Novembro

Ninga niwogilihu mundduli, mukiristawu kaawogege madhu amanyazo. Mbwenye ehikalawo madhu mamodha enavoreyiha murima mukiristawu ahinafwaneleliye wawoga. Motajhiha, nnohowela okala pasope wihina nihikanne ekalelo yabure yowiliganiha nadhowaga owoga ni nlogo, dhilemelelo, mweddelo, nihimo, obe naathu a dhilabo dhimodha. Ohiya eyo, kannafuna wawoga madhu enavoreyihe murima athu amodha. Wawogege madhu enaahagalasa athu amodha. Ohiya wavanyihaga obe owogaga obure dhithu dhineriwana, watamalelege. Amwaana Ezarayeli, yahikanna dhithu dhowinjhiva yafwaneleliwa otamalela. Mbwenye ohiya otamalela, aliwa yosayela ethu-sithu wihina evanyihe dhoholela dha Yehova. Muthu akanna elamalelo yovanya, athu amodha enowambela werana emodhave. Podi wera onowawubuwela alobwana ale kumi yadhonwe weddelela elabo yothomeliwa. Nuwoga ni makalelo abure elabo ele yothomeliwa, amwaana Ezarayeli aatene wambela ompambiha Moses. (Núm. 13:31–14:4) Wa epaddi emodhaya, natamalelaga athu amodha nnere wahagalasa. Bumwahaya, opathege kadda mudhidhi wihina watamalelege athu amodha ni murimawo wamutene. w22.04 epaddi 8 ddima 16-17

Yehova uhakavihera azombwe owinjhiva okanna wandana nuliye. Akala mwanawo onofuna, Yehova podi omukavihera epaddi yomuzimuni. (1 Cor. 3:6, 7) Naarive woonaga wihina mwanawo kanapwatha dhithu dhomuzimuni, Yehova kanadha ahiya omudhivela. (Sal. 11:4) Mwana efunelo vang’no anniyena yomulabela Yehova ni ilibiheraga mowiwanana ni ‘efunelo anniyena’, Yehova anere okala nuliye ni anere omutapulela nlada wihina amukavihere. (At. 13:48; 2 Cró. 16:9) Ohiya eyo, podi wukavihera we owoga ethu enamudahinye murima mudhidhi yole wofwanelela — mwanawo ahoweliye madhu ninga yaale. (Pro. 15:23) Yehova podi omulabihedha ddibila obe murogola ammulogoni wihina amukavihere mwanawo. Naarive osogolowa anawo yunnuwe, Yehova podi weeriha wihina aliwa yubuwele ethu-sithu waahudhihiwe egaali ahima. (João 14:26) Mwebaribarene Yehova anere wureeliha vanlubale wahiselela wahudhiha anawo ni madhu awo ni dhowera dhawo. w22.04 epaddi 21 ddima 18

Saddana kanna oneti wofiya elabo yodhulu, bumwahaya anathabwa wanyanyuwela adhaari oothikitheliwa a Mulugu. Oothikitheliwa ala anagiwana ale enakavihera Omwene wa Mulugu ni ‘enaapara mabasa oovaha onamoona wa Yesu.’ (2 Cor. 5:20; Efé. 6:19, 20) Yaka ya 1918, aalobwana yala atanu natharu, yahinkedhiwa ni makalelo abure, ni ovokeriwa mukambura yaka dhowinjhivadhene. Yakala ninga mabasa yaapara alobwana ala oothikitheliwa, yahimala. (Apo. 11:3, 7-11) Mbwenye mohulegela, mweri wa Março yaka ya 1919, addibila ale oothikitheliwa ovenyihiwamo mukambura, nuvira mwana mudhidhi dhithu dhatedhene athu yawinkedhiwa obibiddeliwa. Mohulegela addibila ala, wahogolowela waholela mabasa oolaleya. Mbwenye eyo kimuhinhe Saddana oharahara nlogo na Mugulu. Obajha mudhidhi yole ofiyera peeno, oliye anna oharahara nlogo na Mulugu. (Apo. 12:15) Bumwahaya, iyo atene nnohowela ovilela ni omuroromela Yehova. — Apo. 13:10. w22.05 epaddi 5-6 ddima 14-16

Murumiwi Juwawu ahawoona makuru menli enakavihera Omwene wa Mulugu ni enaakele egumi yohimala. Nikuru nobajha eri athu owakwana 144 000. Aliwa esakuliwe elabo yavati wihina ekalege odhulu ni okasa epaddi wa Omwene wa Mulugu. Egaari odhulu, aliwa enerege wanda othonga elabo yavati. (Apo. 5:9, 10; 14:3, 4) Wodhela woona waye, Juwawu woona nikuru nna na 144 000 egimenle vamodha ni Yesu mwango wosiyawu. (Apo. 14:1) Obajha mudhidhi warumiwi ofiyera mudhidhi yola wehu, athu owinjhiva ehisakuliwa wihina ekale epaddi ya 144 000. (Luc. 12:32; Rom. 8:17) Mbwenye wodhela woona waye, Juwawu onona wi nikuru nig’ono nna, obe a 144 000 amodha yakale elabo yavati malabo ookuthula. Vano, wafiya ohoseya winlubale, aliwa enere othukuleliwa odhulu, wengo enere witaganyihedha ni oothikitheliwa amodha yaari oororomeleya ofiyera okwa wewa. Wengo enerege othonga elabo yavati vamodha ni Yesu Kiristhu. — Mat. 24:31; Apo. 5:9, 10. w22.05 epaddi 16 ddima 4-5

