പുള്ളി​പ്പു​ലി—ഒളിച്ചു​ജീ​വി​ക്കുന്ന ഒരു പൂച്ച

കെനിയയിലെ ഉണരുക! ലേഖകൻ

സൂര്യൻ അസ്‌ത​മി​ക്കു​ക​യാ​യി​രു​ന്നു. കെനി​യ​യി​ലെ മസായ്‌ മാര വന്യജീ​വി സംരക്ഷ​ണ​കേ​ന്ദ്ര​ത്തി​ലെ മനോ​ജ്ഞ​മായ മൃഗജാ​ല​ങ്ങളെ നിരീ​ക്ഷി​ച്ചും അവയുടെ ഫോ​ട്ടോ​യെ​ടു​ത്തും ഞങ്ങൾ ഞങ്ങളുടെ ദിനം ചെലവ​ഴി​ച്ചി​രു​ന്നു. ടെൻറു​കൊ​ണ്ടുള്ള ഞങ്ങളുടെ പാർപ്പി​ട​ത്തിൽ വന്ന്‌ രാത്രി​യിൽ വിശ്ര​മി​ക്കു​ന്ന​തി​നു മുമ്പ്‌, പുളകം കൊള്ളി​ക്കുന്ന മറെറാ​രു ദൃശ്യം കൂടി ഞങ്ങൾ കാണാ​നി​രി​ക്കു​ക​യാ​യി​രു​ന്നു. ലോഡ്‌ജി​ലെ സ്‌ററാ​ഫം​ഗ​ങ്ങ​ളിൽ ഒരാൾ കയറു​കൊ​ണ്ടു​ണ്ടാ​ക്കിയ ഒരു പാലത്തിൽക്കൂ​ടി ററാ​ലേക്ക്‌ നദിക്കു കുറുകെ ഒരു തുണ്ട്‌ ആട്ടുമാം​സ​വും തോളത്തു തൂക്കി​യിട്ട്‌ അനായാ​സ​മാ​യി നടന്നു​നീ​ങ്ങി​യ​പ്പോൾ ആ വേദി​യൊ​രു​ങ്ങി. അദ്ദേഹം ആ മാംസം ഒരു അക്കേഷ്യ മരത്തിന്റെ ഉയരത്തി​ലുള്ള കവരയിൽ കെട്ടി​ത്തൂ​ക്കി.

ഉഷ്‌ണ​മേ​ഖ​ലാ സന്ധ്യയു​ടെ നിറങ്ങൾ ഇരുട്ടി​നു വഴിമാ​റി​ക്കൊ​ടു​ത്ത​പ്പോൾ ഒരു വലിയ ആൺപു​ള്ളി​പ്പു​ലി നിശബ്ദം ആ മരത്തി​ലേക്കു വലിഞ്ഞു​ക​യറി ആ മാംസം പിച്ചി​ച്ചീ​ന്താൻ തുടങ്ങി. കാഴ്‌ച​കാ​ണാ​നുള്ള ടെറസ്സിൽനി​ന്നുള്ള സ്‌പോ​ട്ട്‌​ലൈ​റ​റിൽ അവൻ ശരിക്കും പ്രകാ​ശി​ത​മാ​യി കാണ​പ്പെട്ടു. എന്നിരു​ന്നാ​ലും, തന്റെ ഭക്ഷണം ആസ്വദി​ക്കാൻ ഇറങ്ങി​ത്തി​രിച്ച ആ പുള്ളി​പ്പു​ലി ഞങ്ങളെ ശ്രദ്ധി​ച്ച​തേ​യില്ല. ഞങ്ങൾ ഭയത്തോ​ടെ​യും അതിശ​യ​ത്തോ​ടെ​യും നോക്കി​നി​ന്നു. ഇര വെച്ചി​രുന്ന വൃക്ഷത്തി​ലേ​ക്കുള്ള അവന്റെ സന്ദർശനം രാത്രി​യി​ലെ പതിവാ​ണെന്നു പിന്നീടു ഞങ്ങളറി​ഞ്ഞു, ഏതാണ്ട്‌ ആറു വർഷ​ത്തോ​ള​മാ​യി അവനതു ചെയ്‌തു​കൊ​ണ്ടാ​ണി​രു​ന്നത്‌. പിറേ​റന്നു രാത്രി​യി​ലും ആ ദർശനം ഞങ്ങൾക്ക്‌ ആതിഥ്യ​മ​രു​ളി!

