മെദോ-പേർഷ്യ—ബൈബിൾ ചരി​ത്ര​ത്തി​ലെ നാലാ​മത്തെ ലോക​മ​ഹ​ച്ഛ​ക്തി

മേദ്യരും പേർഷ്യ​രും ബൈബി​ളിൽ പ്രതി​പാ​ദി​ച്ചി​രി​ക്കുന്ന അനേകം സംഭവ​ങ്ങ​ളിൽ ഉൾപ്പെ​ട്ടി​രു​ന്നു. അവർ അനേകം ബൈബിൾ പ്രവച​ന​ങ്ങ​ളി​ലും പരാമർശി​ക്ക​പ്പെ​ട്ടി​രി​ക്കു​ന്നു. നിങ്ങൾ പുരാ​ത​ന​വും താൽപ്പ​ര്യ​മു​ണർത്തു​ന്ന​വ​രു​മായ ഈ ആളുക​ളെ​ക്കു​റിച്ച്‌ കൂടുതൽ അറിയാൻ ഇഷ്‌ട​പ്പെ​ടു​ന്നു​വോ?

പുരാതന മേദ്യ​രും പേർഷ്യ​രും മാർച്ചു​ചെയ്‌തു​കൊ​ണ്ടി​രി​ക്ക​യാ​യി​രു​ന്നു! അവരുടെ നേതാവ്‌ മഹാനായ കോ​രേ​ശാ​യി​രു​ന്നു. അയാൾ അപ്പോൾത്തന്നെ ഒരു സാമ്രാ​ജ്യ​ത്തെ നിയ​ന്ത്രി​ച്ചി​രു​ന്നു. ഇപ്പോൾ അയാൾ അന്നത്തെ മുഖ്യ ലോക​ശ​ക്തി​യാ​യി​രുന്ന ശക്തമായ ബാബി​ലോ​ന്റെ​മേൽ ശ്രദ്ധ കേന്ദ്രീ​ക​രി​ച്ചു.

ബാബി​ലോ​ന്റെ തലസ്ഥാന നഗരി​ക്കു​ള്ളിൽ ബേൽശസ്സർ രാജാവ്‌ ഒരായി​രം മഹത്തു​ക്കൾക്കു​വേണ്ടി ഒരു വിരുന്നു കഴിക്ക​യാ​യി​രു​ന്നു. രാജാവ്‌ “വീഞ്ഞിന്റെ സ്വാധീ​നത്തി”ലായി​രു​ന്നു എന്ന്‌ ബൈബിൾ പറയുന്നു. ആഹ്ലാദ​ത്തി​മർപ്പിൽ അവർ തങ്ങളുടെ വിഗ്രഹ ദൈവ​ങ്ങളെ സ്‌തു​തി​ച്ചു, അതേസ​മയം യെരു​ശ​ലേ​മി​ലെ യഹോ​വ​യു​ടെ ആലയത്തിൽനിന്ന്‌ എടുത്തു​കൊ​ണ്ടു​പോ​യി​രുന്ന വിശുദ്ധ പാത്ര​ങ്ങ​ളിൽനിന്ന്‌ കുടി​ക്കു​ക​യും ചെയ്‌തു. (ദാനി​യേൽ 5:1-4) ബാബി​ലോ​ന്റെ ശക്തമായ അതിരു​കൾക്കു​ള്ളിൽ അവർക്ക്‌ സുരക്ഷി​ത​ത്വം തോന്നി.

എന്നിരു​ന്നാ​ലും, വെളി​യിൽ കോ​രേ​ശി​ന്റെ സൈന്യം ബാബി​ലോ​നി​ലൂ​ടെ ഒഴുകിയ യൂഫ്ര​ട്ടീസ്‌ നദിയി​ലെ വെള്ളങ്ങ​ളു​ടെ ഗതി മാററി​വി​ട്ടി​രു​ന്നു. പ്രകൃ​തി​പ​ര​മായ ആ തടസ്സം നീങ്ങി​യ​പ്പോൾ അയാളു​ടെ പടയാ​ളി​കൾ നദീത​ട​ത്തി​ലൂ​ടെ ഇരച്ചു​ക​യറി—ബാബി​ലോ​ന്റെ ചുവരു​കൾക്ക​പ്പു​റ​ത്തേക്കു കടക്കു​ക​യും നദിക്ക്‌ അഭിമു​ഖ​മാ​യി ഉണ്ടായി​രുന്ന തുറന്ന പടിവാ​തി​ലു​ക​ളി​ലൂ​ടെ നഗരത്തി​ലേ​ക്കു​തന്നെ പ്രവേ​ശി​ക്കു​ക​യും ചെയ്‌തു. സൂര്യൻ ഉദിക്കു​ന്ന​തി​നു​മുമ്പ്‌ ബേൽശസ്സർ മരിച്ചു. ബാബി​ലോൻ വീണി​രു​ന്നു. മെദോ-പേർഷ്യ ബൈബിൾ ചരി​ത്ര​ത്തി​ലെ നാലാം ലോക​മ​ഹ​ച്‌ഛ​ക്തി​യാ​യി​ത്തീർന്നി​രു​ന്നു. എന്നാൽ ഈ മേദ്യ​രും പേർഷ്യ​രും ആരായി​രു​ന്നു?

