ദൈവ​ത്താൽ പ്രബോ​ധി​പ്പി​ക്ക​പ്പെ​ട്ട​വ​രാ​യി നടക്കു​വിൻ

“നമുക്കു യഹോ​വ​യു​ടെ പർവ്വത​ത്തി​ലേക്കു കയറി​ച്ചെ​ല്ലാം, അവൻ നമുക്കു തന്റെ വഴികളെ ഉപദേ​ശി​ച്ചു​ത​രി​ക​യും നാം അവന്റെ പാതക​ളിൽ നടക്കയും ചെയ്യും.”—മീഖാ 4:2.

1. മീഖാ പറയു​ന്ന​ത​നു​സ​രിച്ച്‌, അന്ത്യനാ​ളു​ക​ളിൽ ദൈവം തന്റെ ജനത്തി​നു​വേണ്ടി എന്തു ചെയ്യും?

“അന്ത്യകാ​ലത്തു,” അതായത്‌, നമ്മുടെ നാളു​ക​ളിൽ, അനേക​മാ​ളു​കൾ ആരാധി​ക്കാൻവേണ്ടി ദൈവത്തെ സജീവ​മാ​യി അന്വേ​ഷി​ക്കു​മെന്ന്‌ ദൈവ​ത്തി​ന്റെ പ്രവാ​ച​ക​നായ മീഖാ മുൻകൂ​ട്ടി​പ്പ​റ​യു​ക​യു​ണ്ടാ​യി. “നമുക്കു യഹോ​വ​യു​ടെ പർവ്വത​ത്തി​ലേക്കു . . . കയറി​ച്ചെ​ല്ലാം, അവൻ നമുക്കു തന്റെ വഴികളെ ഉപദേ​ശി​ച്ചു​ത​രി​ക​യും നാം അവന്റെ പാതക​ളിൽ നടക്കയും ചെയ്യും” എന്നു പറഞ്ഞു​കൊണ്ട്‌ ഇക്കൂട്ടർ പരസ്‌പരം പ്രോ​ത്സാ​ഹി​പ്പി​ക്കും.—മീഖാ 4:1, 2.

2, 3. മനുഷ്യർ പണസ്‌നേ​ഹി​ക​ളാ​യി​ത്തീ​രു​മെന്നു പൗലോസ്‌ മുൻകൂ​ട്ടി​പ്പ​റ​ഞ്ഞത്‌ ഇന്ന്‌ എങ്ങനെ നിറ​വേ​റി​യി​രി​ക്കു​ന്നു?

² 2 തിമൊ​ഥെ​യൊസ്‌ 3:1-5-നെക്കു​റി​ച്ചുള്ള നമ്മുടെ പഠനം “അന്ത്യകാ​ലത്തു” ദൈവ​ത്താൽ പ്രബോ​ധി​പ്പി​ക്ക​പ്പെ​ടു​ന്ന​തു​കൊ​ണ്ടുള്ള ഫലങ്ങൾ കാണാൻ നമ്മെ സഹായി​ക്കും. “സ്വസ്‌നേ​ഹി​കളാ”കാതി​രി​ക്കാ​നുള്ള പൗലോ​സി​ന്റെ മുന്നറി​യി​പ്പു കാര്യ​മാ​യെ​ടു​ക്കു​ന്ന​വർക്കു വന്നു​ചേ​രുന്ന പ്രയോ​ജ​നങ്ങൾ ശ്രദ്ധി​ച്ചു​കൊ​ണ്ടാ​ണു മുൻലേ​ഖനം നാം തുടങ്ങി​യത്‌. നമ്മുടെ നാളു​ക​ളിൽ “ദ്രവ്യാ​ഗ്ര​ഹി​കളാ”യ [“പണസ്‌നേ​ഹി​ക​ളായ,” NW] മനുഷ്യർ ഉണ്ടായി​രി​ക്കു​മെന്നു പൗലോസ്‌ തുടർന്നു പറഞ്ഞു.

³ ആ വാക്കുകൾ നമ്മുടെ നാളു​കളെ എത്ര നന്നായി വർണി​ക്കു​ന്നു എന്നു മനസ്സി​ലാ​ക്കാൻ ആർക്കും ആധുനിക ചരി​ത്ര​ത്തിൽ ഒരു കോ​ളെജ്‌ ബിരു​ദ​ത്തി​ന്റെ ആവശ്യ​മൊ​ന്നു​മില്ല. ഓരോ വർഷവും ലക്ഷക്കണ​ക്കി​നു രൂപ സമ്പാദി​ച്ചി​ട്ടും തൃപ്‌തി​യ​ട​യാത്ത പണമി​ട​പാ​ടു​കാ​രെ​യും വ്യവസായ പ്രമു​ഖ​രെ​യും സംബന്ധി​ച്ചു നിങ്ങൾ വായി​ച്ചി​ട്ടി​ല്ലേ? ഈ പണസ്‌നേ​ഹി​കൾ, നിയമ​വി​രുദ്ധ മാർഗ​ത്തി​ലൂ​ടെ​യാ​ണെ​ങ്കിൽപ്പോ​ലും, പിന്നെ​യും പിന്നെ​യും ആഗ്രഹി​ച്ചു​കൊ​ണ്ടി​രി​ക്കും. സമ്പന്നര​ല്ലാ​ത്ത​വരെ സംബന്ധി​ച്ചും പൗലോ​സി​ന്റെ വാക്കുകൾ ശരിയാണ്‌. അവരി​ലും അനേകർ അത്യാ​ഗ്ര​ഹ​മു​ള്ള​വ​രും ഒരിക്ക​ലും തൃപ്‌തി​വ​രാ​ത്ത​വ​രു​മാണ്‌. നിങ്ങളു​ടെ പ്രദേ​ശത്ത്‌ അത്തരക്കാ​രായ അനേകരെ നിങ്ങൾക്ക്‌ അറിയാ​മാ​യി​രി​ക്കും.

4-6. പണസ്‌നേ​ഹി​ക​ളാ​യി​ത്തീ​രു​ന്നത്‌ ഒഴിവാ​ക്കാൻ ക്രിസ്‌ത്യാ​നി​കളെ ബൈബിൾ സഹായി​ക്കു​ന്ന​തെ​ങ്ങനെ?

⁴ പൗലോസ്‌ സൂചി​പ്പി​ക്കു​ന്നതു മനുഷ്യ സ്വഭാ​വ​ത്തി​ന്റെ വെറു​മൊ​രു അനു​പേ​ക്ഷ​ണീ​യ​മായ വശമാ​ണോ? “ദ്രവ്യാ​ഗ്രഹം [“പണസ്‌നേഹം,” NW] സകലവിധ ദോഷ​ത്തി​ന്നും മൂലമ​ല്ലോ. ഇതു ചിലർ കാംക്ഷി​ച്ചി​ട്ടു വിശ്വാ​സം വിട്ടു​ഴന്നു ബഹുദുഃ​ഖ​ങ്ങൾക്കു അധീന​രാ​യി​ത്തീർന്നി​രി​ക്കു​ന്നു” എന്ന സത്യം വളരെ​നാൾക്കു മുമ്പു പ്രസ്‌താ​വിച്ച ബൈബി​ളി​ന്റെ ഗ്രന്ഥകർത്താവ്‌ പറയു​ന്ന​ത​നു​സ​രി​ച്ചാ​ണെ​ങ്കിൽ, അല്ല എന്നതാണ്‌ ഉത്തരം. ശ്രദ്ധി​ക്കുക, ‘പണമാണ്‌ സകലവിധ ദോഷ​ത്തി​നും കാരണ’മെന്നു ദൈവം പറഞ്ഞില്ല. “പണസ്‌നേഹ”മാണെ​ന്നാണ്‌ അവിടുന്ന്‌ പറഞ്ഞത്‌.—1 തിമൊ​ഥെ​യൊസ്‌ 6:10.