“വലിയ പൂച്ചക​ളിൽ ഏററവും സമ്പൂർണൻ, ആകാര​ത്തിൽ അഴകു​റ​റത്‌, ചലനങ്ങ​ളിൽ ആകർഷ​ക​മാ​യത്‌” എന്നു പുള്ളി​പ്പു​ലി​യെ വർണി​ക്കു​ന്നത്‌ എന്തു​കൊ​ണ്ടെന്നു പൂർണ​മാ​യും വിലമ​തി​ക്കാൻ ഞങ്ങൾക്കു കഴിഞ്ഞു. 60 കിലോ​യോ അതിൽ കൂടു​ത​ലോ തൂക്കമുള്ള പുള്ളി​പ്പു​ലി ഏററവും ബലിഷ്‌ഠ​മായ പേശി​ക​ളുള്ള മൃഗങ്ങ​ളിൽ ഒന്നാണ്‌, തോൾഭാ​ഗത്തു ശരാശരി 60 സെൻറി​മീ​ററർ ഉയരവും മൂക്കു​മു​തൽ വാല​ഗ്രം​വരെ 200 സെൻറി​മീ​ററർ നീളവു​മുണ്ട്‌. ചൂടേ​കുന്ന അതിന്റെ ആവരണ​ത്തിൽ വൃത്താ​കാ​ര​ത്തിൽ ക്രമീ​ക​രണം ചെയ്യ​പ്പെ​ട്ടി​രി​ക്കുന്ന അതിന്റെ സഹജമായ കറുത്ത പുള്ളി​ക​ളി​ലേക്ക്‌ ഉററു​നോ​ക്കി​യ​പ്പോൾ യിരെ​മ്യാവ്‌ പ്രവാ​ചകൻ ഒരിക്കൽ ചോദിച്ച ചോദ്യം ഞങ്ങൾ ഓർമി​ച്ചു​പോ​യി: “കൂശ്യന്നു തന്റെ ത്വക്കും പുള്ളി​പ്പു​ലി​ക്കു തന്റെ പുള്ളി​യും മാററു​വാൻ കഴിയു​മോ?”—യിരെ​മ്യാ​വു 13:23.

പ്രത്യേ​കി​ച്ചും ശ്രദ്ധേ​യ​മാണ്‌ അവന്റെ തിളങ്ങുന്ന പച്ചക്കണ്ണു​കൾ. അവ ഒരുതരം പ്രത്യേക കോശ​പാ​ളി​കൊണ്ട്‌, ഒരു പടലം​കൊണ്ട്‌, സജ്ജമാണ്‌. അതു രാത്രി​യിൽ അസാധാ​ര​ണ​മായ കാഴ്‌ച പ്രദാനം ചെയ്യുന്നു. മമനു​ഷ്യ​ന്റെ കാഴ്‌ച​യ്‌ക്ക്‌ ആവശ്യ​മായ വെളി​ച്ച​ത്തി​ന്റെ ആറി​ലൊ​ന്നു മാത്രം മതി പുള്ളി​പ്പു​ലി​ക്കു കാണാൻ. രാത്രി​യിൽ അവന്റെ കണ്ണിൽ വെളി​ച്ച​മ​ടി​ക്കു​മ്പോൾ കാണുന്ന തിളക്കം പ്രകാശം കാചപ​ട​ല​ത്തി​ലൂ​ടെ പിന്നി​ലേക്കു പ്രതി​ഫ​ലി​പ്പി​ച്ചു​കൊണ്ട്‌ ഈ കോശ​പാ​ളി സൃഷ്ടി​ക്കു​ന്ന​താണ്‌.

പകൽസ​മ​യ​ത്തു പുള്ളി​പ്പു​ലി വിശ്ര​മി​ക്കു​മ്പോൾ നിങ്ങൾ അതിനെ ശ്രദ്ധി​ച്ചാൽ ക്ഷീണി​ച്ചു​വലഞ്ഞ മട്ടിൽ അവൻ കിതയ്‌ക്കു​ന്നതു കാണാം. എന്നാൽ, ത്വരി​ത​ഗ​തി​യി​ലുള്ള അവന്റെ ശ്വാ​സോ​ച്ഛാ​സം ഫലപ്ര​ദ​മായ ഒരു തണുപ്പി​ക്കൽ സംവി​ധാ​ന​ത്തി​ന്റെ ഭാഗമാണ്‌. മിനി​റ​റിൽ 150 തവണവരെ കിതയ്‌ക്കു​ന്ന​തു​കൊണ്ട്‌ അവന്റെ നാക്കിൽനി​ന്നും വായിൽനി​ന്നും നാസാ​ദ്വാ​ര​ങ്ങ​ളിൽനി​ന്നും ജലം ബാഷ്‌പീ​ക​രി​ച്ചു​പൊ​യ്‌ക്കൊ​ള്ളും.

