വിശ്വാ​സ​രാ​ഹി​ത്യ​ത്തിന്‌ എതിരെ ജാഗ്ര​ത​യു​ള്ളവർ ആയിരി​ക്കു​ക

“എന്റെ സഹോ​ദ​രരേ, ജീവനുള്ള ദൈവ​ത്തിൽനിന്ന്‌ വിട്ടു​മാ​റി​ക്കൊണ്ട്‌ നിങ്ങളാ​രും വിശ്വാ​സ​ര​ഹി​ത​മായ ഒരു ദുഷ്ട ഹൃദയം വികസി​പ്പി​ച്ചെ​ടു​ക്കാ​തി​രി​ക്കാൻ സൂക്ഷി​ക്കു​വിൻ.”—എബ്രായർ 3:12, NW.

1. എബ്രായ ക്രിസ്‌ത്യാ​നി​കൾക്കുള്ള പൗലൊ​സി​ന്റെ വാക്കുകൾ ഏതു ഞെട്ടി​ക്കുന്ന യാഥാർഥ്യ​ത്തെ നമ്മുടെ ശ്രദ്ധയിൽപ്പെ​ടു​ത്തു​ന്നു?

എത്ര ഭയാന​ക​മായ ആശയം—ഒരിക്കൽ യഹോ​വ​യു​മാ​യി വ്യക്തി​പ​ര​മായ ബന്ധം ആസ്വദി​ച്ചി​രു​ന്നവർ ‘ജീവനുള്ള ദൈവ​ത്തിൽനി​ന്നു വിട്ടു​മാ​റി​ക്കൊണ്ട്‌’ ഒരു “ദുഷ്ട ഹൃദയം” വികസി​പ്പി​ച്ചെ​ടു​ക്കുക! അത്‌ എന്തൊരു മുന്നറി​യി​പ്പാണ്‌! പൗലൊസ്‌ അപ്പൊ​സ്‌ത​ലന്റെ ഈ വാക്കുകൾ അവിശ്വാ​സി​ക​ളെയല്ല, യേശു​ക്രി​സ്‌തു​വി​ന്റെ മറുവില യാഗത്തി​ലുള്ള വിശ്വാ​സ​ത്തി​ന്റെ അടിസ്ഥാ​ന​ത്തിൽ യഹോ​വ​യ്‌ക്കു തങ്ങളുടെ ജീവിതം സമർപ്പി​ച്ചി​ട്ടു​ള്ള​വ​രെ​യാണ്‌ അഭിസം​ബോ​ധന ചെയ്‌തി​രി​ക്കു​ന്നത്‌.

2. നാം ഏതെല്ലാം ചോദ്യ​ങ്ങൾ പരിചി​ന്തി​ക്കേ​ണ്ട​തുണ്ട്‌?

² ആത്മീയ​മാ​യി അനുഗൃ​ഹീ​ത​മായ അത്തരം അവസ്ഥയി​ലുള്ള ആർക്കെ​ങ്കി​ലും “വിശ്വാ​സ​ര​ഹി​ത​മായ ഒരു ദുഷ്ടഹൃ​ദയം” വികസി​പ്പി​ച്ചെ​ടു​ക്കാൻ എങ്ങനെ കഴിയു​മാ​യി​രു​ന്നു? ദൈവ​ത്തി​ന്റെ സ്‌നേ​ഹ​വും അനർഹ ദയയും രുചി​ച്ച​റി​ഞ്ഞി​ട്ടുള്ള ഒരുവന്‌ അവനിൽനിന്ന്‌ എങ്ങനെ​യാണ്‌ മനഃപൂർവം വിട്ടു​മാ​റാൻ കഴിയു​മാ​യി​രു​ന്നത്‌? ഇതു നമ്മിൽ ആർക്കെ​ങ്കി​ലും സംഭവി​ക്കാൻ സാധ്യ​ത​യു​ണ്ടോ? ഗൗരവാ​വ​ഹ​മാ​യി ചിന്തി​ക്കേണ്ട വിഷയ​ങ്ങ​ളാണ്‌ ഇവ. ഈ മുന്നറി​യി​പ്പി​ന്റെ പിന്നിലെ കാരണം പരി​ശോ​ധി​ക്കു​ന്നതു നിശ്ചയ​മാ​യും നമുക്കു പ്രയോ​ജ​ന​ക​ര​മാണ്‌.—1 കൊരി​ന്ത്യർ 10:11.

അത്തരം ശക്തമായ ബുദ്ധ്യു​പ​ദേശം എന്തു​കൊണ്ട്‌?

3. യെരൂ​ശ​ലേ​മി​ലും പരിസ​ര​ത്തും ഉണ്ടായി​രുന്ന, ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കളെ ബാധി​ച്ചി​രുന്ന സ്ഥിതി​വി​ശേ​ഷങ്ങൾ വർണി​ക്കുക.

³ പൗലൊസ്‌ യഹൂദ്യ​യി​ലുള്ള എബ്രായ ക്രിസ്‌ത്യാ​നി​കളെ അഭിസം​ബോ​ധന ചെയ്‌തു​കൊണ്ട്‌ ലേഖനം എഴുതി​യത്‌ പൊ.യു. 61-ൽ ആയിരി​ക്കാം. “യെരൂ​ശ​ലേം നഗരത്തി​ലോ പ്രവി​ശ്യ​യിൽ ഉടനീളം എവി​ടെ​യെ​ങ്കി​ലു​മോ, ഗൗരവ​മാ​ന​സ​രും സത്യസ​ന്ധ​രു​മാ​യ​വർക്ക്‌ യാതൊ​രു സമാധാ​ന​വും സുരക്ഷി​ത​ത്വ​വും ഇല്ലാതി​രുന്ന” സമയമാ​യി​രു​ന്നു ഇത്‌ എന്ന്‌ ഒരു ചരി​ത്ര​കാ​രൻ രേഖ​പ്പെ​ടു​ത്തി​യി​രി​ക്കു​ന്നു. അതു നിയമ​രാ​ഹി​ത്യ​ത്തി​ന്റെ​യും അക്രമ​ത്തി​ന്റെ​യും നാളുകൾ ആയിരു​ന്നു. മർദക​രായ റോമൻ സൈന്യ​ത്തി​ന്റെ സാന്നി​ധ്യ​വും റോമാ​വി​രുദ്ധ യഹൂദ തീവ്ര​വാ​ദി​ക​ളു​ടെ വീമ്പും അതിനി​ട​യിൽ കലക്ക​വെ​ള്ള​ത്തിൽ മീൻ പിടി​ക്കു​ന്ന​വ​രെ​പ്പോ​ലെ​യുള്ള കള്ളന്മാ​രു​ടെ കുറ്റകൃ​ത്യ​ങ്ങ​ളും എല്ലാം അത്തരം ഒരു അവസ്ഥയ്‌ക്ക്‌ വളം​വെ​ച്ചി​രു​ന്നു. ഇതെല്ലാം ക്രിസ്‌ത്യാ​നി​കൾക്കു ജീവിതം വളരെ ദുഷ്‌ക​ര​മാ​ക്കി, അവർ അത്തരം സംഗതി​ക​ളിൽ ഉൾപ്പെ​ടാ​തി​രി​ക്കാൻ പാടു​പെ​ടു​ക​യാ​യി​രു​ന്നു. (1 തിമൊ​ഥെ​യൊസ്‌ 2:1, 2) വാസ്‌ത​വ​ത്തിൽ, അവരുടെ നിഷ്‌പക്ഷ നിലപാ​ടു നിമിത്തം, ചിലർ അവരെ സമൂഹ​ത്തി​നു കൊള്ളാ​ത്ത​വ​രാ​യി, കുഴപ്പ​ക്കാ​രാ​യി പോലും, വീക്ഷി​ച്ചി​രു​ന്നു. ക്രിസ്‌ത്യാ​നി​കൾ മിക്ക​പ്പോ​ഴും ഉപദ്ര​വി​ക്ക​പ്പെ​ട്ടി​രു​ന്നു, അവർക്കു വ്യക്തി​പ​ര​മായ നഷ്ടങ്ങളും നേരി​ട്ടി​രു​ന്നു.—എബ്രായർ 10:32-34.