⁵ രസകര​മെ​ന്നു​പ​റ​യട്ടെ, ഒന്നാം നൂററാ​ണ്ടി​ലെ ചില ഉത്തമരായ ക്രിസ്‌ത്യാ​നി​കൾ, അവർക്ക്‌ അവകാ​ശ​മാ​യി കിട്ടി​യ​താ​യാ​ലും സത്യസ​ന്ധ​മാ​യി വേല ചെയ്‌തു സമ്പാദി​ച്ച​താ​യാ​ലും, ഈ വ്യവസ്ഥിതിയിൽ സമ്പന്നരാ​യി​രു​ന്നു എന്ന്‌ വാക്യ​ത്തി​ന്റെ സാഹച​ര്യം സ്ഥിരീ​ക​രി​ക്കു​ന്നു. (1 തിമൊ​ഥെ​യൊസ്‌ 6:17) അങ്ങനെ, നമ്മുടെ സാമ്പത്തിക സ്ഥിതി എന്തുത​ന്നെ​യാ​യാ​ലും, ഒരു പണസ്‌നേ​ഹി​യാ​യി​ത്തീ​രു​ന്ന​തി​ന്റെ അപകട​ത്തെ​ക്കു​റി​ച്ചു ബൈബിൾ നമുക്കു മുന്നറി​യി​പ്പു നൽകുന്നു എന്നത്‌ ഇതിൽനി​ന്നു വ്യക്തമാ​യി​രി​ക്കണം. സങ്കടക​ര​വും സർവസാ​ധാ​ര​ണ​വു​മായ ഈ ദൂഷ്യം ഒഴിവാ​ക്കു​ന്നതു സംബന്ധി​ച്ചു ബൈബിൾ എന്തെങ്കി​ലും കൂടു​ത​ലായ പ്രബോ​ധനം നൽകു​ന്നു​ണ്ടോ? നിശ്ചയ​മാ​യും ഉണ്ട്‌, യേശു​വി​ന്റെ ഗിരി​പ്ര​ഭാ​ഷ​ണം​പോ​ലു​ള്ള​വ​യിൽ. അതിന്റെ ജ്ഞാനം ലോക​പ്ര​ശ​സ്‌ത​മാണ്‌. മത്തായി 6:26-33-ൽ യേശു പറയു​ന്നതു ശ്രദ്ധി​ക്കുക.

⁶ ലൂക്കൊസ്‌ 12:15-21-ൽ രേഖ​പ്പെ​ടു​ത്തി​യി​രി​ക്കുന്ന പ്രകാരം, യേശു ധനവാ​നായ ഒരു മനുഷ്യ​നെ​ക്കു​റി​ച്ചു സംസാ​രി​ച്ചു, അയാൾ കൂടു​തൽക്കൂ​ടു​തൽ സമ്പത്തു സ്വരു​ക്കൂ​ട്ടാൻ ശ്രമി​ച്ചു​കൊ​ണ്ടി​രി​ക്ക​യാ​യി​രു​ന്നു. പക്ഷേ പെട്ടെ​ന്നാ​യി​രു​ന്നു അയാൾ മരണത്തിന്‌ അടിമ​പ്പെ​ട്ടത്‌. എന്തായി​രു​ന്നു യേശു ഉദ്ദേശി​ച്ചത്‌? അവിടുന്ന്‌ ഇപ്രകാ​രം പറഞ്ഞു: “സകല ദ്രവ്യാ​ഗ്ര​ഹ​വും [“അത്യാ​ഗ്ര​ഹ​ങ്ങ​ളിൽനിന്ന്‌,” പി.ഒ.സി ബൈബിൾ] സൂക്ഷിച്ചു ഒഴിഞ്ഞു​കൊൾവിൻ; ഒരുത്തന്നു സമൃദ്ധി ഉണ്ടായാ​ലും അവന്റെ വസ്‌തു​വ​കയല്ല അവന്റെ ജീവന്നു ആധാര​മാ​യി​രി​ക്കു​ന്നതു.” അത്തരം ഉപദേശം നൽകു​ന്ന​തോ​ടൊ​പ്പം ബൈബിൾ അലസതയെ കുററം​വി​ധി​ക്കു​ക​യും സത്യസ​ന്ധ​മായ തൊഴി​ലി​ന്റെ മൂല്യത്തെ ഊന്നി​പ്പ​റ​യു​ക​യും ചെയ്യുന്നു. (1 തെസ്സ​ലൊ​നീ​ക്യർ 4:11, 12) ഓ, അത്തരം പ്രബോ​ധ​നങ്ങൾ നമ്മുടെ നാളു​കൾക്കു യോജി​ച്ച​വ​യ​ല്ലെന്നു ചിലർ തടസ്സം പറഞ്ഞേ​ക്കാം. എന്നാൽ അവ തീർച്ച​യാ​യും യോജി​ച്ച​വ​യാണ്‌. അവ വിജയ​പ്ര​ദ​വു​മാണ്‌.

പ്രബോ​ധനം നേടുന്നു, പ്രയോ​ജ​ന​വും

7. ധനത്തെ സംബന്ധിച്ച ബൈബിൾ ബുദ്ധ്യു​പ​ദേശം വിജയ​ക​ര​മാ​യി പ്രാ​യോ​ഗി​ക​മാ​ക്കാൻ നമുക്കാ​വു​മെന്ന ആത്മവി​ശ്വാ​സ​ത്തിന്‌ എന്തു കാരണ​മാ​ണു നമുക്കു​ള്ളത്‌?

⁷ ധനത്തെ സംബന്ധി​ച്ചുള്ള ദിവ്യ​ത​ത്ത്വ​ങ്ങൾ ബാധക​മാ​ക്കി​യി​ട്ടുള്ള, എല്ലാത്തരം സാമൂ​ഹിക-സാമ്പത്തിക തലങ്ങളിൽനി​ന്നുള്ള, സ്‌ത്രീ-പുരു​ഷൻമാ​രു​ടെ യഥാർഥ ജീവി​താ​നു​ഭ​വ​ങ്ങ​ളു​ടെ ദൃഷ്ടാ​ന്തങ്ങൾ നിങ്ങൾക്ക്‌ അനേകം രാഷ്‌ട്ര​ങ്ങ​ളിൽ കണ്ടെത്താ​വു​ന്ന​താണ്‌. പുറത്തു​ള്ള​വർക്കു പോലും കാണാൻ കഴിയു​ന്ന​തു​പോ​ലെ അവർ തങ്ങൾക്കും തങ്ങളുടെ കുടും​ബ​ങ്ങൾക്കും പ്രയോ​ജ​നങ്ങൾ കൈവ​രി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, പ്രിൻസെ​ററൺ യൂണി​വേ​ഴ്‌സി​റ​റി​യു​ടെ പ്രസാ​ധ​ക​രിൽനി​ന്നുള്ള സമകാ​ലിക അമേരി​ക്ക​യി​ലെ മതപര​മായ പ്രസ്ഥാ​നങ്ങൾ [ഇംഗ്ലീഷ്‌] എന്ന പുസ്‌ത​ക​ത്തിൽ ഒരു നരവംശ ശാസ്‌ത്രജ്ഞൻ ഇങ്ങനെ എഴുതി: “[സാക്ഷി​ക​ളു​ടെ] പ്രസി​ദ്ധീ​ക​ര​ണ​ങ്ങ​ളി​ലും സഭാ​പ്ര​സം​ഗ​ങ്ങ​ളി​ലും, അവരുടെ അന്തസ്സി​നാ​യി പുതിയ കാറു​ക​ളി​ലോ വിലപി​ടിച്ച വസ്‌ത്ര​ങ്ങ​ളി​ലോ ധാരാ​ളിത്ത ജീവി​ത​ത്തി​ലോ അവർ ആശ്രയി​ക്കു​ന്നി​ല്ലെന്ന്‌ അവരെ അനുസ്‌മ​രി​പ്പി​ക്കു​ന്നു. അതേസ​മയം ഒരു സാക്ഷി തന്റെ തൊഴി​ലു​ട​മക്ക്‌ ഒരു ദിവസ​ത്തി​ന്റെ ന്യായ​മായ ജോലി നൽകേ​ണ്ട​തും കണിശ​മാ​യി സത്യസ​ന്ധ​മാ​യി​രി​ക്കേ​ണ്ട​തു​മാണ്‌ . . . അത്തരം സവി​ശേ​ഷ​തകൾ അധികം വൈദ​ഗ്‌ധ്യം ഇല്ലാത്ത ഒരു മനുഷ്യ​നെ​പ്പോ​ലും ഒരു ഉപയോ​ഗ​മുള്ള തൊഴി​ലാ​ളി​യാ​ക്കു​ന്നു, വടക്കൻ ഫിലദൽഫി​യ​യി​ലെ [യു.എസ്‌.എ.] ചില സാക്ഷികൾ ഗണ്യമായ തൊഴിൽ ഉത്തരവാ​ദി​ത്വ​ങ്ങ​ളുള്ള സ്ഥാനമാ​നങ്ങൾ കരസ്ഥമാ​ക്കി​യി​രി​ക്കു​ന്നു.” വ്യക്തമാ​യും, നിലവി​ലുള്ള അവസ്ഥകൾ കൈകാ​ര്യം ചെയ്യു​ന്നതു കൂടുതൽ വിഷമ​ക​ര​മാ​ക്കുന്ന മനോ​ഭാ​വ​ങ്ങളെ സംബന്ധി​ച്ചു തന്റെ വചനത്തി​ലൂ​ടെ പ്രബോ​ധനം സ്വീക​രി​ച്ചി​രി​ക്കുന്ന ജനത്തെ ദൈവം ജാഗരൂ​ക​രാ​ക്കി​യി​രി​ക്കു​ന്നു. ബൈബിൾ പ്രബോ​ധ​ന​ങ്ങൾക്കു കൂടുതൽ മെച്ച​പ്പെ​ട്ട​തും സന്തുഷ്ട​വു​മായ ജീവി​ത​ത്തി​ലേക്കു നയിക്കാ​നാ​വു​മെന്ന്‌ അവരുടെ അനുഭ​വങ്ങൾ തെളി​യി​ക്കു​ന്നു.

