പൊടി​യാൽ നിർമി​ത​മെ​ങ്കി​ലും മുന്നേ​റുക!

“അവൻ നമ്മുടെ പ്രകൃതി അറിയു​ന്നു​വ​ല്ലോ; നാം പൊടി എന്നുഅവൻ ഓർക്കു​ന്നു.”—സങ്കീർത്തനം 103:14.

1. മനുഷ്യർ പൊടി​യാൽ നിർമി​ത​മാ​ണെന്നു ബൈബിൾ പറയു​ന്നത്‌ ശാസ്‌ത്രീ​യ​മാ​യി ശരിയാ​ണോ? വിശദീ​ക​രി​ക്കുക.

ഭൗതി​ക​മാ​യി എടുത്താൽ നാം പൊടി​യാണ്‌. “യഹോ​വ​യായ ദൈവം നിലത്തെ പൊടി​കൊ​ണ്ടു മനുഷ്യ​നെ നിർമ്മി​ച്ചി​ട്ടു അവന്റെ മൂക്കിൽ ജീവശ്വാ​സം ഊതി, മനുഷ്യൻ ജീവനുള്ള ദേഹി​യാ​യി​ത്തീർന്നു.” (ഉല്‌പത്തി 2:7) മമനു​ഷ്യ​ന്റെ സൃഷ്ടി​യെ​ക്കു​റി​ച്ചുള്ള ലളിത​മായ ഈ വിവരണം ശാസ്‌ത്രീയ സത്യവു​മാ​യി യോജി​ക്കു​ന്ന​താണ്‌. മനുഷ്യ​ശ​രീ​രം ഉണ്ടാക്ക​പ്പെ​ട്ടി​രി​ക്കുന്ന 90-ലധികം വരുന്ന ഘടകങ്ങ​ളെ​ല്ലാം “നിലത്തെ പൊടി”യിൽ കാണണം. പ്രായ​പൂർത്തി​യെ​ത്തിയ ഒരു മനുഷ്യ​ശ​രീ​ര​ത്തിൽ 65 ശതമാനം ഓക്‌സി​ജ​നും 18 ശതമാനം കാർബ​ണും 10 ശതമാനം ഹൈ​ഡ്ര​ജ​നും 3 ശതമാനം നൈ​ട്ര​ജ​നും 1.5 ശതമാനം കാൽസ്യ​വും 1 ശതമാനം ഫോസ്‌ഫ​റ​സും ബാക്കി മററു മൂലക​ങ്ങ​ളു​മാ​ണു​ള്ള​തെന്നു രസത​ന്ത്ര​ജ്ഞൻമാർ ഒരിക്കൽ അവകാ​ശ​പ്പെ​ട്ടി​രു​ന്നു. ഈ കണക്കു മുഴു​വ​നാ​യും ശരിയാ​ണോ എന്നത്‌ അപ്രധാ​ന​മാണ്‌. എങ്കിലും വസ്‌തുത അവശേ​ഷി​ക്കു​ന്നു: ‘നാം പൊടി​യാ​കു​ന്നു’!

2. ദൈവം മനുഷ്യ​രെ സൃഷ്ടിച്ച വിധം നിങ്ങളിൽ എന്തു പ്രതി​ക​രണം ഉളവാ​ക്കു​ന്നു, എന്തു​കൊണ്ട്‌?

² പൊടി​കൊ​ണ്ടു​തന്നെ ഇത്ര സങ്കീർണ​മായ ജീവജാ​ല​ങ്ങളെ സൃഷ്ടി​ക്കാൻ യഹോ​വക്ക്‌ അല്ലാതെ മററാർക്കാ​ണു കഴിയുക? ദൈവ​ത്തി​ന്റെ വേലകൾ പൂർണ​ത​യു​ള്ള​താണ്‌. അവയ്‌ക്കു ന്യൂന​ത​യില്ല. അതു​കൊണ്ട്‌, അവൻ മനുഷ്യ​രെ ഈ വിധം സൃഷ്ടി​ക്കാൻ തീരു​മാ​നി​ച്ച​തിൽ തീർച്ച​യാ​യും പരാതി​ക്കു വകയില്ല. ഭൂമി​യി​ലെ പൊടി​യിൽനി​ന്നു ഭയജന​ക​വും അത്ഭുത​ക​ര​വു​മായ വിധത്തിൽ മഹാ​സ്ര​ഷ്ടാ​വി​നു മനുഷ്യ​നെ സൃഷ്ടി​ക്കാൻ കഴിഞ്ഞു​വെ​ന്നത്‌ അവന്റെ അപരി​മേയ ശക്തിയി​ലും വൈദ​ഗ്‌ധ്യ​ത്തി​ലും പ്രാ​യോ​ഗിക ജ്ഞാനത്തി​ലു​മുള്ള നമ്മുടെ വിലമ​തി​പ്പു വർധി​പ്പി​ക്കു​ന്നു.—ആവർത്ത​ന​പു​സ്‌തകം 32:4, അടിക്കുറിപ്പ്‌, NW; സങ്കീർത്തനം 139:14.

സാഹച​ര്യ​മാ​റ​റം

3, 4. (എ) പൊടി​യിൽനി​ന്നു മനുഷ്യ​നെ സൃഷ്ടി​ച്ച​പ്പോൾ ദൈവം എന്ത്‌ ഉദ്ദേശി​ച്ചില്ല? (ബി) സങ്കീർത്തനം 103:14-ൽ ദാവീദ്‌ എന്തി​നെ​ക്കു​റി​ച്ചാ​ണു പരാമർശി​ച്ചത്‌, ഈ നിഗമ​ന​ത്തി​ലെ​ത്താൻ സന്ദർഭം നമ്മെ സഹായി​ക്കു​ന്ന​തെ​ങ്ങനെ?

³ പൊടി​യാൽ നിർമി​ത​മായ ജീവജാ​ല​ങ്ങൾക്കു പരിമി​തി​ക​ളുണ്ട്‌. എന്നുവ​രി​കി​ലും, ഇവ ഭാര​പ്പെ​ടു​ത്തു​ന്ന​തോ ക്രമാ​തീ​ത​മാ​യി കൂച്ചു​വി​ല​ങ്ങി​ടു​ന്ന​തോ ആയിരി​ക്കാൻ ദൈവം ഒരിക്ക​ലും ഉദ്ദേശി​ച്ചില്ല. അവ മടുപ്പു​ള​വാ​ക്കാ​നോ അസന്തുഷ്ടി വരുത്താ​നോ ആയിരു​ന്നില്ല. എങ്കിലും, സങ്കീർത്തനം 103:14-ലെ ദാവീ​ദി​ന്റെ വാക്കു​ക​ളു​ടെ സന്ദർഭം സൂചി​പ്പി​ക്കു​ന്ന​തു​പോ​ലെ, മനുഷ്യ​നെ ബന്ധനസ്ഥ​നാ​ക്കുന്ന പരിമി​തി​കൾ മടുപ്പി​നി​ട​യാ​ക്കു​ക​യും അസന്തു​ഷ്ടി​യിൽ കലാശി​ക്കു​ക​യും ചെയ്യാ​നാ​കും. എന്തു​കൊണ്ട്‌? ആദാമും ഹവ്വായും ദൈവ​ത്തോട്‌ അനുസ​ര​ണ​ക്കേടു കാട്ടി​യ​പ്പോൾ തങ്ങളുടെ ഭാവി കുടും​ബ​ങ്ങൾക്കു മാററം വരുത്തിയ ഒരു സ്ഥിതി​വി​ശേഷം അവർ കൈവ​രു​ത്തി. അതോടെ, പൊടി​യാൽ നിർമി​ത​മെ​ന്ന​തിന്‌ ഒരു പുതിയ അർഥം കൈവന്നു.a

