Job
11 Ta̱ Zofar ta̱ naamatita nda̱kuiinra ta ni̱ka̱ʼa̱nra ña̱yóʼo:
2 “¿Á ndákanixi̱níún ña̱ va̱ása ndakuiinna yuʼún xa̱ʼa̱ ndiʼi ña̱ ni̱ka̱ʼún?,
¿á xa̱ʼa̱ ña̱ ku̱a̱ʼání ña̱ʼa káʼún kúni̱ kachiña ña̱ ndixa kúúña?
3 ¿Á kuchiñún kasiún yuʼú na̱ yiví xíʼin tu̱ʼun ña̱ va̱ása ndáyáʼvi ña̱ káʼún?
¿Á kǒo nda̱a̱ ni iin na̱ nda̱ʼyi̱ nu̱ún xa̱ʼa̱ ña̱ ku̱sikindaúnna?
4 Saáchi káʼún ña̱yóʼo: ‘Ña̱ nda̱a̱va kúú ña̱ sánáʼi̱,
ta kúnda̱a̱-ini Ndióxi̱ ña̱ kǒo ku̱a̱chi kúúmiíi̱’.
5 Soo tá ña̱ kívi kúúña,
ná ka̱ʼa̱n Ndióxi̱ ta ná ndakuiinra yuʼún.
6 Tasaá, ta̱kán ka̱ʼa̱nra xíʼún ndáaña keʼún ña̱ va̱ʼa ndíchi xa̱ún koún,
saáchi na̱ yiví ndíchi kivi kunda̱a̱-inina xa̱ʼa̱ ku̱a̱ʼání ña̱ʼa.
Tasaá kunda̱a̱-iniún ña̱ nándósova-ini Ndióxi̱ xa̱ʼa̱ sava ña̱ʼa ña̱ va̱ása va̱ʼa ña̱ kéʼún.
7 ¿Á kivi kunda̱a̱-iniún xa̱ʼa̱ ña̱ ndíchi ña̱ kúúmií Ndióxi̱?
¿A kivi kunda̱a̱-iniún ndiʼi ña̱ʼa xa̱ʼa̱ Ndióxi̱ ta̱ kúúmií ndiʼi ndee̱?
8 Ña̱ ndíchi ña̱ kúúmií Ndióxi̱, káʼnuníkaña nu̱ú ndiví, va̱ása kivi xa̱ún kuumiíúnña.
Kúnúníka ndíkaa̱ ña̱yóʼo nu̱ú Ya̱vi̱* nu̱ú ñuʼú na̱ ni̱xi̱ʼi̱, ña̱kán va̱ása kivi xa̱ún kunda̱a̱-iniún xa̱ʼa̱ña.
9 Káʼnuníkaña nu̱ú ñuʼú,
ta ndíka̱níkaña nu̱ú tá mar.
10 Tá ná tiin ta̱yóʼo iin na̱ yiví ta ku̱ʼu̱nra xíʼinna ña̱ ná ndatiinna ku̱a̱chi xíʼinna,
¿ndáana kivi kasi nu̱úra ña̱ keʼéra ña̱yóʼo?
11 Saáchi kúnda̱a̱-inira ndáana kúú na̱ sándaʼvi.
¿Á va̱ása kíʼinvara kuenta xíʼin ña̱ va̱ása va̱ʼa ña̱ kéʼé na̱ yiví?
12 Nda̱a̱ ná sakáku iin burro yukú iin na̱ yiví
saáví kivi xa̱a̱ iin na̱ yiví kíʼví ndundíchina.
13 Xíniñúʼu viíní kixáʼún ndakanixi̱níún ta ka̱ʼún xíʼin Ndióxi̱...
14 tá kéʼún ña̱ va̱ása va̱ʼa, va̱ása keʼékaúnña,
ta va̱ása taxiún ña̱ keʼéna ña̱ va̱ása va̱ʼa nu̱ú íyo veʼe válíún.
15 Chi saá kúú ña̱ ndaniʼún nu̱ún kakaún ta va̱ása kukaʼan nu̱ún;
ndakúní koo iniún ta ni va̱ása yi̱ʼvíún.
16 Tasaá nandóso-iniún xa̱ʼa̱ tu̱ndóʼo ña̱ yáʼún nu̱ú,
ta va̱ása ndakaʼánkaún xa̱ʼa̱ña nda̱a̱ táki̱ʼva va̱ása ndákaʼánkana xa̱ʼa̱ ti̱kui̱í tá xa̱a̱ ni̱ya̱ʼa ku̱a̱ʼa̱n.
17 Yéʼe̱níka koo ki̱vi̱ ña̱ tákún nu̱úka ña̱ yéʼe̱ ñu̱ʼu* tá káʼñu,*
soo ni ná koo ki̱vi̱ ña̱ naa nu̱ún, ña̱yóʼo ndaye̱ʼe̱ña nda̱a̱ táki̱ʼva ndáye̱ʼe̱ tá xi̱ta̱a̱n.*
18 Va̱ása yi̱ʼvíún saáchi koova ña̱ va̱ʼa kundatún ndakiʼún chí nu̱únínu,
ndakotoún iníí nu̱ú íyoún ta va̱ása yi̱ʼvíún tá ná ndakandúʼún* ku̱su̱ún.
19 Kǒo na̱ sayíʼvi yóʼó tá ná ndakandúʼún ku̱su̱ún,
ta ku̱a̱ʼání na̱ yiví viíní keʼéna xíʼún chi kuni̱na va̱ʼa koo iniún xíʼinna.
20 Soo na̱ yiví na̱ ndi̱va̱ʼa-ini, kindo̱o kúáana;*
va̱ása kooka nu̱ú kununa ku̱ʼu̱nna,
ta ndáa kundatu kuitína kuvina”.