2 Тесалоник

3 Ах дүү нар аа, Еховагийн* үг хурдан түгэн тархаж, та нарын дунд алдаршсан шиг алдарших болтугай гэж залбирч байгаарай. 2 Мөн аюултай, хорон муу хүмүүсээс хамгаалаач гэж бидний төлөө залбирч байгаарай. Учир нь бүх хүн Бурханд итгэдэг юм биш. 3 Харин Эзэн үнэнч бөгөөд та нарыг хүчирхэгжүүлж, хорон муу нэгнээс хамгаална. 4 Зааж сургасныг маань та нар биелүүлдэг, биелүүлэх ч болно гэдэгт Эзний дагалдагч бид итгэдэг. 5 Бурхныг хайрлаж, Христийн төлөө тэвчээртэй байхад тань Эзэн тусалсаар байх болтугай.

6 Одоо бид Эзэн Есүс Христийн өгсөн эрх мэдлийн дагуу* заавар өгье. Итгэл нэгт тань биеэ зөв авч явдаггүй, та нарт* бидний зааж сургасныг биелүүлдэггүй бол түүнээс хол бай. 7 Бидний юуг дуурайхаа та нар мэднэ. Учир нь бид та нарын дунд биеэ зөв авч явсан, 8 хэний ч юмыг зүгээр авч идээгүй. Харин та нарын хэнд ч дарамт болохгүй гэсэндээ өдөр шөнөгүй хөдөлмөрлөж, эцэж туйлдсан. 9 Бид та нараас юм авах эрхгүйдээ тэгээгүй. Харин үлгэр дуурайл болох гэсэн юм. 10 Бид танай тэнд байхдаа «Ажил хийх дургүй хүн бүү идэг» гэж заадаг байсан. 11 Гэтэл зарим чинь ажил огт хийдэггүй, хүний хэрэгт оролцож, биеэ зөв авч явдаггүйг бид дууллаа. 12 Тийм хүмүүсийг хүний хэрэгт оролцолгүй, өөрөө хөдөлмөрлөж хоолоо олж идэхийг Эзэн Есүс Христийн өгсөн эрх мэдлийн дагуу* ятган тушааж байна.

13 Ах дүү нар аа, шантрахгүйгээр сайныг үйлдэж байцгаа. 14 Харин энэ захидалд бичсэнийг дагадаггүй хүн байвал түүнээс болгоомжилж*, түүнтэй харьцахаа боль. Тэгвэл тэр хүн ичих юм. 15 Гэхдээ түүнийг дайсан биш, итгэл нэгтнээ гэж бодоод сануулж бай.

16 Амар амгалангийн Бурхан ямар ч үед та нарт амар тайвныг соёрхох болтугай. Эзэн та бүхэнтэй хамт байх болтугай.

17 Паул би өөрийнхөө гараар ­бичин мэндчилж байна. Ингэж ­бичиж бүх захидлаа баталгаажуулдаг.

18 Эзэн Есүс Христ та бүхнийг нигүүлсэх болтугай.