⁴ ദാവീദ്‌ സംസാ​രി​ച്ചത്‌ പൊടി​യാൽ നിർമി​ത​മായ പൂർണ​ത​യുള്ള മനുഷ്യർക്കു​പോ​ലും ഉണ്ടാകു​മാ​യി​രുന്ന പ്രകൃ​ത്യാ​ലുള്ള പരിമി​തി​ക​ളെ​ക്കു​റി​ച്ചാ​യി​രു​ന്നില്ല, മറിച്ച്‌, അവകാ​ശ​പ്പെ​ടു​ത്തി​യി​രി​ക്കുന്ന അപൂർണത നിമി​ത്ത​മുള്ള മമനു​ഷ്യ​ന്റെ ചാപല്യ​ങ്ങ​ളെ​ക്കു​റി​ച്ചാ​യി​രു​ന്നു. അല്ലായി​രു​ന്നെ​ങ്കിൽ അദ്ദേഹം യഹോ​വ​യെ​ക്കു​റിച്ച്‌ ഇങ്ങനെ പറയു​മാ​യി​രു​ന്നില്ല: “അവൻ നിന്റെ അകൃത്യം ഒക്കെയും മോചി​ക്കു​ന്നു; നിന്റെ സകല​രോ​ഗ​ങ്ങ​ളെ​യും സൌഖ്യ​മാ​ക്കു​ന്നു; അവൻ നിന്റെ ജീവനെ നാശത്തിൽനി​ന്നു വീണ്ടെ​ടു​ക്കു​ന്നു; അവൻ നമ്മുടെ പാപങ്ങൾക്കു ഒത്തവണ്ണം നമ്മോടു ചെയ്യു​ന്നില്ല; നമ്മുടെ അകൃത്യ​ങ്ങൾക്കു ഒത്തവണ്ണം നമ്മോടു പകരം ചെയ്യു​ന്ന​തു​മില്ല.” (സങ്കീർത്തനം 103:2-4, 10) പൊടി​യാൽ നിർമി​ത​മാ​യി​രു​ന്നെ​ങ്കി​ലും, പൂർണ​ത​യുള്ള മനുഷ്യർ വിശ്വ​സ്‌ത​രാ​യി നില​കൊ​ണ്ടി​രു​ന്നെ​ങ്കിൽ ക്ഷമ ആവശ്യ​മാ​ക്കി​ത്തീർക്കു​മാറ്‌ അവർ തെററി​പ്പോ​കു​ക​യി​ല്ലാ​യി​രു​ന്നു, പാപം ചെയ്യു​ക​യി​ല്ലാ​യി​രു​ന്നു. സൗഖ്യ​മാ​ക്കൽ ആവശ്യ​മുള്ള അസുഖ​ങ്ങ​ളും അവർക്ക്‌ ഉണ്ടാകു​മാ​യി​രു​ന്നില്ല. എല്ലാറ​റി​ലു​മു​പരി, പുനരു​ത്ഥാ​ന​ത്തി​ലൂ​ടെ മാത്രം വീണ്ടെ​ടുപ്പ്‌ ആവശ്യ​മാ​കു​മാറ്‌ അവർക്ക്‌ ഒരിക്ക​ലും മരണക്കു​ഴി​യി​ലേക്ക്‌ ഇറങ്ങേ​ണ്ട​താ​യും വരുമാ​യി​രു​ന്നില്ല.

5. ദാവീ​ദി​ന്റെ വാക്കുകൾ മനസ്സി​ലാ​ക്കാൻ നമുക്കു ബുദ്ധി​മു​ട്ടി​ല്ലാ​ത്തത്‌ എന്തു​കൊണ്ട്‌?

⁵ അപൂർണ​രാ​യ​തു​കൊണ്ട്‌, ദാവീദ്‌ സംസാ​രിച്ച സംഗതി​കൾ നാമെ​ല്ലാ​വ​രും അനുഭ​വി​ച്ചി​ട്ടുണ്ട്‌. അപൂർണത ഹേതു​വാ​യുള്ള നമ്മുടെ കുറവു​കളെ കുറിച്ചു നാം നിരന്തരം ബോധ​വാൻമാ​രാണ്‌. യഹോ​വ​യു​മാ​യോ നമ്മുടെ ക്രിസ്‌തീയ സഹോ​ദ​ര​ങ്ങ​ളു​മാ​യോ ഉള്ള നമ്മുടെ ബന്ധത്തെ അവ ചില​പ്പോ​ഴൊ​ക്കെ താറു​മാ​റാ​ക്കു​ന്നു​വെന്നു തോന്നി​ക്കുന്ന സമയത്തു നാം ദുഃഖി​ത​രാ​യി​ത്തീ​രു​ന്നു. നമ്മുടെ അപൂർണ​ത​ക​ളും സാത്താന്റെ ലോക​ത്തി​ന്റെ സമ്മർദ​ങ്ങ​ളും നമ്മെ നിരാ​ശ​യി​ലാ​ഴ്‌ത്തു​മ്പോൾ നാം വല്ലാതെ വിഷമി​ക്കു​ന്നു. സാത്താന്റെ ലോകം അതിന്റെ അന്ത്യത്തി​ലേക്കു പാഞ്ഞടു​ക്കു​ക​യാണ്‌. അതു​കൊണ്ട്‌, ജനങ്ങൾക്കു പൊതു​വേ​യും ക്രിസ്‌ത്യാ​നി​കൾക്കു വിശേ​ഷി​ച്ചും അവന്റെ ലോകം കൂടുതൽ സമ്മർദം സൃഷ്ടി​ക്കു​ക​യാണ്‌.—വെളി​പ്പാ​ടു 12:12.

6. ചില ക്രിസ്‌ത്യാ​നി​കൾക്കു മടുപ്പു തോന്നി​യേ​ക്കാ​വു​ന്ന​തെ​ന്തു​കൊണ്ട്‌, അത്തരം വികാ​രത്തെ സാത്താൻ എപ്രകാ​രം മുത​ലെ​ടു​ത്തേ​ക്കാം?

