Outubro

Aatene iyo, podi werana epaddiihu omutugumanoni wodhela wiiba jhibo ni ndhu nootaama, ni ovaha dhowakula dhowegeredheya pamadhene. Amodha enowarusa wiiba obe ovaha dhowakula dhewa omutugumanoni. Akala siyeyo enupadduwela, osayele onona ethu yakavihere amodha ogonjhiha woova wula. Motajhiha, ethu yakaviherile addibila amodha ogonjhiha woova wiiba fuwiba ni murima wamuteene. Niibaga omutugumanoni, efunelo yehu ekalege onvuwiha Yehova. Wegeredhege jhibo ohinathi odhowa omutugumanoni ni osugwege makalelo jhiboya eniwanana ni muselu onaawogiwe omutugumanoni. Teto, wapwasedhe madhuya ohiya makalelo onibiwe. Wa athu amodha podi okala ethu yorusa ovaha dhowakula dhewa omutugumanoni. Ddiniyani enukavihere? Malabo amatene wakala omutugmanoni ovenyihege mada wihina ovahe yowakula yawo. Yowakulaya podi okala yokweya mbwenye owogaga thomoya. Kuddiwale, Yehova anohagalala vanlubale ni efunelo yehu yonvuwiha nakala omutugumanoni. w22.04 epaddi 7-8 ddima 12-15

Madhu owi “namakavihera” anagiwana muthu anathamaga wihina amukavihera ole anahowela nikavihero. Kamubuwele Yehova athamagaga wihina amukavihere ole ali vang’ovini. Mwebaribarene epaddi ela enowiwanana ni Yehova. Oliye onofuna vanlubale okala namakavihera ehu. Nnikavihero na Yehova iyo nnere wanda ogonjhiha ethu-sithu ni ohagalala. Nimakalelo baani Yehova ananikaviheriye? Wihina naakule nikoho nna, nnere woona dhipaddi ngaasi-ngaasi na livuru na Izayiya. Mwahaya bwaddi? Mwaha dhovuhulela dhowinjhiva Izayiya alebeliiye dhinonikavihera iyo peeno. Ohiya eyo, dila dhowinjhivadhene Izayiya ahileba wodhela Yehova nimakalelo okweya wonelamo. Motajhiha kasugwa kapitulu 30 ya Izayiya, vala namavuhulela Izayiya ahilabihedha dholaddaniha dhowinjhiva dhinanikavihera wonelamo makalelo Yehova anasamaleliye nlogo naaye. Oliye onowerana eyo (1) wodhela wavuruwana malobelo ehu ni wawakula, (2) wodhela onivaha dhoholela, (3) wodhela onreeliha ovanene ni osogolo. w22.11 epaddi 8 ddima 2-3

Awogaga ni mulogo wo Esmirna ni wo Filadelfiya, Yesu owoga ni addibila wihina yahove mwaha woharahariwa, mwaha Yehova eere wareeliha yakalave oororomeleya wa Yehova. (Apo. 3:10) Nnere woonihiwa goyi mwaha woharahariwa, teto nnohowela wiwegeredha ovanene wodhela muselu yoyo. (Mat. 24:9, 13; 2 Cor. 12:10) Livuru na Apocalipse nnihina nlogo na Mulugu neerege oharahariwa malabo yala a peeno obe neere ‘labo Nanabwiya.’ (Apo. 3:10) Apocalipse kapitulu 12 anihina Yesu nukala mwene owana ni Saddana vamodha ni ademoniyu aye. (Apo. 12:7, 8) Amwiddani ala a Mulugu ehigonjhihiwa ni wigareliwa elabo yavati, bumwahaya mwilaboni mukala goyi enlubale. — Apo. 12:9, 12. w22.05 epaddi 5 ddima 12-13

Yehova, Mulugu ahinna nsakulo. Makalelo aye otoriha bowogowa. Yehova amulevelela muthu, oliye kanasugwa mwiili waye, dhoorela dhaye, dhithu dhinonniye werana, newene akala muthuya doovuwa. (1 Sam. 16:7; Tia. 2:1-4) Iyo kannamuwaddihedha Yehova werana ethu, newene kannamuleketha. Yehova athoma ethu siyene, kavo anamwihiha. (Êxo. 34:7) Iyo kananganyedha wi kawo namatoriha apama omukwaranya Yehova, mwaha oliye ohunona dhatedhene wodhela emuthu yehu ni dhithu dhinanipadduwela. (Deut. 32:4) Dholebela dha Ebarayiku dhinowoniha wihina olevelela wa Yehova kawinaligana ni muthu mmodha. Dila dhimodha ehilabiheriwa madhu Ebarayiku mowiwanana ni Disiyonariyu amBibliyani enathabwa olabiheriwa madhu ala wihina “etapulele makalelo Mulugu analeveleliye ale emuthegele. Madhu ala kinatapulela makalelo muthu oomwiilini anamuleveleliye mukwaye, enna manddile mohiyana ni Mulugu.” Yehova baahi, dinna kopolo yomulevelela muthu athegile mbwenye athwaruwile. w22.06 epaddi 4 ddima 10-11