Yesu ohahudhiha anamaharaye okanna monelo wapama wodhela emuthu yewa. Oliye wawaddela egi: ‘Mathithi ammuruni mweenyu ehimala okontariwa.’ (Mat. 10:30) Madhu ala enonikurumusa murima, thabwathabwa akala nihikanna ekalelo yokanna monelo wabure wodhela emuthu yehu. Madhu ala, enowoneyiha wihina Babihu Yehova, anompwatha kadda muthu wa iyo ni niri athima vamentoni vaye. Akala di Yehova ansakunle wihina nimulabegele, teto duliyene anihina wi iyo nnofwanelela okala mwilaboni exa, iyo niri aani wera wihina oliye kubuwenlevo pama. Yaka 15 mundduli, Namasugwera ohuwoga wodhela okanna monelo wapama ni emuthu yehu: “Mwebaribarene, kannafuna othabwaga wiwubuwela iyo yekihu ofiyera wambela withukula, newene kannafuna omorela vamurakoni vowihina kaninna mabasa, ohiya eyo nnafuna nikanne monelo wapama wodhela emuthu yehu, noonaga dhithu dhinandihu ni dhihinandihu.” w22.05 epaddi 24-25 ddima 14-16

Nimakalelo baani kadda muthu wa iyo nnandihu okavihera wiwanana wula? Nakala athu amurenddele! (Mat. 5:9; Rom. 12:18) Naajhaga mudhidhi wihina nandane ni addibila ammulogoni, ninna winjhiviha murenddele mparayizu oomuzimuni. Nnohowela ohuddiwala wihina Yehova dawithane aatene eli mparayizuni oomuzimuni wihina emwebedhe ni makalelo oweela. Kubuwela makalelo Yehova anahagalaliiye anonaga nilibiheraga wihina ndhena murenddele ni wiwanana ni adhaaraye anathabwiye wavaha thima! (Isa. 26:3; Hab. 2:7) Nnande addi wapurelamu mareeliho Yehova ananivahiye? Nnowerana eyo wodhela opendda ndhe nnahudherihu mBibiliyani. Eyo enere onikavihera woniha dhikalelo dheekiristawu dhinanthukulele woniha ‘odhivela wahinamala’ ni ‘waapwatha amodha’ mmulogoni. — Rom. 12:10. w22.11 epaddi 12-13 ddima 16-18

Iyo noonelamo ni narumedha wi Yehova onilevelela, iyo nnokanna ‘malabo amurenddele. Egumihu enakala murenddeleve ni mubuwelo kunaninyemela. Ela ekalelo nnakannihuna ‘Yehova’ anilevelela. (At. 3:19) Yehova anilevelela anorumedha dila biili wandana wehu nuliye, okalaga ninga kannamuthegelege. Yehova anilevelela kanadha anisinyusa mwaha wa yothega emodhave. (Isa. 43:25) Yehova onovokedha dhothega dhehu wolapela nuliye ‘ndo ninga omadhelo nduwa ni omayelo nduwa wilapeliwana.’ (Sal. 103:12) Napendda makalelo wunnuwale olevelela wa Yehova, mmurimani mwehu mwinodhala otikina nuutamalela. (Sal. 130:4) Yehova kanamulevelela muthu mwaha wothabwa othega. Nihoona makalelo Yehova ariye mpaddusi ehu, namatoriha ehu, wi duliye anivahile malamulo nnaharihu, wi oliye dinafwanelela othoma akala anofwanelela omulevelela muthu ole obe naari. w22.06 epaddi 5 ddima 12-14

Yehova ohavaha ejhehero yapama aatene yaale enamudhivela. Mohilegela anere omariha oredda, wukuuwa ni okwa. (Apo. 21:3, 4) Oliye anere wakavihera ale enamuroromela osaddula elabo yavati okala parayizu. (Sal. 37:9-11) Mwilaboni exa, nnere okanna wandana wapama, teto woliba ni Yehova, wandana wapama wohiyana ni ola ninnihuna peeno. Mwebaribarene nihikanna ejhehero yohagalasa osongolo! Mbwenye mwahaya bwaddi nigakanna ebaribari wihina Yehova anere wakwaneliha dhatedhene dhendha osogolo? Kaavo ethu anapaganya Yehova ahakwaneliha. Bumwahaya nihikanna ebaribari yatene ‘yomujheha Yehova.’ (Sal. 27:14) Eyo enatapulela wi nnerege ojheha nuhagalala wihina Yehova akwanelihe mpaganyo dhaye. (Isa. 55:10, 11) Nnafuna nikale oororomeleya wa Yehova, nihaganyedhaga wihina Oliye ‘onowareeliha ale enamusayela ni murima watene. w22.06 epaddi 20 ddima 1; w22.06 epaddi 25 ddima 18