⁶ ഒരു ക്രിസ്‌ത്യാ​നി​യാ​യി ജീവി​ക്കു​ന്നതു കൂടുതൽ ദുഷ്‌ക​ര​മാ​കു​ക​യാ​ണെന്നു നിങ്ങൾക്കു തോന്നു​ന്നു​ണ്ടോ? സത്യത്തിൽ എത്രനാൾ നിലനിൽക്കു​ന്നു​വോ അത്രയ​ധി​കം അപൂർണ​രാ​യി​ത്തീ​രു​ന്ന​തു​പോ​ലെ തോന്നു​ന്നു എന്ന്‌ ചില ക്രിസ്‌ത്യാ​നി​കൾ പറയു​ന്ന​താ​യി കേട്ടി​ട്ടുണ്ട്‌. എന്നിരു​ന്നാ​ലും, തങ്ങളുടെ അപൂർണ​ത​ക​ളെ​ക്കു​റി​ച്ചും യഹോ​വ​യു​ടെ പൂർണ​ത​യുള്ള നിലവാ​ര​ങ്ങ​ളോട്‌ അനുരൂ​പ​പ്പെ​ടാൻ ആഗ്രഹ​മു​ണ്ടെ​ങ്കി​ലും അവർക്ക്‌ അതിനു കഴിയാ​തെ പോകു​ന്നു എന്ന വസ്‌തു​ത​യെ​ക്കു​റി​ച്ചും അവർ കൂടുതൽ ബോധ​വാൻമാ​രാ​യി​ത്തീ​രു​ന്നു എന്നതാ​വാം വാസ്‌തവം. യഹോ​വ​യു​ടെ നീതി​യുള്ള പ്രമാ​ണ​ങ്ങ​ളെ​ക്കു​റിച്ച്‌ പരിജ്ഞാ​ന​വും വിലമ​തി​പ്പും വർധി​ക്കു​ന്തോ​റും അത്തര​മൊ​രു പരിണ​തി​യു​ണ്ടാ​കു​ന്ന​തി​നുള്ള സാധ്യത സ്വാഭാ​വി​ക​മാണ്‌. പിശാ​ചി​ന്റെ കൈക​ളിൽപ്പെ​ട്ടു​പോ​കു​ന്നി​ടം​വരെ അത്തരത്തി​ലുള്ള ഏതൊരു അവബോ​ധ​വും നമ്മെ മടുപ്പി​ക്കാൻ നാം ഒരിക്ക​ലും അനുവ​ദി​ക്ക​രുത്‌ എന്നതു മർമ​പ്ര​ധാ​ന​മാണ്‌. യഹോ​വ​യു​ടെ ദാസൻമാ​രെ​ക്കൊണ്ട്‌ സത്യാ​രാ​ധന വിട്ടു​ക​ള​യി​പ്പി​ക്കാൻവേണ്ടി ഈ മടുപ്പി​നെ മുത​ലെ​ടു​ക്കാൻ നൂററാ​ണ്ടു​ക​ളി​ലൂ​ടെ അവൻ ആവർത്തി​ച്ചു ശ്രമി​ച്ചി​ട്ടുണ്ട്‌. എന്നിരു​ന്നാ​ലും, ദൈവ​ത്തോ​ടുള്ള യഥാർഥ സ്‌നേ​ഹ​വും പിശാ​ചി​നോ​ടുള്ള “സമ്പൂർണ വെറു​പ്പും” നിമിത്തം മിക്കവർക്കും അങ്ങനെ ചെയ്യാ​തി​രി​ക്കാൻ കഴിഞ്ഞി​ട്ടുണ്ട്‌.—സങ്കീർത്തനം 139:21, 22, NW; സദൃശ​വാ​ക്യ​ങ്ങൾ 27:11.

7. ഏതു സംഗതി​യിൽ നാം ചില​പ്പോൾ ഇയ്യോ​ബി​നെ​പ്പോ​ലെ​യാ​യേ​ക്കാം?

⁷ എന്നാലും, യഹോ​വ​യു​ടെ ദാസൻമാർക്കു വല്ലപ്പോ​ഴു​മൊ​ക്കെ മടുപ്പു തോന്നി​യേ​ക്കാം. നമ്മുടെ സ്വന്തം നേട്ടങ്ങ​ളി​ലുള്ള അസംതൃ​പ്‌തി​യും ഒരു കാരണ​മാ​കാം. ശാരീ​രിക ഘടകങ്ങ​ളോ കുടും​ബാം​ഗങ്ങൾ, സുഹൃ​ത്തു​ക്കൾ, അല്ലെങ്കിൽ സഹപ്ര​വർത്തകർ എന്നിവ​രു​മാ​യുള്ള അററു​പോ​കാ​റായ ബന്ധങ്ങളോ ഒക്കെ അതിലുൾപ്പെ​ട്ടേ​ക്കാം. അത്യധി​കം മടുപ്പു നേരിട്ട വിശ്വ​സ്‌ത​നായ ഇയ്യോബ്‌ ദൈവ​ത്തോട്‌ ഇതു​പോ​ലൊ​രു യാചന​പോ​ലും നടത്തി: “നീ എന്നെ പാതാ​ള​ത്തിൽ മറെച്ചു​വെ​ക്ക​യും നിന്റെ കോപം കഴിയു​വോ​ളം എന്നെ ഒളിപ്പി​ക്ക​യും എനിക്കു ഒരവധി നിശ്ചയി​ച്ചു എന്നെ ഓർക്കു​ക​യും ചെയ്‌തു​വെ​ങ്കിൽ കൊള്ളാ​യി​രു​ന്നു.” അപ്പോൾ, “നിഷ്‌ക​ള​ങ്ക​നും നേരു​ള്ള​വ​നും ദൈവ​ഭ​ക്ത​നും ദോഷം വിട്ടക​ലു​ന്ന​വനു”മായ ഇയ്യോ​ബി​നെ​ക്കൊണ്ട്‌ പ്രയാ​സ​ക​ര​മായ സാഹച​ര്യ​ങ്ങൾ മടുപ്പിൻ വചനങ്ങൾ ഉച്ചരി​പ്പി​ച്ചെ​ങ്കിൽ, ഒട്ടും അത്ഭുതം വേണ്ട, അതുതന്നെ നമുക്കും സംഭവി​ക്കാം.—ഇയ്യോബ്‌ 1:8, 13-19; 2:7-9, 11-13; 14:3.

8. വല്ലപ്പോ​ഴു​മൊ​ക്കെ​യുള്ള മടുപ്പ്‌ ഒരു ഗുണക​ര​മായ അടയാ​ള​മാ​യി​രി​ക്കാ​വു​ന്നത്‌ എന്തു​കൊണ്ട്‌?

⁸ യഹോവ ഹൃദയ​ത്തി​ലേക്കു നോക്കു​ന്നു​വെ​ന്നും നല്ല ആന്തരങ്ങളെ അവഗണി​ക്കു​ന്നി​ല്ലെ​ന്നും അറിയു​ന്നത്‌ എത്ര ആശ്വാ​സ​ദാ​യ​ക​മാണ്‌! അവനെ പ്രീതി​പ്പെ​ടു​ത്താൻ അങ്ങേയ​ററം ആത്മാർഥ​ത​യോ​ടെ കിണഞ്ഞു പരി​ശ്ര​മി​ക്കു​ന്ന​വരെ അവൻ ഒരിക്ക​ലും തള്ളിക്ക​ള​യു​ക​യില്ല. വാസ്‌ത​വ​ത്തിൽ, വല്ലപ്പോ​ഴു​മൊ​ക്കെ​യുള്ള മടുപ്പു യഹോ​വ​ക്കുള്ള നമ്മുടെ സേവനം നമ്മൾ നിസ്സാ​ര​മാ​യി കാണു​ന്നി​ല്ലെന്നു സൂചി​പ്പി​ക്കുന്ന ഒരു ഗുണക​ര​മായ അടയാ​ള​മാ​യി​രി​ക്കാം. ഇങ്ങനെ നോക്കു​മ്പോൾ, മടുപ്പു​മാ​യി ഒരിക്ക​ലും പോരാ​ടാ​തി​രി​ക്കുന്ന ഒരുവൻ തന്റെ ബലഹീ​ന​ത​ക​ളെ​പ്പ​ററി മററു​ള്ളവർ തങ്ങളു​ടേ​തി​നെ​ക്കു​റി​ച്ചു ബോധ​വാൻമാ​രാ​യി​രി​ക്കു​ന്ന​തു​പോ​ലെ അത്ര ബോധ​വാ​നാ​യി​രി​ക്ക​യില്ല. ഓർക്കുക: “ആകയാൽ താൻ നില്‌ക്കു​ന്നു എന്നു തോന്നു​ന്നവൻ വീഴാ​തി​രി​പ്പാൻ നോക്കി​ക്കൊ​ള്ളട്ടെ.”—1 കൊരി​ന്ത്യർ 10:12; 1 ശമൂവേൽ 16:7; 1 രാജാ​ക്കൻമാർ 8:39; 1 ദിനവൃ​ത്താ​ന്തം 28:9.