8. “വമ്പു പറയു​ന്നവർ,” “അഹങ്കാ​രി​കൾ,” “ദൂഷകൻമാർ” എന്നിവ ബന്ധിപ്പി​ച്ചു​പ​റ​യാൻ കഴിയു​ന്ന​തെ​ന്തു​കൊണ്ട്‌, ഈ മൂന്നു പദങ്ങളു​ടെ അർഥ​മെന്ത്‌?

⁸ പൗലോസ്‌ പട്ടിക​പ്പെ​ടു​ത്തുന്ന അടുത്ത മൂന്നു സംഗതി​കൾ നമുക്കു ബന്ധപ്പെ​ടു​ത്താ​നാ​വും—അന്ത്യനാ​ളു​ക​ളിൽ മനുഷ്യർ “വമ്പു പറയു​ന്ന​വ​രും അഹങ്കാ​രി​ക​ളും ദൂഷകൻമാ​രു”മായി​രി​ക്കും. ഇവ മൂന്നും സമതു​ല്യ​മല്ല, എന്നാൽ അവയെ​ല്ലാം അഹങ്കാ​ര​വു​മാ​യി ബന്ധപ്പെ​ട്ട​താണ്‌. ആദ്യ​ത്തേതു “വമ്പു പറയു​ന്നവർ [“അഹംഭാ​വി​കൾ,” NW].” “‘വസ്‌തു​തകൾ ന്യായീ​ക​രി​ക്കു​ന്ന​തി​നെ​ക്കാൾ കൂടുതൽ സ്വയം ഭാവി​ക്കുന്ന’ അഥവാ ‘തനിക്കു നിർവ​ഹി​ക്കാൻ സാധി​ക്കു​ന്ന​തിൽ കൂടുതൽ വാഗ്‌ദാ​നം ചെയ്യുന്ന ഒരുവനെ’”യാണ്‌ ഇവിടു​ത്തെ അടിസ്ഥാന ഗ്രീക്കു വാക്ക്‌ അർഥമാ​ക്കു​ന്ന​തെന്ന്‌ ഒരു നിഘണ്ടു പറയുന്നു. ചില ബൈബി​ളു​കൾ “ആത്മപ്ര​ശംസ നടത്തു​ന്നവർ” എന്ന പദപ്ര​യോ​ഗം സ്വീക​രി​ച്ചി​രി​ക്കു​ന്ന​തെ​ന്തു​കൊ​ണ്ടെന്നു നിങ്ങൾക്കു മനസ്സി​ലാ​ക്കാ​വു​ന്ന​താണ്‌. അടുത്തത്‌, “അഹങ്കാ​രി​കൾ,” അക്ഷരാർഥ​ത്തിൽ “ഉന്നതഭാ​വം പ്രകടി​പ്പി​ക്കുന്ന”വർ ആണ്‌. അവസാ​ന​ത്തേതു “ദൂഷകൻമാർ.” “ദൂഷകൻമാ​രെ”ന്നതു ദൈവ​ത്തെ​ക്കു​റിച്ച്‌ അനാദ​ര​വോ​ടെ സംസാ​രി​ക്കു​ന്നവർ മാത്ര​മാ​ണെന്നു ചിലർ വിചാ​രി​ച്ചേ​ക്കാം. എന്നാൽ മനുഷ്യർക്കെ​തി​രെ​യുള്ള ദോഷ​ക​ര​മോ അപകീർത്തി​പ​ര​മോ ദുഷി​ക്കു​ന്ന​തോ ആയ സംസാ​ര​വും അടിസ്ഥാന വാക്കിൽ ഉൾപ്പെ​ടു​ന്നു. അതു​കൊ​ണ്ടു ദൈവ​ത്തി​ന്റെ​യോ മനുഷ്യ​രു​ടെ​യോ നേർക്കു തിരി​ച്ചു​വി​ടുന്ന ദൂഷണ​ത്തെ​യാ​ണു പൗലോസ്‌ പരാമർശി​ക്കു​ന്നത്‌.

9. ഇന്നു കാണുന്ന ദോഷ​ക​ര​മായ മനോ​ഭാ​വ​ങ്ങൾക്കു വിപരീ​ത​മാ​യി, മറേറതു മനോ​ഭാ​വങ്ങൾ വികസി​പ്പി​ച്ചെ​ടു​ക്കാ​നാ​ണു ബൈബിൾ ആളുകളെ പ്രോ​ത്സാ​ഹി​പ്പി​ക്കു​ന്നത്‌?

⁹ പൗലോ​സി​ന്റെ വർണന​യോ​ടു യോജി​ക്കു​ന്ന​തരം ജനങ്ങൾ, അവർ സഹജോ​ലി​ക്കാ​രോ സഹപാ​ഠി​ക​ളോ ബന്ധുക്ക​ളോ ആയി​ക്കൊ​ള്ളട്ടെ, നിങ്ങൾക്കു ചുററു​മാ​യി​രി​ക്കു​മ്പോൾ നിങ്ങൾക്കെന്തു തോന്നും? അതു നിങ്ങളു​ടെ ജീവി​തത്തെ ആയാസ​ര​ഹി​ത​മാ​ക്കു​ന്നു​ണ്ടോ? അതോ അത്തരം ജനങ്ങൾ, നമ്മുടെ കാലഘ​ട്ടത്തെ നേരി​ടു​ന്നതു നിങ്ങൾക്കു കൂടുതൽ കഠിന​മാ​ക്കി​ക്കൊണ്ട്‌, നിങ്ങളു​ടെ ജീവി​തത്തെ സങ്കീർണ​മാ​ക്കു​ക​യാ​ണോ ചെയ്യു​ന്നത്‌? 1 കൊരി​ന്ത്യർ 4:7; കൊ​ലൊ​സ്സ്യർ 3:12, 13; എഫെസ്യർ 4:29 എന്നിവിടങ്ങളിൽ കാണ​പ്പെ​ടു​ന്ന​തു​പോ​ലുള്ള പ്രബോ​ധ​നങ്ങൾ നൽകി​ക്കൊണ്ട്‌ ഈ മനോ​ഭാ​വ​ങ്ങ​ളിൽനിന്ന്‌ ഒഴിഞ്ഞു​നിൽക്കാൻ ദൈവ​വ​ചനം നമ്മെ പഠിപ്പി​ക്കു​ന്നു.

10. ബൈബിൾ പ്രബോ​ധ​നങ്ങൾ സ്വീക​രി​ച്ച​തിൽനി​ന്നു യഹോ​വ​യു​ടെ ജനത്തിനു പ്രയോ​ജനം ലഭിക്കു​ന്നു​ണ്ടെന്ന്‌ എന്തു സൂചി​പ്പി​ക്കു​ന്നു?

¹⁰ ക്രിസ്‌ത്യാ​നി​കൾ അപൂർണ​രാ​ണെ​ങ്കി​ലും ഈ ദുർഘ​ട​നാ​ളു​ക​ളിൽ ഈ ഉത്‌കൃഷ്ട പ്രബോ​ധ​ന​ങ്ങ​ളു​ടെ ബാധക​മാ​ക്കൽ അവരെ വളരെ​യ​ധി​കം സഹായി​ക്കു​ന്നു. യഹോ​വ​യു​ടെ സാക്ഷികൾ പെരു​കി​ക്കൊ​ണ്ടി​രി​ക്കു​ന്ന​തി​ന്റെ ഒരു കാരണം “ആ പ്രസ്ഥാനം അതിന്റെ അംഗങ്ങൾക്കു വ്യക്തവും ശക്തവു​മായ വ്യക്തി​ത്വം നൽകുന്നു” എന്നതാ​ണെന്ന്‌ ഇററലി​യി​ലെ ഒരു ആനുകാ​ലിക പ്രസി​ദ്ധീ​ക​ര​ണ​മായ ലാ സിവിൽററാ കത്തോ​ലി​ക്കാ പറഞ്ഞു. എന്നാൽ ‘ശക്തമായ വ്യക്തി​ത്വം’ എന്നു പറഞ്ഞ​പ്പോൾ എഴുത്തു​കാ​രൻ എന്താണ്‌ അർഥമാ​ക്കി​യത്‌, “വമ്പു പറയു​ന്ന​വ​രും അഹങ്കാ​രി​ക​ളും ദൂഷകൻമാ​രും” എന്നാണോ? നേരെ​മ​റിച്ച്‌, ഈശോ​സ​ഭ​ക്കാ​രു​ടെ പ്രസ്‌തുത പത്രിക ഇപ്രകാ​രം തുടർന്നു പറയുന്നു: “അതിന്റെ അംഗങ്ങൾക്കു വ്യക്തവും ശക്തവു​മായ ഒരു വ്യക്തി​ത്വം നൽകു​ക​യും, സ്‌നേ​ഹ​ത്തോ​ടെ​യും സാഹോ​ദ​ര്യ​ബോ​ധ​ത്തോ​ടെ​യും ഐക്യ​ത്തോ​ടെ​യും അവരെ സ്വാഗതം ചെയ്യു​ക​യും ചെയ്യുന്ന, അവർക്കു​വേ​ണ്ടി​യുള്ള ഒരു ഇടമാണ്‌” ആ പ്രസ്ഥാനം. സാക്ഷി​കളെ പഠിപ്പി​ച്ചി​രി​ക്കുന്ന സംഗതി​കൾ അവരെ സഹായി​ക്കു​ന്നു​വെ​ന്നതു വ്യക്തമല്ലേ?

