​വർക്കാണ്‌.

ആദ്യം, സ്വന്തം വീടു​ത​ന്നെ​യൊ​ന്നു പരി​ശോ​ധി​ക്കുക. ഇതോ​ടൊ​പ്പം നൽകി​യി​രി​ക്കുന്ന ചതുര​ത്തി​ലെ നിർദേ​ശങ്ങൾ ഉപയോ​ഗ​പ്പെ​ടു​ത്തുക. പ്രതി​പാ​ദി​ച്ചി​രി​ക്കുന്ന ചില സുരക്ഷാ സംവി​ധാ​നങ്ങൾ ഒരുപക്ഷേ എല്ലാ രാജ്യ​ങ്ങ​ളി​ലും ലഭ്യമാ​യവ ആയിരി​ക്കില്ല, ലഭ്യമാ​ണെ​ങ്കിൽ തന്നെ അവ നല്ല പണമു​ട​ക്കു​ള്ള​താ​യി​രി​ക്കാം. എങ്കിലും അൽപ്പം സൃഷ്ടി​പ​ര​മായ ഭാവനാ​ശക്തി ഉണ്ടെങ്കിൽ നിങ്ങളു​ടെ പ്രത്യേക സാഹച​ര്യ​ത്തി​നു പ്രാ​യോ​ഗി​ക​മായ പരിഹാ​ര​മാർഗ​ങ്ങളെ കുറിച്ചു ചിന്തി​ക്കാൻ കഴി​ഞ്ഞേ​ക്കും.

ഉദാഹ​ര​ണ​ത്തിന്‌, അടുക്ക​ള​യി​ലെ വലിപ്പു​കൾക്കു വളയരൂ​പ​ത്തി​ലുള്ള പിടി​ക​ളാണ്‌ ഉള്ളതെ​ങ്കിൽ അവയി​ലൂ​ടെ ഒരു കമ്പുക​ടത്തി വെച്ചാൽ കുട്ടിക്ക്‌ അത്‌ വലിച്ചു​തു​റ​ക്കാൻ കഴിയില്ല. ഓവന്റെ വാതി​ലി​ന്റെ കാര്യ​ത്തി​ലും ഇതു​പോ​ലെ എന്തെങ്കി​ലും രീതി അവലം​ബി​ക്കാൻ സാധി​ക്കും. പ്ലാസ്റ്റിക്‌ കൂടുകൾ സൂക്ഷി​ച്ചു​വെ​ക്കു​മ്പോൾ അതിന്റെ അറ്റം കെട്ടി​വെ​ക്കാ​വു​ന്ന​താണ്‌.

വീടി​ന​ക​ത്തും പരിസ​ര​ത്തും സംഭവി​ച്ചേ​ക്കാ​വുന്ന അപകടങ്ങൾ തടയാൻ സഹായ​ക​മായ മറ്റു ലളിത​മായ മാർഗ​ങ്ങളെ കുറിച്ചു ചിന്തി​ക്കാ​നും കൊച്ചു കുട്ടി​ക​ളുള്ള സുഹൃ​ത്തു​ക്ക​ളു​മാ​യോ പരിച​യ​ക്കാ​രു​മാ​യോ അവ പങ്കു​വെ​ക്കാ​നും നിങ്ങൾക്കു സാധി​ച്ചേ​ക്കും.

വീടിനു വെളി​യിൽ

നിങ്ങളു​ടെ കുട്ടി കളിക്കാ​റുള്ള സ്ഥലങ്ങൾ പരി​ശോ​ധി​ക്കുക. നാലു വയസ്സിനു മുകളി​ലുള്ള കുട്ടി​കൾക്ക്‌ ഉണ്ടാകുന്ന മിക്ക പരിക്കു​ക​ളും വെളി​യിൽ കളിക്കു​ന്ന​തി​നി​ട​യ്‌ക്കു സംഭവി​ക്കു​ന്ന​വ​യാണ്‌. ഓടി​ക്ക​ളി​ക്കു​ന്ന​തി​നി​ട​യി​ലോ സൈക്കി​ളിൽനി​ന്നു വീണോ അവർക്കു പരി​ക്കേൽക്കാം. വീടിനു വെളി​യിൽ ആയിരി​ക്കു​മ്പോൾ, മൂന്നി​നും ഏഴിനും ഇടയ്‌ക്കു പ്രായ​മുള്ള കുട്ടി​കൾക്ക്‌ മിക്ക​പ്പോ​ഴും ജീവഹാ​നി സംഭവി​ക്കു​ന്നത്‌ റോഡ​പ​ക​ടങ്ങൾ മൂലവും വെള്ളത്തിൽ വീഴു​ന്നതു മൂലവു​മാണ്‌.