Yehova di musolo wemudhihu. Iyo nihikanna ebaribari wihina oliye anere wakwaneliha madhu avetheliye eri va 1 Timóteo 5:8. Nakanna ebaribari wihina Yehova anondhivela ni anodhivela emudhi yehu, kannanganyedhege wihina oliye anere onivaha ethu-sithu nnahoweliye epaddi yomwilini. (Mat. 6:31-33) Kavo anafuna onikabelela epaddi yomwilini ahiri Yehova! Nupaddusa elabo yavati, ohekamo dhithu dhohiyana Iyana wihina njhege. Teto dhithu ndho, dhinonihagalasa. (Gén. 2:9) Iyo nakanna yojha ya nlabo nimodha, kanere, ki mangwana nnajhe ddi. Mwaha akala nihikanna yojha ya peeno nivahiwe ni Yehova. (Mat. 6:11) Teto kaniddiwale wihina podive nlabe okunamo wihina niisapele epaddi yomwilini, mareeliho anafuna onivaha Yehova ovanene ni osongolo kinaligana ni mabasa nnaaparihu wihina niisapele. — Isa. 65:21, 22. w22.06 epaddi 15 ddima 7-8

Kahiyo yalave eli axa mwibaribarini enahowela yojha yomuzimuni, iyo aatene nnohowela. Murumiwi Pawulo ohuleba wihina dhithu nnahudherihu mBibiliyani dhinonikavihera ‘wixagiha ofiyedha ohiyaniha ethu yapama ni yabure.’ Werana efunelo ya Yehova peeno kahiyo ethu yokweya, mwaha obure waathu onna othabwa. Mbwenye Yesu ononisamalela ni ononivaha yojha yomuzimuni enanikavihera okanna nroromelo nooliba. Oliye onomulabihedha mudhaari oororomeleya wi egeredhe yojha dhinakumela mBibiliyani. Iyo nnohara yotajhiha ya Yesu, ni nnovaha Yehova nthithimiho nnafwaneleliye. (João 17:6, 26) Motajhiha, Yaka ya 1931, iyo obajha ononiwa ninga Anamoona a Yehova. (Isa. 43:10-12) Nerilena ndo mwaha nnafuna ninoniwe ni ndina na Yehova ni nnafuna nimuthithimihe. Ohiya eyo Tradução do Novo Mundo da Bíblia Sagrada onolabihedha ndina na Mulugu mburo dhatedhene nafwanyeyesa ndina na Mulugu vobajhavene. w22.07 epaddi 11 ddima 11-12

Muthenga dhapama dha Omwene wa Mulugu dhinokosa epaddi dha ebaribari dha mBibiliyani. Va Matewuji 13:44, Yesu ohuwoga egi: ‘oOmwene wodhulu onaladdanihiwa ni dhoorela dhinafwanyiwa dhigatibeliwe omundda, vano molobwana dhaala ofwanya ni otibela vamodhavene, nuuhagalala aniyena, oliye odhowa oguliha dhatedhene aniyena wihina agule muddayole.’ Sotikina onona wihina mulobwana ole kaveda dhorela, mbwenyi mulobwana ole nufwanya dhorela ndhe oliye aherana dhatedhene anadiye wihina akanne. Mwahaya bwaddi mulobwana ole adhe agulihege dhetedhene aniyena? Mwaha oliye ahinona wihina dhorela ndhe dhahithabwa okanna thima. Nihinona wihina kaavo ethu-sithu enavaha elabo enaligana ni murenddele ninnihuna womulabela Yehova nuuhagalala ni okanna ejhehedhelo yokanna egumi yohimala osogoro. Kayiwo ethu sithu enaligana ni wandana winlubale ninnihuna ni Yehova. Mwaha winonivaha murenddele webaribari onona wihina ninna ‘ohagalasa murima waye.’ — Col. 1:10. w22.08 epaddi 15 ddima 8-9; epaddi 17 ddima 12

