Job
12 Tasaá nda̱kuiin ta̱ Job ta ni̱ka̱ʼa̱nra ña̱yóʼo:
2 “Náʼa̱ miíva ña̱ ndóʼó kúú na̱ xíni̱,
tá ná kuvindó va̱ása kindo̱oka nda̱a̱ ni iin na̱ ndíchi.
3 Soo saátu yi̱ʼi̱ ndíchivai̱.
Nda̱a̱ táki̱ʼva íyo ndóʼó saátu íyo yi̱ʼi̱va.
¿Ndáana kǒo kúnda̱a̱-ini xa̱ʼa̱ ña̱ ni̱ka̱ʼa̱nndó?
4 Na̱ migoi̱ kúsi̱kindaana yi̱ʼi̱,
saáchi káʼi̱n xíʼin Ndióxi̱ ta kúni̱i̱ ná ndakuiinra yuʼíi̱.
Ni kéʼíi̱ ña̱ nda̱kú ta kǒo ku̱a̱chi kúúmiíi̱, xáku̱ndaana yi̱ʼi̱.
5 Na̱ yiví na̱ va̱ása ndíʼi̱-ini, ndákanixi̱nína ña̱ kǒo ña̱ va̱ása va̱ʼa kundoʼona.
Ndákanixi̱nína ña̱ na̱ xa̱a̱ kúúmií tu̱ndóʼo kúú na̱ ndóʼo ña̱ va̱ása va̱ʼa.
6 Va̱ʼaní ndóo na̱ kui̱ʼná ti̱xin veʼena,
va̱ʼaní ndóo na̱ sásáa̱ Ndióxi̱,
ta níʼina ndióxi̱ ña̱ ndásakáʼnuna.
7 Soo ixaún ña̱ ma̱ní, nda̱ka̱tu̱ʼun kití, ta tíyóʼo kúú tí sanáʼa̱ yóʼó,
saátu nda̱ka̱tu̱ʼun saa tí ndáchí, ta tíyóʼo kúú tí natúʼun xíʼún.
8 Á koto ña̱ʼa ña̱ íyo nu̱ú ñuʼú, ta ña̱yóʼo sanáʼa̱ña yóʼó,
koto ti̱a̱ká tí ñúʼu ini mar, ta tíyóʼo sanáʼa̱rí yóʼó.
9 ¿Á va̱ása xíni̱ ña̱yóʼo* ña̱ mií Jehová kúú ta̱ i̱xava̱ʼaña?
10 Ndaʼa̱ra ndíkaa̱ ña̱ táku na̱ yiví ta saátu ña̱ táku kití,
ña̱ táku ndiʼi na̱ yiví, ndaʼa̱ra ndíkaa̱ña.
11 Nda̱a̱ táki̱ʼva xíniñúʼuyó yáa̱yó* ña̱ va̱ʼa kotondosóyó ña̱ xíxiyó
saá ndóʼoyó tá xíniso̱ʼoyó ña̱ káʼa̱n na̱ yiví, chi kivi kunda̱a̱-iniyó á ña̱ va̱ʼa kúúña á ña̱ va̱ása va̱ʼa kúúña.
12 ¿Á kǒova ña̱ ndíchi kúúmií na̱ yiví na̱ xa̱a̱ chée?
¿Á va̱ása ndíchiva na̱ xa̱a̱ ku̱a̱ʼání ku̱i̱ya̱ táku?
13 Ndióxi̱ ndíchiníra ta kúúmiíníra ndee̱;
ta̱yóʼo kúú ta̱ kúnda̱a̱ní-ini ta saxínura ña̱ kúni̱ra.
14 Tá sándiʼi-xa̱ʼa̱ra iin ña̱ʼa, va̱ása kívi nduva̱ʼa tukuña;
nda̱a̱ ni iin na̱ yiví va̱ása kívi kuná ña̱ ndákasira.
15 Tá sásira ti̱kui̱í, yíchi̱ ñuʼú;
tá táxira ná kuun sa̱vi̱, ndákutúrá nu̱ú ñuʼú.
16 Ndakúníra ta ndíchiníra;
xáʼndara chiñu nu̱ú na̱ sa̱ndáʼvina ta saátu na̱ sándaʼvi inkana;
17 sákukaʼanra nu̱ú na̱ ndíchi
ta ndásara na̱ ndátiin ku̱a̱chi nda̱a̱ táki̱ʼva íyo na̱ kíʼví.
18 Kíndaara chiñu ndaʼa̱ na̱ rey,
ta ndásarana na̱ káchíñundáʼvi.
19 Sákukaʼanra nu̱ú na̱ su̱tu̱
kíndaara nda̱yí* ndaʼa̱ na̱ kúúmií ndee̱ ña̱ kaʼndachíñuna.
20 Va̱ása táxira ka̱ʼa̱n na̱ ndáaní-ini na̱ yiví ña̱ taxina consejo ndaʼa̱na,
kíndaara ña̱ ndíchi ndaʼa̱ na̱ ta̱a na̱ xa̱a̱ chée.
21 Kúndasíra xínira na̱ kúúmií chiñu ña̱ ndáyáʼvi
ta sákuvitára na̱ ndakúní.
22 Ndátavára ña̱ʼa ña̱ ñúʼu se̱ʼé nu̱ú naa,
ta sándaye̱ʼe̱ra nu̱ú naaní.
23 Táxira ná nduku̱a̱ʼá na̱ ñuu náʼnu ta so̱ndíʼi sándiʼi-xa̱ʼa̱rana,
ndásaku̱a̱ʼára ñuʼúna ta so̱ndíʼi táxira ná ndakiʼinnana ku̱ʼu̱n xíʼinna.
24 Kíndaara ña̱ ndíchi ndaʼa̱ na̱ níʼi yichi̱ nu̱ú na̱ ñuu
ta táxira ná kakana nu̱ú ñuʼú yi̱chí nu̱ú kǒo yichi̱ íyo.
25 Xíkandaʼa̱na nu̱ú naa nu̱ú kǒo ñuʼu̱ túu̱n nda̱a̱ táki̱ʼva kéʼé na̱ kúáa;*
ta táxira ná kaka sánana nda̱a̱ táki̱ʼva kéʼé na̱ xíʼi.