Akala we onalela anawo weka, obe mamuno kahiyo mukiristawu, onaaddiwale wihina yotajhiha yawo ya nroromelo enowalibiha addibila owinjhiva. Ki to akala onowilibihera omuhudhiha mwanawo dhithu dhomuzimuni, mbwenye oliye kanapwatha? Kuddiwale wihina omuhudhiha mwaana podi omala yakadhene. We waala thanga kunakanna ebaribari akala onere okala muthanko onavahege dhowima. We kunonne akala muthanko ole onere wunnuwa obe naari. Naarive dhigarive ndo, we onerege ohelave manjhe muthanko ole wula weragana epaddi yawo wihina muthanko ole wunnuwe. (Mar. 4:26-29) Ni makalelo mamodhave, mayi podi wambela wanganyedha akala wilibihera waye onowakavihera anaaye obe naari. We kunonne akala mwanawo anere omulabela Yehova obe naari. Mbwenye we weragana epaddi yawo wihina omukavihere mwanawo ohudhera ebaribari, onere wakavihera epaddi yewa yomuzimuni. w22.04 epaddi 19-20 ddima 16-17

Mudhidhi Salomawu amulabeleyi Yehova ni murimwaye wamutene, ahikanna monelo wapama wodhela emuthwaye. Bumwahaya, oliye agaari muzombwe, ahonelamo wihina dhithu dhimodha kanonne ni ahiloba nikavihero na Yehova. (1 Reis 3:7-9) Mbwenye nuwambela othonga, Salomawu ahinona makathamiho baani enakumelela mwaha wowithukula. Yawukulihaya sowi, nuvira mudhidhi Salomawu oddiwala ovirihamo yolaga yaye. Oliye wambela withukula ofiyedha walupa malamulo a Mulugu. Motajhiha, nlamulo nimodha nawoga wihina mamwene aamwana Ezarayeli, kiyatele ahiyana owinjhiva wihina murima wewa onadha opupuruwe. (Deut. 17:17) Salomawu olupa nlamulo nna yapudhave, ofiyera watela ahiyana 700 ni ahiyana 300 owaweddana! (1 Reis 11:1-3) Podi wera Salomawu ubuwela wi dhatedhene dhanna omweddela pama, teto eyo kiyaamutotele makathamiho. Mbwenye wahifiya mudhidhi, Salomawu afwanyiwiye makathamiho owinjhiva mwaha wohimwiwelela Yehova. — 1 Reis 11:9-13. w22.05 epaddi 23 ddima 12

Kadda muthu onohowela werana yothoma yathima. Omukavihera Yehova Mulugu ninga namathonga a elabo yatene, obe okala epaddi wamwiddani aye abure, Saddana Diyabo? Dhiriwo dhosakula ndha biili baahi. Kadda muthu anofwanelela osakula epaddi anafuniye okalawo, mwaha yothoma ela enere omuthukulela muthu okanna egumi obe okwa. (Mat. 25:31-33, 46) Muwari mwa ‘yohoseya enlubale,’ athu enere ogawiwa, akala enere ovulusiwa obe enere okwa. (Apo. 7:14; 14:9-11; Eze. 9:4, 6) Akala we osakunle okavihera onamathonga wa Yehova, oherana yothoma yapama. Mwebaribarene, onofuna wakavihera athu owinjhiva osakula ethu yapama. Ale eri oororomeleya wa Yehova eneere wawakela mareliho. Ola muselu wathima nnafwanelelihu ohudhera. Mwaha nerana yeyo, nnere wanda okalave txithi wihina nikale oororomeleya wa Yehova. Ohiya eyo, iyo podi olabihera ndhe nihudherihu wihina naakaviherena amodha werana yothoma yapama ni odidelave omulabela Yehova. w22.05 epaddi 15 ddima 1-2

Nnohowela ovuruwana pamadhene ndhe Yehova anawogiye, waahiya amwiddanihu. Jo ahinvuruwana pamadhene Yehova mudhidhi awogaga nuliye. Yehova opendda nuliye, yakala ninga awoga egi: ‘Miyo gihinona dhithu dhatedhene dhinupadduwela mwigumini mwawo. We onoonamo wi kaginande wukabelela?’ Jo wakula nuwiyeviha ni otamalela wodhela opama wa Yehova. Oliye anihina: ‘Gihiwa ewogiwaga wodhela nyu, mbwenye vano, ginna wuwoonani ni mento aaga.’ (Jó 42:5) We ohunonawo wego aariwo Jo aawogaga madhu yala? Oliye aakirante vanddorani, mwiili waye ogaari makwaddave. Mbwenye Yehova owoga wi oomudhivela vanlubale Jo ni oomurumedha vamentoni vaye. (Jó 42:7, 8) Peeno, athu podi onruwanaga ni oneddiha ni makalelo abure. Aliwa podi oxixa otakaliha emuthu yehu ni nikuru nehu. Yopadduwa ya Jo enanihudhiha wi Yehova anororomela wi nnere okala oororomeleya naafwanyiwaga makathamiho. w22.06 epaddi 24 ddima 15- 16