Ki Juze anone addi wi agona ni mwihiyana ola yakale “yothega enlubale vamentoni va Yehova?” Nlamulo na Moyizes nawoga wodhela mararuwo, naalebiwe nuuvira yaka duzento. Nlamulonna ‘nawoga kuraruwe’. (Êxo. 20:14) Naarive dhigari ndo Juze ahikanna mubuwelo wa Yehova wodhela ogonihana. Motajhiha, Juze ahinona wihina Yehona apaddusile matelo wihina ekale athu abiili mulobwana ni mwihiyana. Teto podi wera oliye ahiwa thalako ya avwaye Sara wodhela makalelo Yehova ambareliye mudhidhi athu yafuniwa omurarusa. (Gén. 2:24; 12:14-20; 20:2-7) Juze ahipendda dhatedhene dhendha ofiyedha wonelamo ethu eli yapama ni yabure vamentoni va Yehova. Juze omudhivela Yehova ni oofuna opama waye, bumwaya oliye asakule werana efunelo ya Yehova. w22.08 epaddi 26 ddima 1-2

Yovuhulela ela kinawoga wodhela ovenyihiwa womwilini obe womuzimuni, kinaagana ovenyihiwa wa malabo yala okuthula ninga nonelesihumo kale mbwenye osogolo. Mwebaribarene yovuhulela ela ya Daniyeli enagana ovenyihiwa wa anookwa winereye osogolo mwilaboni exa. Mwahaya bwaddi nigawoga ndo? Madhu owi ‘nthubi’ enolabihedhiwa va Yolebela ya Jó 17:16 enagiwana ‘mahame.’ Eyo enoniha wi Daniel 12:2 anasoriha wodhela ovenyihiwa wanookwa winereye Armajedo avira. Daniel 12:2 Anafuna awoge ddi awogaga wi amodha enere ovenyihiwa wihina yakele ‘egumi yohimala’? Eyo enatapulela wi ale enaavenyihiwe mwari mwa Yaka Txikwi enere okanna ofuru wohudhera wodhela Yehova ni Yesu, ni wawiwelela, yerana ndo finakeliwa egumi yohimala, bumwahaya naarive athu apama yavenyihiwa enere ohowela wilibihedha wihina yakele egumi yohimala. — João 17:3. w22.09 epaddi 21 ddima 6-7

Eyo kinatapulela wihina Yehova anajheha wihina naroromelege athu aatene, ohiya eyo, oliye anajheha wihina naroromelege ale enoniha wihina enofwanelela ororomeliwa. Ororomeleya winohowela osayeliwa ninga nriho. Wihina nande werana eyo onohoweleya mudhidhi wowinjhivene. Ki onande aavi waroromela addibila? Vobajha, onohowela wanona pama. We podi othapanya naaliwa mwakala omutugumanoni. Obe odhowa mmalaleyelo vamodha. Okale oovilela ni wahiye wi yuwonihe wihina boororomeleya. Omabajhowene podi okala ethu yorusa othapanya wodhela dhithu dhamwigumini mwawo ni muthu ohumunonniwe pama. Mudhidhi munandaniyu pama kunakannege manyazo omwaddela dhithu dhamwigumini mwawo. (Luc. 16:10) Mbwenye onere ddi ddibila mmodha ooniha wi kanaroromeleya? Kuwaguve omariha wandana munninyuna, okale oovilela. Teto kuhiye wihina mwaha muthu mmodha ohukala oororomeleya ohiye waroromela athu aatene. w22.09 epaddi 4 ddima 7-8

Namaholela mulogo anithaniwa Mikeya wonelamo wi addibila yanna mutholo mmulogoni yaherana ethu yamutakalele vanlubale, Naarive dhigari ndo, Mikeya ahiliba murima ni oosugwera mubuwelo waye. Andile addi werana eyo? Oliye oolobelesa malabo aamatene wa Yehova amulobaga muzimu wotxena wihina ande ovilelana. Oliye oosayela muselu dholibiha mmalivuruni mwehu. Nnahudhera ddi ni yopadduwa ela? Akala ddibila obe murogola ohuwoga obe oherana ethu-sithu yuwukunle vanlubale, okale ofwaseya ni wahihiye mubuwelo wotakala okumelela. Podi weera ehikala ethu epadduwile mwigumini mwa ddibila oyo, ofiyedha oliye werana dhithudha nimakalelo yaala we wahinonniwe. Bumwahaya olobele wa Yehova ni onfugulele murima wawo, omwaaddele dhatedhene dhinupadduwela ni omulobe wihina woonege dhithudha ninga anoneliye, enere okala yokweya okala olevelela ni kannubuwelege wihina ddibilihu erilena yapudhave. (Pro. 19:11) Kuddiwale wihina Yehova ohunona dhatedhene dhinupadduwela ni oliye aneere wuvaha kopolo onahoweliwe wihina wandde ovilela. — Ecl. 5:8. w22.11 epaddi 21 ddima 5