സാഹച​ര്യ​ങ്ങ​ളോട്‌ ഏററവും നന്നായി ഇണങ്ങി ജീവി​ക്കുന്ന വലിയ പൂച്ചക​ളായ പുള്ളി​പ്പു​ലി​കളെ മരുഭൂ​മി​ക​ളി​ലും വനങ്ങളി​ലും പർവത​ങ്ങ​ളി​ലും സമു​ദ്ര​നി​ര​പ്പി​ലും ചൈന, ഇന്ത്യ, കെനിയ എന്നിങ്ങനെ വൈവി​ധ്യ​മാർന്ന നാടു​ക​ളി​ലും കാണാ​വു​ന്ന​താണ്‌. പുള്ളി​പ്പു​ലി​യു​ടെ മിക്ക ആവാസ​സ്ഥ​ല​ങ്ങ​ളി​ലും മനുഷ്യൻ അതി​ക്ര​മി​ച്ചു​ക​ട​ക്കു​ന്നു​ണ്ടെ​ങ്കിൽപോ​ലും ആഫ്രി​ക്ക​യി​ലും ഏഷ്യയി​ലും മാത്ര​മാ​യി ഏതാണ്ട്‌ പത്തു ലക്ഷം പുള്ളി​പ്പു​ലി​കൾ ഉള്ളതായി ശാസ്‌ത്രജ്ഞർ കണക്കാ​ക്കു​ന്നു. അങ്ങനെ​യാ​ണെ​ങ്കിൽപോ​ലും, നൂററാ​ണ്ടു​ക​ളോ​ളം പുള്ളി​പ്പു​ലി ഗൗരവ​മായ ശാസ്‌ത്ര​പ​ഠ​നത്തെ ഒളിച്ചു​ന​ട​ക്കു​ക​യാ​യി​രു​ന്നു. ഉദാഹ​ര​ണ​ത്തിന്‌, സീനായ്‌ പുള്ളി​പ്പു​ലി​യു​ടെ കാര്യ​മെ​ടു​ക്കുക. അടുത്ത​കാ​ലത്ത്‌ യഹൂദ്യ​യി​ലെ മരുഭൂ​മി​യിൽ കണ്ടുപി​ടി​ക്ക​പ്പെ​ടു​ന്ന​തു​വരെ ഈ പുള്ളി​പ്പു​ലി ദീർഘ​കാ​ല​മാ​യി വംശനാ​ശം സംഭവി​ച്ച​താ​യി കരുത​പ്പെ​ട്ടി​രു​ന്നു!