കളിസ്ഥ​ല​ങ്ങൾ പരി​ശോ​ധി​ക്കു​മ്പോൾ, കളിക്കാ​നുള്ള സജ്ജീക​ര​ണങ്ങൾ നല്ല നിലയി​ലാ​ണെ​ന്നും അവ ഉപയോ​ഗി​ക്കു​മ്പോൾ കുട്ടിക്കു പരി​ക്കേൽക്കി​ല്ലെ​ന്നും ഉറപ്പു വരുത്തുക. ഊഞ്ഞാ​ലി​ന്റെ​യും സ്ലൈഡിങ്‌ ബോർഡി​ന്റെ​യും മറ്റും അടിയിൽ വീണാ​ലും കുട്ടിക്കു പരി​ക്കേൽക്കാ​തി​രി​ക്കു​ന്ന​തി​നാ​യി മണലോ മറ്റോ ഇട്ടിട്ടു​ണ്ടോ?

വീടി​ന​ടുത്ത്‌ കുളമോ അരുവി​യോ മറ്റോ ഉണ്ടോ? ഏതാനും സെന്റി​മീ​റ്റർ ആഴത്തി​ലുള്ള വെള്ളം മതി ഒന്നോ രണ്ടോ വയസ്സുള്ള ഒരു കുട്ടി മുങ്ങി​പ്പോ​കാൻ. “ഒരു കൊച്ചു​കു​ട്ടി വെള്ളത്തിൽ കമിഴ്‌ന്ന​ടി​ച്ചു വീണാൽ അവനു മുക​ളേ​താണ്‌ താഴെ​യേ​താണ്‌ എന്ന്‌ അറിയാൻ പറ്റില്ല,” കുട്ടി​ക​ളു​ടെ മനശ്ശാ​സ്‌ത്ര​ജ്ഞ​നായ ബാക്ക്‌സ്‌​ട്രോം പറയുന്നു. “അതിനാൽ കുട്ടിക്കു വീണി​ട​ത്തു​നിന്ന്‌ എഴു​ന്നേൽക്കാൻ കഴിയാ​തെ പോകു​ന്നു.”

അതു​കൊണ്ട്‌ അടിസ്ഥാ​ന​പ​ര​മായ നിർദേശം ഇതാണ്‌: ഒരു വയസ്സി​നും മൂന്നു വയസ്സി​നും ഇടയ്‌ക്കു പ്രായ​മുള്ള കുട്ടി​കളെ മുതിർന്ന​വ​രു​ടെ മേൽനോ​ട്ട​മി​ല്ലാ​തെ വെളി​യിൽ തനിയെ കളിക്കാൻ വിടരുത്‌. വീടി​ന​ടുത്ത്‌ കുളമോ മറ്റോ ഉണ്ടെങ്കിൽ കുട്ടിക്കു വേണ്ടത്ര പ്രായ​മാ​കു​ന്ന​തു​വരെ മുതിർന്നവർ ഒപ്പമി​ല്ലാ​തെ അവനെ വെളി​യിൽ കളിക്കാൻ അനുവ​ദി​ക്കാ​തി​രി​ക്കുക.