4. എബ്രായ ക്രിസ്‌ത്യാ​നി​കൾക്ക്‌ മതത്തിൽ നിന്നുള്ള എന്തു സമ്മർദം നേരി​ടേ​ണ്ടി​വന്നു?

⁴ എബ്രായ ക്രിസ്‌ത്യാ​നി​കൾക്ക്‌ മതപര​മായ കടുത്ത എതിർപ്പും നേരി​ട്ടി​രു​ന്നു. യേശു​വി​ന്റെ വിശ്വസ്‌ത ശിഷ്യ​ന്മാ​രു​ടെ തീക്ഷ്‌ണ​ത​യും അതിന്റെ ഫലമായി ക്രിസ്‌തീയ സഭ തഴച്ചു വളരു​ന്ന​തും യഹൂദ​ന്മാ​രിൽ—വിശേ​ഷി​ച്ചും അവരുടെ മതനേ​താ​ക്ക​ളിൽ—അസൂയ​യും വിദ്വേ​ഷ​വും ജനിപ്പി​ച്ചി​രു​ന്നു. യേശു​ക്രി​സ്‌തു​വി​ന്റെ അനുഗാ​മി​കളെ ഉപദ്ര​വി​ക്കാ​നും പീഡി​പ്പി​ക്കാ​നും ലഭിച്ച അവസര​ങ്ങ​ളൊ​ന്നും അവർ പാഴാ​ക്കി​യില്ല.a (പ്രവൃ​ത്തി​കൾ 6:8-14; 21:27-30; 23:12, 13; 24:1-9) ചില ക്രിസ്‌ത്യാ​നി​കൾക്കു നേരി​ട്ടുള്ള പീഡനം ഉണ്ടായി​ല്ലെ​ങ്കി​ലും അവർക്ക്‌ യഹൂദ​ന്മാ​രിൽനി​ന്നുള്ള വെറു​പ്പും പരിഹാ​സ​വും നേരി​ട്ടി​രു​ന്നു. യഹൂദ​മ​ത​ത്തി​ന്റെ പകിട്ടോ ആലയമോ പൗരോ​ഹി​ത്യ​മോ ഉത്സവങ്ങ​ളോ ഔപചാ​രിക ബലിക​ളോ പോലുള്ള സംഗതി​കൾ ഇല്ലാത്ത ഒരു പുതിയ മതമായി ക്രിസ്‌ത്യാ​നി​ത്വം പുച്ഛി​ക്ക​പ്പെ​ട്ടി​രു​ന്നു. അവരുടെ നേതാ​വായ യേശു​പോ​ലും കുറ്റം​ചു​മ​ത്ത​പ്പെട്ട കുറ്റവാ​ളി എന്ന നിലയിൽ വധിക്ക​പ്പെട്ടു. തങ്ങളുടെ മതം ആചരി​ക്കു​ന്ന​തിന്‌ ക്രിസ്‌ത്യാ​നി​കൾക്ക്‌ വിശ്വാ​സ​വും ധൈര്യ​വും സഹിഷ്‌ണു​ത​യും ആവശ്യ​മാ​യി​രു​ന്നു.

5. യഹൂദ്യ​യി​ലെ ക്രിസ്‌ത്യാ​നി​കൾ ആത്മീയ​മാ​യി ജാഗരൂ​ക​രാ​യി നില​കൊ​ള്ളു​ന്നത്‌ അത്യന്താ​പേ​ക്ഷി​തം ആയിരു​ന്നത്‌ എന്തു​കൊണ്ട്‌?

⁵ എല്ലാറ്റി​നും ഉപരി, യഹൂദ്യ​യി​ലെ എബ്രായ ക്രിസ്‌ത്യാ​നി​കൾ ജീവി​ച്ചി​രു​ന്നത്‌ അതിന്റെ ചരി​ത്ര​ത്തി​ലെ ഒരു നിർണാ​യക സമയത്ത്‌ ആയിരു​ന്നു. യഹൂദ വ്യവസ്ഥി​തി​യു​ടെ അന്ത്യത്തി​ന്റെ അടയാ​ള​മെന്നു തങ്ങളുടെ കർത്താ​വായ യേശു​ക്രി​സ്‌തു പറഞ്ഞ അനേകം സംഗതി​കൾ അതി​നോ​ട​കം​തന്നെ സംഭവി​ച്ചി​രു​ന്നു. അന്ത്യം താമസി​യാ​തെ സംഭവി​ക്കു​മാ​യി​രു​ന്നു. അതിജീ​വി​ക്കു​ന്ന​തിന്‌, ക്രിസ്‌ത്യാ​നി​കൾ ആത്മീയ​മാ​യി ജാഗരൂ​ക​രാ​യും ‘മലകളി​ലേക്കു ഓടി​പ്പോ​കാ’നുള്ള തയ്യാ​റെ​ടു​പ്പു​ക​ളോ​ടു​കൂ​ടെ​യും നില​കൊ​ള്ളേ​ണ്ടി​യി​രു​ന്നു. (മത്തായി 24:6, 15, 16) യേശു നിർദേ​ശി​ച്ചി​രു​ന്ന​തു​പോ​ലെ, സത്വര നടപടി കൈ​ക്കൊ​ള്ളു​ന്ന​തിന്‌ ആവശ്യ​മായ വിശ്വാ​സ​വും ആത്മീയ കരുത്തും അവർക്ക്‌ ഉണ്ടായി​രി​ക്കു​മാ​യി​രു​ന്നോ? കുറച്ച്‌ സംശയം ഉണ്ടായി​രു​ന്ന​താ​യി കാണ​പ്പെ​ട്ടി​രു​ന്നു.

6. യഹൂദ്യ​യി​ലെ ക്രിസ്‌ത്യാ​നി​കൾക്ക്‌ അടിയ​ന്തി​ര​മാ​യി എന്ത്‌ ആവശ്യ​മാ​യി​രു​ന്നു?

⁶ മുഴു യഹൂദ വ്യവസ്ഥി​തി​യു​ടെ​യും വിഘട​ന​ത്തി​നു മുമ്പുള്ള അവസാന പതിറ്റാ​ണ്ടിൽ, എബ്രായ ക്രിസ്‌ത്യാ​നി​കൾക്ക്‌ വ്യക്തമാ​യും സഭയുടെ അകത്തു​നി​ന്നും പുറത്തു​നി​ന്നും കടുത്ത സമ്മർദം നേരി​ട്ടി​രു​ന്നു. അവർക്ക്‌ പ്രോ​ത്സാ​ഹനം ആവശ്യ​മാ​യി​രു​ന്നു. എന്നാൽ തങ്ങൾ തിര​ഞ്ഞെ​ടു​ത്തി​രി​ക്കുന്ന ഗതി ശരിയാ​യ​താ​ണെ​ന്നും തങ്ങളുടെ കഷ്ടപ്പാ​ടു​ക​ളും സഹിഷ്‌ണു​ത​യും വ്യർഥ​മ​ല്ലെ​ന്നും മനസ്സി​ലാ​ക്കാൻ സഹായി​ക്കുന്ന ബുദ്ധ്യു​പ​ദേ​ശ​വും നിർദേ​ശ​ങ്ങ​ളും അവർക്ക്‌ ആവശ്യ​മാ​യി​രു​ന്നു. സന്തോ​ഷ​ക​ര​മെന്നു പറയട്ടെ, പൗലൊസ്‌ അവസര​ത്തി​നൊ​ത്തു പ്രവർത്തി​ക്കു​ക​യും അവരുടെ സഹായ​ത്തിന്‌ എത്തുക​യും ചെയ്‌തു.