Ogujhuliwa wa Babiloniya munddimuwa onere wahagalasa angero odhulu. (Apo. 19:1-3) Ethu emodhaya enaadhihe ohagalala bi ‘matelo a Nimbila,’ ola bumutomaya onasoriha livuru na Apocalipse. Nihinona wi atene yale enakosa epaddi ya 144 000, enaakale odhulu wihina ewanihe koddo ya Armajedo. Mbwenye matelo ala kinereye mudhidhi yola. (Apo. 21:1, 2) Matelo a Nimbila, enereye yavira koddo ya Armajedo ni yapiwa amwiddani atene a Mulugu. (Sal. 45:3, 4, 13-17) Matelo a Nimbila yereyaga enaapadduwe ddi? Vamateloni enomugumaniha mulobwana ni muhiyana. Ni makalelo, mamodhave, matelo a Nimbila enere omugumaniha Mwene, Yesu Kiristu, nnamwalaye eri a 144 000. Yopadduwa ela yathima, enere otikitedha Omwene muxa onaakabelele elabo yavati muwari mwa yaka 1 000. — Apo. 20:6. w22.05 epaddi 17 ddima 11-13

Yesu ahiwoga wihina malabo okuthula eere omuthoma ‘mudhaari orolomeleya ni athotho’ wihina avahege nikuru na Yehova yojha yomuzimuni. (Mat. 24:45) Teto siyeyo enapadduwa peeno, mwenihu Yesu onolabihedha nikuru ning’ono na addibila oothikitheriwa wihina enivahe ‘yojha yomuzimuni mudhidhi wofwanelela.’ Ni dhikalawo dhithu dhimodha dhathima, alobwana ala kiniwona ninga annya anroromelo naaddibila. (2 Cor. 1:24) ohiya eyo aliwa ehinona wi Yesu kiristu di mwene anaholela nlogo na Yehova. (Isa. 55:4) Obajha yaka ya 1919 mudhaari ororomeleya ni athotho anna wegeredha dhoojha wi akavihere athu enna efunelo yohudhera ebaribari wodhela Yehova. Yaka ya 1921 okumihiwa livuru Arpa de Deus nakavihere athu owinjhiva ohudhera ebaribari ya mBibliyani, nuuvira mudhidhi yahisasanyiwa malivuru mamodha. Livuru baani nuukavihere omunona Yehova? w22.07 epaddi 10 ddima 9-10

Yehova Mulugu anathabwa ovaha. Kinapwatha ethu baani oyeleliwe wihina omulabele oliye, Yehova, anere wureeliha okunamo. (Mar. 10:29, 30) Oliye anere wuvaha egumi yapama ni yohagalasa wahinakannigiwe, naarive okalaga elabo yela ehanle nenaa nufiya omakuthulo. Teto, wula fumabajhowene. We podi odhowagave omulabelaga Yehova, malabo aamatene. Teto, odhivela onniwena ni oliye onerege odhowave wunnuwaga ni onere okala mwilaboni exa vamodha ni oliye. Wavelela egumi yawo wa Yehova ni wabaddiziwa, onokanna gari yonvaha Yehova ethu yathima. Teto, dhithu dhatedhene dhathima wanniwena dhaali nvaho wa Yehova. Ninga makalelo ohogolosa, we podi onvaha Mulugu apaddunse elabo yodhulu ni yavati ethu ahinniyena nikalaga ororomeleya wa oliye ni omulabela ni murimihu wamutene. (Jó 1:8; 41:11; Pro. 27:11) Mwebaribarene, ala makalelo olabihedha pama egumi yehu! w23.03 epaddi 6 ddima 16-17

Wakala muzombwe, nthakwithakwi yomugoniha muthu enothabwa wenjhedhedheya. We podi otujeliwaga naakwawo wihina wawerena mararuwo. Siyeyo saddana anafuniye wihina weregena. Enukavihere ddi wihina wahimothele mmurakoni muna? (1 Tes. 4:3, 4) Walobelaga wa Yehova oofugulelege murima wawo ni omwaddelege dhatedhene dhinupadduwela. Owogege ebaribari ni omulobe wihina uvahe kopolo. (Mat. 6:13) Ni kuddiwale wi Yehova kanafuna wutoriha, mbwenye anafuna ukavihere. (Sal. 103:13, 14) Wafwanyiwa makathamiho kukalege oomaleyene. Wawaddele makolo awo dhithu dhinupadduwela. Ebaribari wi enorusa othapanya ni makolwihu dhithu dhinanipadduwela mwigumini mwehu, mbwenye sofuneya. Wamwilerigi Bibiliya ni wapenddaga malagano onafwanyiwe, enere okweye werana yothoma enaamuhagalase Yehova. Onere woonelamo wihina kunahowela waddeliwa wafunaga werana yothoma mwigumini mwawo. Mwaha onerege wonelamo makalelo Yehova anubuweliye wodhela muselu yoyo. w22.08 epaddi 5 ddima 10-12