അവരും പൊടി​യാൽ നിർമി​ത​മാ​യി​രു​ന്നു

9, 10. (എ) ക്രിസ്‌ത്യാ​നി​കൾ ആരുടെ വിശ്വാ​സം അനുക​രി​ക്കണം? (ബി) തന്റെ നിയമ​ന​ത്തോ​ടു മോശ പ്രതി​ക​രി​ച്ച​തെ​ങ്ങനെ?

⁹ ക്രിസ്‌തീയ കാലഘ​ട്ട​ത്തി​നു മുമ്പുള്ള, ശക്തമായ വിശ്വാ​സം ആചരി​ച്ചി​രുന്ന അനേകം യഹോ​വ​യു​ടെ സാക്ഷി​ക​ളു​ടെ ഒരു പട്ടിക എബ്രായർ 11-ാം അധ്യാ​യ​ത്തി​ലുണ്ട്‌. ഒന്നാം നൂററാ​ണ്ടി​ലെ​യും ആധുനി​ക​നാ​ളി​ലെ​യും ക്രിസ്‌ത്യാ​നി​കൾ അങ്ങനെ ചെയ്‌തി​ട്ടുണ്ട്‌. നമുക്ക്‌ അവരിൽനി​ന്നു വില​യേ​റിയ പാഠങ്ങൾ പഠിക്കാ​നുണ്ട്‌. (താരത​മ്യം ചെയ്യുക: എബ്രായർ 13:7.) ഉദാഹ​ര​ണ​ത്തിന്‌, മോശ​യു​ടെ വിശ്വാ​സ​ത്തെ​ക്കാൾ മെച്ചമാ​യി ആരുടെ വിശ്വാ​സ​ത്തെ​യാണ്‌ ക്രിസ്‌ത്യാ​നി​കൾക്ക്‌ അനുക​രി​ക്കാ​നാ​വുക? അന്നത്തെ ഏററവും ശക്തനായ ലോക​ഭ​ര​ണാ​ധി​പ​നായ, ഈജി​പ്‌തി​ലെ ഫറവോ​നു ന്യായ​വി​ധി ദൂതു പ്രഖ്യാ​പി​ക്കാ​നാ​യി​രു​ന്നു അദ്ദേഹത്തെ വിളി​ച്ചത്‌. ഇന്ന്‌, വ്യാജ​മ​ത​ത്തി​നെ​തി​രെ​യും ക്രിസ്‌തു​വി​ന്റെ സ്ഥാപി​ത​രാ​ജ്യ​ത്തി​നെ​തി​രാ​യി നില​കൊ​ള്ളുന്ന മററു സ്ഥാപന​ങ്ങൾക്കെ​തി​രെ​യും യഹോ​വ​യു​ടെ സാക്ഷികൾ സമാന​മായ ന്യായ​വി​ധി ദൂതു പ്രഖ്യാ​പി​ക്കണം.—വെളി​പ്പാ​ടു 16:1-15.

¹⁰ എളുപ്പം നിർവ​ഹി​ക്കാ​മാ​യി​രുന്ന ഒന്നായി​രു​ന്നില്ല ഈ നിയമനം. എന്തെന്നാൽ മോശ​യു​ടെ പ്രതി​ക​രണം ശ്രദ്ധി​ക്കുക. ‘ഫറവോ​ന്റെ അടുക്കൽ പോകു​വാ​നും യിസ്രാ​യേൽമ​ക്കളെ മിസ്ര​യീ​മിൽനി​ന്നു പുറ​പ്പെ​ടു​വി​പ്പാ​നും ഞാൻ എന്തു മാത്ര​മു​ള്ളു?’ എന്ന്‌ അവൻ ചോദി​ച്ചു. അവന്റെ അപര്യാ​പ്‌ത​താ​ബോ​ധം നമുക്കു മനസ്സി​ലാ​ക്കാൻ കഴിയും? സഹ ഇസ്രാ​യേ​ല്യർ അതി​നോട്‌ എങ്ങനെ പ്രതി​ക​രി​ക്കു​മെ​ന്ന​തി​നെ​പ്പ​റ​റി​യും അവന്‌ ഉത്‌ക​ണ്‌ഠ​യു​ണ്ടാ​യി​രു​ന്നു: ‘അവർ എന്നെ വിശ്വ​സി​ക്കാ​തെ​യും എന്റെ വാക്കുകൾ കേൾക്കാ​തെയു’മിരി​ക്കു​ന്നെ​ങ്കി​ലോ? തന്നെ അധികാ​ര​പ്പെ​ടു​ത്തി​യി​രി​ക്കു​ന്നു എന്ന വസ്‌തുത എങ്ങനെ തെളി​യി​ക്കാ​നാ​വു​മെന്നു യഹോവ അവനോ​ടു വിശദീ​ക​രി​ച്ചു. എന്നിട്ടും മോശ മറെറാ​രു പ്രശ്‌നം ഉന്നയിച്ചു. അവൻ പറഞ്ഞു: “മുമ്പേ തന്നെയും നീ അടിയ​നോ​ടു സംസാ​രി​ച്ച​ശേ​ഷ​വും ഞാൻ വാക്‌സാ​മർത്ഥ്യ​മു​ള്ള​വനല്ല; ഞാൻ വിക്കനും തടിച്ച നാവു​ള്ള​വ​നും ആകുന്നു.”—പുറപ്പാ​ടു 3:11; 4:1, 10.

11. മോശ​യെ​പ്പോ​ലെ നാം പ്രതി​ക​രി​ച്ചേ​ക്കാ​വു​ന്ന​തെ​ങ്ങനെ, എന്നാൽ വിശ്വാ​സം ആചരി​ച്ചു​കൊണ്ട്‌ നമുക്ക്‌ എന്തു സംബന്ധിച്ച്‌ ഉറപ്പു​ള്ള​വ​രാ​യി​രി​ക്കാൻ കഴിയും?