വാഹന​ങ്ങ​ളോ​ടുന്ന റോഡി​ലും വാഹന​ത്തി​ലും ആയിരി​ക്കു​മ്പോൾ

വീടി​ന​ടു​ത്തു​കൂ​ടെ വാഹന​ങ്ങ​ളോ​ടു​ന്നു​ണ്ടെ​ങ്കി​ലും ഈ തത്ത്വം ബാധക​മാണ്‌. “സ്‌കൂൾ പ്രായ​മാ​യി​ട്ടി​ല്ലാത്ത ഒരു കുട്ടിയെ സംബന്ധി​ച്ചി​ട​ത്തോ​ളം വ്യക്തമാ​യി തിരി​ച്ച​റി​യാ​വുന്ന സന്ദേശങ്ങൾ മാത്രമേ അവനു മനസ്സി​ലാ​ക്കാൻ സാധിക്കൂ. മാത്രമല്ല, ഒരു സമയത്ത്‌ ഒരു കാര്യ​ത്തിൽ മാത്രമേ അവനു ശ്രദ്ധ പതിപ്പി​ക്കാൻ കഴിയൂ,” ബാക്ക്‌സ്‌​ട്രോം അഭി​പ്രാ​യ​പ്പെ​ടു​ന്നു. “എന്നാൽ റോഡി​ലെ സന്ദേശങ്ങൾ അവ്യക്ത​വും തിരി​ച്ച​റി​യാൻ ബുദ്ധി​മു​ട്ടു​ള്ള​വ​യു​മാണ്‌.” സ്‌കൂൾ പ്രായം എത്തുന്ന​തി​നു മുമ്പ്‌ കുട്ടിയെ ആരു​ടെ​യും സഹായ​മി​ല്ലാ​തെ റോഡ്‌ മുറിച്ചു കടക്കാൻ അനുവ​ദി​ക്ക​രുത്‌. ഒരു കുട്ടിക്ക്‌ ഗതാഗ​ത​ത്തി​ര​ക്കുള്ള റോഡി​ലൂ​ടെ തനിയെ സൈക്കി​ളിൽ പോകാ​നുള്ള പക്വത വരണ​മെ​ങ്കിൽ ചുരു​ങ്ങി​യത്‌ 12 വയസ്സെ​ങ്കി​ലും ആകണ​മെന്ന്‌ വിദഗ്‌ധർ പറയുന്നു.

സൈക്കി​ളിൽ പോകു​മ്പോ​ഴോ കുതിര സവാരി നടത്തു​മ്പോ​ഴോ സ്‌കെ​യ്‌റ്റി​ങ്ങിൽ ഏർപ്പെ​ടു​മ്പോ​ഴോ ഹെൽമറ്റ്‌ ധരിക്ക​ണ​മെന്ന്‌ നിങ്ങളു​ടെ കുട്ടിയെ പഠിപ്പി​ക്കുക. തലയ്‌ക്കേൽക്കുന്ന പരിക്ക്‌ ചികി​ത്സി​ച്ചു ഭേദമാ​ക്കാൻ ബുദ്ധി​മു​ട്ടു​ള്ള​തും സ്ഥായി​യായ തകരാറ്‌ സൃഷ്ടി​ക്കു​ന്ന​തു​മാണ്‌—അതു മരണത്തി​നു പോലും ഇടയാ​ക്കി​യേ​ക്കാം! കുട്ടി​ക​ളു​ടെ ഒരു ആശുപ​ത്രി​യിൽ സൈക്കിൾ അപകടത്തെ തുടർന്നു ചികി​ത്സി​ക്ക​പ്പെ​ട്ട​വ​രിൽ 60 ശതമാ​ന​ത്തി​നും തലയ്‌ക്കോ മുഖത്തോ പരി​ക്കേ​റ്റി​രു​ന്നു, എന്നാൽ ഹെൽമ​റ്റു​കൾ ധരിച്ചി​രു​ന്ന​വർക്ക്‌ തലയ്‌ക്ക്‌ സാരമായ പരി​ക്കേ​റ്റി​രു​ന്നില്ല.