ഏകാന്ത പൂച്ച

എങ്ങനെ​യാ​ണു പുള്ളി​പ്പു​ലി മമനു​ഷ്യ​ന്റെ നിരീ​ക്ഷ​ണ​ത്തിൽനി​ന്നു രക്ഷപെ​ടു​ന്നത്‌? മുഖ്യ​മാ​യും ഒരു നിശാ​ജീ​വി ആയിരി​ക്കു​ന്ന​തു​കൊ​ണ്ടാണ്‌ അവൻ ഇതു ചെയ്യു​ന്നത്‌—മാത്രമല്ല അത്‌ അങ്ങേയ​ററം ഒളിച്ചു​ന​ട​ക്കുന്ന, രഹസ്യ​മാ​യി കഴിയുന്ന, ഒരു ജീവി കൂടി​യാണ്‌. മനുഷ്യൻ ഭീഷണി ഉയർത്തുന്ന സ്ഥലങ്ങളിൽ പുള്ളി​പ്പു​ലി ജാഗ്ര​ത​യോ​ടെ നിശബ്ദത പാലി​ക്കു​ന്നു. പ്രകോ​പി​പ്പി​ക്ക​പ്പെ​ടു​മ്പോൾ മാത്രമേ സിംഹ​സ​മാ​ന​മായ മുരള​ലും ഒച്ചയും അവൻ പുറ​പ്പെ​ടു​വി​ക്കാ​റു​ള്ളൂ. സാധാരണ സാഹച​ര്യ​ങ്ങ​ളിൽ, അവന്റെ ശബ്ദം പേടി​പ്പെ​ടു​ത്തു​ന്നതല്ല: ശക്തിയാ​യി ഉരയ്‌ക്കുന്ന ഒരുതരം ശബ്ദമാ​ണത്‌—ഏറെക്കു​റെ വാളു​കൊ​ണ്ടു തടി അറക്കു​ന്ന​തു​പോ​ലുള്ള ഒരു ശബ്ദം. സി. ററി. ആസ്‌റ​റ്‌ലി മാബർലി​യു​ടെ പൂർവാ​ഫ്രി​ക്ക​യി​ലെ മൃഗങ്ങൾ (ഇംഗ്ലീഷ്‌) എന്ന പുസ്‌തകം പറയു​ന്ന​ത​നു​സ​രിച്ച്‌ ആ ശബ്ദം “ഗ്രണ്ട്‌-ഹ! ഗ്രണ്ട്‌-ഹ! ഗ്രണ്ട്‌-ഹ! ഗ്രണ്ട്‌-ഹ! എന്നപോ​ലെ തോന്നി​ക്കു​ന്നു—അതു മിക്കവാ​റും അവസാ​നി​ക്കു​ന്നത്‌ കടുത്ത ഒരു ദീർഘ​നി​ശ്വാ​സ ശബ്ദത്തോ​ടെ​യാണ്‌.” അവന്റെ സ്വകാ​ര്യ​താ​പ്രി​യ​ത്തോ​ടു ചേർച്ച​യിൽ, തീവ്രത കുറഞ്ഞ പലതരം ശബ്ദങ്ങളും പുള്ളി​പ്പു​ലി പുറ​പ്പെ​ടു​വി​ക്കാ​റുണ്ട്‌, അവയിൽ പലതും മനുഷ്യർക്കു കേൾക്കാൻ സാധ്യമല്ല.

കൂടു​ത​ലാ​യി, സംസർഗ​പ്രി​യ​നായ സിംഹ​ത്തിൽനി​ന്നു വ്യത്യ​സ്‌ത​നായ പുള്ളി​പ്പു​ലി സാമൂ​ഹിക സ്വഭാ​വ​മുള്ള ഒരു പൂച്ചയല്ല. ഇടയ്‌ക്കി​ട​യ്‌ക്കു ജോഡി​കളെ കാണാ​മെ​ങ്കി​ലും പുള്ളി​പ്പു​ലി​കൾ ഒററയാൻമാ​രാണ്‌. അപ്രതീ​ക്ഷി​ത​മായ അല്ലെങ്കിൽ ശത്രു​ക്ക​ളു​മാ​യുള്ള ഏററു​മു​ട്ട​ലു​കൾ ഒഴിവാ​ക്കു​ന്ന​തി​നു പുള്ളി​പ്പു​ലി തന്റേതായ ഒരു പ്രദേശം നിശ്ചയി​ക്കു​ന്നു, അത്‌ 25 മുതൽ 65 വരെ ചതുര​ശ്ര​കി​ലോ​മീ​ററർ കണ്ടേക്കാം. തന്റെ സ്വൈ​ര​വി​ഹാ​ര​ത്തി​ന്റെ അതിർത്തി​കളെ സൂചി​പ്പി​ക്കു​ന്ന​തി​നു പ്രത്യേക ഗ്രന്ഥി​ക​ളിൽനി​ന്നുള്ള ഒരു സ്രവം അവൻ തളിക്കും. തന്റെ പ്രദേ​ശത്തെ വേർതി​രി​ക്കുന്ന ഈ പ്രത്യേക ഗന്‌ധം അതിന്റെ ലിംഗം, പ്രായം, ലൈം​ഗി​ക​നില, സാധ്യ​ത​യ​നു​സ​രിച്ച്‌ “ഭൂവുടമ” ആർ എന്നീ കാര്യങ്ങൾ മററു പുള്ളി​പ്പു​ലി​കളെ വിളി​ച്ച​റി​യി​ക്കു​ന്നു.