Mulobwana ari musolo wemudhi kanapwaza mutholo waye wosapela muralaye. Akala ori musolo wemudhi. Podi wera wahithuwathuwa vanlubale mwaha ohanda osapela murala wawo ni ohanda oliva nyumba munalugarinyu. Akala ohayelela mabasa podi wera onowoova ohafwanya mabasa mamodha. Obe onowoova ojajaliha egumawo ni okalawo ni korowa vag’onove. Saddana anolabihera woova wula ni ohanda wathukulela amodhaya ohiya omulabela Yehova. Saddana anafuna nrumedhege wi Yehova kanandhivela ni kanaanikavihere okabelela murala wehu epaddi yomwiilini. Mwaha wa yeyo, iyo podi wubuwela ayi, gaahikoma ginowayelela mabasaga, eyo podi onthukulela waviriganiha malamulo a Mulugu. w22.06 epaddi 15 ddima 5-6

Iyo nihinona wi Yehova ‘Mulugu athagaraga ni oohaguvela onyanyuwa, oojheha, anna odhivela ohunamala ni eebaribari.’ (Éxo. 34:6) Ohiya yeyove Yehova oono odhiveliwa opama. (Isa. 61:8) Oliye asugwaga goyi nnonihu, nuliyeya enonpiha mbani. Yehova onoojhehera mudhidhi owamariha makathamiho amatene. (Jer. 29:11) Iyo nnojhehera mudhidhi yoyo dhithudha dhinapadduwiwa. Si dhithu dhendha dhinanithukulela omudhivela vanlubale Yehova! Dhithu dhimodha dhinanithukulela iyovano odhivela ebaribari ddi? Ebaribari enonivaha ejhehedhelo yosogolo, teto eyo enosaddula egumihu. Ndala ninga ankora anamulibiha baruku vamburonivaye, mudhidhi afwanyiwa nipevo ninlubale, ejhehedhelo yehu ninnihuna enakumela mBibiliyani enere onikavihera ovilela naafwanyiwaga makathamiho. Yolebela ya peeno murumiwi Pawulo awooga wodhela ejhehedhelo enna makiristawu othikitheriwa enafuna odhowa odhulu. Mbwenye madhu ala, enovolowela ni makiristawu enna ejhehedhelo yokala ni mukalakala mparayizu mwilaboni yavati. (João 3:16) Ejhehedhelo ninnihuna yokalawo ni mukalakala mwilaboni yavati enonihagalasa mwigumini mwehu. w22.08 epaddi 14-15 ddima 3-5

Ethu enanthukulela iyo waroromela addibilihu fudhivela. Livuru na 1 Coríntios kapitulu 13 nnowoga makalelo odhivela winanikaviheriwa waroromela athu amodha obe ohogolowela omuroromela muthu uwukunle. (1 Cor. 13: 4-8) Motajhiha, versu 4 anihina: ‘Odhivela winoovilela ni fwapama.’ Yehova onovilela ni iyo, naarive nithegaga. Bumwahaya ni iyowa nnohowela okala ovilela naaddibilihu yerana ethu nahidhiveliwihu obe enipihile murima. Versu 5 anowogave egihina: ‘[Odhivela] kunapujha. Ni kunna ntxiga.’ Mwaha odhivela ‘kannakoya ntxiga’ obe kanubuwelege dhoviriganiha addibila enerenliwa. Eclesiastes 7:9 anihina ‘kaninyanyuwege bure-bure.’ Ohiya onyanyuwaga bure-bure! Oxixe wawona ni makalelo Yehova anawoniye. Yehova onowadhivela addibilihu, bumwahaya kanathabwa osugwa dhothega dhewa. Ni iyowa nnohowela werana emodhave. (Sal. 130:3) Ohiya osugweraga dhoviriganiha dhewa nnohowela osugwa dhikalelo dhapama enniwana. — Mat. 7: 1-5. w22.09 epaddi 4-5 ddima 6-7

Livuru na Daniyeli nnoosoriha makalelo dhithudha dhinereyiwa osogolo. Motajhiha, Daniel 12:1 Anowoga wi Migeli ali Yesu Kiristu ali owimelene, ‘wihina abarele nlogo na [Mulugu].’ Epaddi ela ya yovuhulela yambele wakwanela yaka ya 1914 Yesu nuukala mwene. Mbwenye Daniyeli ohusoriha egi Yesu anere ‘ovenya’ mudhidhi ‘worusa wahinakalegewo wambela wibanjhe okalawo malogo ofiyedha mudhidhi yole.’ Mudhidhi ola ‘worusa’ winatapulela ‘ohoseya winlubale’ winasorihiwa va Mateus 24:21. Yesu anere ovenya wihina abarele nlogo na Mulugu. Oliye anere werana eyo omakuthulo wa malabo ala oorusa, obe mudhidhi wa Armajedo. Livuru na Apokalipisi ‘nnowoga wodhela nlogo na Mulugu ninga muthithi munlubale enakuma muhoseyani winlubale.’— Apo. 7:9, 14. w22.09 epaddi 21 ddima 4-5