മേദ്യർ അസ്സീറി​യാ​യു​ടെ കിഴക്കു​വ​ശത്തെ പർവത​പീ​ഠ​ഭൂ​മി​യിൽ നിന്ന്‌ വന്നവരാ​യി​രു​ന്നു. അസ്സീറി​യാ​യിൽ നിന്ന്‌ കണ്ടെടു​ക്ക​പ്പെട്ട ചില ചുമർ കൊത്തു​പ​ണി​കൾ അവർ ഉയർന്ന പീഠഭൂ​മി​യി​ലെ അവരുടെ ഇടയ​വേ​ലക്ക്‌ അനു​യോ​ജ്യ​മായ ആട്ടിൻതോൽ കൊണ്ടുള്ള കോട്ടു​ക​ളും അടിക്കു​പ്പാ​യ​ങ്ങ​ളും ഉയർന്ന ലേസു​ക​ളോ​ടു​കൂ​ടിയ ബൂട്ട്‌സും ധരിച്ചി​രു​ന്ന​താ​യി ചിത്രീ​ക​രി​ക്കു​ന്നു. മേദ്യർ ഫലത്തിൽ യാതൊ​രു ലിഖി​ത​രേ​ഖ​ക​ളും അവശേ​ഷി​പ്പി​ച്ചി​രു​ന്നില്ല. നാം അവരെ​ക്കു​റിച്ച്‌ അറിയു​ന്ന​തിൽ അധിക​പ​ങ്കും ബൈബി​ളിൽനി​ന്നും അസ്സീറി​യൻപാ​ഠ​ങ്ങ​ളിൽ നിന്നും പൗരാ​ണിക ഗ്രീക്ക്‌ ചരി​ത്ര​കാ​രൻമാ​രിൽനി​ന്നും മനസ്സി​ലാ​ക്കി​യി​ട്ടു​ള്ള​താണ്‌. ആദിയിൽ പേർഷ്യർ പേർഷ്യൻഗൾഫി​ന്റെ വടക്കൻ പ്രദേ​ശത്ത്‌ മിക്ക​പ്പോ​ഴും ഒരു നാടോ​ടി​ജീ​വി​തം നയിച്ചി​രു​ന്നു. അവരുടെ സാമ്രാ​ജ്യം വളർന്ന​പ്പോൾ അവർ ആഡംബ​ര​ത്തോട്‌ ഒരു മുന്തിയ അഭിരു​ചി വളർത്തി​യെ​ടു​ത്തു.

ആദ്യം മേദ്യർ പ്രാമാ​ണ്യ​മു​ള്ള​വ​രാ​യി​രു​ന്നു, എന്നാൽ ക്രി.മു. 550-ൽ പേർഷ്യ​യി​ലെ മഹാനായ കോ​രേശ്‌ മേദ്യ​രാ​ജാ​വായ അസ്‌റ​റ​ഗ​സി​ന്റെ​മേൽ ഒരു സത്വര​വി​ജയം നേടി. കോ​രേശ്‌ രണ്ട്‌ ജനതതി​ക​ളു​ടെ​യും ആചാര​ങ്ങ​ളും നിയമ​ങ്ങ​ളും സംയോ​ജി​പ്പി​ക്കു​ക​യും അവരുടെ രാജ്യ​ങ്ങളെ ഒന്നിക്കു​ക​യും അവയു​ടെ​മേ​ലുള്ള വിജയ​ങ്ങളെ വിപു​ല​പ്പെ​ടു​ത്തു​ക​യും ചെയ്‌തു. മേദ്യർ പേർഷ്യർക്ക്‌ അധീന​പ്പെ​ട്ടി​രു​ന്നെ​ങ്കി​ലും സാമ്രാ​ജ്യ​ത്തിന്‌ ഒരു ഇരട്ട പ്രകൃ​തി​യാ​ണു​ണ്ടാ​യി​രു​ന്നത്‌. മേദ്യർ ഉയർന്ന ഉദ്യോ​ഗങ്ങൾ വഹിക്കു​ക​യും പേർഷ്യൻ​സൈ​ന്യ​ങ്ങളെ നയിക്കു​ക​യും ചെയ്‌തി​രു​ന്നു. വിദേ​ശീ​യർ മേദ്യ​രെ​യും പേർഷ്യ​രെ​യും കുറിച്ചു പറഞ്ഞി​രു​ന്നു. അല്ലെങ്കിൽ അവർ ഒരു പദം ഉപയോ​ഗി​ച്ചി​രു​ന്നെ​ങ്കിൽ അത്‌ “മേദ്യ” എന്നായി​രു​ന്നു.

മേദ്യ​രും പേർഷ്യ​രും ബാബി​ലോ​നെ ആക്രമി​ക്കു​ന്ന​തി​നു​മുമ്പ്‌ പ്രവാ​ച​ക​നായ ദാനി​യേ​ലിന്‌ ഈ ഇരട്ട ജനതയെ പ്രതി​നി​ധാ​നം​ചെ​യ്‌തി​രുന്ന രണ്ടു കൊമ്പുള്ള ഒരു ആട്ടു​കൊ​റ​റന്റെ ഒരു ദർശനം കൊടു​ക്ക​പ്പെ​ട്ടി​രു​ന്നു. ദാനി​യേൽ ഇപ്രകാ​രം എഴുതി: “രണ്ടു കൊമ്പു​കൾ നീണ്ടവ​യാ​യി​രു​ന്നു, എന്നാൽ ഒന്ന്‌ മറേറ​തി​നെ​ക്കാൾ നീളം​കൂ​ടി​യ​താ​യി​രു​ന്നു, നീളം കൂടി​യത്‌ പിന്നീടു വന്നതാ​യി​രു​ന്നു.” ആട്ടു​കൊ​റ​റന്റെ താദാ​ത്മ്യം​സം​ബ​ന്ധിച്ച്‌ സംശയ​മു​ണ്ടാ​യി​രു​ന്നില്ല, എന്തു​കൊ​ണ്ടെ​ന്നാൽ ദൂതൻ ദാനി​യേ​ലി​നോട്‌ ഇപ്രകാ​രം പറഞ്ഞു: “രണ്ടു കൊമ്പു​ള്ള​താ​യി നീ കണ്ട ആട്ടു​കൊ​ററൻ മേദ്യ​യി​ലെ​യും പേർഷ്യ​യി​ലെ​യും രാജാ​ക്കൻമാ​രെ പ്രതി​നി​ധാ​നം​ചെ​യ്യു​ന്നു.”—ദാനി​യേൽ 8:3, 20.