പ്രബോ​ധനം കുടും​ബാം​ഗ​ങ്ങൾക്കു പ്രയോ​ജനം കൈവ​രു​ത്തു​ന്നു

11, 12. പല കുടും​ബ​ങ്ങ​ളി​ലും എങ്ങനെ​യുള്ള സ്ഥിതി​വി​ശേഷം സംജാ​ത​മാ​കു​മെ​ന്നാ​ണു പൗലോസ്‌ കൃത്യ​മാ​യി സൂചി​പ്പി​ച്ചത്‌?

¹¹ ഏതാണ്ടു ബന്ധപ്പെ​ട്ടു​കി​ട​ക്കുന്ന, അടുത്ത നാലു സംഗതി​കളെ നമുക്ക്‌ ഒററ ചരടിൽ കോർക്കാം. അന്ത്യനാ​ളു​ക​ളിൽ അനേകർ “അമ്മയപ്പൻമാ​രെ അനുസ​രി​ക്കാ​ത്ത​വ​രും നന്ദി​കെ​ട്ട​വ​രും അശുദ്ധ​രും [“അവിശ്വ​സ്‌ത​രും”, NW] വാത്സല്യ​മി​ല്ലാ​ത്ത​വരു”മായി​രി​ക്കു​മെന്നു പൗലോസ്‌ മുൻകൂ​ട്ടി​പ്പ​റഞ്ഞു. ഈ വൈക​ല്യ​ങ്ങ​ളിൽ രണ്ടെണ്ണം—നന്ദി​കേ​ടും അവിശ്വ​സ്‌ത​ത​യും—നമുക്കു ചുററു​മുണ്ട്‌. എന്നാൽ പൗലോസ്‌ എന്തു​കൊണ്ട്‌ അവയെ “അമ്മയപ്പൻമാ​രെ അനുസ​രി​ക്കാ​ത്തവർ”ക്കും “വാത്സല്യ​മി​ല്ലാ​ത്തവർ”ക്കുമി​ട​യിൽ വെച്ചു എന്നു നമുക്ക്‌ എളുപ്പ​ത്തിൽ കാണാൻ കഴിയും. അവ നാലും കൂടി​പ്പി​ണ​ഞ്ഞാ​ണു കിടക്കു​ന്നത്‌.

¹² മിക്കവാ​റും നിരീ​ക്ഷ​ണ​പ​ടു​വായ ഏതൊരു വ്യക്തി​യും—യുവാ​വോ വൃദ്ധനോ—മാതാ​പി​താ​ക്ക​ളോ​ടുള്ള അനുസ​ര​ണ​ക്കേടു പ്രബല​മാ​ണെ​ന്നും അതു വഷളാ​കു​ക​യാ​ണെ​ന്നും സമ്മതി​ച്ചു​പ​റ​യേ​ണ്ടി​വ​രും. എന്തെല്ലാം ചെയ്‌തു​കൊ​ടു​ത്തി​ട്ടും യുവജ​നങ്ങൾ നന്ദിയി​ല്ലാ​ത്ത​വ​രാ​യി കാണ​പ്പെ​ടു​ന്നു എന്നു പല മാതാ​പി​താ​ക്ക​ളും പരാതി​പ്പെ​ടു​ന്നു. പക്ഷേ തങ്ങളുടെ മാതാ​പി​താ​ക്കൾ, അവരുടെ ജോലി​ക​ളി​ലോ ഉല്ലാസ​ങ്ങ​ളി​ലോ സ്വന്തം കാര്യ​ങ്ങ​ളി​ലോ മാത്രം സാകൂതം മുഴു​കി​ക്ക​ഴി​ഞ്ഞു​കൊണ്ട്‌ തങ്ങളോട്‌ (അല്ലെങ്കിൽ കുടും​ബ​ത്തോ​ടു പൊതു​വേ) യഥാർഥ​ത്തിൽ യാതൊ​രു വിശ്വസ്‌ത പരിഗ​ണ​ന​യും കാണി​ക്കാ​ത്ത​വ​രാണ്‌ എന്നു പറഞ്ഞു​കൊണ്ട്‌ ചെറു​പ്പ​ക്കാർ പലരും പ്രതി​ഷേ​ധി​ക്കു​ന്നു. ആരുടെ ഭാഗത്താ​ണു തെറെ​റന്നു കണ്ടുപി​ടി​ക്കാൻ തുനി​യു​ന്ന​തി​നു​പ​കരം നമുക്ക്‌ അനന്തര​ഫ​ല​ങ്ങ​ളി​ലേക്കു നോക്കാം. പ്രായ​പൂർത്തി​യാ​യ​വ​രും യുവാ​ക്ക​ളും തമ്മിലുള്ള അകൽച്ച മിക്ക​പ്പോ​ഴും കൗമാ​ര​പ്രാ​യ​ക്കാ​രെ, ധാർമി​കത സംബന്ധിച്ച്‌ അവരു​ടേ​തായ സ്വന്തം പ്രമാ​ണങ്ങൾ രൂപീ​ക​രി​ക്കു​ന്ന​തി​ലേക്കു നയിക്കു​ന്നു. അതിന്റെ ഭവിഷ്യ​ത്തോ? കൗമാര ഗർഭധാ​രണം, ഗർഭച്ഛി​ദ്രം, ലൈം​ഗി​ക​മാ​യി പകരുന്ന രോഗങ്ങൾ എന്നിവ​യു​ടെ​യെ​ല്ലാം കുതി​ച്ചു​യ​രുന്ന നിരക്ക്‌. ഭവനത്തി​ലെ വാത്സല്യ​ത്തി​ന്റെ അഭാവം കൂടെ​ക്കൂ​ടെ അക്രമ​ത്തിൽ കലാശി​ക്കു​ന്നു. വാത്സല്യം വററി​ക്കൊ​ണ്ടി​രി​ക്കു​ന്നു എന്നതിന്റെ തെളി​വെ​ന്നോ​ണം നിങ്ങളു​ടെ പരിസ​ര​ത്തു​നി​ന്നുള്ള ഉദാഹ​ര​ണങ്ങൾ നിരത്താൻ ഒരുപക്ഷേ നിങ്ങൾക്കു കഴി​ഞ്ഞേ​ക്കും.

13, 14. (എ) അനേകം കുടും​ബ​ങ്ങ​ളു​ടെ അധഃപ​തനം കണക്കി​ലെ​ടു​ക്കു​മ്പോൾ നാം ബൈബി​ളി​നു ശ്രദ്ധ കൊടു​ക്കേ​ണ്ടത്‌ എന്തു​കൊണ്ട്‌? (ബി) കുടും​ബ​ജീ​വി​തം സംബന്ധിച്ച്‌ ഏതു തരത്തി​ലുള്ള വിജ്ഞാ​ന​പ്ര​ദ​മായ ഉപദേ​ശ​മാ​ണു ദൈവം നൽകു​ന്നത്‌?

¹³ ഒരുകാ​ലത്തു തങ്ങളുടെ വലിയ കുടും​ബ​ത്തി​ന്റെ, തങ്ങളുടെ സ്വന്ത കുലത്തി​ന്റെ, വംശത്തി​ന്റെ അല്ലെങ്കിൽ സമൂഹ​ത്തി​ന്റെ ഭാഗമായിരുന്നവർക്കെ​തി​രെ അധിക​മ​ധി​കം ആളുകൾ എന്തു​കൊണ്ട്‌ തിരി​യു​ന്നു എന്നതി​നുള്ള കാരണം ഇതിൽ കാണാ​വു​ന്ന​താണ്‌. എന്നിരു​ന്നാ​ലും, ഇന്നത്തെ ജീവി​ത​ത്തി​ന്റെ ദോഷ​വ​ശ​ങ്ങൾക്ക്‌ ഊന്നൽകൊ​ടു​ക്കാൻവേ​ണ്ടി​യല്ല നാം ഈ സംഗതി​കൾ പറയു​ന്നത്‌ എന്ന കാര്യം മനസ്സിൽ പിടി​ക്കുക. നമ്മുടെ രണ്ടു മുഖ്യ പരിഗ​ണ​നകൾ ഇവയാണ്‌: പൗലോസ്‌ പട്ടിക​പ്പെ​ടു​ത്തിയ ദോഷ​ങ്ങ​ളിൽനി​ന്നുള്ള ദുരി​തങ്ങൾ ഒഴിവാ​ക്കാൻ ബൈബിൾ പ്രബോ​ധ​ന​ങ്ങൾക്കു നമ്മെ സഹായി​ക്കാൻ കഴിയു​മോ എന്നതും നമ്മുടെ ജീവി​ത​ത്തിൽ ബൈബിൾ പ്രബോ​ധ​നങ്ങൾ ബാധക​മാ​ക്കു​ന്ന​തിൽനി​ന്നു നമുക്കു പ്രയോ​ജനം ലഭിക്കു​മോ എന്നതു​മാണ്‌. പൗലോ​സി​ന്റെ പട്ടിക​യി​ലെ ആ നാല്‌ സംഗതി​ക​ളിൽനി​ന്നു വ്യക്തമാ​യി​രി​ക്കു​ന്ന​തു​പോ​ലെ ഈ രണ്ടു ചോദ്യ​ങ്ങൾക്കും ഉവ്വ്‌ എന്ന്‌ ഉത്തരം കൊടു​ക്കാ​വു​ന്ന​താണ്‌.