Eyo enatapulela wihina mandina elebiwe mulivuruni neegumi podi othimihiwamo, enakala ninga Yehova analabihedha lapiji wihina alebena mandina ayo. (Apo. 3:5, nota.) Nnohowela werana dhatedhene wihina ndina nehu nikalegemove mulivuruni neegumi obe ofiyedha olebiwa ni kaneta ni makalelo yayo kannadha nthimihiwaga. Ale elebiwe mandina ewa mulivuruni neegumi Baani alebiwe ndina naaye mulivuruni na egumi? Nnere wawoga makuru matanu ni nnere woona nikuru baani ninna mandina mulivuruni na egumi baale esakuliwe ni Yesu wihina yathongege nuliye odhulu. Mowiwanana ni murumiwi Pawulo ‘awogiliye ni addibila’ oFilipo, mandina aale eli othikitheliwa ehilebiwa mu livuruni neegumi. (Fil. 4:3) Mbwenye aliwa enohowela okala oororomeleya, wihina mandina ewa yahithimihiwemo mu livuruni neegumi. Alobwana ala othikitheliwa enalebiwe mandina ewa ni mukalakala yamala wakela selu yogomihedha. Selu ela aliwa podi wakela yahinathi okwa obe ohoseya winlubale wahinabajhe. — Apo. 7:3. w22.09 epaddi 14 ddima 3; epaddi 15 ddima 5-6

Wawilerigi madhu a mulugu, waajege mudhidhi wihina olawihe ndhe onahudheriwe. Motajhiha, kamubuwele muthu agapiile yojha onadhiveliwiwe. Mbwenye mwaha waguva ni othuwathuwa, dhojhadha dhimodha we omidhaga ndo wahitakune. Numala ojha we woona wihina wera othabwa waguviha ojhawa, vano we othwaruwa mwaha ohiithalela pama ojha wule ni woona makalelo enadhiviwa yojha ele. Enowupadduwelaga we omwileri Bibiliya mowaguva wahilawihile yojha ela yomuzimuni ananivaha Yehova? Waaje mudhidhi wihina walawihe madhu a Mulugu ali Bibiliya; Wodhela wubuwela ndhe onileriwe, ovuruwanaga ndhu, ni dhinapadduwa vamodha opendda ndhe onileriwe. Werana ndo onere ohagalala vanlubale. Yesu ohumuthoma ‘mudhaari oromeleya ni athotho’ wihina avahe yojha yomuzimuni mudhidhi wofwanelela, iyo nnojhihiwa ni makalelo apama wodhela dhoojha ndha dhomuzimuni. (Mat. 24:45) Wodhela dhoojha dhatedhene ‘mudhaari ororomeleya ni athotho’ anegeredhiye wihina aanjhihe epaddi yomuzimuni, yinlubaleya di Bibiliya. — 1 Tes. 2:13. w22.10 epaddi 7-8 ddima 6-8

Bibiliya ohuwoga wihina Malabo okuthula, enere okalawo athu a nihelu. (2 Ped. 3:3, 4) Dhofuna dhewa dhinowathukulela aliwa ‘werana dhithu dhabure.’ (Judas 7, 17, 18) Nahikala pasope iyo podi okanna dhikalelo dhaliba nihelu. Nnere ddi wihina eyo ehipadduwe? Makalelo obajha fuhandana naliba nihelu. (Sal. 1:1) Eyo enatapulela ohileri newene ohivuruwana muselu dhinadhela wapostata. Onorajhihaga wubuwela nahere nanganyedhaga dhoholela dhinadhela wa Yehova nnikuru naaye? Wihina eyo ehipadduwe nnohowela wikoha: Gakela dhoholela dhixa munikuruni na Yehova, ginowoga dhithu dhohufwanelela? Gihikanna ekalelo yosayela ofwanya dhoviriganiha dha ale enaniholela? Nasaddula mubuwelo wehu wodhela makalelo ala o wubuwela, nnere omuhagalasa Yehova. — Pro. 3:34, 35. w22.10 epaddi 20 ddima 9-10

Muzimu wotxena wa Mulugu wahimulibiha Ezekiyeli wodhela mutholo wowalaleya athu oovadda muru ni a murima wowukuwa. Yehova owoga ni Ezekiyeli egi: ‘Giheriha wihina kove yawo ekale yolibiha ninga kove dhewa, ni giheriha wihina murima wawo okale wooliba ninga murima dhewa. Giheriha murima wawo wihina okale wovadda ninga nibwe na diyamanti, noliba okwaranya mujhila. Kuwawove mwaha ekalelo eli omentoniwiwa.’ (Eze. 3:8, 9) Yakala ninga Yehova awoga ni Ezekiyeli egihina: ‘Kuhiye wihina ovuruvuru wa nlogo nno wukwerebeyihe.’ Mowindo, muzimu wa Mulugu womukavihera Ezekiyeli mwaatemwene aviriyemo. Oliye ohuleba egi: ‘Nlada na Yehova nahigilibiha vanlubale.’ Yahivira sumana modha Ezekiyeli avedaga wonelamo muthenga aanniyena wihina alaleye. (Eze. 3:14, 15) Vano Yehova omwaddela Ezekiyeli wihina adhowe omwangoni wengo ‘aakeliye kopolo dha muzimu wotxena.’ (Eze. 3:23, 24) Vano Ezekiyeli aali owiwegeredhene wihina awambele mabasa aye oolaleya. w22.11 epaddi 4-5 ddima 8-9