¹¹ ചില​പ്പോ​ഴൊ​ക്കെ മോശ​യെ​പ്പോ​ലെ നമുക്കും തോന്നാം. ദിവ്യാ​ധി​പ​ത്യ​പ​ര​മായ കടമകൾ നാം ഏറെറ​ടു​ത്തി​ട്ടു​ണ്ടെ​ങ്കി​ലും അവയെ എങ്ങനെ നിറ​വേ​റ​റാ​നാ​കു​മെന്നു നാം സംശയി​ച്ചേ​ക്കാം. ‘സാമൂ​ഹി​ക​മാ​യോ സാമ്പത്തി​ക​മാ​യോ വിദ്യാ​ഭ്യാ​സ​പ​ര​മാ​യോ ഉയർന്ന പദവി​യി​ലു​ള്ള​വ​രുൾപ്പെ​ടെ​യുള്ള ആളുകളെ സമീപിച്ച്‌ അവരെ ദൈവ​ത്തി​ന്റെ മാർഗം പഠിപ്പി​ക്കുന്ന കാര്യം ഏറെറ​ടു​ക്കാൻ ഞാൻ ആരാണ്‌? ക്രിസ്‌തീയ യോഗ​ങ്ങ​ളിൽ അഭി​പ്രാ​യം പറയു​മ്പോൾ അല്ലെങ്കിൽ ദിവ്യാ​ധി​പത്യ ശുശ്രൂ​ഷാ​സ്‌കൂ​ളിൽ പങ്കെടു​ക്കവേ, പ്ലാററ്‌ഫോ​മിൽനി​ന്നു പരിപാ​ടി​കൾ നിർവ​ഹി​ക്കു​മ്പോൾ എന്റെ ആത്മീയ സഹോ​ദ​രൻമാർ എങ്ങനെ പ്രതി​ക​രി​ക്കും? അവർ എന്റെ അപര്യാ​പ്‌തത മനസ്സി​ലാ​ക്കി​ല്ലേ?’ എന്നാൽ ഓർക്കുക, യഹോവ മോശ​യോ​ടൊ​പ്പ​മു​ണ്ടാ​യി​രു​ന്നു, അവനെ നിയമ​ന​ത്തി​നു സജ്ജനാ​ക്കു​ക​യും ചെയ്‌തു. കാരണം മോശ വിശ്വാ​സം പ്രകട​മാ​ക്കി​യി​രു​ന്നു. (പുറപ്പാ​ടു 3:12; 4:2-5, 11, 12) നാം മോശ​യു​ടെ വിശ്വാ​സം അനുക​രി​ക്കു​ന്നെ​ങ്കിൽ, യഹോവ നമ്മോ​ടൊ​പ്പ​മു​ണ്ടാ​യി​രി​ക്കു​ക​യും നമ്മുടെ വേലക്കാ​യി നമ്മെ സജ്ജരാ​ക്കു​ക​യും ചെയ്യും.

12. പാപങ്ങ​ളോ കുറവു​ക​ളോ നിമിത്തം മടുപ്പ്‌ അനുഭ​വ​പ്പെ​ടു​മ്പോൾ ദാവീ​ദി​ന്റെ വിശ്വാ​സ​ത്തി​നു നമ്മെ പ്രോ​ത്സാ​ഹി​പ്പി​ക്കാൻ കഴിയു​ന്ന​തെ​ങ്ങനെ?

¹² പാപങ്ങ​ളോ കുറവു​ക​ളോ നിമിത്തം ആശാഭം​ഗ​മോ മടുപ്പോ അനുഭ​വ​പ്പെ​ടുന്ന ആർക്കും ഇങ്ങനെ പറഞ്ഞ ദാവീ​ദി​നോ​ടൊ​പ്പം ചേരാം: “എന്റെ ലംഘന​ങ്ങളെ ഞാൻ അറിയു​ന്നു; എന്റെ പാപം എപ്പോ​ഴും എന്റെ മുമ്പിൽ ഇരിക്കു​ന്നു.” യഹോ​വ​യോ​ടുള്ള യാചന​യിൽ ദാവീദ്‌ ഇങ്ങനെ​യും പറഞ്ഞു: “എന്റെ പാപങ്ങളെ കാണാ​ത​വണ്ണം നിന്റെ മുഖം മറെ​ക്കേ​ണമേ. എന്റെ അകൃത്യ​ങ്ങളെ ഒക്കെയും മായിച്ചു കളയേ​ണമേ.” എന്നുവ​രി​കി​ലും, യഹോ​വയെ സേവി​ക്കാ​നുള്ള തന്റെ ആഗ്രഹത്തെ കവർന്നു​ക​ള​യാൻ അദ്ദേഹം മടുപ്പി​നെ അനുവ​ദി​ച്ചില്ല. “നിന്റെ സന്നിധി​യിൽനി​ന്നു എന്നെ തള്ളിക്ക​ള​യ​രു​തേ; നിന്റെ പരിശു​ദ്ധാ​ത്മാ​വി​നെ എന്നിൽനി​ന്നു എടുക്ക​യു​മ​രു​തേ.” ദാവീദ്‌ വ്യക്തമാ​യും “പൊടി”യായി​രു​ന്നു. പക്ഷേ, യഹോവ അവനെ വിട്ടു​ക​ള​ഞ്ഞില്ല. എന്തെന്നാൽ “തകർന്നും നുറു​ങ്ങി​യു​മി​രി​ക്കുന്ന ഹൃദയത്തെ” നിരസി​ക്കു​ക​യി​ല്ലെന്ന യഹോ​വ​യു​ടെ വാഗ്‌ദാ​ന​ത്തിൽ ദാവീദ്‌ വിശ്വാ​സം ആചരി​ച്ചി​രു​ന്നു.—സങ്കീർത്തനം 38:1-9; 51:3, 9, 11, 17.

13, 14. (എ) നാം മനുഷ്യ​രു​ടെ അനുഗാ​മി​കൾ ആയിത്തീ​രാൻ പാടി​ല്ലാ​ത്ത​തെ​ന്തു​കൊണ്ട്‌? (ബി) പൗലോ​സി​ന്റെ​യും പത്രോ​സി​ന്റെ​യും ദൃഷ്ടാ​ന്തങ്ങൾ അവരും പൊടി​യാൽ നിർമി​ത​മാ​ണെന്ന്‌ പ്രകട​മാ​ക്കു​ന്ന​തെ​ങ്ങനെ?

¹³ എന്നുവ​രി​കി​ലും, ‘നമ്മുടെ മുമ്പിൽ വെച്ചി​രി​ക്കുന്ന ഓട്ടം സ്ഥിരത​യോ​ടെ ഓടാൻ’ “സാക്ഷി​ക​ളു​ടെ ഇത്ര വലി​യോ​രു സമൂഹ”ത്തെ നമുക്ക്‌ ഒരു പ്രോ​ത്സാ​ഹ​ന​മെന്ന നിലയിൽ വീക്ഷി​ക്കാ​മെ​ങ്കി​ലും അവരുടെ അനുഗാ​മി​ക​ളാ​കാൻ നമ്മോടു പറഞ്ഞി​ട്ടില്ല എന്നതു ശ്രദ്ധി​ക്കുക. അപൂർണ മനുഷ്യ​രു​ടെ​യോ ഒന്നാം നൂററാ​ണ്ടി​ലെ വിശ്വ​സ്‌ത​രായ അപ്പോ​സ്‌ത​ലൻമാ​രു​ടെ​യോ പോലും കാലടി​ക​ളെയല്ല, “വിശ്വാ​സ​ത്തി​ന്റെ നായക​നും പൂർത്തി വരുത്തു​ന്ന​വ​നു​മായ യേശു”വിന്റെ കാലടി​കളെ പിൻപ​റ​റാ​നാ​ണു നമ്മോട്‌ ആവശ്യ​പ്പെ​ട്ടി​രി​ക്കു​ന്നത്‌.—എബ്രായർ 12:1, 2; 1 പത്രൊസ്‌ 2:21.