ബാബി​ലോൻ വീണ​പ്പോൾ ദാനി​യേൽ അതിനു​ള്ളി​ലു​ണ്ടാ​യി​രു​ന്നു. അവൻ മേദ്യ​രു​ടെ​യും പേർഷ്യ​രു​ടെ​യും ആഗമന​ത്തിന്‌ സാക്ഷി​യാ​യി​രു​ന്നു. പുതു​താ​യി ജയിച്ച​ട​ക്ക​പ്പെട്ട നഗരത്തി​ലെ ആദ്യ ഭരണാ​ധി​കാ​രി​യാ​യി​രുന്ന മേദ്യ​നായ ദാര്യാ​വേശ്‌ ഭരണ​പ്ര​ദേ​ശ​ത്തിന്‌ 120 സംരക്ഷ​കരെ നിയമി​ച്ചു, അവരു​ടെ​മേൽ മൂന്ന്‌ ഉദ്യോ​ഗ​സ്ഥൻമാ​രെ​യും ആക്കി​വെച്ചു. ദാനി​യേൽ മൂവരിൽ ഒരാളാ​യി​രു​ന്നു. (ദാനി​യേൽ 5:30-6:3) ബാബി​ലോൻ വീണതി​നു മുമ്പും ശേഷവു​മുള്ള അവന്റെ ഉയർന്ന ഭരണപ​ദ​വി​യു​ടെ വീക്ഷണ​ത്തിൽ, കോ​രേശ്‌ എന്നു പേരുള്ള ഒരു മനുഷ്യൻ ബാബി​ലോ​നെ ജയിച്ച​ട​ക്കു​മെന്ന്‌ രണ്ടു നൂററാ​ണ്ടു​കൾക്കു മുമ്പു​കൂ​ട്ടി പറഞ്ഞി​രുന്ന എബ്രായ പ്രവച​ന​ത്തെ​ക്കു​റിച്ച്‌ കോ​രേ​ശി​നെ അറിയി​ച്ചി​ല്ലെന്ന്‌ സങ്കൽപ്പി​ക്കുക പ്രയാ​സ​മാണ്‌.—യെശയ്യാവ്‌ 45:1-3.

യരുശ​ലേം പുനഃ​സ്ഥി​തീ​ക​രി​ക്ക​പ്പെ​ടു​ന്നു

ബാബി​ലോ​നി​ന്റെ വീഴ്‌ച മറെറാ​രു നഗരത്തി​ന്റെ—യരുശ​ലേ​മി​ന്റെ—ഉയർച്ചക്ക്‌ കളമൊ​രു​ക്കി. അത്‌ ക്രി.മു.607-ൽ ബാബി​ലോ​ന്യ​രാൽ നശിപ്പി​ക്ക​പ്പെ​ട്ടതു മുതൽ 70 വർഷ​ത്തോ​ളം ശൂന്യ​മാ​യി കിടന്നി​രു​ന്നു. കോ​രേശ്‌ മുഖാ​ന്തരം യരുശ​ലേം പുനർനിർമ്മി​ക്ക​പ്പെ​ടു​മെ​ന്നും അതിന്റെ ആലയത്തി​ന്റെ അടിസ്ഥാ​നം ഇടപ്പെ​ടു​മെ​ന്നും ബൈബിൾ പ്രവച​നങ്ങൾ പറഞ്ഞി​രു​ന്നു.—യെശയ്യാവ്‌ 44:28.

ഇതു സംഭവി​ച്ചോ? ഉവ്വ്‌. യഹോ​വ​യു​ടെ ആരാധ​കർക്ക്‌ “യഹൂദ​യി​ലുള്ള യരുശ​ലേ​മി​ലേക്ക്‌ പോയി ഇസ്രാ​യേ​ലി​ന്റെ ദൈവ​മായ യഹോ​വ​യു​ടെ—അവൻ സത്യ​ദൈ​വ​മാ​കു​ന്നു—യരുശ​ലേ​മി​ലെ ആലയം പുനർനിർമ്മി​ക്കാൻ” കഴിയു​മെന്ന്‌ കോ​രേശ്‌ കല്‌പി​ച്ചു​വെന്ന്‌ പുരോ​ഹി​ത​നും പണ്ഡിത​നും പകർപ്പെ​ഴു​ത്തു​കാ​ര​നു​മായ എസ്രാ റിപ്പോർട്ടു​ചെ​യ്യു​ന്നു. (എസ്രാ 1:3) എതാണ്ട്‌ 50,000 പേർ ആലയനി​ക്ഷേ​പ​ങ്ങ​ളും വഹിച്ചു​കൊണ്ട്‌ യരുശ​ലേ​മി​ലേ​ക്കുള്ള നാലു​മാ​സത്തെ മടക്കയാ​ത്ര നടത്തി. ക്രി.മു. 537-ൽ ദേശം വീണ്ടും നിവസി​ക്ക​പ്പെ​ടാൻ തുടങ്ങി—യരുശ​ലേ​മി​ന്റെ വീഴ്‌ചക്ക്‌ കൃത്യം 70 വർഷത്തി​നു​ശേഷം.—യിരെ​മ്യാവ്‌ 25:11, 12; 29:10.