Namavuhulela Abakuki ohufwanyiwa makathamiho owinjhiva, eyo enowoniha mwaha malabo mamodha oliye owikoha akala Yehova ompwatha. Bumwahaya oliye onfugulela Yehova murima waye ni omwaddela dhatedhene dhampadduwela. Yehova ahaakula nlobelo na Abakuki. (Hab. 2:2, 3) Abakuki ahibajha opendda dhithu Yehova ereliye nlogo naaye, eyo omukavihera ohogolowela ohagalala. Eyo yali ethu yonihile wihina Yehova omuthuwathuwela Abakuki ni eere omukavihera ogonjhiha ethu-sithu yadhelege osogolo. (Hab. 3:17-19) Nnahudhera ddi? Wafwanyiwaga makathamiho olobele wa Yehova omwaddelaga dhatedhene dhinupadduwela ni olobaga wihina ukavihere. Werana ndo, onere okanna ebaribari wi Yehova anere wuvaha kopolo onahoweliwe wihina odhowegeve ovilelaga. Woonelamo wi Yehova ali epaddi yawo, nroromelo nawo nnere oliba. We wadidela okanna ekalelo yapama yomuzimuni, makathamiho ni makoho kinadha yumwalaniha ni Yehova. — 1 Tim. 6:6-8. w22.11 epaddi 15 ddima 6-7

Yesu vamodha ni apanga yali mmambalo mwaaye, yahisegedheya vanlubale ehalaga mudhidhi vang’ono wihina ekwe. (Luc. 23:32, 33) Alobwana ala yahinakwe yahimunyemula Yesu. (Mat. 27:44; Mar. 15:32) Mbwenye mmodha wa aliwa osaddula mubuwelo. Oliye ofiyedha owoga ni Yesu egihina: ‘Yesu, onagidduwale wavolowa mumweneni mwawo.’ Vano Yesu omwakula: ni madhu a yolebela ya peeno. (Luc. 23:39-43) Madhu awonge Yesu ni mpanga ole, enithukulele wubuwela makalelo anakale parayizu. Ethu enaanikavihere wubuwela makalelo anakale parayizu, fupendda wodhela Omwene wa Salomawu Mwaha wi Bibiliya onowoga wihina Yesu munlubale ohumukwaranya Salomawu. Bumwahaya iyo podi ojheha wihina mwene ehu Yesu vamodha ni a 144 000 enere werana ethu yootikiniha mparayizu mwilaboni yela ya vati. (Mat. 12:42) Ebaribari wihina ‘mambila mamodha’ enna ejhehedho yokala ni mukalakala elabo yela ya vati, enohowela onona dhithu baani enahoweliwa wera yegi ekale mparayizu. — João 10:16. w22.12 epaddi 8 ddima 1; epaddi 9 ddima 4

Izayiya ononroromeliha wihina Yehova ‘onopwasedha onivuruwana naalobaga nikavihero.’ Madhu ala ootodola enonubusedha wihina baabihu onofuna — vanlubale — wakavihera ale enanfiyedhe oliye. Onona eyo enere onikavihera ovilela ni ohagalala. Yehova onoopwasedha pama ovuruwana nlobelo na kadda muthu wa iyo. Mwahaya bwaddi nigawogaga ndo? Versu dhobajha dha kapitulu 30 a Izayiya, Yehova onowithana nlogo naye alabihedhaga madhu owi “nyu” obe, onowawithana ninga nikuru. Mbwenye versu 19 oliye onowalabihedha madhu owi “we” ni kadda muthu wa iyo. Izayiya ohuleba egi: ‘We kunadha wunlaga’; ‘we wampigiriyela omulobaga nikavihero oliye anere wuweddela thagaraga’; ‘ni anere wuwakula.’ Ninga baabi odhivela, Yehova, oliye ononthuwathuwela wa kadda muthu wa iyo ni ononipwasedha onivuruwana nalobelaga. — Sal. 116:1; Isa. 57:15. w22.11 epaddi 9 ddima 5-6