¹⁴ ക്രിസ്‌തീയ സഭയുടെ തൂണു​ക​ളായ പൗലോ​സും പത്രോ​സും ചിലയ​വ​സ​ര​ങ്ങ​ളിൽ ഇടറു​ക​യു​ണ്ടാ​യി. “ഞാൻ ചെയ്‌വാൻ ഇച്ഛിക്കുന്ന നൻമ ചെയ്യു​ന്നി​ല്ല​ല്ലോ; ഇച്ഛിക്കാത്ത തിൻമ​യ​ത്രേ പ്രവർത്തി​ക്കു​ന്നത്‌” എന്നാണു പൗലോസ്‌ എഴുതി​യത്‌. “ഞാൻ അരിഷ്ട​മ​നു​ഷ്യൻ!” (റോമർ 7:19, 24) അമിത​മായ ആത്മവി​ശ്വാ​സം തോന്നിയ നേരത്ത്‌ പത്രോസ്‌ യേശു​വി​നോ​ടു പറഞ്ഞു: “എല്ലാവ​രും നിങ്കൽ ഇടറി​യാ​ലും ഞാൻ ഒരുനാ​ളും ഇടറു​ക​യില്ല.” തന്നെ മൂന്നു പ്രാവ​ശ്യം തള്ളിപ്പ​റ​യു​മെന്നു യേശു മുന്നറി​യി​പ്പു കൊടു​ത്ത​പ്പോൾ, തന്റെ ഗുരു പറഞ്ഞതി​ന്റെ നേർവി​പ​രീ​തം പറഞ്ഞു​കൊണ്ട്‌ പത്രോസ്‌ സാഹസി​ക​മാ​യി വീമ്പി​ളക്കി: “നിന്നോ​ടു​കൂ​ടെ മരി​ക്കേ​ണ്ടി​വ​ന്നാ​ലും ഞാൻ നിന്നെ തള്ളിപ്പ​റ​ക​യില്ല.” പക്ഷേ, അവൻ യേശു​വി​നെ തള്ളിപ്പ​റ​യു​ക​തന്നെ ചെയ്‌തു. അങ്ങനെ അതു ഹൃദയം​നൊ​ന്തു കരയേ​ണ്ടി​വന്ന ഒരു അബദ്ധമാ​യി​മാ​റി. അതേ, പൗലോ​സും പത്രോ​സും പൊടി​യാൽ നിർമി​ത​മാ​യി​രു​ന്നു.—മത്തായി 26:33-35.

15. പൊടി​യാൽ നിർമി​ത​മാ​ണെ​ങ്കി​ലും മുന്നേ​റാൻ നമുക്കുള്ള പ്രേര​ക​ഘ​ട​ക​മെന്ത്‌?

¹⁵ ചാപല്യ​ങ്ങ​ളൊ​ക്കെ​യു​ണ്ടാ​യി​രു​ന്നി​ട്ടും, മോശ​യും ദാവീ​ദും പൗലോ​സും പത്രോ​സും അവരെ​പ്പോ​ലെ​യുള്ള മററു​ള്ള​വ​രും ജയശാ​ലി​ക​ളാ​യി​ത്തീർന്നു. എന്തു​കൊണ്ട്‌? എന്തെന്നാൽ യഹോ​വ​യിൽ ശക്തമായ വിശ്വാ​സം ആചരിച്ച അവർ അവനിൽ പൂർണ​മാ​യി ആശ്രയി​ച്ചു, വീഴ്‌ചകൾ സംഭവി​ച്ചു​വെ​ങ്കി​ലും അവനോ​ടു പററി​നി​ന്നു. “സാധാ​ര​ണ​യിൽ കവിഞ്ഞ ശക്തി” ലഭി​ക്കേ​ണ്ട​തിന്‌ അവർ അവനിൽ ആശ്രയം വെച്ചു. വീണ്ടെ​ടുപ്പ്‌ അസാധ്യ​മാ​കു​മാറ്‌ വീണു​പോ​കാൻ അനുവ​ദി​ക്കാ​തെ അവൻ അവർക്ക്‌ അതു ചെയ്‌തു​കൊ​ടു​ത്തു. നാം വിശ്വാ​സം ആചരി​ക്കു​ന്ന​തിൽ തുടരു​ന്നെ​ങ്കിൽ, “ദൈവം നിങ്ങളു​ടെ പ്രവൃ​ത്തി​യും വിശു​ദ്ധൻമാ​രെ ശുശ്രൂ​ഷി​ച്ച​തി​നാ​ലും ശുശ്രൂ​ഷി​ക്കു​ന്ന​തി​നാ​ലും തന്റെ നാമ​ത്തോ​ടു കാണിച്ച സ്‌നേ​ഹ​വും മറന്നു​ക​ള​വാൻ തക്കവണ്ണം അനീതി​യു​ള്ള​വനല്ല” എന്ന വാക്കു​ക​ളോ​ടുള്ള യോജി​പ്പി​ലാ​യി​രി​ക്കും നമ്മെ സംബന്ധി​ച്ചുള്ള ന്യായ​വി​ധി​യെന്നു നമുക്ക്‌ ഉറപ്പു​ള്ള​വ​രാ​യി​രി​ക്കാൻ കഴിയും. നാം പൊടി​യാൽ നിർമി​ത​മാ​ണെ​ങ്കി​ലും മുന്നോ​ട്ടു പോകാൻ ഇത്‌ എന്തൊരു ഉത്തേജ​ന​മാ​ണു നമുക്കു നൽകു​ന്നത്‌!—2 കൊരി​ന്ത്യർ 4:7, NW; എബ്രായർ 6:10.

പൊടി​യാൽ നിർമി​ത​മെ​ന്നതു വ്യക്തി​പ​ര​മാ​യി നമുക്ക്‌ എന്തർഥ​മാ​ക്കു​ന്നു?

16, 17. ന്യായ​വി​ധി​യു​ടെ കാര്യ​ത്തിൽ ഗലാത്യർ 6:4-ൽ വിശദീ​ക​രി​ച്ചി​രി​ക്കുന്ന തത്ത്വം യഹോവ എങ്ങനെ​യാ​ണു ബാധക​മാ​ക്കു​ന്നത്‌?

¹⁶ ഉടപ്പി​റ​ന്ന​വ​രു​മാ​യോ സഹവി​ദ്യാർഥി​ക​ളു​മാ​യോ താരത​മ്യം ചെയ്യാതെ കുട്ടി​ക​ളെ​യോ വിദ്യാർഥി​ക​ളെ​യോ അവരവ​രു​ടെ കഴിവി​നു ചേർച്ച​യിൽ അളക്കു​ന്ന​തി​ലെ ജ്ഞാനം അനേകം മാതാ​പി​താ​ക്ക​ളും അധ്യാ​പ​ക​രും അനുഭ​വ​ത്തിൽനി​ന്നു മനസ്സി​ലാ​ക്കി​യി​ട്ടുണ്ട്‌. ഇതാകട്ടെ പിൻപ​റ​റാൻ ക്രിസ്‌ത്യാ​നി​ക​ളോ​ടു പറഞ്ഞി​രി​ക്കുന്ന ഒരു ബൈബിൾത​ത്ത്വ​ത്തി​നു ചേർച്ച​യി​ലാ​ണു​താ​നും: “ഓരോ​രു​ത്ത​രും സ്വന്തം പ്രവൃത്തി എന്തെന്നു തെളി​യി​ക്കട്ടെ, അപ്പോൾ അവനു തന്നെക്കു​റി​ച്ചു മാത്രം ആഹ്ലാദി​ക്കു​ന്ന​തി​നു കാരണ​മു​ണ്ടാ​യി​രി​ക്കും, അല്ലാതെ മറേറ​യാ​ളി​നോ​ടുള്ള താരത​മ്യ​ത്തി​ലാ​യി​രി​ക്ക​യില്ല.”—ഗലാത്യർ 6:4, NW.

