Job
9 Ta̱ Job nda̱kuiinra ña̱yóʼo:
2 “Ndixava, xa̱a̱ kúnda̱a̱va-inii̱ ña̱ saá íyoña.
¿Soo á kivi ka̱ʼa̱n iin na̱ yiví ña̱ nda̱kúka íyo ña̱ kéʼé na̱yóʼo nu̱úka ña̱ kéʼé Ndióxi̱?
3 Tá iin na̱ yiví ná kuni̱na na̱ána* xíʼin Ndióxi̱,
ni mil ña̱ʼa ná nda̱ka̱tu̱ʼunrana va̱ása kuchiñuna ndakuiinna nda̱a̱ ni iinña.
4 Ta̱kán ndíchiníra ta íyoní ndee̱ra,
¿ndáana kivi kanitáʼan xíʼinra ta kǒo ña̱ kundoʼona?
5 Kǒo na̱ kíʼin kuenta tá sáka̱nda̱ra yuku̱,
xa̱ʼa̱ ña̱ sáa̱níra sánduvaraña.
6 Kísira ñuʼú ta kánda̱ xa̱ʼa̱ña.
7 Xáʼndara chiñu nu̱ú ñu̱ʼu* ña̱ ná va̱ása ndaye̱ʼe̱ña,
ta va̱ása táxira ndaye̱ʼe̱ ki̱mi;
8 sándakaa̱ra ndiví nda̱a̱ táki̱ʼva sándakaa̱na iin tela,
ta xíkara nu̱ú tá mar.
9 Ta̱kán i̱xava̱ʼara tiʼvi ki̱mi tí naní Ash,* tiʼvi ki̱mi tí naní Kesil* ta saátu tiʼvi ki̱mi tí naní Kimá,*
saátu i̱xava̱ʼara tiʼvi ki̱mi tí íyo chí sur;
10 kéʼéra ña̱ʼa ña̱ ndáyáʼviní ña̱ va̱ása kúnda̱a̱-ini nda̱a̱ ni iin na̱ yiví xíʼin,
kéʼéra ña̱ʼa ña̱ ndákanda̱-inina* xíʼin ta ni kǒo kívi ndakaʼvina ña̱yóʼo.
11 Yatin síii̱n* yáʼara ta va̱ása kívi kotoi̱ra;
yatin nu̱úi̱ yáʼara soo va̱ása ndákunii̱ra.
12 Tá ndákiʼinra iin ña̱ʼa, ¿á íyo iin na̱ kivi ka̱ʼa̱nkúáchi* xíʼinra?
¿Ndáana kivi ka̱ʼa̱n xíʼinra, ‘¿Nda̱chun kéʼún ña̱yóʼo?’?.
13 Sa̱a̱níva Ndióxi̱;
nda̱a̱ na̱ chíndeétáʼan xíʼin Rahab* kuxítína nu̱úra.
14 Xa̱ʼa̱ ña̱kán xíniñúʼu to̱ʼóníka ndakuii̱n yuʼúra.
Ta viíní xíniñúʼu ndaka̱xii̱n tu̱ʼun ña̱ kuniñúʼi̱ ña̱ ka̱ʼi̱n xíʼinra.
15 Ni ná ndakanixi̱níi̱ ña̱ va̱ása kúúmiíi̱ ku̱a̱chi, va̱ása ndakuiinvíi̱ yuʼúra.
Ka̱ʼa̱n-ndáʼvii̱ xíʼin ta̱ ndátiin ku̱a̱chi xíʼi̱n ña̱ ná kundáʼvi-inira kunira yi̱ʼi̱.
16 Tá ná kanai̱ra, ¿á ndakuiinra yuʼíi̱?
Sana va̱ása kúni̱víra kuniso̱ʼora yi̱ʼi̱,
17 saáchi sáxo̱ʼvi̱ra yi̱ʼi̱ xíʼin ku̱a̱ʼání tu̱ndóʼo, ta ña̱yóʼo íyoña nda̱a̱ táki̱ʼva íyo sa̱vi̱ tá ndeéní kúun,
táxikara ku̱a̱ʼání tu̱ndóʼo ndaʼíi̱ ni kǒo ña̱ níkeʼíi̱ xíʼinra.
18 Ni va̱ása táxira ndakiʼii̱n ta̱chíi̱;
ta ku̱a̱ʼáka tu̱ndóʼo táxira ndaʼíi̱.
19 Tá ná ka̱ʼa̱nyó xa̱ʼa̱ na̱ kúúmií ndee̱, Ndióxi̱ kúú ta̱ kúúmií ndee̱;
tá ná ka̱ʼa̱nyó xa̱ʼa̱ na̱ kéʼé ña̱ nda̱kú, Ndióxi̱ káchira ‘¿Ndáana kivi ka̱ʼa̱n xíʼi̱n ña̱ va̱ása va̱ʼa íyo ña̱ kéʼíi̱?’.