Wasakule akwawo enamudhivela Yehova. Akwawo podi ovolowela makalelo awo owunnuwelavo epaddi yomuzimuni. (Pro. 13:20) Ddibila dhaala anithaniwa Julien, ali namaholela mulogo, onowoga egi: “Ngali muzombwe miyo gaherana wandana wapama, naaddibila nadhowihuna vamodha mmalaleyelo. Aliwa yoviheyana ni mabasa, bumwahaya aliwa yahigikavihera wadhivela mabasa ammalaleyelo. Aliwa ogikavihera okanna yoluba yolaba ninga piyonero a mudhidhi wamutene. Miyo ofiyedha wonelamo wihina gere oyelela ofuru gannimina wokanna akwaga apama, mwaha kale gandanesa ni athu yaligana ni miyo.” Ki wonelamo wi mmulogoni ohukalamo muthu ahinna ekalelo yapama? Murumiwi Pawulo ahinona wihina makiristawu amudhidhi waye kiyaali athu yanna efunelo ni dhithu dhomuzimuni. Bumwahaya adhe amwaddelege Timotiyu wihina ahawaddamele. (2 Tim. 2:20-22) Wandana ninnihuna ni Yehova bwathima vanlubale. Bumwahaya kanihiye muthu wihina anonge wandana wehu ninnihuna ni Yehova nilibiherihu vanlubale wihina nikanne. w22.08 epaddi 5-6 ddima 13-15

Mohiyana naale eniidda dholaga dha Mulugu, iyo nnowenjhedhedha odhivela wehu wodhela makalelo Yehova anubuweliye, vamodha ni malagano aye. Iyo nnolibiha odhivela wula nonaga ohiyana olivo wodhela ale enawiwelela malagano a Yehova ni ale yahinawiwelela. Kasugwa makathamiho enafwanya athu wodhela okodda enonelo ya Mulugu. Vano kubuwela makalelo egumawo eliwa yapama mwaha omwiwelela Yehova. (Sal. 32:8, 10) Enonelo ya Yehova eli vanenevene, mbwenye oliye kanawaddihedha athu wihina erumedhe. Teto oliye kanakuwa makathamiho enadhela mwaha okoodda enonelo yaye. (Pro. 1:29-32) Aliwa “enere ofwanyiwa makathamiho wodhela dhowera dhewa.” Makalelo ewa owerana dhithudha, dhinerege watatamulela makathamiho, ni goyi, ofiyedha oyelela egumi yewa. Teto livuru na Provérbios 1:33 enowawoga mareliho enaakanne ale eniwelela enonelo ya Yehova ni eparihedhaga mabasa mwigumini mwewa. ‘Ole angivuruwana anere okalawo nubareleya ni anerege okalawo ahovile ethu-sithu.’ w22.10 epaddi 21 ddima 11-13

Omova Yehova enatapulela muriha vanlubale, neeragana dhatedhene wihina nahimuukule. (Pro. 16:6) Bumwahaya nigiilibihedhaga wihina nawiwelele malagano a Yehova wodhela ele eli yapama ni yabure ahiiliye mBibiliyani. (2 Cor. 7:1) Mwebarbarene nnere ohagalala nerana dhatedhene Yehova anadhiveliwiye ni oherana ndhe aniiddiye. (Sal. 37:27; 97:10; Rom. 12:9) Muthu podi onona wihina Yehova baahi dinna ofuru wonadddela ele eli yapama ni yabure, mbwenye oliye onohowela wonelamo wihina onofwanelela wawiwelela malagano a Mulugu. (Rom. 12:2) Wodhela dhowera dhehu, iyo nnowoniha wi nnorumedha wihina wawiwelela malagano a Yehova makalelo apama ookalawo. (Pro. 12:28) David ubuwela ndo, oliye ohuwoga wodhela Yehova egi: ‘Nyu monogaddela dila yegumi. Vamentoni veenyu vihikala ohagalala. Ohagalala ori moono weenyu woojha, malabo amatene.’ — Sal. 16:11. w22.10 epaddi 8 ddima 9-10

Yesu kanahiyege okanna monelo wapama wodhela emuthu yaye ni okala owiyeviha. Yesu ahinathi odha ela yela yavati, ahikanna ofuru wopara dhithu dhathima wula amulabelaga Yehova. Bibliya anihina ‘wodhela oliye, dhihipaddusiwa dhego dhimodha odhulu ni dha elabo yavati.’ (Col. 1:16) Labo abaddiziwaga, Yesu ahubuwela dhithu dhatedhene apanriye agaari vamodha ni Ababe. (Mat. 3:16; João 17:5) Mbwenye Yesu kithukule nuwubuwela dhithu dhapama eriliyena. Ebaribariya sowihina kanubuwelege wihina oliye dathima wapitha athu amodha. Oliye ahawaddela anamaharaye egi: ‘Mwaana muthu kadhele olabiwa, mbwenye adhele olaba ni ovelela egumi yaye wi awobole anamwinjhi’ (Mat. 20:28) Oliye ohoniha wiyeviha waye, nuwonelamo wihina kavo ethu afwaneleliye werana. Mohanganyedha, Yesu aari muthu owiyeviha vanlubale! Ohunihiyedha yotajhiha yapama. w22.05 epaddi 24 ddima 13