കാറി​ലും മറ്റും യാത്ര ചെയ്യു​മ്പോ​ഴും കുട്ടി​യു​ടെ സുരക്ഷി​ത​ത്വം ഉറപ്പു വരുത്തുക. യാത്ര ചെയ്യു​മ്പോൾ കൊച്ചു കുട്ടി​കളെ പ്രത്യേ​കം രൂപകൽപ്പന ചെയ്‌ത സുരക്ഷാ സീറ്റു​ക​ളിൽ ഇരുത്ത​ണ​മെന്നു നിഷ്‌കർഷി​ക്കുന്ന നിയമങ്ങൾ പല രാജ്യ​ങ്ങ​ളി​ലും ഉണ്ട്‌. ഇതുമൂ​ലം, അപകട​ത്തിൽ പെടുന്ന കുട്ടി​കൾക്കി​ട​യിൽ പരിക്കും മരണവും വളരെ​യേറെ കുറയ്‌ക്കാൻ സാധി​ച്ചി​ട്ടുണ്ട്‌. സുരക്ഷാ​സീ​റ്റു​കൾ ലഭ്യമാ​ണെ​ങ്കിൽ, അവ ഉപയോ​ഗി​ക്കു​ന്നത്‌ സുരക്ഷി​ത​ത്വ​ത്തി​നുള്ള ഒരു നല്ല മാർഗം തന്നെയാണ്‌. എന്നാൽ ഈ സീറ്റുകൾ അംഗീ​ക​രി​ക്ക​പ്പെട്ട മാതൃ​ക​യി​ലു​ള്ള​വ​യാ​യി​രി​ക്കണം. ശിശു​ക്കൾക്കും ഏതാണ്ട്‌ മൂന്നു വയസ്സിനു മുകളിൽ പ്രായ​മുള്ള കുട്ടി​കൾക്കും വ്യത്യസ്‌ത തരം സീറ്റു​ക​ളാണ്‌ ഉള്ളത്‌.

യഹോ​വ​യിൽനി​ന്നുള്ള അമൂല്യ സമ്മാന​മാ​ണു നമ്മുടെ കുട്ടികൾ. അവർക്ക്‌ എല്ലാ വിധത്തി​ലും സംരക്ഷ​ണ​മേ​കാൻ നാം ആഗ്രഹി​ക്കു​ന്നു. (സങ്കീർത്തനം 127:3, 4) കരുത​ലുള്ള മാതാ​പി​താ​ക്ക​ളെന്ന നിലയിൽ കാൾ ഏറിക്കും ബിർഗി​റ്റാ​യും മക്കളെ സംരക്ഷി​ക്കു​ന്ന​തിൽ എപ്പോ​ഴും ശ്രദ്ധയു​ള്ളവർ ആയിരു​ന്നു—ഹാന്നാ​യ്‌ക്കു​ണ്ടായ അനുഭ​വ​ത്തി​നു മുമ്പും പിമ്പും. “എന്നാൽ ആ സംഭവ​ത്തി​നു ശേഷം ഞങ്ങൾ കൂടുതൽ ശ്രദ്ധയു​ള്ള​വ​രാ​യി,” കാൾ ഏറിക്ക്‌ സമ്മതി​ക്കു​ന്നു. “ഇപ്പോൾ ഞങ്ങൾക്കു പേരക്കു​ട്ടി​ക​ളുണ്ട്‌, മരുന്നു​കൾ എപ്പോ​ഴും ഭദ്രമാ​യി സൂക്ഷി​ച്ചി​രി​ക്കു​ന്നു​വെന്നു ഞങ്ങൾ ഉറപ്പു​വ​രു​ത്തു​ന്നു,” ബിർഗി​റ്റാ കൂട്ടി​ച്ചേർക്കു​ന്നു.

[22-ാം പേജിലെ ചതുരം]

വീടി​ന​കത്ത്‌ സുരക്ഷി​ത​ത്വം

• മരുന്നു​കൾ: കുട്ടിക്ക്‌ എടുക്കാ​നാ​വാ​ത്ത​വി​ധം അവ അലമാ​ര​യിൽ വെച്ചു പൂട്ടുക, ഡോക്‌ട​റു​ടെ കുറി​പ്പ​ടി​യി​ല്ലാ​തെ വാങ്ങാൻ കിട്ടുന്ന മരുന്നു​ക​ളും നാട്ടു​മ​രു​ന്നു​ക​ളും ഉൾപ്പെടെ എല്ലാം. കൂടാതെ, രാത്രി​യിൽ നിങ്ങളു​ടെ വീട്ടിൽ തങ്ങുന്ന അതിഥി​ക​ളോട്‌ അവരുടെ മരുന്നു​കൾ ഭദ്രമാ​യി സൂക്ഷി​ക്കാൻ ആവശ്യ​പ്പെ​ടുക.