¹⁴ ഹൃദ​യോ​ഷ്‌മളത പകരുന്ന വിജയ​ക​ര​മായ ഒരു കുടും​ബ​ജീ​വി​തം ഉളവാ​ക്കു​ന്ന​തിൽ ബൈബി​ളി​ന്റേ​തി​നെ കവച്ചു​വെ​ക്കുന്ന ഒരു പ്രബോ​ധ​ന​വു​മില്ല എന്ന ഒരു പൊതു പ്രസ്‌താ​വന നടത്തി​യാൽ അതു വളരെ ശരിയാ​യി​രി​ക്കും. കുടും​ബാം​ഗ​ങ്ങളെ വെറും വീഴ്‌ചകൾ ഒഴിവാ​ക്കാ​നല്ല, മറിച്ച്‌, വിജയി​ക്കാൻ സഹായി​ക്കുന്ന അതിന്റെ ബുദ്ധ്യു​പ​ദേ​ശ​ത്തി​ന്റെ കേവലം ഒരു മാതൃക എടുത്താൽമതി അതു സ്ഥിരീ​ക​രി​ച്ചു​കി​ട്ടാൻ. ഭർത്താ​ക്കൻമാർ, ഭാര്യ​മാർ, കുട്ടികൾ എന്നിവരെ ഉദ്ദേശി​ച്ചുള്ള മനോ​ജ്ഞ​വും പ്രാ​യോ​ഗി​ക​വു​മായ മററുപല ഭാഗങ്ങ​ളു​മു​ണ്ടെ​ങ്കി​ലും കൊ​ലൊ​സ്സ്യർ 3:18-21 ഇതിനെ നല്ലവണ്ണം ദൃഷ്ടാ​ന്തീ​ക​രി​ക്കു​ന്നു. ഈ പ്രബോ​ധനം നമ്മുടെ നാളു​ക​ളിൽ പ്രാ​യോ​ഗി​ക​മാണ്‌. സത്യ​ക്രി​സ്‌ത്യാ​നി​ക​ളു​ടെ ഭവനങ്ങ​ളിൽപ്പോ​ലും തകരാ​റു​ക​ളും വെല്ലു​വി​ളി​ക​ളും ഉണ്ടെന്നു സമ്മതി​ക്കു​ന്നു, എന്നാലും കുടും​ബ​ങ്ങൾക്കു വളരെ സഹായ​ക​മായ പ്രബോ​ധ​നങ്ങൾ ബൈബിൾ പ്രദാനം ചെയ്യു​ന്നു​വെ​ന്നാണ്‌ ആകമാ​ന​ഫലം തെളി​യി​ക്കു​ന്നത്‌.

15, 16. സാംബി​യ​യി​ലെ യഹോ​വ​യു​ടെ സാക്ഷി​ക​ളെ​ക്കു​റി​ച്ചു പഠിക്കവേ, ഏതു സ്ഥിതി​വി​ശേ​ഷ​മാണ്‌ ഒരു ഗവേഷക കണ്ടെത്തി​യത്‌?

¹⁵ കാനഡ​യി​ലെ ലെത്‌ബ്രി​ഡ്‌ജ്‌ യൂണി​വേ​ഴ്‌സി​റ​റി​യിൽനി​ന്നുള്ള ഒരു ഗവേഷക ഒന്നര വർഷ​ത്തോ​ളം സാംബി​യ​യി​ലെ സാമൂ​ഹി​ക​ജീ​വി​തം പഠനവി​ധേ​യ​മാ​ക്കി. അവർ ഇപ്രകാ​രം നിഗമ​ന​ത്തി​ലെത്തി: “ഉറച്ച വൈവാ​ഹിക ബന്ധം നിലനിർത്തു​ന്ന​തിൽ മററു മതവി​ഭാ​ഗ​ങ്ങ​ളി​ലെ അംഗങ്ങ​ളെ​ക്കാൾ യഹോ​വ​യു​ടെ സാക്ഷി​കൾക്കാ​ണു കൂടുതൽ വിജയം. . . . അവരുടെ വിജയം ഭർത്താ​വി​നും ഭാര്യ​ക്കു​മി​ട​യി​ലെ മെച്ചപ്പെട്ട ഒരു പരസ്‌പര ബന്ധത്തെ വിളി​ച്ച​റി​യി​ക്കു​ന്നു. അവർ തങ്ങളുടെ പുതു​താ​യി കണ്ടെത്തിയ, ഭീഷണി​ക്കി​ട​മി​ല്ലാത്ത, സഹകര​ണാ​ത്മ​ക​മായ പരി​ശ്ര​മ​ങ്ങ​ളിൽ പരസ്‌പ​ര​മുള്ള പെരു​മാ​റ​റ​ത്തിന്‌ ഒരു ശിരസ്സ്‌ എന്നനി​ല​യിൽ ദൈവ​ത്തോ​ടു കണക്കു​ബോ​ധി​പ്പി​ക്കേ​ണ്ടവർ ആയിത്തീർന്നി​രി​ക്കു​ന്നു . . . യഹോ​വ​യു​ടെ സാക്ഷി​യായ ഭർത്താവ്‌ തന്റെ ഭാര്യ​യു​ടെ​യും കുട്ടി​ക​ളു​ടെ​യും ക്ഷേമം മുൻനിർത്തി​യുള്ള ഉത്തരവാ​ദി​ത്വ നിർവ​ഹ​ണ​ത്തിൽ പക്വത പ്രാപി​ക്കാൻ പഠിപ്പി​ക്ക​പ്പെ​ടു​ന്നു. . . . നിർമ​ല​ത​യുള്ള വ്യക്തി​ക​ളാ​യി​രി​ക്കാൻ ഭാര്യ​യും ഭർത്താ​വും പ്രോ​ത്സാ​ഹി​പ്പി​ക്ക​പ്പെ​ടു​ന്നു . . . നിർമ​ല​ത​ക്കാ​യുള്ള ഈ പ്രബല​മായ ആവശ്യം വിവാ​ഹത്തെ അരക്കി​ട്ടു​റ​പ്പി​ക്കു​ന്നു.”

¹⁶ എണ്ണമററ യഥാർഥ അനുഭ​വ​ങ്ങളെ അടിസ്ഥാ​ന​പ്പെ​ടു​ത്തി​യ​താ​യി​രു​ന്നു ആ പഠനം. ഉദാഹ​ര​ണ​ത്തിന്‌, നാട്ടു​ന​ട​പ്പിൽനി​ന്നു വ്യത്യ​സ്‌ത​മാ​യി “പൂന്തോ​ട്ട​ത്തിൽ, അതിന്റെ പണിയാ​രം​ഭി​ക്കു​മ്പോൾ മാത്രമല്ല, നടു​മ്പോ​ഴും കുഴി​ക്കു​മ്പോ​ഴും, യഹോ​വ​യു​ടെ സാക്ഷി​ക​ളായ പുരു​ഷൻമാർ അവരുടെ ഭാര്യ​മാ​രെ സഹായി​ക്കു​ന്ന​താ​യി കൂടെ​ക്കൂ​ടെ കാണ​പ്പെ​ടു​ന്നു,” എന്ന്‌ ഈ ഗവേഷക പറഞ്ഞു. ബൈബിൾ പ്രബോ​ധനം ആളുക​ളു​ടെ ജീവി​തത്തെ സ്‌പർശി​ക്കു​ന്നു എന്നു പ്രകട​മാ​ക്കുന്ന, എണ്ണിയാൽ തീരാത്ത അനുഭ​വങ്ങൾ ഭൂവ്യാ​പ​ക​മാ​യി ഉണ്ട്‌ എന്നത്‌ അങ്ങനെ വ്യക്തമാ​കു​ന്നു.