അങ്ങനെ​യു​ള്ള ഒരു കല്‌പന കോ​രേ​ശി​ന്റെ നയത്തോ​ടു യോജി​പ്പി​ലാ​യി​രു​ന്നു​വെന്ന്‌ പുരാ​വ​സ്‌തു​ശാ​സ്‌ത്രം സ്ഥിരീ​ക​രി​ച്ചി​രി​ക്കു​ന്നു. ബാബി​ലോ​നി​ന്റെ ശൂന്യ​ശി​ഷ്ട​ങ്ങ​ളിൽ കണ്ടെത്ത​പ്പെട്ട ഒരു കളിമൺ സിലി​ണ്ട​റിൽ കോ​രേശ്‌ ഇങ്ങനെ പറയുന്നു: “ഞാൻ (ഈ) പുണ്യ​ന​ഗ​ര​ങ്ങ​ളെ​യും . . . ദീർഘ​നാ​ളാ​യി ശൂന്യ​മാ​യി കിടന്നി​രുന്ന വിശു​ദ്ധ​മ​ന്ദി​ര​ങ്ങ​ളെ​യും അവിടത്തെ പ്രതി​മ​ക​ളെ​യും (അവർക്ക്‌) തിരികെ കൊടു​ക്കു​ക​യും അവർക്കു​വേണ്ടി സ്ഥിരമായ വിശു​ദ്ധ​മ​ന്ദി​രങ്ങൾ സ്ഥാപി​ക്കു​ക​യും ചെയ്‌തു. ഞാൻ അവരുടെ (മുൻ) നിവാ​സി​ക​ളെ​യെ​ല്ലാം കൂട്ടി​ച്ചേർക്കു​ക​യും അവരുടെ വസതികൾ (അവർക്ക്‌) തിരികെ കൊടു​ക്കു​ക​യും ചെയ്‌തു.”

യഹൂദൻമാ​രു​ടെ ശമര്യ​ശ​ത്രു​ക്കൾ പിന്നീട്‌ ചക്രവർത്തി​യു​ടെ നിരോ​ധ​ന​ത്താൽ ആലയപു​നർനിർമ്മാ​ണം നിർത്തി​വെ​പ്പി​ച്ചു. യഹോ​വ​യു​ടെ പ്രവാ​ച​കൻമാ​രാ​യി​രുന്ന ഹഗ്ഗായി​യും സെഖര്യാ​വും ജനത്തെ ഉത്തേജി​പ്പി​ക്കു​ക​യും നിർമ്മാ​ണ​വേല പുനരാ​രം​ഭി​ക്കു​ക​യും ചെയ്‌തു. “ദാര്യാ​വേശ്‌ രാജാവ്‌” ആലയ പുനഃ​സ്ഥി​തീ​ക​ര​ണത്തെ അധികാ​ര​പ്പെ​ടു​ത്തിയ കോ​രേ​ശി​ന്റെ ആദ്യ കല്‌പന കണ്ടുപി​ടി​ക്കാൻ ഒരു പരി​ശോ​ധന നടത്താൻ ആജ്ഞാപി​ച്ചു. ആലയം​പ​ണി​യു​ടെ നിയമ​സാ​ധു​തയെ സ്ഥിരീ​ക​രി​ക്കുന്ന ഒരു മെമ്മോ​റാ​ണ്ടം സഹിതം ഒരു ചുരുൾ കോ​രേ​ശി​ന്റെ വേനൽക്കാല വസതി​യായ എക്‌ബെ​റ​റ​നാ​യിൽ കണ്ടെത്ത​പ്പെ​ട്ട​താ​യി ബൈബിൾ പറയുന്നു. പേർഷ്യൻരാ​ജാ​വായ ദാര്യാ​വേശ്‌ ഒന്നാമന്റെ ആറാമാ​ണ്ടിൽ പണി പൂർത്തി​യാ​യി.—എസ്രാ 4:4-7, 21; 6:1-15.