7. പൗലൊസ്‌ എബ്രായ ക്രിസ്‌ത്യാ​നി​കൾക്ക്‌ എഴുതി​യ​തിൽ നാം തത്‌പരർ ആയിരി​ക്കേ​ണ്ടത്‌ എന്തു​കൊണ്ട്‌?

⁷ പൗലൊസ്‌ എബ്രായ ക്രിസ്‌ത്യാ​നി​കൾക്ക്‌ എഴുതി​യ​തിൽ നാമും വളരെ തത്‌പ​ര​രാ​യി​രി​ക്കണം. എന്തു​കൊണ്ട്‌? എന്തെന്നാൽ അവരു​ടേ​തിന്‌ സമാന​മായ കാലത്താണ്‌ നാം ജീവി​ക്കു​ന്നത്‌. സാത്താന്റെ നിയ​ന്ത്ര​ണ​ത്തി​ലുള്ള ലോക​ത്തിൽനി​ന്നു നമുക്കു ദിവസേന സമ്മർദം നേരി​ടു​ന്നു. (1 യോഹ​ന്നാൻ 5:19) അന്ത്യകാ​ല​ത്തെ​യും “വ്യവസ്ഥി​തി​യു​ടെ സമാപന”ത്തെയും കുറി​ച്ചുള്ള യേശു​വി​ന്റെ​യും അപ്പൊ​സ്‌ത​ല​ന്മാ​രു​ടെ​യും പ്രവച​നങ്ങൾ നമ്മുടെ കൺമു​മ്പാ​കെ നിറ​വേ​റു​ക​യാണ്‌. (മത്തായി 24:3-14, NW; 2 തിമൊ​ഥെ​യൊസ്‌ 3:1-5; 2 പത്രൊസ്‌ 3:3, 4; വെളി​പ്പാ​ടു 6:1-8) എല്ലാറ്റി​നും ഉപരി, “സംഭവി​പ്പാ​നുള്ള ഈ സംഗതി​ക​ളിൽ നിന്നെ​ല്ലാം രക്ഷപ്പെ​ടു​ന്ന​തിൽ വിജയി​ക്കാൻ കഴിയേ”ണ്ടതിന്‌ നാം ആത്മീയ​മാ​യി ജാഗരൂ​കർ ആയിരി​ക്കേ​ണ്ടത്‌ ആവശ്യ​മാണ്‌.—ലൂക്കൊസ്‌ 21:36, NW.

മോശ​യെ​ക്കാൾ വലിയവൻ

8. എബ്രായർ 3:1-ൽ രേഖ​പ്പെ​ടു​ത്തി​യി​രി​ക്കു​ന്നത്‌ പറയു​ന്ന​തി​ലൂ​ടെ, പൗലൊസ്‌ സഹക്രി​സ്‌ത്യാ​നി​കളെ എന്തു ചെയ്യാൻ ഉദ്‌ബോ​ധി​പ്പി​ക്കു​ക​യാ​യി​രു​ന്നു?

⁸ ഒരു ജീവത്‌പ്ര​ധാ​ന​മായ ആശയം സൂചി​പ്പി​ച്ചു​കൊണ്ട്‌, പൗലൊസ്‌ എഴുതി: “നാം ഏറ്റുപ​റ​യുന്ന അപ്പൊ​സ്‌ത​ല​നും മഹാപു​രോ​ഹി​ത​നു​മായ യേശു​വി​നെ​ക്കു​റി​ച്ചു പരിചി​ന്തി​ക്കുക.” (എബ്രായർ 3:1, NW) “പരിചി​ന്തി​ക്കുക” എന്നതിന്റെ അർഥം “വ്യക്തമാ​യി ഗ്രഹി​ക്കുക . . . , പൂർണ​മാ​യി അറിയുക, അടുത്തു പരിചി​ന്തി​ക്കുക” എന്നൊ​ക്കെ​യാണ്‌. (വൈൻസ്‌ എക്‌സ്‌പോ​സി​റ്ററി ഡിക്‌ഷ​നറി ഓഫ്‌ ഓൾഡ്‌ ആൻഡ്‌ ന്യൂ ടെസ്റ്റ​മെന്റ്‌ വേർഡ്‌സ്‌) അങ്ങനെ തങ്ങളുടെ വിശ്വാ​സ​ത്തി​ലും രക്ഷയി​ലും യേശു വഹിച്ച പങ്കി​നോ​ടു യഥാർഥ വിലമ​തി​പ്പു വളർത്തി​യെ​ടു​ക്കു​ന്ന​തിന്‌ ശുഷ്‌കാ​ന്തി​യോ​ടെ ശ്രമം നടത്താൻ പൗലൊസ്‌ തന്റെ സഹവി​ശ്വാ​സി​കളെ ഉദ്‌ബോ​ധി​പ്പി​ക്കുക ആയിരു​ന്നു. ഇതു ചെയ്യു​ന്നത്‌ വിശ്വാ​സ​ത്തിൽ ഉറച്ചു നിൽക്കു​ന്ന​തി​നുള്ള അവരുടെ ദൃഢനി​ശ്ച​യത്തെ ബലിഷ്‌ഠ​മാ​ക്കു​മാ​യി​രു​ന്നു. അപ്പോൾ യേശു​വി​ന്റെ പങ്ക്‌ എന്തായി​രു​ന്നു, നാം എന്തിന്‌ അവനെ​ക്കു​റി​ച്ചു “പരിചി​ന്തിക്ക”ണം?

9. പൗലൊസ്‌ യേശു​വി​നെ “അപ്പൊ​സ്‌തലൻ” എന്നും “മഹാപു​രോ​ഹി​തൻ” എന്നും പരാമർശി​ച്ചത്‌ എന്തു​കൊണ്ട്‌?

⁹ പൗലൊസ്‌ യേശു​വി​നെ “അപ്പൊ​സ്‌തലൻ” എന്നും “മഹാപു​രോ​ഹി​തൻ” എന്നും പരാമർശി​ച്ചു. “അപ്പൊ​സ്‌തലൻ” അയയ്‌ക്ക​പ്പെ​ടുന്ന ഒരുവൻ ആണ്‌, ഇവിടെ അത്‌ മനുഷ്യ​വർഗ​വു​മാ​യി ആശയവി​നി​യമം ചെയ്യു​ന്ന​തി​നുള്ള ദൈവ​ത്തി​ന്റെ ഉപാധി​യെ പരാമർശി​ക്കു​ന്നു. മനുഷ്യർക്ക്‌ ദൈവത്തെ സമീപി​ക്കാൻ സാധി​ക്കുന്ന മാധ്യ​മ​മാണ്‌ “മഹാപു​രോ​ഹി​തൻ.” ഈ രണ്ടു കരുത​ലു​ക​ളും സത്യാ​രാ​ധ​ന​യ്‌ക്ക്‌ അത്യന്താ​പേ​ക്ഷി​ത​മാണ്‌, യേശു അതിന്റെ രണ്ടി​ന്റെ​യും ആൾരൂപം ആണ്‌. അവൻ ദൈവത്തെ കുറി​ച്ചുള്ള സത്യം മനുഷ്യ​വർഗത്തെ പഠിപ്പി​ക്കാൻ സ്വർഗ​ത്തിൽനിന്ന്‌ അയയ്‌ക്ക​പ്പെ​ട്ട​വ​നാണ്‌. (യോഹ​ന്നാൻ 1:18; 3:16; 14:6) പാപ​മോ​ച​ന​ത്തി​നാ​യുള്ള യഹോ​വ​യു​ടെ ആത്മീയ ആലയ ക്രമീ​ക​ര​ണ​ത്തി​ലെ പ്രതി​മാ​തൃ​കാ മഹാപു​രോ​ഹി​തൻ എന്ന നിലയിൽ നിയമി​തൻ ആയിരി​ക്കു​ന്ന​തും യേശു ആണ്‌. (എബ്രായർ 4:14, 15; 1 യോഹ​ന്നാൻ 2:1, 2) യേശു​വി​ലൂ​ടെ നേടാ​വുന്ന അനു​ഗ്ര​ഹ​ങ്ങളെ നാം യഥാർഥ​ത്തിൽ വിലമ​തി​ക്കു​ന്നെ​ങ്കിൽ, വിശ്വാ​സ​ത്തിൽ ഉറച്ചു നിൽക്കു​ന്ന​തി​നുള്ള ധൈര്യ​വും ദൃഢനി​ശ്ച​യ​വും നമുക്ക്‌ ഉണ്ടായി​രി​ക്കും.