17, 18. മതപര​മായ പൈതൃ​കം, വിവാ​ഹ​പൂർവ​ലൈം​ഗി​കത എന്നിവ​യെ​ക്കു​റി​ച്ചുള്ള ഒരു പഠനം അമ്പരപ്പി​ക്കുന്ന ഏതു ഫലങ്ങൾ വെളി​ച്ചത്തു കൊണ്ടു​വന്നു?

¹⁷ കഴിഞ്ഞ ലേഖനം മതത്തെ സംബന്ധിച്ച ശാസ്‌ത്രീയ പഠന പത്രി​ക​യി​ലെ [ഇംഗ്ലീഷ്‌] കണ്ടെത്ത​ലു​കളെ പരാമർശി​ച്ചു. 1991-ൽ “മത​പൈ​തൃ​ക​വും വിവാ​ഹ​ത്തി​നു മുമ്പുള്ള ലൈം​ഗി​ക​ത​യും: മുതിർന്ന യുവാ​ക്ക​ളു​ടെ ഒരു ദേശീയ പ്രതി​നി​ധി​സം​ഘ​ത്തിൽനി​ന്നുള്ള തെളിവ്‌” എന്ന ശീർഷ​ക​ത്തിൽ അതി​ലൊ​രു ലേഖനം വന്നിരു​ന്നു. വിവാ​ഹ​പൂർവ​ലൈം​ഗി​കത എത്രമാ​ത്രം പ്രബല​മാ​ണെന്നു നിങ്ങൾക്ക്‌ അറിയാ​മാ​യി​രി​ക്കും. ചെറു​പ്പ​ക്കാ​രിൽ അനേകർ ഇളം​പ്രാ​യ​ത്തിൽത്തന്നെ വികാ​ര​ങ്ങൾക്കു വശംവ​ദ​രാ​കു​ന്നു, കൗമാ​ര​പ്രാ​യ​ക്കാ​രിൽ പലർക്കും ഒന്നില​ധി​കം ലൈം​ഗിക പങ്കാളി​കൾ ഉണ്ട്‌. ബൈബിൾ പ്രബോ​ധ​ന​ങ്ങൾക്ക്‌ ഈ സർവസാ​ധാ​രണ ശൈലി​യെ മാററി​യെ​ടു​ക്കാ​നാ​കു​മോ?

¹⁸ ‘കൂടുതൽ യാഥാ​സ്ഥി​തിക ക്രിസ്‌തീയ പാരമ്പ​ര്യ​ത്തിൽ വളർന്നു​വന്ന ഇളം​പ്രാ​യ​ത്തി​ലുള്ള യുവാ​ക്കൾക്കും മുതിർന്ന യുവാ​ക്കൾക്കും വിവാ​ഹ​ത്തി​നു മുമ്പു ലൈം​ഗി​ക​ബ​ന്ധ​മു​ണ്ടാ​യി​രി​ക്കാൻ സാധ്യത കുറവാ​യി​രി​ക്കു​മെന്ന’ പ്രതീ​ക്ഷ​യിൽ മൂന്നു സഹ​പ്രൊ​ഫ​സർമാർ ആ പ്രശ്‌ന​ത്തിൻമേൽ പഠനം നടത്തി. എന്നാൽ വസ്‌തു​തകൾ പ്രകട​മാ​ക്കി​യ​തോ? എല്ലായി​ട​ത്തും ഇക്കൂട്ട​രിൽപ്പെട്ട 70 മുതൽ 82 വരെ ശതമാ​നം​പേർ വിവാ​ഹ​ത്തി​നു മുമ്പു ലൈം​ഗി​ക​ത​യിൽ ഏർപ്പെ​ട്ടി​ട്ടു​ണ്ടാ​യി​രു​ന്നു. ചിലർക്കു “വിവാ​ഹ​ത്തി​നു മുമ്പുള്ള ലൈം​ഗി​ക​ത​യ്‌ക്കുള്ള സാധ്യത യാഥാ​സ്ഥി​തിക പാരമ്പ​ര്യം [കുറയ്‌ക്കു​ക​യു​ണ്ടാ​യി], എന്നാൽ ‘കൗമാ​ര​പ്രാ​യ​ക്കാ​രു​ടെ വിവാ​ഹ​ത്തി​നു​മു​മ്പുള്ള ലൈം​ഗി​ക​ത​യു​ടെ കാര്യ​ത്തി​ല​തില്ല.’” “മുഖ്യ​ധാ​രാ പ്രൊ​ട്ട​സ്‌റ​റൻറു​കാ​രു​മാ​യി താരത​മ്യം ചെയ്യു​മ്പോൾ, വിവാ​ഹ​പൂർവ​ലൈം​ഗി​ക​ത​യ്‌ക്കു പ്രത്യേ​കിച്ച്‌ ഉയർന്ന സാധ്യത” മതഭക്ത​രെന്നു തോന്നിയ കുടും​ബ​ങ്ങ​ളിൽനി​ന്നുള്ള ചില യുവാ​ക്ക​ളി​ലാ​യി​രു​ന്നു എന്ന്‌ അവർ അഭി​പ്രാ​യ​പ്പെട്ടു.—ചെരി​ച്ചെ​ഴുത്ത്‌ ഞങ്ങളു​ടേത്‌.

19, 20. യഹോ​വ​യു​ടെ സാക്ഷി​കൾക്കി​ട​യി​ലെ യുവാ​ക്ക​ളിൽ അനേകരെ ദൈവ​ത്തി​ന്റെ പ്രബോ​ധനം സഹായി​ക്കു​ക​യും സംരക്ഷി​ക്കു​ക​യും ചെയ്‌തി​രി​ക്കു​ന്ന​തെ​ങ്ങനെ?

¹⁹ യഹോ​വ​യു​ടെ സാക്ഷി​ക​ളായ യുവാ​ക്കൾക്കി​ട​യിൽ ആ പ്രൊ​ഫ​സർമാർ കണ്ടെത്തി​യതു നേർവി​പ​രീത അവസ്ഥയാ​യി​രു​ന്നു, അവർ “മററു​ള്ള​വ​രിൽനിന്ന്‌ ഏററവും വ്യത്യ​സ്‌ത​രാണ്‌.” എന്തു​കൊണ്ട്‌? “അവരുടെ ഉയർന്ന പ്രതി​ബ​ദ്ധ​ത​യും അനുഭ​വങ്ങൾ, പ്രതീ​ക്ഷകൾ, പങ്കുപ​ററൽ എന്നിവ ഊട്ടി​വ​ളർത്തുന്ന സാമൂ​ഹിക സമന്വ​യ​വും . . . പൊതു​വേ വിശ്വാസ തത്ത്വങ്ങ​ളോട്‌ ഏറെ പററി​നിൽക്കാൻ അവരെ സഹായി​ച്ചേ​ക്കാം.” തുടർന്ന്‌ അവർ ഇതും പറഞ്ഞു: “ഇളം​പ്രാ​യ​ത്തി​ലുള്ള യുവാക്കൾ എന്നനി​ല​യി​ലും മുതിർന്ന യുവാക്കൾ എന്നനി​ല​യി​ലും സാക്ഷികൾ സുവി​ശേ​ഷ​വേ​ല​യു​ടെ ഉത്തരവാ​ദി​ത്വ​ങ്ങൾ നിറ​വേ​റ​റാൻ പ്രതീ​ക്ഷി​ക്ക​പ്പെ​ടു​ന്നു.”

²⁰ അതായത്‌ അസാൻമാർഗി​കത ഒഴിവാ​ക്കാൻ അവരെ സഹായി​ച്ചു​കൊ​ണ്ടു ബൈബിൾ പ്രബോ​ധ​നങ്ങൾ യഹോ​വ​യു​ടെ സാക്ഷി​കളെ ഗുണക​ര​മാ​യി ബാധിച്ചു. ലൈം​ഗി​ക​മാ​യി പകരുന്ന രോഗ​ങ്ങ​ളിൽനി​ന്നുള്ള സംരക്ഷ​ണ​ത്തിൽ അതു കലാശി​ക്കു​ന്നു, അവയിൽ ചിലതു ചികി​ത്സ​യി​ല്ലാ​ത്ത​തും മററുള്ളവ മാരക​വു​മാണ്‌. ജീവൻ അപഹരി​ക്കു​ന്ന​തി​നു തുല്യ​മാ​യി ബൈബിൾ പഠിപ്പി​ക്കുന്ന ഗർഭച്ഛി​ദ്ര​ന​ട​പ​ടി​യു​ടെ സമ്മർദ​മി​ല്ലെ​ന്ന​തും അതർഥ​മാ​ക്കു​ന്നു. ഒരു ശുദ്ധ മനസ്സാ​ക്ഷി​യോ​ടെ മുതിർന്ന യുവാ​ക്കൾക്കു വിവാ​ഹ​ത്തി​ലേക്കു പ്രവേ​ശി​ക്കാ​മെ​ന്നും അതർഥ​മാ​ക്കു​ന്നു. അതായത്‌, കൂടുതൽ ഉറച്ച അടിത്ത​റ​മേൽ പണിയ​പ്പെട്ട വിവാ​ഹങ്ങൾ എന്നർഥം. ചുരു​ക്ക​ത്തിൽ, ദുർഘ​ട​നാ​ളു​കളെ നേരി​ടാ​നും കൂടുതൽ ആരോ​ഗ്യ​മു​ള്ള​വ​രാ​യി​രി​ക്കാ​നും കൂടുതൽ സന്തുഷ്ടി​യു​ള്ള​വ​രാ​യി​രി​ക്കാ​നും നമ്മെ സഹായി​ക്കാൻ അത്തരം പ്രബോ​ധ​ന​ങ്ങൾക്കേ കഴിയൂ.