പ്രതാ​പ​ത്തി​ന്റെ തെളിവ്‌

നേരത്തെ പറഞ്ഞ ദർശന​ത്തിൽ, രണ്ടു കൊമ്പുള്ള മെദോ-പേർഷ്യൻ “ആട്ടു​കൊ​ററൻ പടിഞ്ഞാ​റോ​ട്ടും വടക്കോ​ട്ടും തെക്കോ​ട്ടും തള്ളിക്ക​യ​റു​ന്നത്‌” ദാനി​യേൽ മുൻകൂ​ട്ടി കണ്ടിരു​ന്നു. “അതിന്റെ മുമ്പാകെ യാതൊ​രു കാട്ടു​മൃ​ഗ​വും [മററു രാഷ്‌ട്രങ്ങൾ] നിന്നില്ല, അതിന്റെ കൈയിൽനിന്ന്‌ വിടു​വി​ക്കുന്ന ഒരുവ​നു​മി​ല്ലാ​യി​രു​ന്നു. അത്‌ അതിന്റെ ഇഷ്ടപ്ര​കാ​രം പ്രവർത്തി​ച്ചു, അത്‌ വലിയ ഭാവം നടിച്ചു.” (ദാനി​യേൽ 8:4) കുറഞ്ഞ​പക്ഷം ദാര്യാ​വേ​ശി​ന്റെ കാലമാ​യ​പ്പോ​ഴേക്ക്‌ ഈ ദർശനം നിവൃ​ത്തി​യേ​റി​യി​രു​ന്നു. അവന്റെ വീരകൃ​ത്യ​ങ്ങൾക്കു സാക്ഷ്യ​മാ​യി മഹാനായ ദാര്യാ​വേ​ശ്‌തന്നെ ഒരു ബൃഹത്തായ ചുവർ കൊത്തു​പ​ണി​യിൽ ചിത്രീ​ക​രി​ക്ക​പ്പെ​ട്ടി​ട്ടുണ്ട്‌. അത്‌ ഇപ്പോ​ഴും ബാബി​ലോ​നി​നും എക്‌ബ​റ​റാ​ന​ക്കും ഇടയ്‌ക്കത്തെ പഴയ റോഡിൽ ബൈസി​റ​റ​നി​ലെ ഉയർന്ന ഭാഗത്തെ കിഴു​ക്കാം​തൂ​ക്കായ മുഖത്ത്‌ കാണാൻ കഴിയും. മെദോ-പേർഷ്യൻ “ആട്ടു​കൊ​ററൻ” ബാബി​ലോ​നെ തോൽപ്പി​ച്ചതു കൂടാതെ മൂന്നു പ്രധാന ദിശക​ളിൽ പ്രദേശം പിടി​ച്ച​ടക്കി: വടക്ക്‌ അസ്സീറി​യ​യി​ലേ​ക്കും, പടിഞ്ഞാറ്‌ ഏഷ്യാ​മൈ​ന​റി​ലൂ​ടെ​യും, തെക്ക്‌ ഈജി​പ്‌റ​റി​ലേ​ക്കും.

പേർഷ്യൻ ചക്രവർത്തി​മാർ എക്‌ബ​റ​റ​നാ​യി​ലെ തങ്ങളുടെ ഗ്രീഷ്‌മ​കാല വസതി​യിൽനിന്ന്‌ 400 മൈൽ തെക്കു​കി​ഴ​ക്കാ​യി പെർസി​പോ​ളീ​സിൽ അവർ ഒരു ബൃഹത്തായ കൊട്ടാ​രം പണിതു. അവിടത്തെ ഒരു ചുവർ കൊത്തു​പ​ണി​യിൽ ദാര്യാ​വേശ്‌ തന്റെ സിംഹാ​സ​ന​ത്തിൽ ഇരിക്കു​ന്നതു കാണി​ക്കു​ന്നു. ഒരു ആലേഖ​ന​ത്തിൽ അയാൾ ഇപ്രകാ​രം വീമ്പി​ള​ക്കു​ന്നു: “ഞാൻ ഈ കൊട്ടാ​രം പണിത . . . മഹാരാ​ജാവ്‌, രാജാ​ക്കൻമാ​രു​ടെ രാജാവ്‌, ദേശങ്ങ​ളു​ടെ രാജാവ്‌ ആയ ദാര്യാ​വേശ്‌ ആണ്‌.” ഈ പകി​ട്ടേ​റിയ തലസ്ഥാന നഗരി​യു​ടെ ഉയര​മേ​റിയ ഏതാനും തൂണുകൾ ഇന്നും നിൽക്കു​ന്നുണ്ട്‌. മറെറാ​രു തലസ്ഥാനം ബാബി​ലോ​നി​നും എക്‌ബ​റ​റ​നാ​ക്കും പെർസി​പോ​ളീ​സി​നും മദ്ധ്യത്തിൽ സ്ഥിതി​ചെ​യ്‌തി​രുന്ന സൂസയിൽ (ശൂശൻ) ആയിരു​ന്നു. അവിടെ മഹാനായ ദാര്യാ​വേശ്‌ മറെറാ​രു ഗംഭീര കൊട്ടാ​രം പണിതു.

