Job
10 ”Kúndasíi̱ xínii̱ ña̱ tákui̱.
Ka̱ʼa̱nkúáchii̱* xa̱ʼa̱ ndiʼi ña̱ ndóʼi̱.
Kúni̱i̱ ná kunda̱a̱-ini Ndióxi̱ ña̱ va̱ása va̱ʼa kúnii̱.
2 Ña̱yóʼo ka̱ʼi̱n xíʼin Ndióxi̱: ‘Va̱ása chika̱ún ku̱a̱chi yi̱ʼi̱.
Ka̱ʼa̱n xíʼi̱n nda̱chun kúú ña̱ íxandi̱va̱ʼún xíʼi̱n.
3 ¿Á íyo iin ña̱ va̱ʼa ndákiʼún xa̱ʼa̱ ña̱ sáxo̱ʼvi̱ún* yi̱ʼi̱?
Saáchi kúndasíún xíniún yi̱ʼi̱ ta̱ i̱xava̱ʼún,
ta táxiún ña̱ va̱ʼa ná kana ña̱ kéʼé na̱ ndi̱va̱ʼa-ini.
4 ¿Á táki̱ʼva íyo nduchúnu̱ú na̱ yiví saá íyo nduchúnu̱ún?
¿Á xítoún ña̱ʼa nda̱a̱ táki̱ʼva xíto na̱ yiví ña̱yóʼo?
5 ¿Á loʼo kúú ki̱vi̱ ña̱ tákún nda̱a̱ táki̱ʼva loʼo kúú ki̱vi̱ ña̱ táku na̱ yiví?
¿Á loʼo kúú ku̱i̱ya̱ ña̱ tákún nda̱a̱ táki̱ʼva loʼo kúú ku̱i̱ya̱ ña̱ táku na̱ yiví?
6 ¿Nda̱chun nándukún xa̱ʼa̱ ña̱ kivi chikaa̱ ku̱a̱chiún yi̱ʼi̱?
¿Nda̱chun nándukún xa̱ʼa̱ ku̱a̱chi ña̱ ni̱ki̱ʼvii̱?
7 Kúnda̱a̱va-iniún ña̱ va̱ása kúúmiíi̱ ku̱a̱chi
ta kǒo nda̱a̱ ni iinna kivi sakǎku yi̱ʼi̱ ndaʼún.
8 Xíʼin ndaʼún kúú ña̱ i̱xava̱ʼún yi̱ʼi̱,
soo vitin kúni̱ún kaʼníún yi̱ʼi̱.
9 Ixaún ña̱ ma̱ní, ndakaʼán chi xíʼin ñuʼú i̱xava̱ʼún yi̱ʼi̱,
soo vitin kúni̱ún ndasa tukún yi̱ʼi̱ ñuʼú.
10 ¿Á su̱ví yóʼó kúú ta̱ chi̱kaa̱ yi̱ʼi̱ ti̱xin siʼíi̱ ta kán i̱xava̱ʼún yi̱ʼi̱?
11 I̱xava̱ʼún ñiíi̱ ta saátu ku̱ñui̱,
i̱xava̱ʼún lekei̱ ta saátu tu̱chui̱.
12 Ta̱xiún ña̱ tákui̱ ta ndixaní ni̱kuʼvi̱-iniún* xi̱niún yi̱ʼi̱;
kíʼún kuenta xíʼi̱n ta ndáún yi̱ʼi̱.
13 Soo nu̱ú se̱ʼé nda̱kanixi̱níún keʼún ña̱ va̱ása va̱ʼa xíʼi̱n;
ta kúnda̱a̱-inii̱ ña̱ miíún kúú ta̱ kéʼé ña̱yóʼo xíʼi̱n.
14 Kunivaún tá ná ki̱ʼvii̱ ku̱a̱chi
ta va̱ása ixakáʼnu-iniún xa̱ʼíi̱.
15 Ndáʼviníi̱ tá ndixa kúúmiíi̱ ku̱a̱chi.
Ta ni tá kǒo ku̱a̱chi kúúmiíi̱, va̱ása ndaniʼivíi̱ xi̱níi̱,
saáchi kúkaʼanní nu̱úi̱ ta xóʼvi̱níi̱.
16 Tá ndániʼii̱ xi̱níi̱, yóʼó tíún yi̱ʼi̱ nda̱a̱ táki̱ʼva tíin tí ndikaʼa* kití tí kaxírí
ta tuku xíniñúʼún ndeún ña̱ saxóʼvi̱ún yi̱ʼi̱.
17 Ndúkún inka na̱ yiví ña̱ va̱ʼa chikaa̱na ku̱a̱chi yi̱ʼi̱,
ndeéníka sáún xíʼi̱n ta xóʼvi̱i̱ saáchi tuku ta tuku tu̱ndóʼo va̱xi nu̱úi̱.
18 Ña̱kán, ¿nda̱chun ta̱váún yi̱ʼi̱ ti̱xin siʼíi̱?
Va̱ʼaka níxi̱ʼi̱i̱ tá kúma̱níka kuni iin na̱ yiví yi̱ʼi̱.
19 Tá níxi̱ʼi̱i̱ ti̱xin siʼíi̱, saá kúú ña̱ iin nda̱kú ku̱ʼu̱nna sandúxu̱nna yi̱ʼi̱;
tasaá koi̱ nda̱a̱ táki̱ʼva íyo ta̱ va̱ása níxi̱yo nu̱ú ñuʼú’.
20 Si̱lóʼo ki̱vi̱ kúú ña̱ kíndo̱o nu̱úi̱. Ná va̱ása keʼéka Ndióxi̱ yi̱ʼi̱,
ná va̱ása kotoka Ndióxi̱ yi̱ʼi̱ ña̱ va̱ʼa ndi̱ko-inii̱*
21 tá kúma̱níka kuvii̱,
ta ku̱ʼi̱n nu̱ú ñuʼú ña̱ naaní, ta va̱ása ndikókai̱,
22 tá kúma̱níka ku̱ʼi̱n nu̱ú ñuʼú ña̱ ni loʼo va̱ása túvi,
nu̱ú ñuʼú ña̱ va̱ása vií íyo,
kán, ña̱ ndáye̱ʼe̱ íyoña nda̱a̱ táki̱ʼva íyo ña̱ naa”.