Job
15 Ta̱ Elifaz ta̱ temanita nda̱kuiinra ta ni̱ka̱ʼa̱nra ña̱yóʼo:
2 “¿Á kivi ndakuiin iin na̱ ndíchi xíʼin tu̱ʼun ña̱ va̱ása ndáyáʼvi?
¿Á xa̱a̱-inina* xíʼin ta̱chí ña̱ va̱xi chí nu̱ú kíta ñu̱ʼu?*
3 Va̱ása ndáyáʼviví ña̱ nda̱ʼyi̱na nu̱ú iin na̱ yiví tá su̱ví tu̱ʼun va̱ʼa kúú ña̱ xíniñúʼuna
ta ni va̱ása chíndeétáʼanví ña̱ káʼa̱nna xíʼin inkana.
4 Saáchi yóʼó va̱ása chíndeétáʼún xíʼin inkana ña̱ ixato̱ʼóna Ndióxi̱
ta xa̱ʼa̱ ña̱yóʼo va̱ása ndákanikaxi̱nína xa̱ʼa̱ Ndióxi̱.
5 Tu̱ʼun ña̱ káʼún náʼa̱ña ña̱ kúúmiíún ku̱a̱chi
ta viíní nándukún tu̱ʼun ña̱ ka̱ʼún ña̱ va̱ʼa sandáʼviún.
6 Su̱ví yi̱ʼi̱ kúú ta̱ chíkaa̱ ku̱a̱chi yóʼó chi ña̱ káʼún kúú ña̱ chíkaa̱ ku̱a̱chi yóʼó;
tu̱ʼun ña̱ káʼún kúú ña̱ chíkaa̱ ku̱a̱chi yóʼó.
7 ¿Á yóʼó kúú ta̱ siʼna ka̱ku nu̱ú ndiʼi na̱ yiví?
¿Á siʼnaka yóʼó ka̱ku nu̱ú xi̱kí?
8 ¿Á xíniso̱ʼovaún ña̱ nátúʼun Ndióxi̱ ña̱ kǒo xíniñúʼu kunda̱a̱-ini inkana xa̱ʼa̱?
¿Á iinlá yóʼó kúú ta̱ kúúmií ña̱ ndíchi?
9 ¿Ndáaña xíni̱ yóʼó ña̱ kǒo xíni̱ ndi̱ʼi̱ xa̱ʼa̱?
¿Á íyo iin ña̱ xíni̱ yóʼó ña̱ kǒo kúnda̱a̱-inindi̱ xa̱ʼa̱?
10 Xíʼinndi̱ ndóo na̱ xa̱a̱ chée na̱ xa̱a̱ ku̱vixi xi̱ní,
xíʼinndi̱ ndóo na̱ xa̱a̱ chéeka nu̱ú yiváún.
11 ¿Á kǒo xáa̱-iniún* xa̱ʼa̱ ña̱ sándi̱ko Ndióxi̱ iniún?
¿Á kǒo xáa̱-iniún xíʼin tu̱ʼun va̱ʼa ña̱ káʼa̱nna xíʼún?
12 ¿Nda̱chun ni̱nuní kúniún ta va̱ása vií ndákanixi̱níún?
¿Nda̱chun xíto kue̱ʼún nu̱úndi̱?
13 Xíʼin Ndióxi̱va kúú ña̱ sáún
ta kána tu̱ʼun ña̱ va̱ása va̱ʼa yuʼún.
14 ¿Á kivi ndii* koo iin na̱ yiví nu̱ú Ndióxi̱?
¿Á kivi keʼé iin na̱ yiví ña̱ nda̱kú?
15 Kuniso̱ʼo, Ndióxi̱ va̱ása ndáa-inira na̱ ángel na̱ kúúmiíra,
ta ni ndiví va̱ása ndiiña nu̱ú Ndióxi̱.
16 Kachikaví na̱ yiví na̱ kéʼé ña̱ kini, na̱ kúndasíra xínira,
na̱ kúni̱ní keʼé ña̱ va̱ása va̱ʼa nda̱a̱ táki̱ʼva kéʼé na̱ kúni̱ní koʼo ti̱kui̱í.
17 Ná ka̱ʼi̱n iin ña̱ʼa xíʼún, ña̱kán kuniso̱ʼo ña̱ ka̱ʼi̱n.
Natúʼi̱n xíʼún xa̱ʼa̱ ña̱ xa̱a̱ xi̱nii̱,
18 ña̱ na̱túʼún na̱ ndíchi, ña̱ va̱ása níchise̱ʼé yuʼúna xa̱ʼa̱,
ña̱ na̱túʼun na̱ yivána xíʼinna.