ദാര്യാ​വേ​ശി​ന്റെ പിൻഗാ​മി​യാ​യി അവന്റെ പുത്ര​നായ സെർക്‌സിസ്‌ വന്നു, സാദ്ധ്യ​ത​യ​നു​സ​രിച്ച്‌ അവനാണ്‌ എസ്ഥേർ എന്ന ബൈബിൾ പുസ്‌ത​ക​ത്തി​ലെ “അഹശ്വേ​രോശ്‌.” അഹശ്വേ​രോശ്‌ “ശൂശൻ രാജധാ​നി​യിൽ തന്റെ രാജസിം​ഹാ​സ​ന​ത്തിൽ” ഇരുന്നു​കൊണ്ട്‌ “ഇൻഡ്യാ മുതൽ എത്യോ​പ്യാ വരെ നൂററി​യി​രു​പ​ത്തി​യേഴ്‌ ഭരണ​പ്ര​വി​ശ്യ​ക​ളു​ടെ​മേൽ ഭരിച്ചി​രു​ന്നു” എന്ന്‌ അത്‌ പറയുന്നു. അഹശ്വേ​രോശ്‌ സുന്ദരി​യായ എസ്ഥേർ എന്ന യുവതി​യെ രാജ്ഞി​യാ​ക്കി​യത്‌ അവി​ടെ​വെ​ച്ചാ​യി​രു​ന്നു. (എസ്ഥേർ 1:1, 2; 2:17) പാരീ​സി​ലെ ലൂവ്‌റി​ലെ കാഴ്‌ച​ബം​ഗ്ലാ​വിൽ നിങ്ങൾക്ക്‌ ഈ കൊട്ടാ​ര​ത്തി​ന്റെ ഉയരമുള്ള തൂണിന്റെ മുകളിൽ അലങ്കരിച്ച ഒരു കാളയു​ടെ തലയും ഉദ്ധതമായ പേർഷ്യൻ വില്ലാ​ളി​ക​ളെ​യും ഗംഭീ​ര​മൃ​ഗ​ങ്ങ​ളെ​യും പ്രതി​നി​ധാ​നം​ചെ​യ്യുന്ന ഭിത്തി​യി​ലെ അലങ്കാ​ര​ങ്ങ​ളും കാണാൻ കഴിയും. അവിടെ കണ്ടെത്തിയ അലങ്കരിച്ച വെങ്കൽ ഭരണികൾ, ആഭരണങ്ങൾ, മററു സാധനങ്ങൾ എന്നിവ എസ്ഥേറി​ന്റെ സൗന്ദര്യ​വർദ്ധ​ന​ക്കു​വേണ്ടി ചെയ്‌ത വിപു​ല​മായ നടപടി​കളെ സംബന്ധി​ച്ചും ശൂശനിൽ സ്ഥിതി​ചെ​യ്‌തി​രുന്ന ആഡംബ​ര​വ​സ്‌തു​ക്കളെ സംബന്ധി​ച്ചും ഉള്ള ബൈബിൾ വിവര​ണ​ത്തി​നു നന്നായി യോജി​ക്കു​ന്നു.—എസ്ഥേർ 1:7; 2:9, 12, 13.

സെർക്‌സി​സി​ന്റെ ഗ്രീക്ക്‌ ശത്രുക്കൾ പറഞ്ഞ കഥകളിൽ വൈവാ​ഹിക വിഷമ​ത​ക​ളും അയാളു​ടെ ചില കൊട്ടാ​രം സേവകർ പേർഷ്യൻ രാജാ​വി​ന്റെ​മേൽ പുലർത്തിയ മേധാ​വി​ത്വ​വും സംബന്ധിച്ച കാര്യങ്ങൾ ഉൾപ്പെ​ട്ടി​രു​ന്നു. വസ്‌തു​തകൾ കുഴക്കു​ക​യും വളച്ചൊ​ടി​ക്ക​യും ചെയ്‌തി​രി​ക്കാ​മെ​ങ്കി​ലും, ഈ കഥകൾ എസ്ഥേറി​ന്റെ പുസ്‌ത​ക​ത്തി​ലെ ചില അടിസ്ഥാന ആശയങ്ങൾ പ്രതി​ഫ​ലി​പ്പി​ക്കു​ന്ന​താ​യി തോന്നു​ന്നു. അതിൽ രാജാവ്‌ ശാഠ്യ​ക്കാ​രി​യാ​യി​രുന്ന വസ്ഥിരാ​ജ്ഞി​യെ നീക്കി പകരം എസ്ഥേറി​നെ വാഴി​ച്ചു​വെ​ന്നും എസ്ഥേറി​ന്റെ മച്ചുന​നാ​യി​രുന്ന മോർദ്ദെ​ഖാ​യിക്ക്‌ രാജ്യത്തെ വലിയ ഒരു അധികാ​ര​സ്ഥാ​നം കിട്ടി​യെ​ന്നും പറയുന്നു.—എസ്ഥേർ 1:12, 19; 2:17; 10:3.

യഹോ​വ​യു​ടെ ആരാധ​ക​രോട്‌ പ്രീതി കാട്ടുന്നു

ക്രി.മു. 468-ാം വർഷത്തിൽ സേർക്‌സി​സി​ന്റെ പിൻഗാ​മി​യാ​യി​രുന്ന അർത്ഥഹ്‌ശ​ഷ്‌ടാവ്‌ (ലോം​ഗി​മാ​നസ്‌) യെരു​ശ​ലേ​മി​ലേക്ക്‌ മടങ്ങി​പ്പോ​യി യഹോ​വ​യു​ടെ നിർമ്മ​ലാ​രാ​ധന അവിടെ പുരോ​ഗ​മി​പ്പി​ക്കു​ന്ന​തിന്‌ എസ്രാ പുരോ​ഹി​തനെ അധികാ​ര​പ്പെ​ടു​ത്തി. എസ്രാ, കോ​രേശ്‌ ആദ്യം യഹൂദൻമാ​രെ വിട്ടയ​ച്ച​ശേഷം ബാബി​ലോ​നിൽ വസിക്ക​യാ​യി​രു​ന്നു. ഏതാണ്ട്‌ 1,500 പുരു​ഷൻമാ​രും അവരുടെ കുടും​ബ​ങ്ങ​ളും—ഒരുപക്ഷേ മൊത്തം 6,000 പേർ—എസ്രാ​യോ​ടു​കൂ​ടെ പോകു​ക​യും യഹോ​വ​യു​ടെ ആലയത്തി​നു​വേണ്ടി ഒരു വലിയ സംഭാവന കൊണ്ടു​പോ​കു​ക​യും ചെയ്‌തു.—എസ്രാ 7:1, 6, 11-26.