¹⁷ യഹോവ ആളുക​ളോട്‌ ഇടപെ​ടു​ന്നത്‌ ഒരു സംഘടിത ജനമെന്ന നിലയി​ലാ​ണെ​ങ്കി​ലും, ഈ തത്ത്വ​ത്തോ​ടുള്ള യോജി​പ്പിൽ അവൻ അവരെ വ്യക്തി​പ​ര​മാ​യി​ട്ടാണ്‌ ന്യായം​വി​ധി​ക്കു​ന്നത്‌. “നമ്മിൽ ഓരോ​രു​ത്തൻ ദൈവ​ത്തോ​ടു കണക്കു ബോധി​പ്പി​ക്കേ​ണ്ടി​വരു”മെന്നു റോമർ 14:12 പറയുന്നു. തന്റെ ഓരോ ദാസ​ന്റെ​യും ജനിതക ഘടന എന്താ​ണെന്നു യഹോ​വക്കു നന്നായി അറിയാം. അവരുടെ ശാരീ​രി​ക​വും മാനസി​ക​വു​മായ ഘടന, അവരുടെ പ്രാപ്‌തി​കൾ, അവരുടെ സ്വതസി​ദ്ധ​മായ കഴിവു​ക​ളും കുറവു​ക​ളും അവർക്കുള്ള സാധ്യ​ത​ക​ളും കൂടാതെ ക്രിസ്‌തീയ ഫലങ്ങൾ ഉത്‌പാ​ദി​പ്പി​ക്കാൻ അവർ ഈ സാധ്യ​തകൾ എന്തുമാ​ത്രം ഉപയോ​ഗ​പ്പെ​ടു​ത്തും എന്നിവ​യെ​ല്ലാം അവന്‌ അറിയാം. ആലയ ഭണ്ഡാര​ത്തിൽ രണ്ടു നാണയ​ത്തു​ട്ടു​ക​ളിട്ട വിധവയെ സംബന്ധി​ച്ചുള്ള യേശു​വി​ന്റെ പ്രശം​സ​യും നല്ല നിലത്തു വിതച്ച വിത്തിന്റെ ഉപമയും മററു​ള്ള​വ​രു​മാ​യി അജ്ഞാന​പൂർവം താരത​മ്യം ചെയ്‌തു വിഷാ​ദ​മ​ഗ്ന​രാ​യേ​ക്കാ​വുന്ന ക്രിസ്‌ത്യാ​നി​കൾക്കുള്ള പ്രോ​ത്സാ​ഹ​ജ​ന​ക​മായ ദൃഷ്ടാ​ന്ത​ങ്ങ​ളാണ്‌.—മർക്കൊസ്‌ 4:20; 12:42-44.

18. (എ) നാം പൊടി​യാ​യി​രി​ക്കു​ന്നു എന്നത്‌ വ്യക്തി​പ​ര​മാ​യി നമുക്ക്‌ എന്ത്‌ അർഥമാ​ക്കു​ന്നു​വെന്നു നാം നിർണ​യി​ക്കേ​ണ്ടത്‌ എന്തു​കൊണ്ട്‌? (ബി) ഒരു സത്യസ​ന്ധ​മായ ആത്മപരി​ശോ​ധന നമ്മെ നിരാ​ശ​പ്പെ​ടു​ത്ത​രു​താ​ത്തത്‌ എന്തു​കൊണ്ട്‌?

¹⁸ പൊടി​യാ​യി​രി​ക്കു​ന്നു എന്നതു നമ്മെ സംബന്ധി​ച്ചു വ്യക്തി​പ​ര​മാ​യി എന്ത്‌ അർഥമാ​ക്കു​ന്നു എന്നു നിർണ​യി​ക്കു​ന്നതു ജീവത്‌പ്ര​ധാ​ന​മാണ്‌. എങ്കിലേ നമ്മുടെ കഴിവി​ന്റെ പരമാ​വധി ഉപയോ​ഗ​പ്പെ​ടു​ത്തി നമുക്കു സേവി​ക്കാൻ സാധിക്കൂ. (സദൃശ​വാ​ക്യ​ങ്ങൾ 10:4; 12:24; 18:9; റോമർ 12:1) നമ്മുടെ വ്യക്തി​പ​ര​മായ ചാപല്യ​ങ്ങ​ളെ​യും ബലഹീ​ന​ത​ക​ളെ​യും കുറിച്ചു സൂക്ഷ്‌മ​മായ ബോധ​മു​ണ്ടെ​ങ്കി​ലേ പുരോ​ഗതി വരു​ത്തേ​ണ്ട​തി​ന്റെ ആവശ്യ​ത്തോ​ടും അതിനുള്ള സാധ്യ​ത​ക​ളോ​ടും നമുക്കു ജാഗരൂ​ക​രാ​യി നിൽക്കാ​നാ​വൂ. ആത്മശോ​ധന നടത്തു​മ്പോൾ പുരോ​ഗതി വരുത്താൻ നമ്മെ സഹായി​ക്കു​ന്ന​തി​നുള്ള പരിശു​ദ്ധാ​ത്മാ​വി​ന്റെ ശക്തിയെ നാം ഒരിക്ക​ലും കുറച്ചു കാണരുത്‌. അതു മുഖാ​ന്ത​ര​മാണ്‌ പ്രപഞ്ചം സൃഷ്ടിക്കപ്പെട്ടത്‌, ബൈബിൾ എഴുത​പ്പെ​ട്ടത്‌, ജീർണി​ച്ചു​കൊ​ണ്ടി​രി​ക്കുന്ന ലോക​ത്തി​ന്റെ നടുവിൽ സമാധാ​ന​പൂർണ​മായ ഒരു പുതി​യ​ലോക സമൂഹത്തെ അസ്‌തി​ത്വ​ത്തിൽ കൊണ്ടു​വ​ന്നി​രി​ക്കു​ന്നത്‌. അതു​കൊണ്ട്‌, നിർമലത നിലനിർത്താൻ ആവശ്യ​മായ ജ്ഞാനവും കരുത്തും ആവശ്യ​പ്പെ​ടു​ന്ന​വർക്കെ​ല്ലാം കൊടു​ക്കാൻത്തക്ക ശക്തി ദൈവ​ത്തി​ന്റെ പരിശു​ദ്ധാ​ത്മാ​വി​നു തീർച്ച​യാ​യു​മുണ്ട്‌.—മീഖാ 3:8; റോമർ 15:13; എഫെസ്യർ 3:16.

19. നാം പൊടി​യാൽ നിർമി​ത​മെ​ന്നത്‌ എന്തു ചെയ്യു​ന്ന​തി​നു ന്യായീ​ക​ര​ണമല്ല?