10. (എ) യഹൂദ മതത്തെ അപേക്ഷിച്ച്‌ ക്രിസ്‌ത്യാ​നി​ത്വ​ത്തി​നുള്ള ശ്രേഷ്‌ഠത വിലമ​തി​ക്കാൻ പൗലൊസ്‌ എബ്രായ ക്രിസ്‌ത്യാ​നി​കളെ സഹായി​ച്ചത്‌ എങ്ങനെ? (ബി) തന്റെ ആശയത്തെ ദൃഢീ​ക​രി​ക്കു​ന്ന​തി​നാ​യി പൗലൊസ്‌ ഏതു സാർവ​ലൗ​കിക സത്യം പരാമർശി​ക്കു​ന്നു?

¹⁰ ക്രിസ്‌തീയ വിശ്വാ​സ​ത്തി​ന്റെ മൂല്യം ഊന്നി​പ്പ​റ​യാൻ, പൗലൊസ്‌ യേശു​വി​നെ മോശ​യു​മാ​യി താരത​മ്യ​പ്പെ​ടു​ത്തി. തങ്ങളുടെ പൂർവി​കർക്ക്‌ ഇടയിലെ ഏറ്റവും വലിയ പ്രവാ​ച​ക​നാ​യി യഹൂദർ വീക്ഷി​ക്കു​ന്നത്‌ മോശയെ ആണ്‌. യേശു മോശ​യെ​ക്കാൾ വലിയ​വ​നാണ്‌ എന്ന വസ്‌തുത എബ്രായ ക്രിസ്‌ത്യാ​നി​കൾക്ക്‌ മുഴു ഹൃദയ​ത്തോ​ടെ ഗ്രഹി​ക്കാൻ കഴിഞ്ഞി​രു​ന്നെ​ങ്കിൽ, യഹൂദ മതത്തെ​ക്കാൾ ശ്രേഷ്‌ഠ​മാണ്‌ ക്രിസ്‌ത്യാ​നി​ത്വം എന്നു സംശയ​ലേ​ശ​മെ​ന്യേ വിശ്വ​സി​ക്കാൻ അവർക്ക്‌ കഴിയു​മാ​യി​രു​ന്നു. ദൈവ​ത്തി​ന്റെ ‘ഗൃഹം’—ഇസ്രാ​യേൽ ജനത, അഥവാ സഭ—ഭരമേൽപ്പി​ക്ക​പ്പെ​ടാൻ മോശ യോഗ്യ​നാ​യി എണ്ണപ്പെട്ടു എങ്കിലും, അവൻ കേവലം ഒരു വിശ്വസ്‌ത സേവകൻ, അഥവാ ദാസൻ മാത്ര​മാ​യി​രു​ന്നു എന്നു പൗലൊസ്‌ സൂചി​പ്പി​ച്ചു. (സംഖ്യാ​പു​സ്‌തകം 12:7) നേരേ​മ​റിച്ച്‌, യേശു ഗൃഹത്തി​ന്മേൽ യജമാനൻ ആയ പുത്ര​നാ​യി​രു​ന്നു. (1 കൊരി​ന്ത്യർ 11:3; എബ്രായർ 3:2, 3, 5) തന്റെ ആശയത്തെ ദൃഢീ​ക​രി​ക്കാൻ, പൗലൊസ്‌ ഈ സാർവ​ലൗ​കിക സത്യം പരാമർശി​ച്ചു: “ഏതു ഭവനവും ചമെപ്പാൻ ഒരാൾ വേണം; സർവ്വവും ചമെച്ചവൻ ദൈവം തന്നേ.” (എബ്രായർ 3:4) എല്ലാവ​രു​ടെ​യും നിർമാ​താവ്‌, അല്ലെങ്കിൽ സ്രഷ്ടാവ്‌ ആയതു​കൊണ്ട്‌ ദൈവം ഏതൊ​രു​വ​നി​ലും വലിയവൻ ആണെന്ന​തി​നെ ആരും ഖണ്ഡിക്കു​ക​യില്ല. അപ്പോൾ യുക്തി​പൂർവ​ക​മാ​യി പറയു​ക​യാ​ണെ​ങ്കിൽ, യേശു ദൈവ​ത്തി​ന്റെ സഹപ്ര​വർത്തകൻ ആയതു​കൊണ്ട്‌, മോശ ഉൾപ്പെ​ടെ​യുള്ള മറ്റെല്ലാ സൃഷ്ടി​ക​ളെ​ക്കാ​ളും വലിയവൻ ആയിരി​ക്കണം.—സദൃശ​വാ​ക്യ​ങ്ങൾ 8:30; കൊ​ലൊ​സ്സ്യർ 1:15-17.

11, 12. “അവസാ​ന​ത്തോ​ളം” എന്ത്‌ “മുറു​കെ​പ്പി​ടി​ച്ചു”കൊണ്ടി​രി​ക്കാൻ പൗലൊസ്‌ എബ്രായ ക്രിസ്‌ത്യാ​നി​കളെ ഉദ്‌ബോ​ധി​പ്പി​ച്ചു, അവന്റെ ബുദ്ധ്യു​പ​ദേശം നമുക്ക്‌ എങ്ങനെ ബാധക​മാ​ക്കാൻ കഴിയും?

¹¹ സത്യമാ​യും, എബ്രായ ക്രിസ്‌ത്യാ​നി​കൾ ഏറെ അനുഗൃ​ഹീത സ്ഥാനത്താ​യി​രു​ന്നു. യഹൂദ മതത്തിനു നൽകാൻ കഴിയു​മാ​യി​രുന്ന എന്തി​നെ​ക്കാ​ളും വലിയ, നിധി​യെ​ന്ന​പോ​ലെ കരുതേണ്ട ഒരു പദവി അവർക്കു​ണ്ടെന്ന്‌, അതായത്‌ അവർ “സ്വർഗ്ഗീ​യ​വി​ളി​ക്കു ഓഹരി​ക്കാ​രാ”ണെന്ന്‌ പൗലൊസ്‌ അവരെ ഓർമി​പ്പി​ച്ചു. (എബ്രായർ 3:1) യഹൂദ പൈതൃ​ക​വു​മാ​യി ബന്ധപ്പെട്ട സംഗതി​കൾ ഉപേക്ഷി​ക്കേ​ണ്ടി​വ​ന്ന​തിൽ ദുഃഖം തോന്നു​ന്ന​തി​നു പകരം, പൗലൊ​സി​ന്റെ വാക്കുകൾ ആ അഭിഷിക്ത ക്രിസ്‌ത്യാ​നി​കളെ, തങ്ങൾക്ക്‌ ഒരു പുതിയ അവകാശം ലഭിക്കാ​നി​രി​ക്കു​ന്നു എന്നതിന്റെ വീക്ഷണ​ത്തിൽ, കൃതജ്ഞ​ത​യു​ള്ളവർ ആക്കിയി​രി​ക്കണം. (ഫിലി​പ്പി​യർ 3:8) തങ്ങളുടെ പദവി നിസ്സാ​ര​മാ​യി കാണാതെ അതി​നോ​ടു പറ്റിനിൽക്കാൻ അവരെ പ്രോ​ത്സാ​ഹി​പ്പി​ച്ചു​കൊണ്ട്‌, പൗലൊസ്‌ പറഞ്ഞു: “ക്രിസ്‌തു​വോ [ദൈവ​ത്തി​ന്റെ] ഭവനത്തി​ന്നു അധികാ​രി​യായ പുത്ര​നാ​യി​ട്ടു തന്നേ; പ്രത്യാ​ശ​യു​ടെ ധൈര്യ​വും പ്രശം​സ​യും നാം അവസാ​ന​ത്തോ​ളം മുറു​കെ​പ്പി​ടി​ച്ചു​കൊ​ണ്ടാൽ നാം തന്നേ അവന്റെ ഭവനം ആകുന്നു.”—എബ്രായർ 3:6.