Olaleya ni wakosa anamahara a Yesu, mabasa enadhana murenddele ni ohagalala. Anamaholela gereja yahawadeliha arumiwi olaleya. Mbwenye naarive dhigaali ndo, alobwana ale ororomeleya yahisakula omwiwelela Mulugu wodhela odidela olaleya, mwaha wa yeyo yahireelihiwa. (At. 5:27-29, 41, 42) Ebaribari wihina mabasa ehu yakoddihiwaga nnohowela okala pasope nalaleyaga. Mbwenye neerana nde nnandihu naalaleyaga nnere wanda okanna murenddele mwaha onona wi nnerana efunelo ya Yehova ni onona wihina nnaapara mabasa enavulusa dhigumi. Kuwanganyedhe wihina naarive dhithudha dhirusaga we onere okanna murenddele. Teto bumudhidhi yoyo nnonelihumo wihina nnohowela murenddele wa Mulugu. Bumwahaya omuroromele oliye dhaapadduwaga dhiredda morulumusa, ngovi obe oharahariwa. Teto kukale wolapela nnikuru na Yehova. Malabo aamatene kuddiwale ejhehedho yohagalasa enadha osogolo. Werana ndo ‘Mulugu amurenddele anakale ni we.’ — Fil. 4:9. w22.12 epaddi 21 ddima 17-18

Mbwenye wihina nande werana eyo, nnohowela wilibihedha. Mbwenye dhikalelo dhimodha, nnahowelihu wilibihedha wihina nisukume sindha, wukuuwa, owali ni onyanyuwa. Mbwenye werana eyo podi ohikala ethu yokweya. (Efé. 4:31, 32) Mwahaya bwaddi? Mwaha malabo mamodha dhithundha dhinonigonjhiha. Motajhiha, Bibiliya onowoga egi: athu amodha ‘kinarusa onyanyuwa’ ni ‘enodhiveliwa onyanyuwa.’ (Pro. 29:22) Muthu anna dhikalelo dhendha, podi wera anere ohowela wilibihedha vanlubale, wihina asaddule mubuwelo waye naarive agabaddiziwe. (Rom. 7:21-23) Akala we ohukanna ekalelo ononniwe wihina sabure, olobele wa Yehova omulobaga nikavihero wihina wande ogojhiha ni ororomele wi oliye anere wukavihera. (1 João 5:14, 15) Ebaribari wi Yehova kanukavihere motikina wihina athimihe dhikalelo dhabure ndha, mbwenye oliye anere wuvaha kopolo onahoweliwe wihina wande owanana. (1 Ped. 5:10) Bumwahaya, werena epaddawo wodhela oparihedha mabasa ndhe onalobiwe mulobelo mwawo ni osukume dhithu dhuthukulele ohogolowela werana dhithu dhabure. Teto kuthabwege wubuwela dhithu dhabure. — Fil. 4:8; Col. 3:2. w23.01 epaddi 10 ddima 7, 9-10

Makalelo ootonyihedha odhivela wula fuukala ooviheya mmabasani oolaleya. Nnothapanya ni athu aatene nnafwanyihu. Kinapwatha akala muzugu, obe kafiri, obe ooreela obe oohawa, obe a nihimo nohiyana. Ni makalelo yala, nnerege otonyihedha wi nnowerana efunelo ya Yehova yowihina ‘athu aatene evuluwe ni ekanne enonelo yeebaribari.’ (1 Tim. 2:4) Iyo nnowoniha wi nnomudhivela Yehova vamodha ni Yesu naadhivelaga addibila, naarogola. Iyo nnowathuwathuwela addibilihu ni nnowakavihera mudhidhi yahowelaga. Ddibilihu amuyelela muthu anamudhiveliye mukwani iyo nnomutodola, akala muredda nnompaada ni akala owuukuweene nnowilibihedha wihina nimuhagalase. (2 Cor. 1:3-7; 1 Tes. 5:11, 14) Ohiya eyenove, nnowilibihedha walobelela addibilihu mwaha ‘malobelo a muthu owogowa ehikanna kopolo.’ — Tia. 5:16. w23.01 epaddi 28-29 ddima 7-8

Ninga muthu anamaga Nyumba anaalemeleliye pamadhene mabasa aye mudhidhi waviraga, ni iyowa podi osaddula makalelo ehu nnalibihihu addibila. Teto iyo podi wakavihera addibilihu okanna kopolo yaafwanyiwaga makathamiho wodhela wawaddela dhopadduwa dha mwigumini dhaathu amodha yandile wagonjhiha makathamiho. (Heb. 11:32-35; 12:1) Iyo podi ohanyedha odhana murenddele nawogaga pama athu amodhaya ni nnowilibihera vanlubale odhana murenddele yakumelela makathamiho enathukulela omariha murenddele. (Efé. 4:3) Nathapanyaga ni addibilihu wodhela dholaga dha mBibiliyani dha thima nnowavaha nikavihero ni nnowalibiha addibilihu ekwerebeyile epaddi yomuzimuni teto nnowakavihera okanna nroromelo nooliba. Iyo nnodhiveliwa ni nnokala ohagalalene nalibihaga addibilihu ammulogoni, nyumba enamaga addibila kadhinadha dhikalawo ni mukalakala. Mbwenye iyo nalibihaga addibilihu nnere wafwanya mareeliho amukalakala. w22.08 epaddi 22 ddima 6; epaddi 25 ddima 17-18