Ethu Yehova anathabwiye osugwa, fuunona akala muthu ole atheegile yapudhave. Yesu kakuwile muselu ola awogaga madhu enafwanyeya va Lukaji 12:47, 48. Muthu amukunga porogarama wihina erena ethu yabure anonniye wi Yehova onokoddiha, oliye annawerana yothega enlubale. Muthu ola podi ohufwanelela oleveleliwa ni Yehova. (Mar. 3:29; João 9:41) Naarive dhigari ndo, iyo podi oleveleliwa? Hee! Akala ethu Yehova anathabwiye osugwa, fuwoona akala mwebaribarene muthu ole ohuthwaruwa ni murima wamutene. Wihina oonihe wi ohuthwaruwa enohoweleya osaddula mubuwelo waye, ekalelo obe efunelo anna muthuya. Eyo enowoneya akala muthu ola anakubanya vanlubale mwaha wowerana ethu yabure obe mwaha wowihiya werana ethu ahoweliye werana. Muthu athwaruwe ni murima wamutene kanakubanya baahi mwaha yothega eriliyena, mbwenye mwaha wohiya wandana waye ni Yehova othembwa ofiyedha werana ethu yabure. w22.06 epaddi 5-6 ddima 15-17

Amwiddani ehu enovuwiha dhowoota ni muselu dhimodha wodhela addibila munikuruni na Yehova. (Sal. 31:13) Addibila amodha ehivolosihiwa mukambura yinkedhiwaga wihina apanga. Mbwenye eyo kinantikiniha mwaha kale makiristawu yahifwanyiwa makathamiho mamodhave. Murumiwi Pawulo ahiinkedhiwa ahinna muladdu ofiyedha ovolosihiwa mukambura ahinna muladdu. Makiristawu mamodha yahihiya omukavihera. (2 Tim. 1:8, 15; 2:8, 9) Kubuwela makalelo aali Pawulo. Oliye ahifwanyiwa makathamiho owinjhiva ofiyedha weka egumi yaye vang’ovini wodhela addibila ale. (At. 20:18-21; 2 Cor. 1:8) Mwebaribarene kannafuna okala ninga addibila ale yamusukumme Pawulo. Bumwahaya kahiyo yootikina wihina Saddana dinathabwa waharahara ale enna mutholo mmulogoni. Anafuniye sowihina addibila ala ehiye okala oororomeleya wa Yehova. Ohiya eyo oliye onoofuna wihina nikale ookwerebeyene ni owovene. (1 Ped. 5:8) Kanihiye woova onigonjhiha ofiyedha ohiya wakavihera addibila enaharahariwa. — 2 Timóteo 1:16-18. w22.11 epaddi 16-17 ddima 8-11

Mpanga ole athwaruwe, podi wera aali mu Judewu. Majudewu yamulabela Mulugu mmodha baahi, mbwenye athu amalogo yowarumedha amulugu owinjhiva. (Êxo. 20:2, 3; 1 Cor. 8:5, 6) Mulobwana ole ahere ahikala muJudewu, podi wera eere owoga egihina, ‘We kunawova amulugu?’ Ethu emodha enoniha wihina mulobwana ole aali mu Judewu sowihina Yesu karumiwe vaari va athu a malogo, mbwenye wa ‘mambila erimele aamwaana Ezarayeli.’ (Mat. 15:24) Ninga mu Judewu mulobwana ole ahinona wihina Yehova ahapaganya amwaana Ezarayeli wihina anere wavenyiha anookwa. Teto, madhu awogiliye ni Yesu enowoniha wihina oliye ahinona wi Yehova eere onvenyiha Yesu wi athongege mumweneni wodhulu, ninga enonihiwa podi wera mulobwana ole ahikanna ebaribari wi eere ovenyihiwa. Mwaha wokala mu Judewu mpanga ole ahinona yopadduwa ya Adawu ni Eva vamodha ni parayizu Yehova ampaddusiliye. Vano nuwawiwa madhu a Yesu, podi wera mulobwana ole omubuwela parayizu owoma mwilaboni yela ya vati. — Gén. 2:15. w22.12 epaddi 8-9 ddima 2-3

Iyo nnanda olaleya nnikavihero na muzimu wotxena. Mwahaya bwaddi? Mwaha Saddana anowana ni iyo ni anafuna anihihe olaleya. (Apo. 12:17) Vamentoni vaathu iyo podi okalaga ninga kaavo ananibarela mwilaboni ela ya Saddana. Mbwenye wodhela mabasa oolaleya iyo ninna omugonjhiha Saddana! (Apo. 12:9-11) Nimakalelo baani? Naaparaga mabasa oolaleya nnowoniha wi kannoova dhoweha dha Saddana. Mudhidhi wamutene nalaleyaga ninna omugonjhiha. Eyo enowoniha wi Yehova anonirumedha vamentoni vaye ni anonikavihera ni muzimu waye wotxena. (Mat. 5:10-12; 1 Ped. 4:14) Enoniroromeliha wihina muzimu wotxena onere onlibiha wihina nande wagonjhiha makathamiho bi makathamiho nnafwanyiwihu mmalaleyelo. (2 Cor. 4:7-9) Ki ethu baani nnahowelihu werana wihina nidhowegeve naakelaga muzimu wotxena wa Mulugu? Nnohowela olobela mudhidhi wamutene, nroromelaga wihina Yehova anere onivuruwana ni anere onivaha muzimu waye. w22.11 epaddi 5 ddima 10-11