¹⁹ നാം പൊടി​യാ​ണെന്ന കാര്യം യഹോവ ഓർക്കു​ന്നു എന്നത്‌ എന്തൊരു ആശ്വാ​സ​മാണ്‌! എന്നിരു​ന്നാ​ലും, ശുഷ്‌കാ​ന്തി​യി​ല്ലാ​ത്ത​വ​രാ​കാ​നോ ഒരുപക്ഷേ തെററു ചെയ്യു​ന്ന​തി​നോ പോലും ഇതൊരു ന്യായ​മായ കാരണ​മാ​ണെന്നു നാം ഒരിക്ക​ലും ന്യായ​വാ​ദം ചെയ്യരുത്‌. അതു തീർത്തും അങ്ങനെയല്ല! നാം പൊടി​യാ​ണെന്ന്‌ അവൻ ഓർക്കു​ന്നു എന്നത്‌ അവന്റെ അനർഹ​ദ​യ​യു​ടെ ഒരു പ്രകട​ന​മാണ്‌. എന്നാൽ ‘നമ്മുടെ ദൈവ​ത്തി​ന്റെ കൃപയെ ദുഷ്‌കാ​മ​വൃ​ത്തി​ക്കു ഹേതു​വാ​ക്കി ഏകനാ​ഥ​നും നമ്മുടെ കർത്താ​വു​മായ യേശു​ക്രി​സ്‌തു​വി​നെ നിഷേ​ധി​ക്കുന്ന അഭക്തരായ മനുഷ്യ​രാ​കാൻ’ നാം ആഗ്രഹി​ക്കു​ന്നില്ല. (യൂദാ 4) പൊടി​യാൽ നിർമി​ത​മെ​ന്നത്‌ അഭക്തരാ​യി​രി​ക്കാൻ ന്യായം നൽകു​ന്നില്ല. ‘പരിശു​ദ്ധാ​ത്മാ​വി​നെ ദുഃഖി​പ്പി​ക്കു’ന്നതൊ​ഴി​വാ​ക്കാൻ ശരീരത്തെ ദണ്ഡിപ്പി​ച്ചു​കൊ​ണ്ടും അതിനെ അടിമ​യാ​യി നടത്തി​ക്കൊ​ണ്ടും ഒരു ക്രിസ്‌ത്യാ​നി തെററായ പ്രവണ​ത​ക​ളു​മാ​യി പോരാ​ടാൻ കിണഞ്ഞു പരി​ശ്ര​മി​ക്കു​ന്നു.—എഫെസ്യർ 4:30; 1 കൊരി​ന്ത്യർ 9:27.

20. (എ) ‘കർത്താ​വി​ന്റെ വേലയിൽ ധാരാളം ചെയ്യാൻ’ നമുക്കുള്ള രണ്ടു മേഖലകൾ ഏവ? (ബി) നമുക്കു ശുഭാ​പ്‌തി​വി​ശ്വാ​സ​ത്തി​നു കാരണ​മു​ള്ള​തെ​ന്തു​കൊണ്ട്‌?

²⁰ ഇപ്പോൾ, സാത്താന്റെ ലോക​വ്യ​വ​സ്ഥി​തി അവസാ​നി​ക്കാ​റായ ഈ സമയം, മന്ദഗതി​യി​ലാ​കാ​നു​ള്ളതല്ല. പ്രസം​ഗ​വേല, ദൈവാ​ത്മാ​വി​ന്റെ ഫലങ്ങൾ കൂടുതൽ തിക​വോ​ടെ വികസി​പ്പി​ച്ചെ​ടു​ക്കുക എന്നിവയെ സംബന്ധി​ച്ചി​ട​ത്തോ​ളം മന്ദതയ്‌ക്കു സ്ഥാനമില്ല. ഈ രണ്ടു മേഖല​ക​ളി​ലും നമുക്കു “ധാരാളം ചെയ്യാനു”ണ്ട്‌. മുന്നേ​റാ​നുള്ള സമയം ഇപ്പോ​ഴാണ്‌. കാരണം നമ്മുടെ “പ്രയത്‌നം വ്യർഥമല്ല” എന്നു നമുക്ക്‌ അറിയാം. (1 കൊരി​ന്ത്യർ 15:58, NW) യഹോവ നമ്മെ താങ്ങി​ക്കൊ​ള്ളും. കാരണം “നീതി​മാൻ കുലു​ങ്ങി​പ്പോ​കു​വാൻ അവൻ ഒരു നാളും സമ്മതി​ക്ക​യില്ല” എന്നാണ്‌ ദാവീദ്‌ അവനെ​ക്കു​റി​ച്ചു പറഞ്ഞത്‌. (സങ്കീർത്തനം 55:22) നാം പൊടി​യാൽ നിർമി​ത​മെ​ങ്കി​ലും, അപൂർണ​രായ മനുഷ്യ സൃഷ്ടി​കൾക്ക്‌ ഏൽപ്പി​ച്ചു​കൊ​ടു​ത്തി​ട്ടു​ള്ള​തി​ലേ​ക്കും ഏററവും മഹത്തായ വേലയിൽ പങ്കു​കൊ​ള്ളാൻ യഹോവ നമ്മെ വ്യക്തി​പ​ര​മാ​യി അനുവ​ദി​ക്കു​ന്നു​വെന്ന്‌ അറിയു​ന്നത്‌ എന്തൊരു സന്തോ​ഷ​മാണ്‌!

[അടിക്കു​റിപ്പ്‌]

നിങ്ങൾക്കു വിശദീ​ക​രി​ക്കാ​മോ?

◻ മനുഷ്യർ പൊടി​യാൽ നിർമി​ത​മാ​ണെന്നു പറയു​ന്ന​തിൽ ഉല്‌പത്തി 2:7-ഉം സങ്കീർത്തനം 103:14-ഉം വ്യത്യാ​സ​പ്പെ​ട്ടി​രി​ക്കുന്ന തെങ്ങനെ?

◻ എബ്രായർ 11-ാം അധ്യായം ഇന്നത്തെ ക്രിസ്‌ത്യാ​നി​കൾക്കു പ്രോ​ത്സാ​ഹ​ന​ത്തി​ന്റേ​തായ ഒരു ഉറവാ​യി​രി​ക്കു​ന്ന​തെ​ങ്ങനെ?

◻ നാം ഗലാത്യർ 6:4-ൽ പ്രസ്‌താ​വി​ച്ചി​രി​ക്കുന്ന തത്ത്വം ബാധക​മാ​ക്കു​ന്നതു ജ്ഞാനമാ​യി​രി​ക്കു​ന്ന​തെ​ന്തു​കൊണ്ട്‌?

◻ എബ്രായർ 6:10-ഉം 1 കൊരി​ന്ത്യർ 15:58-ഉം മടുപ്പ്‌ ഒഴിവാ​ക്കാൻ സഹായി​ക്കു​ന്ന​തെ​ങ്ങനെ?

[10-ാം പേജിലെ ചിത്രം]

ക്രിസ്‌ത്യാനികൾ സഹാരാ​ധ​ക​രു​ടെ വിശ്വാ​സം അനുക​രി​ക്കു​ന്നു, എന്നാൽ അവർ തങ്ങളുടെ വിശ്വാ​സ​ത്തി​നു പൂർത്തി​വ​രു​ത്തു​ന്ന​വ​നായ യേശു​വി​നെ അനുഗ​മി​ക്കു​ന്നു