¹² അതേ, എബ്രായ ക്രിസ്‌ത്യാ​നി​കൾ യഹൂദ വ്യവസ്ഥി​തി​യു​ടെ ആസന്നമാ​യി​രുന്ന സമാപ​നത്തെ അതിജീ​വി​ക്ക​ണ​മെ​ങ്കിൽ, അവർ തങ്ങളുടെ ദൈവദത്ത പ്രത്യാശ “അവസാ​ന​ത്തോ​ളം” മുറു​കെ​പ്പി​ടി​ക്കേണ്ട ആവശ്യ​മു​ണ്ടാ​യി​രു​ന്നു. ഈ വ്യവസ്ഥി​തി​യു​ടെ സമാപ​നത്തെ അതിജീ​വി​ക്കാൻ ആഗ്രഹി​ക്കു​ന്നെ​ങ്കിൽ, ഇന്ന്‌ നാമും അതുതന്നെ ചെയ്യണം. (മത്തായി 24:13) ദൈവ​ത്തി​ന്റെ വാഗ്‌ദാ​ന​ങ്ങ​ളി​ലുള്ള നമ്മുടെ വിശ്വാ​സ​ത്തിൽനി​ന്നു ചഞ്ചലി​ക്കാൻ ജീവിത ഉത്‌ക​ണ്‌ഠ​ക​ളെ​യോ ആളുക​ളു​ടെ വിരക്തി​യെ​യോ നമ്മു​ടെ​തന്നെ അപൂർണ പ്രവണ​ത​ക​ളെ​യോ അനുവ​ദി​ക്ക​രുത്‌. (ലൂക്കൊസ്‌ 21:16-19) നമുക്കു സ്വയം എങ്ങനെ ബലിഷ്‌ഠ​രാ​ക്കാ​മെന്നു കാണു​ന്ന​തിന്‌, പൗലൊ​സി​ന്റെ കൂടു​ത​ലായ വാക്കുകൾ ശ്രദ്ധി​ക്കാം.

“നിങ്ങളു​ടെ ഹൃദയത്തെ കഠിന​മാ​ക്ക​രുത്‌”

13. പൗലൊസ്‌ എന്തു മുന്നറി​യിപ്പ്‌ നൽകി, അവൻ സങ്കീർത്തനം 95 ബാധക​മാ​ക്കി​യത്‌ എങ്ങനെ?

¹³ എബ്രായ ക്രിസ്‌ത്യാ​നി​ക​ളു​ടെ അനുഗൃ​ഹീത സ്ഥാന​ത്തെ​ക്കു​റി​ച്ചു പരിചി​ന്തി​ച്ച​ശേഷം, പൗലൊസ്‌ ഈ മുന്നറി​യി​പ്പു നൽകി: ‘പരിശു​ദ്ധാ​ത്മാ​വു അരുളി​ച്ചെ​യ്യു​ന്നതു പോലെ: “ഇന്നു നിങ്ങൾ അവന്റെ ശബ്ദം ശ്രദ്ധി​ക്കു​ന്നു​വെ​ങ്കിൽ മരുഭൂ​മി​യിൽവെച്ചു കടുത്ത പ്രകോ​പ​ന​മു​ണ്ടായ സന്ദർഭ​ത്തെ​യും പരീക്ഷാ​ദി​വ​സ​ത്തെ​യും പോലെ നിങ്ങളു​ടെ ഹൃദയത്തെ കഠിന​മാ​ക്ക​രുത്‌.”’ (എബ്രായർ 3:7, 8, NW) പൗലൊസ്‌ 95-ാം സങ്കീർത്ത​ന​ത്തിൽനിന്ന്‌ ഉദ്ധരി​ക്കു​ക​യാ​യി​രു​ന്നു, അതു​കൊണ്ട്‌ ‘പരിശു​ദ്ധാ​ത്മാ​വു അരുളി​ച്ചെ​യ്യു​ന്നു’ എന്നു പറയാൻ അവനു കഴിഞ്ഞു.b (സങ്കീർത്തനം 95:7, 8; പുറപ്പാ​ടു 17:1-7) ദൈവം തന്റെ പരിശു​ദ്ധാ​ത്മാ​വി​നാൽ നിശ്വ​സ്‌ത​മാ​ക്കി​യ​താ​ണു തിരു​വെ​ഴു​ത്തു​കൾ.—2 തിമൊ​ഥെ​യൊസ്‌ 3:16.

14. തങ്ങൾക്കു​വേണ്ടി യഹോവ ചെയ്‌തി​രി​ക്കു​ന്ന​തി​നോട്‌ ഇസ്രാ​യേ​ല്യർ പ്രതി​ക​രി​ച്ചത്‌ എങ്ങനെ, എന്തു​കൊണ്ട്‌?

¹⁴ ഈജി​പ്‌തി​ലെ അടിമ​ത്ത​ത്തിൽനി​ന്നു സ്വത​ന്ത്ര​രാ​ക്ക​പ്പെ​ട്ട​ശേഷം, യഹോ​വ​യു​മാ​യി ഒരു ഉടമ്പടി ബന്ധത്തി​ലേക്കു പ്രവേ​ശി​ക്കു​ന്ന​തി​നുള്ള ഒരു വലിയ പദവി ഇസ്രാ​യേ​ല്യർക്കു നൽക​പ്പെട്ടു. (പുറപ്പാ​ടു 19:4, 5; 24:7, 8) എന്നിരു​ന്നാ​ലും, തങ്ങൾക്കു വേണ്ടി ദൈവം ചെയ്‌തി​രി​ക്കുന്ന സംഗതി​ക​ളോ​ടു വിലമ​തി​പ്പു പ്രകട​മാ​ക്കു​ന്ന​തി​നു പകരം, അവർ മത്സരിച്ചു. (സംഖ്യാ​പു​സ്‌തകം 13:25–14:10) അതിന്‌ എങ്ങനെ കഴിയു​മാ​യി​രു​ന്നു? പൗലൊസ്‌ കാരണം സൂചി​പ്പി​ച്ചു: ഹൃദയത്തെ കഠിന​മാ​ക്കൽ. എന്നാൽ ദൈവ വചനത്താൽ ബാധി​ക്ക​പ്പെ​ടു​ന്ന​തും അതി​നോ​ടു പ്രതി​ക​രി​ക്കു​ന്ന​തു​മായ ഹൃദയം കഠിനം ആയിത്തീ​രു​ന്നത്‌ എങ്ങനെ? ഇതു തടയാൻ നാം എന്തു ചെയ്യണം?

15. (എ) കഴിഞ്ഞ കാലത്തും ഇക്കാല​ത്തും ‘ദൈവ​ത്തി​ന്റെ ശബ്ദം’ കേൾപ്പി​ക്ക​പ്പെ​ട്ടി​രി​ക്കു​ന്നത്‌ എങ്ങനെ? (ബി) ‘ദൈവ​ത്തി​ന്റെ ശബ്ദം’ സംബന്ധി​ച്ചു നാം നമ്മോ​ടു​തന്നെ ഏതെല്ലാം ചോദ്യ​ങ്ങൾ ചോദി​ക്കേ​ണ്ട​തുണ്ട്‌?