• വീട്ടാ​വ​ശ്യ​ത്തി​നുള്ള രാസവ​സ്‌തു​ക്കൾ: കുട്ടിക്ക്‌ എടുക്കാൻ പറ്റാത്ത​വി​ധം അവ അലമാ​ര​യിൽ പൂട്ടി വെക്കുക. വ്യക്തമാ​യി തിരി​ച്ച​റി​യാൻ സാധി​ക്കേ​ണ്ട​തിന്‌ കടയിൽനി​ന്നു വാങ്ങി​ക്കു​മ്പോ​ഴുള്ള അതേ പാത്ര​ത്തിൽ തന്നെ അവ സൂക്ഷി​ക്കുക. അവ ഉപയോ​ഗി​ക്കു​മ്പോ​ഴും ശ്രദ്ധ​വേണം. കൂടാതെ, ഇടയ്‌ക്ക്‌ എങ്ങോ​ട്ടെ​ങ്കി​ലും പോകു​ക​യാ​ണെ​ങ്കിൽത്തന്നെ എപ്പോ​ഴും അവ മാറ്റി​വെ​ച്ചി​ട്ടേ പോകാ​വൂ. പാത്രം കഴുകാൻ ഉപയോ​ഗി​ക്കുന്ന സോപ്പോ മറ്റു ശുചീ​കരണ ലായനി​ക​ളോ പാത്രം കഴുകു​ന്നി​ടത്ത്‌ അവശേ​ഷി​പ്പി​ച്ചി​ട്ടു പോകാ​തി​രി​ക്കുക.

• സ്റ്റൗ: അടുപ്പ​ത്തി​രി​ക്കുന്ന പാത്ര​ങ്ങ​ളു​ടെ പിടി പുറ​ത്തേക്കു നീണ്ടു നിൽക്കാ​തി​രി​ക്കാൻ ശ്രദ്ധി​ക്കുക. സോസ്‌പാൻ ഗാർഡ്‌ ലഭ്യമാ​ണെ​ങ്കിൽ അതു പിടി​പ്പി​ക്കുക. സ്റ്റൗ മേശ​മേ​ലോ അടിയിൽ ഷെൽഫു​ക​ളുള്ള പാതക​ത്തി​ന്മേ​ലോ ആണു വെച്ചി​രി​ക്കു​ന്ന​തെ​ങ്കിൽ കുട്ടി അതിൽ ചവിട്ടി​ക്ക​യറി സ്റ്റൗ വലിച്ചു താഴെ​യി​ടാൻ സാധ്യ​ത​യു​ണ്ടോ? സ്റ്റൗവിൽ തൊട്ട്‌ കുട്ടിക്കു പൊള്ള​ലേൽക്കാൻ സാധ്യ​ത​യു​ണ്ടോ? അങ്ങനെ​യെ​ങ്കിൽ, കുട്ടിക്ക്‌ കൈ​യെ​ത്തി​ച്ചു തൊടാൻ പറ്റാത്ത​വി​ധ​ത്തിൽ മറപോ​ലെ എന്തെങ്കി​ലും പിടി​പ്പി​ക്കുക.