ഇതേ അർത്ഥഹ്‌ശ​ഷ്ടാവ്‌ തന്റെ വാഴ്‌ച​യു​ടെ 20-ാം ആണ്ടിൽ (ക്രി.മു. 455) യെരു​ശ​ലേ​മും അതിന്റെ മതിലു​ക​ളും പുതു​ക്കി​പ്പ​ണി​യാൻ തിരി​ച്ച​യ​ക്ക​പ്പെ​ടാ​നുള്ള നെഹെ​മ്യാ​വി​ന്റെ അപേക്ഷ അനുവ​ദി​ച്ച​തും ശൂശൻ രാജധാ​നി​യിൽ വെച്ചാ​യി​രു​ന്നു. അത്‌ ദാനി​യേ​ലി​ന്റെ പ്രവച​ന​ത്തി​ലെ വർഷങ്ങ​ളു​ടെ “എഴുപത്‌ ആഴ്‌ച​ക​ളു​ടെ” തുടക്കം കുറിച്ചു. അത്‌ കൃത്യം ക്രി.വ. 29-ാം ആണ്ടിലെ “നേതാ​വായ മശിഹാ” എന്ന നിലയി​ലുള്ള യേശു​വി​ന്റെ പ്രത്യ​ക്ഷ​ത​യി​ലേക്ക്‌ മുമ്പോട്ട്‌ വിരൽ ചൂണ്ടി.a—ദാനി​യേൽ 9:24, 25; നെഹെ​മ്യാവ്‌ 1:1; 2:1-9.

അരാമ്യ​ഭാ​ഷ​യിൽ പപ്പൈ​റ​സിൽ എഴുതിയ ചില പ്രമാ​ണങ്ങൾ ഈജി​പ്‌റ​റി​ന്റെ നൈൽ നദിയി​ലെ ഒരു ദ്വീപായ എലിഫ​ന്റൈ​നിൽ കണ്ടെത്ത​പ്പെട്ടു. ഈ പ്രമാ​ണങ്ങൾ പേർഷ്യൻ ഭരണകാ​ലത്തെ അവസ്ഥക​ളെ​യും ഔദ്യോ​ഗിക പ്രഖ്യാ​പ​ന​ത്തെ​യും എത്ര കൃത്യ​മാ​യി ബൈബി​ളെ​ഴു​ത്തു​കാ​രായ എസ്രാ​യും നെഹെ​മ്യാ​വും വർണ്ണി​ക്കു​ന്നു​വെന്ന്‌ പ്രകട​മാ​ക്കു​ന്നു. ബിബ്ലിക്കൽ ആർക്കോ​ള​ജി​യിൽ പ്രൊ​ഫസർ ജി. ഏണസ്‌ററ്‌ റൈററ്‌ ഇങ്ങനെ പ്രസ്‌താ​വി​ക്കു​ന്നു: “ഇപ്പോൾ . . . എസ്രാ​യു​ടെ അരാമ്യ കൃത്യ​മാ​യി ആ യുഗത്തി​ലേ​താ​ണെ​ന്നും അതേ സമയം ഗവൺമെൻറ്‌ പ്രമാ​ണങ്ങൾ പേർഷ്യൻ ഭരണകൂ​ട​ത്തോട്‌ നാം പതിവാ​യി ബന്ധപ്പെ​ടു​ത്തുന്ന പൊതു രീതി​യി​ലു​ള്ള​താ​ണെ​ന്നും നമുക്കു കാണാൻ കഴിയു​ന്നു.” പ്രമാ​ണ​ങ്ങ​ളി​ലൊ​ന്നിൽ ഈജി​പ്‌റ​റി​ലെ യഹൂദ കോളനി നടത്തിയ പെസഹാ ആഘോ​ഷത്തെ സംബന്ധിച്ച ഒരു രാജകീയ പേർഷ്യൻ കൽപ്പന അടങ്ങി​യി​രു​ന്നു.

മെദോ-പേർഷ്യ ഗ്രീസി​ന്റെ അധീന​ത്തി​ലാ​കു​ന്നു

ദർശന​ത്തിൽ രണ്ടു കൊമ്പുള്ള ഒരു ആട്ടു​കൊ​റ​റ​നാൽ പ്രതി​നി​ധാ​നം ചെയ്യപ്പെട്ട മെദോ-പേർഷ്യ​യെ ദാനി​യേൽ കണ്ടിരു​ന്നു. അടുത്ത​താ​യി, സംഭവി​ക്കു​ന്ന​തി​നു രണ്ടു നൂററാ​ണ്ടു​കൾക്കു​മു​മ്പു​തന്നെ “സൂര്യാ​സ്‌ത​മ​യ​ത്തി​ങ്കൽനിന്ന്‌ [പടിഞ്ഞാറ്‌] ഒരു കോലാ​ട്ടു​കൊ​ററൻ വരുന്ന”തും “ഭൂമി​യിൽ തൊടാത്ത” വിധം അത്ര വേഗത്തിൽ നീങ്ങു​ന്ന​തും അവൻ കണ്ടു. അതി​വേഗം നീങ്ങി​ക്കൊ​ണ്ടി​രുന്ന കോലാ​ട്ടു​കൊ​ററൻ “ആട്ടു​കൊ​റ​റനെ ഇടിച്ചു​വീ​ഴി​ക്കാ​നും അതിന്റെ രണ്ടു കൊമ്പു​ക​ളും തകർക്കാ​നും” പുറ​പ്പെട്ടു, “അതിന്റെ മുമ്പാകെ നിൽക്കാൻ ആട്ടു​കൊ​റ​റനു ശക്തിയി​ല്ലെന്നു തെളിഞ്ഞു.” (ദാനി​യേൽ 8:5-7) മെദോ-പേർഷ്യക്ക്‌ ഇത്‌ യഥാർത്ഥ​ത്തിൽ സംഭവി​ച്ചു എന്ന്‌ ചരിത്രം പ്രകട​മാ​ക്കു​ന്നു​ണ്ടോ?