20 Ni ña̱ ndixa ná koo ña̱ ka̱ʼi̱n, sakúisoi̱ ku̱a̱chi miívai̱.
Ni kǒo ku̱a̱chi kúúmiíi̱, ta̱kán sakúiso ku̱a̱chivara yi̱ʼi̱;
21 ni kǒo ku̱a̱chi kúúmiíi̱, kǒo xíni̱i̱ ndáaña kundoʼi̱;
kúndasíi̱ xínii̱ ña̱ tákui̱.
22 Inkáchi íyo ndiʼivaña; ña̱kán káʼi̱n ña̱yóʼo:
‘Inkáchi sándiʼi-xa̱ʼa̱ra na̱ kǒo ku̱a̱chi kúúmií ta saátu na̱ ndi̱va̱ʼa-ini’.
23 Tá iin kama ná kixaa̱ tu̱ndóʼo nu̱úna ta ná kuvina
ta̱kán kusi̱kindaara na̱ kǒo ku̱a̱chi kúúmií xa̱ʼa̱ ña̱ kundi̱ʼiní-inina.
24 Nda̱taxina ñuʼú ndaʼa̱ na̱ ndi̱va̱ʼa-ini;
ndákasira nu̱ú na̱ ndátiin ku̱a̱chi.
Tá su̱ví ta̱yóʼo kúúra, ¿ndáana kúú na̱ kéʼé ña̱yóʼo?
25 Kamaníka yáʼa ki̱vi̱ ña̱ tákui̱ nu̱úka iin na̱ yiví na̱ kamaní xínu
ta nda̱a̱ ni iin ki̱vi̱ va̱ása kúsi̱í-inii̱,
26 kamaní yáʼaña nda̱a̱ táki̱ʼva íyo barco tú kamaní ku̱a̱ʼa̱n nu̱ú ti̱kui̱í
nda̱a̱ táki̱ʼva íyo ta̱sú* tí ku̱a̱ʼa̱n tiin kití tí kaxírí saá íyoña.
27 Tá ná ka̱ʼi̱n ña̱yóʼo ‘Nandósova-inii̱ xa̱ʼa̱ ña̱ xóʼvi̱i̱,*
va̱ása na̱ʼa̱kai̱ ña̱ kúsuchí-inii̱ chi kusi̱íva-inii̱’,
28 soo ni saá yíʼvikavai̱ ña̱ xo̱ʼvi̱i̱,
ta kúnda̱a̱-inii̱ ña̱ ka̱ʼa̱nvaún xa̱ʼíi̱ ña̱ kúúmiívai̱ ku̱a̱chi;
29 chi chikaa̱vaún ku̱a̱chi yi̱ʼi̱.*
Tá saá, ¿nda̱chunví chikai̱ ndee̱ ña̱ na̱ʼi̱ ña̱ kǒo ku̱a̱chi kúúmiíi̱?
30 Tá ná kuchui̱ xíʼin ti̱kui̱í hielo ña̱ ndu̱ta,
ta ni ná ndakatai̱ ndaʼíi̱ xíʼin na̱ma̱,
31 yóʼó chika̱ún yi̱ʼi̱ ini ya̱vi̱ nu̱ú chútú nda̱ʼyi̱,
ta nda̱a̱ ti̱ko̱to̱i̱ kundasí yi̱ʼi̱.
32 Saáchi ta̱kán va̱ása íyora nda̱a̱ táki̱ʼva íyo yi̱ʼi̱ ña̱ va̱ʼa ndakuii̱n yuʼúra
á ña̱ inkáchi ku̱ʼu̱nndi̱ ndatiinna ku̱a̱chi xíʼinndi̱.
33 Kǒo nda̱a̱ ni iin na̱ kivi ka̱ʼa̱n ndáana kúúmií ku̱a̱chi, á Ndióxi̱ kúúmií ku̱a̱chi á yi̱ʼi̱ kúúmií ku̱a̱chi.
Kǒo nda̱a̱ ni iin na̱ kivi ndatiin ku̱a̱chi xíʼinndi̱.
34 Tá ná va̱ása taxikara castigo ndaʼíi̱,
ta tá ná va̱ása sayíʼvikara yi̱ʼi̱,
35 va̱ása yi̱ʼvíi̱ ka̱ʼi̱n xíʼinra,
chi va̱ása níxi̱yiʼvíi̱ ka̱ʼi̱n xíʼinra tá ya̱chi̱.