Makalelo mamodha ootonyihedha wi nnowadhivela addibila ni arogola fuwilibihedha okanna murenddele ni aliwa. Yehova tajhiha yinlubale wodhela olevelela ni iyowa nnohariha yotajhiha yaye. Akala Yehova ahifiyedha onvaha mwanaye wihina anoobole, ki iyo, kannafwanelela walevelela addibilihu? Kannafuna nikale ninga mudhaari ole abure asorihiwe va yoladdaniha ya Yesu. Naarive nabuye agamulevelele mangawu manlubale anniyena oliye kaamulevelele mukwaye aanna mangawu mang’ono baahi. (Mat. 18:23-35) Akala ohukanna muladdu ni ddibila mmodha mmulogoni, ononamo aavi omuloba nikurumuwelo nihinafiye labo nowubuwela okwa wa Yesu? (Mat. 5:23, 24) Werana ndo onotonyihedha wi onomudhivela Yehova vamodha ni Yesu. w23.01 epaddi 29 ddima 8-9

Makalelo mamodha owonelamo dhithu addibila enahoweliwa, fuudhela wawerana makoho ohalupile manddile ewa. (Pro. 20:5) Ninga motajhiha, aliwa ehikanna dhoojha, murombwe obe dhithu dhimodha? Aliwa ehanle nenaa wihina eyelele mabasiwa obe nyumbadhiwa? Enohowela nikavihero nanamathonga? Yehova anajheha wi iyo aatene nalibihege amodha. (Gál. 6:10) Naarive nigerilena ethu eng’ono wihina nimukaviherena muredda, eyo podi omulibiha vanlubale. Ahima podi oleba dezenyu obe omwinviyarela karta wihina emulibihe ddibila. Ddibila ahoowelaga nikavihero muzombwe podi wivahedha wihina amukavihere ogula dhithu omerkado obe werana dhithu dhimodha. Amodha podi wegeredha dhoojha wihina yanvahe muredda vadevaye. Addibila amodha enowawinviyarela makarta wihina yatamalele mabasa anamaholela yapariliwa vaari va mutipa, ‘sapama navenyihanaga ni nalibihanaga mmodha ni mukwaye’! — 1 Tes. 5:11. w22.12 epaddi 22 ddima 2; w22.12 epaddi 23 ddima 5, 6

Asadusewu yahanona pamadhene malivuru matanu a dholebela dha Ebarayiko, mbwenye aliwa kiyarumedha dhibaribari dhathima dhaali mmalivuruni mune. Motajhiha, kasugwa awogile Yesu, aSadusewu nuuxixa omweha emukohaga wodhela ovenyihiwa wanookwa. Yesu awoga naaliwa egi: ‘Wodhela anookwa enaavenyihiwe, nyu kamwilerile mulivuruni na Moyizeji, epaddi enawoga wodhela nikupu, Mulugu awogiliye egi: ‘Miyo gili Mulugu Abarawu, Mulugu a Izaki ni Mulugu a Jako’?’ (Mar. 12:18, 26) Mwebaribarene Asadusewu yahileri yopadduwa ela dila dhowinjhivadhene. Mbwenye, madhu awogile Yesu yahoniha wihina Asadusewu yahihiya ohara ebaribari ela yawoga wodhela ovenyihiwa wanookwa. (Luc. 20:38) Nnahudhera ddi? Namwilerigi Bibiliya nnohowela opwasedha pamadhene wihina noone makalelo yopadduwa ela enanihudhihiwa. Teto, namwilerigi Bibiliya kahiwihina nnafuna nonelemo nde dhili dhokweya, mbwenye, nnohowela wonelamo dhibaribari dhoviteya ni malagano. Dhibaribari nda dhili ninga dhoviteya dhomuzimuni, mwaha dhinorusa ofwanya. w23.02 epaddi 11 ddima 9-10