Yesu ohuwoga ekalelo yathima enahoweleya negi nimonelemo Bibiliya. (Mat. 24:15) Mbwenye wonelamo enatapulela ddi? Enatapulela oliganiha ethu onubuweliwe nimakalelo eniwananiwa ni ethu emodha, ni ohiyaniha ethu emodha ni ekwaye. Ohiya eyo, wonelamo enovolowelavo wanda woona dhithu dhihinapadduwe. Teto, Yesu ohuwoga wi nnohowela olabihedha wonelamo wihina nande woona dhovuhulela dhinaakwanela. Wihina nande opurelamo wileri wehu wa Bibiliya, nnohowela okanna ekalelo yela. Yehova onowawonelihamo adhaari aye. Bumwahaya omulobe oliye wihina ukavihere okanna ekalelo ela yowonelamo. Mbwenye iyo nnohowela werana epaddi yehu, nimakalelo baani? Opwasedhege wileri, waajaga makalelo owonelamo ni owiwananiha nde onileriwe ni ndhe onooniwe.dhinere wukavihera wonelamo yotapulela ya yolebela onileriwe ni makalelo ooparihedha mabasa mwigumini mwawo. (Heb. 5:14) Wamwilerigi Bibiliya wihina omonelemo, onere wanda ompurelamo vanlubale. w23.02 epaddi 10 ddima 7-8

Kabiha wubuwela mukwawo aguuvahile kwaduru ya dezenyu, yothabwa okwima. Mbwenye, kwaduruya epaddi emodha ehiddurumuwa ni ehitakala vang’ono. Mbwenye naarive dhigari ndho sothabwa okwima, mwebaribarene were osamalela nvaho ola. Yehova ohunivaha nvaho wathima eli egumi. Teto, Yehova uhoniha wihina onovaha thima egumi, wodhela omuliva mwanaye wihina avahe egumaye ninga mukutho wihina anobole. (João 3:16) Yehova ntxela na egumi. (Sal. 36:9) Murumiwi Pawulo orumedha wihina ‘Mwaha wa oliye nihikanna egumi.’ (At. 17:25, 28) Bumwahaya, iyo podi owoga negi egumi nvaho wa Mulugu. Yehova ononidhivela, bumwahaya, oliye ononivaha dhatedhene nnahowelihu wihina nikalewo. (At. 14:15-17) Peeno Yehova kanawerana matikiniho wihina nikanne egumi, ohiya eyo, Yehova anajheha wihina nerena ethu-sithu wihina nisamalele egumi yehu epaddi yomuzimuni ni epaddi yomwilini. — 2 Cor. 7:1. w23.02 epaddi 20 ddima 1-2

Nnomutamalela vanlubale Yehova wodhela onivaha Bibiliya! Mwaha wa madhu aye, nnowanda ovilelana makathamiho enanifwanya peeno. Teto, mwaha wa Bibiliya Yehova ononivaha ejhehedho yosogolo. Yathimaya sowihina Yehova onomulabihedha Bibiliya wihina anihudhihe dhikalelo dhohiyana-iyana wodhela emuthu yaye. Opendda dhikalelo ndha dhapama dha Yehova, dhinodahinya murima wehu ni dhinonithukulela ofunaga onfiyedha oliye. (Sal. 25:14)Yehova onofuna wihina athu emunone. Kale Yehova olabihedha dhoroha, dhowoona ni Angero wihina akavihere athu omunona. (Núm. 12:6; At. 10:3, 4) Mbwenye yere okala yorusa ohudhera dhoroha, dhowoona ni muthenga, dhahere dhihilebiwa mBibiliyani. Bumwahaya, Yehova adhe aalabihedhege alobwana ale ‘oleba va livuruni’ ndhe afuniye wihina iyo nnone. (Jer. 30:2) Nnohowela okanna ebaribari wi makalelo Yehova asakuliye othapanya ni iyo bapama, ‘mwaha dila ya Mulugu eebaribari sologomana.’ — Sal. 18:30. w23.02 epaddi 2 ddima 1-2

Osakule dholuba dha pama. We podi osakula dholuba dhinalibihe nroromelo nawo ni dhinukavihere okala mukiristawu apama. (Efé. 3:16) Motajhiha, we podi othoma wihina yoluba yawo ekale owomihedha ohudhera wawo wa vayeka ni omwileri Bibiliya. (Sal. 1:2, 3) Obe we podi othoma osaddula ni owomihedha makalelo awo oolobela. Ni wonelamo wi onohowela okanna mubuwelo wapama wafunaga werana yothoma, wihina wande werana dhothoma dhapama wodhela dhowaredhana ni makalelo onalabihedhiwe mudhidhi wawo. (Efé. 5:15, 16) Wakavihera athu amodha podi wukavihera okala mukiristawu apama. Motajhiha, we podi okanna yoluba yowakavihera addibila eli anakalaba obe ale eli aredda mmulogoni mwawo. We podi wakavihera wodhela wagulela ethu-sithu enahoweliwa obe wakavihera ni dhithu dhimodha. We podi wawoniha odhivela athu amodha wodhela walaleyela muthenga womwene. (Mat. 9:36, 37) Dhandeya ononamo aavi olaba ninga piyonero amudhidhi wamutene. w22.08 epaddi 6 ddima 16-17