ക്രിയാ​ത്മ​ക​മായ പ്രബോ​ധ​നം

21. നമ്മുടെ നാളു​ക​ളി​ലേക്കു പൗലോസ്‌ ഏതു സംഗതി​കൾ കൃത്യ​മാ​യി മുൻകൂ​ട്ടി​പ്പ​റഞ്ഞു?

²¹ ഇനി, 2 തിമൊ​ഥെ​യൊസ്‌ 3:3, 4-ലേക്കു തിരി​ച്ചു​പോ​യി, അനേകർക്ക്‌—എല്ലാവർക്കു​മല്ല—നമ്മുടെ നാളു​കളെ ഇടപെ​ടാൻ പ്രയാസമാക്കിത്തീർക്കു​മെന്നു പൗലോസ്‌ പറഞ്ഞ വേറെ എന്തുകൂ​ടി​യു​ണ്ടെന്നു നോക്കാം: “ഇണങ്ങാ​ത്ത​വ​രും ഏഷണി​ക്കാ​രും അജി​തേ​ന്ദ്രി​യൻമാ​രും ഉഗ്രൻമാ​രും സൽഗു​ണ​ദ്വേ​ഷി​ക​ളും ദ്രോ​ഹി​ക​ളും ധാർഷ്ട്യ​ക്കാ​രും നിഗളി​ക​ളു​മാ​യി ദൈവ​പ്രി​യ​മി​ല്ലാ​തെ ഭോഗ​പ്രി​യരു”മായ [മനുഷ്യ​രു​ണ്ടാ​കും]. അതെത്ര കൃത്യ​മാണ്‌! എന്നാൽ നമ്മെ സംരക്ഷി​ക്കാ​നും സാഹച​ര്യ​ങ്ങളെ നേരിട്ട്‌ വിജയി​ക്കു​ന്ന​തി​നു നമ്മെ സജ്ജരാ​ക്കാ​നും ബൈബി​ളിൽനി​ന്നുള്ള പ്രബോ​ധ​ന​ത്തി​നു കഴിയും.

22, 23. ഏതു ക്രിയാ​ത്മ​ക​മായ ആഹ്വാ​ന​ത്തോ​ടെ​യാണ്‌ പൗലോസ്‌ തന്റെ പട്ടിക അവസാ​നി​പ്പി​ക്കു​ന്നത്‌, അതിന്റെ വിവക്ഷ എന്താണ്‌?

²² അപ്പോ​സ്‌ത​ല​നായ പൗലോസ്‌ തന്റെ പട്ടിക അവസാ​നി​പ്പി​ക്കു​ന്നത്‌ ആശാവ​ഹ​മായ വാക്കു​ക​ളി​ലാണ്‌. അളവററ മെച്ചങ്ങൾ നമുക്കു കൈവ​രു​ത്താ​നാ​വുന്ന ഒരു ദൈവിക കൽപ്പന​യി​ലേക്ക്‌ അദ്ദേഹം അവസാന ഇനത്തെ തിരി​ക്കു​ന്നു. “ഭക്തിയു​ടെ വേഷം ധരിച്ചു അതിന്റെ ശക്തി ത്യജി​ക്കു​ന്ന​വരു”ണ്ടാകു​മെന്നു പറഞ്ഞിട്ട്‌ പൗലോസ്‌ തുടർന്നു സൂചി​പ്പി​ക്കു​ന്ന​തോ, “അങ്ങനെ​യു​ള്ള​വരെ വിട്ടൊ​ഴി​യുക”യെന്നും. വിവാ​ഹ​പൂർവ​ലൈം​ഗി​ക​ത​യു​ടെ കാര്യ​ത്തിൽ ചില വിഭാ​ഗ​ങ്ങ​ളി​ലെ യുവാ​ക്കൾക്കു യഥാർഥ​ത്തിൽ, ശരാശ​രി​യെ​ക്കാൾ കൂടുതൽ ഉയർന്ന നിരക്കാ​ണു​ള്ളത്‌ എന്നോർക്കുക. എന്തിന്‌, പള്ളിയിൽ പോകു​ന്ന​വ​രു​ടെ അസാൻമാർഗി​കത വെറും ശരാശരി നിലയി​ലാ​യി​രു​ന്നെ​ങ്കിൽപ്പോ​ലും, അവരുടെ ആരാധ​ന​യ്‌ക്കു ശക്തിയി​ല്ലെ​ന്ന​തിന്‌ അതൊരു തെളി​വാ​യി​രി​ക്കി​ല്ലേ? അതിലു​പരി, വാണിജ്യ ഇടപാ​ടു​ക​ളിൽ ജനങ്ങൾ എങ്ങനെ പ്രവർത്തി​ക്കു​ന്നു, കീഴ്‌ജോ​ലി​ക്കാ​രോട്‌ എങ്ങനെ പെരു​മാ​റു​ന്നു, ബന്ധുക്ക​ളോട്‌ എങ്ങനെ പെരു​മാ​റു​ന്നു എന്നതി​ലെ​ല്ലാം മതപ്ര​ബോ​ധ​നങ്ങൾ മാററം വരുത്തു​ന്നു​ണ്ടോ?

²³ ദൈവ​വ​ച​ന​ത്തിൽനി​ന്നു നാം പഠിക്കു​ന്നതു ബാധക​മാ​ക്ക​ണ​മെന്നു പൗലോ​സി​ന്റെ വാക്കുകൾ പ്രകട​മാ​ക്കു​ന്നു, ഉണ്ടായി​രി​ക്കേ​ണ്ടതു ക്രിസ്‌ത്യാ​നി​ത്വ​ത്തി​ന്റെ യഥാർഥ ശക്തിയെ വെളി​വാ​ക്കുന്ന ആരാധ​നാ​രീ​തി​യാണ്‌. ആരാധ​നാ​രീ​തി നിർജീ​വ​മാ​യി​രു​ന്ന​വരെ സംബന്ധി​ച്ചു പൗലോസ്‌ നമ്മോട്‌ ഇപ്രകാ​രം പറയുന്നു: “അങ്ങനെ​യു​ള്ള​വരെ വിട്ടൊ​ഴി​യുക.” നമുക്കു സുനി​ശ്ചി​ത​മായ പ്രയോ​ജ​നങ്ങൾ കൈവ​രു​ത്തുന്ന വ്യക്തമായ കല്‌പ​ന​യാ​ണിത്‌.

24. വെളി​പ്പാട്‌ 18-ലെ ആഹ്വാനം പൗലോ​സി​ന്റെ ബുദ്ധ്യു​പ​ദേ​ശ​ത്തോ​ടു സമാന്ത​ര​മാ​യി വരുന്ന​തെ​ങ്ങനെ?

²⁴ ഏതു വിധത്തിൽ? കൊള്ളാം, ബൈബി​ളി​ന്റെ അവസാന പുസ്‌തകം ഒരു പ്രതീ​കാ​ത്മക സ്‌ത്രീ​യെ, മഹാബാ​ബി​ലോൻ എന്നു വിളി​ക്ക​പ്പെ​ടുന്ന ഒരു വേശ്യയെ, ചിത്രീ​ക​രി​ക്കു​ന്നു. യഹോ​വ​യാം ദൈവം പരി​ശോ​ധി​ച്ചു തള്ളിക്കളഞ്ഞ, ലോക​വ്യാ​പക-വ്യാജ-മതസാ​മ്രാ​ജ്യ​ത്തെ മഹാബാ​ബി​ലോൻ പ്രതി​നി​ധാ​നം ചെയ്യു​ന്നെന്നു തെളിവു പ്രകട​മാ​ക്കു​ന്നു. എന്നാൽ നാം അതിൽ ഉൾപ്പെ​ടേ​ണ്ട​തില്ല. വെളി​പ്പാ​ടു 18:4 നമ്മോട്‌ ഇങ്ങനെ ആഹ്വാനം ചെയ്യുന്നു: “എന്റെ ജനമാ​യു​ള്ളോ​രേ, അവളുടെ പാപങ്ങ​ളിൽ കൂട്ടാ​ളി​ക​ളാ​കാ​തെ​യും അവളുടെ ബാധക​ളിൽ ഓഹരി​ക്കാ​രാ​കാ​തെ​യു​മി​രി​പ്പാൻ അവളെ വിട്ടു​പോ​രു​വിൻ.” വാസ്‌ത​വ​ത്തിൽ, “അങ്ങനെ​യു​ള്ള​വരെ വിട്ടൊ​ഴി​യുക” എന്നു പറഞ്ഞ​പ്പോൾ അതേ സന്ദേശം​ത​ന്നെ​യല്ലേ പൗലോ​സും തന്നത്‌? ബൈബി​ളി​ന്റെ ആ കല്‌പന നാം അനുസ​രി​ക്കു​ന്നത്‌, ദൈവിക പ്രബോ​ധ​ന​ങ്ങ​ളിൽനി​ന്നു പ്രയോ​ജനം നേടാ​നുള്ള മറെറാ​രു വിധമാണ്‌.