19 Iinlá kuití na̱yóʼo kúú na̱ nda̱kiʼin ñuʼú ña̱ ta̱xina ndaʼa̱na,
ta nda̱a̱ ni iin na̱ inka ñuu va̱ása níya̱ʼana kán.
20 Ndiʼi ki̱vi̱ xóʼvi̱* na̱ ndi̱va̱ʼa-ini,
ta ndiʼi ku̱i̱ya̱ ña̱ tákuna íyo tu̱ndóʼo nu̱úna.
21 Xíniso̱ʼona ña̱ i̱yoní xáa̱ ta yíʼvina,
tá va̱ʼaní ndóona, inkana ndákiʼinna ña̱ʼana ku̱a̱ʼa̱n xíʼinna.
22 Va̱ása kándíxana ña̱ kivi sa̱ñána ndaʼa̱ tu̱ndóʼo ña̱ va̱xi nu̱úna;
na̱ ndátu kuvi xíʼin espada kúúvana.
23 Ni va̱ása xíni̱na ndáa míí ku̱ʼu̱nna nandukúna ña̱ kuxuna..., ¿ndáa míí ndani̱ʼínaña?
Kúnda̱a̱-inina ña̱ xa̱a̱ va̱xi ki̱vi̱ ña̱ kundoʼona tu̱ndóʼo.
24 Yíʼvina xa̱ʼa̱ ña̱ ndíʼi̱-inina ta saátu xa̱ʼa̱ ña̱ xóʼvi̱na,
ña̱yóʼo va̱xiña nu̱úna nda̱a̱ táki̱ʼva va̱xi iin rey ta̱ xa̱a̱ íyo tu̱ʼva ña̱ kanitáʼanra.
25 Saáchi na̱yóʼo íyona contra Ndióxi̱
ta kúni̱na kotondosóna Ndióxi̱ ta̱ kúúmií ndiʼi ndee̱;
26 so̱ʼonína ta ku̱a̱ʼa̱nna contrara,
níʼina escudo ña̱ kúkun* ña̱ ndeéní.
27 Ni̱nuní kúnina ta xa̱ʼa̱ ña̱ ku̱i̱ká ña̱ kúúmiína ndu̱nduʼúna;
28 na̱yóʼo ndóona ñuu ña̱ ndiʼi-xa̱ʼa̱,
ndóona veʼe nu̱ú va̱ása kundooka na̱ yiví,
ta ña̱yóʼo nduuña iin koʼndo yu̱u̱.
29 Va̱ása ndukúikána ta ni va̱ása kayana ku̱a̱ʼání ña̱ʼa;
ta ndiʼi ña̱ʼa ña̱ kúúmiína ndiʼi-xa̱ʼa̱ña nu̱ú ñuʼú.
30 Va̱ása ka̱kuna nu̱ú tu̱ndóʼo;
koona nda̱a̱ táki̱ʼva íyo iin yitu̱n tú xíxi̱ ndaʼa̱, ña̱ sa̱kán va̱xinana,
ta kaʼní Ndióxi̱ na̱yóʼo.
31 Ná va̱ása sandáʼvina miína
ta ná va̱ása kundaa-inina ña̱ʼa ña̱ va̱ása ndáyáʼvi,
saáchi va̱ása ndáyáʼviví ña̱ ndakiʼinna;
32 xa̱a̱ ku̱nu̱mí kundoʼona ña̱yóʼo,
ta koona nda̱a̱ táki̱ʼva íyo ndaʼa̱ iin yitu̱n nu̱ú va̱ása kána yita.
33 Koona nda̱a̱ táki̱ʼva íyo tú uva tú kóyo tí uva ndaʼa̱ tí ta̱ʼán chi̱chi
ta saátu koona nda̱a̱ táki̱ʼva íyo tú olivo tú kóyo yita ndaʼa̱.
34 Saáchi kǒo miíví ña̱ va̱ʼa kéʼé na̱ ndi̱va̱ʼa-ini,
ta koko* veʼe válí na̱ kútóoní kiʼin xu̱ʼún ndaʼa̱ inkana ña̱ keʼéna ña̱ va̱ása va̱ʼa.
35 Ndákani-inina keʼéna ña̱ va̱ása va̱ʼa ta xa̱ʼa̱ ña̱kán xáa̱na kéʼéna ña̱ sáxo̱ʼvi̱ inkana,
ta ndiʼi tiempo ndákanixi̱nína ña̱ sandáʼvina”.