Job
14 ”Loʼoní ku̱i̱ya̱ táku iin ta̱a ta íyoní tu̱ndóʼo nu̱úra.
2 Íyora nda̱a̱ táki̱ʼva íyo iin yita ña̱ xáa ta kamaní yíchi̱ña;
íyora nda̱a̱ táki̱ʼva íyo iin ku̱nda̱ti̱* ña̱ kamaní yáʼa.
3 ¿Nda̱chun xítoún ña̱ kéʼé ta̱yóʼo ta ndátiún ku̱a̱chi xíʼinra?
4 ¿Á kivi sakáku iin na̱ yiví na̱ kúúmií ku̱a̱chi iin na̱ kǒo ku̱a̱chi kúúmií? Va̱ása.
5 Xa̱a̱ xa̱kiún nda̱saa ki̱vi̱ kúú ña̱ kivi kutaku iin na̱ yiví,
yóʼó kúú ta̱ xíni̱ nda̱saa yo̱o̱ kutakuna;
ta xa̱ʼa̱ ña̱yóʼo va̱ása kívi kutakuna ku̱a̱ʼáka tiempo.
6 Va̱ása kotokaún ta̱ ta̱a ta va̱ása keʼékaúnra,
nda̱a̱ ná ndiʼi tiempo ña̱ tákura, nda̱a̱ táki̱ʼva ndíʼi ki̱vi̱ ña̱ káchíñu na̱ káchíñu táti̱.*
7 Saáchi kivi kuaʼnu tuku iin yitu̱n ni ná kaʼndananú,
kivi ndanana ndaʼa̱nú ta kuaʼnunú.
8 Tá ná yi̱chi̱ ti̱oʼonú* ti̱xin ñuʼú ta ná yi̱chi̱ xa̱ʼa̱nú,
9 xíʼin loʼo kuití ti̱kui̱í ndanananú,
ndanana ndaʼa̱nú ta xa̱a̱nú koonú nda̱a̱ táki̱ʼva íyo yitu̱n tú sa̱kán ki̱xáʼa xáʼnu.
10 Soo tá xíʼi̱ iin na̱ yiví, kǒoka ña̱ kívi keʼéna;
tá xíʼi̱ iin na̱ yiví, ¿ndáa míí ku̱a̱ʼa̱nna?
11 Ndíʼiva ti̱kui̱í tá ñúʼu ini mar,
ndókotu ti̱kui̱í tá ñúʼu yu̱ta ta yíchi̱rá.
12 Saátu ndóʼo na̱ yiví tá xíʼi̱na, ndákandúʼúna* ta va̱ása ndákáxíka-inina.
Nani íyoka ndiví, va̱ása ndako̱ona,
chi nda̱a̱ táki̱ʼva koo na̱ ku̱su̱n ndiʼi tiempo saá koona.
13 Á va̱ʼakaví ná chise̱ʼún yi̱ʼi̱ ini Ya̱vi̱* nu̱ú ñúʼu na̱ ni̱xi̱ʼi̱,
á va̱ʼakaví ná chise̱ʼún yi̱ʼi̱ nda̱a̱ ná ya̱ʼa ña̱ sáa̱níún.
Á va̱ʼakaví ná chindúʼún iin ki̱vi̱ ña̱ ndakaʼún xa̱ʼíi̱.
14 Tá ná kuvi iin na̱ yiví, ¿á kivi ndikóna kutaku tukuna?
Kundatui̱ nda̱a̱ ná sa̱ñái̱ chi nda̱a̱ táki̱ʼva koo ta̱ kachíñundáʼvi saá koi̱.
15 Kanaún yi̱ʼi̱ ta ndakuii̱n yuʼún.
Kuni̱níún ndikóún kuniún yi̱ʼi̱ ta̱ i̱xava̱ʼún.
16 Soo vitin xítoún ndiʼi ña̱ kéʼíi̱ ta xíto kuitíún ku̱a̱chi ña̱ kíʼvii̱.
17 Nda̱a̱ táki̱ʼva íyo ña̱ ndíkaa̱ ini bolsa ña̱ kútu̱ní ndási saá íyo ña̱ va̱ása va̱ʼa ke̱ʼíi̱,
ta nda̱a̱ táki̱ʼva íyo ta̱ ndátaánva̱ʼa* ku̱a̱chii̱ saá íyoún.
18 Nda̱a̱ táki̱ʼva ndákava iin yuku̱ ta cháchiña,
nda̱a̱ táki̱ʼva kíta iin yu̱u̱ nu̱ú ndíkaa̱ña ta ndákavaña;
19 nda̱a̱ táki̱ʼva loʼo tá loʼo sándiʼi-xa̱ʼa̱ ti̱kui̱í iin yu̱u̱,
ta nda̱a̱ táki̱ʼva ndákiʼin ti̱kui̱í yóʼo ñuʼú ku̱a̱ʼa̱n xíʼinrá:
saá sa̱ndíʼi-xa̱ʼún ña̱ ndátui̱ ndakiʼii̱n chí nu̱únínu.
20 Xáʼndaún chiñu nu̱ú ta̱ ta̱a nda̱a̱ tá kíxaa̱ tiempo ña̱ xíʼi̱ra,
násamaún ki̱ʼva ña̱ náʼa̱ra ta táváúnra ku̱a̱ʼa̱nra.
21 Íxato̱ʼóna na̱ se̱ʼera soo va̱ása kúnda̱a̱-inira xa̱ʼa̱ ña̱yóʼo;
va̱ása chíndayáʼvikana na̱ se̱ʼera soo va̱ása kúnda̱a̱-inira xa̱ʼa̱ ña̱yóʼo.
22 Ta̱ xóʼvi̱va* kúúra nani tákura;
ta̱ ndóʼo-iniva kúúra nani tákura”.