Anamoona aatene yala esorihiwe va yolebela ya peeno ehifwanyiwa makathamiho oorusa mwigumini mwewa, naarive dhigaari ndo, aliwa okalave oororomeleya wa Yehova. (Heb. 11:36-40) Neerege ovilela wewa ni mabasa yapanriwa ehikanna mabasa? Hee ehikanna! Naarive aliwa ehikanlewo yaka dhowinjhivadhene, wihina yoone mpaganyo dha Yehova dhakwanelaga, yahidhowave emuroromelaga Yehova. Ohiya eyo, adhaari ala oororomeleya yahikanna ebaribari wihina yorumedhiwa vamentoni va Yehova, bumwahaya kiyanganyedha wi egahona mpaganyo dha Yehova dhakwanelaga osogolo. (Heb. 11: 4, 5) Yotajhiha yewa, enonikavihera iyo omuroromela pamadhene Yehova. Elabo nnakalihu enna othabwa wopiha kadda labo. (2 Tim. 3:13) Saddana kanaamarihe mabasaye oowaweha adhaari a Yehova. Nnere ofwanyiwa dhoweha dhowinjhiva osogolo. Naarive dhigari ndo, niikome okala oororomeleya wa Yehova, nroromelaga wihina ‘ejhehero yehu enaadhela wa Mulugu ookalawo.’ — 1 Tim. 4:10. w22.06 epaddi 25 ddima 17- 18

Nihikanna dhithu dhowinjhiva dhinanithukulela okanna egumi yapama. Emodha sowihina niilibihedha osamalela egumi yehu, nnere omuthithimiha Yehova. (Mar. 12:30) Bumwahaya, kannafuna werana ethu sithu yatatamulele makathamiho egumi yehu. (Rom. 12:1) Ebaribari wihina naarive nilibiheraga wihina nikanne egumi yapama iyo podi okala aredda. Mbwenye, nnafuna nerena ele nnandihu wihina nikanne egumi yapama. Nerana ndo nnere omoniha Yehova wihina nnovaha thima egumi. Podi wera mwaha wuluvala, obe oredda, kannawedha werana nde neeresihuna kale. Dhithu ninga dhendha podi onuukula. Mbwenye, naarive dhigari ndo, kannahowela ohiya osamalela egumi yehu. Mwahaya bwaddi? Mwaha kinapwatha yaka ngasi ninnihuna obe makalelo eli egumi yehu, iyo aatene podi omuthithimiha Yehova ninga mwene Davidi. Sohagalasa onona wi Mulugu ononidhivela naarive nihilogomane. (Mat. 10:29-31) Teto, naarive nikwe, Yehova anere okanna munukwela woonivenyiha. (Jó 14:14, 15) Vano nilihu mento, nnafuna nerena dhatedhene nnandihu wihina nisamalele egumi yehu. w23.02 epaddi 20-21 ddima 3-5

Muthithi waathu enoniwe ninga mambila mamodha Armajedo avira mandina ewa enerege ofwanyeya mu livuruni na egumi? Hee. (Apo. 7:14) Yesu ohuwoga egi ale enaladdanihiwa ni mambila ‘yere wakela egumi yamukalakala.’ (Mat. 25:46) Mbwenye aliwa kinakele egumi ya mukalakala ohoseya winlubale wavira. Muwari mwa onamathonga wa Yaka Txikwi, Yesu ‘anere wukukulani ni anere wuthukulelani vantxelani negumi.’ Ale eniwelele dhoholela dha Yesu, ni enakale oororomeleya vamentoni va Yehova, mandina ewa enere olebiwa ni, mukalakala mulivuruni neegumi. (Apo. 7:16, 17) Mbwenye mbuzi ennatolosiwe mu koddo ya armajedon. Yesu ohuwoga egi: ‘Ala enere ogujhuliwa ni mukalakala.’ (Mat. 25:46) Nuvetheliwa, murumiwi Pawulo oliye owoga egi: ‘Ala enere woona goyi mwaha osinyusiwa wodhela ogujhuliwa ni mukalakala.’ — 2 Tes. 1:9; 2 Ped 2:9. w22.09 epaddi 16 ddima 7-8

Emudhi yaatene yaajaga mudhidhi wihina ependde dhopaddusa, enohagalala ni enokala otapuwene. Teto, eyo enolibiha wandana weemudhi. Yehova ohupaddusa mburo wothabwa owoma wihina nithamagegemo, nikubuwege, naredhegemo ni werana dhithu dhimodha nnadhiveliwihu. Dhimudhi dhowinjhiva, dhinodhiveliwa waredha vamodha murudda dhokokolani, omwangoni ni sere-sere ya niya. Mwilaboni exa, ababi vamodha ni aniwa, enere ojhavo dhopaddusa dha Yehova ni mukalakala. Mudhidhi oyo wafiya, kannawovege anenyama ni aliwa kinanovege. (Isa. 11:6-9) Nnere okanna mudhidhi watene wihina nitikine ni naredhena dhopaddusa dha Yehova. (Sal. 22:26) Mbwenye, sathima ababi wakongomedha aniwa otikina dhopaddusa dha Yehova obajha ovanene. Ababi yalabihedhaga dhopaddusa wihina yahudhihena aniwa, podi wera aliwa enere orumedha ele awogile mwene Davidi egihina: ‘Oo Yehova newene kawo mabasa enaligana ni enyu.’ — Sal. 86:8. w23.03 epaddi 25 ddima 16-17