¹⁵ “നിങ്ങൾ അവന്റെ ശബ്ദം ശ്രദ്ധി​ക്കു​ന്നു​വെ​ങ്കിൽ” എന്ന ഒരു വ്യവസ്ഥ​യോ​ടെ​യാണ്‌ പൗലൊസ്‌ തന്റെ മുന്നറി​യി​പ്പു തുടങ്ങു​ന്നത്‌. ദൈവം മോശ​യി​ലൂ​ടെ​യും മറ്റു പ്രവാ​ച​ക​ന്മാ​രി​ലൂ​ടെ​യും ആളുക​ളോ​ടു സംസാ​രി​ച്ചു. പിന്നെ, യഹോവ അവരോട്‌ തന്റെ പുത്ര​നായ യേശു​ക്രി​സ്‌തു​വി​ലൂ​ടെ സംസാ​രി​ച്ചു. (എബ്രായർ 1:1, 2) ഇന്ന്‌, നമുക്ക്‌ ദൈവ​ത്തി​ന്റെ സമ്പൂർണ നിശ്വസ്‌ത വചനമായ വിശുദ്ധ ബൈബിൾ ഉണ്ട്‌. “തക്ക സമയത്തു” ആത്മീയ “ഭക്ഷണം” പ്രദാനം ചെയ്യേ​ണ്ട​തിന്‌ യേശു നിയമിച്ച “വിശ്വ​സ്‌ത​നും വിവേ​കി​യു​മായ അടിമ”യും നമുക്കുണ്ട്‌. (മത്തായി 24:45-47, NW) അതു​കൊണ്ട്‌, ദൈവം ഇപ്പോ​ഴും സംസാ​രി​ക്കു​ന്നുണ്ട്‌. എന്നാൽ നാം ശ്രദ്ധി​ക്കു​ന്നു​ണ്ടോ? ഉദാഹ​ര​ണ​ത്തിന്‌, വസ്‌ത്ര​ധാ​ര​ണ​ത്തെ​യും ചമയ​ത്തെ​യും, അല്ലെങ്കിൽ വിനോ​ദം, സംഗീതം എന്നിവ​യു​ടെ തിര​ഞ്ഞെ​ടു​പ്പി​നെ​യും കുറി​ച്ചുള്ള ബുദ്ധ്യു​പ​ദേ​ശ​ത്തോ​ടു നാം എങ്ങനെ​യാ​ണു പ്രതി​ക​രി​ക്കു​ന്നത്‌? നാം “ശ്രദ്ധി​ക്കു​ന്നു”ണ്ടോ, അതായത്‌ കേൾക്കു​ന്നത്‌ ശ്രദ്ധി​ക്കു​ക​യും അനുസ​രി​ക്കു​ക​യും ചെയ്യു​ന്നു​ണ്ടോ? ബുദ്ധ്യു​പ​ദേശം ലഭിക്കു​മ്പോൾ നാം ഒഴിക​ഴി​വു കണ്ടെത്തു​ക​യോ എതിർക്കു​ക​യോ ചെയ്യുന്ന ശീലമു​ള്ളവർ ആണെങ്കിൽ, നാം നമ്മുടെ ഹൃദയത്തെ കഠിന​മാ​ക്കു​ക​യെന്ന കുടി​ല​മായ അപകട​ത്തി​ലേക്ക്‌ അടുക്കു​ക​യാണ്‌.

16. നമ്മുടെ ഹൃദയം കഠിനം ആയിത്തീ​രാൻ കഴിയുന്ന ഒരു വിധം ഏത്‌?

¹⁶ ചെയ്യാൻ കഴിയു​ന്ന​തും ചെയ്യേ​ണ്ട​തു​മായ സംഗതി​യിൽനിന്ന്‌ ഒഴിവു തേടു​ന്ന​തും നമ്മുടെ ഹൃദയത്തെ കഠിന​മാ​ക്കും. (യാക്കോബ്‌ 4:17) യഹോവ ഇസ്രാ​യേ​ലി​നു വേണ്ടി പലതും പ്രവർത്തി​ച്ചി​ട്ടും, അവർ വിശ്വാ​സം പ്രകട​മാ​ക്കാൻ പരാജ​യ​പ്പെട്ടു, മോശ​യ്‌ക്ക്‌ എതിരെ മത്സരിച്ചു, കനാനെ കുറി​ച്ചുള്ള നിഷേ​ധാ​ത്മക റിപ്പോർട്ട്‌ വിശ്വ​സി​ക്കാൻ തീരു​മാ​നി​ച്ചു, വാഗ്‌ദത്ത ദേശത്ത്‌ പ്രവേ​ശി​ക്കാൻ വിസമ്മ​തി​ച്ചു. (സംഖ്യാ​പു​സ്‌തകം 14:1-4) അതു​കൊണ്ട്‌ അവർ 40 വർഷം മരുഭൂ​മി​യിൽ ചെലവ​ഴി​ക്കു​മെന്ന്‌ യഹോവ കൽപ്പിച്ചു—ആ തലമു​റ​യി​ലെ വിശ്വാ​സ​ര​ഹി​ത​രായ അംഗങ്ങൾ മൺമറ​യാൻ അത്രയും സമയം മതിയാ​കു​മാ​യി​രു​ന്നു. അവരോ​ടു വെറുപ്പു തോന്നി, ദൈവം പറഞ്ഞു: “അവർ എപ്പോ​ഴും തെററി​പ്പോ​കുന്ന ഹൃദയ​മു​ള്ളവർ . . . എന്റെ വഴികളെ അറിയാ​ത്തവർ . . . അവർ എന്റെ സ്വസ്ഥത​യിൽ [“വിശ്ര​മ​ത്തിൽ,” NW] പ്രവേ​ശി​ക്ക​യില്ല എന്നു ഞാൻ എന്റെ ക്രോ​ധ​ത്തിൽ സത്യം ചെയ്‌തു.” (എബ്രായർ 3:9-11) ഇതിൽ നമു​ക്കൊ​രു പാഠം കാണു​ന്നു​ണ്ടോ?

നമു​ക്കൊ​രു പാഠം

17. യഹോ​വ​യു​ടെ വീര്യ​പ്ര​വൃ​ത്തി​കൾ കണ്ടിട്ടും അവന്റെ പ്രഖ്യാ​പ​നങ്ങൾ കേട്ടി​ട്ടും ഇസ്രാ​യേ​ല്യർ വിശ്വാ​സ​രാ​ഹി​ത്യം പ്രകട​മാ​ക്കി​യത്‌ എന്തു​കൊണ്ട്‌?

¹⁷ ഇസ്രാ​യേ​ലി​ന്റെ, ഈജി​പ്‌തിൽനി​ന്നു പുറത്തു​വന്ന തലമുറ സ്വന്തം കണ്ണു​കൊണ്ട്‌ യഹോ​വ​യു​ടെ വീര്യ​പ്ര​വൃ​ത്തി​കൾ കണ്ടവരും സ്വന്തം ചെവി​കൊണ്ട്‌ അവന്റെ പ്രഖ്യാ​പ​നങ്ങൾ കേട്ടവ​രും ആയിരു​ന്നു. എന്നിട്ടും, ദൈവ​ത്തി​നു തങ്ങളെ വാഗ്‌ദത്ത ദേശ​ത്തേക്കു സുരക്ഷി​ത​മാ​യി നയിക്കാൻ കഴിയു​മെന്ന വിശ്വാ​സം അവർക്ക്‌ ഇല്ലായി​രു​ന്നു. എന്തു​കൊണ്ട്‌? “അവർ . . . എന്റെ വഴികളെ അറിയാ​ത്തവർ” ആയിരു​ന്നു​വെന്ന്‌ യഹോവ പറയുന്നു. യഹോവ പറഞ്ഞതും ചെയ്‌ത​തും അവർക്ക്‌ അറിയാ​മാ​യി​രു​ന്നു, എന്നാൽ തങ്ങൾക്കു​വേണ്ടി കരുതു​ന്ന​തി​നുള്ള അവന്റെ പ്രാപ്‌തി​യിൽ അവർ ഉറപ്പും ആശ്രയ​വും വികസി​പ്പിച്ച്‌ എടുത്തി​രു​ന്നില്ല. ദൈവ​ത്തി​ന്റെ വഴികളെ കുറി​ച്ചും ഉദ്ദേശ്യ​ത്തെ കുറി​ച്ചും ചിന്തി​ക്കാൻ കഴിയാ​തെ​വണ്ണം അവർ വ്യക്തി​പ​ര​മായ ആവശ്യ​ങ്ങ​ളി​ലും ആഗ്രഹ​ങ്ങ​ളി​ലും മുഴു​കി​പ്പോ​യി. അതേ, അവന്റെ വാഗ്‌ദാ​ന​ത്തിൽ അവർക്കു വിശ്വാ​സം ഇല്ലായി​രു​ന്നു.