ഉവ്വ്‌, ക്രി.മു. 334-ാം ആണ്ടിൽ മഹാനായ അലക്‌സാ​ണ്ടർ ഗ്രീസിൽ നിന്ന്‌ പടിഞ്ഞാ​റോ​ട്ടു വന്നു. ഒരു കോലാ​ട്ടു​കൊ​റ​റ​ന്റേ​തു​പോ​ലെ​യുള്ള മിന്നൽ വേഗത്തിൽ അയാൾ ഏഷ്യയി​ലൂ​ടെ മുന്നേ​റു​ക​യും ഒന്നിനു​പി​റകെ ഒന്നായി പേർഷ്യ​രു​ടെ​മേൽ വിജയം നേടു​ക​യും ചെയ്‌തു. ഒടുവിൽ ക്രി.മു. 331-ൽ ഗോഗാ​മ​ലാ​യിൽവെച്ച്‌ അയാൾ പത്തുലക്ഷം പേർ അടങ്ങിയ ഒരു പേർഷ്യൻ സൈന്യ​ത്തെ ചിതറി​ച്ചു. അതിന്റെ നേതാ​വാ​യി​രുന്ന ദാര്യാ​വേശ്‌ മൂന്നാമൻ പലായനം ചെയ്‌തു. പിന്നീട്‌ ഒരു കാലത്ത്‌ അയാളു​ടെ സുഹൃ​ത്തു​ക്ക​ളാ​യി​രു​ന്ന​വ​രാൽ അയാൾ കൊല്ല​പ്പെട്ടു. നാലാ​മത്തെ ലോക​ശക്തി വീഴി​ക്ക​പ്പെ​ട്ടി​രു​ന്നു. അതിന്റെ കൊമ്പു​കൾ തകർക്ക​പ്പെട്ടു. അലക്‌സാ​ണ്ട​റി​ന്റെ സാമ്രാ​ജ്യം ബൈബിൾ ചരി​ത്ര​ത്തി​ലെ അഞ്ചാം ലോക​മ​ഹ​ച്ഛ​ക്തി​യാ​യി​ത്തീർന്നു. അത്‌ ഞങ്ങളുടെ 1989 നവമ്പർ മാസത്തി​ലെ ലക്കത്തിൽ ചർച്ച​ചെ​യ്യ​പ്പെ​ടും.

മെദോ-പേർഷ്യൻ ലോക​ശക്തി ക്രി.മു. 539-ൽ അത്‌ ബാബി​ലോ​നെ മറിച്ചിട്ട രാത്രി മുതൽ അത്‌ അലക്‌സാ​ണ്ട​റിന്‌ കീഴട​ങ്ങു​ന്ന​തു​വരെ വെറും രണ്ടു നൂററാ​ണ്ടു​ക​ളും അൽപ്പകാ​ല​വും കൂടെ മാത്രമെ സ്ഥിതി​ചെ​യ്‌തി​രു​ന്നു​ള്ളു. ഇത്‌ ഫ്രഞ്ചു​വി​പ്ലവം മുതൽ അല്ലെങ്കിൽ അമേരി​ക്കൻ ഐക്യ​നാ​ടു​ക​ളു​ടെ സ്ഥാപനം മുതൽ കടന്നു​പോയ ഏതാണ്ട്‌ അതെ കാല​ദൈർഘ്യ​മാണ്‌. താരത​മ്യേന ഹ്രസ്വ​മായ ഈ കാലഘ​ട്ട​ത്തിൽ മേദ്യ​രും പേർഷ്യ​രും യഹോ​വ​യാം ദൈവ​ത്തി​ന്റെ ഉദ്ദേശ്യ​ങ്ങ​ളു​ടെ നിവൃ​ത്തി​യോ​ടും അവന്റെ തിട്ടമുള്ള പ്രവച​ന​ങ്ങ​ളു​ടെ നിവൃ​ത്തി​യോ​ടും അറിയാ​തെ​തന്നെ വളരെ​യ​ധി​കം ബന്ധപ്പെ​ട്ടി​രു​ന്നു. (w88 3/15)

[അടിക്കു​റി​പ്പു​കൾ]

[29-ാം പേജിലെ ഭൂപടം⁄ചിത്രം]

[പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക]

മെദോ -പേർഷ്യൻ സാമ്രാ​ജ്യം

എക്‌ബറ്റനാ

സൂസ(ശൂശൻ)

പെർസിപ്പോളീസ്‌

ബാബിലോൻ

യെരുശേലം

ഈജിപ്‌റ്റ്‌

[ചിത്രം]

പേർഷ്യയുടെ ആചാര​പ​ര​മായ തലസ്ഥാ​ന​മാ​യി​രുന്ന പെർസി​പ്പൊ​ളീ​സി​ന്റെ ശൂന്യ​ശി​ഷ്‌ട​ങ്ങൾ

[കടപ്പാട്‌]

Manley Studios

[32-ാം പേജിലെ ചിത്രം]

ഇറാനിലെ കോ​രേ​ശി​ന്റെ കല്ലറ