25, 26. യഹോ​വ​യാം ദൈവ​ത്തിൽനി​ന്നുള്ള പ്രബോ​ധനം ഇപ്പോൾ സ്വീക​രി​ച്ചു ബാധക​മാ​ക്കു​ന്ന​വർക്കു ഭാവി എന്തു കൈവ​രു​ത്തും?

²⁵ മനുഷ്യ​രു​ടെ കാര്യ​ങ്ങ​ളിൽ ദൈവം ഉടനെ​തന്നെ നേരിട്ട്‌ ഇടപെ​ടും. സകല വ്യാജ​മ​ത​ങ്ങ​ളെ​യും ഈ ദുഷ്ടവ്യ​വ​സ്ഥി​തി​യു​ടെ ശേഷി​ക്കുന്ന ഭാഗ​ത്തെ​യും അവിടുന്ന്‌ തുടച്ചു​നീ​ക്കും. വെളി​പ്പാ​ടു 19:1, 2 സൂചി​പ്പി​ക്കു​ന്ന​പ്ര​കാ​രം അത്‌ ആഹ്ലാദ​ത്തി​നുള്ള ഒരു കാരണ​മാ​യി​രി​ക്കും. ദൈവ​ത്തി​ന്റെ പ്രബോ​ധ​നങ്ങൾ സ്വീക​രിച്ച്‌ അവ പിൻപ​റ​റു​ന്നവർ ഈ ദുർഘ​ട​നാ​ളു​ക​ളു​ടെ ബുദ്ധി​മു​ട്ടു​കൾ ഇല്ലാതാ​കു​മ്പോൾ അവിടു​ത്തെ പ്രബോ​ധ​നങ്ങൾ പിൻപ​റ​റി​ക്കൊ​ണ്ടി​രി​ക്കാൻ അനുവ​ദി​ക്ക​പ്പെ​ടും.—വെളി​പ്പാ​ടു 21:3, 4.

²⁶ തീർച്ച​യാ​യും, പുനഃ​സ്ഥാ​പി​ത​മായ ആ ഭൗമിക പറുദീ​സ​യിൽ ജീവി​ക്കു​ന്ന​തി​ലെ ആനന്ദം ഭാവനാ​തീ​ത​മാ​യി​രി​ക്കും. അതു സാധ്യ​മാ​ണെന്നു ദൈവം വാഗ്‌ദാ​നം ചെയ്യുന്നു, നമുക്ക്‌ അവിടു​ത്തെ പരിപൂർണ​മാ​യി വിശ്വ​സി​ക്കാ​നാ​വും. അപ്രകാ​രം തന്റെ സഹായ​ക​മായ പ്രബോ​ധനം സ്വീക​രി​ച്ചു പിൻപ​റ​റാൻ അവിടുന്ന്‌ നമുക്കു മതിയായ കാരണം നൽകുന്നു. എപ്പോൾ? ഇപ്പോൾ നമ്മുടെ നിർണാ​യക നാളു​ക​ളി​ലും അവിടുന്ന്‌ വാഗ്‌ദാ​നം ചെയ്യുന്ന ആ പറുദീ​സ​യി​ലും നമുക്ക്‌ അവിടു​ത്തെ പ്രബോ​ധ​നങ്ങൾ പിൻപ​റ​റാം.—മീഖാ 4:3, 4.

ധ്യാനിക്കാനുള്ള ആശയങ്ങൾ

◻ ധനത്തെ​ക്കു​റി​ച്ചുള്ള യഹോ​വ​യു​ടെ ബുദ്ധ്യു​പ​ദേ​ശ​ത്തിൽനിന്ന്‌ അവിടു​ത്തെ ജനം പ്രയോ​ജനം അനുഭ​വി​ച്ചി​രി​ക്കു​ന്ന​തെ​ങ്ങനെ?

◻ ദൈവ​ദാ​സൻമാർക്ക്‌ അവിടു​ത്തെ വചനം ബാധക​മാ​ക്കു​ന്ന​തിൽനിന്ന്‌ ഉളവായ ഏതു നല്ല ഫലങ്ങ​ളെ​യാണ്‌ ഈശോ​സ​ഭ​ക്കാ​രു​ടെ ഒരു മാഗസിൻ സാക്ഷ്യ​പ്പെ​ടു​ത്തി​യി​രി​ക്കു​ന്നത്‌?

◻ സാംബി​യ​യി​ലെ ഒരു പഠനം വെളി​പ്പെ​ടു​ത്തു​ന്ന​ത​നു​സ​രി​ച്ചു ദിവ്യ പ്രബോ​ധനം ബാധക​മാ​ക്കുന്ന കുടും​ബ​ങ്ങൾക്ക്‌ എന്തു പ്രയോ​ജ​നങ്ങൾ ലഭിച്ചി​രി​ക്കു​ന്നു?

◻ യുവജ​ന​ങ്ങൾക്കു ദിവ്യ പ്രബോ​ധനം എന്തു സംരക്ഷണം പ്രദാനം ചെയ്യുന്നു?

[15-ാം പേജിലെ ചതുരം]

എന്തൊരു ഭയാന​ക​മായ പരിണ​ത​ഫ​ലങ്ങൾ!

എയ്‌ഡ്‌സും കൗമാ​ര​പ്രാ​യ​ക്കാ​രും എന്ന വിഷയം സംബന്ധിച്ച ഒരു ചർച്ചാ​യോ​ഗ​ത്തിൽ അവതരി​പ്പി​ക്ക​പ്പെട്ട റിപ്പോർട്ട്‌ ഇങ്ങനെ പറയുന്നു: “കൗമാ​ര​പ്രാ​യ​ക്കാർക്ക്‌ എയ്‌ഡ്‌സ്‌ പിടി​പെ​ടാ​നുള്ള സാധ്യത അപാരം​തന്നെ, കാരണം അവർ ലൈം​ഗി​ക​ത​യും മയക്കു​മ​രു​ന്നും പരീക്ഷി​ച്ചു​നോ​ക്കാൻ ഇഷ്ടപ്പെ​ടു​ന്നു, അപകടങ്ങൾ പ്രശ്‌ന​മാ​ക്കു​ന്നില്ല, തത്‌കാല സുഖമാണ്‌ അവർക്കു വേണ്ടത്‌. കൂടാതെ, മരിക്കു​മെന്ന ചിന്തയി​ല്ലാത്ത അവർ അധികാ​രത്തെ വെല്ലു​വി​ളി​ക്കു​ക​യും ചെയ്യുന്നു.”—ന്യൂ​യോർക്ക്‌ ഡെയ്‌ലി ന്യൂസ്‌, 1993 മാർച്ച്‌ 7, ഞായർ.

“എയ്‌ഡ്‌സ്‌ എന്ന പകർച്ച​വ്യാ​ധി​യു​ടെ അടുത്ത ‘മുന്നണി​പ്ര​ചാ​ര​കരാ’യി രംഗ​പ്ര​വേശം ചെയ്‌തി​രി​ക്കു​ന്നത്‌ ലൈം​ഗിക ബന്ധം പുലർത്തുന്ന കൗമാ​ര​പ്രാ​യ​ത്തി​ലുള്ള പെൺകു​ട്ടി​ക​ളാണ്‌ എന്നു യൂറോപ്പ്‌, ആഫ്രിക്ക, തെക്കു​കി​ഴക്കൻ ഏഷ്യ എന്നിവി​ട​ങ്ങ​ളിൽ ഐക്യ​രാ​ഷ്‌ട്രസഭ നടത്തിയ പഠനം കണ്ടെത്തി​യി​രി​ക്കു​ന്നു.”—ദ ന്യൂ​യോർക്ക്‌ ടൈംസ്‌, 1993 ജൂലൈ 30, വെള്ളി.

[16, 17 പേജിലെ ചിത്രങ്ങൾ]

സഭയിലും ഭവനത്തി​ലും ബൈബിൾ പ്രബോ​ധനം യഹോ​വ​യു​ടെ സാക്ഷി​കൾക്കു പ്രയോ​ജനം കൈവ​രു​ത്തു​ന്നു