ഒളിച്ചു​നി​ന്നു വേട്ടയാ​ടു​ന്ന​താ​ണു പുള്ളി​പ്പു​ലി​യു​ടെ സഹജസ്വ​ഭാ​വം. ബൈബിൾകാ​ല​ങ്ങ​ളിൽ അവൻ പട്ടണങ്ങൾക്ക​ടു​ത്തു പതിയി​രി​ക്കു​ന്ന​താ​യി അറിയ​പ്പെ​ട്ടി​രു​ന്നു, മാരക​മായ വേഗത​യോ​ടെ വളർത്തു​മൃ​ഗ​ങ്ങ​ളു​ടെ​മേൽ ചാടി​വീ​ഴാൻ തയ്യാറാ​യി. (യിരെ​മ്യാ​വു 5:6; ഹോശേയ 13:7; ഹബക്കൂക്‌ 1:8) കഴുത​പ്പു​ലി​കൾ, കുറു​ക്കൻമാർ തുടങ്ങിയ ശവഭു​ക്കു​ക​ളിൽനി​ന്നു സംരക്ഷി​ക്കു​ന്ന​തി​നു താൻ കൊന്ന വലിയ ഇരകളെ അവൻ സൂക്ഷി​ച്ചു​വ​യ്‌ക്കു​ന്നതു നിലത്തു​നിന്ന്‌ ഏതാണ്ട്‌ 9-ഓ 12-ഓ മീററർ ഉയരത്തിൽ മരത്തിന്റെ കവരയി​ലാ​യി​രി​ക്കും. ഒരു മാനി​ന്റെ​യോ 1.5 മീററർ ഉയരമുള്ള ഒരു കൊച്ചു ജിറാ​ഫി​ന്റെ​യോ ശവം അവൻ അത്ര ഉയരത്തി​ലേക്കു വലിച്ചു​ക​യ​റ​റു​ന്നത്‌ എങ്ങനെ​യാണ്‌? പുള്ളി​പ്പു​ലി എളുപ്പം പരസ്യ​മാ​യി അറിയി​ക്കുന്ന ഒരു രഹസ്യമല്ല ഇത്‌. അതിശ​ക്ത​മായ ശരീര​ബ​ല​ത്താ​ലാണ്‌ ഇതു സാധ്യ​മാ​കു​ന്ന​തെന്നു ക്ഷമാപൂർവം നിരീ​ക്ഷി​ച്ചവർ അവകാ​ശ​പ്പെ​ടു​ന്നു. മരത്തിന്റെ ശാഖക​ളിൽ തൂക്കി​യിട്ട്‌ ശാഖക​ളു​ടെ​യും വൃക്ഷത്ത​ല​പ്പു​ക​ളു​ടെ​യും മറയത്തു തികഞ്ഞ സ്വകാ​ര്യ​ത​യിൽ, വിശ്ര​മ​സ​മ​യത്തു തന്റെ ഇരയെ ഭക്ഷിക്കാ​നാ​ണു പുള്ളി​പ്പു​ലി​കൾക്കു കൂടു​ത​ലി​ഷ്ടം.

വെല്ലു​വി​ളി​ക്ക​പ്പെ​ടു​ന്നി​ല്ലെ​ങ്കിൽ, പുള്ളി​പ്പു​ലി നാണം​കു​ണു​ങ്ങി​യും പിൻവ​ലി​യുന്ന സ്വഭാ​വ​ക്കാ​ര​നും മനുഷ്യ​നു​മാ​യുള്ള ഏററു​മു​ട്ടൽ ഒഴിവാ​ക്കു​ന്ന​വ​നു​മാണ്‌. ചില പുള്ളി​പ്പു​ലി​കൾ മനുഷ്യ​ഭയം ഇല്ലാത്ത​വ​യാ​യി നരഭോ​ജി​കൾ ആയിത്തീർന്നി​ട്ടു​ണ്ടെ​ന്നി​രി​ക്കെ, മിക്കവ​യും മനുഷ്യർക്കു ഭീഷണി ഉയർത്തു​ന്നില്ല. എന്നാൽ, അതിനു പരി​ക്കേൽക്കു​ക​യോ അപകട​ത്തി​ലാ​കു​ക​യോ ചെയ്‌താൽ, ശത്രു​വി​നോ​ടു യാതൊ​രു ഭയവും പുള്ളി​പ്പു​ലി കാട്ടാ​റില്ല. “കുപി​ത​നായ പുള്ളി​പ്പു​ലി രൗദ്ര​ഭാ​വ​ത്തി​ന്റെ മൂർത്തി​മ​ദ്‌ഭാ​വ​മാണ്‌, . . . അതിന്റെ ശക്തി മുഴു​വ​നും മിന്നൽ വേഗത്തിൽ തൊട്ട​ടു​ത്തു​നിന്ന്‌ കേന്ദ്രീ​ക​രി​ക്കാൻ അതു പ്രാപ്‌ത​വു​മാണ്‌” എന്ന്‌ പുള്ളി​പ്പു​ലി​യു​ടെ കഥ (ഇംഗ്ലീഷ്‌) എന്ന പുസ്‌ത​ക​ത്തിൽ യോനാ​ഥാൻ സ്‌കോട്ട്‌ എഴുതു​ന്നു.