• അപകട​ക​ര​മായ വീട്ടു​പ​ക​ര​ണങ്ങൾ: കത്തി, കത്രിക തുടങ്ങിയ അപകട​ക​ര​മായ വീട്ടു​പ​ക​ര​ണങ്ങൾ അലമാ​ര​ക​ളി​ലോ വലിപ്പു​ക​ളി​ലോ മറ്റോ വെച്ച്‌ പൂട്ടേ​ണ്ട​താണ്‌ അല്ലെങ്കിൽ കുട്ടി​യു​ടെ കൈ​യെ​ത്താത്ത ഇടത്തു സൂക്ഷി​ക്കേ​ണ്ട​താണ്‌. അത്തരം ഉപകര​ണങ്ങൾ ഉപയോ​ഗി​ക്കു​ന്ന​തി​നി​ട​യിൽ മറ്റാവ​ശ്യ​ങ്ങൾക്കാ​യി എങ്ങോ​ട്ടെ​ങ്കി​ലും മാറു​ക​യാ​ണെ​ങ്കിൽ കുട്ടിക്ക്‌ എടുക്കാൻ സാധി​ക്കാ​ത്ത​വി​ധം അത്‌ മേശയു​ടെ വക്കത്തു​നി​ന്നും നീക്കി​വെ​ക്കുക. തീപ്പെ​ട്ടി​യും പ്ലാസ്റ്റിക്ക്‌ കൂടു​ക​ളും കൊച്ചു കുട്ടി​കൾക്ക്‌ അപകടം വരുത്തി​വെ​ച്ചേ​ക്കാം.

• സ്റ്റെയർകെ​യ്‌സ്‌: കുട്ടികൾ കയറി​യി​റ​ങ്ങാ​തി​രി​ക്കാ​നാ​യി സ്റ്റെയർകെ​യ്‌സി​ന്റെ മുകളി​ലും താഴെ​യും ചുരു​ങ്ങി​യത്‌ 70-5 സെന്റി​മീ​റ്റർ പൊക്ക​ത്തിൽ തടി​കൊ​ണ്ടുള്ള പടികൾ പിടി​പ്പി​ക്കുക.

• ജന്നാല​ക​ളും ബാൽക്ക​ണി​യു​ടെ വാതി​ലു​ക​ളും: കൊളു​ത്തു​ക​ളും ചെയി​നും മറ്റും കുഞ്ഞിന്‌ എത്താത്തത്ര ഉയരത്തിൽ ഘടിപ്പി​ക്കുക. അല്ലെങ്കിൽ അവന്‌ തുറക്കാ​നോ വായു സഞ്ചാര​ത്തി​നു വേണ്ടി തുറന്നി​ടു​മ്പോൾ നുഴഞ്ഞു പുറത്തു കടക്കാ​നോ പറ്റാത്ത വിധത്തിൽ മറ്റെ​ന്തെ​ങ്കി​ലും സുരക്ഷാ സംവി​ധാ​നം ഘടിപ്പി​ക്കുക.

• പുസ്‌തക അലമാ​രകൾ: പുസ്‌തക അലമാ​ര​ക​ളി​ലും മറ്റ്‌ ഉയരമുള്ള ഫർണി​ച്ച​റു​ക​ളി​ലും കുട്ടി വലിഞ്ഞു​ക​യ​റാ​നും പിടി​ച്ചു​തൂ​ങ്ങാ​നും ഒക്കെ ശ്രമി​ക്കാ​റു​ണ്ടെ​ങ്കിൽ അവ ചുമരിൽ ഭദ്രമാ​യി ഉറപ്പി​ച്ചു​വെ​ക്കണം, അല്ലാത്ത​പക്ഷം അവ ദേഹ​ത്തേക്കു മറിഞ്ഞു​വീ​ണേ​ക്കാം.

• വൈദ്യു​ത പ്ലഗ്ഗുക​ളും വയറു​ക​ളും: ഉപയോ​ഗി​ക്കാ​ത്ത​പ്പോ​ഴൊ​ക്കെ പ്ലഗ്‌ പോയി​ന്റു​കൾ പ്ലഗ്‌ ടോപ്പു​ക​ളോ മറ്റോ കൊണ്ട്‌ അടച്ചു വെക്കണം. ടേബിൾ ലാമ്പി​ന്റെ​യും മറ്റും വയറുകൾ ചുവരി​ലോ ഫർണി​ച്ച​റു​ക​ളി​ലോ ഉറപ്പി​ച്ചി​രി​ക്കണം. ഇല്ലെങ്കിൽ കുട്ടി അവ വലിച്ചു താഴേ​ക്കി​ടു​ക​യും അവനു ഷോ​ക്കേൽക്കു​ക​യും ചെയ്യും. അവ എടുത്തു മാറ്റി​വെ​ക്കാ​നും കഴിയും. തേപ്പു​പെട്ടി മേശ​മേൽത്തന്നെ വെച്ചി​ട്ടു​പോ​കു​ക​യോ അതിന്റെ വയർ തൂങ്ങി​ക്കി​ട​ക്കാൻ അനുവ​ദി​ക്കു​ക​യോ ചെയ്യരുത്‌.