18. പൗലൊസ്‌ പറയുന്ന പ്രകാരം, ഏതു പ്രവർത്തന ഗതി “വിശ്വാ​സ​ര​ഹി​ത​മായ ഒരു ദുഷ്ട ഹൃദയ”ത്തിൽ കലാശി​ക്കും?

¹⁸ എബ്രാ​യർക്കുള്ള ഈ കൂടു​ത​ലായ വാക്കുകൾ അവർക്കെ​ന്ന​പോ​ലെ നമുക്കും ബാധക​മാണ്‌: “എന്റെ സഹോ​ദ​രരേ, ജീവനുള്ള ദൈവ​ത്തിൽനിന്ന്‌ വിട്ടു​മാ​റി​ക്കൊണ്ട്‌ നിങ്ങളാ​രും വിശ്വാ​സ​ര​ഹി​ത​മായ ഒരു ദുഷ്ട ഹൃദയം വികസി​പ്പി​ച്ചെ​ടു​ക്കാ​തി​രി​ക്കാൻ സൂക്ഷി​ക്കു​വിൻ.” (എബ്രായർ 3:12, NW) “ജീവനുള്ള ദൈവ​ത്തിൽനിന്ന്‌ വിട്ടു​മാ​റു”ന്നതിന്റെ ഫലമാണ്‌ “വിശ്വാ​സ​ര​ഹി​ത​മായ ഒരു ദുഷ്ട ഹൃദയം” എന്നു സൂചി​പ്പി​ച്ചു​കൊണ്ട്‌ പൗലൊസ്‌ അതിന്റെ അടിസ്ഥാന കാരണ​ത്തി​ലേക്കു കടക്കുന്നു. തന്റെ ഈ ലേഖന​ത്തി​ന്റെ ഏതാണ്ട്‌ ആദ്യ ഭാഗത്ത്‌, ശ്രദ്ധയി​ല്ലായ്‌മ നിമിത്തം, ‘ഒഴുകി​പ്പോ​കുന്ന’തിനെ​ക്കു​റിച്ച്‌ അവൻ സംസാ​രി​ച്ചി​രു​ന്നു. (എബ്രായർ 2:1) എന്നിരു​ന്നാ​ലും, “വിട്ടു​മാ​റൽ” എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന ഗ്രീക്കു പദത്തിന്റെ അർഥം “മാറി നിൽക്കുക” എന്നാണ്‌, ഇത്‌ “വിശ്വാ​സ​ത്യാ​ഗം” എന്ന പദവു​മാ​യി ബന്ധപ്പെ​ട്ടി​രി​ക്കു​ന്നു. അത്‌ മനഃപൂർവ​വും ബോധ​പൂർവ​വു​മായ, അതേസ​മയം വെറു​പ്പോ​ടെ​യുള്ള ചെറു​ത്തു​നിൽപ്പി​നെ, പിൻവാ​ങ്ങ​ലി​നെ, കൂറു​മാ​റ്റത്തെ അർഥമാ​ക്കു​ന്നു.

19. ബുദ്ധ്യു​പ​ദേശം ശ്രദ്ധി​ക്കാൻ പരാജ​യ​പ്പെ​ടു​ന്നത്‌ ഗുരു​ത​ര​മായ ഭവിഷ്യ​ത്തു​ക​ളി​ലേക്കു നയി​ച്ചേ​ക്കാ​വു​ന്നത്‌ എങ്ങനെ? ദൃഷ്ടാ​ന്തീ​ക​രി​ക്കുക.

¹⁹ അതു​കൊണ്ട്‌, പാഠം ഇതാണ്‌: യഹോ​വ​യു​ടെ വചനത്തി​ലൂ​ടെ​യും വിശ്വസ്‌ത അടിമ​വർഗ​ത്തി​ലൂ​ടെ​യും അവനിൽനി​ന്നു ലഭിക്കുന്ന ബുദ്ധ്യു​പ​ദേശം അവഗണി​ച്ചു​കൊണ്ട്‌ ‘അവന്റെ ശബ്ദം ശ്രദ്ധി​ക്കാൻ’ നാം പരാജ​യ​പ്പെ​ടു​ന്ന​തിൽ തുടരു​ന്നെ​ങ്കിൽ, താമസി​യാ​തെ നമ്മുടെ ഹൃദയം പ്രതി​ക​ര​ണ​ശേഷി നഷ്ടപ്പെട്ട്‌ കഠിന​മാ​യി​ത്തീ​രും. ഉദാഹ​ര​ണ​ത്തിന്‌, ഒരു അവിവാ​ഹിത ഇണകൾ പരിധി​വിട്ട്‌ പെരു​മാ​റി എന്നിരി​ക്കട്ടെ. അവർ സംഗതി കേവലം അവഗണി​ക്കു​ന്നെ​ങ്കി​ലോ? തങ്ങൾ ചെയ്‌തത്‌ ആവർത്തി​ക്കു​ന്ന​തിൽനിന്ന്‌ അത്‌ അവരെ സംരക്ഷി​ക്കു​മോ, അതോ അത്‌ അവർക്ക്‌ ചെയ്‌ത​തു​തന്നെ വീണ്ടും ചെയ്യാൻ കൂടുതൽ എളുപ്പം ആക്കിത്തീർക്കു​മോ? അതു​പോ​ലെ, സംഗീ​ത​വും വിനോ​ദ​വും പോലുള്ള സംഗതി​കൾ തിര​ഞ്ഞെ​ടു​ക്കു​ന്ന​തിൽ സൂക്ഷ്‌മ​ത​യു​ള്ളവർ ആയിരി​ക്കേണ്ട ആവശ്യം സംബന്ധിച്ച്‌ അടിമ​വർഗം ബുദ്ധ്യു​പ​ദേശം നൽകു​മ്പോൾ, നാം അതു നന്ദിപൂർവം സ്വീക​രി​ക്കു​ക​യും ആവശ്യ​മാ​യി​രി​ക്കു​ന്നി​ടത്ത്‌ പൊരു​ത്ത​പ്പെ​ടു​ത്ത​ലു​കൾ വരുത്തു​ക​യും ചെയ്യു​ന്നു​ണ്ടോ? ‘നമ്മുടെ സഭാ​യോ​ഗ​ങ്ങളെ ഉപേക്ഷി​ക്ക​രുത്‌’ എന്നു പൗലൊസ്‌ നമ്മെ ഉദ്‌ബോ​ധി​പ്പി​ച്ചു. (എബ്രായർ 10:24, 25) ഈ ബുദ്ധ്യു​പ​ദേശം ഉണ്ടായി​രു​ന്നി​ട്ടും, ചിലർ ക്രിസ്‌തീയ യോഗ​ങ്ങളെ ഉദാസീ​ന​ത​യോ​ടെ വീക്ഷി​ക്കു​ന്നു. അവയിൽ ചിലതു നഷ്ടപ്പെ​ട്ടാ​ലും, അല്ലെങ്കിൽ ചില യോഗങ്ങൾ തീർത്തും ഒഴിവാ​ക്കി​യാ​ലും കുഴപ്പ​മി​ല്ലെന്ന്‌ അവർ വിചാ​രി​ക്കു​ന്നു.

