Job
13 ”Xa̱a̱ xítovai̱ ndiʼi ña̱ xa̱a̱ ni̱ka̱ʼi̱n xa̱ʼa̱,
xa̱a̱ xi̱niso̱ʼovai̱ xa̱ʼa̱ña ta xa̱a̱ ku̱ndaa̱va-inii̱ xíʼinña.
2 Ña̱ xa̱a̱ xíni̱ ndóʼó xa̱a̱ xíni̱tu yi̱ʼi̱vaña;
nda̱a̱ táki̱ʼva íyo ndóʼó saátu íyo yi̱ʼi̱va.
3 Soo yi̱ʼi̱, va̱ʼaka kúni̱i̱ ka̱ʼi̱n xíʼin Ndióxi̱ ta̱ kúúmií ndiʼi ndee̱;
kúni̱i̱ ndakiʼii̱n tu̱ʼi̱n nu̱ú Ndióxi̱.
4 Soo ndóʼó káʼa̱nndó ña̱ vatá* xa̱ʼíi̱;
ndiʼi ndóʼó íyondó nda̱a̱ táki̱ʼva íyo na̱ doctor na̱ ni loʼo va̱ása xíni̱ sandáʼa.
5 Tá ná ndakasindó yuʼúndó,
saá na̱ʼa̱ndó ña̱ kúúmiíndó ña̱ ndíchi.
6 Ixandó ña̱ ma̱ní, kuniso̱ʼondó ña̱ ndakanii̱ nu̱úndó,
kuniso̱ʼondó ña̱ ka̱ʼi̱n ña̱ va̱ʼa ndakiʼii̱n tu̱ʼi̱n.
7 ¿Á kuniñúʼundó ki̱vi̱ Ndióxi̱ ña̱ ka̱ʼa̱nndó ña̱ va̱ása va̱ʼa?,
¿á kuniñúʼundó ki̱vi̱ Ndióxi̱ ña̱ ka̱ʼa̱nndó ña̱ vatá?
8 ¿Á chindeétáʼanndó xíʼin Ndióxi̱?
¿Á ndakiʼinndó tu̱ʼun Ndióxi̱ ta̱ nda̱a̱?
9 ¿Á kusi̱í-inira tá ná kotora ña̱ ndíkaa̱ níma̱ndó xíʼin ña̱ kéʼéndó?
¿Á sandáʼvindóra nda̱a̱ táki̱ʼva sándaʼvindó na̱ yiví?
10 Nda̱ʼyi̱vara nu̱úndó tá kúni̱ndó ndakiʼinndó tu̱ʼunra
soo va̱ása va̱ʼa íyo ña̱ káʼa̱nndó xíʼi̱n ta kúni̱ndó chise̱ʼéndóña.
11 ¿Á va̱ása yi̱ʼvíndó kunindóra xa̱ʼa̱ ña̱ káʼnuníra?
Yi̱ʼvínívandó kunindóra.
12 Tu̱ʼun ña̱ ndíchi ña̱ káʼa̱nndó va̱ása ndáyáʼviña nda̱a̱ táki̱ʼva va̱ása ndáyáʼvi yáká;*
ña̱ káʼa̱nndó ña̱ va̱ʼa ndakiʼinndó tu̱ʼunndó íyoña nda̱a̱ táki̱ʼva íyo escudo ña̱ ku̱vaʼa xíʼin nda̱ʼyi̱.
13 Kasindó yuʼúndó ña̱ va̱ʼa ná ka̱ʼi̱n.
Ka̱ʼa̱nvai̱ ni nda̱a̱ ndáaka ña̱ ná kundoʼi̱.
14 ¿Nda̱chun va̱ása yíʼvii̱ ta nda̱a̱ chíkaa̱-inii̱ kuvii̱?
15 Ni ná kaʼní Ndióxi̱ yi̱ʼi̱, soo ni saá kundaava-inii̱ra;
ndakiʼii̱n tu̱ʼi̱n nu̱úra.
16 Tasaá, Ndióxi̱ sakǎkuvara yi̱ʼi̱,
saáchi nda̱a̱ ni iin na̱ ndi̱va̱ʼa-ini va̱ása kivi kuyatinna nu̱úra.
17 Viíní kuniso̱ʼondó ña̱ ka̱ʼi̱n,
va̱ʼaní kuniso̱ʼondó ña̱ ndakanii̱ nu̱úndó.
18 Kuniso̱ʼondó, xa̱a̱ íyo tu̱ʼvai̱ ña̱ ndakiʼii̱n tu̱ʼi̱n;
kúnda̱a̱va-inii̱ ña̱ káʼi̱n ña̱ nda̱a̱.
19 ¿Ndáana chikaa̱ ku̱a̱chi yi̱ʼi̱?
Kuvivai̱ tá ná va̱ása ka̱ʼi̱n.
20 U̱vi̱ kuití ña̱ʼa ndúkúi̱ nu̱ún Ndióxi̱ miíi̱,
tasaá va̱ása koose̱ʼíi̱* nu̱ún:
21 va̱ása saxóʼvi̱kaún* yi̱ʼi̱,
ta va̱ása taxiún ña̱ yi̱ʼvíníi̱ kunii̱ yóʼó.
22 Ka̱ʼa̱n ta ndakuiinvai̱ yuʼún,
á taxi ná ka̱ʼi̱n ta ndakuiin yóʼó yuʼíi̱.
23 ¿Ndáaña kúú ña̱ va̱ása va̱ʼa ke̱ʼíi̱ ta ndáaña kúú ku̱a̱chi ña̱ ni̱ki̱ʼvii̱?
Na̱ʼa̱ ndáaña kúú ña̱ va̱ása va̱ʼa ke̱ʼíi̱ ta saátu ndáaña kúú ku̱a̱chii̱.
24 ¿Nda̱chun chíse̱ʼún nu̱ún nu̱úi̱?
¿Ta nda̱chun kéʼún xíʼi̱n nda̱a̱ táki̱ʼva kéʼún xíʼin na̱ sáa̱-iniún xíniún?
25 Íyoi̱ nda̱a̱ táki̱ʼva íyo iin yu̱ku̱ ña̱ ndáchí xíʼin ta̱chí,
iin yita* yi̱chí kuití kúi̱,
¿nda̱chun sáyi̱ʼvíún yi̱ʼi̱ ta ndíku̱ún sa̱tái̱?
26 Saáchi chíkaa̱kaún ku̱a̱chi ndeé yi̱ʼi̱,
ta kúni̱kaún ndatiún ku̱a̱chi xíʼi̱n xa̱ʼa̱ ku̱a̱chi ña̱ ni̱ki̱ʼvii̱ tá loʼi̱.
27 Táxiún castigo ndaʼíi̱,*
xítova̱ʼún ndiʼi ña̱ kéʼíi̱,
xítova̱ʼún yi̱ʼi̱ nda̱a̱ ndáaka nu̱ú ku̱a̱ʼi̱n.
28 Saá kúú ña̱ ndíʼi-xa̱ʼa̱ iin ta̱a* nda̱a̱ táki̱ʼva ndíʼi-xa̱ʼa̱ iin ña̱ʼa tá táʼyi̱ña,
nda̱a̱ táki̱ʼva ndíʼi-xa̱ʼa̱ ti̱ko̱to̱ ña̱ xáxi ti̱kixín.