• ചൂടു വെള്ളം: ഗീസറിൽ വെള്ളത്തി​ന്റെ താപനില ക്രമീ​ക​രി​ക്കാ​നുള്ള സംവി​ധാ​ന​മു​ണ്ടെ​ങ്കിൽ ഏതാണ്ട്‌ 50 ഡിഗ്രി സെൽഷ്യസ്‌ വരെ മാത്രം ചൂടാ​ക്കി​യി​ടുക, അങ്ങനെ​യാ​കു​മ്പോൾ കുട്ടി പെട്ടെന്ന്‌ ടാപ്പ്‌ തുറന്നാ​ലും പൊള്ള​ലേൽക്കില്ല.

• കളിപ്പാ​ട്ടങ്ങൾ: കൂർത്ത അറ്റങ്ങളോ കോണു​ക​ളോ ഉള്ള കളിപ്പാ​ട്ടകൾ കുട്ടിക്കു കൊടു​ക്ക​രുത്‌. തീരെ ചെറിയ കളിപ്പാ​ട്ട​ങ്ങ​ളോ ചെറിയ ഭാഗങ്ങ​ളാ​യി വേർപെ​ടു​ത്തി​യെ​ടു​ക്കാൻ കഴിയുന്ന കളിപ്പാ​ട്ട​ങ്ങ​ളോ ഉണ്ടെങ്കിൽ അവ എടുത്തു​ക​ള​യുക, കാരണം കുട്ടി അതു വായി​ലി​ടു​ന്ന​പക്ഷം തൊണ്ട​യിൽ കുടുങ്ങി അപകട​മു​ണ്ടാ​കാൻ സാധ്യ​ത​യുണ്ട്‌. പാവക​ളു​ടെ കണ്ണും മൂക്കു​മെ​ല്ലാം കുട്ടിക്കു പറി​ച്ചെ​ടു​ക്കാൻ പറ്റാത്ത വിധത്തിൽ ഉറപ്പി​ച്ച​താ​യി​രി​ക്കണം. കുഞ്ഞ്‌ നിലത്താ​യി​രി​ക്കു​മ്പോൾ ചെറിയ കളിപ്പാ​ട്ടങ്ങൾ എടുത്തു മാറ്റണ​മെന്ന്‌ മൂത്ത കുട്ടി​കളെ പഠിപ്പി​ക്കുക.

• മിഠാ​യി​യും കൊറി​ക്കാ​നുള്ള സാധന​ങ്ങ​ളും: മിഠായി, നിലക്കടല തുടങ്ങിയ സാധനങ്ങൾ കൊച്ചു കുട്ടി​കൾക്കു കൈ​യെ​ത്തു​ന്നി​ടത്ത്‌ വെക്കരുത്‌. കാരണം അവ തൊണ്ട​യിൽ കുടു​ങ്ങി​പ്പോ​യേ​ക്കാം.

[കടപ്പാട]

ഉറവിടം: ദ ഓഫീസ്‌ ഓഫ്‌ ദ ചിൽഡ്രൻസ്‌ ഓംബു​ഡ്‌സ്‌മാൻ

[22-ാം പേജിലെ ചതുരം]