തള്ള പുള്ളി​പ്പു​ലി​കൾ

അപ്പോൾ, പുള്ളി​പ്പു​ലി​കൾ തങ്ങളുടെ കുഞ്ഞു​ങ്ങളെ വളർത്തു​ന്ന​തും താരത​മ്യേന സ്വകാ​ര്യ​ത​യി​ലാ​ണെ​ന്നത്‌ അതിശ​യമല്ല. നവജാ​ത​രായ കുഞ്ഞു​ങ്ങളെ ആദ്യത്തെ രണ്ടു മാസം ഒളിപ്പി​ച്ചു​വ​യ്‌ക്കു​ക​യാ​ണു പതിവ്‌, പലപ്പോ​ഴും ഒരു ഗുഹയി​ലോ മറേറാ. കുഞ്ഞു​ങ്ങളെ വളർത്തി​ക്കൊ​ണ്ടു​വ​രു​ന്ന​തിൽ പിതാവു യാതൊ​രു പങ്കും വഹിക്കാ​റി​ല്ലെ​ങ്കി​ലും മാതാവു കുഞ്ഞു​ങ്ങളെ പോറ​റു​ക​യും വൃത്തി​യാ​ക്കു​ക​യും അവയ്‌ക്കു ചൂടേ​കു​ക​യും ചെയ്‌തു​കൊണ്ട്‌ അവയു​മാ​യി ഒരടുത്ത ബന്ധം വളർത്തി​യെ​ടു​ക്കു​ന്നു. ക്രമേണ, തള്ള തന്റെ ഒററ​പ്ര​സ​വ​ത്തി​ലുള്ള രണ്ടോ മൂന്നോ കുഞ്ഞു​ങ്ങളെ ഒരു പുതിയ ഭവനത്തി​ലേക്കു മാററി​യേ​ക്കാം. അവ അപ്പോ​ഴും തീരെ ചെറു​താ​ണെ​ങ്കിൽ കടിച്ചു​പി​ടി​ച്ചു​കൊ​ണ്ടാ​യി​രി​ക്കും പോകു​ന്നത്‌, കുഞ്ഞുങ്ങൾ കുറേ​ക്കൂ​ടെ വലുതാ​ണെ​ങ്കിൽ തന്റെ പിന്നാലെ വരാൻ അവയോ​ടു പറഞ്ഞു​കൊ​ണ്ടും.

ആൾക്കു​ര​ങ്ങൻമാർപോ​ലുള്ള ശത്രു​ക്ക​ളു​ടെ ദൃഷ്ടി​യിൽ പെടാതെ തള്ള തന്റെ കുഞ്ഞു​ങ്ങളെ സൂക്ഷി​ക്കാ​നും ശ്രമി​ക്കു​ന്നു. എന്നാൽ ആൾക്കു​ര​ങ്ങൻമാർ കുഞ്ഞു​ങ്ങളെ ആക്രമി​ക്കാൻ ശ്രമി​ക്കു​ക​യാ​ണെ​ങ്കിൽ, അവൾ അവയെ ആക്രമി​ക്കും, സുരക്ഷി​ത​സ്ഥാ​ന​ത്തേക്ക്‌ ഓടി​യൊ​ളി​ക്കാൻ കുഞ്ഞു​ങ്ങൾക്ക്‌ ഒരവസരം കൊടു​ക്കാൻ തന്നെത്താൻ അപകട​പ്പെ​ടു​ത്തി​ക്കൊ​ണ്ടു​പോ​ലും. തന്റെ കുഞ്ഞു​ങ്ങളെ പോറ​റാൻ അവൾ വലിയ സാഹസ​ങ്ങൾക്കു​പോ​ലും മുതി​രു​ന്നു. സാധാ​ര​ണ​മാ​യി, ആനകളെ കണ്ടാൽ പിൻതി​രി​യുന്ന പുള്ളി​പ്പു​ലി തന്റെ വിശക്കുന്ന കുഞ്ഞു​ങ്ങൾക്കു തീററി കൊണ്ടു​ക്കൊ​ടു​ക്കാൻ ചിന്നം​വി​ളി​ക്കുന്ന ആനക്കൂ​ട്ട​ത്തി​ന്റെ ഇടയിൽക്കൂ​ടി​പോ​ലും നടന്നു​പോ​കും.