20. നാം തിരു​വെ​ഴു​ത്തു​പ​ര​മായ ബുദ്ധ്യു​പ​ദേ​ശ​ത്തോട്‌ ഒരു ക്രിയാ​ത്മ​ക​മായ വിധത്തിൽ പ്രതി​ക​രി​ക്കു​ന്നത്‌ അത്യന്താ​പേ​ക്ഷി​തം ആയിരി​ക്കു​ന്നത്‌ എന്തു​കൊണ്ട്‌?

²⁰ തിരു​വെ​ഴു​ത്തു​ക​ളി​ലും ബൈബി​ള​ധി​ഷ്‌ഠിത പ്രസി​ദ്ധീ​ക​ര​ണ​ങ്ങ​ളി​ലും വ്യക്തമാ​യി പ്രതി​ഫ​ലി​പ്പി​ച്ചി​രി​ക്കുന്ന യഹോ​വ​യു​ടെ “ശബ്ദ”ത്തോടു നാം ക്രിയാ​ത്മ​ക​മാ​യി പ്രതി​ക​രി​ക്കു​ന്നി​ല്ലെ​ങ്കിൽ, താമസി​യാ​തെ നാം “ജീവനുള്ള ദൈവ​ത്തിൽനിന്ന്‌ വിട്ടു​മാ​റും”. ബുദ്ധ്യു​പ​ദേ​ശ​ത്തോ​ടുള്ള നിസ്സംഗത എളുപ്പ​ത്തിൽ തീവ്ര​മായ തുച്ഛീ​ക​ര​ണ​ത്തി​ലേ​ക്കും വിമർശ​ന​ത്തി​ലേ​ക്കും ചെറു​ത്തു​നിൽപ്പി​ലേ​ക്കും നയിക്കും. തിരു​ത്തു​ന്നി​ല്ലെ​ങ്കിൽ, “വിശ്വാ​സ​ര​ഹി​ത​മായ ഒരു ദുഷ്ട ഹൃദയം” ആയിരി​ക്കും ഫലം, അത്തര​മൊ​രു ഗതിയിൽ നിന്നുള്ള തിരി​ച്ചു​വ​രവ്‌ സാധാ​ര​ണ​മാ​യി വളരെ ദുഷ്‌ക​ര​മാണ്‌. (എഫെസ്യർ 4:19 താരത​മ്യം ചെയ്യുക.) യിരെ​മ്യാ​വു ഉചിത​മാ​യി​ത്തന്നെ എഴുതി: “ഹൃദയം എല്ലാറ​റി​നെ​ക്കാ​ളും കപടവും വിഷമ​വു​മു​ള്ളതു; അതു ആരാഞ്ഞ​റി​യു​ന്നവൻ ആർ?” (യിരെ​മ്യാ​വു 17:9) ഇക്കാര​ണ​ത്താൽ, പൗലൊസ്‌ തന്റെ എബ്രായ സഹവി​ശ്വാ​സി​കളെ ഇങ്ങനെ ഉദ്‌ബോ​ധി​പ്പി​ച്ചു: ‘നിങ്ങൾ ആരും പാപത്തി​ന്റെ ചതിയാൽ കഠിന​പ്പെ​ടാ​തി​രി​ക്കേ​ണ്ട​തി​ന്നു “ഇന്നു” എന്നു പറയു​ന്നേ​ട​ത്തോ​ളം നാൾതോ​റും അന്യോ​ന്യം പ്രബോ​ധി​പ്പി​ച്ചു​കൊൾവിൻ.’—എബ്രായർ 3:13.

21. നാം എല്ലാവ​രും എന്തു ചെയ്യാൻ ഉദ്‌ബോ​ധി​പ്പി​ക്ക​പ്പെ​ടു​ന്നു, നമുക്ക്‌ എന്തെല്ലാം ഭാവി​പ്ര​തീ​ക്ഷകൾ ഉണ്ട്‌?

²¹ നമ്മുടെ ഇക്കാല​ത്തും യഹോവ തന്റെ വചനത്തി​ലൂ​ടെ​യും തന്റെ സ്ഥാപന​ത്തി​ലൂ​ടെ​യും നമ്മോടു സംസാ​രി​ക്കു​ന്ന​തിൽ നാം എത്ര സന്തുഷ്ട​രാണ്‌! “വിശ്വ​സ്‌ത​നും വിവേ​കി​യു​മായ അടിമ” നമ്മെ “ആദ്യവി​ശ്വാ​സം അവസാ​ന​ത്തോ​ളം മുറു​കെ​പ്പി​ടി”ക്കാൻ തുടർന്നും സഹായി​ക്കു​ന്ന​തിൽ നാം എത്ര നന്ദിയു​ള്ള​വ​രാണ്‌. (എബ്രായർ 3:14) ദൈവ​ത്തി​ന്റെ സ്‌നേ​ഹ​ത്തോ​ടും മാർഗ​നിർദേ​ശ​ത്തോ​ടും പ്രതി​ക​രി​ക്കാ​നുള്ള സമയമാണ്‌ ഇപ്പോൾ. നാം അങ്ങനെ ചെയ്യവേ, നമുക്കു യഹോ​വ​യു​ടെ മഹത്തായ മറ്റൊരു വാഗ്‌ദാ​നം ആസ്വദി​ക്കാൻ കഴിയും—അവന്റെ വിശ്ര​മ​ത്തിൽ ‘പ്രവേ​ശി​ക്കൽ’ എന്നത്‌. (എബ്രായർ 4:3, 10) അതാണ്‌ പൗലൊസ്‌ എബ്രാ​യ​രോട്‌ അടുത്ത​താ​യി ചർച്ച ചെയ്യുന്ന വിഷയം. അതു നമ്മുടെ അടുത്ത ലേഖന​ത്തി​ന്റെ വിഷയ​വു​മാണ്‌.

[അടിക്കു​റി​പ്പു​കൾ]

നിങ്ങൾക്കു വിശദീ​ക​രി​ക്കാ​മോ?

□ പൗലൊസ്‌ എബ്രായ ക്രിസ്‌ത്യാ​നി​കൾക്ക്‌ അത്തരം ശക്തമായ ബുദ്ധ്യു​പ​ദേശം എഴുതി​യത്‌ എന്തു​കൊണ്ട്‌?

□ യഹൂദ​മ​ത​ത്തിൻ കീഴിലെ ജീവി​ത​ത്തെ​ക്കാൾ മെച്ചമായ ഒരു സംഗതി തങ്ങൾക്ക്‌ ഉണ്ടെന്നു മനസ്സി​ലാ​ക്കാൻ പൗലൊസ്‌ എബ്രായ ക്രിസ്‌ത്യാ​നി​കളെ സഹായി​ച്ചത്‌ എങ്ങനെ?

□ ഒരുവന്റെ ഹൃദയം എങ്ങനെ കഠിനം ആയിത്തീർന്നേ​ക്കാം?

□ “വിശ്വാ​സ​ര​ഹി​ത​മായ ഒരു ദുഷ്ട ഹൃദയം” വികസി​പ്പി​ച്ചെ​ടു​ക്കു​ന്നത്‌ ഒഴിവാ​ക്കാൻ നാം എന്തു ചെയ്യണം?

[10-ാം പേജിലെ ചിത്രം]

വലിയ മോശ​യായ യേശു​വിൽ നിങ്ങൾ വിശ്വാ​സം പ്രകട​മാ​ക്കു​ന്നു​ണ്ടോ?