അപകടം ഉണ്ടാകു​ന്ന​പ​ക്ഷം

• വിഷം അകത്തു​ചെ​ന്നാൽ: കുട്ടി എന്തെങ്കി​ലും വിഷ​ദ്രാ​വകം കഴിച്ചാൽ വായ്‌ നല്ലവണ്ണം കഴുകി​ച്ച​ശേഷം ഒന്നോ രണ്ടോ ഗ്ലാസ്‌ വെള്ളമോ പാലോ കുടി​ക്കാൻ കൊടു​ക്കുക. അതിനു​ശേഷം, ഉടൻ തന്നെ ഡോക്ട​റു​ടെ​യോ ഉത്‌പ​ന്ന​ത്തി​ന്റെ നിർമാ​താ​ക്ക​ളു​ടെ​യോ ഉപദേശം തേടുക. ആസിഡ്‌ പോ​ലെ​യുള്ള എന്തെങ്കി​ലും കുട്ടി​യു​ടെ കണ്ണിൽ പോയാൽ ഉടനടി ചുരു​ങ്ങി​യത്‌ പത്തു മിനിട്ടു നേര​ത്തേ​ക്കെ​ങ്കി​ലും തോരാ​തെ വെള്ള​മൊ​ഴിച്ച്‌ കണ്ണു കഴുകുക.

• പൊള്ളൽ: പൊള്ളൽ നിസ്സാ​ര​മാ​ണെ​ങ്കിൽ 20 മിനിട്ട്‌ നേര​ത്തേ​ക്കെ​ങ്കി​ലും ആ ഭാഗത്ത്‌ തണുത്ത (വല്ലാതെ തണുത്ത​താ​കാൻ പാടില്ല) വെള്ളം ഒഴിക്കുക. പൊള്ളൽ കുട്ടി​യു​ടെ കൈപ്പ​ത്തി​യെ​ക്കാൾ വലുതാ​ണെ​ങ്കി​ലോ മുഖത്തോ സന്ധിയി​ലോ അടിവ​യ​റ്റി​ലോ ജനനേ​ന്ദ്രി​യ​ത്തി​ലോ ആണെങ്കി​ലോ കുട്ടിയെ അത്യാ​ഹിത വിഭാ​ഗ​ത്തിൽ ചികി​ത്സ​യ്‌ക്കു വിധേ​യ​മാ​ക്കുക. തൊലി​പ്പു​റത്ത്‌ ആഴത്തിൽ മുറി​വു​ണ്ടാ​യാൽ എപ്പോ​ഴും ഡോക്‌ട​റു​ടെ പക്കൽ കൊണ്ടു​പോ​കണം.

• തൊണ്ട​യിൽ കുരു​ങ്ങി​യാൽ: എന്തെങ്കി​ലും വസ്‌തു​ക്കൾ കുട്ടി​യു​ടെ ശ്വാസ​നാ​ള​ത്തിൽ കുരു​ങ്ങി​യാൽ അത്‌ ഉടനെ പുറ​ത്തെ​ടു​ക്കേ​ണ്ട​താണ്‌. ഹൈം​ലിക്ക്‌ രീതി​യാണ്‌ അവലം​ബി​ക്കാൻ കഴിയുന്ന ഫലപ്ര​ദ​മായ ഒരു മാർഗം. എന്നാൽ നിങ്ങൾക്ക്‌ ഈ രീതിയെ കുറിച്ച്‌ അറിഞ്ഞു​കൂ​ടെ​ങ്കിൽ, അതിനെ സംബന്ധിച്ച്‌ അറിയാൻ നിങ്ങളു​ടെ ഡോക്‌ട​റു​മാ​യി ബന്ധപ്പെ​ടുക അല്ലെങ്കിൽ കുട്ടി​കൾക്ക്‌ അപകടങ്ങൾ സംഭവി​ക്കു​മ്പോൾ ചെയ്യേണ്ട കാര്യ​ങ്ങളെ കുറി​ച്ചോ പ്രഥമ ശുശ്രൂ​ഷയെ കുറി​ച്ചോ പഠിപ്പി​ക്കുന്ന കോഴ്‌സു​ക​ളിൽ പങ്കെടു​ക്കുക.

[കടപ്പാട്‌]

ഉറവിടം: സ്വീഡ​നി​ലെ റെഡ്‌ ക്രോസ്‌

[23-ാം പേജിലെ ചിത്രം]

സൈക്കിളിൽ പോകു​മ്പോൾ സുരക്ഷി​ത​ത്വ​ത്തി​നാ​യി ഹെൽമറ്റ്‌ ധരിക്കുക

[23-ാം പേജിലെ ചിത്രം]

കാർ സീറ്റിൽ സുരക്ഷി​ത​ത്വം