രസാവ​ഹ​മെ​ന്നു പറയട്ടെ, ചെറു പുള്ളി​പ്പു​ലി​കൾ കുറെ കാല​ത്തേക്കു തങ്ങളുടെ സ്വത​ന്ത്ര​മായ മനോ​ഭാ​വം പ്രകട​മാ​ക്കാ​റില്ല. ഏതാണ്ട്‌ ആറു മാസമാ​കു​മ്പോൾ കുഞ്ഞുങ്ങൾ ഇരതേ​ടാൻ പഠിക്കു​ന്നു, എന്നാൽ ഒരു വയസ്സു പ്രായ​മാ​കു​ന്ന​തു​വരെ അവ സ്വന്തമാ​യി ഇരയെ കൊല്ലാ​റില്ല. രണ്ടര വയസ്സു കഴിഞ്ഞാണ്‌ ആൺപു​ലി​കൾ ഒററയ്‌ക്കു വിഹരി​ക്കാൻ തുടങ്ങു​ന്നത്‌. പെൺകു​ഞ്ഞു​ങ്ങൾ വളർച്ച​യെ​ത്തി​യ​വ​രെന്ന നിലയിൽ തങ്ങളുടെ മാതാ​വി​ന്റെ ഭവന​പ്ര​ദേ​ശത്തു തുടർന്നും വസി​ച്ചേ​ക്കാം.

പുള്ളി​പ്പു​ലി—ഒടുവിൽ സമാധാ​ന​ത്തി​ലോ?

എന്നാൽ കാണാൻ രസമുള്ള പൂച്ചക്കു​ട്ടി​കൾ ഘാതക​രാ​യി വളരുന്നു. അതു​കൊണ്ട്‌ യെശയ്യാ പ്രവാ​ച​കന്റെ വാക്കുകൾ എന്നെങ്കി​ലും സത്യമാ​യി​ത്തീ​രും എന്നു വിശ്വ​സി​ക്കുക പ്രയാ​സ​ക​ര​മാ​യി തോന്നു​ന്നു: “ചെന്നായി കുഞ്ഞാ​ടി​നോ​ടു​കൂ​ടെ പാർക്കും; പുള്ളി​പ്പു​ലി കോലാ​ട്ടു​കു​ട്ടി​യോ​ടു​കൂ​ടെ കിടക്കും.”—യെശയ്യാ​വു 11:6.

പുള്ളി​പ്പു​ലി​ക​ളെ വീട്ടു​മൃ​ഗ​ത്തെ​പ്പോ​ലെ വളർത്താ​നുള്ള അടുത്ത​കാ​ലത്തെ ശ്രമങ്ങൾക്കു കാര്യ​മായ വിജയ​മൊ​ന്നു​മു​ണ്ടാ​യി​രു​ന്നില്ല. സ്യൂക്കാ ബിസ്‌ലെ​ററി വാൻ ഡെർ ലാനും ഭർത്താ​വും തങ്ങളുടെ ആഫ്രിക്കൻ കൃഷി​യി​ട​ത്തിൽ ഒററ​പ്പേ​റി​ലു​ണ്ടായ പുള്ളി​പ്പു​ലി കുട്ടി​കളെ വളർത്തു​ക​യു​ണ്ടാ​യി. ആ കുഞ്ഞുങ്ങൾ “സമ്പൂർണ സ്വാത​ന്ത്ര്യം” ആസ്വദി​ച്ചി​രു​ന്നു, പലപ്പോ​ഴും അവയ്‌ക്കു തീററി കൊടു​ത്തി​രു​ന്നതു കൈ​കൊ​ണ്ടാണ്‌. എന്നാൽ, വാസ്‌ത​വ​ത്തിൽ അവയെ ഒരിക്ക​ലും വളർത്തു​മൃ​ഗ​ങ്ങ​ളാ​ക്കി മാററാൻ കഴിഞ്ഞില്ല. സ്യൂക്കാ ബിസ്‌ലെ​ററി ഇങ്ങനെ എഴുതു​ന്നു: “പുള്ളി​പ്പു​ലി പൂർണ​വ​ളർച്ച​യെ​ത്തി​ക്ക​ഴി​ഞ്ഞാൽ അവൻ തന്റെ പാട്ടിനു പോകു​ന്നു. ഒരു സിംഹം സദാ നിങ്ങളെ സ്‌നേ​ഹി​ക്കു​ക​യും അനുസ​രി​ക്കു​ക​യും ചെയ്യും; ഒരു പുള്ളി​പ്പു​ലി സദാ നിങ്ങളെ തിരി​ച്ച​റി​യും, എന്നാൽ ഏതു നിമി​ഷ​ത്തിൽ എങ്ങനെ പ്രതി​ക​രി​ക്ക​ണ​മെന്ന്‌ അവൻ സ്വയം തീരു​മാ​നി​ക്കു​ന്നു.”

ഒടുവിൽ, വളർച്ച​യെ​ത്തിയ പുലി​ക്കു​ട്ടി​കളെ കൃഷി​യി​ട​ത്തിൽ സ്വത​ന്ത്ര​മാ​യി വിഹരി​ക്കാൻ വിടു​ന്നത്‌ അപകട​ക​ര​മാ​ണെന്നു തോന്നി. അവയെ വനത്തി​ലേക്കു വിടാൻ തീരു​മാ​നി​ച്ചു. സൗഹൃ​ദ​സ്വ​ഭാ​വ​മുള്ള മനുഷ്യ​രു​ടെ ഇടയിൽ വളർത്ത​പ്പെട്ട ആ കൊച്ചു പുള്ളി​പ്പു​ലി​ക​ളു​ടെ സ്വഭാ​വ​ത്തി​നു മാററം വന്നിരു​ന്നോ? അശേഷ​മില്ല. സ്വത​ന്ത്ര​മാ​ക്കി മൂന്നു ദിവസ​ത്തി​നകം താൻ കൊന്ന ഒരു മാനിന്റെ അടുത്ത്‌ ആൺപു​ള്ളി​പ്പു​ലി ഇരിക്കു​ന്ന​താ​യി കണ്ടെത്തി.

എന്നിരു​ന്നാ​ലും, പുള്ളി​പ്പു​ലി​കളെ മെരു​ക്കി​യെ​ടു​ക്കു​ന്ന​തി​ലെ പരിമി​ത​മായ അത്തരം വിജയം, പുള്ളി​പ്പു​ലി​യും ആടും തമ്മിൽ സമാധാ​നം ഉണ്ടായി​രി​ക്കു​മെ​ന്നുള്ള യെശയ്യാ​വി​ന്റെ നിശ്വസ്‌ത പ്രവച​നത്തെ അസാധു​വാ​ക്കു​ന്നില്ല. അമ്പരപ്പി​ക്കുന്ന ഈ സംഭവം നടക്കാൻ പോകു​ന്നതു മനുഷ്യ​ശ്ര​മ​ങ്ങ​ളാ​ലല്ല, പിന്നെ​യോ ദിവ്യ ഇടപെ​ട​ലി​നാൽ ആയിരി​ക്കും. എന്നിരു​ന്നാ​ലും, ദൈവ​ഭ​രണം മൃഗ​ലോ​ക​ത്തിൽ സമാധാ​നം കൈവ​രു​ത്തു​ന്ന​തി​നെ​ക്കാ​ള​ധി​കം ചെയ്യും. “ഭൂമി യഹോ​വ​യു​ടെ പരിജ്ഞാ​നം​കൊ​ണ്ടു പൂർണ്ണ​മാ​യി”രിക്കും എന്നു യെശയ്യാവ്‌ പ്രവചി​ച്ചു. (യെശയ്യാ​വു 11:1-9) യുദ്ധത്തി​നും ഭിന്നത​യ്‌ക്കും ഇടയാ​ക്കി​യി​രി​ക്കുന്ന മൃഗസ​മാന സ്വഭാ​വത്തെ മനുഷ്യർപോ​ലും ഉപേക്ഷി​ക്കും. അതേസ​മ​യം​തന്നെ, മൃഗ​ലോ​ക​ത്തോ​ടുള്ള മമനു​ഷ്യ​ന്റെ മനോ​ഭാ​വ​ത്തി​നും മാററം വരും. മേലാൽ, യാതൊ​രു മൃഗവും നിഷ്‌ഠൂ​ര​മായ കൂട്ട​ക്കൊ​ല​യു​ടെ ഇരകളാ​യി​ത്തീ​രു​ക​യില്ല. മനുഷ്യർ അവരുടെ വാസസ്ഥ​ലത്തെ പാഴാ​ക്കു​ക​യോ അവരുടെ അസ്ഥിത്വ​ത്തെ അപകട​പ്പെ​ടു​ത്തു​ക​യോ ചെയ്യു​ക​യില്ല, കാരണം യഹോവ ‘ഭൂമിയെ നശിപ്പി​ക്കു​ന്ന​വരെ നാശത്തി​ലേക്കു കൊണ്ടു​വന്നി’രിക്കും.—വെളി​പാട്‌ 11:18, NW.